Jehovap naalannassutsi maniguuttunut saqqummersittarpaa
Jehovap naalannassutsi maniguuttunut saqqummersittarpaa
„Qanilaarnerup [Maniguunnerup, NV] Guutimillu mianerinninnerup akissarsiarititaat tassaapput pisuussutit ataqqinaallu inuunerlu.“ — USSATIT 22:4.
1, 2. (a) Apustilit Suliaat-ni qanoq erserpa Stefanusi „uppernermik Anersaamillu Illernartumik ilumioqangaartoq“? (b) Stefanusip maniguuttuuneranut suna uppernarsaataava?
STEFANUSI angutaavoq „uppernermik Anersaamillu Illernartumik ilumioqangaartoq“. Aamma ’saammaannermik pissaanermillu ilumioqangaarpoq’. Jiisusip ajoqersugaasa siulliit ilaattut inuit akornanni angisuunik nalunaaqutiliortarpoq tupinnartuliortarlunilu. Ilaanni angutit ilaasa oqalliseqatiginiarpaat, „ilisimassuseqarlunili anersaaqarlunilu oqalummat assortorneq saperpaat“. (Apustilit Suliaat 6:5, 8-10) Oqaluttuami erserpoq Stefanusi Guutip oqaasia eqiasuilluni atuaqqissaartaraa, paasivarpullu nalimini upperisarsiornikkut siuttuusunut illersorluartaraa. Apustilit Suliaat kapitali 7-imi nalunaajaataa sukumiisoq atuarsinnaavarput, tassanilu erserpoq Jehovap siunertaata saqqummeriartorsimanera soqutigingaaraa.
2 Upperisarsiornikkut siuttuusut, inissisimaffitsik ilisimassusertillu pissutigalugit inuinnarnit pingaarnerusorisut, assiginagit Stefanusi maniguuttuuvoq. (Matthæusi 23:2-7; Johannesi 7:49) Naak Allakkat nalunngilluaraluarlugit, ’nerisassat isumaginissaat’ suliarissallugu nuannaarutigeqaa, apustilit ’qinoqatigiittarneq oqaaserlu kiffartuutiginissaat’ sammisarilluinnarniassammatigik. Stefanusi qatanngutit akornanni ajunngitsumik tusaamasaavoq, taamaattumillu arfineq-marluk iluarisaasut ullut tamaasa nerisassanik agguaanermik akisussaaffiliussat ilaattut qinerneqarpoq. Suliassaq tamanna maniguulluni akueraa. — Apustilit Suliaat 6:1-6.
3. Stefanusi qanoq Guutip ajunngissusianik pisassarinngisaraluamik nuanningaartumik uppernarsaavigineqarpa?
3 Stefanusip maniguunnera anersaakkullu ittunik pingaartitsinera assuarnaatsuuneralu Jehovap arajutsinngilai. Killisiuisoqatigiinni upperisarsiornikkut siuttuusut akeqqersimaartut nalunaajaaffigimmagit, assortuisut takuaat ’kiinaa soorlu tassa inngilip kiinaa’. (Apustilit Suliaat 6:15) Ima paasisariaqarpoq kiinaa Guutimit tusarliisup kiinaata isikkuatut isikkoqartoq, eqqissinermik, Guutimit naalannartumit Jehovameersumik, malunnaateqarluni. Qunusuilluni Killisiuisoqatigiinni ilaasortaasunut nalunaajaareerami Guutip ajunngissusianik pisassarinngisaraluamik nuanningaartumik uppernarsaavigineqarpoq. „Anersaamik Illernartumik ilumioqangaarluni qilannut aarlorsimavoq, takuaalu Guutip naalannassusia Jiisusilu Guutip talerpiata tungaani qeqartoq.“ (Apustilit Suliaat 7:55) Takorruugaq tupinnangaartoq Stefanusimut uppernarsaataavoq Jiisusi tassaasoq Guutip ernera Missiarsilu. Angutip maniguuttup taassuma tamanna nakussatsissutigaa, qularunnaarsinneqarporlu Jehovamit iluarineqarluni.
4. Jehovap naalannassutsi kikkunnut saqqummersittarpaa?
4 Soorlu Stefanusip takorruugaanit ersertoq, Jehovap naalannassutsi siunertanilu inunnut maniguullutik imminullu attaveqarnerminnik pingaartitsillutik Guutimik mianerinnittunut saqqummersittarpai. „Qanilaarnerup Guutimillu mianerinninnerup akissarsiarititaat tassaapput pisuussutit ataqqinaallu [imaluunniit: naalannassuserlu] inuunerlu.“ (Ussatit 22:4) Taamaattumik pingaaruteqarpoq paasillugu maniguunneq piviusoq sunaanersoq, qanorlu pissuseq pingaartoq tamanna ineriartortinnerusinnaaneripput qanorlu inuunitsinni tamatigut maniguuttuunerput iluaqutigisinnaanerlutigu.
Maniguunneq — Guutip pissusiisa ilaat
5, 6. (a) Maniguunneq sunaava? (b) Jehova qanoq maniguussimava? (c) Jehovap maniguunneranit qanoq sunnerneqartariaqarpugut?
5 Ilaasa immaqa tupigusuutigissavaat Jehova Guuti, qilammi nunamilu qutsinnerpaasoq naalannarnerpaasorlu, maniguunnermigut maligassaalluarnerpaasoq. Jehova saaffigalugu kunngi Daavi ima oqarpoq: „Tunivarma annaassissutinnik eqqortinnaveeqqutaasumik, talerpippit najummivaanga, ikiuinerpillu nakussassarpaanga [maniguunnerpillu pingaartunngortissavaanga, NV].“ (Tussiaat 18:36) Hebræerit ’maniguunnermut’ oqaasiat, Daavip tassani Jehovap pissuserisaa pillugu atugaa, oqaatsimik „sikippoq“-mik isumaqartumik naggueqarpoq. „Qanilaarneq“ aamma „atsissisinneq“ aamma tamatuminnga naggueqarput. Tassa Jehova maniguuppoq atsissisikkami Daavi naammalluinnanngitsoq samminiarlugu imminullu sinniisutut kunngitut ivertikkamiuk. Soorlu Tussiaat 18-imut qulequttap takutikkaa Jehovap Daavi illersorpaa ’aniguisillugulu akeraanit tamanit Saulillu assaanit’. Daavip nammineq nalunngilaa kunngitut qanorluunniit pingaartorsuanngortigissagaluaruni ataqqineqartigilissagaluarunilu, Jehovap maniguulluni atsissisittup ikiorniarluni akuliunnera tamatumunnga pissutaasoq. Tamatuminnga akuerinninnini Daavip maniguuttuaannarnissaminut iluaqutigaa.
6 Uagummi? Jehovap sallusuissummik paasitissimavaatigut, immaqa aamma peqatigiissortamigut kiffartornermi immikkut pisinnaatitaaffimmik tunisimavaatigut arlaatigulluunniit siunertami naammassineqarnissaanut atorsimalluta. Tamanna qanoq isigisariaqarparput? Maniguuttariaqannginnerpugut? Jehovap maniguunnera qujamasuutigisariaqarparput, imminullu pingaartinneq pinngitsoorani ajunaarutaasussaammat imminut pingaartinnaveersaartariaqarpugut,ilaa? — Ussatit 16:18; 29:23.
7, 8. (a) Manasse eqqarsaatigalugu Jehovap maniguunnera qanoq erserpa? (b) Jehova aamma Manasse qanoq maniguunnikkut uagutsinnut maligassaalluarpat?
7 Jehova inuit naammalluinnanngitsut sammisarlugit maniguutingaaginnarnani, aamma kajumilluni nikanartut naakkinnittuliorfigisarpai, allaat imminut maniguuttut makitittarlugit. (Tussiaat 113:4-7) Assersuutigalugu Judami kunngi Manasse eqqaasinnaavarput. Kunngitut immikkut pisinnaatitaaffini atornerlullugu nunami guutipilussiorneq siuarsarpaa, aap, „annertoqisumik [Jehovap] isaani ajortumik iliorpoq tamatumuunakkullu narrutsatsillugu“. (2 Nalunaarsuutit 33:6) Naggataatigut Jehovap pillarpaa Assyriamiut kunngiannit kunngiujunnaarsinneqarnissaa akueralugu. Babylonimi parnaarussaasimatilluni „[Jehova] Guutini qinnuigaa saammaateqqulluni siuaasamilu Guutiannut assut maniguutilerluni“. Tamatuma kingunerisaanik Jehovap Jerusalemimut uternissaa akueraa kunnginngorteqqillugulu. Taamaalilluni „Manassep paasilluarpaa [Jehova] Guutiusoq“. (2 Nalunaarsuutit 33:11-13) Aap, naggataatigut Manassep maniguunnera Jehovap iluaraa, maniguullunilu isumakkeerfigaa kunnginngorteqqillugulu.
8 Jehovap isumakkeerfiginnikkumanera Manassellu peqqissiminera ilinniutigisinnaavavut. Eqqaamajuartariaqarparput narrunarsaasunut iliuutsivut aammalu ajortuliorsimagaangatta qanoq isiginnittaaseqartarnersugut Jehovap uagutsinnut iliorfiginissaanut sunniuteqarsinnaasut. Kajumilluta allat unioqqutitsineri isumakkeerfigisarutsigik maniguullutalu kukkunivut nassuerutigisarlugit, ilimagisinnaavarput Jehovap naakkinnittuliorfigissagaatigut. — Matthæusi 5:23, 24; 6:12.
Guutip naalannassusia maniguuttunut saqqummersinneqartarpoq
9. Maniguunneq sanngiinnermut ersiutaava? Nassuiaruk.
9 Maniguunneq pissutsillu tamatumunnga assingusut sanngiinnertut eqqunngitsumilluunniit isiginngitsuusaareqqajaasarnertut isigineqartussaanngillat. Soorlu Biibilimi allassimasoq, Jehova maniguuttuuvoq, taamaattorli pisariaqaraangat eqqorluartumik kamattarpoq pissaanersuanilu ataqqinangaartoq atortarlugu. Maniguukkami Jehovap inuit maniguuttut malugisarpai immikkullu soqutigalugit, pingaarniartulli ungasinniartarpai. (Tussiaat 138:6) Jehovap kiffani maniguuttut qanoq immikkut soqutigisimavai?
10. Jehovap suna maniguuttunut saqqummersittarpaa, soorlu 1 Korinthimiut 2:6-10-mi ersertoq?
10 Piffissamut nammineq aalajangersakkaminut tusarliisuni aqqutigalugu Jehovap maniguuttuusut siunertami naammassinissaanik sukumiinerusumik saqqummersitsiffigisarsimavai. Ilumoortut nuanningaartut tamakku inunnut pingaarniarlutik uteriillutilluunniit inuinnaat ilisimassusiannik eqqarsariaasiannillu aalajangiussisunut isertugaajuaannarput. (1 Korinthimiut 2:6-10) Maniguuttulli Jehovap siunertaa pillugu eqqorluartumik ilisarsinermik tunineqartarput. Jehovamik qutsissisitsinissaminnut kajumissisinneqartarput taassuma naalannassusianik paasisaqarnerulersinneqaramik.
11. Ukiuni hundredelinni siullerni ilaasa qanoq takutippaat maniguunneq amigaatigalugu, tamannalu qanoq ajoqutigaat?
11 Ukiuni hundredelinni siullerni amerlasuut — aamma kristumiuunerartut ilaasa — maniguunneq amigaatigaat taamaattumillu apustili Paulusip Guutip siunertaa pillugu oqaasii mamiatsaatigalugit. Taanna ’Guutimik nalusunut apustilinngorpoq’, naggueqarninili, ilinniartitaanini, utoqqaassutsini ajunngitsuliornerpassuaniluunniit pissutiginagit. (Romamiut 11:13) Tamakku uinngup piinik pingaartitsisut Jehovap kikkunnik atuisariaqarneranut aalajangiisutut isigigajuttarpaat. (1 Korinthimiut 1:26-29; 3:1; Kolossemiut 2:18) Naamik, Jehovap Paulusi toqqarpaa ajunngissutsi pisassarinngisaraluaq siunertanilu naapertuilluartoq naapertorlugit. (1 Korinthimiut 15:8-10) Paulusimit „apustilissaarsuarnik“ taaneqartut assortuisullu allat, Paulusi taassumalu Allakkat atorlugit tunngavilersueriaasia akuerinngilaat. Maniguunneq amigaatigigamikku Jehova siunertaminik nuanningaartumik qanoq ililluni naammassinnittoq ilisimasinnaanagulu paasisinnaanngilaat. Qanortoq inuit Jehovap siunertami naammassinissaanut atugai suusupaginngisaannartigik eqqartuunagilluunniit. — 2 Korinthimiut 11:4-6.
12. Mosesi eqqarsaatigalugu, qanoq erserpa Jehovap maniguuttut pilluaqqusarai?
12 Biibilimi assersuuterpassuaqarpoq maniguuttuusunik Guutip naalannassusianik takusaqallatsiarnermik tunineqartunik. Mosesi, „tamanit anneruniajuinnerpaasoq“, Guutip naalannassusianik takunnippoq taassumunngalu qanittumik attaveqarluni. (4 Mosesi 12:3) Ukiuni 40-ni savanik paarsisuinnaavoq piffissallu ilarujussua Arabiamiut Qeqertaasaanniikkunarluni, assigiinngitsutigulli Guutimit pilluaqquneqarpoq. (2 Mosesi 6:12, 13) Jehovap tapersiineratigut Israelikkunnut oqaaseqartitanngorpoq inuiaqatigiittullu taakkuninnga aaqqissuisunngorluni. Jehova ’kiinarsillugu oqaloqatigisarpaa’ takorruukkamilu ’isikkukkut takullugu’. (4 Mosesi 12:7, 8; 2 Mosesi 24:10, 11) Kiffamik maniguuttumik taassuminnga, Guutimut sinniisuusumik, akuerinnittut aamma pilluaqquneqartarput. Uaguttaaq pilluaqquneqassaagut pruffiiti Mosesimit annerusoq, tassa Jiisusi Kristusi, aamma „kiffaq ilumoortoq silatoorlu“ taassuma oqartussaassuseqartitaa, akueralugillu naalakkutsigik. — Matthæusi 24:45, 46; Apustilit Suliaat 3:22.
13. Ukiuni hundredelinni siullerni Jehovap naalannassusia qanoq savanik paarsisunut maniguuttunut saqqummersinneqarpa?
13 Kikkut ’Jehovap naalannassusianit qaammarfigineqarpat’ inngilimit oqaluussiffigineqaramik annaassisussap inunngornera pillugu nutaarsiassamik nuannersumik? Tassaanngillat upperisarsiornikkut siuttuusut pingaarniartut qutsisunilluunniit atorfillit, tassaappulli savanik paarsisut maniguuttut ’narsaammiillutik unnuami savaatitik paaralugit pigaartut’. (Lukasi 2:8-11) Taakku tassaanngillat angutit inissisimaffitsik atorfitsillu pissutigalugit ataqqisaalluartut. Jehovamilli malugineqarput, Missiarsillu inunngorneranik siulliullutik paasitinneqarnissaannik pilluaqquai. Aap, Jehovap naalannassutsi maniguuttunut Guutimillu mianerinnittunut saqqummersittarpaa.
14. Guutip qanoq maniguuttut pilluaqqusarpai?
14 Assersuutit taakku qanoq ilinniarfigisinnaavavut? Jehovap maniguuttut pilluaqqusarpai siunertaminik ilisimasaqartillugit paasisaqartillugillu. Imaassinnaavoq inuit ilimagisaat aalajangersimasut eqquutitinngikkaat, taamaattorli taakku atortarpai siunertami nuanningaartup ilisimaneqalernissaanut. Tamanna kajumississutigisariaqarparput Jehovamut, oqaasianut siulittuutaasumut peqatigiissortaanullu siunnersortissarsiortuarnissatsinnut siulersortissarsiortuarnissatsinnullu. Qularinngilluinnarsinnaavarput Jehovap kiffani maniguuttut piumasaminik siunertaminillu nalunaarfigiuassagai. Pruffiiti Amosi allappoq: „Guuti [Jehova] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ — Amosi 3:7.
Maniguunneq ineriartortiguk Guutimillu iluarineqarlutit
15. Sooq maniguuttuaannarnissaq ilungersuutigisariaqarparput, kunngilu Saulimut pisimasunit tamanna qanoq erserpa?
15 Guutimit iluarineqartuassagutta maniguuttuaannartariaqarpugut. Ataasiarluta maniguussimagaluarutta isumaqartariaqanngilaq taamaattuaannassasugut. Inuk pingaarniarnermut imminullu nittarsaateqarusunnermut — isiginnittaatsimut makitanermik ajunaarnermillu kinguneqartartumut — nakkaannarsinnaavoq. Saulip Israelimi kunngitut tanitaasup siulliup tamanna misigaa. Toqqarneqarami ’nikanartutut imminut isigigaluarpoq’. (1 Samueli 15:17) Ukiulli marluinnaat kunngioreerami makitalerpoq assuarnartuliorlunilu. Jehovap pruffiiti Samueli aqqutigalugu pilliutit sassaaneqarnissaannik aaqqissuussinera sumiginnarpaa, nammineersimanerminullu utoqqatsissutissarsiorluni. (1 Samueli 13:1, 8-14) Tamanna aallarnerfigalugu assigiinngitsorpassuatigut ersersittarpaa maniguunnermik amigaateqarluni. Tamatuma kingunerisaanik Guutip anersaava pilluaqqusineralu annaavai, naggataatigullu kinguneraa narrunarsaataasumik toqunera. (1 Samueli 15:3-19, 26; 28:6; 31:4) Ersarippoq qanoq ilinniutigisinnaagipput: Maniguuttuaannarnissaq, naalattuaannarnissaq imminullu nittarsaannaveersaarluinnarnissaq ilungersuutigisariaqarparput. Taamaalilluta makitaneq, Guutimit iluarisaajunnaarnissamik kinguneqartartoq, ingalassinnaavarput.
16. Jehovamut tullitsinnullu attaveqarnerput eqqarsaatiginerullugu qanoq maniguunneq ineriartortissinnaavarput?
16 Naak maniguunneq Guutip anersaavata inerititaasa ilaattut eqqaaneqanngikkaluartoq, Guutip tamanna pissuseraa, uagullu pissuserinissaa noqqaassutigisariaqarparput. (Galatiamiut 5:22, 23; Kolossemiut 3:10, 12) Isiginnittaatsitsinnut aalajangersimasumut — imminut allanullu isiginnittaatsitsinnut — attuumassuteqarpoq, taamaattumillu ineriartortissagutsigu ilungersortariaqarpugut. Jehovamut tullitsinnullu attaveqarnerput eqqarsaatigeqqissaarutsigu maniguuttuaannarnissatsinnut iluaqutigisinnaavarput. Guutip isaani inuit naammalluinnanngitsut tamarmik ivikkatut qorsuusutut sivikitsumik naajartortutut, erniinnarli panertarlutik toqusartutut, ipput. Inuit aamma pillertatut narsamiittutut ipput. (Esaja 40:6, 7, 22) Ivigaq ivikkanit allanit tannerulaaraluartoq usorsitsaatissaqarpa? Pillertaq pillertanit allanit ungasinnerulaartumut pississinnaagaluartoq tamatuminnga usorsitsaatissaqarpa? Eqqarsaatip isumaqanngilluinnassusia! Apustili Paulusip kristumioqatini ilaat ima allaffigai: „Kiap allanit pingaarnerutippaatit? Sunalu pigaajuk tunissutisiarinngisat? Tunissutisigavillu sooq ajugaasimaarpit tunissutisisimanngitsutut?“ (1 Korinthimiut 4:7) Allassimaffiit qulaani eqqaaneqartutut eqqarsaatiginerugutsigik maniguunnerup ineriartortinnissaanut ersersinnissaanullu iluaqutigisinnaavarput.
17. Pruffiiti Danielip maniguunnerup ineriartortinnissaanut suna iluaqutigaa, maligassiaalu malissinnaavarput?
17 Pruffiiti Danieli ’nuannarineqangaartuusutut’ Guutimit isigineqarpoq, taassumunnga maniguuttuugami. (Danieli 10:11, 12) Danielip maniguunnerup ineriartortinnissaanut suna iluaqutigaa? Pingaarnerpaamik Jehova tatigilluinnarpaa aalajangersimasumillu qinunikkut saaffigisarlugu. (Danieli 6:11, 12) Aammattaaq eqiasuilluni eqqortumillu pissutiginiagaqarluni Guutip oqaasia atuartarpaa, tamannalu Guutip siunertaanik nuanningaartumik eqqumaffiginninnissaminut iluaqutigaa. Aamma kajumilluni nammineq kukkunini amigaatinilu, Israelikkut kukkuneri piinnarnagit, miserratiginngilai. Ilumoorlunilu Guutip iluarnera, nammineq iluarnini piinnarnagu, soqutigaa. (Danieli 9:2, 5, 7) Inuunitsinni tamatigut maniguunneq ineriartortinniarlugu ersersinniarlugulu ilungersornitsinni Danielip maligassiaa ilinniarfigisinnaannginnerparput?
18. Ataqqinaat naalannassuserlu suna ullumikkut maniguuttuusut pissaraat?
18 „Qanilaarnerup [Maniguunnerup, NV] Guutimillu mianerinninnerup akissarsiarititaat tassaapput pisuussutit ataqqinaallu inuunerlu,“ Ussatit 22:4-mi allassimavoq. Jehovap maniguuttuusut iluarisarpai, pissutsillu tamatuma akissarsiarititai tassaapput ataqqinaat inuunerlu. Asafi, Tussiaat 73-imik allattoq, Guutimut kiffartorunnaangajavikkaluarpoq, Jehovalli pitsaanerusunik eqqarsaatissimmani maniguulluni oqarpoq: „Ilitsersuutikkut ingerlatissavarma, naalannassusermukaatissavarma.“ (Tussiaat 73:24) Uagummi ullumikkut inuusugut? Naalannassuseq, imaluunniit ataqqinaat, suna maniguuttuusut pissaraat? Jehovamut qanittumik attaveqarnermik saniatigut qilanaarisinnaavaat kunngi Daavip oqaasiisa isumassarsiarititaasut ukua piviusunngornissaat: „Qanilaartut nuna kingornutissavaat pilluangaarnertillu nuannaarutigissallugu.“ Ilumut siunissaq nuanningaarpoq! — Tussiaat 37:11.
Eqqaamavigit?
• Stefanusi qanoq maniguuttunut Jehovap naalannassutsiminik saqqummersitsiffigisaanut assersuutissaalluarpa?
• Jehova Guuti qanoq maniguussimava?
• Assersuutit suut takutippaat Jehovap naalannassutsi maniguuttunut saqqummersittaraa?
• Danielip maligassiaa iluaqutigalugu qanoq maniguunneq ineriartortissinnaavarput?
[Atuaqqissaarnermi apeqqutit]
[Qupp. 12-imi ungalusaq]
Angut maniguuttoq qulanngilluinnartoq
1919-imi Ohiomi Cedar Pointimi ataatsimeersuarnermi Joseph F. Rutherford 50-inik ukiulik, Napasuliaq Alapernaarsuiffik-up Peqatigiiffiata taamanikkut præsidentia, nuannaarluni saqisuarartut ikiuivoq. Hotelimi ataatsimeersuariat inissaannut qanivai kuffertiilu majuullugit. Ataatsimeersuarnerup ulluisa kingullianni najuuttut 7000-it kajumissaarpai ima oqarluni: ’Kunngit Kunngiat naalakkallu Naalagaat sinnerlugu ambassadøriuvusi Naalakkattalu Ajoqersortittalu naalagaaffia naalannartoq oqaluussissutigissallugu.’ Naak qatanngut Rutherford qulanngilluinnartuugaluarluni sallusuissutaatitanilu pillugu pikkunartumik tunniutiinnarumanngitsumillu oqaluttartutut ilisimaneqaraluartoq, aamma ilumoorluni Guutimut maniguuttarpoq, tamannalu Betelimi ullaakkorsioqatigiinnermi qinusarnerani erserpoq.
[Qupp. 9-mi assiliartaq]
Stefanusip, Allakkanik ilisimasaqarluartup, maniguulluni nerisassat agguaattarpai
[Qupp. 10-mi assiliartaq]
Manassep maniguunnera Jehovap iluaraa
[Qupp. 12-imi assiliartaq]
Suna pissutigalugu Danieli ’angutinngorpa nuannarineqangaartoq’?