Guutip piumasaa nunami pippat

JIISUSIP ajoqersukkani qinunermik ilinniartikkamigit: „Piumasat qilammisut nunamissaaq pili,“ Ataatani qilammeeqatigigallaramiuk misigisimasani tunngavigalugit oqaluppoq. (Matthæusi 6:10; Johannesi 1:18; 3:13; 8:42) Inuttut inunngunngikkallarami misigisimavaa qilammi nunamilu pisut tamarmik Guutip piumasaanut, imaluunniit siunertaanut, naapertuunnerat. Pinngortitarsuarmik pilersitseqataagami nuannaarneq nalerisimaarnerlu misigisimavai. — Ussatit 8:27-31.

Guutip pinngortitai siulliit anersaajupput. Taakkulu taaneqartarput ’inngilii, sorsuttartut peqqusaanik naammassisitsisartut oqaasii naalallugit’. Tassaasimapput tassaallutillu „kiffai naammassisitsisartut piumasaanik“. (Tussiaat 103:20, 21) Tamarmik immikkut piumasaminnik iliorsinnaatitaappat? Aap, nunarsuarlu tunngavilerneqarmat ’Guutip erneri tamarmik nipertik illugalugu qiimmattarput’. (Jobi 38:7) Qiimmattarnerat takussutissaavoq nammineerlutik Guutip piumasaanik nuannaarutiginninnerannut, piumasaalu pigiliuppaat.

Guutip nunarsuaq tunngavilereeramiuk inuit najugassaattut piareersarpaa, taavalu angut arnarlu siulliit pinngortippai. (Mosesimik allakkat siulliit, kapitali 1) Tamanna qiimmattarnissamut aamma pissutissaava? Oqaluttuami isumassarsiarititaasumi ima allassimavoq: „Guutillu pinngortitani tamaasa isigai, takuaalu ajunngingaartut.“ Aap, naammalluinnartut. — 1 Mosesi 1:31.

Guutip aappariinnut siullernut kinguaavinullu suna piumasaraa? Mosesimik allakkat siulliit 1:28 naapertorlugu ajunngitsuinnarnik kissaappai. „Guutip pilluaqquai oqarfigalugillu: ’Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu; naalagaagitsilu aalisakkanut immamiittunut qilaallu timmiaanut nersutinullu nunami aalassunut tamanut.’“ Siunertaq ajunngitsoq taanna inuit siulliit naammassissagunikku, pisariaqarpoq namminneq kinguaavisalu inuujuarnissaat. Ajutoorneq, naapertuilluanngitsuliorneq, aliasunneq toqulu eqqaaneqanngilluinnarput.

Taamaalinerani Guutip piumasaa qilammi nunamilu pivoq. Piumasaa malillugu iliortut tamarmik tamanna nuannaarutigingaassavaat. Susoqarami?

Guutip piumasaa naapertuilluartuliornerunersoq ilimaginngisamik qularineqalersinneqarpoq. Kisiannili naqqinneqarsinnaavoq. Taamaakkaluartorli piffissaq sivisoorujussuaq aliasuffiullunilu aliatsaffiusoq maanna aallartippoq, Guutip inunnut siunertaata suuneranik paatsiveerunersuaqalersitsisussaq. Tamavitta eqqugaavugut. Sunaana qulalissutaasoq?

Pikitsitsinerup nalaani Guutip piumasaa

„Guutip ernerisa“ ilaat namminissarsiorluni iluaqutissaminik Guutip inunnut siunertaata akornusernissaanut periarfissarsivoq. Anersaap taassuma periarfissaq eqqarsaatiginerujartortillugu iluatsissinnaasutut kajungernartutullu isiginerujartuinnarpaa. (Jaaku 1:14, 15) Eqqarsarsimassaaq inuit siulliit Guutimut naalanngitillugit imminut naalatsilersinnaassagunigit, Guutip oqartussaassutsimi unammillerneqarnera akueriinnartariaqassagaa. Isumaqarsimassaaq Guutip Adami Evalu toqunnavianngikkai,  Guutimmi taamaalioraluaruni siunertani maangaannartissavaa. Jehova Guutilli siunertani allanngortittariaqalissavaa akuerisariaqalissallugulu ernerup anersaajusup taassuma oqartussaanera, pinngortitami nunamiusut maannakkut naalassagaat. Kingorna naleqquttorujussuarmik pikitsitsisoq taanna Saatanimik taagorneqalerpoq, isumaqartoq „assortuisoq“. — Jobi 1:6.

Saatanip kissaatigisani timitalernialerpaa arnarlu saaffigalugu. Arnaq Guutip piumasaanik tunussitinniarlugulu ileqqussatigut kiffaanngissuseqalersinniarpaa, ima oqarluni: ’Naamik, toqussanngivippusi! . . . Guutisullu ilerumaarpusi ajunngitsoq ajortorlu nalujunnaassallugit.’ (1 Mosesi 3:1-5) Arnaq isumaqarpoq taamaalilluni kiffaanngissusivik angussallugu, inuunerminillu pitsaanerulersitsisinnaasoralugu. Taavalu uini immisut iliortippaa. — 1 Mosesi 3:6.

Tamanna aappariinnut siullernut Guutip siunertarinngilaa. Tamanna namminneq kissaatigaat. Tamannalu ajunaarutaassaaq. Guutip oqarfigereersimavai taamaaliorunik toqussasut. (1 Mosesi 3:3) Guutimut atanatik inuusussatut pinngortitaanngillat. (Jeremia 10:23) Aamma naammalluinnartuujunnaassapput, naammalluinnanngitsuunerlu toqulu kinguaavisa kingornutissavaat. (Romamiut 5:12) Tamanna Saatanip akornusersinnaanngilaa.

Taamatut pisoqarnera Guutip inunnut nunamullu siunertaanik piumasaanilluunniit qaqugorsuarmut allanngortitsissava? Naamik. (Esaja 55:9-11) Apeqqutilli akerleriissutaasut akineqartariaqartut pilersinneqarput: Saatanip oqarneratut inuit ’Guutisut ilersinnaappat ajunngitsoq ajortorlu nalujunnaarlugit’? Naammattumik piffissaqartitaagutta inuunermut attuumassuteqartuni tamani suut eqqortuunersut eqqunngitsuunersulluunniit, iluaqutaanersut ajoqutaanersulluunniit nammineq paasisinnaavavut? Guuti piumasani aqutseriaatsinilu pitsaanerpaajummata naalalluinnarneqartariaqarlunilu tunniusimaffigilluinnarneqartariaqarpa? Illit qanoq akissavit?

Periaaseq ataasiinnaq atorlugu apeqqutit taakku akineqarsinnaapput akissutigineqartut pinngortitanut silassorissunut tamanut paasiuminartussaammata: Kiffaanngissuseqarneq iluaqutaanersoq tamatuminnga kissaateqartunut misilitsinniarlugu. Suujunnaarsitaaginnartuuppata apeqqutit akineqassanngikkaluarput. Akineqartariaqarpulli inuit kiffaanngissuseqarnermik misiliinissaannut naammattumik piffissalerlugit kinguneri paasineqarniassammata. Arnaq oqarfigigamiuk meerartaarumaartoq Guutip tamaaliorniarluni takutippaa. Maanna inuit amerliartulissapput. Qujanartumik taamatut aaqqiisoqarsimammat ullumikkut inuuvugut. — 1 Mosesi 3:16, 20.

Tamannali isumaqanngilaq Guutip inuit anersaarlu pikitsitsiumatooq taanna qanorluunniit iliorsinnaatikkai. Guutip kisimi oqartussaanini taamaatinngilaa, siunertanilu asoorutinngilaa. (Tussiaat 83:19) Tamanna erseqqissarpaa pikitsitsinermik aallarniisup naggataatigut piuneerussaanissaa ajoqusiinerullu kingunipiluisa atuukkunnaarnissaat siulittuutigalugit. (1 Mosesi 3:15) Taamaattumik inuit kinguaariit aallaqqaammulli aniguisitaanissamik neriuuteqalerput.

Utaqqiisaa siulivut siulliit kinguaassaallu Guutip oqartussaaneranit avissaarsimallutik inuusariaqarput. Aalajangikkamik kingunerinik alianartunik tamanik Guutip misigisaqartinnaveersaassagunigit, piumasaminik iliortinniarlugit pinngitsaaliuartariaqassavai.  Tamatuma assigiinnassagaluarpaa kiffaanngissuseqarlutik inuunissamut periarfissineqanngilluinnarnerat.

Soorunami inuit ataasiakkaat Guutip oqartussaaneranik tapersersuisinnaatitaapput. Piffissami tassani Guutip inunnut siunertaa ilinniarsinnaassavaat sapinngisannguaminnillu naleqqussarlutik. (Tussiaat 143:10) Kiffaanngissuserli pillugu apeqqut akineqartinnagu ajornartorsiuteqartarallassapput.

Inuit ataasiakkaat aalajangigaasa kinguneri malugineqapallattalissapput. Inuup erniarineqartup siulliup Kainip qatanngunni Abeli toquppaa, „suliani ajortuummata nukkamili suliai iluartuullutik“. (1 Johannesi 3:12) Tamanna Guutip piumasarinngilaa, Kainimi mianersoqquaa kingornatigullu pillarlugu. (1 Mosesi 4:3-12) Ileqqussatigut kiffaanngissuseqarneq Saatanip neqeroorutaa Kainip qinerpaa, taamaattumillu oqaatigineqarsinnaalluni „ajortumit pisoq“. Allat aamma taamatut aalajangersimapput.

Ukiut 1500-t qaangiummata „nunarsuarmi aserorsimaneqarpoq Guutip takkuani nakuusernernik ulikkaarluni“. (1 Mosesi 6:11) Nunarsuaq annaanneqassappat akuliuttoqartariaqarpoq. Guuti iliuuseqarpoq nunarsuaq ulersuartillugu ilaqutariillu naapertuilluartut ataasiinnaat inuuginnartillugit sernissorlugit, tassaasut: Noa, nulia, erneri ukuaalu. (1 Mosesi 7:1) Tamatta taakkua kinguaaraatigut.

Taamanimiilli Guutip piumasaaminik ilumoorlutik ilisimasaqarusuttut siunnersorneqarnissaat isumagisimavaa. Angutit ilumoorfiginnittut isumassarsisillugit imminik siunnersorneqarusuttunut tamanut tusarliussani allatsissimavaa. Tusarliusaq tamanna Biibilimiippoq. (2 Timotheusi 3:16) Asannilluni inuit aalajaatsut imminut qanittumik attaveqarsinnaanngortippai, allaallu ikinngutigisinnaalerpaat. (Esaja 41:8) Pisariaqartitaannillu nakussatsittarpai ukiut tusindillit ingerlaneranni inuiaat kiffaanngissuseqarneranni ajornartorsiutaasut anigortarsinnaaqqullugit. (Tussiaat 46:2; Filippimiut 4:13) Guutip ikiuisarnera qujamasuutigisariaqarparput.

Tamakkiisumik ’Guutip piumasaa pippat’

Imaappa Guutip inunnut siunertaa manna tikillugu iliuuserisimasaasigut naammassineqarsimasoq? Kristumiu apustili Petrusi allappoq: „Neriorsuutaa naapertorlugu ilimagisaraavut qilaat nutaat nunalu nutaaq iluassutsip najugarisassai.“ (2 Petrusi 3:13) Tassani assersuutaasumik eqqaaneqarput inuiaqatigiinnut nutaanut naalakkersuisut nutaat.

Guutip siunertaa Danielip sukumiinnerusumik ima allaatigaa: „Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa. . . . Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ (Danieli 2:44) Siulittuut taanna naapertorlugu pissutsit aaqqissuussaanerat maannakkut atuuttoq atorsinnaanngitsoq atorunnaarsinneqarumaarpoq Guutillu naalagaaffianik aqutsineranilluunniit taarserneqarluni. Nutaarsiassaq nuanningaarami, ilaa? Akerleriinnerpassuit namminissarsiornerlu pissutaallutik nunarsuaq nakuusernermik ulikkaaqqimmat aserorneqarnissaa aarlerinarsilluni, ullulli ilaanni qanganngorumaarput.

Qaqugu tamanna pissava? Jiisusip ajoqersugai ima aperipput: „Oqarfigitigut qaqugu tamanna pissasoq sunalu nalunaaqutaassasoq illit tikiunnissannut silarsuullu naggatissaanut?“ Jiisusip akissutaasa ilaat imaappoq: „Naalagaaffimmillu iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ — Matthæusi 24:3, 14.

Nunarsuaq tamakkerlugu oqaluussineq taanna maannakkut ingerlanneqartoq ilisimaneqarpoq. Qularnanngitsumik aamma najukkanni nalunaajaasoqarnera maluginiarsimassavat. Atuakkami These Also Believe-mi ilisimatooq Charles S. Braden allappoq: „Jehovap Nalunaajaasui nalunaajaanerminni silarsuaq tamakkerlugu oqaluussisimapput. . . . Jehovap Nalunaajaasuisut ittunik silarsuarmi upperisarsioqatigeeqanngilaq Guutip naalagaaffianik tusagassamik nuannersumik taama kajumitsigalutik pinertutigalutillu  siaruarteriniartunik.“ Nunani 230-ni tusagassaq nuannersoq nalunaajaassutigaat oqaatsini 400-ngajanni. Guutip naalagaaffia taamatut oqaluussissutigineqartigisimanngisaannarpoq. Guutip naalagaaffiata naalakkersuisunik inuit pilersitaannik taarsiingajalerneranut uppernarsaatissarpassuit tamanna ilagaat.

Jiisusip naalagaaffik oqaluussissutigeqqusaa taannaavoq ataatarpuumi qinnutigeqqullugu ilinniartitsissutigisaa: „Naalagaaffiit tikiulli, piumasat qilammisut nunamissaaq pili.“ (Matthæusi 6:10) Aap, Guutip naalagaaffini iluaqutigalugu inunnik nunarsuarmillu siunertani piumasaniluunniit piviusunngortissavaa.

Qanoq isumaqarpa? Tamanna Saqqummersitat 21:3, 4-milu atuarneqarsinnaavoq: „Tusarpara nipi nipitoqisumik issiavissaarsuarmit tutsiuttoq: Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ Taamanikkut nunarsuarmi qilammilu Guutip piumasaa tamakkiisumik pissaaq. * Tamanna misigerusuppiuk? (wE 4/15 04)

[Quppernerup ataani ilanngussaq]

[Qupp. 5-mi assiliartaq]

Silassorissut ilaasa Guutimut attaveqarumannginnerat alianartumik kinguneqarpoq