Utoqqarnik isumassuineq — kristumiutut akisussaaffik

„Utoqqalinissinnut taannaajuassaanga, kissumiassavassi qeersuunngorserlusi.“ — ESAJA 46:4.

1, 2. Ataatatta qilammiittup uagutsinnik isumassuinera angajoqqaallu qitornaminnik isumassuinerat qanoq assigiinngissuteqarpat?

ANGAJOQQAAT asannittut qitornatik naalungiarsuuneranniit inersimasunngornissaannut isumassortarpaat. Aap, allaat meeqqat namminneq ilaqutaqalereeraluartut, angajoqqaat tapersersortuartarpaat asannittumillu isumassortuartarlugit.

² Angajoqqaat qitornatik ikiorniarlugit iliuuserisinnaasaat killeqarput, Ataatattali qilammiittup kiffani aalajaatsut annertoqqusersorsinnaajuaannarpai asannittumillu isumassorsinnaajuaannarlugit. Itsaq innuttaminut toqqakkaminut Jehova ima oqarpoq: „Utoqqalinissinnut taannaajuassaanga, kissumiassavassi qeersuunngorserlusi.“ (Esaja 46:4) Kristumiunut utoqqarnut neriorsuutaavoq nuanningaartoq, ilaa! Jehovap ilumoorfiginnitsini pakatsisinngisaannarpai. Neriorsuivorli inuunerat tamaat, aamma utoqqaaneranni, napatikkumallugit, annertoqqusersorumallugit siulersorumallugillu. — Tussiaat 48:15.

3. Allaaserisami matumani suna misissussavarput?

³ Jehovap utoqqarnik asannittumik isumassuinera qanoq ilaarsinnaavarput? (Efesosimiut 5:1, 2) Misissoriartigu utoqqaat silarsuaq tamakkerlugu qatanngutigiissuarniittut pisariaqartitaannik  matussusiiniarlutik qitornaasut, ilagiinni nakkutilliisut kristumiullu allat qanoq iliorsinnaanersut.

Qitornat akisussaaffiat

4. Meeqqat kristumiut angajoqqaaminnut qanoq akisussaaffeqarpat?

⁴ „Ataatat anaanallu ataqqikkit!“ (Efesosimiut 6:2; 2 Mosesi 20:12) Allakkanit Hebræerisuunit paasiuminartumik pingaarutilimmilli taama issuaalluni apustili Paulusip meeqqat angajoqqaaminnut akisussaaffiannik eqqaasippai. Oqaatsilli taakku utoqqarnillu isummassuineq imminnut qanoq attuumassuteqaramik? Tamanna kristumiut sioqqullugit pisimasunit qiimmaallannartunit paasinarsivoq.

5. (a) Qanoq nalunngissinnaavarput Josefip ataataminut akisussaaffini puiorsimanngikkaa? (b) Nammineq angajoqqaanik ataqqinninnermut suna ilaava, Josefilu tamatumuuna qanoq maligassiuilluarpa?

⁵ Ukiut 20-t sinnerlugit Josefip ataatani utoqqaq, ataataanerpaaq Jaaku, attaveqarfiginngilaa. Josefilli ataataminik asanninnginnera pissutaanngilaq, qatangutiminummi kiunini paasitikkamiuk ima aperai: „Ataataga suli inuua?“ (1 Mosesi 43:7, 27; 45:3) Taamanikkut Kana’animi kaannersuaqarpoq. Taamaattumik ataataminut ima oqariartortitsivoq: „Tuaviorlutit uannukarniarit Goshenimilu nunassillutit . . . uannut qanittumiinniassagassi. Tassani inuussutissaqartikkumaarpakkit.“ (1 Mosesi 45:9-11; 47:12) Aap, angajoqqaanik utoqqalisunik ataqqinninnermut ilaavoq nammineersinnaajunnaaraangata taakkuninnga sernissuineq nunallu piisigut isumassuineq. (1 Samueli 22:1-4; Johannesi 19:25-27) Josefip taamatut akisussaaffeqarnini nuannaarutigalugu akueraa.

6. Josefip ataatani asanninnivimmik qanoq ersersitsivigaa, qanorlu ilaarsinnaavarput?

⁶ Jehovap ikiuineratigut Josefi Egyptenimi pisuujunerpaat pissaaneqarnerpaallu ilagilersimavaat. (1 Mosesi 41:40) Isumaqanngilarli ataatami 130-nik ukiullip ataqqinissaanut pingaaruteqarpallaarluni ulapippallaarluniluunniit. Josefip tusaramiuk Jaaku (Israeli) aggersoq „qamutini qimuttussalersippai, Goshenimullu aallarpoq ataatani Israeli naapikkiartorlugu. Takugamiullu qungasiagut eqippaa, pakkusimallugulu sivisuumik qiavoq“. (1 Mosesi 46:28, 29) Taama tikilluaqqusineq qallikkuinnaq ataqqinninnermut ersiutaanngilaq. Josefip ataatani utoqqalisoq asangaarpaa, tamannalu kanngusuutiginngilaa. Utoqqarnik angajoqqaaqarutta taama ammatigisumik asanninnerput ersersittarparput?

7. Sooq Jaaku Kana’animi ilisaajumava?

⁷ Jaakup toqunissi tikillugu Jehovamut tunniusimangaarnini attattuarpaa. (Hebræerit 11:21) Guutip neriorsuutai upperigamigit Kana’animi ilineqarnissani qinnutigaa, Josefillu ataatani ataqqigamiuk kissaatigisaatut iliorpoq naak pisariugaluartoq akisoorujussuugaluartorlu. — 1 Mosesi 47:29-31; 50:7-14.

8. (a) Angajoqqaatsinnik utoqqalisunik isumassuinitsinnut suna pissutaanerpaava? (b) Piffissaq tamaat kiffartortup angajoqqaani utoqqalisut isumaginiarlugit qanoq iliorpa? (Qupperneq 25-imi ungalusaq takuuk.)

⁸ Josefip ataataminik isumassuinerminut suna kajumississutigaa? Soorunami ataataminut, inuunermik tunisisumut perorsaasumullu, asanninnera akiitsugaqartutullu misiginera peqqutaaqataapput. Aammattaarli qularnanngitsumik  Josefip Jehova nuannaartikkusuppaa. Uaguttaaq taamaakkusuttariaqarpugut. Paulusi ima allappoq: „Uillarneq qitornaqarpat ernutaqarpalluunniit taakkua ilikkaqqaartariaqarpaat ilaquttaminni Guutimik mianerinnilluni inuuneq utoqqartamillu akillugit ajunngitsuliorfiginissaat, tamanna Guutip iluarimmagu.“ (1 Timotheusi 5:4) Aap, Jehovamut asanninnitta taassuminngalu mianerinninnitta angajoqqaatsinnik utoqqalisunik, qanorluunniit unamminiarnartortaqassagaluarpat, isumassuilersissavaatigut. *

Utoqqaanertat soqutiginninnertik qanoq ersersissinnaagaat

9. Jehovap kikkut savaatinik, aamma utoqqarnik, paarsisussatut toqqarpai?

⁹ Jaaku inuunertuujulluni toqungajalerluni Jehova ’inunngornerminit ulloq manna tikillugu paarsisimisut’ taavaa. (1 Mosesi 48:15) Ullumikkut Jehovap kiffani nunamiittut nakkutilliisut kristumiut, imaluunniit utoqqaanertat, ernerminit ’paarsisuunerpaamit’ Jiisusi Kristusimit siulersorneqartut atorlugit siulersortarpai. (1 Petrusi 5:2-4) Nakkutilliisut Jehova qanoq ilaarsinnaavaat savaatillu utoqqartaat isumassorlugit?

10. Kristumiut utoqqaat nunap piisigut ikiorniarlugit qanoq iliortoqartarpa? (Takuuk qupperneq 27-imi ungalusaq.)

¹⁰ Ilagiit kristumiut pilersinneqaqqammersut apustilit toqqarpaat ’angutit arfineq-marluk iluarisaasut anersaamik ilisimassusermillu peqangaartut’ uillarnernut kristumiunut pissaaleqisunut „ullut tamaasa nerisassanik agguaanermi“ nakkutilliisussat. (Apustilit Suliaat 6:1-6) Kingusinnerusukkut Paulusi nakkutilliisumut Timotheusimut allappoq uillarnerit utoqqaat maligassaalluartut nunap piisigut ikiorneqartussaasutut naatsorsuuteqqullugit. (1 Timotheusi 5:3, 9, 10) Taamatulli kristumiut utoqqaat pisariaqartitaminnik ikiorneqarsinnaaqqullugit ullumikkut ilagiinnik nakkutilliisut nuannaarutigalugu aaqqissuussiumasarput. Utoqqarnilli aalajaatsunik isumassuissagaanni iliuuseqarnerusariaqarpoq.

11. Uillarneq piitsoq tunissutinnguamik tunisisoq pillugu Jiisusi qanoq oqarpa?

¹¹ Jiisusi nunami kiffartornini naangajalersoq naalaffimmi ingippoq „isiginnaarlugillu inuit aningaasanik nakkaatitsivimmut nakkaatitsisut“. Ataaserlu malugaa. Oqaluttuami ima allassimavoq: „Uillarneq piitsoq tikiuppoq aningaasannguanillu marlunnik oorinik marlussunnik naleqartunik nakkartitsilluni.“ Jiisusip ajoqersukkani qaaqquai imalu oqarfigalugit:  „Ilumut oqarfigaassi: Uillarneq una piitsoq nakkaatitsisunit tamanit annerusumik tunisivoq. Allammi tamarmik sinnerussaminnik ikisipput, uumali piitsuulluni ikivai pigisani tamaasa, inuuniutissaraluani tamaasa.“ (Markusi 12:41-44) Uillarnerup tunissutaata nalivia mikisuaraararsuuvoq, Jiisusilli nalunngilaa Ataatami qilammiittup uummatikkut iluunngaarluni tunniusimanermik ersersitsinerit taamaattut qanoq pingaartitsigigai. Uillarneq piitsoq taanna qanorluunniit utoqqaatigigaluartoq, iliuusia Jiisusip arajutsisimanngilaa.

12. Kristumiut utoqqaat iliuuserisartagaannik pingaartitsillutik utoqqaanertat qanoq ersersissinnaavaat?

¹² Utoqqaat pallorfiginninnermik ilumoortumik siuarsaaniarlutik iliuuserisartagaat nakkutilliisut kristumiut Jiisusitulli arajutsinngilaat. Utoqqaat oqaluusseqataasarmata, ataatsimiinnerni peqataasarmata, ilagiinnut sunniuteqarluartarmata nikallujuimmatalu nakkutilliisut nersortariaqarpaat. Qamannga pisumik qiimmassaanerat utoqqaat kiffartornerminnik illernartumik nuannaarutiginninnissaminnut iluaqutigisinnaavaat, kristumiunut allanut sanilliunnertik siornatigulluunniit pisinnaasaminnik eqqarsaatiginninnertik nikallussutiginagu. — Galatiamiut 6:4.

13. Utoqqaat misilittagaannik piginnaanerinillu utoqqaanertat qanoq atorluaasinnaappat?

¹³ Aammattaaq utoqqaanertat kristumiunik utoqqarnik pingaartitsinertik ersersissinnaavaat misilittagaannik piginnaanerinillu naleqangaartunik atorluaanermikkut. Utoqqaat maligassiuilluartut immaqa ilaannikkut takutitsisinneqarsinnaapput apersorneqarsinnaallutilluunniit. „Tusarnaartut ingitsitaarluartarput tusarnaarlualerlutillu qatanngummik utoqqarmik qitornaminik sallusuissummi perorsaasimasumik apersugaqaraangama,“ utoqqaanertaq oqaluttuarpoq. Ilagiinni allani utoqqaanertat oqaluttuarput arnap pionerip 71-inik ukiullip oqaluussisartut arlallit aalajangersimasumik oqaluusseqataasalersillugit ikiorsimagai. Aammattaaq kajumissaartarpai „tunngaviusut“, soorlu Biibilimik ullormullu allassimaffimmik atuartarnissaq atuakkaminnillu eqqarsaatiginnittarnissaq, eqqaamaqqullugit.

14. Utoqqaanertaqatigiit utoqqaanertaqatertik utoqqaq pingaartillugu qanoq ersersippaat?

¹⁴ Aammattaaq ilagiinni utoqqaanertat utoqqaanertaqatimik  utoqqaalisut suleqataasinnaanerat pingaartippaat. José, 70-it sinnerlugit ukiulik ukiunilu qulikkuutaani utoqqaanertaasimasoq, qanittukkut pilatserujussuarpoq. Nalunnginnamiuk peqqissigallarunarani, nakkutilliisutut siulittaasutut tunuarnissani eqqarsaatigaa. „Utoqqaanertat allat qisuariarnerat tupaallaatigaara,“ José oqaluttuarpoq. „Siunnersuutiga akuerinagu aperaannga suliassakka suliariinnassagukkit qanoq ikiortariaqarnersunga.“ Utoqqaanertamit inuusunnerusumit ikiorneqarluni Josép nakkutilliisutut siulittaasutut kiffartortuarsinnaanini nuannaarutigaa, ilagiinnullu pilluaqqussutaasimavoq. Ilagiinni taakkunani utoqqaanertat ilaat ima oqarpoq: „Josép utoqqaanertatut sulinera qatanngutit nuannaarutigeqaat. Misilittagaqarluartuummat upperluartuummallu asavaat ataqqillugulu. Ilagiitsinnut pisuunnguutaavoq.“

Isumassoqatigiigitsi

15. Sooq kristumiut tamarmik utoqqaat ilagiinniittut qanoq innerat soqutigisariaqarpaat?

¹⁵ Utoqqarnik soqutiginnittussat tassaaginnanngillat ilagiinni nakkutilliisut utoqqalisunillu angajoqqaallit. Paulusip ilagiit kristumiut inuup timaanut assersuuppai, imalu allappoq: „Guutimiuna timimik katiterisimasoq ataqqinannginnerusut annermik ataqqinartillugit, timimi akerleriinneqaqqunagu avatilli isumaqatigeeqqullugit isumassoqatigeeqqullugillu.“ (1 Korinthimiut 12:24, 25) Ilagiit kristumiut suleqatigiilluassappata tamatta immikkut uppeqatitta, aamma utoqqaat, qanoq innerat soqutigisariaqarparput. — Galatiamiut 6:2.

16. Kristumiut ataatsimiinnerini utoqqaat soqutigalugit qanoq ersersissinnaavarput?

¹⁶ Kristumiut ataatsimiinnerini utoqqarnik soqutiginninnermik ersersitsinissatsinnut periarfissaqarluarpugut. (Filippimiut 2:4; Hebræerit 10:24, 25) Oqaloqatiginissaat piffissaqarfigisarparput? Naleqquttuusinnaavoq peqqissusiat apeqqutigigutsigu, immaqali aamma „Anersaap tunissutaanik“, immaqa misigisamik qiimmaallannartumik, oqaluttuussinnaavavut eqqarsaammilluunniit Biibilimeersumik eqqaasaqarluta. Utoqqaat ilaat pitsorluttuummata, soqutigittarnerussaaq ornikkutsigik naatsorsuutiginagu ornissagaatigut. Tusilartuuppata arriitsumik oqalunnissaq oqaatsillu taalluartarnissaat pisariaqarsinnaavoq. ’Upperisaqaqatigiinnitsigullu kajumissaaqatigiissagutta’ qatanngut utoqqaq tusarnaaqqissaartariaqarparput. — Romamiut 1:11, 12.

17. Kristumiut utoqqaat angerlarsimaffiminnit anisinnaanngitsut qanoq isumassorsinnaavavut?

¹⁷ Utoqqaqarpammi kristumiut ataatsimiinnerinut najuussinnaanngitsunik? Jaaku 1:27 naapertorlugu pisussaaffigaarput ’iliarsunnik uillarnernillu atugarliuutilinnik isumaginninnissaq’.  Grækerit oqaluutaat ’isumaginninnermik’ nutserneqartoq aamma isumaqarsinnaavoq ’pulaarnermik’. (Apustilit Suliaat 15:36) Utoqqaallu pulaarneqartarnertik nuannarisaqaat. Paulusi ukiup 65-ip missaani Romami parnaarussaagami ’utoqqaavoq’, kisimiittutullu oqaatigisariaqarluni. Suleqatini Timotheusi takorusoqaa imalu allaffigalugu: „Aggerasuarniarna.“ (Fiilimuut 9; 2 Timotheusi 1:3, 4; 4:9) Soorunami ullumikkut ilagiinniittut utoqqaat parnaarussaanngillat, ilaalli peqqiilliornertik pissutigalugu angerlarsimaannartunngorsimapput. Immaqa ima oqarput: ’Qanittukkut pulaarniarna.’ Taamaaliortarpugut?

18. Sooq utoqqarnut pulaartarneq pingaaruteqangaarpa?

¹⁸ Anersaakkut qatanngutitta utoqqalisut pulaartarnerisa pingaaruteqarnerat suusupaginngisaannartariaqarparput. Kristumiup Onesiforosimik atillip Romamiitilluni Paulusi ujarlugu nanivaa, taavalu ’qasseeriaqaluni sapiilliseqqittarlugu’. (2 Timotheusi 1:16, 17) „Inuusunnerusunik ilaqartarnera nuannareqaara,“ qatanngut arnaq utoqqaq oqarpoq. „Nuannarinerpaavaralu ilaquttamittut pigaangannga. Qiimmaallaatigisaqaara.“ Kristumiu utoqqaq alla ima oqarpoq: „Kortinnguamik nassinneqaraangama, sianerfigineqarlunga minutsialunni oqaloqatigineqaraangama alakkarneqalaaraangamaluunniit pingaartittaqaara. Inuummarissiallannartaqaaq.“

Isumassuisut Jehovap akilertarpai

19. Utoqqarnik isumassuineq qanoq pilluaqqussutissartaqarpa?

¹⁹ Utoqqarnik isumasuineq pilluaqqussutissartarpassuaqarpoq. Ilaginerinnaat ilisimasaannillu misilittagaannillu ilinniarfiginninnerinnaq immini immikkut pisinnaatitaaffiuvoq. Taakkuninnga isumassuisut tunisinerup pilluarnartortaa misigisarpaat. Iluaqutaanertik nuannaarutigisarpaat, Biibililu naapertorlugu akisussaaffitsik eqqortikkaangamikku isummamikkut eqqissisarput. (Apustilit Suliaat 20:35) Aammattaaq utoqqarnik isumassuisut namminneq utoqqaligunik kiserliulernissartik immineerneqarnissartillu sioorassutigisariaqanngilaat. Guutip oqaasiani ima neriorsuuteqarpoq: „Tukkusooq nammineq tumannguersarneqassaaq; allanik imeruersaasoq nammineq imeruersarneqarumaarpoq.“ — Ussatit 11:25.

20, 21. Utoqqarnik isumassuisut Jehovap qanoq isigai, sunalu aalajangiusimasariaqarparput?

²⁰ Jehovap pilluaqqusarpai qitornat, nakkutilliisut kristumiullu allat Guutimik mianerinnittut namminissarsioratik uppeqatiminnik utoqqarnik isumassuisut. Isiginnittaasiat ussammut uumunnga naapertuuppoq: „Piitsumik ikiuisoq [Jehovamut] taarsigassarsisitsisuuvoq, [Jerhovallu] taarsiiffigissavaa ajunngitsuliornerata taamaaqataanik.“ (Ussatit 19:17) Asanninneq pissutigalugu piitsumik ikiuigutta Guutip imminut taarsigassarsisitsinertut isigissavaa, taarsiivigissavaatigullu pilluaqqungaarluta. Aammattaaq akilissavaatigut uppeqativut utoqqaat, ilarpassui ’silarsuarmi piitsuusut uppernikkulli pisuujusut’, asannittumik isumassortarutsigik. — Jaaku 2:5.

²¹ Guuti tukkorluni taarsiisarpoq. Akissarsiassamut ilaavoq inuuneq naassaanngitsoq. Jehovap kiffaasa amerlanersaat naassaanngitsumik inuussapput nunami paratiisimi, ajortip kingornuttakkap sunniuteqarfigiunnaagaani, utoqqaallu aalajaatsut inuusunnermittut nukissaqaleqqiffigisaanni. (Saqqummersitat 21:3-5) Taamatut pisoqarnissaa utaqqitillugu utoqqaat isumassornissaannik kristumiutut akisussaaffipput eqqortittuartigu. (wE 5/15 04)

[Quppernerup ataani ilanngussaq]

Uteqqiinermi apeqqutit

• Angajoqqaavut utoqqalisut qanoq ataqqisinnaavavut?

• Utoqqaanertat qatanngutit utoqqaat pingaartillugit qanoq ersersissinnaavaat?

• Tamatta immikkut utoqqarnik ilumoortumik soqutiginnilluta qanoq ersersissinnaavarput?

• Kristumiunik utoqqarnik isumassuineq qanoq pilluaqqussutissartaqarpa?

[Atuaqqissaarnermi apeqqutit]

[Qupp. 25-mi ungalusaq]

Angajoqqaavi ikiortariaqalerput

1999-imi Philipip angunni perululluni napparsimalersoq tusaramiuk Liberiami nammineq kajumissutsiminit sanaartoqataavoq. Nalunnginnamiuk isumaginissaa anaanami nammineerluni sapissagaa, aalajangerpoq angerlarniarluni ataatami nakorsarneqarnissaa isumagiartorlugu.

„Angerlarniarneq ajornaatsuinnaanngilaq, misigaangali angajoqqaama isumassornissaat pingaarnerpaamik akisussaaffigalugu,“ Philip oqaluttuarpoq. Ukiut pingasut ingerlaneranni angajoqqaani naleqqunnerusumik initaartippai uppeqatinilu ikiortigalugit ataatami pisariaqartitai naaperlugit illup ilua ilusilersorlugu.

Maanna Philipip arnaata uini perululluni napparsimanerani paaqqutarilluarsinnaanerulerpaa. Qanittukkut Philipip Makedoniami Jehovap Nalunaajaasuisa immikkoortortaqarfiannut suliartoqqusaanini kajumilluni akuerisinnaasimavaa.

[Qupp. 27-mi ungalusaq]

Pisariaqartitai sumiginnanngilaat

Australiamiu arnaq kristumiu Ada 85-inik ukiulik peqqiilliungaalerami angerlarsimaffimminit anisinnaajunnaarmat, ikiorneqarnissaa ilagiinni utoqqaanertat isumagaat. Uppeqatiminit arlalinnit ikiorneqarnissaa isumagaat. Qatanngutit arnat angutillu Ada eqqiaassussinnaagamikku, errorsissussinnaagamikku, iggattarsinnaagamikku pisiuniuttarsinnaagamikkulu nuannaarutigaat.

Aaqqissuussineq tamanna ukiut qulingajaat matuma siorna aallartippoq. Ulloq manna tikillugu qatanngutit 30-t sinnerlugit ikiuuttarsimapput. Suli pulaartarpaat atuakkanillu atuagassianillu Biibililersaarutinik atuffattarlugu, qatanngutillu ilagiinniittut anersaakkut siumukarnerannik oqaluttuullugu qinoqatigisarlugulu.

Utoqqaanertaq ilagiinni taakkunaniittoq ima oqarpoq: „Adamik ikiuisartut ikiuinertik immikkut pisinnaatitaaffittut isigaat. Ukiut ingerlanerini aalajaalluni kiffartornera amerlasuut kajumississutigisarsimavaat, taakkualu Adap pisariaqartitaanik sumiginnaanissartik eqqarsaatigisinnaanngilaalluunniit.“

[Qupp. 24-mi assiliartaq]

Angajoqqaavut utoqqalisut qanoq asatiginerlugit ammasumik qamanngalu pisumik ersersittarparput?

[Qupp. 26-mi assiliartat]

Ilagiinniittut tamarmik uppeqatiminnut utoqqarnut asannittuliorsinnaapput