Pingaartorsuunermut Kristusitut qanoq isiginnittaaseqartoqalersinnaasoq
Pingaartorsuunermut Kristusitut qanoq isiginnittaaseqartoqalersinnaasoq
„Akornassinni angisuujumasoq ilissinnut kiffaassaaq.“ — MATTHÆUSI 20:26.
1. Silarsuaq pingaartorsuunermut qanoq isiginnittaaseqarpa?
EGYPTENITOQQAMI illoqarfiup Thebenip (ullumikkut Karnakip) eqqaani, Kairomit kujammut 500 kilometerisut ungasitsigisumi, 18 meterisut angitigisumik inuusaliaqarpoq farao Amenophis III-ata assinganik. Inuusaliarujussuarmut tassunga sanilliulluni mikisuararsuartut misiginngitsoornanngilaq. Inuusaliaq, qularnanngitsumik isiginnittup ataqqinnittunngortinnissaa siunertaralugu sanaajusoq, ersersitsilluarpoq silarsuup pingaartorsuunermut isiginnittaasianik, tassa angisuutut pingaaruteqartutullu imminut isigineq allanillu suunngitsutut pingaaruteqanngitsutullu misigititsineq.
2. Jiisusip ajoqersukkani maniguunnermik qanoq ilinniartippai, imminullu qanoq aperisinnaavugut?
2 Tamatumunnga akerliusumik Jiisusi Kristusip pingaartorsuunermut isiginnittaasereqqullugu ilinniartitsissutigisaa eqqarsaatigiuk. Ajoqersukkaminut ’Naalagaagaluarluni Ajoqersuisuugaluarlunilu’ paasitippai allanik kiffartuussinikkut pingaartorsuanngortoqartartoq. Tamanna qanoq isumaqartinnerlugu ullormi nunarsuarmi inuuffigisamini kingullermi takutippaa ajoqersukkami isigai asakkamigit. Maniguunnermik ilinniartitsilluarnerussusia! (Johannesi 13:4, 5, 14) Ima aperisinnaavugut: Suna iluarineruiuk, allanik kiffartuussineq namminerluunniit kiffartuunneqarneq? Kissaatigaajuk — Jiisusip maligassiaa eqqarsaatigalugu — taassumatut maniguuttuunissat? Kristusip pingaartorsuunermut isiginnittaasia silarsuup isiginnittaasianit allaanerulluinnartoq misissoriartigu.
Silarsuup pingaartorsuunermut isiginnittaasiatut isiginnittaaseqarnaveersaarit
3. Oqaluttuat Biibilimeersut suut ersersippaat inunnit ataqqineqarusungaarneq qanoq kinguneqartartoq?
3 Biibilimi oqaluttuarpassuit takutippaat silarsuup pingaartorsuunermut isiginnittaasia ajunaarutaasartoq. Hamani pissaaneqangaartoq Esterip Mordokajillu nalaanni Persiamiut kunngianni qaffasissumik atorfilik taaneqarsinnaavoq. Taassuma ataqqineqarusungaarnini narrunarsaataasumik toqqutigaa. (Esteri 3:5; 6:10-12; 7:9, 10) Aamma taaneqarsinnaavoq Nebukadnesari makitasooq pissaaneqarnerpaaffimmini silaarutsitaasoq. Pingaartorsuunerup suuneranik eqqunngilluinnartumik pasinnissimanera oqaasiinit erserpoq: „Ilumut tassa Babyloni angingaaqisoq uanga pissaanikkut artorsajuitsukkut kunngimut najugassiara uanga ataqqinaatissannik!“ (Danieli 4:27) Aamma Herodesi Agrippa I makitasooq Guutip ataqqinaatissaraluanik nammineq nersorneqaatigisassarinngisaminik nersorneqartittoq eqqaasinnaavarput. „Quperlunik nerineqarpoq toqullunilu.“ (Apustilit Suliaat 12:21-23) Angutit taakku tamarmik Jehovap pingaartorsuunermut isiginnittaasiatut isiginnittaaseqannginnamik nikanarsaataasumik pissaaneerussutigaat.
4. Kina makitasuujunerup anersaavanut silarsuup ilisarnaatigissaanut pilerfiua?
4 Paasinarpoq allanit ataqqineqarluta inoorusukkutta. Eqqumaffigisariaqarparpulli taamaakkusunneq Diaavulup atornerlussammagu makitasuumik anersaaqalersinniarsaraluta, anersaamut nammineq anguniagaqarusussutsiminut ersiutaasumik. (Matthæusi 4:8, 9) Puiunngisaannassavarput taanna tassaasoq ’silarsuup matuma guutia’, namminerlu eqqarsartaatsini nunarsuarmi maani siuarsarniarlugu aalajangiusimagaa. (2 Korinthimiut 4:4; Efesosimiut 2:2; Saqqummersitat 12:9) Nalunnginnatsigu eqqarsaatit taamaattut sumit aallaaveqarnersut, kristumiutut silarsuup pingaartorsuunermut isiginnittaasiatut isiginnittaaseqarnaveersaartariaqarpugut.
5. Tusaamasaaneq pisuujuneq angusaqarsimasutullu misigineq ataavartumik nalerisimaalernissamut qulakkeerutaava? Nassuiaruk.
5 Isuma Diaavulumeersoq tassaavoq silarsuarmi tusaamasaaneq, inunnit nersorneqarneq aningaasaaterpassuaqarnerlu pinngitsoorani pillualissutaasartoq. Ilumoorpa? Tusaamasaaneq, pisuujuneq angusaqarsimasutullu misigineq inuunermi nalerisimaarnissamut qulakkeerutaappat? Biibilimi mianersoqquneqarpugut eqqarsaammit taamaattumit imminut salloqittaqqunata. Salomo silatooq ima allappoq: „Paasivara suleruloorneq pikkorissuserlu sinngagiinnermit pissuteqartut. Tamannattaaq piunngitsuuvoq tassaallunilu anorimik tigusiniarsarineq!“ (Oqaluussisartup oqaasii 4:4) Inuppassuit silarsuarmi nuimasuunngorniarsimasut oqaatsit taakkua ilumoorneri uppernarsarsinnaavaat. Assersuutigisinnaavarput angut avataarsualiartaammik, inuit qaammammuliaqqaartut atugaannik, ilusilersueqataasoq, sanaqataasoq misileeqataasorlu. Kingumut qiviarluni tamatuma nalaa ima oqaatigaa: „Suleruloortarpunga suliannullu pillammanngorlunga. Taamaattoq siunertaqanngitsutut naleqanngitsutullu ipput, ataavartumik nalerisimaarnermik eqqissisimanermillu misigilissutiginnginnakkit.“ * Pingaartorsuuneq silarsuarmi anguneqarsinnaasoq — niuernerup, timersornerup aliikkusersuinerullu silarsuaanni — ataavartumik pillualissutaanngilaq nalerisimaalissutaananilu.
Pingaartorsuuneq asanninneq kajumississutigalugu kiffartuussinermit pisoq
6. Suup takutippaa Jaaku Johannesilu pingaartorsuunermut kukkusumik paasinnittaaseqartut?
6 Jiisusip inuunerani pisimasumi pingaartorsuunerup piviusup suunera erserpoq. Jiisusi ajoqersugaalu ukiumi 33-mi Jerusalemimut poorskisioriartorput. Aqqutaani erseqqissivoq ajoqersukkat marluk, tassa Jaaku Johannesilu, Jiisusip illortaarigunagai, pingaartorsuunermut kukkusumik isiginnittaaseqartut. Anaanartik aqqutigalu Jiisusimut ima qinnuteqarput: ’Oqarit naalagaaffinni issiajumaartugut aappaa talerpippit tungaani aappaalu saamippit tungaani.’ (Matthæusi 20:21) Inuup talerpiata saamiataluunniit tungaani inissinneqarneq juutinit ataqqineqangaarnertut isigineqartarpoq. (1 Kunngit 2:19) Jaaku Johannesilu ataqqinaateqarumallutik nuimasut akornanni inissinneqarniarsaripput. Taamatut inissinneqarnissartik qulakkeerusuppaat. Jiisusip nalunngilaa suna eqqarsaatigaat, pingaartorsuunermullu kukkusumik paasinnittaasiannik naqqiinissaminut periarfissaq atorluarpaa.
7. Jiisusip kristumiut pingaartorsuanngorsinnaanerat qanoq nassuiarpaa?
7 Jiisusip nalunngilaa silarsuarmi matumani, makitasuujunermik ilisarnaatilimmi, pingaartorsuunermut ilisarnaataasoq allanut naalagaagaanni pussuillu seqqortiallaannarlugit iliuuseqartitsisinnaagaanni. Jiisusilli ajoqersugaasa akornanni maniguulluni kiffartuussineq tassaavoq pingaartorsuuneq piviusoq. Jiisusi ima oqarpoq: „Akornassinni angisuujumasoq ilissinnut kiffaassaaq, akornassinnilu nuimanerujumasoq ilissinnut inussiaataassaaq.“ — Matthæusi 20:26, 27.
8. Biibili naapertorlugu kiffaaneq qanoq isumaqarpa, imminullu qanoq aperisinnaavugut?
8 Grækerit oqaasiat diaʹkonos Biibilimi „kiffaq“-mik nutserneqartartoq isumaqarpoq eqiasuilluni allanik kiffartuussiniarluni ilungersuuteqartuarnermik. Jiisusip ajoqersukkani ilumoortumik pingaartumik ilinniartippai: Pingaartorsuannguutaanngilaq allanik naalakkiisinnaaneq; pingaartorsuannguutaasorli tassavoq asanninneq kajumississutigalugu allanik kiffartuussineq. Imminut ima aperigit: ’Jaakuusuugaluaruma Johannesiuugaluarumaluunniit qanoq periaaseqassagaluarpunga? Paasisimassagaluarpara asanninneq kajumississutigalugu allanik kiffartuussinikkut pingaartorsuuneq piviusoq anguneqartartoq?’ — 1 Korinthimiut 13:3.
9. Allanik ilaqartarnermini Jiisusi qanoq maligassiuilluarpa?
9 Jiisusip ajoqersukkaminut takutippaa silarsuup pingaartorsuunermut najoqqutaa kristumiunut najoqqutassaanngitsoq. Kiffartuussaminit pingaarnerusutut periaaseqanngisaannarpoq, imminilluunniit nikanarnerusutut misigitinngisaannarlugit. Inuit tamalaat — angutit, arnat meeqqallu, pisuut, piitsut, oqartussaassuseqartut, allaat ajortuliortartutut ilisimaneqartut — ilagalugu nuannaraat. (Markusi 10:13-16; Lukasi 7:37-50) Inuit naammagittaalliulersarput allat kukkunerinit eqqorneqaraangamik. Jiisusi allaavoq. Ajoqersukkani ilaannikkut isumaalliortaraluartut oqqateqqajaasaraluartullu, qasusuilluni ilinniartittarpai qanilaarnerminillu uummatikkullu makitajuinnerminik uppernarsaavigisarlugit. — Zakaria 9:9; Matthæusi 11:29; Lukasi 22:24-27.
10. Jiisusip inuunerata tamarmiusup ersersippaa namminissarsiornani allanik kiffartuussisartoq?
10 Namminissarsiunnginneq tamanna Guutip ernerata pingaarnerpaap ersersitaa pingaartorsuunermut piviusumut uppernarsaataavoq. Jiisusi kiffartuunneqarniarluni maanga nunarsuarmukanngilaq, namminerli kiffartuussiniarluni. Ajorunnaarsippai „assigiinngitsunik nappaateqartut“ inuillu anersaapilunnit aniguisillugit. Qasusinnaasaraluarluni qasuersaarusuttaraluarlunilu, allat pisariaqartitaat nammineq pisariaqartitaminit salliutittarpai sapinngisanilu tamaat tuppallersartarlugit ikiortarlugillu. (Markusi 1:32-34; 6:30-34; Johannesi 11:11, 17, 33) Asanninnini kajumississutigalugu allat anersaakkut ikiortarpai. Nunaannarmi aqqusinikkut pujoralattukkut ungasissuliartarpoq Guutip naalagaaffia oqaluussissutigiartorlugu. (Markusi 1:38, 39) Qularnanngilluinnarpoq allanik kiffartuussineq pingaaruteqangaartutut isigigaa.
Jiisusip maniguunnera ilaaruk
11. Qatanngutit ilagiinni nakkutilliisutut toqqakkat qanoq pissuseqarneq ilisarnaatigissavaat?
11 1800-kkut naalerneranni nakkutilliisunik angalasartunik toqqaasoqartussanngormat Guutip innuttaasa ilagiivini kiffartuussisussat ilisarnaatigisassaat erseqqissarneqarput. Zion’s Watch Tower 1. septembari 1894-imoortoq naapertorlugu ’angutaassapput makitajuitsut — imminut angisuutileqqunagit . . ., pilimanianngitsuusut oqalugiartartullu, imminnut pinnatik, Kristusili pillugu; ilisimasaminnik nittarsaasuunngitsut oqaatsimilli paasiuminartumik kimittuumillu oqaluussisartut’. Erseqqippoq kristumiut ilumoortut namminneq anguniakkatik imaluunniit nuimasuunngornissaq pissaaneqarnissarlu allanullu oqartussaalernissaq anguniarlugit akisussaaffimmik tigusinianngisaannartariaqartut. Nakkutilliisup makitajuitsuusup eqqaamassavaa ilagiinni suliani ’pingaartorujussuusoq’, tassaanngitsoq atorfik nuimasoq imminut ataqqinartaasussaq. (1 Timotheusi 3:1, 2) Utoqqaanertat ilagiinnilu kiffartortut tamarmik sapinngisartik tamaat allanut iluaqutaasumik maniguullutik kiffartuussisariaqarput kiffartornermilu illernartumi siuttuuniartariaqarlutik. Taamaaliornermikkut allanut maligassiuilluassapput. — 1 Korinthimiut 9:19; Galatiamiut 5:13; 2 Timotheusi 4:5.
12. Ilagiinni akisussaaffeqarniartut imminut qanoq aperisinnaappat?
12 Qatanngut ilagiinni akisussaaffeqarusuttoq imminut ima aperisariaqarpoq: ’Periarfissarsiorpunga allanik kiffartuussinissamut, namminerluunniit kiffartuunneqarumavunga? Annikitsunik iluaqutaasunilli allanullu malunnanngitsunik suliaqarusuppunga?’ Imaassinnaavoq qatanngut angut inuusuttoq ilagiinni oqalugiarusuttoq utoqqarnilli ikiuinissaminut tunuarsimaartoq. Immaqa qatanngutit akisussaaffillit ilaginerat nuannaraa oqaluussinermili peqataavallaarnani. Qatanngut taamaattoq imminut ima aperisariaqarpoq: ’Soqutigineruakka kiffartuussinerit nersualaarneqarnermik nersugaanermillu nassataqartartut? Nuimasunngorniarsarivunga?’ Ataqqineqarusuttup Kristusi ilaanngilaa. — Johannesi 5:41.
13. (a) Nakkutilliisup maniguuttuunera qanoq killitsissutaasinnaava? (b) Sooq kristumiutut nikanartinneq atissanerlugu nammineq aalajangigassaanngila?
13 Kristusip maniguunnera ilaarniaraangatsigu allanik kiffartuusserusulersarpugut. Assersuusiornikkut tamanna erseqqissarneqarsinnaavoq. Nunat ilaannut nakkutilliisup angalasartup Jehovap Nalunaajaasuisa immikkoortortaqarfiisa ilaat pulaarpaa. Immikkoortortani assigiinngitsuni angalaartilluni qatanngut inuusuttoq takulerpaa kakkersaammik iluarsiiniarsuataartoq. Ulapittuugaluarluni akisussaaffeqangaaraluarlunilu uniffigalugu qatanngut ikiorpaa. „Tupigutsaqaanga,“ qatanngut inuusuttoq oqaluttuarpoq. „Oqarfigaanga inuusuttuulluni Betelimi suligami, kakkersaat taamaattorpiaq atortarsimallugu, eqqaamanerarpaalu qanoq iluarsilluaruminaatsigisoq. Sivisungaatsiartumik kakkersaammik iluarsiiniaqatigaanga allarpassuarnik suliassaqaraluarluni. Assut killitsippunga.“ Qatanngutip inuusuttup, maanna Jehovap Nalunaajaasuisa immikkoortortaqarfiisa ilaanni nakkutilliisuusup, suli eqqaamavaa nunat ilaannut nakkutilliisup angalasartup kiffartuussiumatussusia. Qanortoq allanik kiffartuussinissamut pingaaruteqarpallaartutut suliassamulluunniit nikagineqarsinnaasumut suliaqartussatut naleqqutinngitsutut misiginngisaannarta. ’Nikanartinneq atisariaqarparput’, kristumiunut ’inuk nutaamut’ ilaasutut piumasaqaataasoq. — Filippimiut 2:3; Kolossemiut 3:10, 12; Romamiut 12:16.
Pingaartorsuunermut Kristusitut qanoq isiginnittaaseqartoqalersinnaasoq
14. Guutimut tullermullu attaveqarnitsinnik eqqarsaatiginneqqissaarnikkut pingaartorsuunermut eqqortumik qanoq isiginnittaaseqalersinnaavugut?
14 Pingaartorsuunermut eqqortumik qanoq ililluta isiginnittaaseqalersinnaavugut? Taama isiginnittaaseqartoqalersinnaavoq Jehova Guutimut nammineq attaveqarnermik eqqarsaatiginnilluarnikkut. Ataqqinangaarnerata, pissaanerata ilisimassusiatalu uagutsinnit inukulunnguanit qutsinnerungaartippaa. (Esaja 40:22) Aamma tullermut attaveqarneq eqqarsaatigeqqissaaraanni iluaqutaassaaq. Imaassinnaavoq arlaatigut allanit piginnaaneqarnerusugut, taakkuali allatigut pingaaruteqarnerungaartunik pitsaaquteqartut, piginnaaneqartulluunniit uagut piginnaaneqarfiginngisatsinnik. Ilumoorpoq Guutip isaani erlinnartorpassuit qanilaartuugamik maniguuttuugamillu nuimarpianngitsut maluginiarnanngitsullu. — Ussatit 3:34; Jaaku 4:6.
15. Pisimasut nalitsinneersut qanoq ersersippaat kinaluunniit allanit pingaarnerusutut misiginissaminut pissutissaqanngitsoq?
15 Jehovap Nalunaajaasui upperisartik pillugu parnaarussaasimasut eqqartuussivimmullu unnerluussaasimasut, tamatumani maligassaalluarput. Inuit silarsuarmi nalinginnaasutut isigineqartut tassaagajupput misilinneqarnerminni ilungersunartuni assuarnaatsuusartut. Taamatut maligassiuisut eqqarsaatigeqqissaarutsigik maniguuttuujuarnissatsinnut ’imminullu pingaartinnginnissatsinnut pisariaqartumit annerusumik’ iluaqutigisinnaavarput. — Romamiut 12:3. *
16. Ilagiinniittut tamarmik Jiisusip kiffartuussiumatussusia qanoq ilaarsinnaavaat?
16 Kristumiut tamarmik, inuusuttut utoqqaallu, pingaartorsuunermut Kristusitut isiginnittaaseqalerniartariaqarput. Ilagiinni assigiinngitsorpassuarnik suliassaararpassuaqarpoq. Suliassat nikagineqarsinnaasut suliarinissaannut naleqqutinngitsutut misiginngisaannarit. (1 Samueli 25:41; 2 Kunngit 3:11) Angajoqqaat, meeqqasi mikisut angisuullu kajumissaartarpisigik naalagaaffilersaarfimmi ataatsimeersuartarfimmilu suliassanik sunilluunniit suliaqartaqqullugit? Takusarpaasi annikitsunik immaqalu pissanganarpallaanngitsunik suliaqartusi? Qatanngutip angutip maanna Jehovap Nalunaajaasuisa qullersaqarfianni kiffartortup eqqaamalluarpaa angajoqqaami maligassiuilluarnerat. Ima oqarpoq: „Naalagaaffilersaarfimmik ataatsimeersuartarfimmilluunniit eqqiaariaasiisa takutippaat suliartik pingaaruteqartutut isigigaat. Suliassanik ilagiinnut qatanngutigiissuarnulluunniit iluaqutaasussanik, qanorluunniit ittunik aamma pissanganannginnerusunik, nammineq kajumissutsiminnik suliaqarajuttuupput. Taamatut isiginnittaaseqarneq iluaqutigaara Betelimi maani qanorluunniit ittumik suliaqarnissannut.“
17. Qatanngutit arnat ilagiinnut qanoq pilluaqqussutaasinnaappat?
17 Allat soqutigisaannik nammineq soqutigisanit salliutitsinermi assersuutissaalluarpoq Esteri, 400-kkunni u.n.s. Perserit naalagaaffianni dronninginngortoq. Naak nuimagaluarluni Guutip piumasaa naapertorlugu piumassuseqarpoq innuttani pillugit inuunerminik navianartorsiortitsinissaminut. (Esteri 1:5, 6; 4:14-16) Ullumikkut kristumiut arnat, aningaasatigut qanorluunniit atugaqaraluarunik, ersersissinnaavaat dronningi Esteritut anersaaqarlutik nikallungasunik qiimmassaanermikkut, napparsimasunut pulaarnermikkut, oqaluusseqataanermikkut aammalu utoqqaanertanik suleqateqarnermikkut. Qatanngutit arnat taama kiffartuusserusussuseqartut maniguuttullu ilagiinnut pilluaqqussutaangaarput.
Pingaartorsuunermut Kristusitut isiginnittaasillit pilluaqqussutisiassaat
18. Pingaartorsuunermut Kristusitut isiginnittaaseqarneq sutigut pilluaqqussutaava?
18 Pingaartorsuunermut Kristusitut isiginnittaaseqartuartut pilluaqqussutisiassarpassuaqarput. Namminissarsiornani qatanngutinik kiffartuussigaanni, taakkununnga imminullu nuannaarutaasarpoq. (Apustilit Suliaat 20:35) Taakku pillugit pilliuteqarasussuseqarami asaneqassaaq. (Apustilit Suliaat 20:37) Unali suli pingaarneruvoq: Jehovap qatanngutinut iluaqutaasumik iliuuseqarneq takussavaa, imminut unnersiutiginnissutitut iluarinartutut isigissavaa. — Filippimiut 2:17.
19. Pingaartorsuunermut Kristusitut isiginnittaaseq pillugu suna aalajangiusimasariaqarparput?
19 Tamatta immikkut uummaterput misissortariaqarparput imalu aperaluta: ’Pingaartorsuunermut Kristusitut isiginnittaaseqartariaqarneq oqaluuseriinnartarpara, iliuuseqarnikkulluunniit taama isiginnittaaseqarlunga takutittarpara?’ Erseqqilluinnarpoq Jehovap makitasuut qanoq isumaqarfigigai. (Ussatit 16:5; 1 Petrusi 5:5) Qanortoq ilagiinni kristumiuni, ilaqutariinni ulluinnarnilu inunnik allanik peqateqarnitsinni iliuutsivut Kristusitut isiginnittaseqarnitsinnik ersersitsilik — iliuutsivut tamaasa Guutimut ataqqinaataatillugit unnersiutiginnissutaatillugillu. — 1 Korinthimiut 10:31. (wE 8/1 04)
[Quppernerup ataani ilanngussaq]
^ imm. 5 Takuuk The Watchtower 1. maaji 1982-imoortumi, qupp. 3-6-imi, „In Search of Success“.
^ imm. 15 Takuuk Jehovas Vidners Årbog 1992, qupp. 182, aamma Napasuliaq Alapernaarsuiffik 1. februaari 1994-imoortoq, qupp. 23-28.
Uku nassuiarsinnaavigit?
• Sooq silarsuup pingaartorsuunermut isiginnittaasiatut isiginnittaaseqarnaveersaartariaqarpugut?
• Jiisusi pingaartorsuunermut qanoq isiginnittaaseqarpa?
• Nakkutilliisut Jiisusip maniguunnera qanoq ilaarsinnaavaat?
• Pingaartorsuunermut Kristusitut qanoq isiginnittaaseqalersinnaavugut?
[Atuaqqissaarnermi apeqqutit]
[Qupp. 17-imi ungalusaq]
Pingaartorsuunermut kikkut Kristusitut isiginnittaaseqarpat?
Kiffartuunneqarusuttoq, imaluunniit kiffartuusserusuttoq?
Tamanit malugineqarusuttoq, imaluunniit nikagineqarsinnaasunik suliaqarsinnaasoq?
Imminut pingaartittoq, imaluunniit allanik pingaartitsisoq?
[Qupp. 14-imi assiliartaq]
Inuusaliarsuaq faraop Amenophis III-ata assinga