„Guuti Qaninniarsiuk, Taava Taanna Ilissinnut Qanillissaaq“

Siorna kingornalu — Inuunera allanngorpoq

MATSEPANG-ip inuunermi imaqannginnera siunertaqarpiarunnaarsimaneralu paasilersimavaa. Niviarsiaraavoq Afrikap kujataata tungaani Lesothomi alliartorsimasoq katuullisullu perorsarneqarsimasoq. Arnat mattutut ukiuni arlalinni Matsepang atornerluttarsimavaat, aningaasanik akilerlugu kanngunartunik iliuuseqarnernut peqataatittarlugu, Guutimut qanittumik attaveqalernissaanik ikiornagu.

Tamanna pissutigalugu Matsepangip upperisarsiorneq pakatsissutigaa, Pinngortitsisullu asannittup pinngortitaminik nunarsuarmiittunik isumassuisuuneranik upperinninneq isumaqatigisinnaajunnaarlugu. Atornerlunneqarsimanini unneqqaserluffigineqarsimaninilu misigissutsimigut ikilerneqaatigingaarpai naleqanngitsutullu misigilissutigalugit. Piffissap ingerlanerani nakuuserniartalerpoq saassussiumatuunngorlunilu, tamannalu pinerlunniaqataasalissutigaa.

Matsepang piffissap ingerlanerani qimuttuitsunik angalasunit tillinniartartunut ilaasortanngorpoq. Tigusarineqarpoq Afrika Kujallermilu parnaarussaalluni. Kingusinnerusukkut Lesothomut utertinneqarpoq, inooriaaserisimasamisullu — imerajuttutut, pinerlunniartartutut, nakuusertartutut kinguaassiuutitigullu inuunerluttutut — inuuleqqilluni.

Ullulli ilaanni aliasungaarami Guuti qinnuigaa ikioqqulluni imatullu neriorsorlugu: „Asasara Guuti, inuuinnassaguma sapinngisara tamaat kiffartorfigissavakkit.“

Tamatuma kinguninnguagut ajoqersuiartortitat Jehovap Nalunaajaasui marluk naapippai, taakkualu Biibilimik atuaqqissaaqatigisalerpaat. Atuaqqissaaqatigineqartalerami paasilerpaa Guutip soqutigalutalu isumagisaraatigut. Aammattaaq paasivaa Saatanip, ’sallumut ataataasup’, nakutitsiniaasinnaassutsini tammarsaarisinnaaninilu iluaqutigalugit inuit ilaat pingaaruteqanngitsutut misigilersittarai, isumaqalersittaraalu Guutip nuannarilinngisaannassagai. — Johannesi 8:44; Efesosimiut 6:11.

Matsepangip qiimmassaatigaa paasigamiuk siornatigut ajortuliarisimanitsinnik peqqissimissutiginnikkutta, Guutimit isumakkeerfigineqarnissaq qinnutigigutsigu taassumalu iluarisaa noqqaassutigigutsigu imminut ataqqinerulersinnaasugut. Paasilerpaa ’Guuti uummatitsinnit annerusoq’, imminullu isiginitsinnit allaanerulluinnartumik isigigaatigut. — 1 Johannesi 3:19, 20.

Tussiaasiortup Daavip oqaasii uku tuppallersaatigingaarpai: „[Jehovap] qanippai sequmissimasumik uummatillit, annaattarpai aserortersimasumik anersaallit.“ (Tussiaat 34:19) Nammineq ’aserortersimasumik anersaaqarami’ paasivaa Jehovap kiffani qimanneq ajorai, naak ilaat nikallortaraluartut pingaaruteqanngitsutullu misigisaraluartut. Guuti kiffartortiminik tamanik isumassuisartoq, erloqinartorsiorfiinilu napatitsisartoq paasigamiuk  qamuuna nuannaajallatigeqaa. (Tussiaat 55:23; 1 Petrusi 5:6, 7) Ingammik oqaatsit uku killissutigingaarpai: „Guuti qaninniarsiuk, taava taanna ilissinnut qanillissaaq.“ — Jaaku 4:8.

Matsepangip inuunermini Biibili pissatsissutigigaa paasinarsipallappoq. Matsepang kristumiut ataatsimiinnerinut aalajangersimasumik najuuttalerpoq Biibilimullu naleqqutinngitsumik inooriaaseqarunnaarluni. Qanoq ingerlasimava? Isumaqarsimagaluarpoq Guutimit asaneqarnissaminut isumagineqarnissaminullu naleqqunnani taamali misigisimajunnaarsimavoq. Jehovap Nalunaajaasuisa ilaattut kuisikkamili nalunaaquttap-akunneri tusindillit atorpai Guutip naalagaaffia pillugu nutaarsiassamik nuannersumik allanik ajoqersuilluni. Naak inuunerisimasami kinguneri suli malugisinnaagaluarlugit maannakkut nuannersumik siunertaqarluartumillu inuuvoq. Tamanna uppernarsaataavoq Biibilip pissaaneqarneranut inuit inuunerminnik allannguissutigisinnaasaannik! — Hebræerit 4:12.  (wE 3/15 03)

[Qupp. 15-mi issuagaq]

„Asasara Guuti, inuuinnassaguma sapinngisara tamaat kiffartorfigissavakkit“

[Qupp. 15-mi ungalusaq]

Biibilimi najoqqutassiat ineriartornartut

Biibilimi najoqqutassiat atornerlunneqarsimasut tuppallersaatigisimasaat:

„Eqqarsaatima eqqissiviilliortileraangannga [Guuti illit] tuppallersaanerpit nuannaalersittarpaanga.“ (Tussiaat 94:19) Jehovap oqaasiatigut tuppallersarneqartarnerput qiimmassaataasaqaaq. Isumakkut qinunikkullu tuppallersaammik tamatumannga eqqarsaatiginneqqissaarneq uummammik isumakuluutilimmik eqqissisitsisarpoq Guutillu ikinngutitut paasinnittuuneranik upperinninnermut ineriartuutaasarluni.

„[Jehovap] katsorsarpai sequmissimasumik uummatillit, ikiilu mattuserlugit.“ (Tussiaat 147:3) Jehovap naakkinnittuunera Jiisusillu utertitsissutitut pilliutaa iluaqutigalugu ajortuliatsinnik piiaanera pingaartikkutsigu, Jehova ilerasuuteqarnata tatigilluinnarlugu saaffigisinnaavarput. Tamanna tuppallersaatigingaarsinnaavarput qamuunalu eqqississutigingaarsinnaallugu.

„Kinaluunniit uannut [Jiisusi Kristusimut] ornigussinnaanngilaq Ataatap uannik aallartitsisup kajungilersinngippani. Orniguttorlu ullut naggatissaanni makitikkumaarpara.“ (Johannesi 6:44) Anersaani illernartoq Guutillu Naalagaaffianik oqaluussineq iluaqutigalugit Jehovap ernerminut kajungilersippaatigut inuunermillu naassaanngitsumik neriuuteqalersilluta.