Jehovap oqaasia uumavoq

Mosesimik allakkat sisamaat-nit pingaarnersat

EGYPTENIMIIT aniguereerlutik Israelikkut inuiaqatigiittut aaqqissugaapput. Tamatuma kinguninngua nuna neriorsuutigisaq iserfigisinnaagaluarpaat, taamaaliunngillalli. Ukiulli 40-ngajaat „inoqajuitsorsuakkut navianartulikkut“ angalaartariaqarput. (5 Mosesi 8:15) Sooq? Mosesimik allakkat sisamaat-ni oqaluttuarisaanermi pisimasut ilumoortut oqaluttuarineqarput. Tamanna Jehova Guutimut naalattariaqarnitsinnut taassumunngalu sinniisuusunik ataqqinninnissamut ilinniutigisariaqarparput.

Mosesimik allakkat sisamaat inoqajuitsumi Moabillu narsartaani allanneqarsimapput, ukiullu 38-t qaammatillu qulingiluat ingerlanerini pisimasut — 1512-imiit u.n.s. 1473 u.n.s. tikillugu — allaatigineqarlutik. (4 Mosesi 1:1; 5 Mosesi 1:3) Allakkat latiinerisut taaguutaat, Numeri, isumaqartoq „kisitsisit“, tikkuussivoq Israelikkut kisinneqarnerannut ukiullu 38-t qaangiummata kisinneqaqqinnerannut. (Kapitalit 1-4, 26) Oqaluttuaq pingasunik immikkoortortaqarpoq. Qaqqami Sinajimi pisimasut immikkoortumi siullermi oqaluttuarineqarput. Israelikkut inoqajuitsumi angalaneranni pisimasut immikkoortup aappaani oqaluttuarineqarput. Immikkoortumilu kingullermi Moabip narsartaani pisimasut allaatigineqarput. Oqaluttuaq atuartillugu imminut ima aperisinnaavutit: ’Pisimasut tamakku qanoq ilinniarfigisinnaavakka? Allakkat najoqqutassianik ullumikkut iluaqutigisinnaasannik imaqarpat?’

QAQQAP SINAJIP EQQAANI

(4 Mosesi 1:1–10:10)

Inunnik kisitsineq siulleq Israelikkut suli Qaqqap Sinajip eqaaniitillugit naammassineqarpoq. Angutit 20-nik ukioqalereersimasut utoqqaanerusullu tamarmik, Levikkut pinnagit, 603.550-iupput. Qularnanngitsumik sakkutooqarneq eqqarsaatigalugu kisinneqarput. Tammaarsimasut tamarmik, arnat, meeqqat Levikkuusullu ilanngullugit, katillutik 3 millionit sinneqarsimassagunarput.

Kisitsisoqareermat Israelikkut naggueqatigiikkuutaarlutik ingerlaaleraangamik najoqqutassaannik, Levikkut pisussaaffii illernartuummilu kiffartuussineq pillugit sukumiisunik, nappaateqarneq pissutigalugu immikkut inissiisarnermik aalajangersakkanik, sinnganeq nasiræeritullu neriorsuutit pillugit eqqartuussinermi inatsisinik paasitinneqarput. Kapitali 7-imi pilliiviup illernartinneqarnerani naggueqatigiinni naalagaasut pilliutaannut tunngasunik paasissutissaqarpoq, kapitali 9-milu poorskisiortarneq sammineqarpoq. Katersuussimasut aamma tammaartarneq aallarnialertarnerallu pillugit ilitsersorneqarput.

Allassimaffinnut apeqqutit akineqartut:

2:1, 2 — Naggueqatigiikkuutaat inoqajuitsumi „tammaartassapput katinngatigisamik eqqaani“, ’katinngatit’ taakku suuppat? Biibilimi nassuiarneqanngilaq katinngatit taakku suunersut. Assersuutitulli illernartutut upperisarsiornermulluunniit pingaarutilittut isigineqanngillat. Katinngatit taakku iluaqutigalugit tammaarsimaffimmi sorlermiinnerlutik paasisarpaat.

5:27 — Nuliaasup allasiorsimasup ’siffiaasa pullaarikkunnaariartortussaanerat’ qanoq paasisariaqarpa? Tassani ’siffissat’ kinguaassiuutinut assersuutaapput. ’Pullaarikkunnaariartorpata’ naartulernissaq ajornassaaq.

Ilinniarfigisinnaasavut:

6:1-7. Nasiræerit viinnisorsinnaatitaanatillu imigassartorsinnaatitaanngillat, taamaaliussagunik imminut naaggaarsinnaasariaqarput. Nutsatik tallisiinnartariaqarpaat — tamannalu Jehovamut naalatsigitinnermut assersuutaavoq, arnat uiminnut ataataminnulluunniit naalatsigitinnerattulli. Nasiræerit minguitsuujuartariaqarput toqusup, allaat qanigisamik, timaanut qanilinnginnermikkut. Ullumikkut piffissaq tamaat kiffartortut imminnut naaggaartarput Jehovamut  aaqqissuussineranullu naalatsigitillutik. Ilaat nunani ungasissuni kiffartorput, taamaattumillu qanigisap ilisaaneranut immaqa angerlarnissaq ajornakusoorsinnaasarluni ajornarluinnarsinnaalluniluunniit.

8:25, 26. Kiffartorneq eqqortumik naammassineqarsinnaaqqullugu utoqqalinerallu eqqarsaatigalugu Levikkut utoqqalilersut pinngitsooratik kiffartortussaanerminnit tunuaqquneqarput. Levikkoqatitilli kiffartorneranni nammineq kajumissutsiminnik suli ikiorsinnaavaat. Ullumikkut Guutip naalagaaffianik oqaluussisartut utoqqalinertik pissutigalugu kiffartornermit tunuarsinnaanngikkaluartut, inatsimmi tamatumani najoqqutassiaq pingaaruteqartoq ilinniarfigisinnaavarput. Kristumiup utoqqalineq pissutigalugu pisussaaffiit ilaat naammassisinnaajunnaarunigit, kiffartoriaatsit allat nukissaqarfigisani immaqa peqataaffigisinnaavai.

INOQAJUITSUMI ANGALAARTUARNEQ

(4 Mosesi 10:11–21:35)

Nuiaq toqqup inissiffianit kiisami qangattarmat, Israelikkut ingerlaalerput naggataatigullu ukiut 38-t qaammallu ataaseq marlulluunniit qaangiummata Moabip narsartai inoqajuitsuusut tikippaat. Atuagassiaaqqami „Det gode land“-imi, Jehovap Nalunaajaasuinit saqqummersinneqartumi, nunap assingani qupperneq 9-miittumi ingerlaarnerat malinnaaffigigukku iluaqutigissavat.

Kadeshimut, Paranip inoqajuitsuaniittumut, angalaartillutik inuiaqatigiit minnerpaamik pingasoriarlutik naammagittaalliorput. Naammagittaalliorneq siulleq unitsinneqarpoq inuit ilaat innermit Jehovameersumit nungunneqarmata. Kingusinnerusukkut Israelikkut neqitorusullutik naammagittaalliulerput, Jehovallu aqissiusarsuarnik tunivai. Mirjami Aronilu Mosesi assuaralugu oqalulerput tamannalu Mirjamip pupissunngorallarneranik kinguneqarpoq.

Kadeshimi tammaarsimatillutik, Mosesip angutit aqqaneq-marluk aallartippai nunamik neriorsuutigisamik alapernaarsuiartortillugit. Ullut 40-t qaangiummata uterput. Alapernaarsuisut ilaat qulit isumalluarnanngitsumik nalunaarutaat upperalugu inuit Mosesi, Aroni alapernaarsuisullu aalajaatsut Josva Kalebilu ujaqqanik milloorlugit toqukkumalerpaat. Jehovap inuit nappaammik toqoraataasumik eqqorniarpai, Mosesilli Jehova isumakkeerfiginneqquaa, Guutilu nalunaarpoq inuit ukiuni 40-ni inoqajuitsumi angalaassasut — inuit kisinneqarsimasut toqunissaat tikillugu.

Jehovap aalajangersakkanik allanik tunivai. Kora allallu Mosesimut Aronimullu pikitsitsilerput, pikitsitsisulli innermit nungutinneqarput nunamilluunniit iineqarlutik. Aqaguani Israelikkut tamarmik Mosesimut Aronimullu naammagittaalliorput. Tamatuma kingunerisaanik perluk Jehovameersoq nalliummat 14.700-t toqupput. Guutip Aronip ajaappiaa sikkersippaa tamarmik paasiniassammassuk kina palasiunertut qinersimagini. Tamatuma kingorna Jehova nutaanik inatsisiliorpoq Levikkut suliassaat inuillu minguiarnissaat pillugit. Ussiup arnavissap aappalaartup arsakui Jiisusip pilliutissaa aqqutigalugu minguiarnissamut siumut assersuutitut atorneqarput. — Hebræerit 9:13, 14.

Israelikkut Kadeshimut uterput, tassanilu Mirjami toquvoq. Inuit Mosesimut Aronimullu naammagittaallioqqilerput.  Tamatumuuna imissaaleqineq pissutaavoq. Mosesip Aronillu tupinnartuliornikkut imeq puilalersillugu Jehovap aqqa illernartinngitsooramikku, nuna neriorsuutigisaq iserfigisinnaajunnaarpaat. Israelikkut Kadesh qimappaat Aronilu qaqqami Horimi toquvoq. Edomi avaqqullugu ingerlatillutik Israelikkut qasullutik Guutimut Mosesimullu naammagittaalliulerput. Jehovap pillarlugit pulateriaarsuit toqunartullit inuit akornannukartippai. Mosesip qinnuteqqippai isumakkeerfigeqqullugit, Guutillu kanngussammik pulateriaarsuusalioqquaa nappakkamut ivertitassaanik. Pulateriaarsunnit kiineqartut pulateriaarsuusiaq qiviaraangamikku ajorunnaartarput. Pulateriaarsuusiaq uagut naassaanngitsumik iluaqutissatsinnut Jiisusi Kristusip kikiattugaaneranut assersuutigineqarpoq. (Johannesi 3:14, 15) Israelikkut Amorikkut kunngii Sihoni Ogilu ajugaaffigaat nunagisaallu tiguarlugu.

Allassimaffinnut apeqqutit akineqartut:

12:1 — Sooq Mirjami Aronilu Mosesimut naammagittaalliorpat? Naammagittaalliornerat Mirjamip pissaaneqarnerorusunneranik pissuteqarunarpoq. Mosesip nuliata Sipporap Mosesi ornillugu inoqajuitsumukarmat, immaqa Mirjamip tammaarsimaffimmi arnatut pingaarnerpaatut isigineqarunnaarnissani isumakuluutigilersimavaa. — 2 Mosesi 18:1-5.

12:9-11 — Sooq Mirjami kisimi pupissunngorpa? Taanna naammagittaallioqqaartuusimassagunarpoq Aronilu naammagittaallioqataalersissimassagunarlugu. Aronip eqqortumik isiginnittaaseqarluni eqqunngitsuliornini nassuerutigaa.

21:14, 15 — Mappersakkat suut uani eqqaaneqarpat? Biibilimi mappersakkat assigiinngitsut arlallit eqqaaneqarput Biibilimik allattunit paasiniaaffittut atorneqartut. (Josva 10:12, 13; 1 Kunngit 11:41; 14:19, 29) ’Jehovap Sorsunnerinik Mappersakkat’ taamaattuusimapput. Tassani Jehovap innuttaasa sorsunnerinik oqaluttuat allanneqarsimapput.

Ilinniarfigisinnaasavut:

11:27-29. Allat Jehovamik kiffartornermi immikkut pisinnaatitaaffeqaleraangata qanoq qisuariartarnissatsinnut Mosesi maligassaalluarpoq. Sinngalluni nammineq ataqqinaatissani piniarnagu, Mosesi nuannaarpoq Eldadi Medadilu pruffiitisut iliuuseqalermata.

12:2, 9, 10; 16:1-3, 12-14, 31-35, 41, 46-50. Jehovap kissaatigaa pallorfiginnitsimi oqartussaassuseq Guutimeersoq ataqqissagaat.

14:24. Silamiut eqqunngitsuliornissamut kimigiisernerat akiussagaanni ’allaasumik anersaaqarneq’ imaluunniit eqqarsariaaseqarneq immikkut pingaaruteqarpoq. Silarsuup inuisa eqqarsariaasiannit allaanerulluinnartariaqarpoq.

15:37-41. Israelikkut atisaasa nivingataasa immikkut ittut eqqaasissavaat inuiaqatigiittut Guutimik pallorfiginninnermut inatsisaasalu naalannissaannut immikkoortitaanerannik. Uaguttaaq Guutip najoqqutassiai maleruassannginnerpavut silarsuullu inuinit allaanerulluta?

MOABIP NARSARTAANI

(4 Mosesi 22:1–36:13)

Israelikkut Moabip narsartaani tammaarsimalermata Moabikkunnit siooragineqangaalerput. Taamaattumik Moabikkut kunngiata Balakip  Bileami Israelikkunnik perloqqusinissamut akilerumavaa. Jehovalli Bileami Israelikkunnik pilluaqqusitippaa. Moabikkut Midjanikkullu arnartaat angutit Israelikkuusut kanngunartuliornissaannut guutipilussiornissaannullu nakutitsiniaatinneqarput. Tamatuma kingunerisaanik Jehovap eqqunngitsuliortut 24.000-it nungutippai. Naggataatigut Pinehasip Jehova pillugu ilungersungaarnini ersersimmagu perluk atuukkunnaarpoq.

Inunnik kisitsinerit aappaata takutippaa angutit kisitsinermi siullermi kisinneqartut tamarmik, Josva Kalebilu kisimik pinnatik, toqoreersut. Josva Mosesip kingoraartaatut toqqarneqarpoq. Pilliutit assigiinngitsut pillugit Israelikkut ajoqersorneqarput qanorlu uppernarsaasarsinnaanerannik siunnersorneqarlutik. Israelikkut Midjanikkunnut akiniaapput. Rubenikkut, Gadikkut Manassellu naggueqatigiissortaasa affaat Jordanip kangiani nunasipput. Israelikkut Jordanikkut qanoq ikaassanersut nunamillu qanoq tiguaassanersut ilitsersorneqarput. Nunap killeqarfissai sukumiisut aalajangerneqarput. Nunaatit kingornuttaqattaagassat immeraannikkut agguaanneqassapput. Levikkut 48-nik illoqarfeqalerput, taakkualu ilaat arfinillit qimarnguffiusussaapput.

Allassimaffinnut apeqqutit akineqartut:

22:20-22 — Sooq Jehovap Bileami kamaatingaarpaa? Jehovap pruffiiti Bileami oqarfigisimavaa Israelikkut perloqqussanngikkai. (4 Mosesi 22:12) Taamaattoq pruffiitip Balakip angutitai ingiaqatigai Israelikkut perloqqunissaat siunertaralugu. Bileami Moabikkut kunngiannut iluarisaajumavoq taassumanngalu akilerneqarumalluni. (2 Petrusi 2:15, 16; Judasi 11) Allaat Bileami Israelikkunnik perloqqusinani pinngitsaalineqarluni pilluaqqusitinneqarami, kunngimut iluarisaajumalluni siunnersuutigaa arnat Ba’alisiortut angutinik Israelikkuusunik kanngunartuliortitsiniarsarissasut. (4 Mosesi 31:15, 16) Tassa Guutip Bileamimik kamaassineranut pissutaavoq pruffiitip soqqusaatsumik piumatuujunera.

30:7-9 — Uiusup kristumiup nuliami uppernarsaatai atorunnaarsissinnaavai? Uppernarsaaneq eqqarsaatigalugu Jehovap maannakkut pallorfiginnitsini inuttut ataasiakkaatut soqutigai. Assersuutigalugu Jehovamut tunniulluinnarneq tassaavoq inuup nammineq uppernarsaanera. (Galatiamiut 6:5) Uiusoq uppernarsaanerup taamaattup atorunnaarnissaannut oqartussaassuseqanngilaq. Nuliaasorli Guutip oqaasianut uiminulluunniit pisussaaffigisaminut akerliusumik soorunami uppernarsaassanngilaq.

Ilinniarfigisinnaasavut:

25:11. Pinehasip Jehovamut kiffartornermi aallussilluartuunera uagutsinnut maligassaalluarpoq! Ilagiit minguitsuujuarnissaat kissaatigigatsigu sualuttumik inuunerluttumik ilisimasaqarutta utoqqaanertanut kristumiunut nalunaarutigisariaqarparput.

35:9-29. Piaarinani toqutsisoq angerlarsimaffini qimallugu illoqarfimmut qimarnguffimmut qimaasussaammat tassaniiginnarallartussaammallu, paasivarput inuuneq illernartuusoq pingaartinneqartariaqartorlu.

35:33. Nuna pinngitsuusut aavannik illernartuujunnaartinneqarsimasoq aatsaat toqutsisut toqumik pillarneqarpata nunap saammaannarsissutigisinnaavaa. Taamaattumik paasinarluarpoq Jehovap ajortut piuneeruteqqaarlugit nunarsuaq paratiisinngortissinnaammagu! — Ussatit 2:21, 22; Danieli 2:44.

Guutip oqaasia sunniisinnaassuseqarpoq

Jehova taassumalu innuttamini akisussaaffeqartitai ataqqisariaqarpavut. Ilumoortoq tamanna Mosesimik allakkat sisamaat-ni erseqqissarluinnarneqarpoq. Ullumikkullu ilagiinni eqqisseqatigiittuarnissap ataasiussuseqartuarnissallu eqqaamanissaa pingaaruteqarpoq!

Mosesimik allakkat sisamaat-ni oqaluttuarineqartunit paasivarput anersaakkut ittunik pingaartitsiunnaartut qanoq eqqunngitsulioriaannaatiginerat, assersuutigalugu naammagittaalliornikkut, inuunerlunnikkut guutipilussiornikkulluunniit. Biibilip atuagartaani tamatumani pisimasut ilinniutissallu ilaat Jehovap Nalunaajaasuisa ilagiivini kiffartornermik ataatsimiinnermi ilagiit pisariaqartitaannut ilanngullugit saqqummiunneqarsinnaapput. Ilumut, „Guutip oqaasia uumavoq sunniisinnaassuseqarlunilu“. — Hebræerit 4:12.  (wE 8/1 04)

[Qupp. 30-mi assiliartaq]

Toqqup qulaagut tupinnartuliornikkut nuiaqartitsilluni, Jehovap Israelikkut qaqugukkut tammaartarnissaat aallarnialertarnissaallu paasitittarpaa

[Qupp. 31-mi assiliartat]

Jehova naalattariaqarparput, naatsorsuutigaalu akisussaaffeqartitani ataqqissagivut