Uummativit paarineratigut minguitsuujuarit

„Paarisassannit tamanit annermik uummatit paariuk inuuneq tassannga aallaaveqarmat.“ — USSATIT 4:23.

1-3. (a) Inuppassuit ileqqussatigut minguitsuunertik naleqarpianngitsutut isigalugu qanoq ersersittarpaat? Assersuuteqarit. (b) Ileqqussatigut minguitsuunerup pingaaruteqarnerata paasinissaa sooq pingaaruteqarpa?

QALIPAGAQ immaqa itsarnisarpasilaarpoq. Immaqaluunniit pequtinut naleqqutinngilaq. Qanorluunniit ikkaluarpat, piginnittuata atorfissaqartissorinngilaa, atornikuerniartarfimmukaanneqarpoq tassanilu 200 kronilerlugu pisiarineqarsinnaalerluni. Ukiualuit tamatuma kingorna paasineqarpoq qalipagaq taanna kroninik 7 millioningajannik naleqartoq! Aap, tassaavoq qalipaallaqqissup qalipataa qaqutigoortoq. Takorlooriaruk piginnittuusimasoq qanoq misigisimassasoq qalipakkap nalinga minnaarujussuarsimallugu paasigamiuk!

² Kinguaassiuutinut tunngatillugu inuup ileqqussatigut minguitsuuneranut atatillugu taamaattoqarajuppoq. Ullumikkut inuppassuit ileqqussatigut minguitsuujuarnissaq naleqarpianngitsutut isigaat. Isumaqartoqarpoq ileqqussatigut najoqqutassat qutsissut itsarnisarpasittut inooriaatsimullu mutiusumut malinnaanngitsut. Ileqqussatigut minguitsuunertik akikitsuararsuanngorlugu akigisarpaat — kinguaassiuutitigut iluarusunnimininnguamut. Allat minguitsuunertik pilliutigisarpaat neriuutigalugu kammalaatiminnit imaluunniit arnaagunik angummit angutaagunilu arnamit nuannerineqarnerulernissartik. — Ussatit 13:20.

³ Inuppassuit kingusinaareerlutik paasisarpaat ileqqussatigut minguitsuujuarneq qanoq pingaaruteqartigisoq. Annaasaqarnertik aliasuutigisarpaat. Biibilimi allassimasutut inuunerlunnerup kingunera toqunartutut, „naasutut sungarnitsutut“, issinnaavoq. (Ussatit 5:3, 4) Nalitsinni ileqqorluttoqangaarnera eqqarsaatigalugu, minguitsuunerput qanoq illersorsinnaavarput, qanorlu minguitsuujuarsinnaavugut? Iliuuserisinnaasavut pingasut misissussavavut.

Uummatit paariuk

4. Uummat assersuutaasoq suua, aamma sooq paarisariaqarparput?

⁴ Ileqqussatigut minguitsuujuassagaanni uummatip paarinissaa pingaaruteqarpoq. Biibilimi ima allassimavoq: „Paarisassannit tamanit annermik uummatit paariuk inuuneq tassannga aallaaveqarmat.“ (Ussatit 4:23) Uummat paarineqartussaq uani pineqartoq suua? Eqqarsaatigineqartoq tassaavoq uummat assersuutaasoq, tassa inuup ilorpiaa — eqqarsaatai, misigissusii pissutiginiagaalu. Biibilimi ima allassimavoq: „[Jehova] Guutit asassavat uummatikkut iluunngarlutit tarnikkullu iluunngarlutit nukitillu tamakkerlugit.“ (5 Mosesi 6:5) Jiisusi oqarpoq inatsit taanna tamanit annerusoq. (Markusi 12:29, 30) Erseqqilluinnarpoq uummaterput assersuutaasoq erlinnangaartuusoq. Paarinissaa imminut akilersinnaavoq.

5. Uummat qanoq ililluni navianartuusinnaallunilu pingaaruteqartuusinnaava?

⁵ Aammattaarli Biibilimi allassimavoq ’tamanit annerusumik uummat tatigisassaanngitsuusoq’. (Jeremia 17:9) Qanoq ililluni uummat tatigisassaanngitsuusinnaava — uagutsinnut navianartuulluni? Assersuutigisinnaavarput biili iluaqutaangaarsinnaasoq  ajornartoorfimmilu inuunermik annaassiniarnermi iluaqutaasinnaasoq. Aquttuatali aquttuaannanngippagu, biili taannapiaq navianartorsiortitseriaannaavoq. Uummatit paarinngikkukku pilerissutsinnit periataartarninnillu aqunneqarluinnalissaatit, tamannalu ajunaarutaangaarsinnaavoq. Guutip oqaasiani ima allassimavoq: „Silaqassutsiminik [Uummatiminnik, NV] tatiginnittoq sianiitsuuvoq, ilisimassusermilli pigisaqarluni inuusoq annaanneqartussaavoq.“ (Ussatit 28:26) Aap, ilisimassuseqarlutit inuusinnaavutit ajunaarnissaraluarlu pinngitsoortillugu Guutip oqaasianit siulersortikkuit, angalalertinnak nunap assinganik misissuisarnittulli. — Tussiaat 119:105.

6, 7. (a) Illernassuseq suua, aamma sooq Jehovap kiffaasa illernartuunissaat pingaaruteqarpa? (b) Inuit naammalluinnanngitsut Jehovap illernassusia ersersissinnaagaat qanoq nalunngilarput?

⁶ Ileqqussatigut minguitsumik inuunissaq uummatitta pissusissamisoortutut isigiuaannarnavianngilaa. Taamaattumik aquttariaqarparput. Ilaatigut taamaaliorsinnaavugut ileqqussatigut minguitsuujuarnissap pingaaruteqarnera eqqarsaatigalugu. Ileqqussatigut minguitsuuneq illernassusermut attuumassuteqarluinnarpoq. Illernartuusoq minguitsuuvoq ajortimillu immikkoorluni. Illernassuseq pissusiuvoq erlinnangaartoq Jehova Guutillu pissusiinut ilaalluinnartoq. Allassimaffinni hundredelikkuutaani pissuseq tamanna Jehovamut atassuserneqarpoq. Biibilimi ima allassimavoq: „Jehovap illernassuseq pigaa.“ (2 Mosesi 28:36, NV) Pissuserli taanna nalinginnarisassaanngitsoq uagutsinnut inunnut naammalluinnanngitsunut qanoq attuumassuteqarami?

⁷ Oqaatsimini Jehova ima oqarpoq: „Illernartuussaasi uanga illernartuugama.“ (1 Petrusi 1:16) Aap, Jehovap illernartuunera ilaarsinnaavarput; taassuma isaani minguitsuusinnaavugut, ileqqorissuujuarsinnaavugut. Minguttuunik ileqqoqarnaveersaartarutta, ersersissavarput nersornartumik nuanningaartumillu immikkut pisinnaatitaaffeqartunut, tassa Guutip qutsinnerussaartup pissusianik nuannersumik ersersitsisunut, ilaarusulluta! (Efesosimiut 5:1) Isumaqarutta uagutsinnut tamanna ajornartuusoq kukkunerussaaq, Jehovami Naalagaavoq silatooq inorsartitsisanngitsorlu sapikkatsinnik piumasaqanngisaannartoq. (Tussiaat 103:13, 14; Jaaku 3:17) Nassuerutigisariaqarpoq anersaakkut ileqqussatigullu minguitsuujuassagaanni ilungersuuteqartoqartariaqartoq. Taamaattoq apustili Paulusi allappoq ’Messiarsi ilumoorfigineqartussaasoq taannalu pillugu minguitsuusoqartariaqartoq’. (2 Korinthimiut 11:3, NV) Jiisusi Kristusi taassumalu Ataataa pillugit ileqqussatigut minguitsuujuarniarluta sapinngisarput tamaat iliuuseqartariaqannginnerpugut? Ilumoortumik oqaatigissagaanni taakkua uagutsinnut asannittuliungaarnerat tamakkiisumik akiniarsinnaanngissaannassavarput. (Johannesi 3:16; 15:13) Naleqqulluinnassaaq qujamasunnitsinnik ersersitsinissarput ileqqussatigut minguitsumik inuunitsigut. Ileqqussatigut minguitsuunerput taamatut isiginnittaaseqarfigigutsigu pingaartissavarput uummaterpullu paarissallugu.

8. (a) Uummat assersuutaasoq qanoq nakussatsissinnaavarput? (b) Oqaluuserisartakkatta suna ersersittarpaat?

⁸ Aammattaaq uummaterput paarisarparput isumatta sumik imerneranik eqqumaffiginnilluta. Aalajangersimasumik isumatta uummatittalu anersaakkut inuussutissanik ajunngitsunik nakussatsittarnissaat Guutillu naalagaaffia pillugu nutaarsiassap nuannersup eqqarsaatigisarnerunissaa pisariaqartippavut. (Kolossemiut 3:2) Tamanna aamma oqaloqatigiinnitsinni tusaaneqarsinnaasariaqarpoq.  Uinimmut tunngasunik ileqqorluttuliornerillu pillugit oqaluuserinnittartutut ilisimaneqarutta, tamanna uummatitta qanoq ittuuneranik ersersitsivoq. (Lukasi 6:45) Taama ilisimaneqarnata anersaamut tunngasunik ineriartornartunillu oqaluuserinnittartutut ilisimaneqarta. (Efesosimiut 5:3) Uummatip paarineranut atatillugu sualuttumik navianartorsiortitsisinnaasunik pinaveersaagaqartariaqarpugut. Taakku ilaat marluk misissoriartigik.

Kinguaassiuutitigut inuunerlunneq qimarratigiuk

9-11. (a) Ny Verden-Oversættelsen naapertorlugu Korinthimiunut allakkat siullit 6:18-imi siunnersuummik sumiginnaasut sooq inuunerlunnermut akuliuteriaannaaneruppat? Assersuuteqarit. (b) Kinguaassiuutitigut inuunerlunneq qimarratigissagutsigu suut nigorsimaniassavavut? (c) Jobi aalajaatsoq qanoq maligassiuilluarpa?

⁹ Jehovap apustili Paulusi isumassarsisillugu allatsippaa siunnersuummik inuppassuit uummatiminnik paarsinerminni ileqqussatigullu minguitsuujuarniarnerminni iluaqutigisaannik. Paulusi ima allappoq: „Kinguaassiuutitigut inuunerlunneq nigorsimaniarsiuk [qimarratigisiuk, NV]!“ (1 Korinthimiut 6:18) Malugiuk Ny Verden-Oversættelsen naapertorlugu ima allaannanngilaq: „Nigorsimaniarsiuk.“ Kristumiut iliuuseqarnerusussaapput. Inuunerlunnerit qimarratigisussaavaat, inuunermik navianartorsiortitsisunit qimarratiginninnermittut. Siunnersuut sumiginnarutsigu, ilungersunartumut soorlu inuunerlunnermut akuliuttooriaannaanerussaagut Guutimillu iluarisaajunnaariaannaalluta.

¹⁰ Ima assersuusiortoqarsinnaavoq: Anaanaasup erninnguani asattoriarlugu nalliuttorsiornissamut kusanartunik atisalersorpaa. Erneq aperivoq ilaqutariit tamarmik piareernissaasa tungaanut silami pinnguarsinnaanerluni, akueritippoq — piumaffigineqarlunili. Arnaata ima oqarfigaa: „Taseraq qanillissanngilluinnarpat. Ipertikkuit, naveersissaatit.“ Kinguninnguali arnaata takulerpaa uppeqqajaalluni taseraq naloraarfigingajattaqattaaraa. Ippanngilaq — suli. Taseqqamulli qanillinnginnissamut anaanami mianersoqqussutaa sumiginnarpaa, isitalaarnissaalu ilimanarluinnarpoq. (Ussatit 22:15) Inuusuttorpassuit inersimasorpassuillu ilisimasaqarnerusariaqarluartut tamatumunnga assingusumik kukkussuteqartarput. Qanoq?

¹¹ Ullumikkut, inuppassuarnut ’[atoqatigiinnissamut] pileritsannernut narrunarsaataasunut’ nakkaannarfiusumi, nioqqutissiorfissuaqalersimavoq piumasamik atoqateqarsinnaaneq siuarsarniarlugu. (Romamiut 1:26, 27) Tiingasulersaarutit nappaassuartut atuagassiat, atuakkat, videofilmit internettilu sunneqqavaat. Oqartoqarsinnaanngilluinnarpoq taamaattunik isummaminnut ammaassisut kinguaassiuutitigut inuunerlunneq qimarratigigaat. Biibilimi mianersoqqussut sumiginnarpaat inuunerlunnerup pinnguarineratigut ’naloraarfigingajattarneratigullu’. Uummatertik paarinngilaat, toqunartulertutulli ippaat  immaqa ukiut arlallit aatsaat qaangiuppata eqqarsaatiminnit peertussanik. (Ussatit 6:27) Jobi aalajaatsoq, isiminik ’isumaqatigiissuteqarfiginnissimasoq’, ilinniarfigisigu. Isini ilumoorsaarluni isumaqatigiissuteqarfigai eqqunngitsuliornissamut ussernartorsiortitsisinnaasunik isigisaqannginniarluni. (Jobi 31:1) Ilumut, maligassaalluartuuvoq.

12. Kristumiut aappassiariit qanoq ’kinguaassiuutitigut inuunerlunneq qimarratigisinnaavaat’?

¹² Ingammik aappassiariinnermi kinguaassiuutitigut inuunerlunnerup qimarratiginissaa pingaaruteqarpoq. Aappassiariinneq nuannersuusariaqarpoq neriuffiungaartoq isumalluarfiungaartorlu, inuusuttulli aappassiariit ilaasa inuunerlunnermik pinnguarinnillutik aserortarpaat. Taamaalillutik aserortarpaat aappariilluarnermut tunngavissaq pitsaanerpaaq — attaveqartigiinneq asanninnermik namminissarsiunngitsumik, imminut naalakkersinnaanermik Jehova Guutimullu naalannermik tunngavilik. Kristumiut aappariit aappassiariinnerminni ileqqussatigut minguitsuujuarsimanngillat. Katereerlutik nuliaasup nassuerutigaa ilerasuutigingaarlugu allaallu ullormi katiffimminni nuannaarsinnaasimanani. Ima oqarpoq: „Isumakkeerfigeqqullunga Jehova amerlasoorpassuariarlunga qinnuigisarpara, ukiulli arfineq-marluk qaangiutereeraluartut suli ilerasuutigaara.“ Taamatut ajortuliortut utoqqaanertanut kristumiunut ikiortissarsiornissaat pingaaruteqarpoq. (Jaaku 5:14, 15) Kristumiulli aappassiariippassuit aappassiariinnerminni silatusaarlutik navianartorsiornaveersaartarput. (Ussatit 22:3) Asanninnerminnik qanoq imminnut ersersitsinissartik killilertarpaat. Avinngarusimasumiikkaangamik marluinnaanaveersaaqqissaartarput pingajoqartuaannarlutillu.

13. Sooq kristumiut Jehovamut kiffaanngitsumik peerartaarnialertariaqanngillat?

¹³ Kristumiup Jehovamut kiffaanngitsumik peeraqalersup ajornartorsiungaalernissaa ilimanarpoq. Jehova Guutimut asanninngitsumut qanoq ililluni ungakkiussisoqarsinnaagami? Pingaaruteqarpoq kristumiup Jehovamik asannittumik ileqqorinnissamullu najoqqutassiaanik ataqqinnittumik taamaallaat aappartaarnissaa. Guutip oqaasiani ima siunnersuuteqarpoq: „Uppinngitsut qamutinik uniaqatiginiaqinasigik! Iluarnerummi inatsisaanneq sukkut peqatiginerpaa? Qaamasoq taartorlu sukkut assigiissuteqarpat?“ — 2 Korinthimiut 6:14.

14, 15. (a) „Kinguaassiuutitigut inuunerlunneq“ ilaasa qanoq paatsoorsimavaat? (b) Iliuutsit suut ‘kinguaassiuutitigut inuunerlunneruppat’, qanorlu kristumiut ‘kinguaassiuutitigut inuunerlunneq qimarratigisinnaavaat’?

¹⁴ Kinguaassiuutitigut inuunerlunneq qimarratigissagaanni suunersoq ilisimasariaqarpoq. Ullumikkut silarsuatsinni inuppassuit „kinguaassiuutitigut inuunerlunneq“ eqqunngitsumik paasisarpaat. Isumaqarput atoqatigiinngiinnarlutik katissimanatik kinguaassiuutitigut pilerissutsiminnik naammassinnissinnaallutik. Allaat siunnersortit ataqqisaasut, inuusuttuaqqat kissaatiginngisamik naartulertarnerinik ikilisaaniartut, inuusuttunik kajumissaarisarput atoqatigeeriaatsit naartulernanngitsut atortaqqullugit. Siunnersuinerlunneruvorli. Ileqqussatigut minguitsuujuarneq katissimanngikkaanni naartunaveersaarnerinnaanngilaq. „Kinguaassiuutitigut inuunerlunneq“ taama nassuiaatikitsiginngilaq.

¹⁵ Grækerit oqaasiat porneiʹa, „kinguaassiuutitigut inuunerlunneq“-mik nutserneqartartoq, arlalinnik isumaqarsinnaavoq. Tamatumunnga ilaavoq katissimanngitsut akornanni kinguaassiuutitigut attaveqatigiinnerit, kinguaassiuutinillu  atornerluineq pineqarluni. Porneiʹa-mut aamma ilaapput qanikkut itikkullu atoqatigiinneq inummillu allamik assani atorlugu inertitsineq — iliuutsit atortittartut illuutaannut attuumassuteqartinneqartartut. Isumaqartoqaruni taamaattut ’kinguaassiuutitigut inuunerlunnerunngitsut’ imminut salloqittarput Saatanillu nigaliaanit napitiffigitissimallutik. (2 Timotheusi 2:26) Aammattaaq ileqqussatigut minguitsuujuarneq kinguaassiuutitigut inuunerlunnermik taaneqarsinnaasunik iliuuseqarnaveersaarnerinnaanngilaq. ’Kinguaassiuutitigut inuunerlunneq qimarratigissagutsigu’ ingalassimasariaqarpavut kinguaassiuutitigut minguttuut kanngunartullu porneiʹa-mik, ajortuliamik sualuttumik, kinguneqarsinnaasut tamaasa. (Efesosimiut 4:19) Taamaallilluta ileqqussatigut minguitsuujuarsinnaavugut.

Qaninniarujoornikkut navianartorsiornaveersaarit

16. Pissutsini qanoq ittuni ajuutigiinneq pissusissamisoorpa, Biibilimilu assersuutip suup tamanna ersersippaa?

¹⁶ Ileqqussatigut minguitsuujuassagutta aamma qaninniarujuugaqarnaveersaartariaqarpugut. Isumaqartoqarsinnaavoq tamanna ajoqutaanngitsuusoq. Soorunami pissutsini eqqortuni ajuutiginninneq naleqquppoq. Assersuutigisinnaavarput Iisaap Rebekka „nuliamisut unarujooraa“ malugineqartoq, qatanngutigiiginnanngitsut erseqqippoq. (1 Mosesi 26:7-9) Aappariikkamillu asanninnerminnik imminnut nittarsaavigiinnerat pissusissamisoorluinnarpoq. Qaninniarujoornerli allaavoq.

17. Qaninniarujoorneq qanoq isumaqarpa, qanorlu taamaaliornaveersaartoqarsinnaava?

¹⁷ Qaninniarujoorneq nassuiarneqarsinnaavoq katinnissamik siunertaqarnani sukataarnertut. Uagut inuit periaaseqarpugut allanngorartorujussuarnik, qularnanngitsumillu assigiinngitsorparujussuarnik malunnarpianngitsunillu qaninniarujooriaaseqarpoq. (Ussatit 30:18, 19) Taamaattumik tamatumunnga atatillugu aalajangersimasunik najoqqutassiortoqarsinnaanngilaq. Naagga, najoqqutassanit qutsinnerusoq pisariaqarpoq — ilumoorluta imminut misissortariaqarpugut Biibilimilu najoqqutassiat peqqissaarluinnartumik malillugit.

18. Sooq ilaat qaninniarujuugaqartarpat, aamma sooq tamanna ajoqutaava?

¹⁸ Imminut ilumoorfigissagutta qularnanngitsumik amerlanersatta nassuerutigisariaqarpaat ajuutigineqarunik usorsisimaassallutik. Taama qisuariarneq pissusissamisoortuuvoq. Allamulli malugeqqusaarniaannarluta imminullu ataqqinerulerniaannarluta allamilluunniit usorsisimaartitsiniaannarluta qaninniarujoortarpugut? Taamaappat taamaaliornikkut allanik anniaatissiisinnaanerput eqqarsaatigisimavarput? Assersuutigalugu Ussatit 13:12-imi ima allassimavoq: „Sivisunaartumik pissamaarnerup uummat nappaateqalersittarpaa.“ Qaninniarujoorfigisaq qanoq misigitinnerlugu kialuunniit ilisimasinnaanngilaa. Imaassinnaavoq taanna peerariilernissassinnik immaqalu kingusinnerusukkut katinnissassinnik ilimasulersoq. Pakatsineq, tamatuma kingunerisinnaasaa, artornangaarsinnaavoq. (Ussatit 18:14) Piaaraluni allat misigissusiinik pinnguarinninneq naakkitsaatsuliorneruvoq.

19. Qaninniarujoorneq kristumiunut aappariinnut qanoq navianartorsiortitsisinnaava?

¹⁹ Ingammik pingaaruteqarpoq aappalimmik qaninniarujuuinnginnissaq. Eqqunngitsuliorneruvoq aappalimmut soqutiginnilluni malugeqqusaarneq, aappallilluunniit aapparinngisaminut ajuutiginnilluni soqutiginninnera. Alianaraluartumik kristumiut ilaat isumaqarsimapput aapparinngisaminnut ajuutiginnillutik misigissutsiminnik ineriartortitsisinnaallutik. Ilaasa eqqarsaatitik ilorlerpiaat „ikinngummittut“ taasaminnut oqaluttuarisarpaat immaqalu aappartillu oqaloqatigiissutigisimanngisatik allaat tassunga oqaluttuarisarlugit.  Tamanna kinguneqartarpoq ajuutigiittut misigissutsimikkut pinngitsuuisinnaajunnaarnerannik, taamaannerlu aappariinnermik qajannarsisitsisinnaavoq allaallu aseruisinnaalluni. Kristumiut aappallit eqqaamasariaqarpaat allasiorneq pillugu Jiisusip mianersoqqussutaa silatooq, tassa allasiorneq uummammi aallartittartoq. (Matthæusi 5:28) Taamaattumik uummaterput paaritigu pissutsillu ajunaarutaasinnaasut nigorsimaniarlugit.

20. Ileqqussatigut minguitsuunerput qanoq isigisariaqarparput?

²⁰ Nassuerutigisariaqarpoq ullumikkut silarsuarmi inuunerluffiusumi ileqqussatigut minguitsuujuaannarnissaq ajornaatsuinnaanngitsoq. Eqqaamajulli ileqqussatigut minguitsuujuarneq ajornannginneerarsuusoq minguitsuuleqqinniarnerminngarnit. Soorunami Jehova ‘isumakkeerfiginnittuartuuvoq’, ajortuliaminnillu peqqissimissutiginnivissut minguiarsinnaavai. (Esaja 55:7) Inuunerluttulli iliuusiisa kingunipiluinut Jehovap illersorneq ajorpai. Kingunipilui ukiorpassuarni, aap, immaqa inuunerup sinnerani, malunnarsinnaapput. (2 Samueli 12:9-12) Qanorluunniit akeqassagaluarpat ileqqussatigut minguitsuujuarit. Uummatit paariuk, Jehova Guutimullu attaveqarnerit minguitsoq erlinnartuutitut iperanngisaannagassattut isigiuk!

Uteqqiinermi apeqqutit

• Ileqqussatigut minguitsuuneq suua, aamma sooq minguitsuujuarnissaq pingaaruteqarpa?

• Uummaterput qanoq paarisinnaavarput?

• Kinguaassiuutitigut inuunerlunnerup qimarratiginissaa qanoq isumaqarpa?

• Sooq qaninniarujuugaqarnaveersaassaagut?

[Atuaqqissaarnermi apeqqutit]

[Qupp. 21-mi assiliartaq]

Biili iluamik aqunneqanngitsoq navianarsinnaavoq

[Qupp. 22-mi assiliartat]

Mianersoqqussutit sumiginnarutsigik qanoq pisoqarsinnaava?

[Qupp. 23-mi assiliartaq]

Aappassiariinnermi minguitsuuneq Guutip ataqqinaatigissavaa, nuannaarutaassaarlu