„Iivangkiiliumik oqaluussisartup suliassaa suliariniaruk“

„Pututitaanaveersaarniarit, . . . iivangkiiliulersaartutut [iivangkiiliumik oqaluussisartutut, NV] suliat ingerlanniaruk.“ — 2 TIMOTHEUSI 4:5.

1. Jiisusip ajoqersukkani sumik suliassippai?

JEHOVAP aqqa siunertaalu silarsuarmi tamarmi oqaluussissutigineqarput. Tamatumunnga pissutaavoq Guutip innuttaasa tunniulluinnarsimasut Jiisusi Kristusip ajoqersukkaminut suliassiissutaanik uuminnga pimoorussinerat: „Aallarlusi inuiaqatigiit tamaasa [inuit inuiannit tamaneersut, NV] uannut ajoqersuganngortissigit kuillugit Ataatap Ernerullu Anersaallu Illernartup aqqani ajoqersorlugillu ilissinnut peqqussutikka tamaasa maleruaqqullugit.“ — Matthæusi 28:19, 20.

2. Nakkutilliisoq Timotheusi qanoq kajumissaarneqarpa, nakkutilliisullu kristumiut kiffartornertik naammassiniarlugu ilaatigut qanoq iliortariaqarpat?

² Ukiuni hundredelinni siullerni Jiisusip ajoqersugaasa suliassaq tamanna pimooruppaat. Assersuutigalugu apustili Paulusip nakkutilliisoq kristumiu Timotheusi ima kajumissaarpaa: „Iivangkiiliulersaartutut [iivangkiiliumik oqaluussisartutut, NV] suliat ingerlanniaruk kiffartuutillu naammassillugu.“ (2 Timotheusi 4:5) Ullumikkut nakkutilliisup kiffartornini naammassiniarlugu akisussaaffiit akuerisariaqagaasa ilaat tassaavoq Guutip naalagaaffianik aallussilluarluni oqaluussisartuuneq aalajangersimasumillu oqaluusseqataasarneq. Assersuutigalugu ilagiit atuakkamik atuaqqissaarnerannik nakkutilliisut oqaluussinermi siulersuisuunissaq allanillu ilinniartitsinissaq immikkut pisinnaatitaaffigaat. Paulusip nutaarsiassamik nuannersumik oqaluussinissamik  akisussaaffini nammineq eqqortippaa, kiffartornermullu allanik ilinniartitseqataalluni. — Apustilit Suliaat 20:20; 1 Korinthimiut 9:16, 17.

Itsaq iivangkiiliumik oqaluussisartut aallussilluartut

3, 4. Filipi iivangkiiliumik oqaluussisartutut qanoq misigisaqarpa?

³ Kristumiut siulliit oqaluussisartutut aallussilluartutut ilisimaneqarput. Assersuutigalugu eqqarsaatigeriaruk iivangkiiliumik oqaluussisartoq Filipi. Taanna ’angutit arfineq-marluk iluarisaasut anersaamik ilisimassusermillu peqangaartut’, Jerusalemimi uillarnernut ullut tamaasa nerisassanik agguaassinermi grækerisut oqaasillit hebræerisullu oqaasillit assigiimmik tunineqartarnissaannik isumaginnittussat, ilagaat. (Apustilit Suliaat 6:1-6) Filipi taamatut immikkut kiffartuuteqareerluni, malersuisoqarneralu pissutigalugu tamarmik apustilit kisimik pinnatik siammarmata, Samariamukarpoq. Tassani nutaarsiassaq nuannersoq oqaluussissutigaa anersaapilunnillu anisitsinissaminut nukillaarsimasunik tusiattunillu ajorunnaarsitsinissaminut anersaaq illernartumit nukissaqalersinneqarluni. Samariamiorpassuit Guutip naalagaaffianik tusarliussaq ilassivaat kuisillutillu. Apustilit Jerusalemimiittut tamanna tusaramikku apustilit Petrusi Johannesilu Samariamukartippaat kuiserlaat anersaaq illernartumik pisinnaaqqullugit. — Apustilit Suliaat 8:4-17.

⁴ Taava Guutip anersaavata Filipi kunngip atorfilittaanut Etiopiamiumut Gazamukartumut siulersorpaa. ’Etiopiamiut dronningianni Kandakemi atorfilik pissaaneqangaartoq’ taanna Jiisusi Kristusimut uppertunngorpoq kuisillunilu Filipip Esajap siulittuutaata isumaanik nassuiaateqqissaareermani. (Apustilit Suliaat 8:26-38) Taava Filipi Ashdodimukarpoq tassanngaaniillu Cæsareamut ’iivangkiiliu oqaluussissutigiitigalugu illoqarfinni aqqusaartukkamini tamani’. (Apustilit Suliaat 8:39, 40) Iivangkiiliumik oqaluussisartup suliassaanik suliaqartutut maligassaalluartuuvoq.

5. Filipip panii sisamat ingammik suna ilisimaneqaatigaat?

⁵ Ukiut 20-t missaat tamatuma kingorna Filipi Cæsareami suli kiffartortuuvoq. Paulusip Lukasillu inisimaffigimmanni „sisamanik paneqarpoq niviarsiaasunik siulittuisartunillu“. (Apustilit Suliaat 21:8-10) Taakku anersaakkut ilinniartitaalluarsimagunarput, kiffartornermi aallussilluartuupput allaallu siulittuisinnaaneq immikkut pisinnaatitaaffigalugu. Aamma ullumikkut angajoqqaat kiffartornermi aallussilluartuunerat qitornaannut sunniuteqarluarsinnaavoq taakkulu oqaluussinermik inuunerminni pingaarnerpaatitserusulersillugit.

Ullumikkut oqaluussisartut aallussilluartut

6. Ukiuni hundredelinni siullerni oqaluussineq qanoq kinguneqarluarpa?

⁶ Siulittuummini pingaartumi, ullutsinnut naggatissallu nalaanut tikkuussisumi, Jiisusi Kristusi ima oqarpoq: „Siullermik iivangkiiliu oqaluussissutigineqassaaq inuiaqatigiinnut tamanut.“ (Markusi 13:10) Nutaarsiassaq nuannersoq „silarsuarmi tamarmi“ oqaluussissutigineqareerpat naggatissaq nalliutissaaq. (Matthæusi 24:14) Ukiuni hundredelinni siullerni Paulusip allallu nutaarsiassaq nuannersoq oqaluussissutigimmassuk amerlasuut uppertunngorput, ilagiillu pilersiortorneqarput Romamiut naalagaaffissuanni tamarmi sumi tamaani. Utoqqaanertat ilagiinni taakkunani kiffartortussatut toqqarneqartut qatanngutitik oqaluusseqatigisarpaat nutaarsiassallu nuannersup tamaginni oqaluussissutigineqarnissaanut taperseeqataallutik. Jehovap oqaasia taamanikkut siammariartortuarpoq sunniuteqarnerujartuinnarlunilu, ullumikkut aamma taamaappoq Jehovap Nalunaajaasui milionillit tamarmik iivangkiiliumik oqaluussisartup suliassaanik suliaqarmata. (Apustilit Suliaat 19:20) Nuannaarlutik Jehovamik unnersiutiginnittunut ilaavit?

7. Ullumikkut oqaluussisartut qanoq kiffartorpat?

⁷ Ullumikkut oqaluussisartorpassuit oqaluusseqataanerunissamut periarfissatik atorluartarpaat. Tusindilikkuutaat ajoqersuiartortitaapput, hundredetusindilikkuutaat pioneriupput ikiorti-pioneriullutillu. Aammattaaq anguterpassuit, arnarpassuit meerarpassuillu Guutip naalagaaffianik oqaluussisartutut aallussilluartutut kiffartorluarput. Aap, Jehovap kiffaasa tamarmik taassuma pilluaqqusinerpassui malugisarpaat kristumiutut iivangkiiliumik oqaluussisartutut kiffartoqatigiitsillutik. — Sefania 3:9.

8. Nalunaaqutsersuineq suna maanna ingerlanneqarpa, kikkullu taamaaliorpat?

⁸ Guutip Jiisusip ajoqersugai tanitat nutaarsiassap nuannersup nunarsuarmi tamarmi oqaluussissutigineqarnissaanik  akisussaaffeqartippai. Kristusip ’savaataasa allat’ amerliartuinnartut taamatut suliaqarneranni tapersersorpaat. (Johannesi 10:16) Inuunermik annaassiniarneq tamanna siulittuutaasumik assersuunneqarpoq maajunnartuliat maanna pisut pillugit anersaarulullutik kappialasunik qaavisigut nalunaaqutsersuinermut. Ungasinngitsukkut guutiitsut piuneerussaassapput. Taamaalitinnaguli sallusuissutip inuunartup nunarsuup inuinut tamanut oqaluussissutiginera immikkut pisinnaatitaafferujussuuvoq. — Ezekieli 9:4-6, 11.

9. Nutaat oqaluussinermi qanoq ikiorneqarsinnaappat?

⁹ Oqaluusseqataasareersimagutta qularnanngitsumik arlaannik iliuuseqarsinnaavugut ilagiinniittut nutaat ikiorniarlugit. Immaqa ilaannikkut angalaaqatigisarsinnaavavut. Utoqqaanertat kajumissaarneqarput uppeqatitik anersaakkut ineriartortinniarlugit sapinngisartik tamaat iliuuseqaqqullugit. Nakkutilliisut maniguuttut iliuuseqarluarnerat allat aallussilluarlutik inerititaqarlutillu iivangkiiliumik oqaluussisartunngornissaannut pingaaruteqangaarpoq. — 2 Petrusi 1:5-8.

Illumiit illumut oqaluussineq

10. Kristusi kristumiullu siulliit oqaluussinermi qanoq maligassiuilluarpat?

¹⁰ Jiisusi Kristusi oqaluussinermi ajoqersukkaminut maligassiuilluarpoq. Jiisusip apustiliisalu kiffartornerat pillugu Guutip oqaasiani ima allassimavoq: „Jiisusi angalaarpoq illoqarfiit illoqarfeeqqallu aqqusaartorlugit oqaluussisarluni Guutillu naalagaaffianik iivangkiiliu tusarliuttarlugu. Angalaqatigai taakku aqqaneq-marluk.“ (Lukasi 8:1, 2) Apustilit aamma oqaluussippat? Aap. Ukiumi 33-mi piinsip ulluani anersaaq illernartoq kuineqareermat, „naalaffimmi illuminnilu [illumiillu illumut, NV] ullut tamaasa ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq“. — Apustilit Suliaat 5:42.

11. Apustilit Suliaat 20:20, 21 Paulusip kiffartornera pillugu sumik ersersitsiva?

¹¹ Apustili Paulusi oqaluussinermini aallussilluartuugami utoqqaanertanut kristumiunut Efesosimeersunut ima oqarsinnaasimavoq: „Nalunngilarsi ilissinnut ikiuutaasinnaasunik nipangiussaqarsimanngitsunga ilissinnulli nalunaajaasimallunga ajoqersorlusilu tamanut saqqumisumik illunilu [illumiillu illumut, NV].“ Paulusi ’illumiit illumut ajoqersuisarpa’ uppeqatiminut pulaarluni, uppertunngoreersut paarsisutut pulaarlugit? Naagga, imami nangippoq: „Juutinut grækerinullu nalunaajaavunga Guutimut allamik isumataarnissamik Naalakkatsinnullu Jiisusimut uppernissamik.“ (Apustilit Suliaat 20:20, 21) Jehovamut tunniulluinnareersimasut „Guutimut allamik isumataarnissamik Naalakkatsinnullu Jiisusimut uppernissamik“ ilinniartinneqarnissartik pisariaqartittanngilaat. Paulusip Efesosimi utoqqaanertat illumiit illumut oqaluussinermik ilinniartippai inuit uppinngitsut allamik isumataarnissamik uppernissamillu ilinniartiitigalugit. Taamaalilluni Jiisusip maligassiuinera periaasialu malippaa.

12, 13. Filippimiut 1:7 naapertorlugu Jehovap Nalunaajaasuisa oqaluussisinnaatitaanertik qanoq illersorsimavaat?

¹² Illumiit illumut oqaluussineq unamminiarnartuusinnaavoq. Assersuutigalugu ilaat kamalersarput Biibilimi tusarliussaq tusarliukkiartoraangatsigu. Paamisaarinianngilagut. Illumiit illumulli oqaluussineq Biibilimik tungaveqarpoq, Guutimullu tullermullu asannikkatta taamatut periaaseqarluta oqaluussisarpugut. (Markusi 12:28-31) Illumiit illumut oqaluussisinnaatitaanerput ’illersorniarlugu inatsisitigullu aalajangersarniarlugulu’ eqqartuussivilersuussisarpugut, ilaatigut USA-mi eqqartuussiviit qullersaanni. (Filippimiut 1:7, NV) Tamatigorluinnangajak eqqartuussiviit qullersaannit illersorneqartarpugut. Ima aalajangiisoqarajuppoq:

¹³ „Upperisarsiornikkut atuagassianik nammineerluni agguaassineq ajoqersueriaasiuvoq qangarsuarnisaq — naqiterutitulli pisoqaatigisoq. Ukiut ingerlaneranni upperisarsioqatigiinnut assigiinngitsorpassuarnut kajumississutaangaartarsimavoq. Iivangkiiliumik siaruartereriaaseq tamanna ullumikkut upperusiortunit atugaangaarpoq, taakkua kolportøriisa angerlarsimaffiit tusindilikkuutaat iivangkiiliumik tusarlertarpaat nammineq pulaarnermikkut upperisaminnut ilanngutsitsiniarlutik. . . . [USA-mi inatsisinut] Tapiliussaq Siulleq malillugu upperisarsiornikkut suliniuteqarneq taamaattoq oqaluffimmi pallorfiginninnertulli oqaluttarfimmiillu oqaluussinertulli pingaaruteqartigaaq.“ — Murdock mod Pennsylvania, 1943.

 Sooq oqaluussiuassaagut?

14. Oqaluussinerput piffissap ingerlanerani sumik kinguneqarsinnaava?

¹⁴ Illumiit illumut oqaluussinissamut pissutissarpassuaqarpoq. Pulaagaqarnitsinni tamani sallusuissutinik Biibilimeersunik siaruarteriniarsarisarpugut. Pulaaqqiinerni imerteriniarsarisarpugut. Immaqa piffissap ingerlanerani naajartulissapput inerititaqalerlutillu, Paulusimi ima allappoq: „Uanga ikkussuivunga, Apollosi imerterivoq; naajartortitsisorli tassa Guuti.“ (1 Korinthimiut 3:6) Taamaattumik ’ikkussuiuarta imerteriuarlutalu’ tatigalugu Jehova ’naajartortitsissasoq’.

15, 16. Sooq inuit uterfigiuarpavut?

¹⁵ Tamatta immikkut iivangkiiliumik oqaluussisartup suliassaanik suliaqarpugut inuuneq toqulu pineqarmata. Oqaluussinikkut imminut annaassinnaavugut tusartivullu annaassinnaallugit. (1 Timotheusi 4:16) Nalunngikkutsigu angutip inuunera navianartorsiortoq, ilungersuutigivallaarnagu ataasiaannarluta annaateriassavarput? Soorunami naamik! Inuit annaanneqarnissaat pineqarmat uterfigiuarpavut. Pissutsit atugaat allanngorartuaannarput. Tusarnaarnissaminut ulapippallaartoq immaqa tullissaanik Biibilimi tusarliussamik tusarnaarusuppoq piffissaqarlunilu. Immaqaluunniit ilaqutaasup allap matu ammarpaa, tamannalu Biibili pillugu oqaloqatigiinnermik kinguneqarsinnaavoq.

¹⁶ Pissutsit atukkat kisimik pinnatik, aammattaarli inuit isumaat allangorsinnaapput. Assersuutigalugu immaqa ikinngummik eqqarlimilluunniit toqukkut alianartumik annaasaqarsimaneq pissutigalugu Guutip naalagaaffianik tusarliussaq tusarnaarusunneqalersinnaavoq. Aliasuttut tuppallersarusuppavut, anersaakkut pisariaqartitaminnik nassuerutiginninnissaannut ikiorusuppavut pisariaqartitsinertillu tamanna qanoq pisinnaaneraat takutikkusupparput. — Matthæusi 5:4.

17. Oqaluussinitsinnut pissutaasoq pingaarnerpaaq suua?

¹⁷ Illumiit illumut oqaluussisarnitsinnut kristumiulluunniit kiffartoriaasiinut allanut peqataasarnitsinnut pissutaasoq pingaarnerpaaq tassaavoq Jehovap aqqanik ilisimannilersitsinermut peqataarusunnerput. (2 Mosesi 9:16; Tussiaat 83:19) Nuannertassusia oqaluussinerput sallusuissummik naapertuilluarnermillu asannittut Jehovamik unnersiutiginnilernerannut iluaqutaagaangat! „Nukappiaqqat niviarsiaqqallu, utoqqaat inuusuttullu,“ tussiaasiortoq erinarsorpoq. „[Jehovap] aqqa unnersiutigissavaat aqqa kisimi pissarsuummat, naalannassusia nunamut qilammullu anngussimammat.“ — Tussiaat 148:12, 13.

Oqaluussineq nammineq iluaqutigaarput

18. Oqaluussineq nammineq qanoq iluaqutigaarput?

¹⁸ Iivangkiiliumik oqaluussisartup suliassaanik suliaqarnerput arlalitsigut nammineq iluaqutigaarput. Nutaarsiassap nuannersup illumiit illumut oqaluussissutiginera maniguunnermik ineriartortitsinitsinni iluaqutigaarput, ingammik inussiarniiffigineqaraangatta. Oqaluussinermi sapinngisamik angusaqarnerpaajumalluta Paulusitut ittuusariaqarpugut, taassuma ’kikkut tamaasa peqatiginiartarsimavai ilaannaannilluunniit annaassaqarumagaluarluni’. (1 Korinthimiut 9:19-23) Oqaluussinermi misilittagaqarneq periaaserissuunissatsinnut iluaqutigaarput. Jehovap tatigineratigut oqaatsitsinnillu mianersuusseqqissaarnikkut Paulusip siunnersuutaa una malissinnaavarput: „Tamatigut oqaluttassaasi inussiarnersumik tarajulimmillu, ilisimaqqullugu kikkut tamaasa qanoq akisariaqartassagisi.“ — Kolossemiut 4:6.

19. Iivangkiiliumik oqaluussisartunut anersaaq illernartoq qanoq iluaqutaava?

¹⁹ Oqaluussineq Guutip anersaavanik illernartumik tatiginninnissatsinnut aamma iluaqutigaarput. (Zakaria 4:6) Kiffartornitsinni takuneqarsinnaaleriartugaassaaq inerititaqartugut anersaap inerititaanik — ’asanninnermik, nuannaarnermik, eqqissinermik, kamajasuunnginnermik, inussiarnisaarnermik, ajunngitsuunermik, unneqqarissusermik [uppernermik, NV], qanilaarnermik imminullu naalakkersinnaanermik’. (Galatiamiut 5:22, 23) Allanut attaveqarnitsinnut attuumassuteqarpoq, anersaammi siulersuinera malikkaangatsigu nutaarsiassap nuannersup oqaluussissutiginerani asannittuunissatsinnut, nuannaartuunissatsinnut, eqqissisimasuunissatsinnut, kamajasuujunnginnissatsinnut, inussiarnersuunissatsinnut, ajunngitsuliornissatsinnut, uppertuunissatsinnut, qanilaartuunissatsinnut imminullu naalakkersinnaanissatsinnut iluaqutigaarput.

20, 21. Oqaluussinermik ulapputiginninnerup suut iluaqutissartarai nuannersortaralugillu?

²⁰ Oqaluussinermut atatillugu ajunngitsortat  ilagaat paasinnittuunerulernerput misiginneqataasinnaanerulernerpullu. Allat ajornartorsiutiminnik — nappaatiminnik, suliffissaaleqinerminnik, ilaqutariinni ajornartorsiutiminnik — oqaluttuukkaangatigut, nammineq misilittakkavut naapertorlugit siunnersussanngilavut, allassimaffinnilli qiimmaallannartunik tuppallernartunillu takutitsiffigissavavut. Anersaakkut tappiillisinneqarsimasut, naapertuilluarnermilli asannippasissut, tamaasa soqutigaavut. (2 Korinthimiut 4:4) Nuanningaarporlu „inuunermik naassaanngitsumik pisassaqartitaasut [eqqortumik isumaqarfiginnittut, NV]“ anersaakkut ikiorsinnaallugit. — Apustilit Suliaat 13:48.

²¹ Aalajangersimasumik oqaluusseqataasarutta isummatsinnik anersaamut tunngasunut sammitsitsinissatsinnut iluaqutigissavarput. (Lukasi 11:34) Tamanna iluaqutigingaarparput, taamaanngikkuttami pigisanik pingaartitsinermut silarsuarmi nalinginnaangaartumut nakkaannarsinnaavugut. Apustili Johannesip kristumiut ima oqaaqqissaarpai: „Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa; silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput. Silarsuarlu piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Johannesi 2:15-17) Oqaluussineq ulapputigigutsigu Naalakkallu suliaanik suliarpassuaqarutta silarsuup asannginnissaanut iluaqutigissavarput. — 1 Korinthimiut 15:58.

„Qilammi katersigitsi erlinnartuutinik“

22, 23. (a) Oqaluussisartut kristumiut erlinnartuutit suut katersorpaat? (b) Allaaserisaq tulliuttoq iluaqutigalugu suna paasissavarput?

²² Aallussilluarluni oqaluussineq ataavartunik pilluaqqussutissartaqarpoq. Tamanna Jiisusip ersersippaa ima oqarami: „Erlinnartuutinik nunami katerseqinasi, tassanimi qillaalaat oquillu aseruisarmata tillinniallu nakuuserlutik illumut iserlutik tillittarmata. Qilammili katersigitsi erlinnartuutinik, tassanimi qillaalaat oquillu aseruissanngimmata, tillinniallu nakuuserlutik illumut iserlutik tillissanngimmata. Uummativimmi erlinnartuutitit najortuartarpai.“ — Matthæusi 6:19-21.

²³ Qilammi erlinnartuutinik katersiuarta, nalunnginnatsigu immikkut pisinnaatitaaffimmik allamik annerusoqanngitsoq Naalakkamut kisimi oqartussaasumut Jehovamut, taassuma nalunaajaasuisut, sinniisuunermit. (Esaja 43:10-12) Guutip kiffaasut suliassarput suliarigaangatsigu qularnanngitsumik misigissaagut arnatut kristumiutut, 90-it sinnerlugit ukiulittut, kiffartornermi inuunini sivisooq pillugu ima oqartutut: „Sutigut tamatigut Jehova qutsavigaara ukiuni taakkunani tamani kiffarisinnaammanga kukkusaraluartunga, qamanngalu pisumik qinnuigaara naassaanngitsumut Ataatagiumaarlugu asannittoq.“ Guutimut attaveqarnerput taamatulli pingaartitsigigutsigu, qularnanngivippoq iivangkiiliumik oqaluussisartutut kiffartornerput naammasserusussagipput. Allaaserisaq tulliuttoq iluaqutigalugu paasissavarput kiffartornerput qanoq naammassisinnaaneripput.

Qanoq akissavit?

• Sooq tamatta immikkut iivangkiiliumik oqaluussisartup suliassaanik suliaqartariaqarpugut?

• Itsaq ullumikkullu oqaluussisartut suliaat qanoq oqaatigisinnaavarput?

• Sooq illumiit illumut oqaluussisarpugut?

• Oqaluussineq nammineq qanoq iluaqutigaarput?

[Atuaqqissaarnermi apeqqutit]

[Qupp. 23-mi assiliartat]

Nalitsinni Filipitut paniisullu ittunik nuannaartunik iivangkiiliumik oqaluussisartorpassuaqarpoq

[Qupp. 27-mi assiliartaq]

Nutaarsiassap nuannersup allanut oqaluussissutiginera nammineq qanoq iluaqutigaarput?