„Ajoqersuganngortitsigitsi“

„Qilammi nunamilu oqartussaaneq tamarmi uannut tunniunneqarpoq. Taamaattumik aallaritsi . . . ajoqersuganngortitsigitsi.“ — MATTHÆUSI 28:18, 19, NV.

1, 2. (a) Jiisusip ajoqersukkat sumik suliakkerpai? (b) Apeqqutit Jiisusip peqqussutaanut tunngasut suut misissussavavut?

UPERNAAJUVOQ ukiumi 33-mi Israelimi, Jiisusillu ajoqersugai qaqqami Galilæamiittumi katersuussimapput. Naalagaat toqusunit makissimasoq qilaliangajalerpoq, pingaarutilimmilli oqaluttuuteqqaassavai. Suliassaqartippai. Sumik? Ajoqersukkat suliassinneqaramik qanoq pippat? Aamma suliassiissutaa uatsinnut ullumikkut qanoq atuuppa?

² Jiisusip oqaasii Matthæusi 28:18-20-mi atuarneqarsinnaapput: „Qilammi nunamilu oqartussaaneq tamarmi uannut tunniunneqarpoq. Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit, ajoqersorsigillu ilissinnut peqqussutikka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ (NV) Jiisusip oqaatsit atorpai „oqartussaaneq tamarmi“, „inunnik inuiannit tamaneersunik“, „ilissinnut peqqussutikka tamaasa“, aamma „ullut tamaasa“. Oqariaatsit isumaqartorujussuit taakku sisamat atorlugit peqqussuteqarnera pingaarutilinnik apeqqutissaqalersitsivoq. Apeqqutit taakku oqaatsinut makkununnga eqikkarneqarsinnaapput: sooq? sumi? sumik? aamma qanoq sivisutigisumik? Apeqqutit ataasiakkaarlugit sammeriartigik. *

„Oqartussaaneq tamarmi uannut tunniunneqarpoq“

3. Sooq ajoqersuganngortitsinissamik peqqussut naalattariaqarparput?

³ Siullermik: Ajoqersuganngortitsinissamik peqqussut sooq naalassavarput? Jiisusi oqarpoq: „Qilammi nunamilu oqartussaaneq tamarmi uannut tunniunneqarpoq. Taamaattumik aallaritsi . . . ajoqersuganngortitsigitsi.“ Oqaatsimik „taamaattumik“ atuinerata takutippaa sooq peqqussut taanna naalattariaqarneripput. Tassa Jiisusip, peqqusisuusup, ’oqartussaaneq tamaat’ pigimmagu. Qanoq oqartussaassuseqartigaa?

4. (a) Jiisusi qanoq oqartussaassuseqartigaa? (b) Jiisusip oqartussaaneranik paasinninnerput ajoqersuganngortitsinissamik peqqussummut isiginnittaatsitsinnut qanoq sunniuteqartariaqarpa?

⁴ Jiisusi ilagiimminut oqartussaavoq, aamma 1914-imiilli Guutip naalagaaffia pilersinneqarlaaq oqartussaaffigaa. (Kolossemiut 1:13; Saqqummersitat 11:15) Inngiliunertut qilammi inngilit hundredemillionillit arlallit aamma naalakkersugarai. (1 Thessalonikamiut 4:16; 1 Petrusi 3:22; Saqqummersitat 19:14-16) „Pissaaneq piginnaatitaanerlu nakuussuserlu suut tamaasa“,  tassa naapertuilluarnerup pilersinneqarnissaanut akerliusut tamaasa, suujunnaarsissallugit Ataataminit piginnaatinneqarpoq. (1 Korinthimiut 15:24-26; Efesosimiut 1:20-23) Jiisusip inuusut kisiisa oqartussaaffiginngilai. Aamma ’inuusunik toqusimasunillu eqqartuussisussaavoq’, toqumilu sinippaartunik makititsinnissaminut Guutimit pissaanermik tunineqarpoq. (Apustilit Suliaat 10:42; Johannesi 5:26-28) Soorunami taamatut oqartussaassusilerneqartup peqqussutaa tamanit pingaarnerpaatut isigisariaqarpoq. Taamaattumik Jiisusip peqqussutaa una kajumilluta ataqqinnillutalu naalapparput: „Aallaritsi . . . ajoqersuganngortitsigitsi.“

5. (a) Jiisusip peqqussutaa suna Petrusip naalappaa? (b) Petrusip peqqussummut naalannera qanoq kinguneqarpa?

⁵ Jiisusip ajoqersukkani maluginiarnartorujussuarmik periuseqarluni siusissukkut ajoqersorpai oqartussaassutsiminik akuerinninneq peqqussutiminullu naalanneq pilluaqqusaanermik kinguneqassasoq. Ilaanni Petrusi aalisartuusoq ima oqarfigaa: „Itisuumut avalallusi qassuseritsi!“ Petrusi aalisagaqannginneranik qulanngilluinnartoq Jiisusimut akivoq: „Ajoqersuisoq, unnuaq tamaat ilungersoraluarpugut susaarlutali“. Maniguullunili ima nangippoq: „Illilli oqaatsitit tatigalugit qassusissaanga.“ Jiisusip peqqussutaa Petrusip naalappaa, taavalu „aalisagarpassuarnik“ pisaqarpoq. Petrusi tupigusoqaluni Jiisusip saavanut pallorpoq oqarlunilu: „Naalagaq, qimannga inuugama ajortilik.“ Jiisusili akivoq: „Erseqinak! Maannamiit inunnik pisaqartalerumaarputit.“ (Lukasi 5:1-10; Matthæusi 4:18) Oqaluttuaq taanna qanoq ilinniarfigisinnaavarput?

6. (a) Tupinnartuliornikkut aalisakkanik pisaqarnermik oqaluttuami qanoq takutinneqarpa Jiisusip naalannissaq qanoq ittoq piumasarineraa? (b) Jiisusi qanoq ilaarsinnaavarput?

⁶ Aalisakkanik pisaqarnerup tupinnartup tamatuma kingorna Jiisusip Petrusi Andreasilu apustilillu sinneri ’inunnik aalisartunngornissamik’ suliakkerpai. (Markusi 1:16, 17) Oqaluttuami takutinneqarpoq Jiisusip piumasarinngikkaa ajoqersukkami naalaannarnissaat, imminummi naalannissamut pissutissamik qularunnaarsitsisumik oqaluttuuppai. Soorlu Jiisusip qassuseqqusineranut naalanneq tupinnaannartumik kinguneqartoq taamatuttaaq ’inunnik aalisarnissamik’ Jiisusip peqqusineranut naalanneq pilluaqqusaangaarnermik kinguneqassaaq. Apustilit uppissuseqangaarlutik Jiisusip oqarneratut iliorput. Oqaluttuaq ima naavoq: „Taava umiatsiatik tulatsippaat, tamaasalu qimallugit malippaat.“ (Lukasi 5:11) Ullumikkut allat ajoqersuganngortitsiortoqataaqqullugit kajumissaaraangatsigik Jiisusitut iliortarpugut. Oqaatsivut maleqquinnarneq ajorpavut, Jiisusilli peqqussutaanik naalannissamut pissutissanik qularunnaarsitsisunik oqaluttuuttarpavut.

Pissutaasut uppernartut eqqortumillu pissuteqarneq

7, 8. (a) Oqaluussinitsinnut ajoqersuganngortitsinitsinnullu pissutaasunik Biibilimeersunik eqqaasaqarit. (b) Oqaluussiuarnissannut ingammik allassimaffik sorleq kajumississutigaajuk? (Aamma takuuk quppernerup ataani ilanngussaq.)

⁷ Tassa Jiisusip oqartussaanera akuerigatsigu Guutip naalagaaffia pillugu oqaluusseqataallutalu ajoqersuganngortitsiortoqataavugut. Ajunngitsunik suliaqaqqullugit kajumissaarusutavut pissutaasunik Biibilimeersunik allanik sunik oqaluttuussinnaavavut? Nunani assigiinngitsuni arlalinni oqaluussisartut aalajaatsut oqaasii malugeriakkit, allassimaffiillu ilanngunneqartut oqaasiinut naleqqunnerat misissoruk.

⁸ Roy, 1951-imi kuisittoq: „Jehovamut tunniulluinnarama neriorsuivunga kiffartuuttuaannarniarlugu. Neriorsuut taanna eqqortikkusuppara.“ (Tussiaat 50:14; Matthæusi 5:37) Heather, 1962-imi kuisittoq: „Jehovap uannut iliuuserisimasai tamaasa eqqarsaatigigaangakkit qujamasunnera aalajaallunga kiffartorfigalugu takutikkusuttarpara.“ (Tussiaat 9:2, 10-12; Kolossemiut 3:15) Hannelore, 1954-imi kuisittoq: „Oqaluussiartornivut tamaasa inngilit ilagisarpaatigut — pisinnaatitaaffik angingaarami!“ (Apustilit Suliaat 10:30-33; Saqqummersitat 14:6, 7) Honor, 1969-imi kuisittoq: „Kissaatiginngilara Jehovap eqqartuussiffissaa nalliuppat najugaqarfigisanni Jehova nalunaajaasuilu sumiginnaasimanerarlugit unnerluutigalugit ima  oqartoqarnissaa: ’Mianersoqquneqarsimanngisaannarpunga!’“ (Ezekieli 2:5; 3:17-19; Romamiut 10:16, 18) Claudio, 1974-imi kuisittoq: „Oqaluussigaangatta ’Guutip kiinaata saani’ aamma ’Kristusimi’ kiffartortarpugut. Eqqarsaatigilaaruk! Oqaluussigaangatta Ikinngutiginerpaasavut ilagisarpavut.“ — 2 Korinthimiut 2:17. *

9. (a) Tupinnartuliornikkut aalisakkanik pisaqarnermik oqaluttuaq Jiisusimut naalannissamut pissutaasoq pillugu sumik takutitsiva? (b) Guutimut Jiisusi Kristusimullu naalannissamut ullumikkut suna pissutaasussaava eqqortoq? Akissutit tunngavilersoruk.

⁹ Tupinnartuliornikkut aalisakkanik pisaqarnermik oqaluttuami takutinneqarportaaq Jiisusi Kristusimut naalannissamut eqqortumik pissuteqarnissaq qanoq pingaaruteqartigisoq — tassa asanninneq. Petrusip ima oqarfigimmani: „Naalagaq, qimannga inuugama ajortilik,“ Jiisusip qimanngilaa, aamma ajortuliorneq sunaluunniit Petrusimut avoqqaarliutiginngilaa. (Lukasi 5:8) Petrusiluunniit qimaqqummat appiutinngilaa, inussiarnersumilli ima oqarfigaa: „Erseqinak!“ Annilaanganeq Jiisusip naalannissaanut pissutaasussaanngilaq eqqortoq. Petrusili ikinngutaalu oqarfigai inunnik aalisartuusinnaasut. Ullumikkuttaaq allat pinngitsaalillugit Jiisusimut naalatsinniarlugit annilaangatissanngilavut nikallornartunillu allanik misigitissanngilavut, soorlu kanngusutillugit pisuusutullu misigitillugit. Uummatikkut iluunngarluni naalanneq Guutimut Kristusimullu asanninnermik aallaavilik kisimi Jehovap uummataanik nuannaartitsisinnaavoq. — Matthæusi 22:37.

„Inunnik inuiannit tamaneersunik ajoqersuganngortitsigitsi“

10. (a) Ajoqersuganngortitsinissamik peqqussummut atatillugu Jiisusip ajoqersugaanut suna unamminiagassaava angisooq? (b) Peqqussut naalakkaat qanoq paasineqarsinnaava?

¹⁰ Jiisusip peqqussutaanut atatillugu apeqqutit aappaat tassaavoq: Sumi ajoqersuganngortitsineq ingerlanneqassava? Jiisusi ajoqersukkaminut oqarpoq: „Inunnik inuiannit tamaneersunik ajoqersuganngortitsigitsi.“ Jiisusip nalaa sioqqullugu inuit inuianneersut Jerusalemimut  tikilluaqqusaapput Jehovamik pallorfiginnikkiartorunik. (1 Kunngit 8:41-43) Jiisusi nammineq pingaarnerpaamik juutinut oqaluussivoq, maannali oqarpoq ajoqersukkani inunnut inuiannit tamaneersunukarlutik oqaluussissasut. Oqartoqarsinnaavoq ajoqersugaasa ’aalisarfigisimasaat’, tassa oqaluussiffigisaat, ’taseerannguusimasoq’ — tassa inunnguuseralugu juutiinnaat. Maannali aalisarfissaq allineqarpoq inuiaat ’imarsuat’ tamakkerlugu. Tamanna ajoqersukkanut unamminiarnassagaluartoq peqqussut kajumillutik naalappaat. Jiisusip toquneraniit ukiut 30-t qaangiutinngitsulluunniit apustili Paulusi allassinnaalerpoq nutaarsiassaq nuannersoq oqaluussissutigineqarsimasoq, juutiinnaanngitsunut, aammali „qilaap ataani pinngortitanut tamanut“. — Kolossemiut 1:23.

11. ’Aalisartarfiit’ 1900-kkut aallartinneranniilli qanoq annertusinneqarsimappat?

¹¹ Ukiuni kingulliunerusuni takusimavarput oqaluussiffigisartagaq tamatumunnga assingusumik annertusinneqarsimasoq. Ukiut 1900-kkut aallartinneranni nunarpaaluinnannguit ’aalisarfiusarput’. Taamanikkulli oqaluussisartut kristumiut siulliit maligassiaat malillugu kajumillutik allanik oqaluussiffissarsiortarput. (Romamiut 15:20) 1930-kkut aallartinneranni nunani 100-t missaanniittuni oqaluussipput. Ullumikkut nunani 235-ni ’aalisartarfeqarpugut’. — Markusi 13:10.

’Immikkut oqaasillit tamalaat’

12. Siulittuutip Zakaria 8:23-miittup suna unamminiarnartortaraa?

¹² Inunnik inuiannit tamaneersunik ajoqersuganngortitsiortorneq unamminiarnartuuvoq — sumiiffiit kisiisa eqqarsaatiginagit aammali oqaatsit eqqarsaatigalugit. Pruffiiti Zakaria aqqutigalugu Jehova ima siulittuivoq: „Taamaalisukkut inuiaat assigiinngitsut tamarmik [immikkut oqaasillit tamalaat, 1900/1961] angutitaasa ilaasa quliullutik angut Judakkuusoq ataaseq atisaata nuuagut tigullugu oqarumaarput: ’Ingerlaqatigissavassi tusaratsigu Guutip najoraasi.’“ (Zakaria 8:23) Siulittuutip taassuma eqquunnerani pingaarnerusumi „Judakkuusoq“, imaluunniit ’juuteq’, tassaavoq kristumiut tanitat sinneri, ’angutillu qulit’ tassaapput ’amerlangaartut’. * (Saqqummersitat 7:9, 10; Galatiamiut 6:16) Jiisusip ajoqersugai amerlangaartut taakku inuiannit amerlasuuneertussaapput, Zakariallu oqarneratut oqaatsit assigiinngitsorpassuit atorlugit oqalussapput. Taamaattoqarnera Guutip innuttaasa ukiuni kingulliunerusuni oqaluttuarisaanerannit paasineqarsinnaava? Aap.

13. (a) Guutip innuttaasa akornanni oqaatsit tungaasigut ullumikkut qanoq ineriartortoqarpa? (b) Oqaatsit assigiinngitsut atorlugit anersaakkut inuussutissanik pisariaqartitsinerujartorneq kiffaqatigiit ilumoortut qanoq naammassisimavaat? (Aamma takuuk ungalusaq „Tappiitsunut atuagassiat“.)

¹³ 1950-imi nunarsuarmi tamarmi Jehovap Nalunaajaasui tallimaagaangata pingasut tuluttut oqaaseqartuusarput. Tamanna 1980-imi allanngorsimavoq nalunaajaasut tallimaagaangata  marluk missaaniittarput, ullumikkullu Jehovap Nalunaajaasui tallimaagaangata ataaseq kisimi tuluttut oqaaseqartuusarpoq. Oqaatsit tungaasigut taamatut allannguuteqarneq ’kiffap ilumoortup silatuullu’ qanoq naleqqussaavigisimavaa? Oqaatsinut suli amerlanerusunut anersaakkut inuussutissalersuinermigut taamaaliorsimavoq. (Matthæusi 24:45) Assersuutigalugu 1950-imi atuagassiaativut oqaatsinut 90-inut saqqummersinneqartarput, ullumikkulli 400-t tungaannut amerlisimapput. Inunnut assigiinngitsunik oqaasilinnut soqutiginninnerulerneq tamanna kinguneqarluarsimava? Aap! Agguaqatigiissillugu inuit „immikkut oqaasilinnit tamanit pisut“ 5000-it ukioq kaajallallugu sapaatit akunneri tamaasa Jiisusimut ajoqersuganngortarput. (Saqqummersitat 7:9) Amerliartortuarpullu. Nunat ilaanni ’qassutit’ ulikkaavipput! — Lukasi 5:6; Johannesi 21:6.

Suliaq kinguneqarluartoq — Peqataasinnaavit?

14. Allatut oqaasillit oqaluussiffigisartakkatsinniittut qanoq ikiorsinnaavavut? (Takuuk ungalusaq „Ussersorluni oqaatsit ajoqersuganngortitsinerlu“.)

¹⁴ Nunarpassuarni killerni nunasisut amerliartuinnarnerisa kinguneranik inunnik ’immikkut oqaasilinnit tamanit pisunik’ ajoqersuganngortitsiortortoqarpoq. (Saqqummersitat 14:6) Nalunaajaaffigisartakkatsinni najuuttut oqaatsitsinnit allaanerusumik oqaasillit qanoq ikiorsinnaavavut? (1 Timotheusi 2:4) ’Aalisaatit’ eqqortut atornerisigut taamaaliorsinnaavugut. Atuagassiat takornartat oqaasii atorlugit allakkat neqeroorutigisinnaavavut. Ajornanngippallu oqaluussisartoq taakkua oqaasiinik oqaluttartoq pulaartissinnaavarput. (Apustilit Suliaat 22:2) Taamaaliornissaq maanna ajornannginnerulersimavoq takornartat Jiisusimut ajoqersuganngornissaannut ikiorniarlugit oqaluussisartorpassuit oqaatsinik allanik ilinniarsimammata. Nalunaarutit takutippaat taamatut periuseqarneq angusaqarfiulluartartoq.

15, 16. (a) Assersuutit suut takutippaat takornartatut oqaluttunik ikiuineq nuannaarnaqisoq? (b) Takornartatut oqaasillit oqaluussiffigisarnissaannut atatillugu apeqqutit suut isumaliutigisinnaavavut?

¹⁵ Marlunnik assersuuteqariarta Hollandimeersunik, oqaatsit 34-t atorlugit aaqqissuussamik nalunaajaasarfiusumeersunik. Nunasisut Polenimiutut oqaluttut akornanni aappariit oqaluussiumapput. Ima angusarissaartigigamik angutip sulisarnini sivikillilertariaqarpaa, soqutiginnittunik Biibilimik atuaqqissaaqateqartarnissaminut ullumik  ataatsimik piffissaqarneruniarluni. Sivitsunngitsoq aappariit 20-nik atuaqqissaaqateqartalerput. Oqarput: „Kiffartuutitta nuannaarteqalutalu pilluarteqaatigut.“ Sulilu nuannaarnarnerusarpoq sallusuissutit Biibilimeersut namminneq oqaatsitik atorlugit oqalussissutigineqartut tusarlugit oqaluussiffigineqartut qujamasunnerminnik ersersitsigaangata. Ataatsimiinnermi Vietnamimiusut ingerlanneqartumi angut utoqqaq nikuilluni oqaaseqarsinnaanerluni aperivoq. Isini imerlaarsisut najuuttut ima oqarfigai: „Oqaatsikka ilikkaruminaatsut ilinniarniarlugit ilungersorassi qujanaq! Ukioqqortusillunga sallusuissutit nuanningaartut Biibilimeersut ilinniarsinnaagakkit nuannaarutigaara.“

¹⁶ Taamaattumik tupinnanngilaq ilagiinni takornartatut oqaasilinniittut misigisimammata ilungersornitik kinguneqarluartut. Aappariit tuluit oqarput: „Takornartatut oqaasillit oqaluussiffiginerat ukiuni 40-ni oqaluussinitsinni kiffartoriaatsit pissanganarnerpaat ilagaat.“ Pissutsit atukkatit ima aaqqissinnaavigit taamatut qiimmaallannartumik kiffartoqataasinnaalerlutit? Suli atuaruit taamatut kiffartornissaq piareersarfigalugu takornartat oqaasiinik ilinniagaqarnissannut immaqa periarfissaqarputit. Taamaaliornikkut inuunermut pilluaqqussutinik ulikkaartumut periarfissaqalersinnaavutit. (Ussatit 10:22) Soormi angajoqqaatit tamanna pillugu oqaloqatigigukkit?

Oqaluusseriaatsimik allanngorartitsineq

17. Oqaluussiffigisartakkatsinni inuit amerlanerusut qanoq anguniarsinnaavavut?

¹⁷ Pissutsit atukkavut pissutigalugit amerlanersavut takornartatut oqaasillit akornannut ’qassusersinnaanngillat’. Immaqali uagut nammineq oqaluussiffigisartakkatsinni maannakkumut naleqqiullugu inuit amerlanerusut anguniarsinnaavavut. Qanoq? Tusarliusatsinnik allanngortitsinikkuunngitsoq oqaluusseriaatsitsinnilli allanngorartitsinnikkut. Inuit illuni immikkut isumannaallisakkani najugaqartarnerat illoqarfippassuarni nalinginnaaleraluttuinnarpoq. Allarpassuillu illumiit illumut oqaluussiartoraangatta angerlarsimaneq ajorput. Taamaattumik piffissani sumiiffinnilu allani ’qassusernissarput’ pisariaqarsinnaavoq. Taamaaliornitsigut Jiisusi ilaassavarput. Taassuma inuit periarfissani assigiinngitsorpassuarni oqaloqatigisarpai. — Matthæusi 9:9; Lukasi 19:1-10; Johannesi 4:6-15.

18. Oqaluussineq sumi kinguneqarluartarpa? (Aamma takuuk ungalusaq „Niuertunut oqaluussineq“.)

¹⁸ Nunarsuatta ilaani pisartunit takutinneqarpoq inuppassuarnik naapitsiffiusinnaasumi sumiluunniit oqaluussineq pitsaasuusoq. Oqaluussisartut misilittagaqarluartut illumiit illumut oqalussisarnermik saniatigut mittarfinni, allaffinni, niuertarfinni, biilit unittarfiini, bussit unittarfiini, naatsiivissuarni, sissami allarpassuarnilu oqaluussisarneq immikkut piginnaaneqarfigilersimavaat. Hawaiimi oqaluussisartut kuiserlaat amerlangaatsiartut sumiiffinni taamaattorpiani attaveqarfigeqqaarneqarsimapput. Oqaluuseriaatsimik allanngorartitsinikkut Jiisusip ajoqersuganngortitsiortornissamik peqqussutaa suli malilluarnerusinnaavarput. — 1 Korinthimiut 9:22, 23.

19. Jiisusip peqqussutaaneersut marluk suut allaaserisami tulliuttumi misissussavavut?

¹⁹ Jiisusip ajoqersuganngortitsiortornissamik peqqussutaa sooq aamma sumi suliassap ingerlanneqarnissaanik paasissutissiiginnarani, aamma sumik oqaluussissanersugut aamma qanoq sivisutigisumik oqaluussineq ingerlanneqassanersoq najoqqutassinneqarpugut. Taakkununnga tunngasut Jiisusip peqqussutaaneersut marluk allaaserisami tulliuttumi misissussavavut.

[Quppernerup ataani ilanngussat]

Eqqaamavigit?

• Suut pissutigalugit sumillu pissuteqarluta oqaluusseqataallutalu ajoqersuganngortitsiortoqataavugut?

• Jiisusip inunnik inuiannit tamaneersunik ajoqersuganngortitsinissamik peqqutaa Jehovap kiffaasa ullumikkut qanoq malilluartigisimavaat?

• ’Aalisariaatsivut’ qanoq allanngorartissinnaavavut, aamma sooq taamaaliortariaqarpugut?

[Atuaqqissaarnermi apeqqutit]

[Qupp. 10-mi ungalusaq/​assiliartat]

Tappiitsunut atuagassiat

Albert USA-mi najugaqartoq utoqqaanertaavoq kristumiu, piffissarlu tamaat oqaluussisartuuvoq. Tappiitsuuvoq. Oqaluussigaangami braille (tappiitsunut naqinnerit) iluaqutigingaartarpai, aamma kiffartornermik nakkutilliisutut sulinermini iluaqutigingaartarpai. Suliassaq taanna qanoq suliarisinnaavaa?

„Albertimit pitsaanerusumik kiffartornermik nakkutilliisoqarsimanngisaannarpugut,“ nakkutilliisoq siulittaasoq James oqarpoq. USA-mi tappiitsut 5000-iusut ukiuni arlalinni atuagassianik Biibililersaarutinik tuluttut Spaniamiusullu braillesut naqinnilinnik pisarsimasut Albert ilagaat. ’Kiffap ilumoortup silatuullu’ braillesut naqinnillit atuagassiat atuakkallu assigiinngitsut 100-nit amerlanerusut 1912-imiilli saqqummersittarsimavai. Teknologii nutaaliaq atorlugu Jehovap Nalunaajaasuisa naqiterivii ukiut tamaasa oqaatsinut qulinit amerlanerusunut braillesut naqinnillit quppernernik millionilippassuarnik naqiterisarput, taakkulu nunanut 70-init amerlanerusunut siammartittarpaat. Tappiitsunut atuagassianik Biibililersaarutinik immaqa perusussinnaasunik nalunngisaqarputit?

[Qupp. 11-mi ungalusaq/​assiliartaq]

Ussersorluni oqaatsit ajoqersuganngortitsinerlu

Tusilartut Jiisusimut ajoqersuganngornissaannik ikiorniarlugit Jehovap Nalunaajaasui nunarsuarmi tamarmi tusindilippassuit, aamma inuusuttorpassuit, ussersorluni oqaatsinik ilinniarsimapput. Tamatuma kinguneranik Brasiliaannarmi tusilartut 63-it ukiup ataatsip ingerlanerani kuisipput, aamma nunami tassani Jehovap Nalunaajaasui tusilartut 35-t piffissartik tamaat oqaluussisartuupput. Nunarsuaq tamakkerlugu ilagiit gruppillu ussersorlutik oqaluttut 1.200-nit amerlanerupput. Nunarsuaq tamakkerlugu ussersorlutik oqaluttunik ataasiinnarmik ilageeqatigeeqarpoq. Ruslandimiippoq, nunarsuarmilu ilageeqatigiit annersaraat, ilagiimmi Ruslandimit tamarminngaanneerput.

[Qupp. 12-mi ungalusaq]

Niuertunut oqaluussineq

Hawaiimi Jehovap Nalunaajaasuisa ilaat niuertut allaffiannukartarpoq, assartuisarfimmilu immikkoortortaqarfimmi pisortaq naapippaa. Naak ulapikkaluarluni Biibilimik atuaqqissaarnissamik neqeroorut akuersaarpaa, isumaqatigiippullu allaffiani sapaatit akunneri tamaasa nalunaaquttap akunnerata affaa atuaqqissaaqatigiittassallutik. Atuaqqissaarnini aallulluarsinnaajumallugu pingasunngornerit tamaasa ullaap tungaa allatsini qinnuigisarpaa oqaloqatiginninniartut nuuttaqqunagit. Hawaiimi oqaluussisartoq alla kamippaliorfimmik piginnittumik sapaatip akunneranut ataasiarluni Biibilimik atuaqqissaaqateqartarpoq. Pisiniarfiup nerriviusaani atuaqqissaartarput. Pisiniaq iseraangat oqaluussisartoq illikaamisarpoq, anigaangallu atuaqqissaaqqilertarput.

Oqaluussisartut tamaannga ’qassusermata’ assartuisarfimmi immikkoortortaqarfimmi pisortaq niuertarfiutilillu attaveqarfigineqalerput. Ilagiivit oqaluussiffigisartagaanni inuit angerlarsimaffiini naapikkuminaatsut sumi naapissinnaavigit?

[Qupp. 12-mi assiliartaq]

Takornartatut oqaasillit akornanni kiffartorsinnaavit?