Ilerasuuteqannginneq

ULLUT ILAANNI Charlesip Kenyami universitetimi sulisup, suliffimminit angerlartilluni mobiltelefonini katappaa. Kenyami taamaattut suli akisoorujussuupput.

„Tigoqqinnissaa naatsorsuutiginngikkaluarpara,“ Charles oqarpoq. Ullulli arlaqanngitsut qaangiummata Kenyami Jehovap Nalunaajaasuisa immikkoortortaqarfiannit sianerfigineqarpoq. Mobiltelefoniminik aallersinnaanini tusaramiuk upperinngikkaluarpaa. Imatut pisoqarsimavoq: Jehovap Nalunaajaasuisa ilaata, piffissaq tamaat oqaluussisartuusup, Charles suliffimminit angerlarmut aqqutaata eqqaani, issiasimasup telefoni nassaarisimavaa. Piginnittoq nassaariniarlugu oqaluussisartup mobiltelefoni immikkoortortaqarfimmut nassarsimavaa, tassanilu normu telefonip takutitaa iluaqutigalugu Charles nanivaat.

„Nassaariniarlunga pisarissersorsimanersi qujamasuutigeqaara,“ Charles immikkoortortaqarfimmut allappoq. „Mobiltelefonimik nassaartumut, uannillu ujaasillutik nassaarinnittunut katatannillu utertitsisunut qujamasunnera paasitikkusuppara. Nalitsinni inuit unneqqarissut amerlanngillat, qujanaqaarli inuit ilaat amerlanngikkaluarlutik ilumoorlutillu Jehova Guutimut nalunaajaasuummata.“

Jehovap Nalunaajaasui unneqqarissusertik pillugu sumi tamaani ilisimaneqarput. Apustili Paulusi ilaarpaat taanna oqarmat: „Nalunngilluaratsigu ilerasuutissaqarnata, tamatigummi eqqortumik iliorumasaraluaratta.“ (Hebræerit 13:18; 1 Korinthimiut 11:1) Paasisimavaat taamatut pissuseqarneq Jehova Guutimut ataqqinaataasoq, soorlu Jiisusip oqaasiani atuarneqarsinnaasoq: „Qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.“ — Matthæusi 5:16.  (wE 2/1 04)