„Ajoqersorsigik ilissinnut peqqussutikka tamaasa maleruaqqullugit“

„Taamaattumik aallaritsi . . . ajoqersuganngortitsigitsilu . . . ajoqersorsigillu ilissinnut peqqussutikka tamaasa maleruaqqullugit.“ — MATTHÆUSI 28:19, 20, NV.

1. Ajoqersugaq Filipi angullu Etiopiamiu qanoq oqaloqatigiippat?

ANGUT Etiopiamiit aqqussua tamaat Jerusalemiliarsimavoq. Tassani Guuti asasani, Jehova, pallorfigaa. Nuannarisimagunarpaalu Guutip oqaasia isumassarsiarititaasoq, angerlartillunimi qamutimini pruffiiti Esajap allagai assilillugit allaqqitat atuarpai Filipip Jiisusip ajoqersugaasa ilaata arpalluni qamutit angummagit. Filipip Etiopiamiu ima aperaa: „Atuakkatit paasivigit?“ Angut ima akivoq: „Qanoq ilillunga paasisinnaassavakka ilitsersorneqanngikkuma?“ Taava Filipip Biibilimik atuartoq eqqortuliorusuttoq taanna Allakkat pillugit nassuiaatilerpaa Jiisusimullu ajoqersuganngornissaanut ikiorlugu. — Apustilit Suliaat 8:26-39.

2. (a) Sooq Etiopiamiup Filipi akilluarpaa? (b) Apeqqutit Jiisusip ajoqersuganngortitsinissamik peqqussutaanut tunngasut suut maanna misissulerpavut?

² Etiopiamiup akissutaa una malugiuk: „Qanoq ilillunga paasisinnaassavakka ilitsersorneqanngikkuma?“ Aap, ajoqersuunneqartariaqarpoq, atuakkaminik nassuiaassisinnaasumik. Taamatut akinerata paasinarsisilluarpaa Jiisusip ajoqersuganngortitsinissamik peqqussutaata ilaa aalajangersimasoq. Suna? Tamanna akissutissarsiniarlugu Jiisusip oqaasiinik Matthæusip iivangkiiliuani kapitali 28-mi allassimasunik misissuinerput nangeriartigu. Allaaserisap siuliani apeqqutit „sooq?“ aamma „sumi?“ sammivavut. Maanna apeqqutit Jiisusip ajoqersuganngortitsinissamik peqqussutaanut tunngasut allat marluk sammissavavut — „sumik?“ aamma „qanoq sivisutigisumik?“

„Ajoqersorsigik ilissinnut peqqussutikka tamaasa maleruaqqullugit“

3. (a) Jiisusi Kristusimut qanoq ajoqersuganngortoqarsinnaava? (b) Ilinniartitsinermut suna ilaava?

³ Jiisusi Kristusimut ajoqersuganngorusuttut sumik ilinniartissavavut? Jiisusi ajoqersukkaminut ima oqarpoq: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit, ajoqersorsigillu ilissinnut peqqussutikka tamaasa maleruaqqullugit.“ (Matthæusi 28:19, 20, NV) Tassa Jiisusip peqqussutai ilinniartitsissutigissavavut. * Qanorli qulakkeerneqarsinnaava Jiisusip peqqussutaanik ilinniartinneqartoq ajoqersugannguinnassanngitsoq, aammattaarli ajoqersugaajuassasoq? Jiisusip peqqissaartumik oqaasissaminik toqqaaneranit pingaarutilik erserpoq. Malugiuk ima oqaannanngitsoq: ’Ajoqersorsigik ilissinnut peqqussutinnik tamanik.’ Imali oqarpoq: „Ajoqersorsigik ilissinnut peqqussutikka tamaasa maleruaqqullugit.“ (Matthæusi 19:17) Qanoq paasisariaqarpa?

4. (a) Peqqussummik maleruaaneq qanoq paasisariaqarpa? (b) Jiisusip peqqussutaanik maleruaanissamik alla qanoq ilinniartitsissinnaaneripput assersuuteqarlutit oqaluttuariuk.

⁴ Peqqussummik maleruaaneq isumaqarpoq taanna „maleruarpaa, malippaa imaluunniit naalappaa“. Atuaqatigineqartartormi qanoq ilinniartinneqarsinnaava Jiisusip peqqussutaanik naalannissamik? Assersuutigisinnaavarput biilernermut ilinniartitsisup ilinniartitaminut angallannermi malittarisassanik maleruaanissamik ilinniartitseriaasia. Immaqa biilernermut ilinniartitsisup malittarisassanik tamakkuninnga teoreertarfimmi ilinniartitani paasissutissippai. Ilinniartulli maleruaanissartik ilikkassappassuk biilertillutik ajoqersuuttariaqarpai  isumagalugulu ilikkakkaminnik atuinissaat. Taamatuttaaq ippoq Biibilimik atuaqqissaaqateqaraangatta. Jiisusip peqqussutaanik paasissutissittarpavut. Aammattaarli ilikkakkatik ulluinnarni inuunerminni oqaluussinermilu malinniarsarigaangatigik ajoqersuuttariaqarpavut. (Johannesi 14:15; 1 Johannesi 2:3) Imaappoq, Jiisusip peqqussutaa malilluinnassagutsigu ajoqersuganngortitsiortorlutalu, paasissutissiisariaqarpugut ajoqersuussillutalu. Taamaaliorluta Jiisusi Jehovalu ilaassavavut. — Tussiaat 48:15; Saqqummersitat 7:17.

5. Sooq Biibilimik atuaqqissaaqatigisartakkatta ajoqersuganngortitsinissamik Jiisusip peqqussutaanut naalannissani nangaanartortaqartissinnaavaa?

⁵ Jiisusip peqqussutaanik maleruaanissamik allanik ilinniartitsinermut aamma ilaavoq ajoqersuganngortitsinissamik peqqussummut naalannissamik ilinniartitsineq. Immaqa tamanna Biibilimik atuaqqissaaqatigisartakkatta isumakuluutigilersinnaavaat. Kristumiuunerartut ilagiivinut suliniuteqartartutut ilaasortaasimagaluarlutik, ilimananngilaq upperisarsiornikkut ilinniartitsisuisa ajoqersuganngortitsiortornissamik ilinniartissimassagaat. Upperisarsiornikkut siuttuusut ilaasa ammasumik nassuerutigaat ilagiit savaatiminnik oqaluussinissamik ilinniartitsinerminni iluatsinngilluinnarsimasut. Silarsuarmut aallarnissamik inunnillu qanorluunniit ittunik ajoqersuganngortitsinissamik Jiisusip peqqussutaanut oqaaseqaammini Biibilimik misissueqqissaartartoq John R.W. Stott ima oqarpoq: „Peqqussummik tamatuminnga naalalluinnarsinnaannginnerput ullumikkut iivangkiiliumik oqaluussinermi kristumiut iivangkiiliuinnarnik tunngaveqartut sanngiiffiginerpaavaat.“ Imalu nangippoq: „Tusarliussaq ungasianiit oqaluussissutigisarparput. Assersuunneqarsinnaavugut ipilersumut qanoq iliornissaanik, namminneq sissami isumannaatsumiillutik, suaartartunut. Annaanniarlugu avalanngilagut. Masakkusunngilagut.“

6. (a) Soqutiginnittoq Biibilimik atuaqqissaaqatigigaangatsigu Filipip maligassiaa qanoq malissinnaavarput? (b) Oqaluusseqataasaleraangat qanoq ikiorsinnaavarput?

⁶ Biibilimik atuaqqissaaqatigisartagarput ilagiinnut „masakkusunngitsunik“ ilaasortalimmut ilaasimaguni, ’masakkusunnginnini’ assut anigoruminaatsissinnaavaa ajoqersuganngortitsinissamillu Jiisusip peqqussutaa assut naalakkuminaatsissinnaallugu. Ikiorneqartariaqarpoq. Nikallujuittariaqarpugulli ilinniartitsigaangatta ajoqersuussigaangattalu paasisaqarnerulersitsisumik iliuuseqarnissamullu kajumilersitsisumik, soorlu Filipip ilinniartitsinera Etiopiamiup iluaqutigigaa kuisinnissaminullu kajumississutigigaa. (Johannesi 16:13; Apustilit Suliaat 8:35-38) Aammattaaq nutaat ajoqersuganngortitsinissamik peqqussummik maleruaanissaannik ilinniartitserusunnerput kajumississutigissavarput oqaluussiniarlutik iliuuseqaqqaaraangata suleqatiginissaannut. — Oqaluussisartup oqaasii 4:9, 10; Lukasi 6:40.

 „Ilissinnut peqqussutikka tamaasa“

7. Nutaat Jiisusip peqqussutaanik ’tamanik maleruaqqullugit’ ilinniartissagutsigik inatsisinik aamma sunik ilinniartissavavut?

⁷ Nutaat ajoqersuganngortitsinissamik ilinniartinnissaat naammagissanngilarput. Jiisusi oqarpoq peqqussutai „tamaasa maleruaqqullugit“ ilinniartissagivut. Soorunami taakkununnga ilaapput inassutit pingaartut marluk — Guutimik asanninneq tullermillu asanninneq. (Matthæusi 22:37-39) Ajoqersuganngorlaaq inassutinik taakkuninnga maleruaasinnaaqqullugu qanoq ilinniartinneqarsinnaava?

8. Assersuuteqarlutit ersersiguk ajoqersuganngorlaap asanninnermik ersersitsinissamik inassutip maleruarnissaa qanoq ilinniarsinnaagaa.

⁸ Biilernermut ilinniarnerup assersuutigineqarnera eqqarsaatigeqqeriartigu. Angallattut akornutigoornerminni ilinniartoq ilinniartarpoq ilinniartitsisoq saniminiittoq tusarnaaginnarnagu, aammattaarli biilertut allat malugisarlugit. Immaqa biilernermut ilinniartitsisup uparuartarpaa biilertoq alla soqutigittarluni biilertumik allamik siulliutitsisoq; allalluunniit pissuserilluni qullini ungasissorsiutit qamikkai illuatungaanut angallattut inngiasutsikkumanagit; allaluunniit motooriminik unittoorsimasumik ikiuiniarluni unittoq. Tamakku ilinniartup ilinniarfigisinnaavai. Taamatulli ajoqersuganngorlaap inuunermut aqqutikkoortup ilinniarfigisarpai ilinniartitsisuniinnaanngitsoq aammattaarli maligassiuilluartut ilagiinni takusartakkani. — Matthæusi 7:13, 14.

9. Asanninnermik ersersitsinissamik peqqussummik maleruaanissaq qanoq isumaqarnersoq ajoqersuganngorlaap qanoq ilinniartarpaa?

⁹ Assersuutigalugu immaqa nutaap malugaa anaanaasup kisimiittup qitornani mikisut — qularnanngitsumik ulapinnaraluartoq — naalagaaffilersaarfimmukaqatigigai. Immaqa aamma takusarpaa ataaseq isumatsassimangaaraluarluni aalajaalluni ataatsimiigiartartoq, uillarnerluunniit utoqqaq ataatsimiigialernermi utoqqaqatiminik biiliussisartoq, inuusuttuararluunniit naalagaaffilersaarfimmik eqqiaaqataasoq. Immaqa aamma malugaa ilagiinni utoqqaanertaq aalajaalluni oqaluussinermi siuttuusoq ilagiinni akisussaaffippassuarminik isumaginniitigaluni. Immaqa aamma Biibilimik atuaqqissaaqatigineqartartoq pulaaqataavoq ilagiinni qatanngummut innarluutilimmut angerlarsimaffimminillu anisinnaanngitsumut pulaartiminilli tamanik qiimmassaangaartumut. Immaqa aamma nutaamut maluginiaqquneqarpoq aappariit inuunerminni allanngortitserujussuartut angajoqqaatik utoqqaat sanngiitsullu paaqqutariniarlugit. Kristumiut inussiarnersut, ikiuiumatuut aalajaatsullu taakku isiginnaarlugit ajoqersuganngorlaap ilinniartarpaa Guutimut tullermullu, ingammik uppeqatiminut, asanninneq qanoq isumaqarnersoq. (Ussatit 24:32; Johannesi 13:35; Galatiamiut 6:10; 1 Timotheusi 5:4, 8; 1 Petrusi 5:2, 3) Taamatulli kristumiut ilagiivinut ilaasut tamarluinnarmik ilinniartitsisuusinnaapput ajoqersuussisuusinnaallutillu, taamaattuusariaqarpullu. — Matthæusi 5:16.

„Pissutsit aaqqissuussaanerata naggatissaanut allaat“

10. (a) Qanoq sivisutigisumik ajoqersuganngortitsiortortuassaagut? (b) Suliamik naammassinninneq eqqarsaatigalugu Jiisusi qanoq maligassiuiva?

¹⁰ Qanoq sivisutigisumik ajoqersuganngortitsiortortuassaagut? Pissutsit aaqqissuussaanerata matuma atorunnaarsinneqarnissaa tikillugu. (Matthæusi 28:20, NV) Jiisusip peqqussutaata taannartaa eqquutitissinnaavarput? Nunarsuaq tamakkerlugu ilagiittut taamaaliornissarput aalajangiusimavarput. Ukiuni qaangiuttuni nuannaarutigalugu piffissarput, nukivut aningaasaativullu atorsimavavut ’inuunermik naassaanngitsumik eqqortumik isumaqarfiginnittunik’ ujaasinitsinni. (Apustilit Suliaat 13:48, NV) Maannakkut Jehovap Nalunaajaasuisa nunarsuaq tamakkerlugu Guutip naalagaaffianik oqaluussinermi ajoqersuganngortitsinermilu ukioq naallugu ullut tamarluinnaasa agguaqatigiissillugu nalunaaquttap-akunneri 3 millionit atortarpaat. Taamaaliornikkut Jiisusip maligassiaa malipparput, taannami ima oqarpoq: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ (Johannesi 4:34) Uaguttaaq tamanna qamuuna kissaatigaarput. (Johannesi 20:21) Uagutsinnut suliassiissutigisaa aallartiinnarumanngilarput, aammattaarli naammassiumavarput. — Matthæusi 24:13; Johannesi 17:4.

11. Qatanngutitta kristumiut ilaat qanoq pisimappat, imminullu qanoq aperisinnaavugut?

¹¹ Aliasuutigaarpulli uppeqatitta ilaasa anersaakkut sanngiitsunngorsimanerat taamaattumillu oqaluusseqataanikillinerat ajoqersuganngortitsinissamilluunniit  peqqussummik malikkunnaavissimanerat. Ilagiinnut aggertaqqilernissaannut oqaluusseqataaqqilernissaannullu arlaatigut ikiorsinnaavavut? (Romamiut 15:1; Hebræerit 12:12) Jiisusip apustilini sanngiilliorallarmata ikiueriaasianit takusinnaavarput ullumikkut qanoq iliorsinnaanersugut.

Isumassuigit

12. (a) Jiisusip toqunissaa sioqqutsiarlugu apustilit suppat? (b) Jiisusip apustilini sanngiilliorujussuaraluartut qanoq pivai?

¹² Jiisusip nunami kiffartornera naangajalersoq toqunissaalu qanillisoq apustilit „tamarmik immineerpaat qimaallutillu“. Jiisusip siulittuutigeriigaatut ’tamarmik immikkut ornigassaminnut aallakaapput’. (Markusi 14:50; Johannesi 16:32) Jiisusip ikinngutini anersaakkut sanngiillisimasut qanoq pivai? Makinnermi kinguninngua ajoqersukkami ilaannut ima oqarpoq: „Erseqinasi, qatanngutikkalu oqarfigiartorsigit Galilæamukaqqullugit; tassani takujumaarpaannga.“ (Matthæusi 28:10) Naak apustilit sanngiilliorujussuaraluartut, Jiisusip suli ’qatanngutimisut’ taagorpai. (Matthæusi 12:49) Isumakkiinngilai. Nallittuisuuvoq isumakkeerfiginnittuullunilu, soorlu Jehova nallittuisuusoq isumakkeerfiginnittuusorlu. (2 Kunngit 13:23) Jiisusi qanoq ilaarsinnaavarput?

13. Anersaakkut sanngiillisimasut qanoq isiginnittaaseqarfigisariaqarpavut?

¹³ Oqaluusseqataanikilliartulersut oqaluussiunnaavissimasullu isumassortariaqarpavut. Taakkua asannittuliornerat siornatigullu, immaqa ukiorpassuarni, qanoq aallussilluartiginerat suli eqqaamavavut. (Hebræerit 6:10) Ilumut maqaasivavut. (Lukasi 15:4-7; 1 Thessalonikamiut 2:17) Taavami isumassorlugit qanoq ersersissinnaavarput?

14. Jiisusip apustiliminik ikiuineratut sanngiitsoq qanoq ikiorsinnaavarput?

¹⁴ Jiisusip apustilit nikallorsimasut Galilæamukaqquai, tassanilu takussagaanni oqarluni. Jiisusip ataatsimiinnermut immikkut ittumut qaaqquai. (Matthæusi 28:10) Anersaakkut sanngiillisimasut taamatulli kajumissaartarpavut kristumiut ilagiivinut ataatsimiigiaqqullugit, aap, immaqa ataasiaannarnata kajumissaartariaqarpavut. Apustilinut qaaqqusissut kinguneqarluarpoq, tassami „ajoqersukkat taakku aqqanillit Galilæamukarput qaqqamut Jiisusip orneqqusaanut“. (Matthæusi 28:16) Nuannaangaartarpugut sanngiillisimasut ilaat taamatulli qaaqqusissuterput ilassigaangassuk kristumiullu ataatsimiinnerinut ataatsimiigiaqqittaleraangata! — Lukasi 15:6.

15. Sanngiitsut ilaat naalagaaffilersaarfimmut ataatsimiigiaraangata Jiisusip maligassiaa qanoq malissinnaavarput?

¹⁵ Taavami qanoq iliussaagut sanngiitsut taakku naalagaaffilersaarfimmut ataatsimiigiaraangata? Aap, Jiisusi qanoq iliorpa apustilini — uppernermikkut sanngiilliorallartut — naapiffissaminni takugamigit? Ornippai oqaluffigalugillu. (Matthæusi 28:18) Ungasinniarsaralugit isigiinnanngilai. Naagga, ornippai. Takorlooriaruk apustilit qanoq oqiliallatsigisimassasut Jiisusi siulliulluni iliuuseqarmat! Qanortoq aamma uagut siulliulluta iliuuseqarluta anersaakkut sanngiitsut ornitsigik qamanngalu  pisumik tikilluaqqullugit kisikkunnaarlutik kristumiut ilagiivinut aggertaleqqikkaangata.

16. (a) Jiisusip ajoqersukkaminut periaasia qanoq ilinniutigisinnaavarput? (b) Sanngiitsunik ikiuinissap tungaatigut Jiisusip maligassiaa qanoq malissinnaavarput? (Takuuk quppernerup ataani ilanngussaq.)

¹⁶ Jiisusi aamma qanoq iliorpa? Siullermik, ima ilisimatitsivoq: „Qilammi nunamilu oqartussaaneq tamarmi uannut tunniunneqarpoq.“ Aappassaanik, ima peqqusivoq: ’Taamaattumik aallaritsi ajoqersuganngortitsigitsilu.’ Pingajussaanillu, ima neriorsuivoq: „Ullut tamaasa najorpassi.“ Malugaajulli Jiisusi qanoq iliunngitsoq? Ajoqersukkat sanngiitsut qulartullu assuarinngilai. (Matthæusi 28:17) Sunniuteqarluarpa? Aap, sivitsunngitsoq apustilit ’ajoqersueqqilerput nalunaajaaqqilerlutillu’. (Apustilit Suliaat 5:42) Immaqa uagut ilagiitsinni taamatut kinguneqarluartumik takusaqassaagut sanngiitsunik ikiuinissap tungaatigut Jiisusip maligassiaa malikkutsigu. * — Apustilit Suliaat 20:35.

„Ullut tamaasa najorpassi“

17, 18. Jiisusip oqaasii uku qanoq nakussatsinnarlutillu tuppallernarpat: „Ullut tamaasa najorpassi“?

¹⁷ Jiisusip peqqussutaani oqaatsit kingulliit, „ullut tamaasa najorpassi“, nakussatsinnartorujussuupput Jiisusip ajoqersuganngortitsinissamik peqqussutaanut naalanniarsarisunut tamanut. Sulinitsinni qanorluunniit akerlilersorneqaraluarutta, akeqqatsinnillu qanorluunniit eqqartornerlunneqartigigaluarutta mamarlerneqartigigaluaruttalu, sioorassutissaqanngilagut. Sooq? Siulersortitta, Jiisusi Kristusip, ’qilammi nunamilu tamanut oqartussaasup’, najormatigut tapersersorumallutalu.

¹⁸ Jiisusip neriorsuutaa una aamma tuppallernartortaqangaarpoq: „Ullut tamaasa najorpassi.“ Eqiasuilluta Jiisusip ajoqersuganngortitsinissamik peqqussutaanik naalanniarsarinitsinni ullut nuannersuginnaaneq ajorput, aammattaarli nuanniitsortaqartarput. (2 Nalunaarsuutit 6:29) Ilatta asasamik annaasaqarnertik aliasuutigaat. (1 Mosesi 23:2; Johannesi 11:33-36) Allat utoqqalinermi ajornartorsiutinik akiugaqartarput peqqiilliulerlutik nukeerukkiartulerlutillu. (Oqaluussisartup oqaasii 12:1-6) Allallu ulloqartarput nikallungallutik isumatsassimangaarlutillu. (1 Thessalonikamiut 5:14) Amerliartuinnartullu aningaasaqarnikkut ilungersunartumik ajornartorsiuteqarput. Taamaattorli kiffartornitsinni aalajaappugut Jiisusi oqarmat „ullut tamaasa“, aamma ulluni anigoruminaatsuni, najorumaarluta. — Matthæusi 11:28-30.

19. (a) Jiisusip ajoqersuganngortitsinissamik peqqussutaa sunik ilitsersuutitaqarpa? (b) Suna pissutigalugu peqqussut naammassisinnaavarput?

¹⁹ Soorlu allaaserisami matumani siulianilu takoreeripput Jiisusip ajoqersuganngortitsinissamik peqqussutaa isumaqartorujussuuvoq. Oqaluttuutiinnanngilaatigut sumi aamma sooq peqqussummisut iliussanersugut, aammattaarli qanoq oqassanersugut qanorlu sivisutigisumik peqqussutaa naalassaneripput. Ilumoorpoq tamakkua tamaasa iliuuserinissaat unamminiarnartuusoq, nalunnginnatsiguli Jiisusip najoraatigut suliaq naammassisinnaavarput, ilaa! (wE 7/1 04)

[Quppernerup ataani ilanngussat]

Qanoq akissavit?

• Allat Jiisusip peqqussutaanik tamanik maleruaanissamik qanoq ilinniartissinnaavavut?

• Ajoqersuganngorlaat ilagiinniittut allat qanoq ilinniarfigisinnaavaat?

• Anersaakkut sanngiillisimasut qanoq ikiorsinnaavavut?

• Jiisusip neriorsuutaa una qanoq nakussatsinnarlunilu tuppallernarpa: „Ullut tamaasa najorpassi“?

[Atuaqqissaarnermi apeqqutit]

[Qupp. 15-imi assiliartat]

Ilinniartitsisuullutalu ajoqersuussisuusariaqarpugut

[Qupp. 17-imi assiliartat]

Ajoqersuganngorlaap allat maligassiuinerat ilinniarfigilluartarpaa