Guutimuna piumasaa pisoq?

„Piumasat qilammisut nunamissaaq pili.“ — Matthæusi 6:10.

JULIO Christinalu annilaarnartumik misigisaqarput meeqqamik ilaat sisamat ikuallagussaallutik toqusut takugamikkik. Imigassartorsimalluni biilertoq biiliannut uninngasumut aporpoq, biiliallu qaarpoq ikuallalerlunilu. Meeraasa tallimaat, Marcos 9-nik ukiulik, uutitersimasorujussuaq biilimit ikuallattumit annaanneqarpoq, inuunermili sinnerani ajoqutissarsilluni. Aliasungaarluni Julio imminut ilaquttaminillu tuppallersaaniarsarivoq ima oqarluni: „Guutimuna piumasaa. Tamanna akuerisariaqarparput ajunngitsumik ajortumilluunniit pisoqaraangat.“

Alianartunik assingusunik nalaataqarnerminni amerlasuut taamatut qisuariartarput eqqarsartaramik: ’Guutip ajugaqanngitsuuguni isumagippatigullu pisut arlaannik siunertaqassapput, qanorluunniit paasiuminaatsigigaluarunik.’ Aamma illit taamatut eqqarsartarpit?

Ajunngitsunik ajortunillu Guutimut piumasaasorinninnermut Jiisusip ataatarpuumi oqaasii, qulaani issuarneqartut, tunngavigineqarajuttarput. Guutimuna piumasaa qilammi pisoq, ilaa? Qinugaangatta ’piumasat nunami pili’, nunami pisartut Guutip piumasaatut pisarneri akuerisariaqannginnerpavuttaaq?

Amerlasuulli taamatut isumaqarneq akueriuminaatsippaat isumaqaramik Guutip pinngortitani nunamiusut misigeqatigerpasinngikkai. Aperipput: ’Guutip asannittup qanoq piumasarisinnaavaa inuit pisuussuteqanngitsut taama ajortigisunik nalaataqarnissaat? Uagutsinnut ilinniarfiunissaa pissutaappat, sunaassagami?’ Immaqa aamma illit taamatut eqqarsarputit.

Tamatumunnga tunngatillugu Jiisusip affarmik qatanngutaa Jaaku ima allappoq: „Usserneqarsimasumik oqartoqarniaqinani: ’Guutimit usserneqarpunga.’ Guutimi ajortumit usserneqarsinnaanngilaq, namminerlu kimilluunniit ussiisanngilaq.“ (Jaaku 1:13) Guuti ajortunut pisuunngilaq. Taamaattumik erseqqippoq ullumikkut nunami pisartut ilaannaat Guutip piumasarigai. Biibilimi aamma eqqartorneqarput angutip piumasaa, Guutimik nalusut piumasaat allaallu Diaavulup piumasaa. (Johannesi 1:13; 2 Timotheusi 2:26; 1 Petrusi 4:3) Takorlooruminaappoq Juliop Christinallu ilaqutaasa misigisaat Ataatap qilammiusup asannittup piumasarisinnaagaa.

Jiisusi qanoruna isumaqartoq ajoqersukkani ilinniartikkamigit ima qinusarnissaannik: ’Piumasat pili’? Guutimut qinnutaannaava pisuni immikkut ittuni akuliuteqqullugu, imaluunniit Jiisusip pitsaanerungaartumik, allannguinissamik inuit tamarmik neriuutigisinnaasaannik, qinusarnissatsinnik ilinniartippaatigut? Tamanna pillugu Biibilimi qanoq allassimasoqarnersoq misissoriartigu.

[Qupp. 3-mi suminngaanneernerat]

Biili: Dominique Faget-STF/AFP/Getty Images; meeraq: FAO photo/B. Imevbore