Silarsuarmi inussiarniiffiusumi inussiarnisaarneq

„Inuup kajungernartua tassaavoq ilumoorfiginnilluni tunniusimanera.“ — Ussatit 19:22, NV.

1. Sooq inussiarnisaarniarneq ajornakusoorsinnaava?

ISUMAQARPIT inussiarnersuullutit? * Taamaakkuit qularnanngitsumik ullumikkut silarsuatsinni oqitsorsiuinnarnavianngilatit. Inussiarnisaarneq Biibilimi ’anersaap inerititaanut’ ilaasutut allassimavoq, soormiuna, allaat nunani kristumiuunerartuni, inussiarnisaarniarneq taama ajornakusoortigisoq? (Galatiamiut 5:22) Allaaserisap matuma siuliani allassimasutut pissutaasut ilaat apustili Johannesip allaatigaa — tassa silarsuaq tamarmi anersaamit ajortumit, Saatani Diaavulumit, aqunneqartoq. (1 Johannesi 5:19) Jiisusi Kristusip Saatani ’silarsuup naalagaanik’ taavaa. (Johannesi 14:30) Silarsuullu naalakkani pikitsitsiumatooq ajortorlu assigeqqajaavaa. — Efesosimiut 2:2.

2. Inussiarnersuunitsinnut suut sunniuteqarsinnaappat?

² Inussiarniiffigineqaraangatta ajortumik sunnerneqartarpugut. Sanilitsinnit akeqqersimaartunit, takornartanit pissusiluttunit allaalluunniit  ikinngutitsinnit ilaquttatsinnillu ilaannikkut isumaalliortartunit inussiarniiffigineqarsinnaavugut. Inuit sorraatsut imminnut nilliaffigisut akerartuuttullu nuanniilliliortitsingaarsinnaapput. Taamatut pissuseqartoqarpat uagut nammineq kamassimaalersinnaavugut immaqalu inussiarniinneq inussiarneeqataanik akerusulerlugu. Allaat anersaakkut timikkullu peqqissuserput navianartorsiortissinnaavarput. — Romamiut 12:17.

3. Ajornartorsiungaarnerit qanoq ittut inuit inussiarnisaarniarnerminni misilinneqaatigisinnaavaat?

³ Silarsuarmi pissutsit nalorninartut aamma inussiarnisaarniaraluarnermut akornusersuisinnaapput. Soorlu inuppassuit ernumapput peqqarniisaartoqariataarsinnaammat, peqqarniisaartoqartarmat nunallu ilaat sakkussianik atomitortunik biologiskiusunilluunniit atueriataarsinnaammata. Aammami inuit millionillit piitsuungaarlutik, nerisakinneroqqissinnaanatik, inilungaangaarlutik, atisarlungaarlutik nakorsaatissaaleqingaarlutillu inuupput. Neriunartoqanngivissutut ittumi inuulluni inussiarnisaarnissaq unamminiarnangaarsinnaavoq.

4. Inussiarnisaarnissamut atatillugu kukkusumik qanoq isummertoqarsinnaava?

⁴ Isumaqartoqariaannaavoq inussiarnisaarnissaq taama pingaaruteqartiginngitsoq, allaallu sanngiinnermut ersiutaasoq. Inuit taamatut isumallit naapertuilluanngitsuliorfigineqartutut misigisinnaapput, ingammik allanit naalagaaniarfigineqarunik soqutigittaatsuliorfigineqarunillu. (Tussiaat 73:2-9) Tamatumunnga atatillugu Biibilimi ima siunnersorneqarpugut: „Akissut sallaatsoq kamannaveersaartitsisarpoq, oqaatsilli ajuallannartut uumitsatsitsisarput.“ (Ussatit 15:1) Saamaneq, tassa sallaatsuuneq, inussiarnisaarnerlu pissusiupput imminnut ataqatigiilluinnartut Guutip anersaavata inerititaanut ilaasut, pissutsinilu ajornartorsiorfiusuni iluaqutaalluarsinnaasut.

5. Kikkunnut inussiarnisaarnissaq pingaaruteqarpa?

⁵ Guutip anersaavata illernartup inerititaanik ersersitsisarnissarput taama pingaaruteqartigimmat silatusaassaagut qanoq inussiarnisaarsinnaanerluta eqqarsaatigigutsigu. Silarsuarmi inussiarniiffiusumi inussiarnisaarnissaq ajornanngila? Saatanimillu inussiarniillisinneqarata kikkut inussiarnisaarfigisinnaavavut, ingammik tatineqaraangatta? Misissussavarput ilaqutariinni, suliffimmi, atuarfimmi, sanilitsinnut, oqaluussinermi ilagiinnilu qanoq inussiarnisaarnerulersinnaanerluta.

Ilaqutariinni inussiarnersuuneq

6. Sooq ilaqutariinni inussiarnisaartuunissaq taama pingaaruteqartigaa, inussiarnersuunerlu qanoq ersersinneqarsinnaava?

⁶ Jehovamit iluarisaassagutta siulersorneqassaguttalu sapinngisarput tamaat anersaap inerititaa ineriartortittariaqarparput. (Efesosimiut 4:32) Ilaqutariinni inussiarnisaartuunissap pisariaqarnera misissorneroriartigu. Ulluinnarni uiusoq nuliaasorlu imminnut qitornarminnullu inussiarnerfigeqatigiittariaqarput isumassoqatigiittariaqarlutillu. (Efesosimiut 5:28-33; 6:1, 2) Tamanna ersertariaqarpoq ilaqutariit oqaloqatigeeriaasiatigut,  meeqqat angajoqqaaminnik ataqqinnittuunerisigut, angajoqqaallu qitornaminnut periaasiisigut. Nersualaarinasuartarit, naveersiavallaarnak.

7, 8. (a) Ilaqutariinni piviusumik inussiarnisaartuussagaanni qanoq pissuseqarnaveersaartariaqarpa? (b) Attaveqatigiilluarneq ilaqutariittut ataqatigiilluarnermut qanoq ilasaataava? (c) Ilaqutariinni qanoq inussiarnisaartuusinnaavit?

⁷ Ilaqutariinni inussiarnisaarfigeqatigiinnermut ilaavoq Paulusip kajumissaarutaanik matumannga malinninneq: „Maanna ilississaaq tamaasa iperassavasi: Kamanneq, puffajaneq, ajussuseq, mitaatilliineq kanngunartunillu oqalunneq.“ Ilaqutariit kristumiut oqaloqatigiinnerat ataqqinnippaluttuujuaannartariaqarpoq. Sooq? Attaveqatigiilluarneq ilaqutariinnut nukittuunut ingerlalluartunullu pingaaruteqarluinnarmat. Aaqqiagiinngissuteqaleraanni ajugaaniaannarnani maniguilluni ajornartorsiut aaqqinniarneqartariaqarpoq. Ilaqutariit pilluartut inussiarnisaarfigeqatigiittuarnissartik isumassoqatigiittuarnissartillu pimooruttarpaat. — Kolossemiut 3:8, 12-14.

⁸ Inussiarnisaartuuneq pissusiuvoq allanut ajunngitsuliorusulersitsisartoq. Ilaqutariinni allat qanoq isumassorsinnaanerlugit ikiorsinnaanerlugillu eqqarsaatigisassavarput. Ilaqutariit ataqqinaatigisaannik taamatut inussiarnisaartuussagaanni ilaqutariinniittut ataasiakkaat tamarmik iliuuseqartariaqarput. Tamanna ilaqutariit Guutimit pilluaqquneqarnerannik kinguneqaannassanngilaq, aammattaarli inussiarnissutsip Guutianut, Jehovamut, ataqqinaataassaaq, ilagiinni nunaqqatigisallu takkuanni. — 1 Petrusi 2:12.

Suliffimmi inussiarnersuuneq

9, 10. Suliffimmi ajornartorsiutaalersinnaasut oqaluttuarikkit, nassuiarullu aaqqiiniarnermi inussiarnersuuneq qanoq iluaqutaasinnaasoq.

⁹ Suliffimmi ullut tamaasa ilagisartakkanut inussiarnisaartuunissaq kristumiumut unamminiarnartuusinnaavoq. Suliffimmi sinngasoqarnera unammillertoqarneraluunniit pissutigalugu kristumiu suleqatiminit salluliuutigineqarsinnaavoq allatulluunniit peqqusersusaarfigineqarsinnaalluni sulisitsisumit isiginerlugaalersinneqarluni, taamaalilluni suliffini annaaratarsinnaallugu. (Oqaluussisartup oqaasii 4:4) Pissutsini taamaattuni inussiarnisaartuunissaq oqitsuinnaanngilaq. Taamaattoq Jehovamut kiffaasup eqqaamasariaqarpaa inussiarnersuuneq aamma amerlanertigut eqqortuliornerusartoq. Taamaattumik inussiarniiffiginnitsini sapinngisaq tamaat inussiarnisaarfiginiartariaqarpaa. Pineqartup soqutiginninnermik isumassuinermillu ersersitsiviginera iluaqutaasinnaavoq. Assersuutigalugu suleqat ilaqutaasaluunniit ilaat napparsimappat taanna misiginneqataanermik ersersitsivigineqarsinnaavoq. Napparsimasumik apersuutiginninnerinnarluunniit iluaqutaasinnaavoq. Aap, kristumiut, namminneq aalajangiisuusinnaagunik aaqqiagiilluni eqqisseqatigiillunilu suleqatigiinnermik  pilersitseqataasariaqarput. Ilaannikkut inussiarnersumik paasinnippaluttumillu oqaaseqarneq pissutsinik najummassimanarpallaarunnaarsitsisinnaasarpoq.

¹⁰ Ilaanni sulisitsisup nammineq isummani sulisunut pinngitsaaliissutiginiarsinnaavaa piumasarisinnaallugulu sulisut tamarmik inuiaassutsimik pingaartorsiutiginninnermut nalliuttorsiornermulluunniit Biibilimi najoqqutassianut akerliusumut peqataassasut. Kristumiutut nalunngeqatiginnissuseq pissutigalugu peqataasinnaanngikkaanni tamanna assortuussutaalersinnaavoq. Taamaalisoqartillugu silatusaarnerussagunanngilaq sooq sulisitsisup kissaatigisaatut iliornerup eqqunngitsuunera sukumiisumik nassuiassallugu. Kristumiutummi upperisaqanngitsut pisussamut peqataanissartik ajortussaqartinnaviarunanngilaat. (1 Petrusi 2:21-23) Immaqa oqaasialunnguit atorlugit inussiarnersumik nassuiarneqarsinnaavoq sooq peqataarusunnginnerluni. Tusangiasaarisoqarpat assinganik akeqinagu. Kristumiu silatusaassaaq Romamiut 12:18-imi siunnersuutitsialak una malikkuniuk: „Ajornanngippat — ilissi aalaajangiisuusinnaagussi — inuit tamaasa eqqisseqatiginiarsigit.“

Atuarfimmi inussiarnersuuneq

11. Sooq atuaqatinut inussiarnersuunissaq inuusuttunut oqitsuujuaannanngila?

¹¹ Atuaqatinut inussiarnisaartuuniarneq inuusuttunut oqitsuujuaannanngilaq. Inuusuttut pingaartittarpaat atuaqatiminnit akuerineqarnissartik. Ilaat kammalaatiminnit ataqqisaalerniarlutik qiningasaartarput, immaqalu atuaqatiminnik ikkatilliisarlutik. (Matthæusi 20:25) Inuusuttut allat kammalaatiminnut malugeqqusaartarput atuarfimmi, timersornermi allatigulluunniit, pikkorinnertik usorsitsaarutigalugu, isumaqarpullu pikkorinnertik allanit pitsaanerussutigalugu. Inuit taamaattut ilaminnut inussiarniitsuugajupput. Kristumiut inuusuttut taamatut pissuseqalerumanatik mianersortariaqarput. (Matthæusi 20:26, 27) Apustili Paulusi ima allappoq: ’Asanninneq kamagittartuuvoq, asanninneq saamasuuvoq, asanninneq sinngasarinngilaq; pingaakujuttarinngilaq.’ Tassa kristumiut inussiarniitsunik ilaarsisassanngillat, Biibilimili siunnersuutit malittassavaat, aamma atuaqatiminnut atatillugu. — 1 Korinthimiut 13:4.

12. (a) Inuusuttut ilinniartitsisuminnut inussiarnersuuniarnerminni suna unamminiarnartuutissinnaavaat? (b) Inuusuttut inussiarniitsinniarsarineqaraangamik kimut ikiortissarsiorsinnaappat?

¹² Inuusuttut aamma ilinniartitsisuminnut inussiarnisaartuusariaqarput. Atuartorpassuit oqqassaariumatuujupput. Ilinniartitsisut ataqqineqarunnaarsinniarlugit atuarfimmi najoqqutassianut  akerliusumik iliornertik nuannarisarpaat. Immaqa allat sioorasaarlugit peqatissarsiarisarpaat. Kristumiu inuusuttoq peqataarusunngikkaangami illaruaatigineqarsinnaasarpoq mitaatigineqarsinnaallunilu. Illit kristumiutut ukiumi atuarfiusumi arlaleriarlutit taama pineqartaruit tamanna inussiarnisaartuuniarlutit aalajangersimaninni misilinneqaatigissavat. Eqqaamajulli Jehovamut ilumoorfiginnittuunissap qanoq pingaaruteqartiginera. Qularutiginngilluinnarsinnaavat pissutsini artornartuni taamaattuni Jehovap anersaaminik annertoqqusersorumaaraatit. — Tussiaat 37:28.

Sanilinut inussiarnersuuneq

13-15. Sanilinut inussiarnisaartuuniarnermi suut ajornakusoortitsisinnaappat, akornutaasinnaasullu tamakku qanoq ajugaaffigineqarsinnaappat?

¹³ Illumi, inissiami allamiluunniit najugaqaraluaraanni sanilit qanoq inussiarnisaarfiginissaat soqutiginissaallu eqqarsaatigineqarsinnaapput. Tamannali aamma oqitsuujuaannanngilaq.

¹⁴ Immaqa sanilinnit asissoqqajaaneqarputit ammip qalipaataa, inuiaassutsit upperisalluunniit pissutigalugu. Ilaannikkut aamma inussiarniittarsinnaapput takunngitsuusaavillutilluunniit. Jehovamulli kiffaasutut sapinngisarput tamaat inussiarnisaartuuniarutta iluaqutaassaaq. Taamaalilluta inuummarissiallannartumik allaanerussaagut, tamannalu ataqqinaataassaaq Jehovamut — tamanit inussiarnisaarnerpaajusumut. Naluarput sanilitta inussiarnisaarfigineqarnini pissutigalugu qaqugu isummani allanngortissagaa. Immaqa allaat Jehovamik unnersiutiginnittunngorsinnaavoq. — 1 Petrusi 2:12.

¹⁵ Sanilit qanoq inussiarnisaarfigineqarsinnaappat? Pingaarnerpaamik ilaqutariinniittut tamarmik anersaap inerititaanik ersersitsillutik maligassiuilluarnermikkut. Immaqa tamanna sanilinit maluginiarneqarpoq. Aamma ilaannikkut sanilitit arlaannik ikiorsinnaanerlugit eqqumaffigisinnaavat. Eqqaamajuk inussiarnersuuneq tassaammat allat ingerlalluarnissaannik soqutiginnilluni iliuuseqarneq. — 1 Petrusi 3:8-12.

 Oqaluussinermi inussiarnersuuneq

16, 17. (a) Sooq oqaluussinermi inussiarnisaartuuneq pingaaruteqarpa? (b) Oqaluusseriaatsini assigiinngitsuni qanoq inussiarnisaartoqarsinnaava?

¹⁶ Oqaluussinitta inussiarnersuuneq ilisarnaatigisariaqarpaa inuit oqaluussiffigisavut angerlarsimaffimminniippata, niuertarfinniippata imaluunniit kikkunnit tamanit ornigarneqarsinnaasumiippata. Eqqaamasariaqarparput Jehovamut, tamanut inussiarnersuusumut, sinniisuugatta. — Lukasi 6:35.

¹⁷ Oqaluussinermi inussiarnisaartuuneq qanoq paasisariaqarpa? Assersuutigalugu aqqusinermi oqaluussinermi inussiarnisaartoqarsinnaavoq oqaaseqarpallaarnaveersaarnikkut saaffigisanullu soqutigittartuunikkut. Aqqusineq inuppassuaqarpat sanioqquttunik assersuinaveersaartariaqarpoq. Aammattaaq niuertarfinni oqaluussinermi inussiarnisaarneruvoq oqaatiginiakkamik oqaatiginnipallattarneq, eqqaamallugulu pisiniartitsisut pisinianik sullissinissaminnut piffissaqarnissaat.

18. Oqaluussinermi inussiarnisaartuuniarluni naliliisinnaaneq qanoq pingaaruteqarpa?

¹⁸ Illumiit illumut oqaluussinermi naliliisinnaassuseqartariaqarpoq. Matup silataani oqaluussinerit sivisunaaqinagu, ingammik silarluppat. Pulaakkat naammagittaaqajaalersoq paamitsaqqajaalersorluunniit malugisinnaaviuk? Nunarsuup ilaani oqaluussiffigisartakkani angalaarfigineqakulasuni najugaqaruit ingammik soqutigittartuusariaqarputit, aamma inussiarnersuujuaannartariaqarputit ajunngisaartuujuaannartariaqarlutillu. (Ussatit 17:14) Paasinialaaruk pulaakkat ulloq taanna tusarnaarusunnginnerminut pissutissaqarluarsinnaasoq. Eqqarsaatigisinnaavat oqaluussisartumit allamit qanittukkut pulaarneqaqqinnissaa ilimanartoq. Inussiarniitsumik naapitaqaruit inussiarnersuuniarlutit immikkut ittumik iliuuseqarit. Eqqissisimaannarit, sukangataalernak kamassarnallu. Kristumiu inussiarnersoq pulaakkaminik oqqassaarissanngilaq. (Matthæusi 10:11-14) Immaqa ullut ilaanni taassuma nutaarsiassaq nuannersoq tusaarusulissavaa.

Ilagiinni inussiarnersuuneq

19, 20. Sooq ilagiinni inussiarnisaartuunissaq pisariaqarpa, qanorlu ersersinneqarsinnaava?

¹⁹ Ilagiinni kristumiuni inussiarnisaartuunissaq taamatulli pingaaruteqartigaaq. (Hebræerit 13:1) Nunarsuaq tamakkerlugu qatanngutigiissuarnut ilaagatta inussiarnisaarfigeqatigiinnissarput pingaaruteqangaarpoq.

²⁰ Naalagaaffilersaarfik ilagiinnit arlalinnit atorneqartarpat pingaaruteqarpoq ilagiinni allaniittut inussiarnisaarfiginissaat ataqqinnittumillu pissuseqarfiginissaat. Ataatsimiiffissanik aalajangiiniarnermi suliassanillu pisariaqartunik suliaqarnermi, soorlu eqqiaanermi aserfallatsaaliinermilu, assortuiumatuujuneq suleqatigiinnissamut iluaqutaanngilaq. Iluarisat assigiinngikkaluarpataluunniit tamarmik inussiarnersuusariaqarput soqutigittartuusariaqarlutillu. Taava inussiarnersuuneq ajugaassaaq, allallu ingerlalluarnissaannik soqutiginninnerput Jehovap pilluaqqussavaa.

Inussiarnersuujuarit

21, 22. Kolossemiut 3:12 naapertorlugu suna aalajangiusimasariaqarparput?

²¹ Inussiarnersuuneq pissusiuvoq inuunermut tamarmut attuumassuteqartoq. Taamaattumik kristumiutut pissusitsinnut ilaalluinnartariaqarpoq, aap, inussiarnisaartuuneq ileqquliuttariaqarparput.

²² Ullut tamaasa allanut inussiarnisaartuusa taamaalillutalu apustili Paulusip kajumissaarutaa una malillugu: „Guutip qinigaasut illernartutut asanartutullu atiniarsigit nallittuingaarneq, ajunngissuseq [imaluunniit: inussiarnersuuneq], nikanartinneq, qanilaarneq naammagittassuserlu.“ — Kolossemiut 3:12.  (wE 4/15 04)

[Quppernerup ataani ilanngussaq]

Eqqaamavigit?

• Kristumiumut inussiarnisaartuunissamik suut ajornakusoortitsisarpat?

• Sooq ilaqutariinni inussiarnisaartuuneq pingaaruteqarpa?

• Sooq ilaannikkut atuarfimmi, suliffimmi sanilinulluunniit inussiarnisaartuunissaq ajornakusoorsinnaava?

• Kristumiut oqaluussinermi qanoq inussiarnisaartuusinnaappat?

[Atuaqqissaarnermi apeqqutit]

[Qupp. 26-mi assiliartaq]

Ilaqutariinniittut tamarmik inussiarnisaartuuppata ataasiussuseq suleqatigiinnerlu siuarsarneqassapput

[Qupp. 27-mi assiliartaq]

Suleqatit taassumaluunniit ilaqutaasa ilaat napparsimappat inussiarnisaarfigisinnaavat

[Qupp. 28-mi assiliartaq]

Jehovap ikiortarpai, naak mitallerneqaralutik, ilumoorfiginnillutik inussiarnisaartuusut

[Qupp. 29-mi assiliartaq]

Sanilimik ikiuiumaneq inussiarnisaarneruvoq