Qasoqqavugut uniinnarnatali

„[Jehovap] nunarsuaq isorartooq pinngortippaa. . . . Qasusoq nakussatsittarpaa, nukillaangasoq pissatsittarpaa.“ — ESAJA 40:28, 29.

1, 2. (a) Pallorfiginninnermut minguitsumut peqataarusuttut tamarmik asannittumik qanoq kajumissaarneqarpat? (b) Anersaakkut peqqissuunitsinnut suut navianartorsiortitsingaarsinnaappat?

JIISUSIP ajoqersugaasut ilisimalluarparput asannittumik kajumissaarutaa una: „Ornissinga tamassi suleruluttusi nanertugaasusilu, qasuertissavassi. . . . Nammaatarami iluaqaaq, nammakkiussaralu oqeqaluni.“ (Matthæusi 11:28-30) Aammattaaq kristumiut neriorsorneqarput Jehovap ’nalliutitissagai ullut inuummarissiffissat’. (Apustilit Suliaat 3:20) Qularnanngitsumik nammineq misigisimassavat sallusuissutit Biibilimeersut ilikkarneri, siunissamut isumalluarnartumik neriugisaqalerneq inuuninnilu Jehovap najoqqutassiaanik maleruaaneq qanoq nakussatsinnartigisut.

² Taamaattoq Jehovamut kiffaasut ilaat ilaannikkut misigissutsikkut qasoqqasorujussuanngortarput, imaluunniit nukissaaruttarput. Ilaannikkut taamatut nikallunganeq sivikitsuinnaasarpoq, allatigulli misigissutsikkut nukillaaqqaneq sivisusinnaasarpoq. Piffissap ingerlanerani ilaat isumaqalersinnaapput kristumiutut akisussaaffitik Jiisusip neriorsuineratut nukissaqalissutaanatik artorsaataalersut. Misigissutsit nikallornartut taamaattut kristumiup Jehovamut attaveqarneranut navianartorsiortitsingaarsinnaapput.

3. Sooq Jiisusip ajoqersukkani Johannesi 14:1-imi allassimasutut siunnersorpai?

³ Jiisusip tigusaanissani toqutaanissanilu sioqqutsiarlugu ajoqersukkani ima oqarfigai: „Uummatisi annilaanngikkilit. Guutimut upperitsi, uannullu upperitsi.“ (Johannesi 14:1) Jiisusi taama oqarpoq apustilit pisussanut alianartunut isiginnittussaammata tamatumalu kingorna malersorneqalissammata. Jiisusip nalunngilaa nikallunganeq immini apustilimi tunussissutigisinnaagaat. (Johannesi 16:1) Misigissuseq nikallornartoq taanna ajugaaffigineqanngippat, anersaakkut sanngiillissutigisinnaavaat Jehovamillu tatiginnikkunnaarutigalugu. Ullumikkut kristumiunut aamma taamaappoq. Nikallungajuarneq nanertisimanarsinnaavoq uummammillu eqqissiunnaarsitsisinnaalluni. (Jeremia 8:18) Ilorlikkut pissutsivut sanngiillisinnaapput. Taamatut tatineqarluta misigissutsikkut anersaakkullu soriarsinnaajunnaarsinnaavugut allaallu Jehova pallorfigerusukkunnaarsinnaallugu.

4. Uummatitta assersuutaasup qasulernaveersaartinneranut suna iluaqutigisinnaavarput?

⁴ Ussatit 4:23-mi pitsaasumik ima siunnersorneqarpugut: „Paarisassannit tamanit annermik uummatit paariuk inuuneq tassannga aallaaveqarmat.“ Biibilimi atoriaannaasunik siunnersuuteqarpoq uummatitta assersuutaasup nikallunnginnissaanut anersaakkullu qasulinnginnissaanut illersuutigisinnaasatsinnik. Qasoqqalernermulli pissutaasinnaanersoq misissoqqaariartigu.

Kristumiussuseq nanertuutaanngilaq

5. Jiisusip oqaasii suut imminnut akerliorpasippat?

⁵ Nassuerutigisariaqarpoq kristumiuussagaanni ilungersuuteqartariaqartoq. (Lukasi 13:24) Allaat Jiisusi ima oqarpoq: „Sanningasulimminik [nappakkamik anniartitaaffimminik, NV] ersunngitsoq uannillu malinninngitsoq uannut ajoqersugaasinnaanngilaq.“ (Lukasi 14:27) Qarsupittumik eqqarsaatigalugit oqaatsit taakku Jiisusip nammakkiussaminik oqinneraaneranik nukissaqalersitseqqittarneranillu oqaasiinut akerliorpasipput, imminnulli akerliunngillat.

6, 7. Sooq oqartoqarsinnaava guutisiornerput qasunartuunngitsoq?

⁶ Nukkiorluni ilungersorlunilu iliuuseqarneq timikkut qasunarsinnaagaluartoq, ajunngitsoq siunertaralugu iliuuserineqarpat nalerisimaarnangaarsinnaallunilu nukissaqalernaqqissinnaallunilu  inuummarissinarsinnaavoq. (Oqaluussisartup oqaasii 3:13, 22) Sunalu pitsaanerusoq siunertaralugu iliuuserineqarsinnaava inoqatinut sallusuissutinik nuanningaartunik Biibilimeersunik oqaluttuarnermit? Aamma Guutip ileqqussatigut najoqqutassiai qutsissut maleruarniarlugit akiuunnerput suunngilaq pilluaqqussutertaanut sanilliullugit. (Ussatit 2:10-20) Allaat malersorneqaraangatta Guutip naalagaaffia pillugu naalliunnerput ataqqinaatitut isigisarparput. — 1 Petrusi 4:14.

⁷ Eqqunngitsumik upperisarsiornerup nammaataata ataaniiginnarlutik anersaakkut taartumiittut assiginagit Jiisusip nammaataanik nammaatsertut nukissaqaleqqittarput. Guutip asannittumik isumassorpaatigut ingasattajaartunillu piumasaqaateqanngilaq. Jehovap inassutai „artornartuunngillat“. (1 Johannesi 5:3) Kristumiussuseq ilumoortoq, Biibilimi allaatigineqartoq, nanertuutaanngilaq. Taamaattumik guutisiornerput qasussutigisinnaanngilarput nikallussutigisinnaanagulu.

’Nanertuisitsinnit tamanit peerniarta’

8. Anersaakkut qasoqqanermut suna pissutaagajuppa?

⁸ Anersaakkut qasoqqasutut misigigutta, pissutaassagunarput nanertuutigisatta saniatigut pissutsit aaqqissuussaanerata ajortup matuma nammakkiissutai allat. ’Silarsuaq tamarmi Ajortumut naalatsigitimmat’, avatangiiseqarpugut nukinnik nikallornartunik nukillaarutigisinnaasatsinnik kristumiutullu oqimaaqatigiissaariunnaassutigisinnaasatsinnik. (1 Johannesi 5:19) Sammisartakkat pingaannginnerusut kristumiutut inuunitsinnik ajornakusoornerulersitsisinnaapput. Nanertuutigisat saniatigut nanertuutigisat taamaattut nanertisimanarsinnaapput artorsartissinnaallutalu. Taamaattumik pissutissaqarluartumik Biibilimi oqaaqqissaarneqarpugut ’nanertuisitsinnit tamanit peeqqulluta’. — Hebræerit 12:1-3.

9. Pigisatigut anguniagaqarneq qanoq nanertuutigisinnaavarput?

⁹ Silarsuarmi pingaartinneqartut — qaffasissumik atorfeqarneq, aningaasat, aliikkutassat, feeriarluni angalaneq pigisatigullu anguniakkat allat — eqqarsartaatsitsinnik sunniisinnaapput. (1 Johannesi 2:15-17) Ukiuni hundredelinni siullerni kristumiut ilaat pisuunngorniarsimapput taamaalillutillu inuunertik ajornakusoornerulersillugu. Apustili Paulusi ima nassuiaavoq: „Inuit pisuunngorumasut usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu. Aningaaserituujunermi ajortunut tamanut sorlaavoq; tamatumannga pileritsatsitaallutik inuit ilaat uppernerminnit tunussisitaasarput taamalu imminnut amerlasuunik erloqissutissiorlutik.“ — 1 Timotheusi 6:9, 10.

10. Jiisusip naatsiiassanik siaruarterisumik assersuusiaa pisuussutit pillugit sumik ilinniarfigisinnaavarput?

¹⁰ Guutimut kiffartornitsinni qasoqqasutut nikallungasutullu misigigaangatta, pissutaasinnaava pigisatigut ima anguniagaqartigigatta anersaakkut ittunik pingaartitsinerput ipitinneqalersoq? Jiisusip naatsiiassanik siaruarterisumik assersuusiaani ersersinneqartutut taamaariaannaavoq. Jiisusip „silarsuarmi matumani isumakuluutit pisuussutillu nakutitsinerisa sunullu tamanut pileritsannerit“ assersuuppai naasupilunnut kapinartulinnut „nalliullutik“ uummatitsinni Guutip oqaasiata naatsiiassartaanik ’ipititsisunut’. (Markusi 4:18, 19) Taamaattumik Biibilimi ima siunnersorneqarpugut: „Aningaaserituussutsissi qanoq inuunissarsi aalajangissanngilaa, pigisasili naammagisigit. Guutimi nammineq oqarpoq: ’Iperassanngilakkit imminiiginnassanallu.’“ — Hebræerit 13:5.

11. Nanertuutigisavut susinnaavavut?

 ¹¹ Ilaannikkut inuunitsinnik ajornakusoornerulersitsisoq tassaasinnaavoq, pigisaqarneruniarsarineq pinnani, pigeriikkatsinnut isiginnittaaserput. Ilaat misigissutsikkut nukillaarsimapput ilungersunartumik peqqiilliornertik, asasamik annaasaqarnertik allatigulluunniit nukillaarnartunik ajornartorsiuteqarnertik pissutigalugu. Taamatut nukillaarsimasut paasisimavaat ulluinnarni inuunerminnik ilaannikkut allannguilaartariaqartarnertik. Aappariit aalajangersimapput aliikkutaralugu sammisartakkamik pilersaarutimillu pingaannginnerusut ilaat taamaatinniarlugit. Pigisatik misissorpaat pilersaarutinullu taamaattunut tunngasut tamaasa poortoriarlugit ittujaarlugit. Ileqquliussimasatsinnik pigisatsinnillu ilaannikkut naliliisarneq pisariaqanngitsumillu nanertuutigisatta suulluunniit pigiunnaarnissaat tamatta iluaqutigisinnaavarput qasuleqqunata uniinnaqqunatalu.

Silatusaartariaqarpugut ingasaassinianngitsusariaqarlutalu

12. Nammineq kukkunitsinnut susinnaanngisatsinnullu tunngatillugu suna paasisariaqarparput?

¹² Nammineq kukkunivut susinnaanngisavullu, allaat pingaaruteqarpasinngitsutut ittut, aamma artorsaatissiilersinnaapput. Eqqorluartumik Daavi ima oqarpoq: „Ajortuliama artorsippaannga, nanertuutaalerpoq uannut oqimaappallaartoq.“ (Tussiaat 38:5) Allannguilaarnerit nanertuutaangaartunik oqiliallatsitsisinnaasarput.

13. Ingasaassiniannginneq kiffartornitsinnik oqimaaqatigiissumik isiginnittaaseqarnissatsinnut qanoq iluaqutigisinnaavarput?

¹³ Biibilimi kajumissaarneqarpugut „silatussuseq isumatussuserlu“ pigiliuteqqullugit. (Ussatit 3:21, 22) ’Ilisimassut pavannga pisoq . . . saamasuuvoq [ingasaassinianngitsuuvoq, NV],’ Biibilimi allassimavoq. (Jaaku 3:17) Kristumiutut kiffartornermi allanut angummanniarneq pissutigalugu ilaat tatineqartutut misigisimapput. Biibilimili ima siunnersorneqarpugut: „Kialuunniit nammineq suliani misilissavaa, sulianilu namminiinnaq usorsisimaarutigissavai allanut naleqqiunnagit. Kialuunniimmi nammagassani nammineq nammassavaa.“ (Galatiamiut 6:4, 5) Ilumoorpoq kristumiut allat maligassiuilluarnerat Jehovamut uummatikkut iluunngarluta kiffartornissatsinnut kajumississutigisinnaagipput, pissutsilli nammineq atukkavut naapertorlugit piviusorsiortunik imminut anguniagassinissamut atorluarsinnaasumik ilisimassuseqarneq ingasaassiniannginnerlu iluaqutigisinnaavavut.

14, 15. Timikkut misigissutsikkullu pisariaqartitatsinnut tunngatillugu qanoq atorluarsinnaasumik ilisimassuseqarsinnaavugut?

¹⁴ Allaat pingaaruteqarpasinngitsuni ingasaassiniannginneq qasulinnginnissatsinnut iluaqutigisinnaavarput. Assersuutigalugu oqimaaqatigiissaarisumik inooriaaseqarpugut timikkut peqqinnartumik? Tamatumani aappariit, Jehovap Nalunaajaasuisa immikkoortortaqarfianni kiffartortut, maligassaalluarput. Taakkua paasisimavaat ilisimassuseq atorluarsinnaasoq qasulernaveersaarnermi iluaqutaangaarsinnaasoq. Nuliaasoq ima oqarpoq: „Qanorluunniit suliassaqartigigaluaraangatta innarfigisartagarput unnuit tamaasa aalajangersimasuutinniartarparput. Aamma aalajangersimasumik timigissartarpugut. Tamanna iluaqutigilluarparput.  Maanna pisinnaasatta killeqarneri nalunngilavut tamannalu naapertorlugu iliuuseqartarneq ilikkarsimallugu. Nukissaqarpasittuaannartunut imminut naleqqiunnaveersaartarpugut.“ Peqqinnartunik aalajangersimasumillu nerisarpugut naammattumillu sinittarluta? Peqqissutsimik silatusaartumik nakkutiginnikkaanni misigissutsikkut anersaakkullu nukillaartutut misiginannginnerusinnaavoq.

¹⁵ Ilaqarpugut immikkorluinnaq ittunik pisariaqartitsisunik. Assersuutigisinnaavarput qatanngut arnaq kristumiu piffissaq tamaat kiffartornermi unamminiarnartunik suliassarpassuaqarsimasoq. Ilungersunartumik peqqiilliortarsimavoq, ilaatigut kræfterluni. Tatineqarnermini naammagittartuunissaminut suna iluaqutigisarpaa? Ima oqarpoq: „Uannut pingaartuuvoq nipaalluinnartumi kisimiiffigisinnaasanni piffissaqarnissara. Stressertutut qasoqqasutullu misiginerujartortillunga pisariaqartikkiartuinnartarpara nipaatsumi, atuarfigisinnaasanni qasuersaaffigisinnaasannilu, kisimiinnissara.“ Ilisimassuseq atorluarsinnaasoq eqqarsarsinnaanerlu iluaqutigissavavut nammineq pisariaqartitatsinnik miserratiginninnginnissatsinnut matussusiinissatsinnullu taamaalillutalu anersaakkut qasulinnginnissatsinnut.

Jehovap nakussatsittarpaatigut

16, 17. (a) Anersaakkut peqqissutsip paarinissaa sooq pingaaruteqarluinnarpa? (b) Ullut tamaasa iliuuserisartakkatsinnut suna ilannguttariaqarparput?

¹⁶ Soorunami anersaakkut peqqissutsip paarinissaa pingaaruteqarluinnarpoq. Timikkut qasusinnaavugut, Jehovamulli qanittumik attaveqarutta taassuma kiffartorfiginera qatsutinngisaannassavarput. Jehovap „qasusoq nakussatsittarpaa, nukillaangasoq pissatsittarpaa“. (Esaja 40:28, 29) Apustili Paulusip oqaatsit taakkua ilumoornerannik nammineq misigisoq ima allappoq: „Nikallunngilagut, naammi inuuserput qalleq aseroriartoraluartillugu ilorleq ullut tamaasa nutaanngoriartorpoq.“ — 2 Korinthimiut 4:16.

¹⁷ Malugikkit oqaatsit „ullut tamaasa“. Tamanna isumaqarpoq ullut tamaasa Jehovap aaqqissuussai atorluartariaqarivut. Ajoqersuiartortitaq ukiuni 43-ni aalajaalluni kiffartorsimasoq timikkut qasoqqasarneq nikallungasarnerlu arlaleriarluni misigisarsimavai. Uniinanngilarli. Ima oqarpoq: „Makiaarneq ileqquliuppara arlaannik suliaqalertinnanga Jehovamut qinunissamut oqaasianillu atuarnissamut piffissaqarsinnaaniarlunga. Ullut tamaasa taamaaliortarneq pinertusaarnissannut ulloq manna tikillugu iluaqutigaara.“ Naatsorsuutigilluinnarsinnaavarput Jehovap pissaanini atorlugu napatissagaatigut, aalajangersimasumik, aap, „ullut tamaasa“, taassumunnga qinusarutta pissusiilu qutsissut neriorsuutaalu eqqarsaatigeqqissaartarutsigik.

18. Aalajaatsut utoqqalisimasut napparsimasulluunniit Biibilimi qanoq tuppallersarneqarpat?

¹⁸ Tamanna ingammik ukioqqortuujuneq peqqiilliornerluunniit pissutigalugu nakangasunut iluaqutaavoq. Qatanngutit taamaattut immaqa nikallortarput allanut sanilliunnertik pissutiginagu, maannakkulli pisinnaasatik siornatigut pisinnaasaminnut sanilliuttaramikkik. Tuppallernarpoq nalunagu Jehovap utoqqaat ataqqigai! Biibilimi ima allassimavoq: „Nutsat qeersuusut tassaapput niaqorut kusanartoq, taanna iluarnerup aqqutaaniippoq.“ (Ussatit 16:31) Jehovap pisinnaasatta killeqarneri nalunngilai, timikkullu sanngiissuteqaraluarluta uummatikkut iluunngarluta kiffartornerput pingaartingaarpaa. Ajunngitsuliareriikkavullu Guutip puiuikkiussimavai. Allakkani ima uppernarsaavigineqarpugut: „Guutip iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu.“ (Hebræerit 6:10) Ukiuni qulikkuutaani arlalinni Jehovamut ilumoorfiginnissimasunik ilaqarnerput nuannaarutigaarput!

Uniinnaqinak

19. Ajunngitsuliornermik ulapputeqarnerput qanoq iluaqutigaarput?

¹⁹ Inuppassuit isumaqarput aalajangersimasumik timikkut aalalluni sammisaqartaranni qasoqqanannginnerusartoq. Taamatulli anersaakkut ittunik aalajangersimasumik sammisaqartarneq misigissutsikkut anersaakkulluunniit nukillaarsimasutut misiginaveeqqutaasinnaavoq. Biibilimi ima allassimavoq: „Ajunngitsuliorneq qatsuteqinatigu, piffissarmi nalliuppat katersuiumaarpugut qasunngikkutta. Taamaattumik piffissaqarallartilluta tamanut ajunngitsuliorniarta, pingaartumik uppeqatitsinnut.“  (Galatiamiut 6:9, 10) Versini taakkunani iliuuseqartariaqarnerput erseqqissarneqarpoq. Aap, allanut ajunngitsuliortarneq Jehovamut kiffartornitsinni uniinnannginnissatsinnut iluaqutigisinnaavarput.

20. Nikalloqqunata kikkut ilaginaveersaartariaqarpavut?

²⁰ Tamatumunnga akerliusumik Guutip inatsisaanik sumiginnaasunik peqateqartarneq arlaannilluunniit sammisaqaqatigiittarneq qasunartumik nanertuutaasinnaavoq. Biibilimi ima mianersoqqussuteqarpoq: „Ujaqqat oqimaatsuupput sioqqallu oqitsuunngeqalutik, sulili taakkunannga oqimaanneruvoq sianiitsoq pillugu narrutsanneq.“ (Ussatit 27:3) Qasuleqqunata nikalloqqunatalu silatusaassaagut isumalluarnanngitsumik isiginnittaasillit allanillu kukkunersiueqqajaasartut isornartorsiueqqajaasartullu ilaginaveersaartarutsigik.

21. Kristumiut ataatsimiinnerini allanut qanoq qiimmassaataasinnaavugut?

²¹ Kristumiut ataatsimiinnerini Jehovameersumik anersaakkut nukissaqaleqqissinnaavugut. Taakkunani najuunnikkut pitsaasumillu ilinniartitsinermut taperseeqataanikkut kajumissaaqatigiinnissamut nakussatseqatigiinnissamullu periarfissaqarluarpugut. (Hebræerit 10:25) Ilagiinniittut tamarmik oqaaseqartarnermikkut saqqummiussigaangamillu ineriartorteqatigiinniarsarisariaqarput. Ilinniartitsisutut siuttuusut allanik qiimmassaanissaminnut immikkut akisussaaffeqarput. (Esaja 32:1, 2) Allaat oqaaqqissaarinissaq avoqqaarinninnissarluunniit pisariaqaraangat qanilaartumik inussiarnersumillu nakussatsinnartumik siunnersuisoqartariaqarpoq. (Galatiamiut 6:1, 2) Aap, allanut asanninnerput iluaqutigissavarput qasunata uniinnarnatalu Jehovamut kiffartornissatsinnut. — Tussiaat 133:1; Johannesi 13:35.

22. Inuttut naammalluinnanngitsuugaluarluta sooq nakimanata inuusinnaavugut?

²² Naggatissap nalaani matumani Jehova kiffartorfigissagaanni ilungersuuteqartariaqarpoq. Aamma kristumiut sianissutsikkut nukillaarsinnaapput, misigissutsikkut anniaateqarsinnaapput stressernartunillu atugaqarsinnaallutik. Inuttut naammalluinnanngitsuugatta qajannarpugut, marrarnit sanaatut. Biibilimili ima allassimavoq: „Erlinnartuut tamanna pigaarput immersakkani marraasuniitillugu, pissaaneq asseqanngitsoq tassaaqqullugu uatsinnit pinnani Guutimit pisoq.“ (2 Korinthimiut 4:7) Aap, qasusarumaarpugut, uniinnanngisaannartali akiuukkunnaanngisaannartalu. Aammattaaq ’nakimanata oqarta: Jehova ikiortigaara.’ — Hebræerit 13:6.  (wE 8/15 04)

Uteqqiilaarneq

• Nanertuutaasunik taamaatissinnaasatsinnik eqqaasaqarit.

• Uppeqatitsinnut kristumiunut qanoq ’ajunngitsulioqataasinnaavugut’?

• Qasoqqasutut nikallungasutulluunniit misigigaangatta Jehovap qanoq napatittarpaatigut?

[Atuaqqissaarnermi apeqqutit]

[Qupp. 29-mi assiliartaq]

Jiisusip nalunngilaa nikallungajuarneq apustilit nanertuutigisinnaagaat

[Qupp. 30-mi assiliartaq]

Ilaasa aliikkutaralugu sammisartakkamik pilersaarutimillu pingaannginnerusut ilaat taamaatissimavaat

[Qupp. 32-mi assiliartaq]

Pisinnaasavut killeqaraluartut uummatikkut iluunngarluta kiffartornerput Jehovap pingaartingaarpaa