Anersaakkut pisariaqartitsineq qanoq matussuserneqarsinnaasoq

„SULIFFEQARFIMMI imminut anersaakkut ineriartortinnissaq pillugu atuakkianik atuagaarniarfiit ukiut kingulliit qulit ingerlanerini ulikkaavissimapput. Pineqartut tassaapput atuakkat 300-t, ilaat Jesus CEO-mik ilaallu The Tao of Leadership-imik * taaguuserneqarsimasut,“ U.S.News & World Report-imi oqaatigineqarpoq. Taamaattoqarnerata ersersippaa nunani amerlasuuni pigissaarfiusuni  amerliartuinnartut anersaakkut ilitsersorneqarnissamik pisariaqartitsingaartut. Inuussutissarsiornermut tunngasunik aviisimi Training & Development-imi ineriartorneq tamanna ima oqaatigineqarpoq: „Ullutsinni inuunerup teknologiimit aqunneqaleriartorfiani inuusugut, inuunerup siunertaanik arlaannillu nalerisimaarnerulersitsisinnaasumik ujartortuivugut.“

Anersaakkulli ilitsersuutit pisariaqartitanik matussusiisut sumi nanineqarsinnaappat? Qangaanerusoq inuit nunagisaminni upperisamut inuunerminni „siunertaqarnerulersitsisumik“ nanisiumallutik ikiortissarsiortarput. Ullumikkulli upperisarsiornerit tamakku inuppassuit tunuppaat. Training & Development ilisimatitsivoq misissuinerup, pisortanit 90-init peqataaffigineqartup, takutikkaa „inuit upperisarsiorneq anersaakkullu ittunik pingaartitsineq immikkoortilluinnartaraat.“ Misissuinermi peqataasut upperisarsiorneq „akaarinninngitsutut avissaartuunnartutullu“ isigaat, anersaakkulli ittunik pingaartitsineq „silarsuarmut tamarmut atuuttutut tamangajannillu iluarinnittutut“ isigineqarpoq.

Inuiaqatigiinni silap piinik pingaartitsiffiusuni, soorlu Australiami, New Zealandimi nunanilu Europamiittuni, inuusuttorpassuit aamma isumaqarput upperisarsiorneq anersaakkullu pingaartitsineq assigiinngissuteqartut. „Inuusuttut amerlanersaasa Guuti imaluunniit ajugaqanngitsumik pissaaneqartoqartoq upperaat,“ professori Ruth Webber aviisimi Youth Studies Australia-mi allaaserisat ilaanni oqarpoq, „anersaakkulli pingaartitsinermik ersersitsinissamut oqaluffik pisariaqartissorinngilaat.“

Upperisaq ilumoortoq anersaakkut pingaartitsinermik siuarsaavoq

Inuit upperisarsiornermut qularnerat paasinarpoq. Upperisarsiornermik sammisalippassuit politikkikkut peqqusersusaarnernut ileqqussatigullu ilumoortuusaarnernut akuliussimasorujussuupput, aamma upperisarsiornerit sorsuunnerni pinngitsut inuartarineqarsimasut aavinik simerterneqarsimaqaat. Allalli upperisarsioqatigiinnik, peqquserlunnerup ilumoortuusaarnerullu marulluanut nakkaannikunik, narruginnittut aamma kukkuluttorput, Biibili ilanngullu narrugigamikku, isumaqarlutik iliuutsit tamakku Biibilip ajoqersuutaanit ajorineqanngitsut.

Ilumoortumilli Biibilimi ilumoortuusaarneq inatsisaatsuliornerlu assuarineqarput. Jiisusip nalimini upperisarsiornikkut siuttut oqarfigisimavai: „Eqqanaq ilissi allakkanik ilisimasut farisiiarillu, ilumoortuusaartusi! Ilerrit kalkikkat assigaasi; taakkumi qaamikkut kusanaraluarput, ilumikkulli toqusut saarninik mingunnartunillu tamanik ulikkaarput. Taamatuttaaq ilissi inunnut qallikkut iluartutut isikkoqaraluarpusi, ilorlikkulli ilumoortuusaarniarnermik inatsisaassusermillu ulikkaarpusi.“ — Matthæusi 23:27, 28.

Aammattaaq kristumiut Biibilimi kajumissaarneqarput politikkikkut tunngasunut tamanut akuliunnaveersaassasut. Sumiluunniit kajumissaarneqanngillat imminnut toqoraatissasut, akerlianilli imminnut pilliutigeriaannaasussaapput. (Johannesi 15:12, 13; 18:36; 1 Johannesi 3:10-12) Upperisaq ilumoortoq Biibilimik tunngavilik „akaarinnittuulluni avissaartuutitsisuunngilaq“, kisianni „tamangajaannik iluarinnittuuvoq“. Apustili Petrusi oqarpoq: „Guuti kinaassusersiortuunngitsoq, tassaasorli inuiaqatigiinni kikkuusuniluunniit imminik mianerinnittumik iluartuliortumillu ilassinnittartoq.“ — Apustilit Suliaat 10:34, 35.

Biibili — ilitsersuut tutsuiginartoq anersaakkut peqqissinartoq

Biibili naapertorlugu inuk Guuti assilillugu pinngortitaavoq. (1 Mosesi 1:26, 27) Imaanngilaq Guuti timitsigut assigigipput, kisianni Guutip pissusaanik ersersitsisinnaassuseqarpugut aamma anersaakkut ittunik paasinnissinnaassuseqarluta.

Taamaassimappat ilimagissannginnerparput Guutip isumagissagaa anersaakkut pisariaqartitatta matussuserneqarnissaat, aamma anersaakkut suna uatsinnut ajoqutaassanersoq iluaqutaassanersorlu pillugit naleqquttumik ilitsersussagaatigut. Soorlu Guutip timerput nappaatinik akiuisinnaasumik peqqissuujuarnissatsinnillu ikiorsiisinnaasumik pitsaalluinnartumik akiuussutissalersimagaa, taamattaaq eqqortunik aalajangiisinnaaniassagatta, timikkut anersaakkullu ajoqusiisumik iliuuseqannginniassagatta nalunngeqatiginnissusilersimavaatigut, ilutsinni oqaluttumik. (Romamiut 2:14, 15) Soorlu naluneqanngitsoq timitta  akiuussutissaa ajunngitsuujuassappat pisariaqartunik inuussutissaqartariaqarpugut. Nalunngeqatiginnissuserput ajunngitsumik ingerlassappat, taamatuttaaq anersaakkut inuussutissanik peqqinnartunik ’inuussuteqartariaqarpugut’.

Inuussutissat sorliit anersaakkut peqqissuutissinnaaneraatigut Jiisusip ima oqarami erseqqissarpaa: „Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.“ (Matthæusi 4:4) Jehovap oqaasii Biibilimi allanneqarsimapput, aamma ’iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut’. (2 Timotheusi 3:16) Taamaattumik anersaakkut nerisassaqarnissarput nammineq akisussaaffigaarput. Biibilip anersaakkut timikkullu qanoq annertutigisumik iluaqutaassanersoq qanoq ilisimallualertigineripput najoqqutassiaalu inuunitsinni qanoq malinniartigineripput aalajangiisuuvoq. — Esaja 48:17, 18.

Ilungersuutiginera akilersinnaava?

Ilumoorpoq Biibilimik atuaqqissaarnikkut anersaakkut peqqinnerulernissaq piffissaqarfigineqartariaqartoq, piffissaaleqiartuinnartutulli ippugut. Iluanaarutissartaali eqqarsaatigigaanni ilungersuutiginissaa akilersinnaavoq. Tusariaruk, angutit arnallu ilinniarsimalluartut ulluinnarnilu ulapittut anersaakkut pisariaqartitamik matuneqarnissaasa piffissaqarfiginissaat sooq pingaartutut isumaqarfigineraat.

Marina, nakorsaq, oqarpoq: „Inuit naalliuutaat malinnaaffigilerlugit napparsimmavimmi atorfininnerma siorna, inuunerup anersaakkut tunngasortai eqqaanngisaannartarpakka. Taamanikkut paasivara nuannaartuarneq attatiinnassagukku inuuninnilu eqqississaguma anersaakkut pisariaqartitsinera nassuerutigalugulu matussusertariaqarlugu. Suliffittut ittumik suliffeqaraanni — allat ajornartorsiutaat isumagisariaqarlugit — ulluinnarni tatisinerup anigorniarnera mersernarsinnaasarpoq.

Jehovap Nalunaajaasui Biibilimik maanna atuaqqissaaqatigisarpakka. Taamatut atuaqqissaaraangama pissutsikka iliuutsikkalu takusinnaanerulertarpakka, eqqarsaatikkalu ajunnginnerusumut saatsittarlugit. Taamaalillunga oqimaaqatigiinnerusumik inuuneqarsinnaavunga. Suliffiga nuannarisorujussuuara. Biibilimilli atuaqqissaarnerma misigissutsikkut peqqinnerulersippaanga, atuaqqissaarnermi iluaqutigalugu misigissutsit nuanniitsut aqussinnaanerulerpakka, ilungersorpallaannginnerulerpunga, naammagittarnerulerpunga aamma misiginneqataanerulerpunga. Biibilip najoqqutassiaanik malinninneq aappariinnitsinnut iluaqutaavortaaq. Pingaarneruvorli Jehova ilisarigakku, aamma anersaava inuuninni qanoq sunniuttartoq misigaara. Tamatuma inuunera siunertaqarnerulersippaa.“

Nicholas, illuliornermi konstruktøri, oqarpoq: „Jehovap Nalunaajaasui Biibilimik atuaqatigisanngikkallarakkit apeqqutit anersaakkut ittut soqutiginngilakka. Inuuninni siunertarisatuara tassaavoq suliami ilinniarsimasanni iluatsitsilluarnissaq. Biibilimik atuaqqissaartarnerma ilinniartippaanga inuuneq sulinerinnaanngitsoq, aamma Jehovap piumasaatut iliorneq pilluarnivimmik ataavartumik kinguneqartartoq.

Suliffiga soorunami iluarusuutigisarpara, Biibililli ilinniartippaanga inuunerup anersaakkut tunngasortaasa isiginiarnerunerisigut pilimanianngitsumik inuuneq qanoq pingaaruteqartigisoq.  Nuliaralu taamaaliorpugut, taamaaliornitsigullu nunap piinik pingaartitsilluni inuunerup uippakajaarnartortaata ilarujussua pinngitsoorsinnaavarput. Aamma uatsitut anersaakkut ittunik inuunermut isiginnittaasillit ilagisarnerisigut ikinnguterpassuaqalerpugut.“

Vincent, eqqartuussissuserisuusoq, oqarpoq: „Suliffimmi qaffakkiartorneq ilaatigut nalerisimaartitsisarpoq. Paasisimavarali pilluarneq nalerisimaarluarnerlu anguniaraanni annertunerusoq pisariaqartinneqartoq. Paasinnittaatsit taakku pillugit Biibilimi qanoq ilinniuteqartoq paasinngikkallarakku, ullut ilaanni paasilerpata inuuneq siunertaqanngilluinnartuusoq. Inunngortarpugut, peroriartortarpugut, katittarpugut, meeqqagut pilersorniarlugit sulisarpugut uatsitorluinnarlu inuuneqarnissaannik perorsartarlugit — naggataatigullu utoqqalilluta toqusarpugut.

Aatsaat Jehovap Nalunaajaasui Biibilimik atuaqqissaaqatigisalerakkit inuunerup siunertaa pillugu apeqqutigisartakkakka naammaginartumik akissutissarsivakka. Biibilimik atuaqqissaarnera iluaqutigalugu Jehova piviusutut ilinniarsinnaalersimavara, asalerlugu. Tamanna pissutigalugu Jehovap siunertaatut ilikkarsimasannut naapertuuttumik inuuniarsariutigalunga, anersaakkut ittumik inuunermut silatuumik isiginnittaaseqartuarnissannut pissutissaqalerpunga. Maanna nuliaralu nuannaarutigaarput inuunerput siunertaqarluartumik atoratsigu.“

Illittaaq Biibilimik atuartarnikkut inuunerit siunertaqalersinnaavoq. Jehovap Nalunaajaasuisa nuannaarutigalugu ikiorusuppaatit. Marina, Nicholas Vincentilu assigalugit nuannaarneq Jehovamik siunertaanillu, inunnut ilinnullu siunertaanik, paasinninnermut atasoq angusinnaavat. Tamatuma maannakkorpiaq anersaakkut pisariaqartitatit matussusiinnarnagit, aammattaaq peqqilluinnartunngornissannik naassaanngitsumillu inuuneqalernissannik periarfississavaatit — periarfissaq ’anersaakkut pisariaqartitsinerminnik miserratiginninngitsut’ kisimik periarfissarisaat. — Matthæusi 5:3.  (wE 2/1 04)

[Quppernerup ataani ilanngussaq]

[Qupp. 6-mi assiliartaq]

Marina

[Qupp. 7-mi assiliartaq]

Nicholas

[Qupp. 7-mi assiliartaq]

Vincent