Kalluunnaveersaartuuneq kristumiutut asanninnermut naleqquppa?

KRISTUMIUUNEQ Biibilimik atuarnerinnaanani, Guutimut qinusarnerinnaananilu sapaatikkut tussiarnerinnaanngilaq. Aamma Guutimut inoqatinullu iliuuseqartariaqarpoq. Biibilimi allassimavoq: „Oqaasiinnartigut oqaannakkulluunniit pinnata suliatigulli sallusuinnikkullu asannittuuniarta!“ (1 Johannesi 3:18) Jiisusip asannilluni allat isumagai, kristumiullu taanna assiginiarpaat. Paulusip uppeqatini kajumissaarpai ’tamaviaarlutik Naalagaq kiffartuuteqqullugu’. (1 Korinthimiut 15:58) Qanoq iliorlutik ’Naalagaq kiffartuutissavaat’? Politikkikkut iluarsaanikkut piitsut naqisimaneqartullu iluaqutissaannik suliaqarnermikkut? Jiisusi taamaaliorpa?

Jiisusi kajumissaarneqarpoq apeqqutinut politikkimut tunngasunut isummeqqullugu politikkimullu akuliuteqqullugu, piumanngilarli.  Saatanip silarsuarmi naalagaaffinnut tamanut pissaanermik neqeroorutaa itigartippaa, akileraartarnerlu pillugu oqallinnermut ilanngutitinniarneqarami piumanani, tunuarterlunilu inuiannik eqeersaasut kunnginngortinnialermanni. (Matthæusi 4:8-10; 22:17-21; Johannesi 6:15) Kalluunnaveersaarneratali allanut ajunngitsuliornissaanut akornusinngilaa.

Jiisusip allat iluaqutigiuarsinnaasaat aalluppaa. Inunnut 5000-inut nerisitsinera napparsimasunillu ajorunnaarsitsinera ikittuinnarnut utaqqiisaagallartumik ajunngitsuliorneruvoq. Oqaluussineratali inuit tamaasa naassaanngitsumik iluaqutissaannik neriuutissippai. Jiisusi ajorsartunik ikiuiniarnermut aaqqissuussisutut tusaamaneqanngilaq, kisiannili „Ajoqersuisutut“. (Matthæusi 26:18; Markusi 5:35; Johannesi 11:28) Oqarpoq: „Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu.“ — Johannesi 18:37.

Tusarliussaq politikkikkut siunertarisanit pitsaanerusoq

Jiisusi politikkikkut isumaliutersuutinik siaruarterinngilaq. Oqaluuseraali naalagaaffik nammineq kunngiuffissani. (Lukasi 4:43) Naalagaaffik tassaavoq qilammi naalakkersuisoqarfik nunarsuarmi pisortaqarfinnik tamanik taarsiisussaq eqqissinermillu ataavartumik pilersitsisussaq. (Esaja 9:5, 6; 11:9; Danieli 2:44) Taamaattumik inuit taanna neriuutissatuaraat uppernartoq. Neriuummik qularnaatsumik tamatuminnga ilisimatitsineq tullermut asannittuliornerunngila, inuit tutsuiginartumik siunissaqalersitsisinnaanerannik tatigeqqusineraninngarnit? Biibilimi allassimavoq: „Tatigeqinasigit naalagartat, inuit annaassisinnaanngitsut. Anerningerunik kingumut issunngussapput, pilersaarutaallu ulloq taanna maangaannassapput. Pilluarpoq Jaakup Guutianik ikiorteqartoq [Jehovamut] Guutiminut neriulluartoq.“ (Tussiaatit 146:3-5) Taamaattumik Jiisusip ajoqersukkani aallartinngilai naalakkersuinikkut allannguuteqartoqarnissaa oqaluussissutigeqqullugu, kisianni ’naalagaaffimmik pillugu nutaarsiassaq nuannersoq’. — Matthæusi 10:6, 7; 24:14, NV.

Taanna tassaavoq „Naalakkap suliaa“, kristumiunut oqaluussisartunut suliareqquneqartoq. Guutip naalagaaffiata innuttaasa asaqatigiinneq ilinniarsimavaat, taamaattumillu piffissaq nalliuppat naalagaaffiup piitsuussuseq piuneerutissavaa isumalluutit naligiinnerusumik agguarnerisigut. (Tussiaatit 72:8, 12, 13) Nutaarsiassaavoq nuannersoq, oqaluussissutigissallugu ilumut pingaartoq.

Ullumikkut Jehovap Nalunaajaasuisa „Naalakkap suliaa“ nunani 235-ni suliaraat. Jiisusip peqqussutaa naalappaat nunanilu tamani naalakkersuisut ataqqillugit. (Matthæusi 22:21) Aammali oqaasii uku malippaat ’silarsuup inui ilageqqunagit’, nammineq ’silarsuup inuinit qineramigit’. — Johannesi 15:19.

Ilaasa politikkikkut oqariartuutinik siammarterisimasut isumartik allanngortissimavaat, peqqissaartumik Biibilimik atuaqqissaareernermikkut. Politikeri Italiamiu Katuullit Iliuuseqartut-ni, peqatigiiffik ilagiinnit nakkutigineqartumi, ilaasortaasimasoq oqaluttuarpoq: „Politikkimut iserpunga isumaqarama inuiaqatigiinnut politikkikkut inuillu atugarisaatigut ineriartornermi tapersersuisariaqarlunga.“ Jehovap Nalunaajaasuinut ilanngunniarluni Guutillu naalagaaffia oqaluussissutigiumallugu borgmesteritut tunuarami, nassuiaatigaa sooq politikkikkut  ajunngitsumik isumaqarluni suliniuteqarnerit iluatsinngitsoortartut: „Silarsuaq taamaappoq, imaanngitsoq inuit ileqqorissut inooqatigiinnermut tunngasunut iliuuseqanngitsoorsimammata, kisiannili ikinnerussutillit ilungersuutigisaat amerlanerussutillit naapertuilluanngitsuliornerannit akornuserneqartarmat.“

Kristumiut ilumoortut politikkimut akuliuttannginnerisa, taarsiulluguli neriuutissatuamik ilumoortumik oqaluussissutiginninnerisa, allanik ikiuinngitsoortinngilaat. Guutip naalagaaffia pillugu nalunaarummut tusartut ilinniartarpaat isummat aserornartut atorunnaarnissaat, naalakkersuisut ataqqinissaat, ilaqutariit ingerlalluarnissaasa isumagilluarnissaat pigisanillu oqimaaqatigiissumik isiginnittaaseqarnissaq. Pingaarnerpaatullu Jehovap Nalunaajaasuisa Guutip qanittumik attavigilernissaanut allat ikiortarpaat.

Guutip naalagaaffianik oqaluussisut inuiaqatigiinnut iluaqutaapput. Allaallu allat ilinniartippaat naalakkersuisunut piviusunut tatiginnilernissaannik, Guutimik asannittunut tamanut naassaanngitsumik eqqissineqalersitsisussamik. Kristumiut kalluunnaveersaartuunerat isumaqarpoq killeqanngitsumik ikiuilluni kiffartorsinnaanermik iluaqutaajuartussamik. (wE 5/1 04)

[Qupp. 7-mi ungalusaq/​assiliartaq]

Politikeriujunnaarluni Guutip naalagaaffianik oqaluussisartunngortoq

Brasiliami illoqarfimmi Belémimi nukappiaraalluni Átilap palasit naalakkersuisunut akerliunikkut upperisarsiornermi anguniagaqarneq tapersersoqqugaat tusarpaa. Naqisimanninnerup tamarmi piiagaanissaata eqqarsaatersuutigineqarnera nuannaraa. Isummaminnik ilungersuutiginnillutik tamaviaartunut ilannguppoq, tassanilu ilinniarlugu akerliussutsimik takutitsinerit qanoq aaqqissuunneqartarnersut qanorlu pisortanut naalannginnissamut kajumissaarisoqarsinnaasoq.

Átilap aamma taakkua meerartaasa atuakkamik tunissutisiarisimasaminik, Ajoκersuissorssuaκ tusarnârparput-mik, ilinniartinnissai nuannaraa. * Atuakkami tassani pissuserissaarnissaq naalakkersuisunullu naalannissaq inassutigineqarpoq. Tamatumanit Átila eqqarsalersinneqarpoq sooq naalakkersuisunut akerliunikkut upperisarsiornermi anguniagaqartut tapersersortaasa Jiisusip ileqqorissaarnermut najoqqutai qutsissut malinnginneraat, aamma sooq ilaasa pissaaneqaleraangamik naqisimaneqartut puigortaraat. Politikkikkut sulinermit tunuarpoq. Ullut ilaanni Jehovap Nalunaajaasui matuanut kasuttorput, Guutillu naalagaaffia pillugu oqaloqatigalugu. Sivitsunngitsoq Biibili atuaqqissaartalerpaa, paasillugulu naqisimanninneq qanoq ilumut atorunnaarsinneqassasoq.

Tamatuma nalaani katuullit upperisaq politikkilu pillugit isumasioqatigiittoqarmat Átilap najuuffigisimavai isumasioqatigiinnermi ilinniartitsisut isumaat naapertorlugit tassaalluni sammisaq ataaseq marlunnik immikkoorutilik. Jehovap Nalunaajaasuisa naalagaaffilersaarfiannut ataatsimiigiarami allaanerulluinnartumik naammattuugaqarpoq. Assersuutigalugu pujortartoqanngilaq, imertoqarani quiasaarutipalaanilluunniit oqaluttuartoqarani. Átilap Jehovap Nalunaajaasuinut ilanngunnissani qinerpaa oqaluusseqatigalugillu, kinguninngua kuisippoq. Maanna paasivaa naalakkersuisunut akerliunikkut upperisarsiornermi anguniagaqarneq piitsut ajornartorsiutaannut sooq aaqqiissutissaviunnginnersoq.

[Quppernerup ataani ilanngussaq]

[Qupp. 6-mi assiliartat]

Kristumiut kalluunnaveersaartuunerisa allanut ikiuinngitsoortinngilaat