Silarsuarmi ajornartorsiutinut upperisarsiorneq pissutaava?

„UPPERISARSIORNEQ eqqissiviilliornermut pissutaaqataanngikkaangami inuup nalunngeqatiginnissusianut sininnartutut kajumiillisitsisutullu sunniuttarpoq, inullu piviusorsiorunnaarsittarlugu. . . . [Upperisarsiorneq] inunnik uungaannaq isigilersitsisarpoq upperisapalaaqalersitsisarlunilu, uumissuilersitsisarpoq siooralersitsisarlunilu.“ Metodistit ajoqersuiartortitarisimasaat taama allattoq ima nangippoq: „Pasilliutit ilumoorput. Ajunngitsumik ajortumillu upperisaqarpoq.“ — Start Your Own Religion.

Isumaqartoqarunarpoq ingasattumik isornartorsiuinerusoq. Oqaluttuarisaanermili pisimasut kia assortorsinnaavai? Upperisarsiorneq — ima nassuiarneqartoq: „Guutimut inummilluunniit pissaaneqarnerusumut pallorfiginninneq“ — quarsaarnartumik pisimasoqarfiuvoq. Qaammarsartariaqaraluarlutalu neriuuteqalersittariaqaraluarpaatigut. Ataatsimulli oqaatigalugu eqqissiviilliornermik, iluarisaqanngeqqajaanermik uumissuinermillu pilersitsivoq. Sooruna taamaattoq?

’Qaamasup inngilia’ tammartitsisartoq

Tamanna Biibilimi paasiuminartumik akineqarpoq. Saatani Diaavulup, ’qaamasumut inngiliunerartup’, inuit millionillit Guutip ajoqersuutaanit nigortillugit ajoqersuutiminik malinnilersippai.  (2 Korinthimiut 11:14) Saatani qanoq sunniuteqartiginersoq apustili Johannesip oqaasiini takuneqarsinnaavoq: „Silarsuaq tamarmi Ajortumut naalatsigitippoq.“ (1 Johannesi 5:19) Johannesip nalunngilaa Saatani „silarsuarmik tamarmik tammartitsiniartoq“. — Saqqummersitat 12:9.

Tamanna qanoq kinguneqarsimava? Saatani upperisarsiornikkut aaqqissuussaqarpoq qallikkut illernarpasissumik. „Qallikkuinnaq ’upperisarsiorneq ileqqorisuusaaginnarpaat’“, inerititaasali ajortut qanoq ittuviunerat qulaarpaat. (2 Timotheusi 3:5, J.B. Phillips; Matthæusi 7:15-20) Inuiaat ajornartorsiutaannut aaqqiissutaanani upperisarsiorneq tassaalertarpoq ajornartorsiutit ilaat.

Eqqarsaat suusupagalugu uppernanngivissutut ingasaassisutulluunniit ingerlaannaq itigarteqinagu. Eqqaamajuk salloqittarneqartut peqquserluffigineqarnertik ilisimasanngimmassuk. Apustili Paulusi tamatumunnga assersuusiorluni ima allappoq: ’Guutimik nalusut pilliutitik anersaapilunnut pilliutigisarpaat Guutimut pinnatik.’ (1 Korinthimiut 10:20, 1900/1961) Pallorfiginnittut Paulusip allaaserisaasa anersaapiluit pallorfigalugit paasisuugunikku annilaangaarsimassagaluarput. Isumaqarput Guuti ataaseq guutilluunniit arlallit ajunngitsut pallorfigalugit. ’Ajussutsilli anersaavinit pissaasunit qilaap ataaniittunit’, Saatanip inunnik tammartitsiortorneranik tapersersuisunit, tammartitaasimapput. — Efesosimiut 6:12.

Assersuutigalugu misissoriartigu inuppassuit imminut kristumiutut isigisut, anersaapiluilli sunniinerat pillugu apustili Johannesip mianersoqqussutaanik tusaajumanngitsut, Saatanimit peqquserluffigineqarlutik qanoq tammartitaasimanersut. — 1 Korinthimiut 10:12.

Jiisusip ajoqersuutaa Guutiminngaaneerpoq

„Ajoqersuutiga uanga nammineq piginngilara, aallartitsisimali pigaa,“ Jiisusi oqarpoq. (Johannesi 7:16) Aap, ajoqersuutaa Guutimit ajugaqanngitsumit pivoq. Taamaattumik Jiisusip ajoqersuutaa tusarnaartaanut ajunngitsumik iluaqutaasumillu sunniuteqartarpoq. ’Inuup nalunngeqatiginnissusia sumiginnartanngilaa piviusorsiorunnaartinnaguluunniit’. Akerlianik tusarusuttut Jiisusip ajoqersuutaatigut aniguisitaapput upperisarsiornikkut tammartitaanermit inuillu isumaliutersuutaannit, silarsuarmi Saatani Diaavulup tammartitaani sorlaqartumit, inuillu ’isumamikkut taarsiorfigisaannit’. — Efesosimiut 4:18; Matthæusi 15:14; Johannesi 8:31, 32.

Kristumiut ilumoortut upperluartuusaarneq ilisarnaatiginngilaat, ilisarnaatigaalli upperneq, nuannersunik pissuseqarnikkut, Guutip anersaavata illernartup pilersitaasigut, ersersinneqartartoq. (Galatiamiut 5:22, 23; Jaaku 1:22; 2:26) Pissuserineqartussat taakkua asanninneq malunnarnersaraat, aamma kristumiunut ilumoortunut ilisarnaataasussaasoq. — Johannesi 13:34, 35.

Malugiulli Jiisusip apustiliisaluunniit kristumiut ilagiivisa pilersinneqaqqaarnermissulli ingerlajuaannarnissaat ilimaginngimmassuk. Ilisimavaat tunussinersuaqalerumaartoq.

Upperisarsiorneq ilumoortoq sorliunersoq nalunarallassaaq

Jiisusip qajuusiassat naasupiluillu pillugit assersuusiamini eqqartorpaa upperisaq ilumoortoq sorliunersoq nalunarallassasoq. Oqaluttuaq nammineerlutit Matthæusi 13:24-30, 36-43-miittoq atuaruk. Jiisusi siaruarterivorlusooq narsaammi qajuusiassanik, „naatsiiassanik ajunngitsunik“, taakkualu assersuutaapput ajoqersugaanut aalajaatsunut tassaalerumaartunut kristumiut ilagiivi siulliit. „Akeraq“, Saatani Diaavulu, narsaammi „naasupilunnik“ siaruarteriartortussaq mianersoqqussutigaa. Naasupiluit tassaapput Jiisusi Kristusimut malinnittuunerartut, ajoqersuutaanilli sumiginnaasut.

Jiisusip apustiliisa toqunerisa kinguninnguatigut inuit ataasiakkaat, „naasupiluit“, „Jehovap oqaasianik“ killormut  saatitsisut saqqummertalerput. (Jeremia 8:8, 9; Apustilit Suliaat 20:29, 30) Tamatuma kinguneranik kristumiussuseq ilumuunngitsoq silarsuarmi saqqummerpoq. Biibili naapertorlugu silarsuaq ’inatsisaatsumit’, palaseqatigiinnit peqquserluttunit ’iluaatsuliortunit’ naalakkersorneqassaaq. (2 Thessalonikamiut 2:6-10) Jiisusip siulittuutigaa pissutsit allanngorumaartut ’aaqqissuussaanerup matuma naggatissaanni’. Kristumiut qajuusiassanut assingusut ataatsimut katersorneqassapput, „naasupiluillu“ naggataatigut piuneerussaassallutik.

Tassa kristumiussuseq ilumuunngitsoq ukiut hundredellit ingerlaneranni „naakkittaassutsip saammarsagassaanngitsup“ pileriartorsimaneranut silarsuarmilu kristumiuunerartorpassuit anersaakkut taarsiornerannut akisussaavoq. Apustili Petrusip taamaattoqarnissaa upperisarsiornerullu aqqani ajorluinnartumik iliuuserineqartussat nakuusernerillu siulittuutigai. Taamaattumik kristumiuunerartut pillugit ima allappoq: „Sallusuissummut aqqutaasoq tusagaanerlulerumaarpoq taakku pissutaallutik.“ — 2 Petrusi 2:1, 2.

’Teologii kamassimangaarnermik uumissiungaarnermillu ilisisarnaatilik’

Kristumiussuserli kisimi upperisamik tusaamasaanerlutsitsinngilaq. Assersuutigalugu eqqarsaatigeriakkit allassimasut maliinnavillugit upperisarsiortut „upperluarlutik sorsukkumatuujusut“, mattuttuusimasup Karen Armstrongip oqarneratut „upperisarsioqatigiinni amerlasuunik ilaasortalinni tamani“ takussaalersimasut. Taanna isumaqarpoq upperisarsiornerit tamarmik „misiginneqatiginninnermik ersersitsinerat naapertorlugu“ naliliiffigineqartariaqartut. Tamatumunnga tunngatillugu allassimasut maliinnavillugit upperisallit qanoq ersersitsippat? „Allassimasut maliinnavillugit upperisallit juutiugaluarunik, kristumiuugaluarunik muslimiugaluarunilluunniit upperisaminnut ilisarnaatissaq siuliani eqqaaneqartoq eqqortissimassanngilaat, teologiiat kamassimangaarnermik uumissuingaarnermillu ilisarnaateqarpat,“ Karen Armstrong allappoq. (The Battle for God — Fundamentalism in Judaism, Christianity and Islam) „Allassimasulli maliinnavillugit upperisallit“ kisimik kukkuluttorsimappat, ’teologiimillu kamassimangaarnermik uumissuingaarnermillu ilisarnaatilimmik’ siuarsaasimappat’? Oqaluttuarisaaneq allamik takutitsivoq.

Saatanip eqqunngitsumik upperisarsiorup silarsuarmi tamarmi naalagaaffissua, kamassimangaarnermik, uumissuingaarnermik toqoraanerpassuarnillu ilisarnaatilik, ineriartortissimavaa. Naalagaaffissuaq taanna Biibilimi taaneqarpoq ‘Babylonersuarmik, nunarsuarmi maajunnartut anaanaannik’, taannalu eqqartorneqarpoq atortittartutut nersummi, politikkikkut aaqqissuussamut assersuutaasumi, qimussersutut. Maluginiartariaqarpoq „nunarsuarmi toqutaasimasut tamarmik“ aavinut akisussaatitaanera. — Saqqummersitat 17:4-6; 18:24.

Ilaannaat peqquserluffigineqarput

Oqaluttuarisaanerulli takutippaa ilaannaat peqquserluffigineqarsimasut. Allaat taarsiornerpaaffiup nalaani „tarnerpassuit pinnersut ajunngitsuliorput, naak ajortorpassuit akornanniikkaluarlutik,“ Melvyn Bragg oqarpoq. Kristumiut ilumoortut Guuti pallorfigiuarpaat „anersaakkut ilumoornikkullu“. (Johannesi 4:21-24) Silarsuarmi tamarmi upperisarsiornerit, „sakkutooqarnikkut pissaanilimmut tapersersuillutik“ atortittartutut imminnut atortissimasut, ingalassimavaat. Oqaluffiup naalagaaffiullu suleqatigiinnerannut akuliukkumanngillat, oqaluttuarisaanerup takutimmagu „angeruseq Jiisusi Nazaretimeersumit pinnani Saatanimit pilersaarutigineqarsimasoq“. — Two Thousand Years — The Second Millennium: From Medieval Christendom to Global Christianity.

Ukiuni kingullerni Jehovap Nalunaajaasuisa ileqqorissuunerat pissuserissuunerallu maluginiarneqarsimavoq. Upperisarsiornermit eqqunngitsumit sunnerneqarumanatik, upperisartik iliuutsitillu taamaallaat Guutip oqaasianit isumassarsiarititaasumit, Biibilimit, tunngaveqartippaat. (2 Timotheusi 3:16, 17) Ukiuni hundredelinni siullerni kristumiutulli Jiisusip ’silarsuarmut ilaannginnissamik’ peqqussutaa naalappaat. (Johannesi 15:17-19; 17:14-16, NV) Assersuutigalugu Tysklandimi nazistit nalaanni kristumiunut najoqqutassiat qasukkarumanngilaat, taamaattumillu nazistit eqqarsartaasiat naapertorlugu akuerisaanngillat. Hitlerip aalajaannerat pissutigalugu qinngarsorpai. Tamanna pillugu atuakkami atuarfimmi ilinniutaasumi allassimavoq: „Jehovap Nalunaajaasuisa Biibilimi ajoqersuutit malippaat, arlaannillu  angusaqarniarlutik sakkulersorneq ajorput. Taamaattumik sakkutuujujumanngillat nazistinillu suleqateqarumanatik. SS-it akiniaallutik Jehovap Nalunaajaasui ilaqutariikkaarlugit parnaaruttarpaat.“ (Germany — 1918-45) Nazistit Jehovap Nalunaajaasuinik qinuginninnerat hundredelippassuit toqunerannik kinguneqarpoq.

Soorunami inuit ataasiakkaat upperisarsiortunit assigiinngitsuneersut sapiillutik upperisartik pillugu aamma naalliuttarput. Kisianni Jehovap Nalunaajaasui upperisarsioqatigiittut ataasioqatigiillutik taamaaliorput. Amerlanerpaat Biibilimi najoqqutassiaq una aalajangiusimavaat „Guuti inunnit naalattariaqarneruvoq“. — Apustilit Suliaat 5:29; Markusi 12:17.

Ajornartorsiummut pissutaasoq

Taamaattumik upperisarsiornerup silarsuarmi ajornartorsiutinut pissutaanerarneqarnera ilaatiguinnaq ilumoortortaqarpoq. Upperisarsiorneq eqqunngitsoq kisimi pissutaavoq. Guutilli upperisarsiorneq eqqunngitsoq tamaat qanittukkut suujunnaarsinniarpaa. (Saqqummersitat 17:16, 17; 18:21) Eqqortuliornermik naapertuilluarnermillu nuannarisaqartunut tamanut kajumissaarutaa imaappoq: „Qimallugu anigitsi, innuttakka, ajortuliornerini peqataaqqunasi perluutaanillu eqqorneqaqqunasi. Ajortuliaammi qaleriiaarlutik qilammut apississimapput, iluaatsuliornerilu Guutip puiorsimanngilai.“ (Saqqummersitat 18:4, 5) Aap, Guuti nammineq narrunarsagaangaarpoq upperisarsiornermit ’eqqissiviilliornermut pissutaaqataasumit, inuup nalunngeqatiginnissusianut kajumiillisitsisutut sunniuttartumit, inunnik piviusorsiorunnaarsitsisartumit, inunnik uungaannaq isigilersitsisartumit upperisapalaaqalersitsisartumit, uumissuilersitsisartumit siooralersitsisartumillu’.

Manna tikillugu Guutip inuit sallusuissummik nuannarisaqartut, upperisami minguitsumi ilumoortumilu uppeqatigiinnut, Pinngortitsisup asannittup, naapertuilluartuullunilu avaaginnittup ileqqoreqqusaanik ajoqersuutaanillu aalajangiussisunut, katersorpai. (Mika 4:1, 2; Sefania 3:8, 9; Matthæusi 13:30) Upperisaq ajortunngorsimanngitsoq pillugu paasisaqarnerorusukkuit, atuagassiamik matumannga saqqummiisut allaffiginissaannut imaluunniit Jehovap Nalunaajaasuisa arlaannut kimulluunniit ikioqqunissannut nangaassanngilatit. (wE 2/15 04)

[Qupp. 7-mi assiliartaq]

Inuit assigiinngitsunik tunuliaqutallit upperisamik ajortunngorsimanngitsumik nuannarinnilersimapput