Guutimit uumasumit siulersortigit

„Guutimut uumasumut qilammik nunamillu immamillu taakkunaniittunillu tamanik pinngortitsisumut [saanniaritsi].“ — APUSTILIT SULIAAT 14:15.

1, 2. Jehovap „Guuti uumasoq“-mik taaneqarnera sooq naleqquppa?

LYSTRAMI apustili Paulusip Barnaballu angut ajorunnaarsereerlugu Paulusip inuit ima oqarfigai: „Ilissitulliuna inuinnaasugut. Iivangkiiliu nalunaajaatigaarput guutipiluit piunngitsut tunullugit saaqqullusi Guutimut uumasumut qilammik nunamillu immamillu taakkunaniittunillu tamanik pinngortitsisumut.“ — Apustilit Suliaat 14:15.

² Ilumuungaarami Jehova ’Guutiusoq uumasoq’, guutipiluunani uumassuseqanngitsoq! (Jeremia 10:10; 1 Thessalonikamiut 1:9, 10) Jehova tassaaginnanngilaq Guuti uumasoq, aammattaarli inuunermut pilerfiuvoq. „Taannaavoq tamanut inuunermik anersaartornermillu allanillu tamanik tunisisartoq.“ (Apustilit Suliaat 17:25) Kissaatigaa maannakkut siunissamilu inuuneq nuannaarutigissagipput. Paulusi nangilluni oqarpoq Guuti ’imminut nalunaajaassutigisimasoq ajunngitsuliornermigut  tunisarlusi qilammit sialummik ullunillu naalluarfiusunik, qaarsillartittarlusi uummatisilu nuannaartittarlugit’. — Apustilit Suliaat 14:17.

3. Sooq isumakuluuteqarnata Guutimit siulersortissinnaavugut?

³ Guutip uagutsinnik soqutiginninnera siulersuineranik tatiginnilluinnalissutigaarput. (Tussiaat 147:8; Matthæusi 5:45) Inuilli ilaat taassumannga siulersortikkumasanngillat Biibilimi peqqussutigineqartoq paasinngikkaangamikku killiliisorigaangamikkuluunniit. Paasinarsisimavorli Jehovap siulersuineranik tatiginninneq silatusaarnerusoq. Ima assersuusiortoqarsinnaavoq: Uumasumik toqungasumik attuinnginnissamik inatsit paasinngikkaluarlugu Israelikkuusup maleruaanini iluaqutigisarpaa. Siullermik, naalannini Guutimut uumasumut qanillissutigissavaa, aappassaanillu nappaateqalissutiginngitsuussavaa. — 3 Mosesi 5:2; 11:24.

4, 5. (a) Kristumiut sioqqullugit Jehova aak pillugu qanoq peqqussuteqarpa? (b) Aak pillugu Guutip peqqussutaa kristumiunut atuuttoq qanoq nalunngilarput?

⁴ Aak pillugu Guutip peqqussutaanut atatillugu aamma taamaappoq. Noa oqarfigaa inunnik aattortoqassanngitsoq. Kingusinnerusukkut Guutip Mosesip inatsisaani paasinarsisippaa tunisivimmi aap atorneqarnissaa taamaallaat akueralugu — ajortit isumakkeerneqaatissaattut. Guutip taakkuninnga najoqqutassiinermigut tunngavilerpaa aap nersornarnerpaamik atorneqarsinnaanissaa — Jiisusip utertitsissutitut pilliutaa iluaqutigalugu inuunermik annaassinissamut. (Hebræerit 9:14) Ilumut, Guutip pissutsinik aqutsinerata takutippaa inuunerput ingerlalluarnissarpullu soqutigigai. 1800-kkunni Biibilimik misissueqqissaartartoq Adam Clarke Mosesimik allakkat siulliit 9:4 pillugu oqaaseqaammini ima allappoq: „[Noamut] peqqussut taanna kristumiunit ortodoksinit suli maleruaqqissaarneqartarpoq . . . Mosesip inatsisaasa atuunnerisa nalaanni aak sunaluunniit nerineqartussaanngilaq aammut silarsuup ajortaa pillugu kuineqartussamut tikkuussigami; kristumiullu nalaanni aak nerineqartussaanngilaq aammut ajortit isumakkeerneqaatissaattut kuineqarsimasumut assersuutaasutut isiginneqartuartussaagami.“

⁵ Biibilimik misissueqqissaartartup taassuma eqqarsaatigigunarpaa iivangkiiliup, imaluunniit nutaarsiassap nuannersup, Jiisusip pingaarnerpaatut inuttaaffiata, pingaarnersaa. Tamatumunnga ilaavoq Guutip ernerminik nunarsuarmut aallartitsinera uagut pilluta toquniassammat aamminillu kuisiniassammat naassaanngitsumik inuusinnaaleqqulluta. (Matthæusi 20:28; Johannesi 3:16; Romamiut 5:8, 9) Aattunnginnissamik peqqussut, kingusinnerusukkut Kristusip ajoqersugaanut oqaatigineqartoq, aamma oqaaseqaammi eqqaaneqarpoq.

6. Aak pillugu malittarisassat suut kristumiunut tunniunneqarpat, aamma sooq?

⁶ Nalunngilarput Guutip Israelikkut inatsisinik hundredelikkuutaanik tunigai. Jiisusilli toqunerata kingorna ajoqersugai inatsisinik taakkuninnga tamanik maleruaasussaatitaanngillat. (Romamiut 7:4, 6; Kolossemiut 2:13, 14, 17; Hebræerit 8:6, 13) Piffissalli ingerlanerani apeqqummik saqqummersoqarpoq Inatsisini aalajangersakkat tunngaviusut ilaannut atatillugu — tassa kipineqarnermut. Juutiunngitsut Kristusip aavanik iluaqutiginnikkumasut kipineqartussaappat taamaalillutillu Inatsisini piumasarineqartunik maleruaallutik? Ukiumi 49-mi kristumiut  siulersuisoqatigiivisa apeqqut tamanna oqaloqatigiissutigaat. (Apustilit Suliaat, kapitali 15) Guutip anersaavanit siulersorneqarlutik apustilit utoqqaanertallu isummiuppaat pinngitsoorani kipineqartussaaneq atorunnaartoq Inatsisit atorunnaarmata. Piumasaqaatilli Guutimeersut ilaat kristumiunut suli atuupput. Siulersuisoqatigiit ilagiinnut ima allapput: „Anersaaq Illernartoq uagullu aalajangerpugut allamik nammagassikkumanasi pisariaqartut ukua saniatigut: Nerissanngikkisi nersutit guutipilunnut pilliutaasut neqaat aammattaaq aak nersutillu qimitat neqaat, kinguaassiuutitigullu inuunerlunneq nigorsimaniarlugu. Tamakku ingalassimaniarussigit eqqortuliussaasi.“ — Apustilit Suliaat 15:28, 29.

7. ’Aammik nerinnginnissaq’ kristumiunut qanoq pingaaruteqartigaa?

⁷ Erseqqippoq siulersuisoqatigiit ’aammik nerinnginnissaq’ kinguaassiuutitigut inuunerlunnginnissatulli guutipilussiunnginnissatullu pingaartitsigigaat. Tamatuma ersersippaa aattoqqusinnginneq ilumooruttariaqartoq. Kristumiut peqqissiminatik guutipilussiortut kinguaassiuutitigulluunniit inuunerluttut ’Guutip naalagaaffia kingornussarsiarisinnaanngilaat’; „pisassartik pissavaat . . . Tassa toqup aappaa“. (1 Korinthimiut 6:9, 10; Saqqummersitat 21:8; 22:15) Malugiuk ukua assigiinngissutaat: Aap illernassusia pillugu Guutip aalajangersagaanik sumiginnaaneq naassaanngitsumut toqunermik kinguneqarsinnaavoq. Jiisusilli pilliutaanik ataqqinninneq inuunermik naassaanngitsumik kinguneqarsinnaavoq.

8. Suup takutippaa kristumiut siulliit aak pillugu Guutip peqqussutaa ilumoorukkaat?

⁸ Aak pillugu Guutip peqqussutaanik kristumiut siulliit qanoq paasinnillutillu maleruaappat? Eqqaaneqareersutut Adam Clarkep oqaaseqaataani ima allassimavoq: „Kristumiut nalaanni aak nerineqartussaanngilaq aammut ajortit isumakkeerneqaatissaattut kuineqarsimasumut assersuutaasutut isiginneqartuartussaagami.“ Oqaluttuarisaanermi uppernarsaatissaqarpoq kristumiut siulliit tamatuminnga ilumoorussinerannik. Tertullian, itsaq atuakkiortoq, ima allappoq: „Aamma taamaappoq isiginnaartitsivinni isiginnaartitsinerup nalaani pinerluttut toqutaasut aavannik suli kissartumik najorpalillutik imertunut . . . tamatuminnga imerunik noqartarunnaassasorisunut.“ Tertullian allappoq kristumiut, Guutimik nalusunit aattortartunit allaanerulluinnartut, „uumasut aavat nerineqarsinnaasulluunniit ilaattut isiginngikkaat . . . Taamaattumik kristumiut misilinniarlugit pølsenik uumasut aavannik aattalinnik sassaallertarpusi nalunngilluinnarassiuk taakkununnga nereqqusaanngitsut.“ Massa toqumut sioorasaarneqaraluarlutik kristumiut aattorumanngillat. Guutip peqqussutaa taakkununnga taama pingaaruteqartigaaq.

9. Aap nereqqusaannginnerata saniatigut aattoqqusinnginnermut suut ilaappat?

⁹ Immaqa isumaqartoqarpoq siulersuisoqatigiit isumaqaannartut kristumiut aattoqqusaanngitsut, aaverneqarsimanngitsullu neqaannik nerisassanillu aammik akulinik nereqqusaanngitsut. Ilumoorpoq Guutip Noamut peqqussutaani tamanna tunngaviusoq. Apustilit ataatsimiinneranni aamma aalajangerneqarpoq kristumiut ’ipisumik nereqqusaanngitsut’, tassa neqimik aattalimmik. (1 Mosesi 9:3, 4; Apustilit Suliaat 21:25, 1900/1961) Kristumiulli siulliit nalunngilaat peqqussut tamatumannga isumaqarnerusoq. Ilaannikkummi aak nakorsaatitut atorneqartarsimavoq. Tertullian allappoq Guutimik nalusut ilaat suli kissartumik aattortartut noqartarunnaarniaraluarlutik. Imaassinnaavorlu nakorsaanermi peqqinnerulerniaraluarnermiluunniit aak aamma allatigut atorneqartarsimasoq. Taamaattumik kristumiut aattortanngillat aamma ’nakorsaatitut’ taaneqaraluarpat. Taamatut isumaqarnertik aalajangiusimajuarpaat allaat inuunerminnik naleqassagaluarpat.

Aap nakorsaatitut atorneqartarnera

10. Aak nakorsaatitut qanoq atorneqartarpa, sunalu apeqqutaalerpa?

¹⁰ Ullumikkut aap nakorsaanermut tunngatillugu atorneqartarnera nalinginnaavoq. Aalersuisoqaqqaartalermat aak aalanngaat atorneqartarpoq — aaviisoqareeraangat toqqorneqartarpoq taannalu atorlugu napparsimasoq, immaqa sorsunnermi  ikiligaasimasoq, aalersorneqartarluni. Kingusinnerusukkut ilisimatuut aap akuisa pingaarnerpaat immikkoortiternissaat ilikkarpaat. Aap akui pingaarnerpaat atorlugit nakorsat aaversittup aava napparsimasunut amerlanerusunut atorsinnaavaat, immaqa napparsimasoq ataaseq aap imerpalasortalersorlugu allalu aap aappalaartortalersorlugu. Kingusinnerusukkut ilisimatuut paasilerpaat aap akuanit pingaarnerpaamit ataatsimit, assersuutigalugu aap imerpalasortaanit, derivatit assigiinngitsut immikkoortinneqarsinnaasut taakkulu napparsimasunut suli amerlanerusunut atorneqarsinnaasut. Tamanna suli misissugarineqarpoq, derivatinillu atueriaatsit nutaat nalunaarutigineqartarput. Tamanna kristumiup qanoq periaaseqarfigisariaqarpaa? Aalajangiusimalluinnarpaa aalersortinngisaannarnissani, immaqali aap akuisa pingaarnerpaat ilaannik ataasiinnarmik pinissaminut, assersuutigalugu aap aappalaartortalersortinnissaminut, nakorsamit kajumissaarneqarpoq. Derivatimilluunniit ataasiinnarmik, aap akuisa pingaarnerpaat ilaanneersumik, nakorsartinnerusinnaavoq. Aap illernartuunera Kristusillu aavata inuunermik annaassivissinnaanera eqqarsaatigalugit Guutimut kiffaasup tamakku qanoq isummerfigisinnaavai?

11. Aammut tunngatillugu isuma nakorsaanermut naapertuuttoq suna Jehovap Nalunaajaasuisa qangali aalajangiusimavaat?

¹¹ Ukiorpaaluit matuma siornali Jehovap Nalunaajaasuisa aalajangiusimasartik erseqqissarpaat. Assersuutigalugu The Journal of the American Medical Association-imi allaaserisaqarput (27. novembari 1981; taanna kingusinnerusukkut atuagassiaaqqami Hvordan kan blod redde dit liv?-mi qupp. 27-29-mi issuarneqarpoq). * Allaserisami, Mosesimik allakkat siulliit-nit, Mosesimik allakkat pingajui-nit aamma Apustilit Suliaat-nit issuaaffiusumi, ima allassimasoqarpoq: „Allassimaffiit tamakku nakorsat oqaaserinngikkaluaraat Jehovap Nalunaajaasuisa taakku aammik aalanngaat aalersortinnissamut, aap aappalaartortalersortinnissamut, imerpalasortalersortinnissamut, qaqortortalersortinnissamut saalimasortalersortinnissamullu inerteqqutitut paasivaat.“ Atuakkami ilinniummi Emergency Care-mi, 2001-imi saqqummersinneqartumi, „Aap sananeqaataa“-nik qulequtalimmi ima allassimasoqarpoq: „Aap akui arlaliupput: aap imerpalasortaa, aappalaartortai, qaqortortai saalimasortaalu.“ Taamaattumik nakorsaatitigut ilisimatusarnermut tunngasunut naapertuuttunut taakkununnga naapertuuttumik Jehovap Nalunaajaasui aammik aalanngaat aamma aap akuisa pingaarnerpaat sisamaasut ilaannik sumilluunniit atuiumanngillat.

12. (a) Derivatit, aap akuinit pingaarnerpaanit immikkoortinneqartut, pillugit isuma suna siusinnerusukkut nassuiarparput? (b) Tamanna pillugu aamma sumi paasiniaasoqarsinnaava?

¹² Nakorsanut atuagassiami allaaserisap nanginnerani ima allassimavoq: „[Jehovap Nalunaajaasuisali]  upperisarsiornikkut isumaat imaattariaqanngilaq albuminimik, globulinimik aamma aanaaginnalertarnermik nappaateqartunut nakorsaatinik atuinissaq inerteqqutaasoq; Jehovap Nalunaajaasuisa ataasiakkaat namminneq aalajangigassaraat tamakkuninnga pisinnaanerlutik.“ 1981-imiilli derivatit (aap akuisa pingaarnerpaat sisamaasut ilaata ataatsip akui mikisuaraararsuit) amerlasuut immikkoortinneqartalersimapput nakorsaatitut atorneqartussanngorlugit. Taamaattumik Vagttårnet 15. juuni 2000-imoortumi „Spørgsmål fra læserne“-mi tamanna pillugu iluaqutaasinnaasunik paasissutissiisoqarpoq. Atuartartut nutaat millionillit iluaqutiginiassammassuk Vagttårnet 15. juuni 2004-moortumi qupp. 29-31-mi allaaserisaq taanna naqinneqaqqippoq. Allaaserisaq sukumiisumik paasissutissiillunilu paasiuminartunik tunngavilersuutitaqarpoq, pingaarnerusutigulli 1981-imi saqqummiunneqartoq assigaa.

Nalunngeqatiginnissutsip pingaaruteqarnera

13, 14. Nalunngeqatiginnissuseq suua, aallu pillugu qanoq pingaaruteqarpa? (b) Neqitorneq pillugu Guutip Israelikkut qanoq siunnersorpai, suulli apeqqutigineqarsinnaappat?

¹³ Paasissutissat taamaattut ersersippaat aalajangigassaqaraanni nalunngeqatiginnissuseq atortariaqartoq. Sooq? Kristumiut tamarmik isumaqarput Guutimit siulersorneqartariaqarlutik, pissutsinili aalajangersimasuni namminneq aalajangertussaavaat qanoq iliussanerlutik, taamaattoqartillugulu nalunngeqatiginnissuseq pingaaruteqarpoq. Nalunngeqatiginnissuseq inunnguusiuvoq, tamannalu pissutigalugu assigiinngitsunik, ilaatigut ileqqussanut tunngasunik, naliliisinnaasarpugut aalajangiisinnaasarlutalu. (Romamiut 2:14, 15) Nalunngeqatiginnissutsilli qanoq malussaritsiginera inummit inummut assigiinngissinnaasarpoq. * Biibilimi eqqaaneqarpoq ilaasa ’tarningisa nalunngissusiat qajannartuusoq’, tamatumalu paasinarsisippaa allat nalunngeqatiginnissuseqartut nukittuumik. (1 Korinthimiut 8:12) Guutip piumasaanik ilinniarnerminni, eqqarsartaasianik paasinninnerminni aalajangigassaqaraangamillu tamanna naapertorlugu iliuuseqarnerminni kristumiut siumukarnerat assigiinneq ajorpoq. Tamanna paasiuminarsarniarlugu juutit neqitortarnerlu pillugit assersuuteqarsinnaavugut.

¹⁴ Biibilimi erseqqilluinnarpoq Guutimut naalattoq aaverneqarsimanngitsup neqaanik neriumanavianngitsoq. Peqqussut tamanna ima pingaaruteqartigaaq sakkutuut Israelikkut allaat ajornartoorfimmi aaverneqarsimanngitsut neqaannik nerisut sualuttumik kukkusutut imaluunniit ajortuliortutut pissuutinneqarlutik. (5 Mosesi 12:15, 16; 1 Samueli 14:31-35) Apeqqutissaqartoqalersinnaavorli. Israelikkuusoq savamik toqutsiguni toqutani qanoq  pilertortigisumik aavertariaqarpaa? Uumasoq aaverniarlugu qungasiatigut pilallugu toquttariaqarpaa? Sava kingulliivisigut pitullugu nivinngarneqartariaqarpa? Taamaappallu qanoq sivisutigisumik nivingatinneqartariaqarpa? Nersussuaq angisooq susariaqarpaa? Allaat aaverneqareersimasup neqaa aattaqalaarsinnaavoq. Neqi taamaattoq nerisinnaavaa? Kia tamanna aalajangissavaa?

15. Neqitornermut tunngatillugu juutit ilaat qanoq iliortarpat, Guutilli qanoq peqqusimavai?

¹⁵ Takorlooriaruk juuteq ilumoortoq taamatut apeqqutissaqartoq. Immaqa eqqarsarpoq niueriartortarfimmi neqisinaveersaaruni pitsaanerussasoq, soorlu juuteq alla guutipilummut pilliutigineqarsimasinnaasumik neqitorusussanngitsoq. Juutit allat immaqa malittarisassat aalajangersimasut malillugit aaverneqarsimasut neqaannaannik neqitorusupput. * (Matthæusi 23:23, 24) Isummat taama assigiinngitsigisut illit qanoq isumaqarfigaagit? Guuti tamatumunnga malittarisassiorsimanngimmat juutinut pitsaanerusimassagaluarpa apeqqutissarpassuatik rabbinereqatigiinnut apeqqutigisimappatigik tamaasa ataasiakkaarlugit immikkut aalajangiiffigineqaqqullugit? Juutiussutsimi taamaaliortarneq taamani nalinginnaaleriartuinnarpoq, oqiliallannarporli nalunagu Jehovap pallorfiginnittut ilumoortut aammut tunngasunik taamatut aalajangiisarnissaat peqqussutiginngikkaa. Uumasut mingunnaatsut qanoq toqunneqartariaqarnerannik aaverneqartariaqarnerannillu siunnersuut tunngaviusoq Guutip isumagaa, sukumiinerusumilli paasissutissiinani. — Johannesi 8:32.

16. Sooq kristumiut derivatimik mikisuararsuarmik, aap akuisa pingaarnerpaat ilaanneersumik, kapitinnissaq assigiinngitsumik isumaqarfigisinnaavaat?

¹⁶ Soorlu immikkoortuni 11-mi 12-imilu eqqaaneqareersoq Jehovap Nalunaajaasui aammik aalanngaat aallu akuisa pingaarnerpaat sisamaasut ilaannik sumilluunniit — tassa aap imerpalasortaanik, aappalaartortaanik, qaqortortaanik saalimasortaanillu — aalersortikkumanngillat. Derivatimmi mikisuararsuit, aap akuisa pingaarnerpaat ilaannit immikkortinneqarsimasut, soorlu serumit nappaatinut imaluunniit pulateriaarsuup toqunartuanut akiuussutissartallit? (Takuuk Vagttårnet 15. juuni 2004-moortoq, qupp. 30, immikkoortoq 4.) Ilaat isummerput derivatit mikisuaraararsuit taamaattut aajujunnaartut taamaammallu ’aammik nerinnginnissamik’ peqqussummi pineqanngitsut. (Apustilit Suliaat 15:29; 21:25; Vagttårnet 15. juuni 2004-moortoq, qupp. 31, immikkoortoq 1) Tamanna namminneq akisussaaffigaat. Allat nalunngeqatiginnissusertik pissutigalugu suulluunniit aammut tunngassuteqalaaginnarsinnaasut, allaat derivati mikisuararsuaq, aap akuisa pingaarnerpaat ilaannit ataasiinnarmeersoq, piumanngilaat. * Allat immaqa aap imerpalasortaata proteinitaanik kapitikkumassapput nappaammut pulateriaarsuulluunniit toqunartuanut akiuussutissaqarniarlutik, derivatilli allat piumanagit. Aamma nakorsaatit ilaat, aap akuisa pingaarnerpaat sisamaasut ilaannit ataatsimit immikkoortinneqarsimasut, aap akuanut pingaarnerpaamut ima assingutigisinnaapput, timimilu sulinerat inuunermi ima pingaaruteqartigisinnaavoq, kristumiut amerlanersaannit piumaneqassanatik.

17. (a) Derivatinut aammeersunut tunngasunik isummerfigisassaqaraangatta nalunngeqatiginnissuserput qanoq iluaqutaasinnaava? (b) Tamatumunnga tunngatillugu aalajangiisarnissaq sooq taama pingaaruteqartigaa?

¹⁷ Taamaattunik aalajangigassaqaraangatta nalunngeqatiginnissuseq pillugu Biibilimi allassimasut iluaqutigisinnaavavut. Taamaattumik Guutip oqaasiani qanoq allassimasoqarnersoq  paasiniartariaqarparput nalunngeqatiginnissuserpullu tamanna naapertorlugu ilusilersorniarsaralutigu. Taamaaliorutta Guutip oqaasianut naapertuuttumik aalajangiisinnaalissaagut, alla uagut pilluta aalajangiinissaanik qinnuiginagu. (Tussiaat 25:4, 5) Derivatinik aammeersunik pisoqarsinnaanera pillugu ilaat ima eqqarsarsimapput: ’Tamanna nalunngeqatiginnissuseq malillugu aalajangigassaavoq, taamaattumik qanoq iliorniarluta aalajangernersugut apeqqutaanngilaq.’ Taamatulli tunngavilersuineq kukkuneruvoq. Nalunngeqatiginnissuseq malillugu aalajangigassaammat isumaqanngilaq soqutaanngitsuusoq. Pingaaruteqartorujurujussuusinnaavoq. Pissutaasut ilagaat tamatuma uagutsinnit allaanerusumik nalunngeqatiginnissusilinnut sunniuteqarsinnaanera. Tamanna erserpoq neqi immaqa guutipilummut pilliutigineqarsimasoq kingornalu niueriartortarfimmi tunineqarsimasoq pillugu Paulusip siunnersuutaani. Kristumiup allat ’tarningisa nalunngissusiat qajannartoq ikilernaveersaartariaqarpaa’. Allat mamiatsatsikkunigit imaassinnaavoq ’qatanngutini Kristusip toqqutigisaa tammartikkaa’ taamaalillunilu Kristusimut ajortuliorluni. Derivatinut tunngasut tamatta inuttut ataasiakkaatut isummerfigisussaagaluarlutigik tamakku pillugit aalajangertinnata eqqarsarluaqqaartariaqarpugut. — 1 Korinthimiut 8:8, 11-13; 10:25-31.

18. Aak pillugu aalajangigassaqaraangami kristumiu nalunngeqatiginnissutsiminik qanoq misikkarluttunngortitsinaveersaarsinnaava?

¹⁸ Aammut tunngatillugu aalajangikkat pingaaruteqartorujussuunerat pillugu aamma allamik erseqqissaatissaqarpoq. Tassa aalajangikkat aalajangiisumut sunniutigisinnaasaat. Derivatimik pinissat eqqissiunnaarutigissagukku nalunngeqatiginnissutsit Biibili tunngavigalugu ilinniartinneqarsimasoq sumiginnassanngilat. Aamma nalunngeqatiginnissutsit tusaanngitsuusaassanngilat allamit ima oqarfigineqarnerit piinnarlugu: „Derivatimik aammeersumik pinissaq ajorineqanngilluinnarpoq; allarpassuit taamaaliorsimapput.“ Eqqaamajuk ullumikkut inuit millionilikkuutaat nalunngeqatiginnissutsiminnik sumiginnaasarnerat nalunngeqatiginnissusertik misikkarlussitillugu ilerasuutiginagulu sallusinnaanngortarlutik allanillu eqqunngitsuliorsinnaanngortarlutik. Kristumiut taamaalinissartik kissaatiginngilluinnarpaat. — 2 Samueli 24:10; 1 Timotheusi 4:1, 2.

19. Aak pillugu nakorsaanermut tunngasunik isummerfigisassaqaraangatta pingaarnerpaamik suna eqqarsaatigisariaqarparput?

¹⁹ Vagttårnet 15. juuni 2004-moortumi qupp. 29-31-mi allaaserisami naqiteqqitami naggataata tungaani ima allassimavoq: „Isummat assigiinngitsuummata inuillu nalunngeqatiginnissusiisa akuerisinnaasaat assigiinngitsuummata, taava qanoq aalajangiinissaq soqutaanngila? Naamik. Pingaaruteqarluinnarpoq.“ Ingammillu taamaappoq „Guutimut uumasumut“ attaveqarnitsinnut tunngammat. Attaveqarneq taanna naassaanngitsumik inuulersitsisinnaasutuaavoq, Jiisusip aavata kuisap annaassissutaanera tunngavigalugu. Aammik ataqqinningaarneq ineriartortitsigu Guutip aak atorlugu iliuuserisimasai pissutigalugit — tassa inuunermik annaassinissaq. Paulusi eqqorluartumik ima allappoq: ’Taamani neriuutissaqanngilasi silarsuarmilu Guuteqarnasi. Maannali Kristusi-Jiisusimiilerassi ilissi qanga Guutimit ungasikkaluartusi Kristusip aavatigut qanillivusi.’ — Efesosimiut 2:12, 13.  (wE 6/15 04)

[Quppernerup ataani ilanngussaq]

Eqqaamavigit?

• Aak pillugu Noamut, Israelikkunut kristumiunullu Guuti qanoq peqqussuteqarpa?

• Aammut tunngatillugu Jehovap Nalunaajaasuisa suut akueriumanngilluinnarpaat?

• Derivatinik mikisuararsuarnik, aap akuisa pingaarnerpaat ilaannit immikkoortinneqarsimasunik, pissanerluni nalunngeqatiginnissuseq malillugu aalajangigassaanera qanoq paasisariaqarpa, qanorli paasineqassanngila?

• Aalajangigassaqaraangatta sooq pingaarnerpaamik Guutimut attaveqarnerput eqqarsaatigisariaqarparput?

[Atuaqqissaarnermi apeqqutit]

[Qupp. 28-mi nalunaarsukkat]

(Allassimasut qanoq inissisimanersut naqitami takuneqarsinnaavoq)

Kristumiut Aak Pillugu Isumaat Tunngaviusoq

AAK AALANNGAAT

AKUERINEQARSINNAANNGITSUT

Aap aappalaartortai

Aap qaqortortai

Aap saalimasortai

Aap imerpalasortaa

KRISTUMIUT ATAASIAKKAAT NAMMINNEQ AALAJANGIGASSAAT

Derivatit aap aappalaartortaaneersut

Derivatit aap qaqortortaaneersut

Derivatit aap saalimasortaaneersut

Derivatit aap imerpalasortaaneersut

[Qupp. 26-mi assiliartaq]

Siulersuisoqatigiit isummiuppaat kristumiut ’aammik nerissanngitsut’

[Qupp. 29-mi assiliartaq]

Derivatimik aammeersumik pissanerlutit aalajangertariaqalissaguit nalunngeqatiginnissutsit sumiginnassanngilat