Sooq Jehovap Nalunaajaasui aggertuarpat?

Nikallujuillutik Jehovap Nalunaajaasuisa illumit illumut oqaluussinerat silarsuarmi ilisimaneqarpoq. Ilaasa Jehovap Nalunaajaasuisa aggertuarnerat tupigusuutigaat, massa Jehovap Nalunaajaasuisa tusarliussaannut siusinnerusukkut soqutiginninngikkaluarlutik. Sooq oqaluussiuarnerannut nassuiaatissarsisoqarsinnaavoq allakkanni marlunni Ruslandimeersuni.

„Nassuerutigissavara Jehovap Nalunaajaasui siornatigut iluarinngilluinnarakkit,“ Masja, arnaq inuusuttoq 19-inik ukiulik, Khabarovskimeersoq oqarpoq. Atuagassialli Jehovap Nalunaajaasuisa saqqummersitaat arlaqanngitsut atuaramigit isummani allanngortippaa. „Tamarmik soqutiginarluinnarput paasissutissiillutillu,“ Masja allappoq, „pingaarnersaavorli inuuneq pillugu allamik isiginnittaaseqalersitsinerat. Inuuneq sumik siunertaqarnersoq paasiartuaalerpara.“

Illoqarfimmit Ussurijskimit, Vladivostokimit 85 kilometerinik avannarpasinnerusumiittumit, Svetlana allappoq: „Napasuliaq Alapernaarsuiffik aamma Iteritsi! atuartaleqqammerpakka. Atuagassiat taakkua nalitsinni pisariaqartinneqartorujussuupput. Allaaserisat tamaasa pitsaasoraakka. Soqutiginartorujussuupput, paasissutissiillutik ilikkagaqarnarlutillu. Qujanaq! Nuannaarutigaara ilissitut ittunik inoqarmat, aamma taama pitsaatigisumik pisariaqartumillu suliaqarassi.“

Silarsuarmi tamarmi Jehovap Nalunaajaasuisa apustili Paulusip apeqqutaa eqqarsalersitsisoq ilumooruppaat: „Qanoq ilillutik [inuit] tusassappat oqaluussisoqanngippat?“ (Romamiut 10:14) Soormi Jehovap Nalunaajaasui tullianik takkuppata minutsini marlussunni tusarnaarukkit? Immaqa tusarliussaq kajumissinartoq Guutip oqaasianit Biibilimeersoq aamma illit nuannarissavat. (wE 2/15 04)