’Jehovap inatsisai’ nuannaraagit?

„Pilluarpoq . . . [Jehovap] inatsisaanik nuannarisaqartoq.“ — TUSSIAAT 1:1, 2.

1. Sooq Jehovap kiffaasut pilluartuuvugut?

JEHOVAP kiffani ilumoorfiginnittut ikiortarpai pilluaqqusarlugillu. Ilumoorpoq misilinneqartuartartugut, taamaattorli pilluarneq piviusoq nuannaarutigaarput. Tamanna tupaallannanngilaq, ’Guutimi pilluartoq’ kiffartorfigaarput, anersaavatalu illernartup uummatitsinni nuannaarneq ineritittarpaa. (1 Timotheusi 1:11; Galatiamiut 5:22) Nuannaarneq tassaavoq pilluarneq arlaannik ajunngitsumik ilimasunnermit pigisaqalernermilluunniit pilersinneqartoq. Ataatattalu qilammiusup ilumut ajunngitsorpassuarnik tunisarpaatigut. (Jaaku 1:17) Tassa pilluarnissamut pissutissaqavippugut!

2. Tussiaatit sorliit misissussavavut?

² Pilluarneq Tussiaatit ilarpassuini, ilaatigut Tussiaat 1-imi aamma 2-mi, eqqaaneqartarpoq. Ukiuni hundredelinni siullerni Jiisusi Kristusip ajoqersugaasa Israelikkut kunngiat Daavi tussiaatit aappaannik allattuunerarpaat. (Apustilit Suliaat 4:25, 26) Tussiaammik siullermik taalliortup atermigut taaneqanngitsup erinarsuusiani isumassarsiarititaasoq ima aallartippaa: „Pilluarpoq iluaatsut siunnersuutaat malillugit inuunngitsoq.“ (Tussiaat 1:1) Allaaserisami matumani tullianilu takussavarput Tussiaat 1-imi 2-milu nuannaarnissamut pissutissaqartugut.

Qanoq pilluartuartoqarsinnaasoq

3. Tussiaat 1:1 naapertorlugu Guutip inatsisaanik maleruaasup pilluarneranut suut pissutaaqataappat?

³ Tussiaat 1-imi erserpoq sooq Guutip inatsisaanik maleruaasoq pilluarnersoq. Pilluarnermut pissutaasut ilaat tussiaasiortup ima oqaatigai: „Pilluarpoq iluaatsut siunnersuutaat malillugit inuunngitsoq, ajortuliortut aqqutaatiguunngitsoq, mitaatilliisullu akornannut ingiffissinngitsoq.“ — Tussiaat 1:1.

4. Zakaria Elisabethilu maligassaalluartumik qanoq inooriaaseqarpat?

⁴ Pillualivissagutta Jehovap piumasaqaatai naapertuilluartut maleruartariaqarpavut. Zakaria Elisabethilu, Johannesi Kuisisumut angajoqqaanngornerminnik nuannaarutiginnillutik immikkut pisinnaatitaaffeqartitaasut, „Guutip takkuani iluartuupput assuarnaatsumik inuullutik [Jehovap] inassutai ileqqoreqqusaalu maleruarlugit“. (Lukasi 1:5, 6) Pilluarsinnaavugut taamatut inuugutta ’iluaatsullu siunnersuutaat malillugit inuujumanata’ eqqarsartaasiannilluunniit ajortumit siulersortikkumanata aalajangiusimalluinnarutsigu.

5. ’Ajortuliortut aqqutaatiguunnginnissamut’ suna iluaqutigisinnaavarput?

⁵ Guutiitsutut eqqarsartaaseqarumanngikkutta ’ajortuliortut aqqutaatiguussanngilagut’. Tamanna isumaqarpoq sumiiffigisartagaanniinngilluinnassasugut, tassa inuunerlunnermik aliikkusersuiffiusartuni tusaamanerlugaasuniluunniit. Taavami ajortuliortut iliuusii Biibilimut naapertuutinngitsut ilaarnissaannut ussernartorsiorutta? Taava Guutimut ikioqqusinnaavugut apustili Paulusip oqaasiinut ukununnga naapertuuttumik iliuuseqarnissatsinnut: „Uppinngitsut  qamutinik uniaqatiginiaqinasigik! Iluarnerummi inatsisaanneq sukkut peqatiginerpaa? Qaamasoq taartorlu sukkut assigiissuteqarpat?“ (2 Korinthimiut 6:14) Guuti tatigigutsigu ’uummatitsigullu minguitsuugutta’, ajortuliortutut inooriaaseqarumassanngilagut siulersortillutali kissaatinit pissutiginiakkanillu minguitsunit ’uppernermillu pisuusaartumiunngitsumit’. — Matthæusi 5:8; 1 Timotheusi 1:5, 1900/1961.

6. Sooq mitallersut mianersorfigisariaqarpavut?

⁶ Jehova nuannaartikkusukkutsigu ’mitaatilliisut akornannut ingiffississanngilagut’. Ilaasa Guutimut uppertuuneq mitaatigisarpaat, maannali ’ulluni kingullerni’ kristumiuusimagaluartunit tunussisimasunit immikkut ajorniarfigineqarluta mitaatigineqartarpugut illaruaatigineqartarlutalu. Apustili Petrusip uppeqatini ima mianersoqquai: „Asasakka, . . . pingaartumik ilisimassavarsi ullussani kingullerni tikiukkumaarmata mitallersut pilerissusertik maliinnarlugu inuusut mitallerlutillu ima oqartut: ’Tikiunnissaaninguna neriorsuut qanoq piniartoq? Siuaasat toqummatali suut tamarmik pinngortinneqaqqaarnermissut ittuaannarsimapput.’“ (2 Petrusi 3:1-4) ’Mitaatilliisut akornannut ingiffissinngisaannarutta’ ajunaarnermit pinngitsoorani taakkununnga eqquisussamit eqqorneqassanngilagut. — Ussatit 1:22-27.

7. Sooq Tussiaat 1:1-imi oqaatsit uummammiuliuttariaqarpavut?

⁷ Tussiaat 1-imi oqaatsit aallaqqaasiutit uummammiuliutinngikkutsigik Biibilimik atuaqqissaartarnikkut anersaakkut ittunik pingaartitsilersimanerput annaariaannaavarput. Aap, allaat inuunerput ajorneruleriataarsinnaavoq. Anersaakkut sisuulersinnaavugut guutiitsut siunnersuutaannik malinninnikkut. Taava immaqa guutiitsut aalajangersimasumik ilagisartagarilersinnaavavut. Piffissap ingerlanerani allaat aalajaannata tunussisuullutalu mitaatilliisunngorsinnaavugut. Erseqqippoq guutiitsunik ikinnguteqarutta guutiitsutut isiginnittaaseqalersinnaasugut Jehovamullu attaveerussinnaasugut. (1 Korinthimiut 15:33; Jaaku 4:4) Qanortoq taamaalinngisaannarta!

8. Anersaakkut ittunik eqqarsaatiginnittarnissamut suut iluaqutigissavavut?

⁸ Qinuneq iluaqutigissavarput anersaakkut ittunik eqqarsaatiginninnissamut guutiitsunillu peqateqannginnissamut. „Sumilluunniit isumakuluuteqarnaveeritsi,“ Paulusi allappoq, „kissaatigisasili qanoq ittukkulluunniit Guutimut saqqummiuttarsigit qinullusi torlulallusilu qujallusilu. Taava eqqissinerup Guutimit pisup siuneqassusernit tamanit annerungaartup uummatisi eqqarsaatisilu sernigissavai Kristusi-Jiisusimi.“ Apustili Paulusip kristumiut kajumissaarpai ilumoortut, assuarnaatsut, naapertuilluartut, minguitsut, asanartut, ajunngitsumik oqallisaasut, ileqquulluartut nersornartullu eqqarsaatigisaqqullugit. (Filippimiut 4:6-8) Paulusip siunnersuutaanut naapertuuttumik iliuuseqarta, uagutsinnullu nikanarsanngisaannarta guutiitsutut iliorluta.

9. Guutiitsutut inooriaaseqarumanngikkaluarluta, inuit kikkuugaluartulluunniit ikiorniarlugit qanoq iliorpugut?

 ⁹ Guutiitsutut inooriaaseqarumanngilagut, periaaserillutali oqaluussiffigaavut, soorlu apustili Paulusi „iluarneq pinaveersaarnerlu eqqartuussinissarlu pillugit“ Romamiut Judæami naalagaatitaannut, Feliximut, nalunaajaasoq. (Apustilit Suliaat 24:24, 25; Kolossemiut 4:6) Guutip naalagaaffianik nutaarsiassaq nuannersoq kikkuugaluartunulluunniit oqaluussissutigaarput inussiarnisaarfigalugillu. Qularutiginngilarpullu „inuunermik naassaanngitsumik eqqortumik isumaqarfiginnittut“ uppertunngorumaartut Guutillu inatsisaanik nuannarisaqalerumaartut. — Apustilit Suliaat 13:48, NV.

Jehovap inatsisaanik nuannarisaqarpoq

10. Atuakkatsinnik puiuikkiussinerunissatsinnut uummammiuliussinerunissatsinnullu suna iluaqutigisinnaavarput?

¹⁰ Pilluartoq pillugu tussiaasiortoq ima nangippoq: ’Jehovap inatsisaanik nuannarisaqarpoq, inatsisaalu eqqarsaatigisarpai [nipikitsumik atuartarpai, NV] ullukkullu unnuakkullu.’ (Tussiaat 1:2) Guutimut kiffaasutut ’Jehovap inatsisaanik nuannarisaqarpugut’. Nammineq atuaqqissaartilluta atuakkatsinnillu eqqarsaatiginneqqissaartilluta, ajornanngikkaangat „nipikitsumik“ atuartarsinnaavugut, tassa oqaatsit nipilimmik oqaatigalugit. Biibilimik atuaraangatta taamaaliortarutta atuakkavut puiuikkiunnerussavavut uummammiuliunnerussallugillu.

11. Sooq „ullukkullu unnuakkullu“ Biibilimik atuartariaqarpugut?

¹¹ ’Kiffap ilumoortup silatuullu’ kajumissaarpaatigut ullut tamaasa Biibilimik atuartaqqulluta. (Matthæusi 24:45) Aap, Jehovap inuiannut tusarliussaata ilisimanerulernissaa qamuuna kissaatigigutsigu, „ullukkullu unnuakkullu“ — immaqa allaat arlaannik pissuteqarluta sininneq ajuleraangata — Biibilimik atuartarneq uagutsinnut naleqangaassaaq. Petrusip ima kajumissaarpaatigut: „Inoorlaannguatut kajungerisiuk oqaatsip immua minguitsoq taassumuuna alliartorsinnaaqqullusi annannissamut.“ (1 Petrusi 2:1, 2) Ullut tamaasa Biibilimik atuartarneq unnuakkullu Guutip oqaasianik siunertaanillu eqqarsaatiginnittarneq nuannaraagit? Tussiaasiortoq taamaappoq. — Tussiaat 63:7.

12. Jehovap inatsisaanik nuannarisaqarutta qanoq iliussaagut?

¹² Guutip inatsisaanik nuannarisaqarnerput naassaanngitsumik pilluarnissatsinnut aalajangiisuuvoq. Guutip inatsisai naammalluinnartuupput naapertuilluartuullutillu, maleruarnerisigullu pilluaqqusaangaartoqartarpoq. (Tussiaat 19:8-12) Ajoqersugaq Jaaku ima allappoq: „Kiffaanngissutsip inatsisaanik naammalluinnartunik isumaliutiginneqqissaartoq aalajangiussisorlu, tusakkaminik puigutuujunani suliassamillu naammassinnittartuulluni, taanna taamaaliornermigut pilluarumaarpoq.“ (Jaaku 1:25) Guutip inatsisai nuannarivikkutsigik ullut tamarluinnaasa anersaakkut ittunik sammisaqartassaagut. Aap, ’Guutip itissusiinik killisiuinissatsinnut’ kajumissuseqassaagut Guutillu naalagaaffiata soqutigisaanik inuunitsinni salliutitsissalluta. — 1 Korinthimiut 2:10-13; Matthæusi 6:33.

Orpik assigilissavaa

13-15. Orpik kuunnguup killingani ikkunneqarsimasoq qanoq assigilersinnaavarput?

¹³ Inuk assuarnaatsoq allaatigalugu tussiaasiortoq  ima nangippoq: „Taassuma assigaa orpik kuunnguup killingani ikkunneqarsimasoq; inerititaqarfissamigut inerititaqartarpoq toqujuitsunillu pilutaqarluni. Qanoq iliornermini tamani iluatsitsisaraaq.“ (Tussiaat 1:3) Jehovamut kiffartortut inuttut allatulli naammalluinnanngitsutut ajornartorsiuteqartarput. (Jobi 14:1) Uppernerput pissutigalugu malersorneqarsinnaavugut allarpassuarnillu annikilliortitaasinnaalluta. (Matthæusi 5:10-12) Guutilli ikiuineratigut misilinneqarnerit tamakku naammagalugit atorsinnaavavut, soorlu orpik peqqissoq anorersuarujussuarmi uppinneq ajortoq.

¹⁴ Orpik imeqartuaannartumi ikkunneqarsimasoq panernersuarmi aasakkulluunniit kiannerujussuani toquliorneq ajorpoq. Guutimik mianerinnittuugutta nakussatsinneqassaagut nakussatsitsisumit pakatsisitsinngisaannartumit — Jehova Guutimit. Paulusi Guutimut ikiortissarsiortarpoq, imalu oqarsinnaasimavoq: „Tamaasa pissatsitsisikkut [Jehovakkut] atussallugit sapinngilakka.“ (Filippimiut 4:13) Jehovap anersaavanit illernartumit siulersorneqarutta napatinneqaruttalu taroriartussanngilagut, inerititaqanngitsuussanngilagut, anersaakkulluunniit toqussanngilagut. Guutimut kiffartornitsinni inerititaqassaagut anersaallu inerititaanik inerititaqassalluta. — Jeremia 17:7, 8; Galatiamiut 5:22, 23.

¹⁵ Tussiaasiortup inuit orpinnut assersuuppai; assigiinngillat, aalajangersimasumilli assigiissuteqarput. Orpiup kuunnguup eqqaani ikkunneqarsimasup naggorinnera, tussiaasiortup eqqaanartissimagunarpaa ’Jehovap inatsisaanik nuannarisaqartup’ anersaakkut uummaarinneranut. Guutip inatsisaanik nuannarisaqarutta ulluvut orpiup ulluisulli amerlatigilersinnaapput. Aap, allaat naassaanngitsumik inuusinnaavugut. — Johannesi 17:3.

16. Sooq aamma qanoq ’qanoq iliornivut tamarmik iluatsissappat’?

¹⁶ Assuarnaatsumik inuugutta, Jehovap ikiussavaatigut misilinneqarnerit ajornartorsiutillu naammagalugit atornissaannut. Guutimut kiffartornermi nuannaarneq misigissavarput inerititaqarlutalu. (Matthæusi 13:23; Lukasi 8:15) ’Qanoq iliornivut tamarmik iluatsissapput’ Guutip piumasaanik iliornissaq pingaarnertut anguniagarigatsigu. Jehovap siunertai piviusunngortuaannarmata inatsisaalu ’nuannarigatsigik’, anersaakkut siumukassaagut. (1 Mosesi 39:23; Josva 1:7, 8; Esaja 55:11) Aamma taamaappoq allaat misilinneqaraangatta. — Tussiaat 112:1-3; 3 Johannesi 2.

Guutiitsut ingerlalluarpasipput

17, 18. (a) Tussiaasiortup guutiitsut sumut assersuuppai? (b) Sooq guutiitsut pigisatigut ingerlalluaraluarlutik ataavartumik toqqissisimanngillat?

¹⁷ Guutiitsut inuunerat naapertuilluartut inuunerannit allaanerulluinnarpoq. Guutiitsut immaqa sivisujaamik pigisatigut ingerlalluarpasipput, anersaakkulli siumukanngillat. Tamanna tussiaasiortup oqaasiinit tulliuttunit paasinarpoq: „Taamatulli inngillat iluaatsut, assigaat karrit qalipakui anorimit teqqarneqartut. Taamaammat iluaatsut eqqartuussummi atassanngillat ajortuliortullu iluartuni katersorsimasuni aamma atassanatik.“ (Tussiaat 1:4, 5) Malugiuk tussiaasiortup ima oqarnera: „Taamatulli inngillat iluaatsut.“ Oqaatiginiagaa unaavoq: Taakku Guutimik mianerinnittutut, orpinnut sivisuumik uummaarillutik inerititaqartartunut assersuunneqaqqammersutut, inngillat.

¹⁸ Guutiitsut pigisatigut ingerlalluaraluarlutik ataavartumik toqqissisimanngillat. (Tussiaat 37:16; 73:3, 12) Jiisusip kingornussisussanik isumaqatigiissitsiniartussatut qinnuigineqareerluni angummik sianiitsumik pisuumik assersuusiamini eqqartugaatut Guutiitsut ipput. Jiisusip najuuttut ima oqarfigai: „Sissueritsi mianersorlusilu piumatussusermut sumulluunniit, inuummi inuuneranut aalajangiisuunngilaq sumik pigisaqarnera naammattorsuarnilluunniit pigisaqaraluaruni.“ Jiisusip erseqqissarniakkani angummik assersuusiorluni oqaluttuaraa, angullu taanna pisuujuvoq narsaamminit ima pissarsilluarsimatigisimasoq quiminik ingutsereriarluni anginerusunik pigisaminut tamanut inissalimmik quiliorniarluni. Angut taamaalioreeruni nerinissani, imernissani inuulluataarnissanilu pilersaarutigai. Guutilli ima oqarfigaa: „Sianiitsutit, unnuaru tarnit ilinnit qaaqquneqassaaq. Kiammi taava katersugarpassuatit pissavai?“ Jiisusip tunngavilersuinini kimittooq ima naavaa: „Taama pisarpoq pisuussutinik katersisoq Guutimili pisuujunani.“ — Lukasi 12:13-21.

19, 20. (a) Itsaq qanoq karrinik karrertaajaallutillu saliisarnersut oqaluttuariuk. (b) Sooq guutiitsut karrit qalipakuinut assersuunneqarpat?

 ¹⁹ Guutiitsut ’Guutimi pisuujunngillat’, taamaattumillu karrit qalipakuinit, karrit ameraasaannit saattunit, asiujaannerunngillat allanngujaannerunatillu. Itsaq karrinik katersuereeraangamik karrertaajaaffimmukaattarpaat, nunamut toqqissumut qaffasissumiikkajuttumut. Tassani karrit kanaartaajarniarlugit qalipaajarniarlugillu uumasut uniartoralugit qamutinit ujaqqamik saviminermilluunniit ipittunik kigutaasalinnit aqqusaarneqartarput. Taava taakku tamarmik nivaattamik anorip tungaanut naloriunneqartarput. (Esaja 30:24) Karrit karrertaajaaffimmut nakkartarput, kanaartalli illusinnerulaartumut tingitaasarput qalipakullu ungasissumut. (Ruthi 3:2) Karrit ujaraaraajarniarlugit nakkartitsivikkoortinneqareeraangamik toqqorneqarsinnaasarput aserorterneqarsinnaasarlutilluunniit. (Lukasi 22:31) Qalipakulli peerupput.

²⁰ Karrit karrertaajaaffimmut nakkartut toqqorneqartut, karrit qalipakui tingitaapput, taamatulli naapertuilluartoq atassaaq guutiitsorlu piiagaassalluni. Aap, soorunami inuit ajortut taamaattut qanittukkut peerulluinnarnissaat nuannaarutigaarput. Peeruppata Jehovap inatsisaanik nuannarisaqartut pilluaqqusaangaassapput. Aap, Guutimut naalattut taassuma naggataatigut inuunermik naassaanngitsumik tuniumaarpai. — Matthæusi 25:34-46; Romamiut 6:23.

„Iluartut aqqutaat“ pilluaqquneqassapput

21. Jehovap ’iluartut aqqutaat nalunngikkaa’ qanoq paasisariaqarpa?

²¹ Tussiaat siulleq ima naavoq: „[Jehovap] iluartut aqqutaat nalunngilaa, piujunnaassaarli iluaatsut aqqutaat.“ (Tussiaat 1:6) Guutip ’iluartut aqqutaat nalunngikkaa’ qanoq paasisariaqarpa? Imaappoq, assuarnaatsumik inuugutta, qularutigissanngilarput Ataatatta qilammiusup Guutimik mianerinnilluta inuunerput malugisaraa kiffamisullu iluarisamisut isigisaraatigut. Taava uagut isumakuluutivut tamaasa taassumunnga tunniussinnaavavut tunniuttariaqarlugillu tatigalugu isumagissagaatigut. — Ezekieli 34:11; 1 Petrusi 5:6, 7.

22, 23. Ajortut naapertuilluartullu qanoq pineqassappat?

²² „Iluartut aqqutaat“ ataavartuuvoq, ajortulli iliuutsiminnik allannguiumanngitsut ajunaassapput Jehovap eqqartuussinerata kingunerisaanik. Taakkualu „aqqutaat“, imaluunniit inuunerat, kipissaaq. Upperisinnaavarput Daavip oqaasii ukua eqquukkumaartut: „Iluanngitsoq erniinnaq peeruttussaavoq, inaani takuniaraluarukku peerutereersimassaaq. Kisianni qanilaartut nuna kingornutissavaat pilluangaarnertillu nuannaarutigissallugu. Iluartut nuna kingornutissavaat  najugaqassallutillu tassani naassaanngitsumik.“ — Tussiaat 37:10, 11, 29.

²³ Nunami paratiisiusumi ajortuerussimasumi immikkut pisinnaatitaaffigalugu inuulerutta qanoq pilluartigissanersugut eqqarsaatigiuk! Taamanikkussamut qanilaartut naapertuilluartullu eqqissineq piviusoq nuannaarutigisinnaavaat ’Jehovap inatsisaanik’ nuannarisaqartuaannaramik. Tamannali pitinnagu „[Jehovap] aalajangiinera“ piviusunngortariaqarpoq. (Tussiaat 2:7a) Allaaserisap tulliani misissussavarput Guutip aalajangiinera sunaanersoq, uagutsinnullu inuiannullu tamanut qanoq isumaqassanersoq.

Qanoq akissavit?

• Sooq Guutimik mianerinnittoq pilluarpa?

• Jehovap inatsisaanik nuannarisaqartugut qanoq takuneqarsinnaava?

• Inuup orpik kuunnguup killingani ikkunneqarsimasoq qanoq assigilersinnaavaa?

• Naapertuilluartup aqqutaa guutiitsup aqqutaanit qanoq allaanerua?

[Atuaqqissaarnermi apeqqutit]

[Qupp. 20-mi assiliartaq]

Qinuneq guutiitsunik peqateqannginnissamut iluaqutigissavarput

[Qupp. 21-mi assiliartaq]

Naapertuilluartup orpik qanoq assigaa?