Jeremiatut tatitusaarit

„[Jehova] neriuffiguuk, nikallornatit tatitusaarit, [Jehova] neriuffiguuk!“ — TUSSIAAT 27:14.

1. Jehovap Nalunaajaasuisa suna nuannaarutigisinnaavaat?

JEHOVAP NALUNAAJAASUI anersaakkut paratiisimiipput. (Esaja 11:6-9) Silarsuarmi maani eqqissiviilliorfiungaartumi kristumiut ilumoortut asseqanngilluinnartunik anersaakkut avatangiiseqarput. Guutimik eqqisseqateqarlutillu eqqisseqatigiipput. (Tussiaat 29:11; Esaja 54:13, 1990) Paratiisilu anersaakkut ittoq taanna alliartorpoq. ’Uummatimikkut Guutip piumasaanik iliortut’ tamarmik alliartortitseqataapput. (Efesosimiut 6:6) Qanoq? Biibilimi najoqqutassianut naapertuuttumik inuunermikkut, taamaaliornissamillu allanik ilinniartitsinermikkut, taakkuattaaq paratiisimi tamatumani pilluaqqussutit iluaqutigisinnaalerniassammatigik. — Matthæusi 28:19, 20; Johannesi 15:8.

2, 3. Kristumiut ilumoortut sunik atugaqartariaqarpat?

² Imaanngilarli anersaakkut paratiisimiikkatta annikilliuuteqartanngitsugut. Suli naammalluinnanngitsuuvugut, napparsimasarpugut utoqqaliartorlutalu naggataatigullu toqusariaqarluta. Aammattaaq ’ullut kingulliit’ pillugit siulittuutigineqartut eqquunneri misigaavut. (2 Timotheusi 3:1) Sorsunnerit, pinerluttuliornerit, nappaatit, kaannersuit annikilliornangaartullu allat inunnut tamanut sunniuteqartarput, aamma Jehovap Nalunaajaasuinut. — Markusi 13:3-10; Lukasi 21:10, 11.

³ Aammattaaq nalunngilluinnarparput anersaakkut paratiisimi kissalaartumiinnitta avataani akerlilersuisut nillertumik anorlertitsisut. Jiisusip ajoqersukkani ima mianersoqquai: „Silarsuarmit pisuunngilasi [Silarsuarmut ilaanngilasi, NV]. Uangali silarsuarmit qinerpassi, taamaattumik silarsuup uumissorpaasi. Ilissinnut oqaatsikka uku eqqaamaniarsigit: Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi.“ (Johannesi 15:18-21) Pissutsit ullumikkut allaanerunngillat. Inuit amerlanersaasa Guutimik pallorfiginneriaaserput paasinngilaat. Ilaasa isornartorsiortarpaatigut mitaatigalutalu, allalli allaat, Jiisusip siulittuineratut, uumissortarpaatigut. (Matthæusi 10:22) Tusagassiuutini uagutsinnik oqaatiginerluisoqartarlunilu ajortitsiniaasoqartarpoq. (Tussiaat 109:1-3) Aap, tamatta misilinneqaatigisinnaasatsinnik nalaataqartarpugut, tamannalu ilatta nikalluutigisinnaavaat. Qanoq pinertusaarsinnaavugut?

4. Pinertusaarniarluta sumi ikiortissarsiorsinnaavugut?

⁴ Jehovap ikiussavaatigut. Tussiaasiortoq isumassarsisinneqarluni ima allappoq: „Iluartoq ajunaarnernik amerlasuunik eqqorneqartarpoq, [Jehovalli] tamakkunannga tamanit annaattarpaa.“ (Tussiaat 34:20; 1 Korinthimiut 10:13) Ilarpassuatta uppernarsarsinnaavaat Jehova tatigilluinnaraangatsigu pisariaqartumik nakussatsitaraatigut qanorluunniit annikillioraluarluta pinertusaarsinnaatilluta. Nikalloqqajaanerup siooranerullu akiorneranni tassunga asanninnerput nuannaarnissarlu siunitsinniittoq iluaqutigisarpavut. (Hebræerit 12:2) Taamaattumik ajornartorsiortaraluarluta aalajaattuarpugut.

Jeremia Guutip oqaasianit nakussatsinneqarpoq

5, 6. (a) Pallorfiginnittut ilumoortut pinertusaarsinnaasimasut kikkut eqqaasinnaavigit? (b) Jeremia pruffiitinngoqquneqarami qanoq qisuariarpa?

⁵ Oqaluttuarisaanerup takutippaa Jehovap kiffai aalajaatsut nuannaarutissarsiuaannarsimasut, allaat artornartunik atugaqaraluarlutik. Taakkua ilaat Jehovap aalajaatsuunngitsunik  eqqartuussinerata nalaani inuupput. Taakkua ilagaat Jeremia taassumalu nalaani inuusut ikittunnguit aammattaaq ukiuni hundredelinni siullerni kristumiut. Oqaluttuat piviusut taakku qiimmassaatissatsitut Biibilimi allanneqarsimapput, misissornerugutsigillu ilinniarfigilluarsinnaavavut. (Romamiut 15:4) Jeremiap misigisai misissoriartigik.

⁶ Jeremia inuusuttuulluni Judami pruffiititut kiffartoqquneqalerpoq. Suliassaq imaannaanngitsuuvoq, guutipilussiortorpassuaqarpormi. Aamma Josija, Jeremiap kiffartulernerata nalaani kunngiusoq, kunngitut aalajaatsuugaluartoq, kingoraartai tamarmik kunngiupput aalajaatsuunngitsut. Palasit pruffiitillu, inunnik ilinniartitsinissamik akisussaasut, amerlanersaat sallusuissummik aamma tapersersuinngillat. (Jeremia 1:1, 2; 6:13; 23:11) Jeremia Jehovap pruffiitinngoqqummani qanoq qisuariarpa? Qunulerpoq! (Jeremia 1:8, 17) Jeremiap qisuariaqqaarnini ima oqaluttuaraa: „Uanga akivunga: ’Ila Guuti, [Jehova], inuusuttuuvunga; oqalunneq naluvunga!’“ — Jeremia 1:6.

7. Jeremiap inuit oqaluussiffigisai qanoq qisuariartarpat, namminerlu qanoq periaaseqarpa?

⁷ Jeremiamut tusarnaartoqarpianngilaq, sakkortuumillu akerlilerneqakulasarpoq. Ilaanni palasimit Pashkurimit persuttarneqarpoq, taassumalu aamma kiggitsivimmut pisippaa. Jeremiap oqaluttuaraa taamatut pineqarami ima eqqarsartarsimalluni: „[Jehova] eqqaaqqissanngilara, aqqani oqaloqqinnianngilanga.“ Immaqa aamma illit ilaannikkut taama misigisarputit taamaatiinnarusunnerusarlutillu. Malugiulli Jeremiap pinertusaarnissaminut suna iluaqutigigaa. Ima oqarpoq: „Misigilersarpara soorlu ilunni innermik ikumasoqartoq [tassa Guutip oqaasia, imaluunniit tusarliussaa], soorlu saanikka ikuallanneqartut. Sapilerpunga, artulerpara!“ (Jeremia 20:9) Guutip oqaasia taamatut ilinnut sunniuteqartarpa?

Jeremiap suleqatai

8, 9. (a) Pruffiiti Urijap suna sanngiissutigaa, qanorlu kinguneqarpa? (b) Sooq Baruki nikallorpa, qanorlu ikiorneqarpa?

⁸ Jeremia pruffiititut kiffartornermini kisimiinngilaq. Suleqateqarpoq, tamannalu qiimmassaatigisarsimassavaa. Ilaannikkulli suleqatai silatusaarpallaarnatik iliuuseqartarput. Assersuutigalugu pruffiitip Urijamik atillip „Jeremiatorluinnaq“ Jerusalemimiunik Judakkunnillu mianersoqqusineq ulapputigaa. Kunngi Jojakimili Urijamik toqutseqqusimmat, Urija siooralerluni Egyptenimut qimaavoq. Qimaaninili annassutiginngilaa. Kunngip sakkutuuisa malersorlugu tigusarigamikku Jerusalemimut oqquppaat, tassanilu toqutaavoq. Jeremiamut tupannarsimassaqaaq. — Jeremia 26:20-23.

⁹ Aamma Jeremiap Barukimik atilik suleqatigalugulu allatsigaa. Baruki tapersersortigilluarpaa, ilaannili aamma taanna anersaakkut ittunik pingaartitsisutut naliliisinnaajunnaarpoq. Naammagittaalliulerpoq imalu oqarluni: „Eqqanaq uanga, [Jehovap] anniaatikka ilammagit naalliungaarnermik. Anersaaruluttarninnit  qasoqaanga qasuerfissaqarnangalu!“ Baruki nikallorpoq anersaakkullu ittunik pingaartitsiunnaalerluni. Jehovalli inussiarnerluni Baruki silatuumik siunnersorpaa, eqqortumillu isiginnittaaseqaqqilerpoq. Taava neriorsoqqissaarneqarpoq Jerusalemi aserugaappat aniguiumaartoq. (Jeremia 45:1-5) Jeremiap qiimmassaatigingaarsimassavaa Baruki anersaakkut oqimaaqatigiissaarileqqissinnaalermat.

Jehovap pruffiitini annertoqqusersorpaa

10. Jehovap Jeremia ikiorumallugu qanoq neriorsorpaa?

¹⁰ Pingaarnerpaavorli Jehovap Jeremia qimanngisaannarmagu. Nalunngilaa Jeremia qanoq misiginersoq, pisariaqartitaanillu ikiorlugulu nakussatsippaa. Assersuutigalugu Jeremia kiffartornermi aallaqqaataani suliassamut piukkunnarsorinngimmat, Jehovap ima oqarfigaa: „Ersigissanngilatit uanga najorakkit annaatissallutillu.“ Jehova pruffiitini suliassaanik paasiteriarlugu ima oqarpoq: „Saassutissavaatsit artorsartissinnaanatilli, uanga najussagakkit annaatissallutillu.“ (Jeremia 1:8, 19) Tuppallernassusia! Jehovallu oqaatsini eqquutitippai.

11. Jehovap Jeremia ikiorumallugu neriorsuutini eqquutitikkaa qanoq nalunngilarput?

¹¹ Taamaattumik Jeremia kiggitsivimmiititaareerluni inunnillu mitaatigineqareerluni tatiginnilluni ima oqarpoq: „[Jehovap] sorsuttartorsuulluni ilagaanga. Tamanna pillugu qinuginnitsikka naakkiutissapput soriarsinnaassanangalu, pakatsissapput.“ (Jeremia 20:11) Kingusinnerusukkut Jeremia toqunniarneqarmat Jehovap najortuarpaa, Jerusalemillu aserugaanera Jeremiap Barukitulli kiffaanngissuseqartutut anigorpaa, malersuisulli mianersoqqussutaanillu sumiginnaasut ajunaanngikkunik Babylonimut aallarussaapput.

12. Nikalluutissaqarsinnaagaluarluta suna eqqaamasariaqarparput?

 ¹² Ullumikkut Jehovap Nalunaajaasorpassuisa Jeremiatut ajornartorsiutit naammagittarlutik atorpaat. Oqaatigineqareersutut ajornartorsiutit tamakkua ilaat nammineq naammalluinnanngitsuunitsinnik pissuteqarput. Allat silarsuarmi pissutsinik ajortunik suliatsinnilluunniit akerlilersuisoqarneranik pissuteqarput. Ajornartorsiutit taamaattut nikallornarsinnaapput. Immaqa Jeremiatut eqqarsaatigilersinnaavarput pinertusaartuarsinnaanerluta. Ilimagisinnaavarput ilaannikkut nikallortarnissarput, nikalloraangattalu Jehovamut qanoq asannitsiginersugut misilinneqartarpoq. Taamaattumik aalajangiusimatigu nikallunganeq pissutigalugu Urijap kiffartorunnaarneratut Jehovamut kiffartorunnaannginnissarput. Jeremiali ilaartigu tatigalugulu Jehovap ikiussagaatigut.

Nikallunganeq qanoq akiorneqarsinnaasoq

13. Jeremiap Daavillu maligassiaat qanoq malissinnaavavut?

¹³ Jeremiap Jehova Guuti aalajangersimasumik qinunikkut oqaluuttarpaa, qamuuna misigissutsiminik oqaluttuuttarpaa nakussatseqqullunilu qinnuigisarlugu. Maligassaalluarpoq. Tussiaasiortoq Daavi, aamma Guutimik nakussatsissutissarsiortartoq, ima allappoq: „[Jehova], oqaasissakka tusaaniakkit, anersaaminikka malugikkit! Tusannga ikioqqullunga torlulasaraangama, kunngiga Guutigalu, illit qinnuigigakkit!“ (Tussiaat 5:2, 3) Daavip inuuneranik oqaluttuap isumassarsiarititaasup ersersippaa Jehovap Daavip ikioqqulluni qinnutai akiuartarai. (Tussiaat 18:2, 3; 21:2-6) Aamma uagutsinnut tuppallersaataangaassaaq artukkerneqaraangatta ajornartorsiutivulluunniit aaqqinneqarsinnaanngitsutut ikkaangata qinunikkut Jehova saaffigisarutsigu uummaterpullu tassunga ammartarutsigu. (Filippimiut 4:6, 7; 1 Thessalonikamiut 5:16-18) Jehovap tusaajumanngittanngilaatigut. Neriorsoqqissaarpaatigulli ’isumassorumalluta’. (1 Petrusi 5:6, 7) Jehovamulli qinoriarluni taassuma oqaasiinut tusaajumannginneq killormoornerussannginnerpa?

14. Jehovap oqaasia Jeremiamut qanoq sunniuteqarpa?

¹⁴ Jehovap qanoq oqaluuttarpaatigut? Jeremiamik oqaluttuaq misissoqqeriartigu. Pruffiitiummat Jehovap toqqaannartumik attavigisarpaa. Jeremiap Guutip oqaasia qanoq killitsissutiginerlugu ima allaatigaa: „Oqaatsitit nanivakka iillugillu; uangali oqaatsitit nuannaarutigaakka uummatikkullu tipaatsuutigalugit illit atinnik ateqartitaagama, [Jehova], Katersaarsuit Guutiat.“ (Jeremia 15:16) Aap, Jeremiap tipaatsuutigaa Guutip aqqanik taaguuteqarnini, oqaasialu pruffiitimut erlinnartuuvoq. Jeremiap apustili Paulusitut tusarliuteqquneqartoq oqaluussissutigerusungaarpaa. — Romamiut 1:15, 16.

15. Jehovap oqaasia qanoq uummammiuliussinnaavarput, nipangersimaannarumanatalu aalajangiussinissatsinnut suna iluaqutigissavarput?

¹⁵ Ullumikkut Jehovap inuit toqqaannartumik attaveqarfigineq ajorpai. Oqaasiali Biibilimi atuarsinnaavarput. Biibili pimoorullugu atuaqqissaartarutsigu ilinniakkavullu eqqarsaatigeqqissaartarutsigik Guutip oqaasia uummatitsinnut aamma ’nuannaarutaallunilu tipaatsuutaassaaq’. Jehovap oqaasia allanut oqaluttuarigaangatsigu taassuma aqqanik taaguuteqarnerput tulluusimaarutigisinnaavarput. Puiunngisaannartigu silarsuarmi ullumikkut kisitta Jehovap aqqanik nalunaajaatiginnittuugatta. Nalunaajaasuisa kisimik Guutip naalagaaffia pilersinneqartoq pillugu nutaarsiassaq nuannersoq oqaluussissutigaat, taakkualu kisimik inuit maniguuttut Jiisusi Kristusimut ajoqersuganngornissaannik ilinniartittarpaat. (Matthæusi 28:19, 20) Tamanna pilluaqqussutaangaarpoq. Jehovap asannilluni immikkut pisinnaatitaaffeqartikkaatigut nipangersimaannarsinnaagatta?

Kikkut ilagisarnerlugit mianersuutigisigu

16, 17. Jeremiap ilagisartagaqarneq qanoq isumaqarfigaa, qanorlu ilaarsinnaavarput?

¹⁶ Jeremiap tatitusaasinnaanerminut iluaqutigisani alla aamma eqqaavaa. Ima oqarpoq: „Nuannattut [Oqaruserumatuut, NV] akornanni  issianeq ajorpunga nuannaarlunga, illit assannit pinngitsaalisaallunga kiserliorlunga issiasarpunga kamannerpit ulikkaarmanga.“ (Jeremia 15:17) Jeremia kisimiikkusunneruvoq ikinngutipalaanit ajortumik sunnertinnissamininngarnit. Ullumikkut uagut aamma taamaappugut. Puiunngisaannarparput apustili Paulusip mianersoqqussutaa una: „Ikinngutipalaaqarneq ileqqorikkaluartunut aseruutissiisarpoq.“ Allaat ukiorpassuarni ileqqorikkaluarluta ikinngutipalaaqarutta ileqqorlussissaagut. — 1 Korinthimiut 15:33.

¹⁷ Ikinngutipalaaqarutta silarsuup anersaavata eqqarsartaaserput ajortunngortissinnaavaa. (1 Korinthimiut 2:12; Efesosimiut 2:2; Jaaku 4:4) Taamaattumik paasinnissinnaassuserput sungiusartigu paasilluinnarsinnaajumallugu kikkut ikinngutipalaajunersut, ingalassimalluinnarlugillu. (Hebræerit 5:14) Paulusi ullumikkut inuusuuguni, qanormita oqassagaluarpa kristumiumut filminik inuunerlunnertalinnik nakuusernertalinnilluunniit isiginnaartumut timersoriaatsinilluunniit nakuusernertalinnik sammisaqartumut? Qatanngut internetimi takornartanik ikinngutissarsiortoq qanormita siunnersussagaluarpaa? Qanormita isumaqarfigissagaluarpaa kristumiu nalunaaquttap-akunnerpassuini videospilertartoq TV-milluunniit isiginnaartartoq, inuttulli nammineq iluamik atuaqqissaartanngitsoq? — 2 Korinthimiut 6:14b; Efesosimiut 5:3-5, 15, 16.

Anersaakkut paratiisimiittuarit

18. Anersaakkut nukittujuarnissatsinnut suut iluaqutigissavavut?

¹⁸ Anersaakkut paratiisi pingaartingaarparput. Ullutsinni silarsuarmi sunaluunniit tassunga nallersuunneqarsinnaanngilaq. Allaat uppeqatiginngisatta kristumiutut asaqatigiinnerput, isumassoqatigiinnerput inussiarnisaarfigeqatigiinnerpullu ajunngitsumik oqaluuserisarpaat. (Efesosimiut 4:31, 32) Taamaattoq nikalloqqajaaneq aatsaat taama akiortigisariaqarparput. Ajunngitsunik ilagisartagaqarneq, qinuneq iluamillu atuaqqissaartarneq anersaakkut nukittujuarnissatsinnut iluaqutigissavavut. Taakku nakussatsissutigissavavut Jehovamik tatiginnilluinnarluta misilinneqarnernik sunilluunniit naammagalugit atuinissatsinnut. — 2 Korinthimiut 4:7, 8.

19, 20. (a) Pinertusaarnissatsinnut suna iluaqutigissavarput? (b) Allaaserisami tulliuttumi kikkut saaffigineqarpat, kikkullu aamma soqutigissavaat?

¹⁹ Tusarliussatsinnik Biibilimeersumik uumiginnittunik siooralersinneqarluta uppernikillisinneqanngisaannartariaqarpugut. Soorlu akeqqat Jeremiamik malersuisimasut uagutsinnik akerlilersuisut Guutimik akerlilersuipput. Taamaattumik ’artorsartissinnaanngilaatigut’. Jehova, akeqqatsinnit nukittunerungaartoq, ima oqarpoq: „[Jehova] neriuffiguuk, nikallornatit tatitusaarit, [Jehova] neriuffiguuk!“ (Tussiaat 27:14) Jehova neriuffigilluinnartigu uummatikkullu aalajangiusimatigu eqqortuliortuaannarnissarput. Upperilluinnarsinnaavarput Jeremiatut Barukitullu katersuiumaarluta qasunngikkutta. — Galatiamiut 6:9.

²⁰ Kristumiorpassuit nikallunganeq akiortuartariaqarpaat. Inuusuttulli immikkut unamminiagassaqarput. Aammattaarli periarfissarpassuaqarput. Allaaserisami tulliuttumi inuusuttortavut toqqaannartumik saaffigineqarput. Angajoqqaat ilagiinnilu kristumiut tunniulluinnarsimasut inuusuttunik ilagiinniittunik oqaatsimikkut maligassiuinermikkullu toqqaannartumillu tapersersuinermikkut ikiuisinnaasut tamarmik aamma soqutigissavaat.

Qanoq akissavit?

• Sooq ilimagisinnaavarput nikalluutigisinnaasatsinnik pisoqartarnissaa, sumilu ikiortissarsiorsinnaavugut?

• Jeremiap oqaluussiffigiuminaatsumiitilluni nikallunganini qanoq akiorpaa?

• Annikilliuuteqaraluarluta suna ’nuannaarutigalugulu tipaatsuutigisinnaavarput’?

[Atuaqqissaarnermi apeqqutit]

[Qupp. 4-mi assiliartaq]

Jeremia pruffiitiunissaminut inuusuppallaarsoralunilu misilittagakippallaarsoraaq

[Qupp. 5-imi assiliartaq]

Jeremiap malersorneqaraluarluni nalunngilaa Jehovap „sorsuttartorsuulluni“ ilagigaani