Jehova, ’pallittaalisarput ulluni annikilliornartuni’

„[Jehova] tassaassaaq qunutitaasut pallittaalisaat, pallittaalisaq ulluni annikilliornartuni.“ — TUSSIAAT 9:10.

1, 2. (a) Jiisusip ajoqersukkani sumik qinnuppai? (b) Guutip innuttaminut suna piumasaraa?

JEHOVA ajugaqanngitsuuvoq. Pallorfiginnitsiminik ilumoortunik qanorluunniit ittumik illersuerusukkuni taamaaliornissamut pissaaneqarpoq. Allaat innuttani silarsuarmit immikkoortissinnaagaluarpai toqqissisimanartunik eqqissisimanartunillu avatangiiseqalersillugit. Ajoqersukkanili pillugit Jiisusi Ataataminut qilammiusumut ima qinuvoq: „Qinnutinngilakka silarsuarmit peerseqqullugit, paareqqullugilli ajortumut peqqunagit [ajortoq pissutigalugu, NV].“ — Johannesi 17:15.

² Jehova aalajangersimavoq ’silarsuarmit peersinniarnata’. Piumasaraami silarsuarmi inuit akornanni inuunissarput neriuummik tuppallersaammillu tusarliusani taakkununnga oqaluussissutiginiassagatsigu. (Romamiut 10:13-15) Silarsuarmili maani inuugatta Jiisusip qinnutimini oqaatigitsiagaatut ’ajortup’ sunniinera misigisarparput. Inuit naalasseriitsut anersaallu ajortut ersiortitsingaarlutilu anniartitsingaartarput, kristumiullu naalliuutinit eqqortiuitsuunngillat. — 1 Petrusi 5:9.

3. Jehovamut kiffaasut aalajaatsut allaat qanoq misigisaqartarpat, Guutilli oqaasiani qanoq tuppallersarneqarpugut?

³ Taamatut misilinneqartilluni nikallortoortarneq pissusissamisuuinnarpoq. (Ussatit 24:10) Angutit arnallu aalajaatsut aliasuutinik isumakuluutinillu nalaataqartut pillugit Biibilimi oqaluttuarpassuaqarpoq. „Iluartoq ajunaarnernik amerlasuunik eqqorneqartarpoq, [Jehovalli] tamakkunannga tamanit annaattarpaa,“ tussiaasiortoq allappoq. (Tussiaat 34:20) Aap, allaat „iluartoq“ atugarliuuteqartarpoq. Tussiaasiortoq Daavi assigalugu allaat ’sequmisitaallutalu nukeerusinnaasarpugut’. (Tussiaat 38:9) Taamaakkaangatta tuppallernartarpoq nalunagu ’[Jehovap] qanikkai sequmissimasumik uummatillit, annaattaraalu aserortersimasumik anersaallit’. — Tussiaat 34:19; 94:19.

4, 5. (a) Ussatit 18:10 naapertorlugu Guutip illersuinera iluaqutigissagutsigu qanoq iliortariaqarpugut? (b) Guutimit ikiorneqarumagutta aalajangersimasut suut iliuuserisariaqarpavut?

⁴ Jiisusip qinnutaanut naapertuuttumik Jehovap ilumut paarisarpaatigut. Taanna ’pallittaalisaraarput  ulluni annikilliornartuni’. (Tussiaat 9:10) Ussatit-ni oqariartaaseq assingusoq atorneqarpoq: „[Jehovap] aqqa pallittaalisap napasuliaatut ippoq, iluartoq tassunga qimaanasuartarpoq isumannaatsumilu inissittarluni.“ (Ussatit 18:10) Allassimaffik taanna Jehovap pinngortitaminut asannittumik isumassuinera pillugu sallusuissummik tunngaviusumik imaqarpoq. Ingammik iluartut iliuuseqarlutik imminut qimarnguffissarsiortut illersortarpai, soorlu napasuliamut qajannaatsumut qimaanasuartut.

⁵ Ilungersunartunik ajornartorsiuteqaraangatta Jehovamut qanoq illersortinniarsinnaavugut? Jehovamit ikiorneqassagutta iliuuserisariaqakkavut pingasut pingaarutillit misissoriartigit. Siullermik Ataatatsinnut qilammiusumut qinunikkut saaffiginnittassaagut. Aappassaanik anersaavanut illernartumut naapertuuttumik iliuuseqartassaagut. Pingajussaanillu uppeqatitsinnik kristumiunik, aliasunnitsinni annikilliornitsinnilu ikiuisinnaasunik, peqateqartarnikkut Jehovap aaqqissuussinera akuerissavarput.

Qinunerup kiminga

6. Kristumiut ilumoortut qinuneq qanoq isigaat?

⁶ Peqqissutsimik ilisimasallit ilaasa qinuneq isumatsassimangaarnermut stressernermullu nakorsaatitut innersuussutigisarpaat. Soorunami ilumoortortaqarsinnaavoq qinunermut eqqaanartumik nipaatsumiilluni eqqarsarneq stressernermut iluaqutaasinnaasoq, aammali pinngortitarsuarmi nipit ilaat allaallu tunukkut tagiartortinneq taamatut oqaatigineqarsinnaapput. Kristumiut ilumoortut qinuneq suusupagisassatut stresserunnaarutissaannartut isiginngilaat. Qinunerli Pinngortitsisitsinnut ataqqinnittumik attaveqaatitut isigaarput. Qinuneq Guutimik asanninnitsinnut tatiginninnitsinnullu atassuteqarpoq. Aap, qinusarneq pallorfiginninnitta ilagaa.

7. Tatiginnilluni qinuneq qanoq isumaqarpa, qinnutillu taamaattut aliasuutitta isumakuluutittalu naammagalugit atornissaannut qanoq iluaqutigisinnaavavut?

⁷ Qinnutivut Jehovamik tatiginninnermut ersiutaasariaqarput. Apustili Johannesi allappoq: „Mannaavoq taassuma saavani nakimanngissutigisarput: Piumasaminut naapertuuttumik qinnuigigutsinni tusarumaaraatigut.“ (1 Johannesi 5:14) Takorlooriassagit Jehovap, tamanit qutsinnerussaartup kisimilu Guutiusup ajugaqanngitsup, kiffami qamannga pisumik qinnutaat immikkut maluginiartarai. Isumakuluutitsinnik ajornartorsiutitsinnillu avitseqatigigaangatsinni Guutitta asannittup tusartaraatigut tamatuminnga ilisimanninnerinnaluunniit tuppallersaataasarpoq. — Filippimiut 4:6.

8. Sooq kristumiut ilumoortut Jehova qinunikkut saaffigigaangamikku kanngusuuteqanngisaannartariaqarlutillu ajukkutinngisaannartariaqarpat?

⁸ Kristumiut ilumoortut Jehova qinunikkut saaffigigaangamikku kanngusuuteqanngisaannartariaqarput, ajukkutinngisaannartariaqarput tatiginnittuusariaqarlutillu. Nassuerutigineqartariaqarpoq imminut pakatsissutigigaangatta  ajornartorsiutinilluunniit nanertuuteqaraangatta immaqa tamatigut Jehova qinunikkut qanillerusuttanngikkipput. Taamaattoqartilluguli eqqaamassavarput, Jehovap ’innuttani ikiortariallit nallittortarai’, aamma ’nikallortut tuppallersartarai’. (Esaja 49:13; 2 Korinthimiut 7:6) Ersioraangatta isumatsakkaangattalu Ataatatsinnut qilammiusumut pallittaalisatsitut qimarngunissarput immikkut pisariaqartittarparput.

9. Guutimut qinunitsinnut atatillugu upperneq qanoq pingaaruteqartarpa?

⁹ Qinusinnaatitaanerput tamakkiisumik iluaqutiginiarutsigu upperluartuusariaqarpugut. Biibilimi allassimavoq: „Guutimut pisup upperisariaqarpaa taanna tassaareersoq ujarlersinilu akissarsisissagai.“ (Hebræerit 11:6) Guutimik upperinninneq taassuma ’piuneranik’ upperinninnerinnaanngilaq. Guuti naalallugu inuugutta taassuma uagutsinnik akiliisinnaaneranik akiliiumaarneranillu qularuteqanngilluinnarneq uppernermut ilumoortumut ilaavoq. „[Jehovap] isaasa sammivigaat iluartut, ikioqqullutik nillianerat siutaasa tusartarpaat.“ (1 Petrusi 3:12) Jehovap asannittumik uagutsinnik isumassuinera maluginiartuartarutsigu qinnutivut isumaqarnerungaassapput.

10. Jehovamit anersaakkut nakussatsinneqarusukkutta qinnutivut qanoq ittuusariaqarpat?

¹⁰ Uummatikkut iluunngarluta qinugaangatta Jehovap qinnutivut tusarnaartarpai. Tussiaasiortoq allappoq: „Uummatikkut iluunngarlunga torlulavunga, akinnga [Jehova].“ (Tussiaat 119:145) Upperisarsioqatigiippassuit ileqqulersuutigalugu qinusarnerattut uagut qinusanngilagut, eqqarsaatigalugu soqutigalugulu qinusarpugut. Jehovamut ’uummatikkut iluunngarluta’ qinugaangatta oqaatsivut peqqusersuitsuullutillu imaqarluartuusarput. Taamatut qamannga pisumik qinoreeraangatta malugisarparput ’nanertuutigisatsinnik Jehovamut tunniussinerup’ qanoq oqiliallannartartiginera. Biibilimi neriorsuutigineqartutut ’isumagiumaarpaatigut’. — Tussiaat 55:23; 1 Petrusi 5:6, 7.

Guutip anersaava ikiortigaarput

11. Ikiuinissaa ’qinnutigiuaraangatsigu’ Jehovap qanoq ilaatigut akisarpaatigut?

¹¹ Jehovap qinnutit tusaannartanngilai, aammali akisarpai. (Tussiaat 65:3) Daavi allapoq: „Ullormi annikilliorfinni torlorfigissavakkit, akiumaaramma.“ (Tussiaat 86:7) Tamatumunnga naapertuuttumik Jiisusip ajoqersukkani kajumissaarpai Jehovap ikiuinissaa ’qinnutigiuassagaat’, ’Ataatap qilammiittup imminut qinusut Anersaamik Illernartumik tuniumaarmagit’. (Lukasi 11:9-13) Aap, Guutip pissaanera sulissutiginnittoq innuttaanut ikiortaavoq, imaluunniit tuppallersaasuuvoq. — Johannesi 14:16.

12. Ajornartorsiutit mersernarpasikkaangata Guutip anersaava qanoq iluaqutigisinnaavarput?

¹² Allaat misilinneqaraangatta Guutip anersaavagut „pissaaneq asseqanngitsoq“ pisinnaavarput. (2 Korinthimiut 4:7) Apustili Paulusi ilungersunartorsiortarsimaqisoq tatiginnilluni oqarpoq: „Tamaasa pissatsitsisikkut atussallugit sapinngilakka.“ (Filippimiut 4:13) Ullumikkut kristumiorpassuit misigisimapputtaaq anersaakkut misigissutsikkullu nukissaqarnerulerlutik Guutip qinnutitik akimmagit. Guutip anersaavanit ikiorneqaraangatta ajornartorsiutit sualuttut mersernannginnerulersutut ittarput. Nukik Guutimit pisarput pissutigalugu apustilip oqarneratut oqarsinnaavugut: „Tamatigut annikilliortitaasarpugut mattunneqaratali. Nalornisarpugut neriuutissaaruttarnatali. Qinugineqartarpugut ilaginnaannagaasarnatali, orlutitaasarpugut suujunnaarsitaanatali.“ — 2 Korinthimiut 4:8, 9.

13, 14. (a) Oqaatsini Biibili aqqutigalugu Jehova uagutsinnut qanoq pallittaalisaasarpa? (b) Biibilimi najoqqutassianik maleruaanerit qanoq iluaqutigisarpiuk?

¹³ Aamma anersaaq illernartoq atorlugu Guutip oqaasia allassimasoq uagut iluaqutissatsitut isumassarsiarititaallunilu tammatsaalineqarpoq. Oqaatsini Biibili aqqutigalugu Jehova ulluni annikilliornartuni uagutsinnut qanoq pallittaalisaasarpa? Ilaatigut taamaaliortarpoq atoriaannaasumik ilisimassuseqalersilluta eqqarsarsinnaassuseqalersillutalu. (Ussatit 3:21-24) Biibilip sianissuseqarnerulersillutalu silatusaarluta iliuuseqarsinnaanerulersittarpaatigut. (Romamiut 12:1) Guutip oqaasia aalajangersimasumik atuarlugulu atuaqqissaartarutsigu ilikkakkavullu maleruartarutsigit taava ’ajunngitsumik ajortumillu immikkoortitsisinnaalissaagut’. (Hebræerit 5:14) Immaqa nammineq misigisimassavat  ajornartorsiorfinni Biibilimi najoqqutassiat silatusaartumik aalajangiinissannut iluaqutigisarlugit. Ajornartorsiutinut ilungersunartunut silatusaartumik aaqqiissutissarsinissamut Biibili atorlugu silassorissuseqalertarpugut. — Ussatit 1:4.

¹⁴ Guutip oqaasia aamma allamik nukissaqalersitsisartumik imaqarpoq, tassa annaanneqarnissamik neriuut. (Romamiut 15:4) Biibilimi oqaluttuarineqarpoq pissutsit ajortut ingerlaannassanngitsut, taamaattumik sunilluunniit annikilliuuteqaraluarutta annikilliuutivut atuukkallaannarput. (2 Korinthimiut 4:16-18) ’Neriuutigaarput inuuneq naassaanngitsoq Guutip sallusuitsup itsarsuarli neriorsuutigisimasaa.’ (Titusi 1:2) Neriuut taanna nuannaarutigisarutsigu siunissarlu qaamasoq Jehovap neriorsuutigisaa eqqarsaatigiuartarutsigu annikilliornitsinni pinertusaarsinnaavugut. — Romamiut 12:12; 1 Thessalonikamiut 1:3.

Ilagiit — Guutip asanninneranut ersiut

15. Qanoq ilillutik kristumiut kristumioqatiminnut pilluaqqussutaasinnaappat?

¹⁵ Aaqqiissuussaq Jehovameersoq alla ulluni annikilliornartuni iluaqutigisinnaasarput tassaavoq ilagiinni kristumiuni peqatigiinneq. Biibilimi allassimavoq: „Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.“ (Ussatit 17:17) Guutip oqaasiani ilagiinniittut tamarmik ataqqeqatigeeqqullugit asaqatigeeqqullugillu kajumissaarneqarput. (Romamiut 12:10) „Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk,“ apustili Paulusi allappoq. (1 Korinthimiut 10:24) Taamatut isiginnittaaseqarutta allat pisariaqartitaat pingaarnerutissavavut, uagut ajornartorsiutivut pinnagit. Allanut iluaqutaagaangatta taakku ikiuinnarnagit aamma nuannaalersarpugut nalerisimaalersarlutalu, uagullu nammineq nanertuutigisavut oqiliallattarput. — Apustilit Suliaat 20:35.

16. Kristumiut ataasiakkaat tamarmik allanut qanoq qiimmassaataasinnaappat?

¹⁶ Angutit arnallu anersaakkut inersimalluartut allanik nakussatsitsinermi pingaaruteqartorujussuusinnaapput. Taamaaliorsinnaassagunilli saaffigiuminartuullutillu ikiuuteriaannaasariaqarput. (2 Korinthimiut 6:11-13) Ilagiinnut nuannaarutaasaqalunilu iluaqutaasaqaaq inuusuttunik nersualaarinissamut, nutaanik nakussatsitsinissamut nikallungasunillu qiimmassaanissamut tamarmik piffissaqarfiginnikkaangata. (Romamiut 15:7) Qatanngutigiittut asaqatigiinneq immitsinnut pasillerumatuujunnginnissamut iluaqutigissavarputtaaq. Isummerniapallattassanngilagut inuttut ajornartorsiuteqarneq anersaakkut sanngiitsuunermut ersiutaasoq. Kristumiut ’ernumasunik tuppallersaaqqullugit’ Paulusip naleqqulluartumik kajumissaarpai. (1 Thessalonikamiut 5:14) Biibilimi ersersinneqarpoq allaat kristumiut aalajaatsut inuttut sanngiissutit pissutigalugit annikilliuuteqartartut. — Apustilit Suliaat 14:15.

17. Qatanngutigiissuarni kristumiuni ataasiussuseqarnerup nakussatsinnissaanut sunik periarfissaqarpugut?

 ¹⁷ Kristumiut ataatsimiinnerini tuppallersaqatigiinnissamut qiimmassaqatigiinnissamullu periarfissaqarluartarpugut. (Hebræerit 10:24, 25) Ataatsimiinnerniinnaanngitsorli Guutip innuttai taamatut asaqatigiittarput. Aamma persuarsiornanngitsumik qiimmassaqatigiinniartarpugut. Attaveqatigiilluareertaratta ajornartorsiuteqaleraangat ikioqatigiipallattarpugut tapersersoqatigiippallattarlutalu. Apustili Paulusi ima allappoq: „Guutimiuna timimik katiterisimasoq . . . timimi akerleriinneqaqqunagu avatilli . . . isumassoqatigeeqqullugit. Avat ataaseq naalliukkaangat avatit tamarmik naallioqatigisarpaat, aamma avat ataaseq ataqqinartinneqaraangat avateqataasa nuannaaqatigisarpaat.“ — 1 Korinthimiut 12:24-26.

18. Nikallungagaangatta qanoq misiginaveersaartariaqarpugut?

¹⁸ Ilaannikkut immaqa uppeqatitsinnik kristumiunik peqateqarnissamut nikallungavallaarsorisarpugut. Misigissutsilli taamaattut akiortariaqarpavut, akiunngikkutsigimmi uppeqativut uagutsinnik ikiuinngitsoortillugillu tapersersuinngitsoortissavavut. Biibilimi ima mianersoqqussuteqarpoq: „Avissaarisup kissaatigisaannani piniartarpai; ilisimassut piviusorsiortoq sunaluunniit soqutiginagu ingerlaannartarpoq.“ (Ussatit 18:1, NV) Guuti uagutsinnik isumassuisarpoq qatanngutivut aqqutigalugit. Ilagiinnik asannittumik aaqqissuussineq qujamasuutigigutsigu ulluni annikilliornartuni ikiortisarsissaagut.

Isumalluartumik isiginnittaaseqartuaannarit

19, 20. Allakkat ajortunik eqqarsaateqannginnissatsinnut qanoq iluaqutaappat?

¹⁹ Nikallungagaanni aliasukkaannilu ajortunik eqqarsaateqaqqajaanartarpoq. Ajornartorsiuteqaraangamik ilaasa immaqa anersaakkut ittunik pingaartitsisuunertik qularilersarpaat isummertarlutillu annikilliuutitik Guutip iluarinninnginneranut ersiutaasut. Eqqaamajulli Jehova kimilluunniit ajortumik misiliisanngitsoq. (Jaaku 1:13) „[Guutip] inuit naalliutsittanngilai qunutittarnagillu uummammit pisumik,“ Biibilimi allassimavoq. (Upputit 3:33) Kiffanili naalliuuteqaraangata Jehova aliasungaartarpoq. — Esaja 63:8, 9; Zakaria 2:12.

²⁰ Jehova tassaavoq „Ataataq nallittuisoq Guutilu tuppallersaajuartoq“. (2 Korinthimiut 1:3) Isumassortarpaatigut, piffissarititanilu nalliuppat akitsisissavaatigut. (1 Petrusi 5:6, 7) Guutip uagutsinnut tunniusimanera maluginiartuarutsigu, tamanna isumalluartumik isiginnittaaseqartuarnissamut, aap, allaat nuannaartuunissamut, iluaqutigissavarput. Jaakku ima allappoq: „Qatanngutikka, tamalaanik misilinneqartarnisi nuannaarutigiinnartassavasi.“ (Jaaku 1:2) Sooq? Ima akivoq: „Misilinneqarninimi attakkuniuk piumaaramiuk ajugaasumut niaqorusiussassaq inuussutaasoq Guutip asasiminut neriorsuutigisaa.“ — Jaaku 1:12.

21. Qanorluunniit ittunik ajornartorsiuteqaraluarlutik Guutimut aalajaatsut taassumannga qanoq neriorsoqqissaarneqarpat?

²¹ Soorlu Jiisusip mianersoqquaatigut silarsuarmi annikilliuuteqarpugut. (Johannesi 16:33) Biibilimili neriorsuuteqarpoq ’naalliunnartut, qinugisaanerup, kaannerup, tamaqanngitsuunerup navianartorsiortitaanerullu’ suulluunniit Jehovap taassumalu ernerata asannissusiannit avissaartissinnaanngikkaatigut. (Romamiut 8:35, 39) Tuppallernaqaaq nalunagu sunilluunniit annikilliuuteqaraluarutta annikilliuutivut atuukkallaannartut. Tamatta naalliuutaarunissatta tungaanut Ataatatta asannittup, Jehovap, paarisarpaatigut. Taassumunnga illersortinniarutta taanna tassaassaaq „qunutitaasut pallittaalisaat, pallittaalisaq ulluni annikilliornartuni“. — Tussiaat 9:10.

Suna ilikkarpiuk?

• Silarsuarmi ajortumi matumani inuutillutik kristumiut sunik misigisaqartarnissartik naatsorsuutigisariaqarpaat?

• Misilinneqaraangatta qamannga pisumik qinnutivut qanoq nakussatsissutigisinnaavavut?

• Guutip anersaava qanoq ililluni ikiortaasarpa?

• Ikioqatigiinniarluta qanoq iliorsinnaavugut?

[Atuaqqissaarnermi apeqqutit]

[Qupp. 24-mi assiliartaq]

Jehovamut qimarnguffissarsiortariaqarpugut soorlu napasuliamut qajannaatsumut qimaanasuartugut

[Qupp. 26-mi assiliartat]

Anersaakkut nukittuut periarfissani tamani allanik nersualaarisarput qiimmassaasarlutillu