Nakussatseqatigiigitsi

’Taakkorpiaat uannut nakussatsissutaapput.’ — KOLOSSEMIUT 4:11, NV.

1, 2. Sooq Paulusi parnaarussivimmut pulaassagunikku ikinngutai sapiissuseqartariaqarpat?

PARNAARUSSAMIK ikinnguteqarneq navianarsinnaavoq, taannaluunniit naapertuilluanngitsumik parnaarussaasimagaluarpat. Immaqa parnaarussivimmi sulisut pasillerpaluttumik isigisarput, pinerluttuliortoqannginnissaalu qulakkeerniarlugu suninngui tamaasa alapernaattarpaat. Taamaattumik ikinngut parnaarussaq pulaassagaanni qanittumillu attaveqarfigiuassagaanni sapiissuseqartoqartariaqarpoq.

² Ukiulli 1900-ngajaat matuma siorna apustili Paulusip ikinngutaasa ilaat taamatorluinnaq iliorput. Paulusi parnaarussaammat nangaanatik pulaartarpaat, pisariaqartumik tuppallersarniarlugu qiimmassarniarlugulu, anersaakkullu nukittorsarniarlugu. Ikinngutit aalajaatsut taakku kikkuuppat? Uagullu sapiissusaat, aalajaannerat  ikinngutaanerallu qanoq ilinniarfigisinnaavarput? — Ussatit 17:17.

’Nakussatsissutaasoq’

3, 4. (a) Ikinngutit tallimat kikkut Paulusip eqqaavai, taakkualu qanoq ikiorpaat? (b) ’Nakussatsissutaaneq’ qanoq isumaqarpa?

³ Paulusip ukiumi 60-imi pikitsitsiniartutut eqqunngitsumik unnerluutigineqarluni Romami parnaarussaanerata nalaani susoqarsimanersoq misissoriartigu. (Apustilit Suliaat 24:5; 25:11, 12) Paulusip kristumiut tallimat tapersersortigisimasani atiisigut taallugit eqqaavai: Tykikosi, nammineq Asiamiit aallartitaa ’suleqataasorlu Naalakkami’; Onesimosi, ’qatanngut unneqqarissoq asanartorlu’ Kolossemeersoq; Aristarki, Makedoniamioq Thessalonikameersoq, Paulusip ’parnaarussaaqatigisimasaa’; Markusi Paulusip ajoqersuiartortitatut suleqataata Barnabap illortaava, iivangkiiliumik ateqaatigisaminik allattoq; aamma Justusi, „Guutip naalagaaffia pillugu“ apustilip suleqataasa ilaat. Taakku tallimat pillugit Paulusi oqarpoq: ’Taakkorpiaat uannut nakussatsissutaapput’. — Kolossemiut 4:7-11, NV.

⁴ Paulusip ikinngutimi aalajaatsut ikiuinerat oqaluttuarigamiuk oqaaseq takorluuinartoq atorpaa. Grækerit oqaasiat parēgoriʹa ’nakussatsissutaasoq’-mik nutserneqartoq atorpaa, oqaaserlu taanna Biibilimi tassanerpiaq ataasiaannarluni atorneqarpoq. Oqaaseq arlalinnik isumaqarpoq, nakorsaatinulli atatillugu atorneqarnerusarpoq. * ’Tuppallersaanermik, iluaallatsitsinermik, tapersersuinermik ikiuinermilluunniit’ nutserneqarsinnaavoq. Paulusip nakussatsinneqarnissani pisariaqartippaa, ikiorneqarnissaalu angutit taakkua tallimat isumagaat.

Paulusi sooq ’nakussatsineqartariaqartoq’

5. Paulusi apustiliugaluarluni qanoq pisariaqartitsiva, tamattalu ilaannikkooriarluta qanoq pisariaqartitsisarpugut?

⁵ Ilaasa immaqa tupaallaatigaat Paulusi apustiliulluni nakussatsinneqarnissaminik pisariaqartitsimmat. Pisariaqartitsivorli. Paulusi upperluartuugaluarpoq, ajortumillu pineqarnerpassuani naammagalugit atortarlugit. ’Persuttarneqartarsimaqaaq’ akuttunngitsumillu ’inuunini navialisittarsimavaa’, naalliuutillu allat atortarsimavai. (2 Korinthimiut 11:23-27) Inuinnaavorli, inuillu tamarmik ilaannikkooriarlutik nakussatsinneqartariaqarput, allanillu ikiorneqarlutik uppernerminnik aalajaallisaasariaqartarlutik. Allaat Jiisusi taamatut pisariaqartitsisimavoq, toqutaatinnagumi unnuaq kingulleq inngili Getsemanep Naatsiiviani tassunga takutippoq, „nakussatsillugulu“. — Lukasi 22:43.

6, 7. (a) Paulusip Romami suna pakatsissutigaa, kimillu qiimmassarneqarpa? (b) Paulusip Romamiinnerani qatanngutai kristumiut tassunga qanoq ’nakussatsitsippat’?

⁶ Oqaatigineqartutut Paulusi nakussatsinneqarnissaminik pisariaqartitsivoq. Tigusatut Romamut pigami juuteqatiminit inussiarnisaarfigineqarluni tikilluaqqusaanngilaq. Juutit amerlanersaasa Guutip naalagaaffia pillugu oqariartuut ilassinngilaat. Juutit nuimasortaasa Paulusi parnaarussaaffianut pulaareeraat Apustilit Suliaat-ni oqaluttuami imaattoq oqaatigineqarpoq: „Ilaat oqaasiinit qularunnaarsinneqarput, allalli uppinngillat. Isumaqatigiikkunnaarlutik avissaarput.“ (Apustilit Suliaat 28:17, 24, 25) Jehovap ajunngisaarneranik pisassarinngisaraluaminnik pingaartitsinnginnerat Paulusip anniaatigisimassavaa. Tamatumunnga atatillugu misigissusii sakkortuut ukiualuit siornatigut Romami ilagiinnut allagaanit ersarissumik ersersinneqarput: „Angisuumik aliasuuteqarama uummatikkut naalliuutigiuakkannik. Kissaatigiumasinnaagaluarparami uanga nammineq perloqqusaassasunga Kristusimillu avissaartinneqarlunga, tamanna qatanngutima [juutit] inuiaqatimalu iluaqutigisinnaappassuk.“ (Romamiut 9:2, 3) Romamili aalajaatsunik ilumoortunillu ikinngutitaarportaaq, taakkua sapiittuuneri asannittumillu isumassuineri Paulusip tuppallersaatigai. Taakkua anersaakkut qatanngutigai ilumoortut.

 ⁷ Qatanngutit taakkua tallimat qanoq nakussatsitsipat? Paulusi kalunneqarmat ungasinnianngillat, inuttut pisariaqartitaasa matussuserneqarnissaat asannillutik pinaaseratillu isumagaat, parnaarussaasimaninilu pissutigalugu nammineerluni suliarisinnaanngisaanik ikiorpaat. Assersuutigalugu aatsisuusarput, Paulusillu ilagiinnut assigiinngitsunut allagaanik oqaatsitigullu najoqqutassiaanik aatsisuusarput; aamma Romami allanilu qatanngutit qanoq ingerlaneri pillugit Paulusip nalunaarutaanik qiimmaallannartunik aatsisuusarput. Aamma pisariaqartitaanik, soorlu ukiorsiutinik, allaffissanik allaatinillu, pissarsissussimannguatsiarpaat. (Efesosimiut 6:21, 22; 2 Timotheusi 4:11-13) Ikiuineq taamaattoq apustilimut parnaarussamut nakussatsissutaallunilu kaammattuutaavoq, taamaalilluni allanut, ilaatigut ilagiinnut tamanut, ’nakussatsitsilluni ikiuutaaleqqippoq’. — Romamiut 1:11, 12.

Qanoq ’nakussatsitsisoqarsinnaasoq’

8. ’Nakussatsitsissutaasumik ikiorneqarnissamik’ Paulusip maniguulluni nassuernera qanoq ilinniarfigisinnaavarput?

⁸ Paulusi taassumalu suleqatai tallimat pillugit oqaluttuaq qanoq ilinniarfigisinnaanerlugu takoriartigu. Atugarliornermik nalaanneqartut ikiussagaanni sapiissuseqarnissaq imminullu pilliutigeriaanaanissaq pisariaqarpoq. Aammattaaq nammineq ajornartorsiortilluni ikiorneqarnissaq nassuerutigissagaanni maniguunneq pisariaqarpoq. Paulusip ikiorneqartariaqarnini nassuerutigiinnanngilaa, aammali ikiorneqarnini qujamasulluni ilassivaa, ikiuisinilu nersualaarlugit. Allanit ikiorneqarneq sanngiinnermut ersiutaasutut imaluunniit kanngunartutut isiginngilaa. Uaguttaaq taamaaliussanngilagut. Tuppallersarneqarnissamik pisariaqartitsinngisaannarluta isumaqarutta assigiinnarpaa oqarluni inuusugut sunik tamanik sapigaqanngitsut. Inuup naammalluinnartup ilaannikkooriarluni allaat ilungersorluni ikioqqunissaminik pisariaqartitsineranik Jiisusip maligassiaa puigussanngilarput. — Hebræerit 5:7.

9, 10. Ikiortariaqarnermik nassuerutiginninneq qanoq ajunngitsumik kinguneqarsinnaava, tamannalu qanoq ilaqutariinni ilagiinnilu sunniuteqarsinnaava?

⁹ Ilagiinni akisussaaffeqartut killeqarnerminnik allanillu tapersersorneqartariaqarnerminnik nassuerutiginninnerat ajunngitsumik kinguneqarsinnaasarpoq. (Jaaku 3:2) Oqartussaassusermik paarseqquneqartut oqartussaassutsimullu taassumunnga naalatsigitittut akornanni ataqatigiinneq nukittorsarneqassaaq, qanittumillu ataqatigiilluartoqalissaaq. Siuttut maniguullutik pinaaseratillu ikiortippata, tamanna allanut assingusunik atugalinnut maligassiuilluarnerussaaq. Tamatuma takutippaa taakkua inuusut allatulli ittut, nangaanani saaffigineqarsinnaasut. — Oqaluussisartup oqaasii 7:20.

¹⁰ Immaqa meeqqat ajornartorsiutiminnik ussernartunillu qaangiiniarnerminni angajoqqaaminnit ikiorneqarnissartik akueriuminarnerutissinnaavaat, tusarunikku angajoqqaatik meeraallutik assingusunik unamminiagaqartarsimasut. (Kolossemiut 3:21) Tamanna attaveqaqatigiilluarnermik pilersitsissaaq. Angajoqqaat Biibili qanoq oqarnersoq takutikkuminartinnerussavaat, qularnanngitsumillu meeqqat ilitsersuut Biibilimeersoq akueriuminartinnerussavaat. (Efesosimiut 6:4) Ilagiinni ilaasortat utoqqaanertanit ikiorneqarnissaq aamma orniginerussavaat nalunngikkunikku, utoqqaanertat namminneq ajornartorsiuteqartartut ernumassuteqartartullu ilaatigullu nalornisartut. (Romamiut 12:3; 1 Petrusi 5:3) Soorlu angajoqqaani meeqqanilu takuneqarsinnaasartoq tamanna attaveqaqatigiilluarnermik kinguneqarsinnaavoq, Biibili naapertorlugu ilitsersuisoqarsinnaavoq uppernerulertoqarsinnaavorlu. Puigussanngilarput qatanngutitta nakussatsinneqarnissaq aatsaat taama pisariaqartitsigileraat. — 2 Timotheusi 3:1.

11. Sooq ullumi inuppassuit ’nakussatsinneqarnissaq’ pisariaqartippaat?

¹¹ Sumiluunniit najugaqaraluarutta, kinaagaluarutta qanorluunniillu ukioqaraluarutta ilaannikkut ilungersuumminartunik nalaataqartarpugut. Inuuneq ullutsinni taamaappoq.  (Saqqummersitat 12:12) Timikkut misigissutsikkulluunniit taamatut ajornartorsiuteqartarnikkut uppernitta pitsaassusaa misilinneqartarpoq. Assersuutigalugu suliffimmi, atuarfimmi, ilaqutariinni ilagiinniluunniit ajornartorsiortoqalersinnaavoq. Napparsimaruloorneq imaluunniit misigisimasat avaanngunartut artorsaataasinnaapput. Ilali iluaallannaqaaq aappaq, utoqqaanertaq ikinngulluunniit asannittumik qiimmassaagaangat, oqaatsit isumatusaartut atorlugit imaluunniit suliassatigut ikiuilluni. Tamanna ikimut tarnutitut ittarpoq. Qatanngutivit ilaat ajornartorsiortoq malugigukku, taava nakussatsitsisuugit. Illit nammineq aarlerissuteqaruit qatanngutit anersaakkut piginnaaneqarluartut ikiortiserikkit. — Jaaku 5:14, 15.

Ilagiit qanoq ikiuussinnaasut

12. Qatanngutivut nakussatsiniarlugit qanoq tamatta immikkut iliuuseqarsinnaavugut?

¹² Ilagiinni kikkulluunniit, aamma inuusuttut, allanut nakussatsitaasinnaapput. Akuttunngitsumik ataatsimiittaruit oqaluussinermilu peqataasaruit tamanna allat uppernerannut annertuumik nakussatsissutaassaaq. (Hebræerit 10:24, 25) Kiffartuummi illernartumi aalajaannerpit takutissavaa, Jehovamut ilumoortuusutit aamma ajornartorsiortaraluarlutit anersaakkut eqqumaniartuusutit. (Efesosimiut 6:18) Taamatut aalajaatsuuneq allanut nakussassaataasinnaavoq. — Jaaku 2:18.

13. Sooq ilaat unittarpat, taakkulu ikiorniarlugit qanoq iliortoqarsinnaava?

¹³ Ilaasa ulluinnarni tatineqarnerit ajornartorsiutilluunniit allat unikaallaatigisinnaavaat imaluunniit oqaluussiunnaarutigisinnaavaat. (Markusi 4:18, 19) Immaqa ilagiit ataatsimiinnerinut takkuttanngillat. Qularnanngitsumilli Guutimut suli asannipput. Uppernerat sakkortunerulersinniarlugu qanoq iliorsinnaavugut? Pulaarlugit utoqqaanertat asannittumik ikiorumasinnaavaat. (Apustilit Suliaat 20:35) Aamma ilagiinni allat ikiortiserisinnaavaat. Isumassuilluni pulaarnerit taamaattut tassaasinnaapput tarnut nipaallisaat uppernermikkut sanngiilliortunik nakussatsiteqqiisinnaasoq.

14, 15. Allanik nukittorsaanissamut atatillugu Paulusi qanoq ilitsersuuteqarpa? Assersuuteqarit ilagiit ilitsersuut taanna qanoq malissimaneraat.

¹⁴ Biibilimi kajumissaarneqarpugut ’ernumasut tuppallersassagivut, sanngiitsullu isumagissagivut’. (1 Thessalonikamiut 5:14) Immaqa „ernumasut“ misigisimasarput ikiorteqaratik ajornartorsiutit nalaattakkatik qaangerniarsinnaanagit. Taamatut ikiorsinnaavigit? Oqariartaaseq „isumaginiarsigit sanngiitsut“ aamma ima nutserneqarsinnaavoq, sanngiitsut „aalajangerlugit tigukkit“, „eqitaakkit“. Jehovap savaatini asavai pingaartippaalu. Naleqanngitsutut isiginngilai, aamma arlaannaataluunniit peerunnissaa kissaatiginngilaa. Anersaakkut sanngiitsut nukittornerunissaasa tungaanut ilagiit ’aalajangerlugit tigumminittut’ ikiorsinnaavigit? — Hebræerit 2:1.

¹⁵ Utoqqaanertap aappariit marluullutik ukiuni arfinilinni unittooqqasimasut pulaarpai. Utoqqaanertaq allappoq: „Ilagiit tamarmik inussiarnersumik asannittumillu taakkununnga isumassuinerat ima sunniuteqartigimmat  savaatinut uterput.“ Qatanngutip arnap unittooraluarsimasup ilagiinnit pulaarneqarnertik qanoq isumaqarfigaa? Ullumikkut oqarpoq: „Aallarteqqinnissatsinnut iluaqutaasoq tassaavoq, qatanngutit pulaartut avoqqaarinninngisaannarlutillu isornartorsiunngisaannarmata. Akerlianik paasinnittuupput Biibililu tunngavigalugu kaammattuipput.“

16. Nakussatsinneqartariaqartunik kina ikiueriaannaava?

¹⁶ Aap, kristumiut misiginneqataasut allanik nakussatitsinertik nuannaarutigaat. Namminerlu atugarisat allanngoriartortillugit imaassinnaavoq qatanngutinit nammineq nakussatsineqartugut. Paasisariaqarparpulli pisoqartarsinnaasoq inuit ikiuuffigisinnaanngisaannik. Kisianni nakussatsitsissutissatsinnik qaqugukkulluunniit aallerfissaqarpugut, tassalu Jehova Guuti. Taanna ikiuinissaminut piareersimajuarpoq. — Tussiaat 27:10.

Jehova — nakusatsitsisoq annerpaaq

17, 18. Jehovap ernini Jiisusi Kristusi qanoq nakussatsippaa?

¹⁷ Jiisusi qisummut kikiattugaagami nillerpoq: „Ataataq, anersaara assannut tunniuppara.“ (Lukasi 23:46) Taava toquvoq. Akunnialuit tamanna sioqqullugu tigusarineqarsimavoq, ikinngutaasalu ersillutik qimassimavaat qimaallutillu. (Matthæusi 26:56) Jiisusi immineerneqarpoq ataasiinnarlu nukissaminik aallerfigisinnaavaa — Ataatani qilammiusoq. Jehovamilli tatiginnilussinnanngilaq. Jiisusip Ataataminut ilumoorfiginninnera akilerneqarpoq, Ataataminillu asannittumik tapersersorneqarpoq. — Tussiaat 18:26; Hebræerit 7:26.

¹⁸ Jiisusip nunami kiffartornermini assuarnaassutsi anerningernissaminut attartuarsinnaaniassammagu Jehovap ernermi pisariaqartitai isumagai. Jiisusip kuisinnermi, kiffartornerata aallartinneranik malunnartitsisup, kingunitsianngua Ataatami nipaa tusarpaa. Jehova oqarpoq, Jiisusi akueralugulu asallugu. Jehovap inngilit aallartippai Jiisusi tapersersorneqarnissaminik pisariaqartitsimmat nakussatsinniarlugu. Nunami inuunermi naalernerani Jiisusi annerpaamik misilinneqarpoq. Torlulanerili qinnutaalu Jehovap tusarpai. Tamakku tamarmik Jiisusimut ilumut nakussatsitsissutaapput — Markusi 1:11, 13; Lukasi 22:43.

19, 20. Qanoq nalunngissinnaavarput Jehovap pisariaqartitsiffitsinni nakussatsissagaatigut?

¹⁹ Jehova uatsinnuttaaq nakussatsitsisoorusuppoq. (2 Nalunaarsuutit 16:9) Pissaanerup nukiillu tamarmik pilerfiat pisariaqartitsiffitsinni nakussatsitsisinnaavaatigut. (Esaja 40:26) Sorsunnerit, piitsuuneq, nappaatit toqulu uagulluunniit nammineq naammalluinnanngissuserput pissutigalugit annertuumik tatineqarsinnaavugut. Artornartut ’akeqqatut nakuarsuartut’ imaannaanngippasitsigippata, Jehova nakussatsitsisigalugulu pissatsitsisigisinnaavarput. (Tussiaat 18:18; 2 Mosesi 15:2) Anersaani illernartoq aqqutigalugu nakussatsissinnaavaatigut. Anersaaq taanna aqqutigalugu Jehovap ’qasusoq nattoralittut suluninniassammat nakussatsissinnaavaa’. — Esaja 40:29, 31.

²⁰ Guutip anersaava nukiuvoq nunami qilammilu nallerneqarsinnaanngitsoq. Paulusi nalunaarpoq: „Tamaasa pissatsitsisikkut atussallugit sapinngilakka.“ Aap, Ataatatta qilammiusup asannittup paratiisimi neriorsuutigisamini erniinnaq takkuttussami ’sunik tamanik nutaanngortitsinissami’ tungaanut ajornartorsiutit alianartut tamaasa naammagittarluta atorsinnaaniassagatsigit ’pissaanermik asseqanngitsumik’ tunisinnaavaatigut. — Filippimiut 4:13; 2 Korinthimiut 4:7; Saqqummersitat 21:4, 5.  (wE 5/1 04)

[Quppernerup ataani ilanngussaq]

Eqqaamavigit?

• Romami qatanngutit qanoq Paulusimut ’nakussatsitsissutaappat’?

• Ilagiinni qanoq ’nakussatsitsissutaasinnaavugut’?

• Sooq Jehova nakussatsitsisuua annerpaaq?

[Atuaqqissaarnermi apeqqutit]

[Qupp. 13-mi assiliartaq]

Qatanngutit ilumoorlutit tapersersuinermikkut, qiimmassaanermikkut inuttullu ikiuinermikkut Paulusimut ’nakussatsissutaapput’

[Qupp. 16-mi assiliartaq]

Utoqqaanertat savaatinik nakussatsitsiniarnermi siuttuupput