„Guutip sakkutuussutai tamarmiusut atiniarsigit“

„Guutip sakkutuussutai tamarmiusut atiniarsigit atasinnaaqqullusi Diaavulup qoqassiniaraangasi.“ — EFESOSIMIUT 6:11.

1, 2. Nammineq oqaatsitit atorlugit kristumiut anersaakkut sakkutuussutigisariaqagaat eqqartukkit.

UKIUNI hundredelinni siullerni Roma pissaaneqarnerpaavoq. Romamiut sakkutuuisa pissaaneqarnerat pissutigalugu silarsuup taamani ittup ilarujussua illoqarfiup taassuma pissaaneqarfigisinnaavaa. Oqaluttuarisaanermik ilisimatuup sakkutuut taakku ’oqaluttuarisaanermi sakkutooqatigiittut akiuutillaqqinnerpaatut’ allaatigai. Romamiut sakkutuui maleruaaqqissaarnissamik ilikkarnerit sukasarlugit sungiusartinneqartarput, akiuulluarsinnaanerannulli aamma sakkutuussutaat pingaaruteqarput. Apustili Paulusip Romamiut sakkutuuisa sakkutuussutaat assersuutitut atorpai kristumiut Diaavulumut sorsunneranni ajugaanissamut anersaakkut sakkutuussutigisariaqagaannut.

² Sakkutuussutit anersaakkut ittut taakku Efesosimiut 6:14-17-imi allaatigineqarput. Paulusi ima allappoq: „Aalajaanniaritsi sallusuissut qiterutsiussiuk. Atiniarsigit iluarneq saattuaasatut pitseriassuserlu kamippattut eqqissinerup iivangkiiliuanik ingerlassisussatut. Tamani kivissimasarsiuk uppernerup eqqortinnaveeqqutaa, taassuminnga qamissinnaassagassigit Ajortup qarsui ikumasut. Niaqorornaveeqquseritsi annassummik panalerlusilu Anersaap panaanik, tassa Guutip oqaasianik.“ Sakkutuussutit piviusut Paulusip eqqartugai Romamiut sakkutuuinut illersuutaangaartarput. Aammattaaq sakkutooq panalisartarpoq qanimut akiuunnermi atugassaminik.

3. Sooq Jiisusip peqqussutai naalattariaqarpavut maligassiaalu malinniartariaqarlugu?

³ Sakkutuussutit sungiusarsimanerlu kisimik Romamiut akiuulluarsinnaanerannut aalajangiisuunngillat, sakkutuut siulersortiminnut naalannerat aamma aalajangiisuuvoq. Kristumiut Jiisusi Kristusi, Biibilimi ’inuianni naalaganngortitamik’ taaneqartoq, naalattariaqarpaat. (Esaja 55:4) Taanna aamma ’ilagiinnut niaquuvoq’. (Efesosimiut 5:23) Jiisusip anersaakkut sorsunnissamik ajoqersorpaatigut naammalluinnartumillu maligassiamigut takutissimalluta anersaakkut sakkutuussutit qanoq atussagivut. (1 Petrusi 2:21) Kristusitut pissuseqarneq anersaakkullu sakkutuussutit assigiissuteqangaarmata, Biibilimi allassimavoq Kristusip isumaatut ittumik ’sakkulersortariaqartugut’. (1 Petrusi 4:1) Taamaattumik anersaakkut sakkutuussutit ataasiakkaarlugit misissortillugit Jiisusip maligassiaa eqqarsaatigissavarput ersersinniarlugu sakkutuussutit qanoq pingaaruteqartiginerat sunniuteqarluartiginerallu.

 Qitip, sakissat isikkallu illersorneqarnerat

4. Sakkutuup sakkutuussutaani qiterut sumut atorneqartarpa, qanorlu assersuutitut atorneqarpa?

⁴ Sallusuissut qiterutsiullugu. Biibilip nalaani sakkutuut qiteruteqartarput amermik 5-init 15-it centimeterit tikillugit silissusilimmik. Sakkutuup qitequtaa qitianut illersuutaasarpoq panalu tassani nivingatinneqarsinnaalluni. Sakkutooq qiterutseraangami sorsunnissamut piareertarpoq. Paulusip sakkutuup qiterutaa assersuutitut atorpaa ersersinniarlugu sallusuissut Biibilimeersoq inuunitsinnut qanoq sunniuteqartigisariaqartoq. Taanna qititsinnut ’qilerussimasutut’ ittariaqarparput, sallusuissummut naapertuuttumik inuusinnaaqqulluta tamatigullu illersorsinnaaqqullugu. (Tussiaat 43:3; 1 Petrusi 3:15) Taamaattumik Biibilimik peqqissaartumik atuaqqissaartarnissarput atuakkatsinnillu eqqarsaatiginneqqissaartarnissarput pisariaqarpoq. Guutip inatsisai Jiisusip ’iluani ipput’. (Tussiaat 40:9) Taamaattumik akerlilersuisunit aperineqaraangami, akisinnaasarpai Allakkat-nit eqqaamasani issuarlugit. — Matthæusi 19:3-6; 22:23-32.

5. Nassuiaruk najoqqutassiat Biibilimeersut qanoq iluaqutigisinnaagivut ussernartorsiorfiusuni misilinneqarfiusunilu.

⁵ Sallusuissummit Biibilimeersumit siulersorneqartikkaangatta tunngavilersuutinut eqqunngitsunut illersuutigisinnaasarparput silatusaartumillu aalajangiisinnaasarluta. Ussernartorsiorfiusuni misilinneqarfiusunilu najoqqutassiat Biibilimeersut eqqortuliorniarluta aalajangersimanitsinnut nakussatsissutigisarpavut. Ajoqersuisorsuarput Jehova takusutut issavarput oqaaserlu tunutsinni ima oqartoq tusartutut issavarput: „Aajuna aqqusineq, taanna ingerlavigissavarsi!“ — Esaja 30:20, 21.

6. Sooq uummaterput assersuutaasoq illersorneqartariaqarpa, iluarnerlu qanoq illersuutaasinnaava?

⁶ Iluarneq saattuaasatut. Sakkutuup saattuaasaa timip pisataasa ilaannut inuunermut pingaaruteqartumut, uummammut, illersuutaavoq. Uummaterput assersuutaasoq — inuttut ilorlikkut qanoq ittuunerput — immikkut illersorneqartariaqarpoq ajortulioqqajaasarmat. (1 Mosesi 8:21) Taamaattumik Jehovap najoqqutassiai iluartut ilinniartariaqarpavut nuannarisariaqarlugillu. (Tussiaat 119:97, 105) Iluarneq nuannarigatsigu silamiut eqqarsartaasiat Jehovap najoqqutassiaanik erseqqissunik sumiginnaasoq kimeerutsitsisorluunniit itigartissavarput. Eqqortullu nuannarigutsigik ajortullu uumigalugit, inuunitsinnut aseruutaalersinnaasukkoornaveersaarsinnaavugut. (Tussiaat 119:99-101; Amosi 5:15) Jiisusi tamatumani maligassaalluarpoq, taannami pillugu Allakkat-ni ima allassimavoq: „Eqqortumik iliorneq nuannaraat eqqunngitsuliornerlu uumigalugu.“ — Hebræerit 1:9. *

7. Sooq Romamiut sakkutuui pitsaasunik ninngusuunillu kamippaqartariaqarpat, tamannalu sumut assersuutaava?

⁷ Eqqissinerup iivangkiiliua kamippattut. Romamiut sakkutuuisa kamippaat aloqutilluunniit ninngusuut pisariaqartippaat, sakkut sakkutuussutillu 30 kiilungajaat nassarlugit sorsukkiartillutik ilaatigut 30 kilometerit ingerlaartaramik. Taamaattumik Paulusip kamippannik eqqartuinera Guutip naalagaaffianik nutaarsiassamik nuannersumik tusarusuttunut tamanut oqaluussinissamut kajumissuseqarnermut assersuutaalluarpoq. Kajumissuseq pissusiuvoq pingaarutilik, inuimmi Jehova qanoq ilisarisimalersinnaassavaat  oqaluussinissamut piareersimanatalu kajumissuseqanngikkutta? — Romamiut 10:13-15.

8. Nutaarsiassamik nuannersumik oqaluussisartutut Jiisusi qanoq ilaarsinnaavarput?

⁸ Jiisusip inuunerani suna pingaarnerpaava? Taassuma Romamiut naalagaatitaat Pontiusi Pilatusi ima oqarfigaa: „Silarsuarmut pivunga sallusuissut nalunaajaassutigissallugu.“ Sumiluunniit tusarnaarusuttoqartillugu Jiisusi oqaluussisarpoq, kiffartorninilu ima nuannaarutigitigaa timikkut pisariaqartitaminit pingaarnerutillugu. (Johannesi 4:5-34; 18:37) Jiisusitut nutaarsiassap nuannersup oqaluussissutiginissaanut kajumissuseqarutta, allat tamatuminnga oqaluttuunniarlugit periarfissarsiuassaagut. Kiffartornermi aallussilluarutta anersaakkut nukissaqartuarnissatsinnut iluaqutigissavarput. — Apustilit Suliaat 18:5.

Eqqortinnaveeqqut, niaqorornaveeqqut panalu

9. Eqqortinnaveeqqussuaq Romamiut sakkutuuinut qanoq illersuutaasinnaava?

⁹ Uppernerup eqqortinnaveeqqutaa. Grækerit oqaasiata ’eqqortinnaveeqqummik’ nutserneqartup isumagaa eqqortinnaveeqqut timip annersaanik assiisinnaasoq. ’Qarsunut ikumasunut’ Efesosimiut 6:16-imi eqqaaneqartunut illersuutaasinnaavoq. Biibilip nalaani sakkutuut qarsut atortagaat sullortuunik sanaajupput, nuumikkut saviminermik ikummatissaasivittallit naftamik ikummatissamik imerneqarsinnaasumik. Biibilimik misissueqqissaartartup qarsut taamaattut ’itsaq sorsunnermi sakkut navianarnerpaat ilaattut’ allaatigisimavai. Sakkutooq qarsunut taamaattunut eqqortinnaveeqqussuarmik illersuuteqanngikkuni ikiligaarujussuarsinnaavoq toqutaasinnaalluniluunniit.

10, 11. (a) ’Qarsut ikumasut’ qanoq ittut Saatanip atortarpai upperunnaarsinniarluta? (b) Jiisusip maligassiaata qanoq ersersippaa annikilliornartorsiorfiusuni uppernerup pingaaruteqarnera?

¹⁰ ’Qarsut ikumasut’ qanoq ittut Saatanip atortarpai  upperunnaarsinniaraangamisigut? Ilaqutariinni, suliffimmi atuarfimmiluunniit malersuineq akerlilersuinerluunniit sakkortusarsinnaavaa. Nunap piinik amerlanerujartuinnartunik pigisaqarusunneq kinguaassiuutitigulluunniit inuunerlunnissamut ussernartorsiorneq aamma kristumiut ilaannut anersaakkut peqqinnartuusimanngilaq. Navianartorsiortitsisinnaasunut taamaattunut illersorneqarniarluta ’tamani kivissimasariaqarparput uppernerup eqqortinnaveeqqutaa’. Uppissuseqalertarpugut Jehova pillugu ilinniaraangatta, aalajangersimasumik qinunikkut attavigisaraangatsigu maluginiartaraangatsigulu taassuma qanoq illersorlutalu pilluaqqusaraatigut. — Josva 23:14; Lukasi 17:5; Romamiut 10:17.

¹¹ Nunamiikkallarami Jiisusip ersersissimavaa annikilliornartorsiorfiusuni upperluarneq qanoq pingaaruteqartigisoq. Ataatami aalajangigaanik tatiginnilluinnarpoq Guutillu piumasaatut iliorneq nuannaarutigalugu. (Matthæusi 26:42, 53, 54; Johannesi 6:38) Allaat Naatsiivimmi Getsemanemi Jiisusi annilaangangaaraluarluni Ataataminut ima qinuvoq: „Uanga piumasara pinnani illit piumasat pili.“ (Matthæusi 26:39) Jiisusip puiunngisaannarpaa assuarnaattuarnissami Ataatamilu uummataanik nuannaartitsinissami qanoq pingaaruteqartiginerat. (Ussatit 27:11) Uagut taassumatut Jehovamut tatiginnikkutta, uppernerput isornartorsiuinermit akerlilersuinermilluunniit sanngiillisinneqartissanngilarput. Uppernerpulli nakussatsinneqassaaq Jehova tatigigutsigu, asanninnermik ersersitsivigisarutsigu inatsisaalu maleruartarutsigik. (Tussiaat 19:8-12; 1 Johannesi 5:3) Nunap pii nalillit inuulluarniutilluunniit qaangiutiasut suulluunniit Jehovap asasiminut pilluaqqussutigiumaagaanut naleqqiunneqarsinnaanngillat. — Ussatit 10:22.

12. Niaqorornaveeqqutip assersuutaasup suna illersortarpaa, sunalu pillugu niaqorornaveeqqut taama pingaaruteqartigaa?

¹² Niaqorornaveeqqut annassut. Niaqorornaveeqqutip  sakkutuup niaqua qarasaalu — taamaattumillu eqqarsarsinnaanera — illersortarpai. Kristumiutut neriuuterput niaqorornaveeqqummut assersuunneqarpoq isummatsinnut illersuutaagami. (1 Thessalonikamiut 5:8) Naak Guutip oqaasianik eqqorluartumik ilisimasaqalernikkut isumarput nutaanngortissimagaluaripput, suli inuttut sanngiillutalu naammalluinnanngitsuuvugut. Isumarput ajortunngoriaannaavoq. Anguniakkat kissaatillu pissutsit aaqqissuussaanerannit matumannga pisut allamut saasaatigisinnaavavut allaallu neriuuterput Guutimeersoq puiorsinnaallugu. (Romamiut 7:18; 12:2) Diaavulup iluatsinngitsumik Jiisusi allamut saasaraluarpaa „silarsuarmi naalagaaffiit tamaasa taakkualu alutornassusiat“ nereroorutigalugit. (Matthæusi 4:8) Jiisusilli neqeroorut itigartilluinnarpaa, taannalu pillugu Paulusi ima allappoq: „[Jiisusip] nuannaarnissaq siunerminiittoq pillugu sanningasulik [nappagaq anniartitaaffik, NV] naammagalugu atorpaa kanngunarsaataanera soqutiginagu, maannalu Guutip issiavissaarsuata talerpiata tungaani issialluni.“ — Hebræerit 12:2.

13. Qanoq siunissamut neriuuteqartuarsinnaavugut?

¹³ Tatiginninneq Jiisusip tatiginninneratut ittoq isumaminik takkunnavianngilaq. Kissaatit anguniakkallu pissutsit aaqqissuussaanerannut matumunnga tunngasut eqqarsaatigisarutsigik, siunissamut neriuut pingaarnerutinnagu, Guutip neriorsuutaa uppererpiarunnaassavarput. Piffissap ingerlanerani neriuutaarulluinnarsinnaavugut. Aalajangersimasumilli Guutip neriorsuutai eqqarsaatigeqqissaartarutsigik, neriuuterput nuannaarutigiuarsinnaassavarput. — Romamiut 12:12.

14, 15. (a) Panarput assersuutaasoq suua, qanorlu atorsinnaavarput? (b) Ussernartunik akiuinitsinni anersaap panaa qanoq iluaqutigisinnaaneripput assersuuteqarit.

¹⁴ Anersaap panaa. Guutip oqaasia, imaluunniit tusarliussaa, Biibilimi allassimasoq panatut illuttut kiinalittut ippoq, upperisarsiornikkut ajoqersuutinik eqqunngitsunik suujunnaarsitsilluinnarsinnaasoq inuillu eqqortuliorusuttut anersaakkut kiffaanngissuseqalernissaannut iluaqutaalluarsinnaasoq. (Johannesi 8:32; Hebræerit 4:12) Aamma pana anersaakkut ittoq taanna imminut illersuutigisinnaavarput ussernartorsiortinneqaraangatta tunussisunilluunniit upperunnaarsinniarneqaraangatta. (2 Korinthimiut 10:4, 5) Qujamasuutigingaartariaqarparput ’Allakkat Guutimit anersaarfigineqarmata [isumassarsiarititaammata, NV] tamarmik ajunngitsuliornernullu tamanut piginnaanngorsarmatigut’. — 2 Timotheusi 3:16, 17.

¹⁵ Jiisusi inoqajuitsumi Saatanimit usserneqarami, pana taanna atorluarpaa tunngavilersuutit eqqunngitsut peqquserluttumillu ussernartorsiortitsinerit itigartillugit. Saatanip usserniaraangani ima akisarpoq: „Allassimavoq.“ (Matthæusi 4:1-11) Davidip, Jehovap Nalunaajaasuata Spaniamiup, aamma paasilersimavaa Biibili iluaqutigalugu ussernartut akiorsinnaallugit. 19-inik ukioqartoq arnap inuusuttup pinnersup eqqiaasuni suleqatigisaata ’nuannisaaqatigilaarumavaa’. Qaninniaraangat Davidip itigartittarpaa eqqiaasullu nakkutilliisuat qinnuigaa allami sulilerumalluni taama pisoqaqqeqqunagu. „Josefip maligassiaa eqqaamavara,“ David oqarpoq. „Taassuma inuunerlunneq itigartippaa qimaagasuarlunilu. Uangattaaq taamaaliorpunga.“ — 1 Mosesi 39:10-12.

16. Nassuiaruk sooq ’oqaatsimik sallusuissutaasumik eqqortumik atuisinnaassagutta’ ilinniartitaasariaqartugut.

¹⁶ Jiisusip aamma anersaap panaa atorpaa allat Saatanimit aniguisinnaaqqullugit. „Ajoqersuutiga uanga nammineq piginngilara, aallartitsisimali  pigaa,“ Jiisusi oqarpoq. (Johannesi 7:16) Jiisusip ajoqersueriaasia pitsaalluinnartoq ilaassagutsigu ilinniartinneqartariaqarpugut. Oqaluttuarisaanermik ilisimatooq juutiusoq Josefus Romamiut sakkutuui pillugit ima allassimavoq: „Sakkutuut ullut tamaasa sungiusartarput, sorsuffiusumiinnermittulli ilungersortigalutik, taamaattumik sorsunnermi taama qasujaatsigisarput.“ Anersaakkut sorsunnitsinni Biibilip atortarnissaa pingaaruteqarpoq. Aammattaaq ’noqqaassutigisariaqarparput sulisutut kanngusuutissaqanngitsutut oqaatsimik sallusuissutaasumik nassuiaasutut [eqqortumik atuisutut, NV] Guutip saavani misiligaanitsinni attassinissarput’. (2 Timotheusi 2:15) Nalerisimaarnartaqaarlu soqutiginnittup apeqqutaa Biibili atorlugu akisinnaagaangatsigu!

Periarfissat tamaasa qinusarit

17, 18. (a) Qanoq qinuneq iluaqutigalugu Saatani akiorsinnaavarput? (b) Qinunerup pingaaruteqarnera pillugu assersuuteqarit.

¹⁷ Sakkutuussutit tamarmiusut anersaakkut ittut sammereerlugit Paulusi pingaarutilimmik allamik siunnersuuteqarpoq. Saatani akiorsinnaajumallugu kristumiut ’qinujuartariaqarput torlulallutillu’. Qanoq akulikitsigisumik? „Tamatigut Anersaakkut qinusassaasi,“ Paulusi allappoq. (Efesosimiut 6:18) Ussernartorsiortinneqaraangatta, misilinneqaraangatta nikallungagaangattaluunniit qinunikkut nakussatsineqangaarsinnaavugut. (Matthæusi 26:41) Jiisusi „nillingaarluni qullilillunilu qinuvoq torlulallunilu toqumit annaassisinnaasumut, qinnutaalu tusarneqarpoq Guutimik mianerinnittuummat“. — Hebræerit 5:7.

¹⁸ Milagros, ukiut 15-it sinnerlugit uiminik katsorsarneqarsinnaanngitsumik nappaatilimmik paarsisimasoq, ima oqarpoq: „Nikalloraangama qinunikkut Jehova saaffigisarpara. Taassumatut uannik allamik ikiuisinnaasoqanngilaq. Nassuerutigisariaqarpara ilaannikkut pinertusaarsinnaajunnaavissutut misigisarnera. Jehovamulli qinoreeraangama tamatigut misigisarpunga nukissaqaqqilersimallunga pinertusaarsinnaanngoqqissimallungalu.“

19, 20. Saatanimut sorsunnermi ajugaassagutta suut pisariaqartippavut?

¹⁹ Diaavulup nalunngilaa piffissakilluni, ajugaaffiginiarlutalu ilungersorneruleraluttuinnarpoq. (Saqqummersitat 12:12, 17) Akeraq pissaanilik taanna akiugassaraarput ’sorsuppugullu ajunngitsoq sorsuutigalugu’. (1 Timotheusi 6:12) Taamaaliussagutta pissaaneq pissusissamik akimuisoq pisariaqartipparput. (2 Korinthimiut 4:7) Aamma Guutip anersaavanit ikiorneqartariaqarpugut taamaattumillu tamanna qinnutigisariaqarlutigu. Jiisusi ima oqarpoq: „Ilissi ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.“ — Lukasi 11:13.

²⁰ Jehovap sakkutuussutaasa tamarmiusut atinissaat pingaaruteqarluinnarpoq. Sakkutuussutit tamakku atorsinnaassagutsigik Guutip pissusiitut ittut soorlu upperneq iluarnerlu ineriartortittariaqarpavut. Taamaaliussagutta sallusuissut nuannarisariaqarparput qititsinnut ’qilerussimasutut’ illugu, periarfissaqarnerit tamaasa nutaarsiassap nuannersup oqaluussissutiginissaanut kajumissuseqartariaqarluta isumarpullu siunissamut neriuutitsinnut sammitittariaqarlugu. Anersaap panaata atorluarnissaa ilinniartariaqarparput. Guutip sakkutuussutai tamarmiusut atigutsigik anersaanut pissaanilinnut ajortunut sorsunnermi ajugaasinnaavugut Jehovallu aqqa illernartoq ataqqinaatissillugu. — Romamiut 8:37-39.  (wE 9/15 04)

[Quppernerup ataani ilanngussaq]

Qanoq akissavit?

• Sakkutuussutinik anersaakkut ittunik atuinermi kina maligassaalluarnerpaava, sunalu pillugu taassuma maligassiuinera misissortariaqarparput?

• Isumarput uummaterpullu assersuutaasoq qanoq illersorsinnaavavut?

• Anersaap panaanik qanoq atuillaqqissisinnaavugut?

• Sooq periarfissat tamaasa qinusariaqarpugut?

[Atuaqqissaarnermi apeqqutit]

[Qupp. 29-mi assiliartat]

Biibilimik peqqissaartumik atuaqqissaartarutta periarfissat tamaasa nutaarsiassap nuannersup oqaluussissutiginissaanut kajumissuseqalersinnaavugut

[Qupp. 30-mi assiliartat]

Neriuuterput qularnaatsoq iluaqutigalugu misilinneqarnerit naammagalugit atorsinnaavavut

[Qupp. 31-mi assiliartat]

Oqaluussinermi ’anersaap panaa’ atortarpiuk?