Anersaaq silarsuarmut allanngoriartortumut ilisarnaataasoq akioruk

„Uagut silarsuup anersaava pinnagu Anersaaq Guutimit pisoq pissarsiaraarput.“ — 1 Korinthimiut 2:12.

1. Eva qanoq nakutitaava?

’PULATERIAARSUUP usserpaanga.’ (1 Mosesi 3:13) Taama oqaaseqarluni arnap siulliup Evap Jehova Guutimut pikitsitsisimanini nassuiarniarsaraa. Oqaasii ilumoorput, naak unioqqutitsineranut tamanna utoqqatsissutissaanngikkaluartoq. Apustili Paulusimi isumassarsisitaalluni kingusinnerusukkut ima allappoq: ’Eva nakutitaavoq.’ (1 Timotheusi 2:14) Eva nakutitaalluni isumaqalerpoq naalanngisaarnini iluaqutigissallugu, paarnaq nereqqusaanngitsoq neriffigiguniuk Guutitut ilerumaarluni. Salloqittaasup kinaassutsiminik isertuussinera aamma nakutitsineruvoq. Saatani Diaavulup pulateriaarsuk oqalutsittuusaaraa sianiginngilaa. — 1 Mosesi 3:1-6.

2. (a) Ullumikkut Saatanip qanoq inuit tammartittarpai? (b) „Silarsuup anersaava“ suua, apeqqutillu suut misissussavavut?

² Adamip Evallu nalaaniilli Saatanip inuit peqqusersiorfigiuarpai. Allaat Biibilimi allassimavoq „silarsuarmik tamarmik tammartitsiniartoq“. (Saqqummersitat 12:9) Periaasii allanngorsimanngillat. Pulateriaarsuk atortarunnaaraluarlugu kinaassutsi suli isertortuarpaa. Aliikkutassiat ilaat, tusagassiuutit allallu atorlugit Saatanip inuit tammartillugit isumaqalersittarpai, Guutip asannittumik siunnersuutaa atorfissaqartinnagulu iluaqutigissanngikkaat. Diaavulup salloqittaanerujussuata kinguneranik inuit nunarsuarmi sumi tamaniittut inatsisit najoqqutassiallu Biibilimiittut akerliuniarfigisalerpaat. Isiginnittaaseq taamaattoq ’silarsuup anersaavanik’ Biibilimi taaneqarpoq. (1 Korinthimiut 2:12) Anersaaq taanna Guutimik ilisimasaqanngitsut upperisaannut, eqqarsaataannut iliuusiinullu sunniuteqartorujussuuvoq. Anersaaq taanna qanoq malunniuttarpa, sunniineralu aserornartoq qanoq akiorsinnaavarput? Misissoriartigu.

Ileqqussatigut najoqqutaarukkiartorneq

3. Sooq silarsuup anersaava ullutsinni malunnarsiartuinnarpa?

³ Nalitsinni silarsuup anersaava malunnarsiartuinnarpoq. (2 Timotheusi 3:1-5) Malugisimassagunarpat  ileqqussatigut najoqqutaarukkaluttuinnartoqarnera. Sooq taamaannersoq Biibilimi nassuiarneqarpoq. Guutip naalagaaffiata 1914-imi pilersinneqarnerata kingorna qilammi sorsuuttoqalerpoq. Saatani inngilipiluilu ajugaaffigineqarlutik nunap qanittuanut iginneqarput. Saatanip kamangaarnermini silarsuarmik tamarmik tammartitsiniarnini ilungersuutiginerulerpaa. (Saqqummersitat 12:1-9, 12, 17) Suna tamaat sakkugalugu ’ajornanngippat allaat qinikkat tammartinniarpai’. (Matthæusi 24:24) Guutimut innuttaasutut uagut saassutassaani pingaarnersaavugut. Jehovamit iluarisaajunnaarniassagatta inuunerlu naassaanngitsoq neriuutigiunnaarniassagatsigu anersaakkut ittunik pingaartitsiunnaarsinniarsaraatigut.

4. Jehovap kiffaasa Biibili qanoq isigaat, qanorlu silarsuarmi inuppassuarnit isigineqartarpa?

⁴ Biibilimik, atuakkamik erlinnartumik Pinngortitsiserput asannittoq pillugu ilinniutitsinnik, Saatani tatiginnikkunnaarsitsiniarsarivoq. Jehovap kiffaasa Biibili nuannaringaarpaat pingaarteqalugulu. Nalunngilarput inuit oqaaserinagu Guutip oqaaserigaa isumassarsiarititaasoq. (1 Thessalonikamiut 2:13; 2 Timotheusi 3:16) Saatanilli silarsuaata allatut isumaqalersinniarpaatigut. Biibilimik saassussilluni atuakkiap siulequtaani ima allassimavoq: „Biibili ’illernartortaqanngivippoq’ tassaanngilluaasarlunilu ’Guutip oqaasia’. Angutinit illernartunit Guutimit isumassarsisitaasunit allanneqarani palasinit pissaaneqarniartunit allanneqarpoq.“ Taamatut tammartitaasut kukkusumik isumaqaleriaannaapput, iluarisaminnik Guuti pallorfigisinnaallugu — imaluunniit pallorfiginngitsuuissinnaallugu. — Ussatit 14:12.

5. (a) Atuakkiortoq upperisarsiornerit Biibilimut attuumassuteqartut pillugit qanoq allappa? (b) Isummat silarsuarmi nalinginnaasut Biibilimi allassimasunut naleqqiutikkit. (Ungalusaq qupperneq 11-miittoq takuuk).

⁵ Toqqaannartumik toqqaannanngitsumillu Biibilimik saassussineq, kiisalu Biibilimik upperinninneraasut ilumoortuusaarnerat pissutaalluni upperisarsiorneq nuannarineqarunnaaraluttuinnarpoq, ilaatigut upperisarsiornerit Biibilimut attuumassuteqartut. Upperisarsiorneq nutaarsiassaqartitsivinnit ilinniarnertuunillu saassunneqarpoq. Atuakkiortoq ima allappoq: „Inuit amerlanerit juutiussutsimik kristumiussusermillu isiginerluisuupput. Ajunnginnerpaamik isigigaangamikkik itsarnisarsiortutut isigisarpaat; ajornerpaamik isigigaangamikkik upperisarsiornertut itsangasunik isiginnittaasilittut inuit ilisimasaqassutsimikkut inersimalluarnissaannik aamma ilisimatusarnikkut siuarsaanissamik akornusiisutut isigisarpaat. Taamatut asissuineq ukiuni kingullerni illaruaatiginninninngorlunilu toqqaannartumik akeqqersimaarninngorsimavoq.“ Taamatut akeqqersimaarneq Guuteqannginneraasuneersuuvoq, taakkualu „eqqarsaataat piunngitsunngoriartorsimapput“. — Romamiut 1:20-22.

6. Atoqatigiinnerit Guutip assuarisai silarsuup qanoq isumaqarfigai?

⁶ Taamaattumik suup eqqortuunera pillugu Guutip najoqqutassiaanit inuit ungasilliartuinnarmata tupinnangilaq. Assersuutigalugu anguteqatiminnoortartut Biibilimi ’kanngutsaattutut’ eqqaaneqarput. (Romamiut 1:26, 27) Allassimavortaaq kinguaassiuutitigut inuunerluttut allasiortullu Guutip naalagaaffia kingornutissanngikkaat. (1 Korinthimiut 6:9) Atoqatigiinnerit  taamaattut nunarpassuarni akuerineqaannaratik aamma atuakkani, atuagassiani, erinarsuutini, filmini tv-milu nuannaartorinartutut isigineqalersinniarneqartarput. Tamakkunannga ajorinnittut akaarinninngitsutut, assuarlersutut ullutsinnilu eqqarsartaatsimut qaammarsagaasumut malinnaanngitsutut oqaatigineqartarput. Silarsuarmi inuit Guutip najoqqutassiai asannittumik isumassuinermut ersiutaasutut isiginagit piumasaminnik inuunissaminnut akornutitut, inuttut kiffaanngissutsiminnik killiliisutut, isigisarpaat. — Ussatit 17:15; Judasi 4.

7. Imminut qanoq aperisinnaavugut?

⁷ Silarsuarmi Guutimut assortuiffiugaluttuinnartumi inuuvugut, taamaattumillu inuttut isiginnittaaserput ileqqussatigullu najoqqutarisavut misissortarutsigik silatusaassaagut. Ilaannikkut unneqqarissumik qinunikkullu imminut misissortariaqarpugut Jehovap eqqarsartaasianit najoqqutassiaanillu qimagukkiartulinnginnerput qulakkeerniarlugu. Assersuutigalugu imminut ima aperisinnaavugut: ’Ukiut arlallit matuma siorna ingalassimalluinnarsimasannik aliikkutaqartarpunga? Guutip avoqqaarisai akuersaarnerulerpakka? Siornatigumut naleqqiullugu anersaakkut sammisassat pingaartinnginnerulerpakka? Inooriaatsikkut takutippara Guutip naalagaaffiata soqutigisai inuuninni salliutillugit?’ (Matthæusi 6:33) Taamatut isumaliutiginninneq silarsuup anersaavanik akiuinitsinni iluaqutigissavarput.

’Qimagukkiartoqinak’

8. Jehovamit qanoq qimagukkiartortoqarsinnaava?

⁸ Apustili Paulusi kristumioqatiminut ima allappoq: „Uatsinnut tusarliunneqartut sianigilluaqqissaarniartariaqarpavut sarfaanneqartutut qimakkiartoqqunatigit.“ (Hebræerit 2:1) Umiarsuaq tissukaatitiinnarluni apuuffissaminut apuuttanngilaq. Umiarsuup naalagaata sarfaq anorilu nakkutiginngikkunigit umiarsuaata umiarsualivik isumannaatsoq qaangiinnartooriaannaassavaa ikkarlorasaartumilu ikkarlissinnaalluni. Aamma uagut Jehovamit qimagukkiartorsinnaavugut, sallusuissutillu erlinnartut Guutip oqaasianiittut nakkutigiuartanngikkutsigik anersaakkut umiiarsinnaavugut. Taamatut annaasaqarutta imaattariaqanngilaq sallusuissut toqqaannartumik tunuartissimagipput. Jehovamik piaaralutik narruginnileriataartut amerlanngitsuararsuupput. Qimagukkiartutut amerlanertigut Guutip oqaasia mianerinngitsoorlugu allamut saasaarisunut akuliukkiartuaartarput. Malunnanngingajattumik ileqqorlussiartortarput. Umiarsuup naalagaa pigaarfissamini sinittoq assigalugu kingusinaarlutik aatsaat itertarput.

9. Jehovap Salomo qanoq pilluaqquaa?

⁹ Salomop oqaluttuassartaa ilinniutissaalluarpoq. Jehovap Israelimut kunnginngortippaa, naalaffiliortippaa Biibilillu ilaanik isumassarsisillugu allatillugu. Jehovap marloriarluni oqaluffigaa, pisuunngortippaa, tusaamasaalersippaa naalakkersuineralu tamaat eqqissineqartillugu. Tamanilli pingaarnermik Jehovap Salomo ilisimassuseqangaalersippaa, Biibilimimi ima allassimavoq: „Guutip Salomo tunivaa ilisimassusermik, paasisimasaqangaarnermik misilittagaqangaarnermillu annertussutsiminni sissap sioraasut killisissaanngitsunik, ilisimassutsimigullu akimorsimavai  Kangiamiut ilisimassusiat tamaat Egyptenimiullu ilisimassusiat tamaat.“ (1 Kunngit 4:21, 29, 30; 11:9) Isumaqarnarsinnaagaluarpoq Guutimut aalajaattoqartuassappat aalajaatsoq tassaassasoq Salomo. Salomoli qimagukkiartorpoq tunussisunngorlunilu. Tamanna qanoq piva?

10. Siunnersuut suna Salomop malinngitsoorpaa, qanorlu kinguneqarpa?

¹⁰ Salomop Guutip inatsisai nalunngilluinnarlugillu paasisimalluinnarpai. Qularnanngitsumik Israelimi kunnginngortussanut tamanut siunnersuut immikkut maluginiarsimassavaa. Taanna ilaatigut ima nipeqarpoq: „Aamma kunngi amerlasuunik nuliaqalissanngilaq tamatumuuna tammartinneqaqqunani.“ (5 Mosesi 17:14, 17) Naak taamatut ersarissumik siunnersuuteqaraluartoq Salomo 700-nik nuliarlunilu 300-nik panerfaqalerpoq, arnallu taakku ilarpassui guutinik allanertanik pallorfiginnittuupput. Naluarput sooq Salomo taama amerlatigisunik nuliarsimanersoq, naluarputtaaq taamaaliornini qanoq illersorniarsimaneraa. Unali nalunngilarput Guutip siunnersuutaanut ersarissumut naalanngitsoortoq. Tamanna Jehovap mianersoqqussutigisimasarluinnaatut kinguneqarpoq. Atuarpugut: „[Salomop] nuliaasa . . . uummataa guutinut allanut saatsippaat.“ (1 Kunngit 11:3, 4) Aap, ilisimassuseq Guutimit pisimasani annaajartorpaa. Qimagukkiartorpoq. Salomop nuliaminit guutiitsunit iluarisaarusungaalerami Guutimit iluarisaarusunnini Guutimullu naalakkusunnini eqqarsaatigiunnaariartorpai. Alianassusia, Salomommi oqaatsit uku allappai: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ — Ussatit 27:11.

Silarsuup anersaava sunniinertoqaaq

11. Isigisatsinnit tusakkatsinnillu eqqarsartaaserput qanoq sunnerneqartarpa?

¹¹ Sallusuissumik ilisimanninnerput pissutigiinnarlugu silarsuarmit sunnertissinnaanngitsugut isumaqassalluni qanoq navianartigisoq Salomomik oqaluttuami takuneqarsinnaavoq. Nerisatta timitsinnik sunniisarnerattut isigisavut tusaasavullu eqqarsartaatsitsinnik isiginnittaatsitsinnillu ilusilersuisarput. Tamanna niuernerup silarsuaani naluneqanngilluinnarpoq, taamaattumillu tunisassiaminnik pilerisaarinermut ukiut tamaasa aningaasat milliardillit atortarpaat. Pisisartut pilerisaarniarlugit pilerisaarutini sunniuteqarluartuni oqaasinnaat assillu torrallatat atorneqartarput. Pilerisaarusiortartut nalunngilaattaaq inuit pilerisaarut ataasiaannarlugu takugaangamikku pisiniapallattanngitsut. Pisisartulli sunnerniarneqartuaraangamik nioqqutissaq aalajangersimasoq nuannarilertarpaat. Pilerisaarutit sunniuteqartarput — taamaanngippammi kialuunniit aningaasartuutigiumanavianngikkaluarpai. Tamakku inuit eqqarsartaasiannik isiginnittaasiannillu sunniingaartarput.

12. (a) Inuit eqqarsartaasiannik Saatani qanoq sunniisarpa? (b) Suup takutippaa kristumiut sunnerneqarsinnaasut?

¹² Saatanip pilerisaarusiortartutut periaaseqarluni isumassarsiani pilerinartunngorlugit saqqummiuttarpai. Nalunngilaa inuit eqqarsartarnermisut eqqarsartaleriartorumaartut. Aliikkutassiat aqqutigalugit sunniiniutillu allat iluaqutigalugit Saatanip inuit nakutittarpai isumaqalersillugit ajunngitsoq ajortuusoq ajortorlu ajunngitsuusoq.  (Esaja 5:20) Allaat kristumiut ilumoortut Saatanip tammarsaarutaanit tammartitaasimapput. Biibilimi ima mianersoqqussuteqarpoq: „Anersaaq nassuitsumik oqarpoq ullussani kingullerni inuit ilaat uppernermik tunussiumaartut, tassa naalakkamikkit anersaat tammartitsisut anersaapiluillu ajoqersuutaat, siaruartigaasut ajoqersuisut salluliortut nalunngeqatiginnissutsimikkut pinerluttuliortutut nalunaaqutsigaasut peqqusersiornerisigut.“ — 1 Timotheusi 4:1, 2; Jeremia 6:15.

13. Ikinngutipalaaqarneq qanoq paasisariaqarpa, ilagisartakkatsinnillu qanoq sunnerneqartarpugut?

¹³ Arlaannarpulluunniit silarsuup anersaavanit sunnertinngitsoorsinnaanngilaq. Saatanip silarsuaani anorit sarfallu sakkortoorujussuupput. Taamaattumik Biibilimi silatuumik siunnersorneqarpugut: „Tammarnaveeritsi! Ikinngutipalaaqarneq ileqqorikkaluartunut aseruutissiisarpoq.“ (1 Korinthimiut 15:33) Suulluunniit kikkulluunniillu silarsuup anersaavanik ersersitsisut tamarmik ikinngutipalaajusinnaapput — allaat ilagiinniittut. Isumaqarutta ikinngutipalaaqarneq ajoqutigisinnaanatigu, assigiinnannginnerpaa oqartugut ajunngitsunik ikinnguteqarneq iluaqutigisinnaanatigu? Taamaattoqanngilarli. Biibilimi erseqqilluinnartumik ima allassimavoq: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ — Ussatit 13:20.

14. Silarsuup anersaava qanoq akiorsinnaavarput?

¹⁴ Silarsuup anersaava akiorniarlugu ilisimasut, Jehovamut kiffartortut, ilagisartagarisariaqarpavut. Uppernerulersitsisunik eqqarsaateqartariaqarpugut. Apustili Paulusi ima allappoq: „Pingaartissigit suut ilumoortut tamaasa, suut assuarnaatsut, suut iluartut, suut minguitsut, suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.“ (Filippimiut 4:8) Inuttut kiffaanngissusilittut pinngortitaasutut suna eqqarsaatigissanerlugu nammineq aalajangersinnaavarput. Jehovamut qaninnerulersitsisut eqqarsaatigisarnissaat tamatigut aalajangiusimasartigu.

Guutip anersaava sunniinertuneruvoq

15. Itsaq Korinthimi kristumiut illoqarfimmiunit allanit qanoq immikkooruteqarpat?

¹⁵ Silarsuup anersaavanit tammartinneqarsimasut assiginagit kristumiut ilumoortut Guutip anersaavanit illernartumit siulersortittarput. Paulusi Korinthimi ilagiinnut ima allappoq: „Uagut silarsuup anersaava pinnagu Anersaaq Guutimit pisoq pissarsiaraarput Guutip saammaannermigut uatsinnut tunissutigisai paaseqqullugit.“ (1 Korinthimiut 2:12) Itsaq Korinthi silarsuup anersaavanit sunnerneqarluinnarsimavoq. Illoqarfimmiut amerlanersaat ileqqussatigut ima ajortunngorsimatigaat „Korinthimiutut inuuneq“ „inuunerlunnermik“ isumaqartinneqalersimalluni. Saatanip inuit tappiillisissimavai. Taamaattumik Guuti ilumoortoq pillugu paasisimasaqalaaginnartarput paasisimasaqanngivittarlutilluunniit. (2 Korinthimiut 4:4) Anersaanili illernartoq atorlugu Jehovap Korinthimiut ilaasa isaat uisippai, sallusuissummillu ilisimasaqalersillugit. Inuunerminni allannguerujussuarnissaannut anersaaminik kajumissisillugillu siulersorpai, iluarilersinnaajumallugit pilluaqqusinnaajumallugillu. (1 Korinthimiut 6:9-11) Silarsuup anersaava sunniinertugaluartoq Jehovap anersaava sunniinertuneruvoq.

16. Guutip anersaava qanoq pisinnaavarput, pigiuarsinnaallugulu?

¹⁶ Ullumikkuttaaq taamaappoq. Jehovap anersaava illernartoq nukiuvoq qilammi nunamilu sunniisinnaanerpaaq, taannalu upperlutik qinusunut tamanut avaaginnilluni tunniuttarpaa. (Lukasi 11:13) Guutilli anersaava pissagutsigu silarsuup anersaava akiuinnarnagu iliuuseqarnerusariaqarpugut. Aalajangersimasumik atuaqqissaartariaqarpugut Guutillu oqaasia inuunitsinni atortariaqarlugu anersaarput – imaluunniit eqqarsartaaserput – taassuma eqqarsartaasianut  naapertuuttunngortissagutsigu. Taamaaliorutta Jehovap pissatsissavaatigut, Saatanip anersaakkut ittunik pingaartitsiunnaarsitsiniaaneri tamaasa akiorsinnaanngortillugit.

17. Lotip misigisai uatsinnut qanoq tuppallersaataappat?

¹⁷ Naak kristumiut silarsuarmut ilaanngikkaluarlutik silarsuarmiipput. (Johannesi 17:11, 16) Arlaannattaluunniit silarsuup anersaava ingalassimalluinnarsinnaanngilaa, Guutimimmi aqqutigeqqusaanillu asanninngitsut suleqatigisariaqarsinnaavavut allaallu immaqa ineqatigisariaqarlugit. Lotitut Sodomami najugaqartutut illoqarfimmiut inatsisaatsuliornerinik ’erloqissuteqartartutut’ misiginerpugut? (2 Petrusi 2:7, 8) Taamaappat tuppallersaatissaqarpugut. Jehovap Loti sernissorlugulu aniguisippaa. Aamma uagut sernissorsinnaallutalu aniguisissinnaavaatigut. Ataatatta asannittup atukkavut isigalugillu nalunngilai, aamma anersaakkut ittunik pingaartitsiuarnissatsinnut pisariaqartumik ikiorsinnaallutalu pissatsissinnaavaatigut. (Tussiaat 33:18, 19) Tatigigutsigu torlorfigalugulu silarsuup anersaavanik akiuisinnaatissavaatigut, atukkavut qanorluunniit ilungersunartigigaluarpata. — Esaja 41:10.

18. Sooq Jehovamut attaveqarnerput erlinnartutut isigisariaqarparput?

¹⁸ Silarsuarmi Guutimit ungasillisimasumi Saatanimillu nakutitaasimasumi uagut Jehovamut innuttaasutut sallusuissut pillugu ilisimassuseqarnermik pilluaqqusaavugut. Taamaattumik eqqissineq nuannaarnerlu silarsuup sianiginngisaa misigaarput. (Esaja 57:20, 21; Galatiamiut 5:22) Paratiisimi, silarsuup massuma anersaavata nungujartortup sunniuteqarfigiunnaagaani, naassaanngitsumik inuunissamik neriuuterput alutornangaartoq nuannaarutigaarput. Taamaattumik Guutimut attaveqarnerput erlinnartoq pingaartitsigu, anersaakkullu qimagukkiartuleqqajaaneq qanorluunniit ittoq mianersorfigisigu. Jehovamut qaninneruleriartortuarta. Taava silarsuup anersaavanik akiuisinnaatissavaatigut. — Jaaku 4:7, 8.

Uteqqiinermi apeqqutit

• Qanoq ililluni Saatanip inuit nakutillugillu tammartippai?

• Qanoq ililluta Jehovamit qimagukkiartornaveersaarsinnaavugut?

• Suup takutippaa silarsuup anersaava sunniuteqangaartoq?

• Qanoq Guutip anersaava pisinnaallugulu pigiuarsinnaavarput?

[Atuaqqissaarnermi apeqqutit]

[Qupp. 11-mi nalunaarsukkat]

SILARSUUP ILISIMASSUSIA ILISIMASSULLU GUUTIMEERSOQ

Ilumoortoq assigiinngitsumik paasineqarsinnaavoq — inuit namminneq suna ilumoortuunersoq aalajangertarpaat.

„[Guuti, illit] oqaatsitit sallusuissutaapput.“ — Johannesi 17:17.

Suna eqqortuunersoq sunalu eqqunngitsuunersoq immikkoortinniaraangakkit misigissutsitit tatigisakkit.

„Tamanit annerusumik uummat tatigisassaanngitsuuvoq. Katsorsagassaanngilaq.“ — Jeremia 17:9.

Illit iluarisannik iliorit.

’Inuup ingerlavissani nammineq aalajangigassarinngilaa.’ — Jeremia 10:23.

Pisuujuneq pilluarnermut aqqutaavoq.

„Aningaaserituujuneq ajortunut tamanut sorlaavoq.“ — 1 Timotheusi 6:10.

[Qupp. 10-mi assiliartaq]

Salomo pallorfiginninnermit ilumoortumit qimagukkiartorluni guutipilussiulerpoq

[Qupp. 12-mi assiliartaq]

Pilerisaarusiortartut silarsuaanni periaaserineqartoq periaaseralugu Saatani silarsuup anersaavanik siuarsaavoq. Anersaaq taanna akiorpiuk?