’Inussiaq aalajaatsoq’ misissorneqarnermini aalajaattuarpoq!

„Maanna eqqartuussinissaq aallartittussanngorpoq, Guutip inoqutaanit aallartilluni.“ — 1 PETRUSI 4:17.

1. Jiisusi ’inussiamik’ misissuimmat pissutsit qanoq ippat?

UKIUMI 33-mi piinsip ulluani Jiisusip toqqarpaa „inussiaq“ piffissaq eqqorlugu „kiffaminut“ inuussutissalersueqqusani. 1914-imi Jiisusi kunnginngorpoq, kinguninngualu ’inussiap’ taassuma misissornissaanut piffissanngorpoq. ’Inussiaq’ taanna pingaarnertigut ’aalajaallunilu silatuujusoq’ paasivaa, taamaattumillu ’pigisaminut tamanut paarsisunngortippaa’. (Matthæusi 24:45-47, NV) Aammattaarli kiffaqarpoq ajortumik, aalajaannanilu silatuujunngitsumik.

’Kiffaq ajortoq’

2, 3. ’Kiffaq ajortoq’ suminngaaneerpa, qanorlu ajortunngorpa?

² Jiisusip „inussiaq aalajaallunilu silatooq“ oqaluttuareriitsiarlugu kiffaq ajortoq taanna oqaluttuaraa. Ima oqarpoq: „Kiffaaguni ajortoq ima isumaliortoq: Naalagara mululerpoq! — kiffaqatinilu unatalerlugit nerillunilu imerlunilu imerajuttut ilagalugit, taava kiffap taassuma naalagaa ullormi ilimasunngiffiani nalunaaquttap-akunneranilu nalusaani tikiutissaaq toqussallugulu [sukannernerpaamillu pillassavaa, NV] ilumoortuusaartullu atugarisaannik pineqartillugu. Tassaniittut qiallutillu qorsaqqortassapput.“ (Matthæusi 24:48-51) Oqariaaseq ’kiffaq ajortoq’ inussiaq aalajaallunilu silatooq pillugu Jiisusip oqaasereriigaanut uparuussivoq, aammami paasinarsisimavoq ’kiffaq ajortoq’ inussiamut aalajaatsumut ilaasut akornanninngaaneersuusoq. * Qanoq?

³ 1914 sioqqullugu inussiaqatigiit aalajaatsut ilarpassuisa ukiumi tamatumani ’uissap’ qilammi naapinnissaa neriuutigingaarpaat, neriuutaalli piviusunngunngilaq. Tamatuma pissutsillu allat kingunerisaannik amerlasuut pakatsipput, ilaallu allaat narrutsassimaalerput. Ilaasa qatanngutigisimasatik oqaatsikkut ’unatartalerpaat’ ilagisalerlugillu „imerajuttut“, upperisarsioqatigiit kristumiuunerartut. — Esaja 28:1-3; 32:6.

4. Jiisusip ’kiffaq ajortoq’ qanoq akuliuffigaa, taamatullu isiginnittaaseqartut qanoq pineqassappat?

⁴ Piffissap ingerlanerani kristumiuusimagaluartut taakku ’kiffatut ajortuusutut’ ilisarnarsipput, Jiisusillu ’sukannernerpaamik pillarpai’. Qanoq? Ajattorpai, qilaliarnissamillu neriuutertik annaavaat. Ingerlaannarli piuneerutitinngilai. ’Silataani taarnersuarmi’ ilagiinnut kristumiunut attaveerullutik qiaqqaarallassapput qorsaqqortaqqaarallassallutillu. (Matthæusi 8:12) Piffissamit tamatumaniilli tanitat ikittut tamatumunnga assingusumik ajortumik isiginnittaaseqarlutik ersersissimavaat, taamaalillutik ’kiffatut ajortutut’ imminut ilisaritipput. Taakkua aalajaannginnerat ’savanut allanut’ ilaasut ilaasa ilaarsimavaat. (Johannesi 10:16) Kristusimut akeraasut taakku tamarmik anersaakkut taartumi ’silataaniilissapput’.

5. „Inussiaq aalajaallunilu silatooq“-p misissorneqarnini qanoq periaaseqarfigaa, ’kiffap ajortup’ periaasianut akerlisusumik?

⁵ „Inussiaq aalajaallunilu silatooq“ aamma ’kiffaq ajortoq’ assigiimmik misissorneqaraluarput. „Inussiaq aalajaallunilu silatooq“-mulli ilaasut narrutsanngillat, ’iluarsarneqartippulli’. (2 Korinthimiut 13:11, NV) Jehovamut  qatanngutiminnullu asanninnerat ima nakussatsinneqartigaaq tassaasinnaanngorlutik ’sallusuissutsip sukaralugulu tunngavigisai’ ’ulluni kingullerni’ toqqissisimanngiffiusuni makkunani. — 1 Timotheusi 3:15; 2 Timotheusi 3:1.

Niviarsiat silatuut sianiitsullu

6. (a) Qanoq assersuusiorluni Jiisusip takutippaa inussiaqatigiit aalajaatsut silatuujusut? (b) Kristumiut tanitat 1914 sioqqullugu tusarliussaq suna oqaluussissutigaat?

⁶ ’Kiffaq ajortoq’ eqqartoreerlugu Jiisusi marlunnik assersuusiorpoq erseqqissarniarlugu sooq kristumiut tanitat ilaat aalajaatsuussanersut silatuujussanersullu, allalli taamaassanngitsut. * Silatuujuneq qanoq isumaqarnersoq erseqqissarniarlugu, ima oqarpoq: „Taava Qilaap Naalagaaffia assersuunneqassaaq niviarsianut qulinut qullilisarlutik anisunut uissaq parsiarlugu. Taakkunannga tallimat sianiitsuupput, tallimallu sianisuujullutik. Sianiitsut qullilisaraluarlutik uuliamik nassataqanngillat. Sianisuulli qullilisarput uuliaasivilisarlutillu imalinnik.“ (Matthæusi 25:1-4) Niviarsiat qulit taakku 1914 sioqqullugu kristumiunut tanitanut eqqaanarput. Uissaq Jiisusi Kristusi, tikiutingajalersoq ilimagaat. Taamaattumik ’parsiarpaat’ „Guutimik nalusunut piffissarititaasut“ 1914-imi naanissaat nakimaallutik oqaluussissutigalugu. — Lukasi 21:24.

7. Qanga aamma sooq kristumiut tanitat sinilertutut ippat?

⁷ Tamanna ilumoorpoq. Guutimik nalusunut piffissarititaasut, imaluunniit inuiaat ullussaat aalajangersagaasut, 1914-imi naapput, Guutillu naalagaaffia Kristusi Jiisusimit siulersorneqarluni atuutilerpoq. Tamannali pivoq qilammi takussaanngitsumi. Nunarsuarmi inuiaat ’eqqanartunik’ siulittuutigineqartunik malussartalerput. (Saqqummersitat 12:10, 12) Tamatuma kingunerisaanik misilinneqarfissanngorpoq. Kristumiut tanitat susoqarneranik paasinnilluanngillat isumaqarlutillu ’uissaq mulusoq’. Paatsuunganertik silarsuarmillu akeqqersimaarfigineqarnertik pissutigalugit tamangajavimmik nukingiussiunnaarput, aaqqissugaasumillu tamanut oqaluussisoqarunnaangajavilluni. Assersuusiami niviarsiat assigalugit tamarmik anersaakkut „uernalerput sinilerlutillu“ — Jiisusip apustiliisa toqunerata kingorna kristumiuunerartut aalajaanngitsut assigalugit. — Matthæusi 25:5; Saqqummersitat 11:7, 8; 12:17.

8. Suup kingunerisaanik ’uissaq aggersoq’ suaarutigineqarpa, kristumiullu tanitat sunissaannut piffissanngorpa?

⁸ 1919-imili ilimaginngisamik pisoqarpoq. Ima allassimavoq: „Unnuaq qiterarmat suaartoqarpallappoq: Uissaq aggerpoq, parsiarniarsiuk! Taava niviarsiat taakku tamarmik iterput qullitillu piareersarlugit.“ (Matthæusi 25:6, 7) Neriuutissaarutivissutut ileruttortut iliuuseqarnissamut kajumissaarisoqarpoq! 1918-imi Jiisusi, „angeruseq pillugu aallartitaq“, Jehovap anersaakkut naalaffianut tikiussimavoq Guutip ilagiissai misissoriartorlugit minguiariartorlugillu. (Malaki 3:1, NV) Maanna kristumiut tanitat naalaffiup tamatuma silarliliaani nunarsuarmiittuni Jiisusi parsiartariaqarpaat. ’Qaammaqqutaasutut qaamanissaannut’ piffissanngorpoq. — Esaja 60:1; Filippimiut 2:14, 15.

9, 10. Sooq oqartoqarsinnaava 1919-imi kristumiut ilaat ’sianisuujusut’ allat ’sianiitsuusut’?

⁹ Assersuusiamili arnat inuusuttut ilaat ajornartorsiuteqarput. Jiisusi ima oqaluttuarpoq: „Sianiitsut sianisuunut oqarput: Uuliaatissinnik tunisigut, qullivut qamilermata.“ (Matthæusi 25:8) Qulliit uuliaqarnatik ikumasinnaanngillat.  Taamaattumik qulliup uuliaata Guutip oqaasianut sallusuissutaasumut anersaavanullu illernartumut, kristumiunik ilumoortunik qaammaqqusersuisitsisinnaasumut, eqqaanarpoq. (Tussiaat 119:130; Danieli 5:14) 1919 sioqqullugu kristumiut tanitat silatuut, naak sanngiikkallaraluarlutik, kajumillutik paasiniarsaraat Guutip sumik kissaateqarfigineraatik. Taamaattumik qaamasortik qaammateqqullugu kajumissaarneqaramik piareersimapput. — 2 Timotheusi 4:2; Hebræerit 10:24, 25.

¹⁰ Tanitalli ilaat pilliuteqarusunngillat inuttulluunniit ilungersuuteqarusunnatik — uissaq ilagerusungaaraluarlugu. Nutaarsiassaq nuannersoq pillugu oqaluussiffissanngormat piareersimanngillat. (Matthæusi 24:14) Allaat aallussilluartut kinguarsarniaraluarpaat uuliaataannik qinnuigalugillusooq. Jiisusip assersuusiaani niviarsiat silatuut qanoq qisuariarpat? Ima oqarput: „Naamik, uatsinnut ilissinnullu amigarpoq. Pitsaanerussaaq niuertumukarlusi nammineq pisiniarussi.“ (Matthæusi 25:9) Taamatulli kristumiut tanitat ilumoorfiginnittut qaammaqqusersuisutut periarfissakillisitsisinnaasunik iliuuseqarumanngilluinnarput. Tassa misissorneqarnerminni aalajaattuarput.

11. Niviarsiat sianiitsut qanoq pippat?

¹¹ Jiisusip assersuusiani ima naavaa: „[Niviarsialli sianiitsut] pisiniariartortillugit uissaq tikiuppoq, piareersimasullu taanna katittorsiorfimmut iseqatigaat, matulu matuneqarpoq. Kingorna niviarsiat ikku tikiupput oqarlutillu: Naalagaq, naalagaq, mappiutsigut! Akivorli: Ilumut oqarfigaassi: Ilisarisimanngilassi.“ (Matthæusi 25:10-12) Aap, uissaq tikiummat ilaat piareersimanngillat. Taamaattumik misissorneqarnerminni aalajaattuanngillat qilammilu katittorsiorfimmut isersinnaajunnaarlutik. Alianassusia!

Talentit pillugit assersuusiaq

12. (a) Aalajaanneq erseqqissarniarlugu Jiisusi qanoq iliorpa? (b) Angut ’aallartoq’ kinaava?

¹² Jiisusi silatuujuneq pillugu taamatut assersuuteqariarluni aalajaanneq pillugu assersuusiorpoq. Ima oqarpoq: „Imaappoq, soorlu inuk nunamut allamut aallalersoq kiffaminik qaaqqusisoq pisuussutiminillu taakkununnga tunniussisoq paareqqullugit. Ilaat talentinik tallimanik tunivaa, alla marlunnik allalu ataatsimik, tamarmik immikkut piginnaanerat naapertorlugu; taava aallarpoq.“ (Matthæusi 25:14, 15) Assersuusiami angut tassaavoq Jiisusi, ukiumi 33-mi qilaliarami ’aallartoq’. Qilaliartinnanili ’pisuussutini’ ajoqersukkaminut aalajaatsunut tunniuppai paareqqullugit. Qanoq?

13. Jiisusip oqaluussiffissarujussuaq qanoq piareersarpaa, ’kiffanilu’ qanoq niuersinnaatippai?

¹³ Nunami kiffartornermini Jiisusip Israelimi tamarmi Guutip naalagaaffianik nutaarsiassaq nuannersoq pillugu oqaluussinermigut oqaluussiffissarujussuaq piareersalerpaa. (Matthæusi 9:35-38) ’Aallartinnani’ oqaluussiffissaq tamanna ajoqersukkaminut aalajaatsunut isumagisassanngortippaa, ima oqarluni: „Taamaattumik aallarlusi inuiaqatigiit tamaasa [inuit inuiannit tamaneersut, NV] uannut ajoqersuganngortissigit kuillugit Ataatap Ernerullu Anersaallu Illernartup aqqani ajoqersorlugillu ilissinnut peqqussutikka tamaasa maleruaqqullugit.“ (Matthæusi 28:18-20) Taamatut oqarluni Jiisusip uternissami tungaanut ’kiffani’ niuersinnaatippai, „tamarmik immikkut piginnaanerat naapertorlugu“.

14. Sooq ajoqersukkat tamarmik assigiimmik ilimasuffigineqanngillat?

 ¹⁴ Oqariartaatsip „tamarmik immikkut piginnaanerat naapertorlugu“ ersersippaa ukiuni hundredelinni siullerni kristumiut periarfissaat pissutsillu atugaat assigiinngitsuusut. Ilaasa, soorlu Paulusip Timotheusillu, piffissartik tamangajalluinnaat oqaluussinermut ilinniartitsinermullu atorsinnaasimavaat. Allat iliuuserisinnaasaat immaqa pissutsinit atugaannit killilerneqartarput. Assersuutigalugu kristumiut ilaat inussiaapput, allallu ilaquttanut akisussaaffeqarput napparsimallutilluunniit utoqqaallutilluunniit. Aammattaaq ilagiinni immikkut pisinnaatitaaffiit ilaat ajoqersukkanit tamanit immikkut pisinnaatitaaffigineqarsinnaanngillat. Assersuutigalugu angutit tanitat tamakkeratik ilagiinni ilinniartitsisuupput, aamma arnat tanitat ilagiinni ilinniartitsisuunngillat. (1 Korinthimiut 14:34; 1 Timotheusi 3:1; Jaaku 3:1) Kristusip ajoqersugai tanitat tamarmik — angutit arnallu — qanorluunniit atugaqaraluarunik ’niuertussaapput’ kristumiutut kiffartornermi periarfissaminnik pissutsinillu atugarisaminnik atorluaanermikkut. Ullumikkut Kristusip ajoqersugaanut aamma taamaappoq.

Misissuineq aallartippoq!

15, 16. (a) Qanga naatsorsuiffissanngorpa? (b) Aalajaatsut ’niuernissaminnut’ sunik nutaanik periarfissinneqarpat?

¹⁵ Assersuusiaq ima nanginneqarpoq: „Kingunerujussuatigut kiffat taakkua naalagaat tikiuppoq paarisaannik naatsorsueqatigilerlugit.“ (Matthæusi 25:19) 1914-imi — ukiup 33-p kingunerujussua — Kristusi Jiisusi kunngitut najuutilerpoq. Ukiut sisamassaat qiteqqullugu tamatuma kingorna, 1918-imi, Guutip anersaakkut naalaffianut tikiuppoq Petrusillu oqaasii uku eqquutitillugit: „Maanna eqqartuussinissaq aallartittussanngorpoq, Guutip inoqutaanit aallartilluni.“ (1 Petrusi 4:17; Malaki 3:1) Naatsorsuiffissanngorpoq.

¹⁶ Kiffat, Jiisusip qatanngutaasa tanitat, Kunngip ’talentiutai’ qanoq pivaat? Ukiumiit 33-miit 1914 tikillugu inuppassuit Jiisusi ’niuissunniarlugu’ ilungersorsimapput. (Matthæusi 25:16) Allaat sorsunnersuup siulliup nalaani  Naalagartik kiffartuukkusungaarlugu ersersissimavaat. Maanna naleqqutissaaq kiffanik aalajaatsunik ’niuernissamut’ nutaanik periarfissiinissaq. Pissutsit aaqqissuussaanerata matuma naggatissaata nalaa nalliussimavoq. Nutaarsiassaq nuannersoq silarsuarmi tamarmi oqaluussissutigineqartussaavoq. „Nunarsuarmi katersugassat“ katersorneqartussaapput. (Saqqummersitat 14:6, 7, 14-16) ’Qajuusiassanut’ ilaasut kingulliit nanineqartussaapput, ’amerlangaartullu’ ’savanut allanut’ ilaasut katersorneqartussaapput. — Saqqummersitat 7:9; Matthæusi 13:24-30.

17. Kristumiut tanitat aalajaatsut ’naalakkamik tipaatsuffianut’ qanoq iserpat?

¹⁷ Katersuiffik piffissaavoq nuannersoq. (Tussiaat 126:6) Taamaattumik Jiisusip qatanngutini tanitat aalajaatsut 1919-imi akisussaaffeqartinneruleramigit naleqqulluartumik ima oqarsinnaavoq: „Annikitsutigut ilumoorsimagavit amerlasuunut pisortanngortissavakkit. Naalakkavit tipaatsuffianut iserit.“ (Matthæusi 25:21, 23) Guutip naalagaaffiani kunnginngorlaatut Naalakkap nuannaarnera paasivissinnaanngilluinnarparput. (Tussiaat 45:2, 3, 7, 8) Inussiaqatigiit aalajaatsut taakkua Kunngimut sinniisuunermikkut nunamilu pigisaanik amerliartortitsinermikkut nuannaarneq taamaattoq misigisarpaat. (2 Korinthimiut 5:20) Nuannaangaarnerat Esaja 61:10-mi oqaatsini siulittuutaasuni erserpoq, ima allassimavoq: „Uanga [Jehova] tipaatsuutigingaarpara, tarnima Guutiga qiimmattaatigaa annassutip atisaanik atisitimmanga.“

18. Misissuineq ilaannut qanoq kinguneqarpa, aamma sooq?

¹⁸ Ajoraluartumik misissuineq ilaannut pilluarnartumik kinguneqanngilaq. Ima allassimavoq: „Sassarpoq talentimik ataatsimik pisoq oqarluni: Naalagaq, ilisimavakkit sukannersuusutit killuisartutit siaruarteriffiginngisanni katersuisartutillu siammarteriffiginngisanni, siooragalutit talentiutit nunamut matoorukkiartorpara. Aanalu illit piit.“ (Matthæusi 25:24, 25) Taamatulli kristumiut tanitat ilaat ’niuinngitsoorput’. 1914 sioqqullugu qiimmattarlutik neriuutertik allanut oqaluttuarinngilaat, 1919-imilu taamaaliulerusunngillat. Kannguttaatsuunerat Jiisusip qanoq periaaseqarfigaa? Immikkut pisinnaatitaaffiinik tamanik arsaarpai. ’Silataanut taarnersuarmut ajattorneqarput, tassanilu qiallutillu qorsaqqortassapput’. — Matthæusi 25:28, 30.

Misissuineq ingerlaannarpoq

19. Misissuineq qanoq ingerlaannarpa, kristumiullu tanitat tamarmik suna aalajangiusimavaat?

¹⁹ Jiisusi 1918-imi misissuilluni aallartimmat naggatissap nalaani Kristusimut inussianngortussat tanitaasut amerlanersaat, suli Jehovamut kiffaalinngillat. Tassa imaappa taakku misissorneqassanngitsut? Ilumut. 1918-imiit 1919-imut misissuineq, inussiap aalajaallunilu silatuup eqimattatut isigalugu aalajaaffigisaa, aallaqqaataannaavoq. Kristumiut tanitat inuttut ataasiakkaatut inaarutaasumik naqissuserneqarnissamik tungaanut misissugaajuassapput. (Saqqummersitat 7:1-3) Tamanna Kristusip qatanngutaasa tanitat nalunnginnamikku aalajaallutik ’niuertuarnissartik’ aalajangiusimavaat. Aalajangiusimavaat silatuujunissartik naammattumillu uuliaateqarnissartik, qaamasortik qaammaarissinnaaqqullugu. Nalunngilaat tamarmik immikkut nunami inuunertik aalajaallutik naagunikku Jiisusip qilammi ilassissagaatik. — Matthæusi 24:13; Johannesi 14:2-4; 1 Korinthimiut 15:50, 51.

20. (a) Ullumikkut savat allat qanoq iliornissartik aalajangiusimavaat? (b) Kristumiut tanitat suna nalunngilaat?

²⁰ Amerlangaartut savanut allanut  ilaasut qatanngutitik tanitat ilaarpaat. Nalunngilaat Guutip siunertaanik ilisarsinertik akisussaaffeqarnerulersitsisoq. (Ezekieli 3:17-21) Jehovap oqaasiata atuaqqissaarneratigut kristumiullu ataatsimiinnerisa, anersaavata sunniuteqarfigisaasa, najuuffiginerisigut naammattumik uuliaateqarnertik qulakkeertarpaat. Oqaluusseqataanermikkullu ilinniartitseqataanermikkullu, taamaalillutillu qatanngutitillu tanitat ’niueqatigiinnermikkut’, qaamasortik qaamatittarpaat. Kristumiulli tanitat nalunngilluinnarpaat tassaallutik talentinik tunineqartut naatsorsuiffigineqartussaallutillu Naalakkap nunami pigisaanik qanoq ingerlatsinerminnik. Ikittuinnaagaluarlutik akisussaaffitsik iperarlugu amerlangaartunut akisussaaffinngortissinnaanngilaat. Taamatut nassuerluni „inussiaq aalajaallunilu silatooq“ Kunngip pigisaanik amerliartortitsinermi siuttuujuarpoq, qujamasuutigaallu amerlangaartunut ilaasut aallussilluarlutik tapersersuinerat. Taakkua qatanngutitik tanitat qanoq akisussaaffeqarnersut paasivaat taakkunanngalu nakkutigineqarlutik sulinertik immikkut pisinnaatitaaffittut isigalugu.

21. Kristumiunut tamanut 1919 sioqqullugumiit nalerput tikillugu inuusunut qanoq oqaaqqissaaruteqarpa?

²¹ Assersuusiat taakku marluk 1919-imi tamatumaluunniit missaani pisimasunik paasinarsisitsipput, taamaattorli najoqqutassartaat kristumiunut ilumoortunut tamanut piffissami ullunik kingullernik taaneqartumi tamarmi inuusunut atuupput. Taamaammat niviarsiat qulit pillugit assersuusiap naggataani Jiisusip oqaaqqissaarutaa pingaarnerpaamik kristumiunut tanitanut 1919 sioqqullugu inuusunut tunngavoq, tunngavimmigulli kristumiunut tamanut atuulluni. Qanortoq tamatta Jiisusip oqaasii uku pigiliutsigik: „Taamaattumik eqqumagitsi, ulloq nalunaaquttap-akunneraluunniit nalugassiuk.“ — Matthæusi 25:13.  (wE 3/1 04)

[Quppernerup ataani ilanngussaq]

Nassuiarsinnaavigit?

• Jiisusip ajoqersukkani qanga misissorpai, misissuinerlu qanoq kinguneqarpa?

• Sooq kristumiut tanitat ilaat ajortumik isiginnittaaseqalerpat tassaalerlutillu ’kiffaq ajortoq’?

• Anersaakkut ittumik ’silatuujulluta’ qanoq ersersissinnaavarput?

• Jiisusip qatanngutai tanitat aalajaatsut qanoq ilaarsinnaavavut ’niuertuarlutalu’?

[Atuaqqissaarnermi apeqqutit]

[Qupp. 20-mi ungalusaq]

QAQUGU JIISUSI TIKIUTISSAVA?

Matthæusi kapitali 24-mi 25-milu Jiisusip ’tikiunnissaa’ assigiinngitsunik isumaqartillugu allassimavoq. Timikkut nikinngikkaluarluni ’tikiussinnaavoq’. Aap, ’tikiuttarpoq’ ima paasillugu inuiannik ajoqersukkanilluunniit soqutiginninnerulersoq, eqqartuussutip oqaatiginissaanik amerlasuutigut siunertaqarluni. Assersuutigalugu 1914-imi ’tikiuppoq’ kunngitut najuunnissani aallartinniarlugu. (Matthæusi 16:28; 17:1; Apustilit Suliaat 1:11) 1918-imi angeruseq pillugu aallartitatut ’tikiuppoq’ (imaluunniit: aggerpoq) Jehovamullu kiffaanerartunik eqqartuussilerluni. (Malaki 3:1-3, NV; 1 Petrusi 4:17) Harmagedonimi ’tikiutissaaq’ Jehovap akeraasa eqqartuunneqarnerat naammassiartorlugu. — Saqqummersitat 19:11-16.

Oqaatsit ’tikiunnissamut’ tunngasut Matthæusi 24:29-44-mi aamma 25:31-46-mi atorneqaraangata Jiisusip ’annikilliortitaangaarnermi’ tikiunnissaanut tunngasarput. (Saqqummersitat 7:14) Oqaaserli Matthæusi 24:45-mit 25:30-mut atorneqaraangat Jiisusip 1918 aallarnerfigalugu imminut ajoqersugaanerartunik eqqartuussinera pineqartarpoq. Assersuutigalugu naleqqutissanngilaq oqassagaanni kiffap aalajaatsup akissarsinissaa, niviarsiallu sianiitsut eqqartuunneqarnissaat kiffallu eqiasuttup Naalakkami talentiutaanik toqqorsisup eqqartuunneqarnissaa Jiisusi annikilliortitaangaarnermi ’tikiuppat’ pissasut. Taamaassagaluarpat tanitat ilarpassui piffissami tamatumani aalajaatsuunnginerarneqassagaluarput taamaattumillu taarserneqartariaqaraluarlutik. Saqqummersitat 7:3-mili ersersinneqarpoq Kristusip kiffai tanitat tamarmik piffissami tamatumani inaarutaasumik ’naqissuseriigaassasut’.

[Qupp. 18-mi assiliartaq]

’Kiffaq ajortoq’ 1919-imi pilluaqqusaanngilaq

[Qupp. 19-mi assiliartaq]

Uissaq tikiummat niviarsiat silatuut piareersimapput

[Qupp. 21-mi assiliartaq]

Kiffat aalajaatsut ’niuerput’

Kiffaq eqiasuttoq taamaaliunngilaq

[Qupp. 22-mi assiliartat]

Tanitat ’amerlangaartullu’ qaamasortik qaamatittuarpaat