Guutimik unnersiutiginnittut naalannarsisitsisullu pilluaqquneqartarput

„Ornissavaatsit pallorfigalutillu, [Jehova], aqqillu ataqqissavaat [naalannartissavaat, 1900/1961].“ — TUSSIAAT 86:9.

1. Sooq pinngortitanit uumassuseqanngitsunit Guuti unnersiutigilluarnerungaarsinnaavarput?

JEHOVA pinngortitaminit tamanit unnersiutigineqarnissaminut qinngaqqunnanngitsuuvoq. Pinngortitaasa uumassuseqanngitsut oqaaseqaratik unnersiutigigaat, uagut tunngavilersuisinnaavugut, paasinnissinnaavugut, qujamasunnerput ersersissinnaavarput pallorfiginnissinnaallutalu. Taamaattuminguna tussiaasiortup ima oqarfigigaatigut: „Appigitsi Guuti qiimmattaatigalugu nunarsuarmi tamarmi, erinalimmik unnersiutigisiuk aqqa naalannartoq, ataqqisiuk nersorlugulu!“ — Tussiaat 66:1, 2.

2. Guutip aqqanik naalannarsisitseqqusissut kikkut qisuariarfigaat, aamma sooq?

² Inuit amerlanersaasa Guuteqarnera akueriumanngilaat taassuminngaluunniit unnersiutiginnikkumanatik. Nunanili 235-ni 6 millionit sinnerlugit Jehovamut nalunaajaasoqarpoq, taakkualu ersersippaat Guutip pissusii takussaanngitsut pinngortitaani takusinnaallugit pinngortitarsuullu oqaaseqanngitsumik unnersiutiginninnera ’tusaasinnaallugu’. (Romamiut 1:20; Tussiaat 19:3, 4) Biibilimik atuaqqissaarnermikkut aamma Jehova ilisarisimalerlugulu asalersimavaat. Tussiaat 86:9, 10-mi ima siulittuuteqarpoq: „Inuiaat pinngortitavit tamarmik ornissavaatsit pallorfigalutillu, [Jehova], aqqillu ataqqissavaat [naalannartissavaat, 1900/1961]. Illimmi angingaarputit tupinnartuliortarlutillu, kisivit Guutiuvutit.“

3. ’Amerlangaartut’ qanoq ’kiffartorpat ullukkut unnuakkullu’?

³ Aammattaaq Saqqummersitat 7:9, 15-imi eqqaaneqarput pallorfiginnittut ’amerlangaartut’ Guutimik ’naalaffiani kiffartorfiginnittut ullukkut unnuakkullu’. Soorunami Guutip piumasarinngilaa kiffami kipisuitsumik unnersiutigissagaanni, pallorfiginnittaali silarsuaq tamakkerlugu  peqatigiissuupput, nunallu ilaanni unnuaagaangat nunarsuup illua-tungaani oqaluussisartut oqaluussineq ulapputigisarpaat. Taamaattumik oqartoqarsinnaavoq Jehovamut unnersiutiginnittunut seqineq tarrinngisaannartoq. Ungasinngitsukkut „anersaartortut tamarmik“ Jehova unnersiutigissavaat. (Tussiaat 150:6) Taamaalinnginneranili Guuti unnersiutiginiarlugu tamatta immikkut qanoq iliuuseqarsinnaavugut? Sunik unamminiagaqalersinnaavugut? Guutimillu unnersiutiginnittut naalannarsisitsisullu qanoq pilluaqquneqarnissartik ilimagisinnaavaat? Tamanna akissutissarsiniarlugu naggueqatigiit Gadikkut pillugit Biibilimi oqaluttuaq misissoriartigu.

Itsaq unamminiarnartoq

4. Naggueqatigiit Gadikkut sunik unamminiagaqarpat?

⁴ Israelikkut nunamut neriorsuutigisamut isertinnatik naggueqatigiit Gadikkut Jordanip kangiani, nersutaateqarfissaqqissuusumi, nunasinissartik qinnutigaat. (4 Mosesi 32:1-5) Tassani najugaqarluni unamminiagassaqarnassaqaaq. Naggueqatigiit kitaaniittut Jordanip qoorortaa, sakkutuunut tiguaaniartunut akimmiffiusoq, illersuutigaat. (Josva 3:13-17) Nunali Jordanip kangianiittoq pillugu George Adam Smithip atuakkiaani The Historical Geography of the Holy Land-imi ima allassimavoq: „[Nuna tamanna] tamarmi akimmiffissaqarpiarani Arabiap qatsissortaa toqqissoq portoqatigaa. Taamaammat normadet kaattut tamaani sakkutuuleeriaannaajuaannarput, ukiullu tamaasa taakkua ilaannit ivigartorfinnik tiguaaniartunit isaaffigineqartarpoq.“

5. Gadip kinguaavi saassunneqarnerminni qanoq periaaseqaqqullugit Jaakup kajumissaarpai?

⁵ Naggueqatigiit Gadikkut taamatut tatineqartuarlutik qanoq ingerlassappat? Ukiut hundredellit arlallit tamatuma siorna siuaasaat Jaaku toqulerluni ima siulittuivoq: „Gadi piiaasut saassutaraat, namminerli saassuppai malersorlugillu.“ (1 Mosesi 49:19) Immaqa oqaatsit taakku aarlerinartortaqarpalussinnaapput, tassaappulli Gadikkunnut imminnut illersoqqusissutit akiuuteqqusissutillu. Jaakup neriorsoqqissaarpai taamaaliorunik piiaasut nikanarsaatigisaannik qimaatissagaat malersorlugillu.

Ullumikkut unamminiakkavut

6, 7. Pissutsit kristumiut ullumikkut atugaat naggueqatigiit Gadikkut atuagaannut qanoq assinguppat?

⁶ Naggueqatigiit Gadikkut saassunneqarnerattulli, ullumikkut kristumiut Saatanip aaqqissuussineranit akerlilersorneqartarlutillu ajornartorsiortinneqartarput; tamakkununnga tupinnartuliornikkut illersugaanngilagut. (Jobi 1:10-12) Ilarpassuatsinnut atuartuuneq, inuussutissarsiorneq qitornanillu perorsaaneq tatineqaataavoq. Puiorneqassanngillallu inuttut ajornartorsiutit. Inoqarpoq ’kapinartumik timiminnut kapputtut’ ittunik innarluuteqartunik perulunnartumilluunniit nappaateqartunik. (2 Korinthimiut 12:7-10) Allat  imminut nikagineq erloqissutigaat. Kristumiullu utoqqaat utoqqalinermik ’ullui ajortut’ pissutigalugit immaqa siornatigutut nukeqartigalutik Jehovamut kiffartorsinnaajunnaarput. — Oqaluussisartup oqaasii 12:1.

⁷ Aammattaaq apustili Paulusip eqqaasippaatigut „ajussutsip anersaavinut pissaasunut qilaap ataaniittunut“ akiuuttariaqartugut. (Efesosimiut 6:12) ’Silarsuup anersaavanit’, pikitsitsiumatuujunermit ileqqorluttuunermillu Saatanip inngilipiluisalu piliaannit, sunnerneqartuarpugut. (1 Korinthimiut 2:12; Efesosimiut 2:2, 3) Lotip Guutimik mianerinnittup erloqissutigisai inuit avatitsinniittut ileqqorlullutik oqaasii iliuusiilu immaqa erloqissutigaavut. (2 Petrusi 2:7) Aammattaaq Saatanimit toqqaannartumik saassunneqartarpugut. Taassuma tanitat sinneri, „Guutip inassutaanik Jiisusillu nalunaajaataanik aalajangiussisut“, sorsuffigai. (Saqqummersitat 12:17) Aamma Jiisusip ’savaataasa allat’ Saatanip saassussineri inerteqquteqarnerni malersugaanernilu malugisarpaat. — Johannesi 10:16.

Nakkaannassaagut akiuutissaagulluunniit?

8. Saatanip saassussineri qanoq periaaseqarfigissavavut, aamma sooq?

⁸ Saatanip saassussineri qanoq periaaseqarfigissavavut? Itsaq naggueqatigiit Gadikkutulli anersaakkut nukittuujusariaqarpugut Guutillu innersuussinera malillugu imminut illersorluta. Ajoraluartumik ilaat inuunermi tatisinernut nakkaannartalersimapput anersaakkullu pisussaaffimminnik sumiginnaasalersimallutik. (Matthæusi 13:20-22) Oqaluussisartoq aperineqarami ilagiiminni sooq taama ataatsimiigiartukitsigisarnersoq, ima akivoq: „Qatanngutit qasulluinnalerput. Tamarmik stressertorujussuupput.“ Ilumoorpoq ullumikkut qasussutissarpassuaqarmat. Taamaattumik Guutimut pallorfiginninneq pisussaaffiit artornartut ilaattut tatineqaatigisatsitut isumaqarfigineqariaannaavoq. Taamatulli isumaqarneq peqqinnartuua — imaluunniit eqqortuua?

9. Kristusip nammaataa nammaatsiukkutsigu qanoq nukissaqaleqqissutigissavarput?

⁹ Jiisusip inuppassuarnut nalimini inuusunut, inuunermi tatisinernit aamma nanertugaasutut misigisunut, oqaasii uku eqqarsaatigikkit: „Ornissinga tamassi suleruluttusi nanertugaasusilu, qasuertissavassi.“ Jiisusi isumaqarpa Guutimut kiffartornikinnerulernermikkut qasuertinneqassasut, imaluunniit nukissaqalersinneqaqqissasut? Naagga, akerlianik Jiisusi ima oqarpoq: „Nammaatara ilissinnut pisissiuk, ilinniarfigisingalu qanilaarama uummatikkullu makitajuikkama; taava qasuerfissarsiumaarpusi tarnissinnut.“ Nammaataq tassaavoq qisummik saviminermilluunniit sanaaq inummut uumasumulluunniit oqimaatsumik nammattumut oqilisaataasoq. Sooq taamaattumik nammaatsissaagut? ’Nanertuutigeriikkavut’ naammannginnamik? Ilumut, Grækerisulli allassimanera aamma ima nutserneqarsinnaavoq: „Nammaqatigisinga.“ Eqqarsaatigilaaruk: Jiisusip nanertuutigisatsinnik nammaqatigiumavaatigut! Kisermaattariaqanngilavut. — Matthæusi 9:36; 11:28, 29; 2 Korinthimiut 4:7.

10. Guuti unnersiutiginiarlugu ilungersorutta qanoq kinguneqassava?

¹⁰ Jiisusimut ajoqersukkatut nammaataq taanna nammaatsiukkaangatsigu, Saatani akiortarparput. „Diaavulu akerartorsiuk, taava ilissinnit qimaassaaq,“ Jaaku 4:7-imi neriorsuuteqarpoq. Imaanngilarli oqitsuusoq. Guutimut kiffartorneq ilungersornartorujussuuvoq. (Lukasi 13:24) Tussiaat 126:5-imili ima neriorsorneqarpugut: „Qianngarmik siaruarterisut katersuiumaarput qiimmattarlutik.“ Guuti pallorfigisarput qujasuitsuunngilaq. ’Ujarlersini akissarsisittarpai’ unnersiutiginnitsinilu pilluaqqusarlugit. — Hebræerit 11:6.

Guutip naalagaaffianik oqaluussisartutut Guuti unnersiutigisiuk

11. Sooq oqaluussineq Saatanip saassussinerinut illersuutitut ippa?

¹¹ Jiisusi ima peqqusivoq: „Taamaattumik aallaritsi inunnillu inuiannit tamaneersunik ajoqersuganngortitsigitsi.“ Pingaarnerpaamik oqaluussinikkut Guuti ’pilliivigisinnaavarput qujaniutinik’. (Matthæusi 28:19, NV; Hebræerit 13:15) ’Guutip sakkutuussutaanut tamarmiusumut’ — Saatanip saassussineranut illersuutitsinnut — ’kamippatsitut eqqissinerup iivangkiiliua’ ilaavoq pinngitsoorneqarsinnaanngitsoq. (Efesosimiut 6:11-15) Aammattaaq uppernerput nakussatsinneqartarpoq illumiit illumut oqaluussinikkut Guuti unnersiutigigaangatsigu. (2 Korinthimiut 4:13) Nikallornartunik eqqarsaateqannginnissatsinnut iluaqutigisarparput. (Filippimiut 4:8) Oqaluusseqataagaangattalu  uppeqatitsinnik ilaqarnerput ineriartornartoq nuannaarutigisinnaasarparput.

12, 13. Aalajangersimasumik oqaluusseqataasarneq ilaqutariinnut qanoq iluaqutaasarpa? Assersuuteqarit.

¹² Aammattaaq ilaqutariittut oqaluussinermi suleqatigiinneq iluaqutaavoq. Soorunami meeqqat peqqinnartunik aliikkutaqarneq pisariaqartippaat, oqaluussinerli qatsunnartuusariaqanngilaq. Angajoqqaat qitornatik oqaluussillaqqissunngortillugit ilinniartikkunikkik taakkununnga pissanganarnerulersissinnaavaat. Meeqqat pikkoriffigisatik sammigaangamikkik nuannaarutigisarpaat, ilaa? Aamma angajoqqaat oqimaaqatigiissaarigunik qitornatillu sapigaannik piumasaqarfiginagit, qitornatik oqaluussinermik nuannarinnilersissinnaavaat. — 1 Mosesi 33:13, 14.

¹³ Aammattaaq ilaqutariit Guutimik unnersiutiginneqatigiittut imminnut qanittuararsuanngortarput. Assersuutigineqarsinnaavoq qatanngut uiminit uppinngitsumit qimanneqartoq meeqqanillu tallimanik kisimeeqateqalersoq. Maanna qitornani pilersorniarlugit sulisariaqalerpoq, tamannalu tassunga assut unamminiarnartuuvoq. Imali stressertigaa qitornami anersaakkut peqqissusiat sumiginnarlugu? Naagga. Ima oqaluttuarpoq: „Biibili aamma atuakkat atuagassiallu Biibililersaarutit eqiasuillunga atuaqqissaartarpakka, ilikkakkakkalu atorniarsarisarlugit. Meeqqat ataatsimiigiaqatigisarpakka aalajangersimasumillu oqaluusseqatigisarlugit. Ilungersuutikka qanoq kinguneqarpat? Maanna meeqqat tallimat tamarmik kuisimasuupput.“ Uummatikkut iluunngarlutit oqaluusseqataaneq aamma illit iluaqutigissavat qitornannik ’perorsaaniarninni inerterisarninilu Jehovamit’. — Efesosimiut 6:4, 1900/1961.

14. (a) Inuusuttut atuarfimmi qanoq Guuti unnersiutigisinnaavaat? (b) Inuusuttut ’iivangkiiliumik kanngusuutiginninnginnissaminnut’ suna iluaqutigisinnaavaat?

¹⁴ Ilissi meeqqat, atuarfimmi Guuti unnersiutigisarpisiuk, inunnulluunniit qunugassi nipangersimasarpisi? (Ussatit 29:25) Puerto Ricomi oqaluussisartoq 13-inik ukiulik ima allappoq: „Atuarfimmi oqaluussinissara kanngusuutiginngisaannarpara, nalunngilarami sallusuissutaasoq. Klassitsinni nappaajuaannarpunga Biibilimeersunillu ilikkakkannik oqaluttuarlunga. Fritiimeraangama atuakkanik atorniartarfimmukartarpunga, tassanilu atuagaq Unge spørger — Svar der duer * atuartarpara.“ Jehovap pilluaqqusimavaa? Ima oqaluttuarpoq: „Ilaannikkut atuaqatima arlaannik aperisarpaannga allaalluunniit atuakkamik qinnuigisarlunga.“ Oqaluussineq tunuarsimaarfigisimagukku, immaqa peqqissaartumik atuaqqissaartarnikkut ’Guutip piumasaata: ajunngitsup, iluarinartup, naammalluinnartup’ suuneranik paasinnilluinnarnissat pisariaqartippat. (Romamiut 12:2) Ilikkakkavit sallusuissutaanera qulakkeerluinnarukku, ’iivangkiiliu kanngusuutiginngisaannassavat’. — Romamiut 1:16.

Sulinissamut ’matu ammasoq’

15, 16. „Sulinissamut matu angisooq“ suna kristumiut ilaasa iserfigaat, qanorlu pilluaqquneqarpat?

¹⁵ Apustili Paulusi allappoq „sulinissamut matu angisooq“ imminut ammasoq. (1 Korinthimiut 16:9, NV) Sulinerunissamut matup ammasup iserfiginissaanut periarfissaqarpit? Assersuutigalugu ikiorti-pioneritut pioneritulluunniit nalinginnaasutut oqaluussinermi qaammammut nalunaaquttap-akunneri 50-it 70-illuunniit atorneqartussaapput. Pionerit pingaartinneqangaarput aalajaallutik kiffartoramik, oqaluussinermili piffissamik atuinerugaluarlutik qatanngutiminnit pingaarnerusutut misiginngillat. Isiginnittaaserli Jiisusip ajoqersukkaminut ineriartorteqqullugu kajumissaarutaa una ineriartortippaat: „Kiffaavugut atunngitsut. Pisussaassuserput malillugu iliuinnarpugut.“ — Lukasi 17:10.

 ¹⁶ Pioneritut kiffartortuussagaanni imminut naalakkersinnaasariaqarpoq, inuttut pilersaarusiorsinnaasariaqarpoq pilliuteqarusussuseqartariaqarlunilu, pilluaqqussutissartaali eqqarsaatigalugit imminut akilersinnaavoq. „Guutip oqaasianik sallusuissutaasumik eqqortumik atuisinnaaneq pilluaqqussutaangaarpoq,“ inuusuttoq pioneriusoq Tamikamik atilik oqarpoq. „Pioneriugama Biibili atortorujussuusarpara. Maanna illumiit illumut angalaaraangama allassimaffiit inunnut assiginngitsunut naapitannut naleqquttut eqqaasinnaasarpakka.“ (2 Timotheusi 2:15) Pioneriusoq Micamik atilik ima oqarpoq: „Pilluaqqussutissartaa alla nuanningaartoq tassaavoq sallusuissutip inunnut qanoq sunniuttarnera takullugu.“ Angutip inuusuttup Matthewimik atillip aamma eqqaavaa nuannaartarnini „allat sallusuissummiilersut takugaangamigit. Allamik taama nuannertigisoqanngilaq.“

17. Qatanngutip kristumiup pioneriunissani qanoq merseriunnaarpaa?

¹⁷ Pionerinngornissat eqqarsaatiginikuuiuk? Immaqa kajumigaat, imminulli ajukkullutit. „Pioneriunissara merseraara,“ qatanngut arnaq Kenyattemik atilik nassuerpoq. „Sapissallugu misigivunga. Aallarniutit qanoq piareersassanerlugit Biibililu oqaluussinermi qanoq atussanerlugu naluara.“ Taavali utoqqaanertat qatanngut arnaq pioneriusoq inersimalluartoq Kenyattemik suleqateqaqquaat. „Suleqatiginera nuannersuuvoq,“ Kenyatte oqaluttuarpoq. „Pionerinngornissannut kajumissuseqalissutigaara.“ Immaqa kajumissaarneqarneq ilinniartitaalaarnerlu aamma illit pionerinngornissannut kajumississutigissavatit.

18. Ajoqersuiartortitanngortut qanoq pilluaqqusaasarpat?

¹⁸ Pioneritut kiffartorneq kiffartornermi immikkut pisinnaatitaaffinnut allanut matunik aamma ammaasinnaavoq. Assersuutigalugu aappariit ilaat ajoqersuiartortitanngortussatut ilinniartinneqarsinnaapput, taavalu nunamut allamut aallartitaallutik. Ajoqersuiartortitat nunamik tikitaminnik sungiussisariaqarput, immaqa aamma oqaatsinik allanik, kulturimik allamik nerisassanillu allanik. Pilluaqqussaanerulli erloqinartut tamakku soqutaajunnaarsilluinnartarpai. Mildred, ukiorpassuarni Mexicomi ajoqersuiartortitaasoq, ima oqarpoq: „Ajoqersuiartortitanngornera  peqqissimissutiginngisaannarpara. Niviarsiaraallungali kissaatigisimavara.“ Qanoq pilluaqqusaasarpa? „Nammineq nunanni Biibilimik atuaqqissaaqatitaarnissaq ajornakusoortorujussuuvoq. Maanili Biibilimik atuaqqissaaqatigisartakkannik sisamanik ataatsikkut oqaluussisartunngortoqarpoq!“

19, 20. Betelimi nunanilu tamalaani sanaartortutut kiffartorneq aamma Kiffartortut Toqqakkat Atuarfianni ilinniartitaaneq amerlasuunut qanoq pilluaqqussutaasimava?

¹⁹ Jehovap Nalunaajaasuisa immikkoortortaqarfiini kiffartortut aamma pilluaqqusaangaartarput. Svenip, qatanngutip inuusuttup Tysklandimi Betelimiittup, suliani ima oqaatigaa: „Misigivunga naleqartuartussamik naammassisaqartarlunga. Piginnaanikka silarsuarmi atorsinnaagaluarpakka. Taamaaliornerulli assigiinnassavaa aningaasanik bankimut akiliisinnaajunnaalersumut ikisineq.“ Ilumoorpoq nammineq kajumissutsimit akissarsiaqaranilu sulissagaanni pilliuteqartoqartariaqartoq. Svenili ima oqarpoq: „Angerlaraangama naluneq ajorpara ulloq taanna suliakka tamaasa Jehovamut suliaralugit. Nuannertaqaaq.“

²⁰ Qatanngutit ilaat nunani tamalaani sanaartortutut kiffartorneq pilluaqqusaassutigisimavaat nunanilu allani immikkoortortaqarfilioqataasimallutik. Aappariit nunani assigiinngitsuni arfineq-pingasuni sulisimasut ima allapput: „Maani qatanngutit nuannerluinnarput. Maanngaanniit aallassaagut artorsaateqangaarluta — arfineq-pingajussaalu qamuuna sequmeqqalluta aallassaagut. Nuanningaartunilli misigisaqarpugut!“ Aammattaaq taasinnaavarput Kiffartortut Toqqakkat Atuarfiat. Tassani qatanngutit aappaqanngitsut piukkunnaatillit anersaakkut ilinniartinneqartarput. Qatanngut tassani atuarsimasoq ima allappoq: „Atuarfik nuannersoq taanna pillugu ilissinnut qujamasunnera oqaasertassaaleqivara. Peqatigiiffik alla allanik ilinniartitsiniarluni taamarsuaq iliuuseqassava?“

21. Kristumiut tamarmik Guutimut kiffartornerminnut atatillugu suna unamminiagassaraat?

²¹ Aap, sulinerunissamut matorpassuit ammapput. Ilumoorpoq ikinnerpaartavut Betelimi nunaniluunniit allani kiffartorsinnaammata. Jiisusip aamma nassuerutigaa kristumiut pissutsit atukkatik assigiinngitsuummata ’inerititaqassasut’ assigiinngisitaartunik. (Matthæusi 13:23) Taamaattumik kristumiutut unamminigassarput tassaavoq pissutsit atukkatta pissarsiffiginerpaanissaat — pissutsit atukkavut naapertorlugit Jehovamut kiffartornermi sapinngisamik peqataanerpaanissaq. Taamaaliorutta Jehova ataqqissavarput naalannarsisillugulu, qularutiginngilluinnarsinnaavarpullu aamma nuannaartillutigu. Assersuutigalugu eqqarsaatigiuk Ethel, qatanngut utoqqaat-illuanni najugalik. Utoqqaat-illuanniittunut allanut aalajangersimasumik oqaluussisarpoq telefonikkullu oqaluusseqataasarluni. Pisinnaasani killeqaraluartut uummatikkut iluunngarluni kiffartorpoq. — Matthæusi 22:37.

22. (a) Qanoq Guuti naalannarsisissinnaavarput? (b) Nuanningaartumik qanoq siunissaqarpugut?

²² Eqqaamasariaqarparpulli oqaluussineq Jehovamik unnersiutiginninnerit ilaannarimmassuk. Suliffimmi, atuarfimmi angerlarsimaffimmilu pissusitsigut maligassiuilluarutta, eqqiluitsuugutta takujuminaruttalu Jehovap uummataa nuannaartissavarput. (Ussatit 27:11) Ussatit 28:20-mi ima neriorsuuteqarpoq: „Inuk tatiginartoq [suliamigut aalajaatsoq, NV] naammattunik pilluaqqusaassaaq.“ Taamaattumik Guutimut kiffartornitsinni ’naammangaartunik siaruarterisariaqarpugut’ nalunagu pilluaqquneqangaarumaarluta. (2 Korinthimiut 9:6) Taamaaliorutta immikkut pisinnaatitaaffigalugu inuussaagut „anersaartortut tamarmik“ pisassarilluinnagaattut Jehova unnersiutigilerpassuk! — Tussiaat 150:6.  (wE 6/1 04)

[Quppernerup ataani ilanngussaq]

Uteqqiineq

• Guutip innuttai Jehovamut „ullukkut unnuakkullu“ kiffartortut qanoq paasisariaqarpa?

• Naggueqatigiit Gadikkut sunik unamminiagaqarpat, tamannalu ullumikkut kristumiut qanoq ilinniarfigisinnaavaat?

• Oqaluussineq Saatanip saassussinerinut qanoq illersuutaava?

• Ilaasa ’matu ammasoq’ suna iserfigaat, qanorlu pilluaqquneqarsimappat?

[Atuaqqissaarnermi apeqqutit]

[Qupp. 15-imi assiliartaq]

Naggueqatigiit Gadikkut piiaasunut akiuunerattulli kristumiut Saatanip saassunerinut imminnut illersortariaqarput

[Qupp. 17-imi assiliartaq]

Oqaluussinermi ineriartornartumik peqatigiittarpugut

[Qupp. 18-imi assiliartat]

Pioneritut kiffartorneq kiffartornermi immikkut pisinnaatitaaffinnut allanut matunik ammaasinnaavoq, soorlu makkununnga:

1. Nunani tamalaani sanaartortutut kiffartorneq

2. Betelimi kiffartorneq

3. Ajoqersuiartortitatut kiffartorneq