Atuartartut apeqqutaat

Paulusi qanoq isumaqarpa oqarami: „Timiusamik tamatuminnga nerisaraangassi ermutsimillu tamatuminnga imeraangassi“?

Jiisusip toqunera eqqaaniarlugu nalliuttorsiornerup atulersinneqarnera pillugu Paulusi allappoq: „Timiusamik tamatuminnga nerisaraangassi ermutsimillu tamatuminnga imeraangassi Naalakkap toqua nalunaajaatigisarparsi, tikiutserlugu.“ (1 Korinthimiut 11:25, 26) Isumaqartoqarpoq „-raangassi“ matumani isumaqartoq Jiisusip toqua akuttunngitsumik eqqaaniarneqartassasoq, tassa amerlasooriarluni. Taamaattumik pisimasoq taanna ukiumut ataasiaannaratik eqqaaniartarpaat. Paulusi taamatut isumaqarpa?

Maannakkut ukiut 2000-ngajaat qaangiupput Jiisusip toqunini eqqaaniarlugu nalliuttorsiorneq atulersimmagu. Tassa imaappoq ukiumut ataasiaannarluniluunniit nalliussineqartaraluarpat, taamaattoq ukiut ingerlaneranni amerlasooriarluni nalliussineqassaaq. Kisiannili Korinthimiunut allakkat siulliit 11:25, 26-mi versit ataqatigiinnerisa takutippaat Paulusip allagaani apeqqutaatinneqanngitsoq qanoq akulikitsigisumik, kisianni eqqaaniaalluni nalliuttorsiorneq qanoq nalliussineqassanersoq. Grækerit oqaasiat atugaa polla’kis isumaqartoq „-gajuttoq“ imaluunniit „-kulasoq“ atunngilaa, kisianni atorpaa hosaʹkis, isumaqartoq „-raangassi“, oqaaseq aamma isumaqartoq „qaqugukkulluunniit“, „pinerit tamaasa“. Tassa Paulusi oqarpoq: ’Taamaaliornerit tamaasa Naalakkap toqua nalunaajaatigisarparsi.’

Jiisusimmi toqunera qanoq akulikitsigisumik nalliuttorsiutigineqartassava? Pissusissamisuussaaq ukiumut ataasiaannarluni nalliussisaraanni. Eqqortumik taaneqartarpoq eqqaaniaalluni nalliuttorsiorneq, eqqaaniaallunilu nalliuttorsiornerit ukiumut ataasiarluni nalliussineqartarnerat nalinginnaavoq. Aamma Jiisusi juutit poorskianni ukiumut ataasiaannarluni nalliussineqartartumi toquvoq. Paulusip naleqqulluartumik Jiisusi „poorskisiutissaq“-mik taavaa, Jiisusimmi toqukkut pilliutaata anersaakkut Israelikkut inuunermut aqqummik ammaappai, soorlu pilliut poorskisiutissaq siulleq Egyptenimi Israelikkut angajulliliaannik inuutitsisoq inuiannillu inussiaataanermit aniguisitsisoq. (1 Korinthimiut 5:7; Galatiamiut 6:16) Ukiumoortumik juutit poorskisiortarnerat eqqarsaatigalugu erseqqinneruleqqippoq Jiisusip toqunera pillugu eqqaaniaalluni nalliuttorsiortarnerup ukiumut ataasiaannarluni nalliussineqartariaqarnera.

Aammattaaq Paulusip Jiisusip toqunera juutit nalliuttorsuannut allamut atassuteqartippaa, tassa ullormut saammaannartitsivimmut. Hebræerinut allakkat 9:25, 26-mi Jiisusi pillugu atuarpugut: „Taamaaliunngilarluunniit qasseerpassuariarluni imminik sassaanniarluni, soorlu palasiuneq ukiut tamaasa [ullormi saammaannartitsivimmi] illernartuummut isertartoq aak nammineq aaginngisani nassarlugu. . . . Akerlianilli ataasiaammik sassarpoq ullut naammatsiffianni imminik pilliutiginermigut ajorti nungutikkumallugu.“ Jiisusip pilliutaa ullormi saammaannartitsivimmi pilliutaasumut taarsiunneqarmat, ukiumut ataasiaannarluni toqunera eqqaaniarlugu nalliuttorsiortarneq eqqortuuvoq. Akulikinnerusumik nalliussineqartarnissaa Biibilimi tunngavissaqanngilaq.

Oqaluttuarisaanermik ilisimatooq John Laurence von Mosheim qulaani taaneqartumut naapertuuttumik paasissutissiivoq Asiaaqqami kristumiut ukiuni 100-kkunni Jiisusip toqua eqqaaniartaraat „juutit qaammataanni siullermi [nisanip] ulluisa fiortanianni“. Aatsaat kingusinnerusukkut kristumiuunerartuni ileqquulerpoq ukiumut ataasiaannarani toqua eqqaaniarlugu nalliuttorsiortarneq. (wE 1/1 03)