Ullut tamaasa Jehova pisariaqartitatsinnik isumaginnittarpoq

„Ernumaqinasi. . . . Ataatassi nalunngilaa tamakku pisariaqartikkisi.“ — LUKASI 12:29, 30.

1. Jehovap uumasut qanoq pilersorpai?

QUPALORAARSUK timmiarluunniit alla nunami nerisassarsiortoq isiginnaarsimaviuk? Sumik nassaassanersoq immaqa eqqarsaatigaat. Qaqqami oqaluutsimini Jiisusip takutippaa Jehovap timmissanik qanoq isumassuisarnera ilinniarfigisinnaagipput. Ima oqarpoq: „Qilaap timmiai isigeriarsigit; siaruarterinatillu katersuinngillat quinullu qimatulinatik, Ataatassilu qilammiittup nerisittarpai. Ilissili taakkunannga pingaarnerujussuunnginnerpisi?“ (Matthæusi 6:26) Jehovap pinngortitami tamarmik inuussutissaannik isumassueriaasia tupinnangaarpoq. — Tussiaat 104:14, 21; 147:9.

2, 3. Jiisusip ullormut inuussutissat pillugit qinusarnissamik uagutsinnut ilinniartitsissutaa anersaakkut ittunik sunik ilinniutissartaqarpa?

² Taavami sooq Jiisusip qinunermut najoqqutassiissutiminut uku ilannguppai: „Inuussutissatsinnik ullumi tunisigut“? (Matthæusi 6:11) Qinnummit paasiuminartumit tamatumannga ilinniutissat anersaakkut ittut pingaarutillit ersersinneqarput. Siullermik, eqqaasinneqarpugut Jehova pilersuisuusoq anneq. (Tussiaat 145:15, 16) Inuit naatitassanik ikkussuisinnaapput imerterillutillu, Guutilli kisimi naajartortissinnaavai, aamma anersaakkut ittunut tunngatillugu taamaappoq. (1 Korinthimiut 3:7) Nerisartakkavut imertakkavullu Guutimit tunissutaapput. (Apustilit Suliaat 14:17) Ullormut pisariaqartitatsinnik qinusarnitta ersersittarpaat tamakku taamaattussaannartut isiginngikkivut. Sulisinnaaguttalu qinnutip taamaattup soorunami sulinissatsinnut akisussaaffiianngilaatigut. — Efesosimiut 4:28; 2 Thessalonikamiut 3:10.

³ Aappassaanik, „inuussutissatsinnik“, imaluunniit Ny Verden-Oversættelsen naapertorlugu „ullormi matumani inuussutissatsinnik“, qinusariaqarnitta ersersippaa siunissaq pillugu ingasaallugu isumakuluttariaqanngitsugut. Jiisusi nangilluni ima oqarpoq: „Isumakuluuteqassanngilasi ima aperalusi: Suna nerissavarput? Suna imissavarput imaluunniit suna atissavarput? Tamakku tamaasa Guutimik nalusut ujartarpaat, ataatassilu qilammiittup nalunngilaa tamakku tamaasa pisariaqartikkisi. Guutilli naalagaaffia iluarneralu ujaqqaarsigit, taava tamakku tamarmik ilanngullutik ilissinnut tunniunneqarumaarput. Taamaattumik aqagussaq isumakuluutigeqinasiuk; aqagussaq nammineq piminik isumakuluutissaqassaaq.“ (Matthæusi 6:31-34) „Ullormi matumani inuussutissatsinnik“ qinnut najoqqutassaqalersitsivoq qanoq pisariitsumik inuusoqarsinnaaneranik ’Guutimik mianerinnilluni naammagittarlunilu’. — 1 Timotheusi 6:6-8.

Ullormut anersaakkut inuussutissat

4. Anersaakkut nerisarnerup pingaaruteqarnera Jiisusip Israelikkullu inuuneranni qanoq erseqqissarneqarpa?

⁴ Ullormut inuussutissavut pillugit Guuti qinnuigigaangatsigu aamma uagutsinnut eqqaasitsissutaasariaqarpoq inuussutissanik anersaakkut ittunik ullut tamaasa pisariaqartitsinitsinnut. Allaat Jiisusi ullorpassuarni iisinnginniareerluni kaattorujussuullunilu Saatanip ujarak timiusanngorteqqullugu usserniaraluarmani itigartippaa. Ima oqarpoq: „Allassimavoq: ’Inuup timiusaannaq inuussutissarinngilaa, oqaaserli sunaluunniit Guutip qarnanit anisoq’.“ (Matthæusi 4:4)  Tassani Jiisusip issuarpaa pruffiiti Mosesi, Israelikkunnut ima oqartoq: „[Jehovap] makitanaveersarpaatit kaatsillutit. Taavali nerisassippaatit mannanik illit siuaasavillu ilisimanngisassinnik. Taamaalillusi paasitinniarpaatit inuup timiusaannaq inuussutiginngimmagu, oqaaserli sunaluunniit [Jehovap] qarnanit anisoq inuussutigisarmagu.“ (5 Mosesi 8:3) Israelikkut Jehovamit mannamik tunineqaramik nerisassaqalerlutillu anersaakkut ilinniartinneqarput. „Ullormut pisariaqakkaminnik katersuiartortassapput.“ Ullormut pisariaqartitatik sinnerlugit katersuigaangamik sinnikui tippattarput, quperlunillutillu. (2 Mosesi 16:4, 20) Ullulli arfernanni taamatut pisoqarneq ajorpoq Israelikkut aamma sabbatikkut pisariaqartitatik isumaginiarlugit marloriaammik katersuisariaqaraangata. (2 Mosesi 16:5, 23, 24) Taamaalilluni manna taakkununnga sunniuteqarluartumik eqqaasitsissutaavoq naalattuusariaqarnerannik timiusaannaanngitsullu aammattaarli ’suulluunniit Jehovap qarnanit anisup’ inuunerannut aalajangiisuusussaaneranik.

5. Jehovap qanoq ullut tamaasa anersaakkut inuussutissaqartippaatigut?

⁵ Taamatulli anersaakkut inuussutissanit Jehovap ernini aqqutigalugu pilersitaanit nakussatsinneqarnissarput ullut tamaasa pisariaqartipparput. Tamanna siunertaralugu Jiisusip „kiffaq ilumoortoq silatoorlu“ toqqarpaa inoqutigiit uppertut ’nerisassaannik piffissaq eqqorlugu’ pilersuisussatut. (Matthæusi 24:45) Kiffaq aalajaatsoq taanna anersaakkut inuussutissanik Biibilimik atuaqqissaaqatigiissutissanik naammattorsuarnik pilersuiinnanngilaq, aammattaarli ullut tamaasa Biibilimik atuartarnissatsinnik kajumissaarivoq. (Josva 1:8; Tussiaat 1:1-3) Jiisusitulli anersaakkut nakussatsinneqarsinnaavugut ullut tamaasa Jehovap piumasaa suunersoq ilinniarniarsaralugulu malinniarsarigutsigu. — Johannesi 4:34.

Ajortulianik isumakkeerfigineqarneq

6. Suut isumakkeerfigeqqullugit qinusarpugut, Jehovallu qinnuterput akissaguniuk sunik piumasaqaateqarpa?

⁶ Qinnummi najoqqutassaasumi tulliullugu qinnutigineqartoq imaappoq: „Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.“ (Matthæusi 6:12) Uani Jiisusip aningaasanik akiitsugaqarneq pinngilaa. Eqqarsaatigaali ajortinik isumakkeerfigineqarnissaq. Lukasip allagaani qinnut najoqqutassaasoq ima oqaasertaqarpoq: „Ajortitsinnik isumakkeerfigitigut, uaguttaarmi kinaluunniit uagutsinnut akiitsortoq isumakkeerfigaarput.“ (Lukasi 11:4) Tassa ajortulioraangatta Jehovamut akiitsoqalersarpugullusooq. Guuterpulli asannittoq piareersimavoq akiitsukkatta tamatuma ’piiarnissaanut’, imaluunniit akilernissaanut, ilumoorluta peqqissimigutta allamillu isumataarluta, saakkutta Kristusillu utertitsissutitut pilliutaanik uppernerput tunngavigalugu isumakkeerfigeqqulluta qinugutta. — Apustilit Suliaat 3:19; 10:43; 1 Timotheusi 2:5, 6.

7. Sooq isumakkeerfigineqarnissaq ullut tamarluinnaasa qinnutigisariaqarparput?

⁷ Ajortuliornerput aamma isumaqarpoq Jehovap naapertuilluarnermut najoqqutassiai unioqqutikkivut. Ajorti kingornuttagaq pissutigalugu tamatta oqaatsikkut, iliuutsikkut eqqarsaatikkullu kukkusarpugut, iliuuserisariaqaraluakkatsinnilluunniit iliuuseqanngitsoortarluta. (Oqaluussisartup oqaasii 7:20; Romamiut 3:23; Jaaku 3:2; 4:17) Tassa ullup ingerlanerani ajortuliornerput sianigigaluarutsigu sianiginngikkaluarutsiguluunniit ajortuliatsinnik isumakkeerfigineqarnissarput ullut tamarluinnaasa pisariaqartipparput. — Tussiaat 19:13; 40:13.

8. Isumakkeerfigeqqulluta qinugutta qanoq iliortariaqarpugut, qanorlu iluaqutaasumik kinguneqassava?

⁸ Ilumoorluni imminut misissoreerluni, peqqissimereerluni, allamik isumataareerluni ajortuliaminillu nassuerutiginnereerluni isumakkeerfigineqarnissamik qinusoqarsinnaavoq Jiisusip aavata utertitsissutaaneranik upperinninnini tunngavigalugu. (1 Johannesi 1:7-9) Ilumoorluta takutinniarlugu isumakkeerfigineqarnissamik qinnutivut ’sulianik allamik isumataarnerup piumasarisaanik’ malitseqartariaqarput. (Apustilit Suliaat 26:20) Taava tatigisinnaavarput Jehova ajortitsinnik isumakkeerfiginnikkumassasoq. (Tussiaat 86:5; 103:8-14) Kingunerissavaa isumakkut eqqissineq nalissaqanngitsoq, tassa ’eqqissineq Guutimit pisoq siuneqassusernit  tamanit annerungaartoq’, eqqissinerullu tamatuma ’uummativut eqqarsaativullu sernigissavai Kristusi-Jiisusimi’. (Filippimiut 4:7) Ajortitsinnilli isumakkeerfigineqarsinnaanngorumalluta qanoq iliortariaqarnitsinnik Jiisusip qinunermut najoqqutassiaa suli allamik ilikkagaqarfigaarput.

Isumakkeerfigineqassagutta allat isumakkeerfigisariaqarpavut

9, 10. (a) Jiisusip qinunermut najoqqutassaasoq qanoq oqaaseqarfigaa, tamatumalu suna erseqqissarpaa? (b) Allanik isumakkeerfiginnittuusariaqarnerput ersersinniarlugu Jiisusi qanoq assersuusiorpa?

⁹ Soqutiginarpoq qinunermut najoqqutassaasumit qinnutigineqartuni „akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut“ kisiat Jiisusip itisilermagu. Qinnut naariarlugu ima nangippoq: „Inuimmi unioqqutitsinerinik isumakkeerfigigussigit, taava Ataatassi qilammiittup aamma ilissi isumakkeerfigissavaasi. Inuilli isumakkeerfiginngikkussigit, taava aamma Ataatassi unioqqutitsinissinnik isumakkeerfigissanngilaasi.“ (Matthæusi 6:14, 15) Taamaalilluni Jiisusip erseqqilluinnartumik oqaatigaa Jehovap isumakkeerfigissagaatigut aatsaat allat isumakkeerfigiumasarutsigik. — Markusi 11:25.

¹⁰ Piffissami allami Jiisusi erseqqissaataasumik assersuusiorpoq Jehovamit isumakkeerfigineqarnissarput kissaatigigutsigu allanut isumakkeerfiginnittuusariaqartugut. Oqaluttuaraa kunngi naakkinnilluni kiffami ilaata akiitsorpassuinik isumakkeerisoq. Kingusinnerusukkut kunngip kiffaq taannarpiaq pillarpaa kiffaqammi akiitsugamininnguinik isumakkeerfiginnikkumanngimmat. Jiisusip assersuutini ima naavaa: „Taamatuttaaq Ataatama qilammiittup ilarsi kinaluunniit pissavaa qatanngutini uummatimigut isumakkeerfiginngippagu.“ (Matthæusi 18:23-35) Ilinniartitsissutaa erseqqippoq: Tamatta immikkut akiitsuvut, ajortuliavut, Jehovamit isumakkeerfigineqartut amerlanerungaarput inuup allap uagutsinnut qanorluunniit ittumik ajortuliarisinnaasaanit. Aammattaaq Jehovap ullut tamarluinnaasa isumakkeerfigisarpaatigut. Taamaattumik soorunami allat ilaannikkut uagutsinnut ajortuliarisartagaannik isumakkeerfigisariaqarpavut.

11. Jehovamit isumakkeerfigineqarusukkutta Paulusip siunnersuutaa suna malittariaqarparput, qanorlu kinguneqassava?

¹¹ Apustili Paulusi ima allappoq: „Immissinnut ajunngitsuliorfigigitsi nallittuillusilu,  isumakkeerfigeqatigiittaritsilu soorlu Guutip Kristusimi isumakkeerfigigaasi.“ (Efesosimiut 4:32) Kristumiut isumakkeerfigeqatigiittarunik akunnerminni eqqissineq siuarsassavaat. Aammattaaq Paulusi ima kajumissaarivoq: „Guutip qinigaasut illernartutut asanartutullu atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu. Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi. Soorlu [Jehovap] isumakkeerfigigaasi taamatuttaaq ilissi iliussaasi. Tamakkuali tamarmik qaavatigut atiniarsiuk asanninneq, tassaammat naammalluinnassutsip qilerutaa.“ (Kolossemiut 3:12-14) Tamakku tamarmik qinnummut Jiisusip uagutsinnut ilinniartitsissutigisaanut uunga ilaapput: „Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.“

Usserneqaraangatta illersuutaasartoq

12, 13. (a) Qinunermut najoqqutassaasumi qinnutigineqartuni kingulliup tullia qanoq paasineqassanngila? (b) Ussiisoq anneq kinaava, qanorlu isumaqarpa ussernartumut pisinneqannginnissarput qinnutigigaangatsigu?

¹² Jiisusip qinunermut najoqqutassiaani qinnutigineqartuni kingulliup tullia imaappoq: „Ussernartumut pisinnata.“ (Matthæusi 6:13) Jiisusi isumaqarpa Jehova qinnuigissagipput usseqqunata? Taamaassinnaanngilaq, ajoqersugarmi Jaaku isumassarsisinneqarluni ima allappoq: „Usserneqarsimasumik oqartoqarniaqinani: ’Guutimit usserneqarpunga’; Guutimi ajortumit usserneqarsinnaanngilaq, namminerlu kimilluunniit ussiisanngilaq.“ (Jaaku 1:13) Tussiaasiortut ilaat ima allappoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Jehovap ajortuliavut tamarluinnaasa nakkutigeqqissaartanngilai, ajortuliortinniarsarinngilluinnarlutalu. Qinnutilli najoqqutassaasup ilaa taanna taava qanoq isumaqarpa?

¹³ Qoqassiilluni uagutsinnik ajortuliortitsiniarsarisoq, allaat uagutsinnik iisiniarsarisoq, tassaavoq Saatani Diaavulu. (Efesosimiut 6:11) Taanna tassaavoq ussiisoq anneq. (1 Thessalonikamiut 3:5) Ussernartumut piseqqunata qinunitsigut Jehova qinnuigisarparput ussernartorsiortinneqaraangatta nakkaannarnissarput akuereqqunagu. „Saatanimit nakutinneqaqqunata“ ikioqqulluta qinusarpugut ussernartunut nakkaannannginniassagatta. (2 Korinthimiut 2:11) Qinnutigisartagarput tassaavoq ’Qutsinnerussaartup toqqorsimaffianiittuarsinnaanissarput’, iliuutsimikkut tamatigut Jehovap kisimi oqartussaaneranik akuerinnittut anersaakkut illersorneqarnerattulli illersorneqarnissarput. — Tussiaat 91:1-3.

14. Apustili Paulusip qanoq neriorsoqqissaarpaatigut ussernartorsioraangata Jehova tatigisarutsigu imminiissanngikkaatigut?

¹⁴ Qularissanngilarput Jehovap imminiinngisaannassagaatigut ussernartunut nakkaannannginnissarput ilumoorluta kissaatigigutsigu qinnutitsinnilu iliuutsitsinnilu tamanna ersersittarutsigu. Apustili Paulusip ima neriorsoqqissaarpaatigut: „Usserneqaatigisimasasi inuit atortagaattut iinnarput, Guutilu unneqqarippoq; akuersaarumanngilaa artukkassinnik usserneqarnissarsi, kisianni usserneqarnermut ilagitillugu aniguiffissaq pilersissavaa artorsartitaaqqunasi.“ — 1 Korinthimiut 10:13.

„Ajortumit annaatsigut“

15. ’Ajortumit’ annaanneqarnissatsinnik qinunissaq sooq aatsaat taama pingaaruteqartigaa?

¹⁵ Kristumiut Allagaataat Grækerisuut assilillugit assammik allakkat tatiginarnerpaat naapertorlugit Jiisusip qinunermut najoqqutassiani ima naavaa: „Ajortumit annaatsigut.“ * (Matthæusi 6:13) Maanna naggatissap nalaani Diaavulumut illersorneqarnissaq aatsaat taama pisariaqartigivoq, taannami inngilipiluilu sorsupput tanitat sinnerinut, ’Guutip inassutaanik Jiisusillu nalunaajaataanik aalajangiussisunut’, taakkualu suleqataannut ’amerlangaartunut’ ilaasunut. (Saqqummersitat 7:9; 12:9, 17) Apustili Paulusip kristumiut ima oqaaqqissaarpai: „Eqiingagitsi silatusaarlusilu! Akerartortersi Diaavulu løvitut uiannisaartutut angalasarpoq iisassarsiorluni. Uppernikkut aalajaallusi assortorsiuk.“ (1 Petrusi  5:8, 9) Saatanip oqaluussinerput unitsikkusuppaa, nunamilu ikiortini — upperisarsiortuugaluarpata, niuertuugaluarpata politikeriugaluarpataluunniit — atorlugit annilaangalersinniartarpaatigut. Aalajaakkuttali Jehovap aniguisissavaatigut. Ajoqersugaq Jaaku ima allappoq: „Taamaattumik Guutimut naalatsigitinniaritsi; Diaavululu akerartorsiuk, taava ilissinnit qimaassaaq.“ — Jaaku 4:7.

16. Jehovap kiffani usserneqaraangata ikiorniarlugit suut atorsinnaavai?

¹⁶ Jehovap ernermi usserneqarnissaa akueraa. Jiisusilli Guutip oqaasia illersuutitut atorlugu Diaavulu assortoreermagu, Jehovap inngilini aallartippai nakussatseqqullugu. (Matthæusi 4:1-11) Taamatulli Jehovap inngilini atortarpai ikioqqulluta uppernikkut qinnuigigaangatsigu qimarnguigigaangatsigullu. (Tussiaat 34:8; 91:9-11) Apustili Petrusi ima allappoq: „[Jehovap] mianerinnitsini ussernartunit aniguisinneq sapinngilai, iluaatsulli parnaarussaatissavai ullormi eqqartuussivissami pillagassanngorlugit.“ — 2 Petrusi 2:9.

Aniguisitaalluinnarneq qanillivoq

17. Qinnummi najoqqutassaasumi Jiisusi eqqortumik pingaarnersiuilluni qanoq tulleriiaariva?

¹⁷ Qinunermut najoqqutassiamini Jiisusi eqqortumik pingaarnersiuilluni tulleriiaarivoq. Jehovap aqqata illernartitaanissaa uagutsinnut pingaarnerpaasariaqarpoq. Guutip tamatuminnga naammassinninnissamini sakkugisassaa naalagaaffik Missiarsikkoortuusussaammat, qinnutigisarparput Guutip naalagaaffiata tikiulluni nunami naalagaaffinnik, imaluunniit naalakkersuisunik, naammalluinnanngitsunik tamanik suujunnaarsitsinissaa, Guutillu piumasaata nunami, qilammisulli, tamakkiisumik pinissaata isumannaarneqarnissaa. Jehovap aqqata illernartitaanissaa taassumalu kisimi oqartussaanerata naapertuilluartup avataarsuani nunarsuarmilu tamarmi akuerineqarnissaa, nunarsuarmi paratiisissami naassaanngitsumik inuunissamik neriuutitsinnut aalajangiisuupput. Tamakku pingaaruteqarluinnartut qinnutigereerlugit qinnutigisinnaavavut ullormut pisariaqartitavut, ajortuliatsinnik isumakkeerfigineqarnissaq Saatani Diaavulullu ussiineranit qoqassiineranillu aniguisinneqarnissarput.

18, 19. Jiisusip qinunermut najoqqutassiaa naggatissaq tikillugu eqqumanissatsinnut neriuutittalu aalajangiussimalluinnarnissaanut qanoq iluaqutigaarput?

¹⁸ Ajortumit taassumalu pissutsinik aaqqissuussineranit ajortumit aniguisitaalluinnarnissarput qanillivoq. Saatanip nalunngilluinnarpaa nunarsuarmiunut, ingammillu Jehovap kiffaanut aalajaatsunut, ’kamarujussuarnissaminut’ „piffissakissutsi“. (Saqqummersitat 12:12, 17) „Pissutsit aaqqissuussaanerata naggatissaanut“ (NV) nalunaaqqummi katitikkami Jiisusip eqqaasamini pisussat pissanganartut siulittuutigai, ilaallu suli eqquutinngillat. (Matthæusi 24:3, 29-31) Pisussat taakku piartuaartillugit aniguisitaanissamik neriuuterput nakussatsinneqassaaq. Jiisusi ima oqarpoq: „Tamakku pilerpata nikuigitsi niaqqusilu massitsillugit aniguisitaanissarsimi qanillimmat.“ — Lukasi 21:25-28.

¹⁹ Jiisusip ajoqersukkaminut qinunermut najoqqutassiaa naatsoq erseqqissorlu maanna naggatissap qanilliartornerani sunik qinnuteqartariaqarnitsinnik siunnersuutitaqarpoq. Jehovap ullormut pisariaqartitatsinnik, anersaakkut timikkullu, naggatissaq tikivillugu isumagiumaaraatigut tatigiuartigu. Eqqumajuarutta Guutimullu qinusarluta, ’tatiginninneq aallaqqaataanili pigisarput naggatissaq tikillugu aalajangiulluinnarsinnaavarput’. — Hebræerit 3:14; 1 Petrusi 4:7.  (wE 2/1 04)

[Quppernerup ataani ilanngussaq]

Uteqqiineq

• „Ullormi matumani inuussutissatsinnik“ qinnuterput qanoq paasisariaqarpa?

• Ima qinuneq qanoq isumaqarnersoq nassuiaruk: „Akiitsukkatsinnik isumakkeerfigitigut, soorlu uaguttaaq akiitsortivut isumakkeerfigigivut.“

• Ussernartumut piseqqunata Jehova qinnuigigaangatsigu qanoq isumaqartarpa?

• ’Ajortumit annaanneqaqqulluta’ Jehovap qinnuiginissaa sooq pisariaqarpa?

[Atuaqqissaarnermi apeqqutit]

[Qupp. 17-mi assiliartaq]

Isumakkeerfigineqarusukkutta allat isumakkeerfigisariaqarpavut

[Qupp. 15-mi suminngaanneernera]

Lydekker