Guutip Naalagaaffianik Oqaluussissutiginninnermit Nutaarsiassat

Inuit suliffimminni oqaluussiffigineqarput

SUNA apustilit Matthæusip, Petrusip, Andreasip, Jaakup Johannesillu assigiissutigaat? Tamarmik suliffimminniipput Jiisusip qaaqqummatik apustilinngoqqullugit. Petrusi, Andreasi, Jaaku Johannesilu aalisartutut suliatik ulapputigaat Jiisusip qaaqqummatik oqarfigalugillu: „Qaallusi malissinga.“ Matthæusi ilanngaaseriffimmi issiavoq Jiisusip ajoqersugaanut ilannguteqqullugu qaaqquneqarami. — Matthæusi 4:18-21; 9:9.

Inuit suliffiini oqaluussineq kinguneqarluarsinnaavoq. Taamaattumik Japanimi Jehovap Nalunaajaasui qanittukkut nalunaajaaffinni immikkut ittuni taakkunani nalunaajaallutik suliniuteqarsimapput. Qanoq angusaqarpat? Qaammatialunnguit ingerlaneranni tusindilinnik pulaaqqiisoqarpoq, 250-illu Biibilimik atuaqqissaaqatigineqartalerlutik. Aajuku misigisat ilaat.

Tokyomi piffissaq tamaat oqaluussisartup angut neriniartarfimmi pisortaq naapippaa. Ukiut 30-t missaasa matuma siorna atuartuulluni Jehovap Nalunaajaasui oqaloqatigisimavai. Naak angutip taamanikkut oqaluttuarineqartut paasilluarsimanngikkaluarlugit Biibilimik soqutiginnilersimavoq. Maanna soqutiginnilerseqqinneqarami atuagaq Ilisarsineq inuunermut naassaanngitsumut sammisoq * atorlugu Biibilimik atuaqqissaaqatigineqarnissamut akuersivoq. Aammattaaq unnuit tamaasa innartinnani Biibilimik atuartalerpoq.

Qatanngutip arnap specialpionerip allaffik pulaarpaa saaffiginnittarfimmullu saaffiginnilluni direktøri oqaloqatigiumallugu. Naapinneqarsinnaanngimmat allattaa aperivoq immaqa nammineq paarlaalluni oqaluukkusunneraani. Telefonikkut oqaluutilaareerlugu arnaq anillappoq oqarlunilu Biibilip misissornerunissaa soqutigalugu. Specialpioneri neriorsuivoq Biibilimik nassarluni uterumalluni, arnarlu inuusuttoq Biibilimik atuaqqissaaqatigisalerpaa. Atuaqqissaarneq naatsiiviliarsuarmi qanittumiittumi ullaakkut arnaq suliartortinnagu ingerlanneqartarpoq.

Allaffimmi allami angutip takuaa suleqatini Napasuliaq Alapernaarsuiffik-mik Iteritsi!-millu tigusisoq, oqaluussisartorli qimagunniariarmat atuagassiat igippai. Angutip angerlarami nuliani Jehovap Nalunaajaasuusoq qanoq pisoqarsimaneranik oqaluttuuppaa, oqarlunilu namminiusuuguni oqaluussisartumut tusarnaalaarsimassagaluarluni. Paniata nalaatsornikkut qanoq oqarneranik tusaasup pisiniarfeqarfinni pineqartumi oqaluussisartumut oqaluttuareqqippaa. Oqaluussisartup piaartumik angut suliffianut pulaarpaa, Biibilimillu atuaqqissaaqatigisalerlugu. Sivitsunngitsoq sapaammi ataatsimiinnernut aalajangersimasumik najuuttalerpoq.

Inuit suliffiini oqaluussineq aamma allanik iluaqutaasunik kinguneqarpoq. Japanimi oqaluussisartut amerlasuut pisiniarfeqarfinni, fabrikkini allaffinnilu pulaaqqiinernut pikkorissisimapput. Aammattaaq unittooqqasut amerlasuut attavigineqalersimapput, ilaallu Biibilimik atuaqqissaartalerput. Kinguneri asseqanngivissimapput. Ilagiit Tokyop qeqqaniittut qanittukkut Biibilimik atuaqqissaaqatigineqartartut 108-t nalunaarutigisinnaasimavaat, tassa ukiup ataatsip ingerlanerani marloriaatinngorsimapput. (wE 4/1 04)

[Quppernerup ataani ilanngussaq]