Guutip innuttai inussiarnisaartuusariaqarput

„Ilisimatinneqareerputit . . . [Jehovap] suut ilinnit piumasarigai: Iluartumik iliussasutit, ilumoortumik asannissasutit [ilumoorfiginnilluni tunniusimaneq nuannarissagit, NV] misissuilluarlutillu Guutit inooqatigissagit.“ — MIKA 6:8.

1, 2. (a) Sooq tupaallaatigissanngilarput Jehovap innuttami inussiarnisaartuunissaat naatsorsuutigigaa? (b) Inussiarnersuunermut atatillugu qanoq aperissalluni pissusissamisuussava?

JEHOVA Guutiuvoq inussiarnisaartoq. * * (Romamiut 2:4; 11:22) Tamanna aappariit siulliit Adamip Evallu qujamasuutigingaarsimassavaat. Naatsiivimmi Edenimi avatangiisii tamarmik inunnut inussiarnersuuneranut uppernarsaataapput, tamakkuninngalu nuannaarutiginnissinnaapput. Guutilu inunnut inussiarnisaartuujuaannarpoq, allaat qujasuitsunut ajortunullu.

² Inuk Guuti assilillugu pinngortitaagami Guutip pissusiinik ersersitsisinnaavoq. (1 Mosesi 1:26) Taamaattumik pissusissamisuuginnarpoq inussiarnisaartuunissarput Guutip naatsorsuutigimmagu. Mika 6:8-p hebræerisut allassimanerani paasinarpoq Guutip innuttaasa inussiarnersuuneq nuannarisariaqaraat. Inussiarnersuunerli suua? Inussiarnersuuneq Guutillu pissusii allat imminnut qanoq attuumassuteqarpat? Inuit inussiarnisaarsinnaammata sooq silarsuarmi taama inussiarniitsoqartigaa ilaatigullu naakkittaatsoqartigaa? Sooq kristumiutut allanut tamanut inussiarnersuuniartuusariaqarpugut?

Inussiarnersuuneq suua?

3. Pissuseq inussiarnersuuneq qanoq nassuiassaviuk?

³ Inussiarnerneq ersersinneqartarpoq allat ingerlalluarnissaannik soqutiginnilluni iliuuseqarnikkut, allanik qajassuussinikkut ikiuiumatuujunikkullu. Inussiarnerneq isumaqarpoq allanik ajoqusiiniarnani ajunngitsuliorneq. Inuk inussiarnersoq pissuserissuuvoq, misiginneqataasuuvoq ilakkuminartuullunilu. Allanut ilassiortuuvoq isumassuisuullunilu. Apustili Paulusi kristumiunut ima kajumissaarivoq: „Atiniarsigit nallittuingaarneq, ajunngissuseq [imaluunniit: inussiarnersuuneq], nikanartinneq, qanilaarneq naammagittassuserlu.“ (Kolossemiut 3:12) Tassa inussiarnersuuneq kristumiut ilumoortut anersaakkut atisaannut ilaalluinnaqqissaarpoq.

4. Jehova inussiarnisaarnermik qanoq maligassiuilluarnerpaava?

⁴ Jehova Guuti inussiarnisaartuunermik maligassiuilluarnerpaavoq. Paulusi ima oqarpoq: „Taava Guutip, annaassisitta, inunnut ajunngissusia asannissusialu saqqummiunneqarmata taassuma annaappaatigut imaanngitsoq iluartuliorsimagatta, kisianni nallittuissutsi pissutigalugu; taamaaliorporlu uffaatikkut ernioqqissitsisukkut nutaanngortitsisukkullu Anersaakkut Illernartukkut.“ (Titusi 3:4, 5) Guutip kristumiut tanitat Jiisusip aavanik minguiarpai, imaluunniit ’uffarpai’, Kristusip pilliutaata nalinga taakku iluaqutissaattut atorlugu. Aammattaaq anersaaq illernartukkut nutaanngortinneqarput tassaalerlutik ’pinngortitaq nutaaq’, Guutip erneri anersaakkut kinguaassiarititaasut. (2 Korinthimiut 5:17) Aammattaaq Guutip inuit ’amerlangaartut’ asavai inussiarnerfigalugillu „atisaminnik Savaaqqap aavanut eqqiaasimasut qaqortitillugit“. — Saqqummersitat 7:9, 14; 1 Johannesi 2:1, 2.

5. Sooq Guutip anersaavanit siulersortittut inussiarnisaartuusariaqarpat?

⁵ Aammattaaq inussiarnersuuneq Guutip anersaavata inerititaanut ilaavoq. Paulusi ima allappoq: „Anersaap inerititai tassaapput asanninneq, nuannaarneq, eqqissineq, kamajasuunnginneq,  inussiarnisaarneq, ajunngitsuuneq, unneqqarissuseq, qanilaarneq imminullu naalakkersinnaaneq. Tamakku inatsisini inerteqqutaanngillat!“ (Galatiamiut 5:22, 23) Taamaattumik Guutip anersaavanit siulersortittut inussiarnisaartuusariaqarput, ilaa?

Inussiarnernivik sanngiinnermut ersiutaanngilaq

6. Inussiarnerneq qaqugukkut sanngiilliornerusarpa, aamma sooq?

⁶ Ilaasa inussiarnersuuneq sanngiinnermut ersiutaasoraat. Isumaqarput allanit ataqqineqalissagaanni sukannersuusariaqartoq, allaalluunniit sorraatsuusariaqartoq. Ilumoortumik inussiarnisaassagaanni kukkusumillu inussiarnisaarnaveersaassagaanni nukittuujusariaqarpoq. Inussiarnerneq Guutip anersaavata inerititaanut ilaagami sanngiilliornerusinnaanngilaq, eqqunngitsuliat isiginngitsuusaarlugit. Kukkusumilli inussiarnersuuneq tassaavoq sanngiinneq eqqunngitsulianik isiginngitsuusaarititsisoq.

7. (a) Elip maleruutiasuunini qanoq ersersippaa? (b) Sooq utoqqaanertat kukkusumik inussiarnisaarnaveersaartariaqarpat?

⁷ Assersuutitut eqqarsaatigeriaruk Israelikkuusoq palasiuneq Eli. Ernini, Hofni Pinehasilu, tupermi naapeqatigiittarfimmi palasiusut perorsaatissinngilai. Taakku pilliutissap ilaa Guutip inatsisai naapertorlugit pisartagartik naammaginagu pilliutissat tunnuat altarimi suli pilliutigineqanngitsoq kiffaq Israelikkunnut pilliiartortunut neqimik ooqanngitsumik aallersittarpaat. Allaat Elip ernerisa arnat naapeqatigiittarfiup isaariaani kiffartortut kinguaassiuutitigut atoqatigisarpaat. Elilli soraarsinnagit naviilaaginnarpai. (1 Samueli 2:12-29) Tupinnanngilaq ’tamatuma nalaani Jehovap oqaasia qaqutiguinnaq tutsiuttarmat’. (1 Samueli 3:1) Taamatuttaaq utoqqaanertat kristumiut eqqunngitsuliortunut ilagiit anersaakkut peqqissusiannik navianartorsiortitsisinnaasunut kukkusumik inussiarnisaarnaveersaartariaqarput. Ilumoortumik inussiarnersup oqaatsit nikallornartut iliuutsilluunniit Guutip najoqqutassiaanik narrunarsaasut isiginngitsuusaarneq ajorpai.

8. Jiisusi ilumoortumik qanoq inussiarnisaartarpa?

⁸ Maligassarput, Jiisusi Kristusi, kukkusumik inussiarnisaanngisaannarpoq. Ilumoortumik inussiarnerluinnartuuvoq. Assersuutigalugu ’inuit nalligingaarpai paarinerlugaallutillu naakkinarsisimangaarmata savatut paarsisoqanngitsutut’. Taamaattumik eqqortuliorusuttut saaffigiuminartippaat; allaallu qitornatik tassunngaattarpaat. Eqqarsaatigiuk inussiarnisaarnera misiginneqataaneralu meeqqat ’pakkummagit assamminillu patimmagit pilluaqqullugillu’. (Matthæusi 9:36; Markusi 10:13-16) Jiisusili inussiarnersuugaluarluni Ataatami qilammiusup isaani eqqortuusut aalajangiusimavai. Ajortut akueriinnanngisaannarpai. Assersuutigalugu upperisarsiornikkut siuttuusunik ilumoortuusaartunik avoqqaarinninnissaminut sapiissuseqarpoq nukissaqarlunilu, soorlu Matthæusi 23:13-26-mi allassimasutut arlaleriarluni ima oqarpoq: „Eqqanaq ilissi allakkanik ilisimasut farisiiarillu, ilumoortuusaartusi!“

Inussiarnersuuneq pissutsillu allat assingusut

9. Inussiarnerneq qanoq ililluni kamaginninnermut ajunngissusermullu attuumassuteqarpa?

⁹ Inussiarnerneq pissutsinut allanut Guutip anersaavata inerititaanut, soorlu kamaginninnermut ajunngissusermullu, attuumassuteqarpoq.  Inussiarnersuuniartup pissuseq taanna ilaatigut ersersittarpaa kamaginnittuunermigut. Allaat inussiarniitsoq inussiarnisaarfigisarpaa. Inussiarnersuuneq ajunngissusermut attuumassuteqarpoq, tassa allanut iluaqutaasumik ajunngitsuliornikkut ersersinneqartarami. Grækerit oqaasiat Ny Verden-Oversættelsen-imi ’inussiarnisaarnermik’ nutserneqartartoq Biibilimik nutsikkani allani ’ajunngissusermik’ nutserneqartarpoq. Kristumiut siulliit inussiarnersuunerat guutimik nalusut tupigusuutigingaaramikku Tertullian naapertorlugu ’Jiisusip ajoqersugai christiani-nik (kristumiunik) taanagit chrestiani-nik (inunnik ajunngissusermik inussiarnersuunermillu ilisarnaatilinnik) taasarsimavaat’.

10. Inussiarnerneq asanninnermut aamma ilumoorfiginnilluni tunniusimanermut qanoq attuumassuteqarpa?

¹⁰ Inussiarnerneq aamma asanninnermut attuumassuteqarpoq. Jiisusi ima oqarpoq: „Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:35) Asanninnerlu taamaattoq pillugu Paulusi ima allappoq: ‘Asannittoq kamajuillunilu inussiarneraraaq.’ (1 Korinthimiut 13:4, 1900/1961) Aammattaaq inussiarnerneq attuumassuteqarpoq ilumoorfiginnilluni tunniusimanermut, pissuserlu taanna Biibilimi taaneqarajuppoq. Pissuseq taanna inussiarnernerinnaanngilaq tassaaginnarnanilu nalinginnaasumik tunniusimaneq. Kikkunnut tamanut inussiarnersuusariaqarpugut, qanigisatsinnuinnarli ilumoorfiginnilluta tunniusimasinnaavugut. Oqaaseq hebræerisooq ’ilumoorfiginnilluni tunniusimanermik’ nutserneqartartoq ima nassuiarneqarpoq: Pissuseq taanna tassaavoq inussiarnerneq imaluunniit ajunngissuseq pineqartumut asannittumik ilumoorfiginnittumillu ungakkiussisitsisartoq misigissutsip tamatuma siunertaata anguneqarnissaa tikillugu. Jehovap taamatut tunniusimalluni arlalippassuartigut ersersittarpaa, soorlu kiffani sernissoraangamigit aniguisikkaangamigilluunniit. — Tussiaat 6:5; 40:12; 143:12.

11. Guutip ilumoorfiginnilluni tunniusimanera qanoq tatiginnilersitsiva?

¹¹ Jehovap pissusiata tamatuma inuit taassumunnga kajungilersittarpai. (Jeremia 31:3) Kiffaasa aalajaatsut ikiortariaqaleraangamik naluneq ajorpaat ilumoorfiginnilluni tunniusimanerata pakatsisinnavianngikkaatik. Taamaattumik tatiginnillutik tussiaasiortutut ima qinusinnaapput: „Tatigaara unneqqarissutsit, uummatima qiimmattaatigissavaa annaassinissat.“ (Tussiaat 13:6) Jehova ilumoorfiginnilluni tunniusimasuummat kiffaasa tatigilluinnarsinnaavaat. Ima neriorsoqqissaarneqarpugut: „Ajattussanngilai [Jehovap] innuttani, imminiiginnassanagillu pigisani.“ — Tussiaat 94:14.

Sooq silarsuarmi taama inussiarniitsoqartigaa?

12. Qanga qanorlu Saatanip nunami naalakkersuinera aallartippa?

¹² Apeqqutip tamatuma akissutaa naatsiivimmi Edenimi pisimasumut tunngavoq. Inuiaat oqaluttuarisaaneranni siusissukkut pinngortitaq anersaajusoq namminissarsiulersimasoq makitasuujulersimasorlu silarsuarmi naalaganngorniarluni pilersaalerpoq. Tamatuma kingunerisaanik ’silarsuup matuma naalagarilerpaa’, naalagaq naqisimanningaartoq. (Johannesi 12:31) Saatani Diaavulutut, Guutimik inunnillu akerlilersuisutut annertut, ilisimaneqalerpoq. (Johannesi 8:44; Saqqummersitat 12:9) Jehovap naalakkersuisuuneranik ajunngitsumik taarsiiniarluni pilersaarutai namminissarsiortut qulaarneqarput Evap pinngortinneqarnerata kingunitsianngua. Taamaalilluni Saatanip nunami naalagaanera aallartippoq Adamip attaviitsuunissaq qinermagu Guutip naalakkersuinera piumanagu Guutillu inussiarnisaarnera ajattorluinnarlugu. (1 Mosesi 3:1-6) Adami Evalu attaviitsunngornatik Diaavulup namminissarsiortuuneranit makitasuujuneranillu sunnersimaneqalerput; naalakkersuinerata ataaniilerput.

13-15.  (a) Inuit siulliit Jehovap aqutsinera naapertuilluartoq ajattormassuk qanoq kinguneqarpa? (b) Sooq silarsuarmi taama inussiarniitsoqartigaa?

¹³ Tamanna qanoq kinguneqarpa? Adami Evalu nunarsuup paratiisertaanit anisitaapput. Naatsiivimmit naggorissumit peqqinnartunik paarnalimmit naatitalimmillu anisitaapput naatsiiviup Edenip avataani suleruluttussanngorlutik. Guuti Adamimut ima oqarpoq: „Nuliat naalallugu nerigavit orpimmit neriffigeqqunngisannit, narsaat perloqqunarsissaaq illit pisuullutit; erloqillutit inuutissarsiorfigissavat inuunerit naatserlugu. Orpikkanik naasupilunnillu kapinartulinnik  nuna ilinnut naatitaqartassaaq.“ Nunap perloqqusaanerata kingunerisaanik naggorissarnissaa ajornakusoortorujussuanngortussanngorpoq, ilaatigut orpigaqarnera kapinartulinnillu naasupiloqarnera pissutaalluni. Perloqqusaanera Adamip kinguaavinut malunnangaarmat Noap angutaata Lemekip ’erloqillutik nunaammi Jehovap perloqqusaani suleruloornertik’ oqaluttuaraa. — 1 Mosesi 3:17-19; 5:29.

¹⁴ Adamip Evallu isumakuluuteqaratik inuunerat allanngorpoq aliasuuteqalerlutik atugarliulerlutillu. Guuti Evamut ima oqarpoq: „Naartuninni amerlaqisunik ippigusuuteqartittarumaarpagit. Anniarlutit ernisarumaarputit; uiit pilerissuseqarfigissavat, taannalu ilinnut naalagaassaaq.“ Kingusinnerusukkut Kaini, Adamip Evallu angajulliliaat, ajortuliorpoq nukki Abeli toqullugu. — 1 Mosesi 3:16; 4:8.

¹⁵ ’Silarsuaq tamarmi Ajortumut naalatsigitippoq,’ apustili Johannesi allappoq. (1 Johannesi 5:19) Ullumikkut silarsuaq naalakkamisullu ajussusermik, namminissarsiornermik makitasuujunermillu ersersitsivoq. Taamaattumik inuit inussiarniitsuugajupput ilaatigullu naakkittaatsuugajullutik. Pissutsilli taamaattuaannassanngillat. Jehovap isumagissavaa naalagaaffimmi inussiarniinnermik naakkittaannermillu ilisarnaateqannginnissaa, inussiarnersuunermilli misiginneqataanermillu ilisarnaateqarnissaa.

Guutip naalagaaffiani tamarmik inussiarnisaartuussapput

16. Sooq Guutip Jiisusi Kristusikkut aqutsinera inussiarnernermik ilisarnaateqarpa, qanorlu iliorusulersippaatigut?

¹⁶ Jehovap naalagaaffianilu kunnginngortitap, Jiisusi Kristusip, innuttamik inussiarnisaartutut ilisimaneqarnissaat piumasaraat. (Mika 6:8) Jiisusi Kristusip siumut takutereerpaa naalagaaffik Ataataminit pisani inussiarnersuunermik qanoq ilisarnaateqassasoq. (Hebræerit 1:3) Tamanna ilaatigut erserpoq eqqunngitsumik upperisarsiornikkut siuttuusut inunnik artukkiisartut qulaarlugit Jiisusip oqaasiinit. Ima oqarpoq: „Ornissinga tamassi suleruluttusi nanertugaasusilu, qasuertissavassi. Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut. Nammaatarami iluaqaaq [nutsiinnavillugu: inussiarneqaaq], nammakkiussaralu oqeqaluni.“ (Matthæusi 11:28-30) Nunami naalakkersuisut upperisarsiornikkullu siuttuusut amerlavallaartut inunnik artukkiisarput najoqqutassarparpassualiorlutik siunertaqanngitsunillu pisussaaffippassualersuillutik. Jiisusilli ajoqersukkaminut piumasaqaatai taakkua pisinnaasaannut pisariaqartitaannullu naleqqussagaapput. Tamanna tassaavoq nammaataq nukissaqalernartoq iluartorlu, imaluunniit inussiarnersoq! Allanut inussiarnisaartuunikkut Jiisusi ilaarusulinngiliuk? — Johannesi 13:15.

17, 18. Kristusip qilammi kunngioqatissaasa nunamiluunniit innuttassaasa inussiarnisaartuunissaat sooq qularutiginngilarput?

¹⁷ Jiisusip apustiliminut oqaasiisa eqqarsaallannartut ersersippaat Guutip naalagaaffiata aqutsinera inuit aqutsinerannit qanoq allaanerutigissasoq. Biibilimi ima allassimavoq: „[Ajoqersukkat] oqqassutigilerpaattaaq kina arlartik ilaminit annerusutut naatsorsuunneqassanersoq.  Taava Jiisusi taakkununnga oqarpoq: ’Inuiaat kunngiisa naalagaaffigisarpaat, naalakkersuisullu avaaginnittunik taaneqartittarput. Ilissi taamaassanngilasi; akornassinnili annersarsi nukarlersassitut issaaq siulersuisorlu kiffartortutut. Kinami annerua: Nerrivimmi inissisimasoq imaluunniit kiffartuussisoq? Tassaannginnerpa nerrivimmi inissisimasoq? Uangali akornassinni kiffartortutut ippunga.’“ — Lukasi 22:24-27.

¹⁸ Nunami naalakkersuisut inissisimanertik aalajaallisinniartarpaat allanut ’naalagaaniarnikkut’ nuimasumillu atorfeqarniarnermikkut, soorlu tassa atorfiit taamaattut innuttaminnit ’annerutissagaatik’. Jiisusili oqarpoq pingaartorsuavinngortoqartartoq allanik kiffartuussinikkut — allat iluaqutissaannik eqiasuilluni noqqaassuteqartuarnikkut. Kristusip qilammi kunngioqatissaasa nunamiluunniit innuttassaasa tamarmik maniguuttuunikkut inussiarnisaartuunikkullu maligassiaa malittariaqarpaat.

19, 20. (a) Jehovap qanoq inussiarnertiginera Jiisusip qanoq oqaatigaa? (b) Inussiarnisaartuunikkut Jehova qanoq ilaarsinnaavarput?

¹⁹ Jiisusip asannittumik siunnersuutaa alla takoriartigu. Jehova qanoq inussiarnertiginersoq ajunngissuseqartigisorlu ima oqaatigaa: „Ilissinnik asannittut kisiisa asagussigit sukkut taava qutsavigisariaqassanerpisi? Ajortuliortummi aamma asannitsitik asasarpaat. Ajunngitsuliortisi kisiisa ajunngitsuliorfigigussigit tamanna pillugu qutsavigisariaqassanerpisi? Ajortuliortummi aamma ajunngitsuliortitik ajunngitsuliorfigisarpaat. Taarsiisinnaasorisasi kisiisa taarsigassarsisittarussigit taava qutsavigisariaqassanerpusi? Ajortuliortummi aamma ajortuliortut allat taarsigassarsisittarpaat angeqataanik taarsiiffigineqarumallutik. Akeqqasili asasigit, ajunngitsulioritsi taarsigassarsisitsigitsilu taarserneqarnissaat ilimaginngikkaluarlugu. Taamaappat angisuumik akissarsiassaqassaasi, Qutsinnerussaartullu qitornarilissavaasi, taannami qujasuitsunut ajortunullu ajunngitsuliortuuvoq. Nallittuigitsi soorlu Ataatarsi nallittuisoq.“ — Lukasi 6:32-36.

²⁰ Guuti namminissarsiunngitsumik inussiarnisaartarpoq. Arlaannik qinnuigineq ajorpaatigut iliuutsimilu akineqarnissaat naatsorsuutigineq ajorlugu. Inussiarnernermini ajunngissutsiminilu „seqerni ajortunut ajunngitsunullu nueqqusarpaa siallersitsisarlunilu iluartunut iluaatsunullu“. (Matthæusi 5:43-45; Apustilit Suliaat 14:16, 17) Ataatatsinnik qilammiusumik ilaarsisutut qujasuitsunik  ajoqusiinaveersaaginnartanngilagut, aammattaarli ajunngitsuliorfigisarpavut, allaat akeqqersimaarsimagaluarpataluunniit. Inussiarnisaartuunikkut Jehova Jiisusilu paasitippavut Guutip naalagaaffiata ataani, inussiarnernerup Guutillu pissusiisa allat inuit tamarmik akornanni pissutsinut sunniuteqarfigisaanni, inoorusulluta.

Sooq inussiarnisaartuussaagut?

21, 22. Sooq inussiarnisaartuusariaqarpugut?

²¹ Inussiarnersuunissaq ingammik kristumiunut ilumoortunut pingaaruteqarpoq. Taamaalilluta ersersissavarput Guutip anersaavanit siulersortilluta. Ilumoortumik inussiarnisaarutta Jehova Guuti Jiisusi Kristusilu ilaassavavut. Aammattaaq inussiarnerneq Guutip naalagaaffiani innuttaarusuttunut piumasaqaataavoq. Taamaattumik pissutsini tamani inussiarnisaartuunissaq ilikkartariaqarparput.

²² Ulluinnarni sutigut inussiarnisaartuusinnaavavut? Tamanna allaaserisami tulliuttumi allaaserineqarpoq.

[Quppernerup ataani ilanngussat]

Qanoq akissavit?

• Inussiarnerneq suua?

• Sooq silarsuarmi taama inussiarniitsoqartigaa ilaatigullu taama naakkittaatsoqartigaluni?

• Guutip aqutsinerata inussiarnerneq ilisarnaatigissagaa qanoq nalunngilarput?

• Guutip naalagaaffiata ataani inoorusuttut inussiarnisaartuunissaat sooq pingaaruteqarpa?

[Atuaqqissaarnermi apeqqutit]

[Qupp. 21-mi assiliartaq]

Kristumiut utoqqaanertat Guutip savaatai inussiarnersumik piniartarpaat

[Qupp. 23-mi assiliartaq]

Ulluni ajornakusoortuni Jehovap kiffani pakatsisissanngilai

[Qupp. 24-mi assiliartat]

Jehova inussiarnisaarluni inunnut tamanut iluaqutaasumik seqinnertitsisarpoq siallertitsisarlunilu