Jehovap oqaasia uumavoq

Mosesimik allakkat tallimaat-nit pingaarnersat

UKIOQ 1473-iuvoq u.n.s. Ukiut 40-t qaangiussimapput Jehovap Israelikkunnik Egyptenimi inussiaanermit aniguisitsineraniit. Ukiuni taakkunani Israelikkut inoqajuitsumiissimapput inuiaqatigiittullu suli nunaqaratik. Maannakkulli nunamut neriorsuutigisamut kiisami isingajalerput. Nuna tamanna pigilerpassuk qanoq pisoqassava? Sunik ajornartorsiuteqalissappat, aamma ajornartorsiutit qanoq anigussavaat?

Kuussuaq Jordani ikaarlugu Kana’anip nunaanut isinnginneranni Mosesip ilagiit Israelikkut suliassamut pingaartumut piareersarpai. Qanoq? Arlaleriarluni oqalugiarfigai kajumissaarlugit, kaammattorlugit, oqaaqqissaarlugit mianersoqqullugillu. Israelikkut eqqaasippai Jehova Guuti tunniusimalluinnarfigineqarnissaminik piumasaqartoq inuiaqatigiillu eqqaminniittut malinniassanngikkaat. Oqalugiaatit taakkuinnangajaat Mosesimik allakkat tallimaat-ni sammineqarput. Siunnersuutit tassaniittut ullumikkut taamatulli pisariaqartitsigaavut, uagut aamma silarsuarmi Jehovap tunniusimalluinnarfiginissaanut unamminiarnartulimmi inuugatta. — Hebræerit 4:12.

Mosesimik allakkat tallimaat Mosesip allassimavai kapitali kingulleq kisiat pinnagu. Tassani sammineqarput qaammatit marluk sinnilaarlugit pisimasut. * (5 Mosesi 1:3; Josva 4:19) Misissoriartigu allakkat qanoq iluaqutigisinnaanerlutigik Jehova Guutip uummatikkut iluunngarluta asanissaanut aalajaallutalu kiffartorfiginissaanut.

’ILLIT NAMMINEQ MISIGISIMASATIT PUIGUSSANNGILATIT’

(5 Mosesi 1:1– 4:49)

Oqalugiaatimini siullermi Mosesip inoqajuitsumi Israelikkut misigisimasaasa ilaat eqqartorpai — pingaartumik nunamik  neriorsuutigisamik tiguaanissamut piareersarneranni taakkununnga iluaqutaasussat. Eqqartuussisunik ivertitsinermik oqaluttuaq taakkuninnga eqqaasitsisimassaaq Jehovap asannittumik isumassuilluni innuttaminik aaqqissuussisarneranik. Mosesi aamma oqaluttuarpoq alapernaarsuisut qulit ajortumik nalunaaruteqarnerat pissutigalugu siuaasaat nunamut neriorsuutigisamut isersimanngitsut. Takorlooriaruk mianersoqqussut tamanna qanoq Mosesip tusarnaartuinut sunniuteqartigisimassasoq, nuna maannakkut isigisinnaaleramikku.

Kuussuup Jordanip akianiileramik nunalu tiguarnialeramikku Jehovap Israelikkunnik ajugaasitsisarnerinik eqqaamasatik sapiissuseqalissutigisimassavaat. Nuna tinguagassaat guutipilussiortoqangaarpoq. Taamaattumik naleqqulluinnarpoq Mosesip assilissanik pallorfiginninnermut mianersoqqummagit!

Allassimaffinnut apeqqutit akineqartut:

2:4-6, 9, 19, 24, 31-35; 3:1-6 — Sooq Israelikkut Jordanip kangiani inuiaat najugaqartut ilaannaat suujunnaarsippaat? Jehovap Israelikkut peqquai Esauip erneri saassuteqqunagit. Sooq? Jaakup qatanngutaata kinguaarimmagit. Moabikkut Ammonikkullu akornusersortussaanngilaat sorsuffigissanagillu, Aaperaap jornguata Lotip kinguaarimmagit. Amorikkulli kunngii Sihoni Ogilu nunamut tamatumunnga assingusumik attaveqanngillat, taamaattumik nuna pigisartik piumaffigisinnaanngilaat. Taamaattumik Sihonip Israelikkut tamaanaaqqunngimmagit Ogillu sorsuffigilermagit Jehovap Israelikkut peqquai illoqarfiit inuillu suujunnaarseqqullugit.

4:15-20, 23, 24 — Guutilialioqqusinnginneq isumaqarpa eqqumiitsuliamik inuusaateqarneq ajortuusoq? Naamik. Inerteqqummi pineqarpoq pallorfiginninnermi atugassamik assilialiunnginnissaq imaluunniit inuusaliunnginnissaq ’taakkuninngalu pallorfiginninnginnissaq guutisiorfiginninnginnissarlu’. Biibilimi inerteqqutigineqanngilaq eqqumiitsuliorluni inuusaliorneq assilialiornerluunniit. — 1 Kunngit 7:18, 25.

Ilinniarfigisinnaasavut:

1:2, 19. Israelikkut ukiuni 38-ni inoqajuitsumi angalaarput, naak ’Horebimit [qaqqanit Sinajip eqqaaniittunit inatsisit qulit tunniunneqarfigisaannit] Kadesh-Barneamut aqqutaa Seʹirip qaqqai aqqusaarlugit ulluni aqqanilinni ingerlasariaannaagaluartoq’. Tassa Jehovamut naalannginneq akisoqaaq! — 4 Mosesi 14:26-34.

1:16, 17. Guutip eqqartuussinermut najoqqutassiai ullumikkut aamma taamaapput. Eqqartuussisutut naliliisitatut akisussaassusilerneqartut assigiinngisitsineq inunnilluunniit qunugisaqarneq aalajangernerminnut sunniuteqartissinnaanngilaat.

4:9. ’Namminneq misigisimasamik puigunnginnissaat’ Israelikkut iluatsitsinissaannut pingaaruteqarluinnarpoq. Silarsuaq nutaaq neriorsuutigineqartoq qanilliartortillugu pingaaruteqarpoq uaguttaaq Jehovap iliuuserisimasaanik nuanningaartunik eqqaamannittuarnissarput oqaasianik atuaqqissaartarnikkut.

JEHOVA ASAJUK INASSUTAALU NAALALLUGIT

(5 Mosesi 5:1–26:19)

Aappassaanik oqalugiarami Mosesi oqaluttuarpoq qanoq Inatsisit Qaqqami Sinajimi tunniunneqarsimasut Inatsisillu Qulit eqqaaqqillugit. Inuiaqatigiit arfineq-marluk suujunnaarsitaaluinnartussat eqqartorpai. Israelikkut inoqajuitsumi ilinniarsimasaminnik pingaarutilinnik eqqaasinneqarput: ’Inuup timiusaannaq inuussutiginngilaa, oqaaserli sunaluunniit [Jehovap] qarnanit anisoq inuussutigisarpaa.’ Maanna nutaanik atugaqaleramik ’peqqussutigisai tamaasa maleruartariaqarpaat’. — 5 Mosesi 8:3; 11:8.

Nunamut neriorsuutigisamut nunasileramik Israelikkut inatsisinik pallorfiginninnermut tunngasuinnaanngitsunik pisariaqartitsilerput, aammali eqqartuussinermut, naalakkersuinermut, sorsunnermut inuiaqatigiillu inuinnaallu ulluinnarni inuunerannut tunngasunik. Mosesip inatsisit taakku uteqqippai erseqqissarlugulu Jehovamut asanninnerup inatsisaanillu naalannerup pingaaruteqassusiat.

 Allassimaffinnut apeqqutit akineqartut:

8:3, 4 — Sooruna Israelikkut inoqajuitsumiitsillutik atisaat nungullanngitsut isigaallu pullannatik? Tamanna tupinnartuliaavoq, soorluttaaq mannamik pilersorneqarnerat tupinnartuliaasoq. Israelikkut aallaramilli atisatik aloqutitillu atukkatik atorpaat allanullu kingornutsittarsimassagunarlugit meeqqat alliartortillugit utoqqaallu toqugaangata. Inoqajuitsumi angalaneq aallartimmat naammassimmallu inunnik kisitsinerit takutimmassuk Israelikkut amerliartorsimanngitsut, atisat aloqutillu aallaramilli pigisaat naammattuarsimassapput. — 4 Mosesi 2:32; 26:51.

14:21 — Sooq Israelikkut uumasut isumaminnik toqusimasut aaverneqarsimanngitsut, namminneq neriumanngisatik, takornartanut tunniussinnaavaat allamiunulluunniit akigisinnaallugit? Biibilimi ’takornartaq’ tassaasinnaavoq Israelikkuunngitsoq juutit upperisaannut ilanngussimasoq aammalu nunasisoq nunap inatsisaanik malinnittoq Jehovamilli pallorfiginnittuunngitsoq. Allamiut nunasisullu juutit upperisaannut ilanngusimanngitsut Inatsisinut naalatsigititaanngillat, taamaattumillu uumasut isumaminnik toqusimasut assigiinngitsutigut atorsinnaavaat. Israelikkut uumasut taamaattut taakkununnga tunniussinnaallugillu tunisinnaavaat. Juutilli upperisaannut ilanngussimasoq Inatsisinut naalatsigititaavoq. Soorlu Mosesimik allakkat pingajui 17:10-mi atuarneqarsinnaasoq taanna uumasut aavannik nereqqusaanngilaq.

24:6 — Sooq ’aserorterivimmik ujaqqamilluunniit aserorterutitaanik sallunaveeqqutitut tigusineq’ ’inuunermik’ tigusinermut assersuunneqarsinnaava? Aserorterivik ujarallu aserorterutitaa inuunermut assersuutaavoq. Inuunermi pisariaqartut tamakkua ilaat tiguneqarpata ilaqutariit tamarmik inuussutissaarutissapput.

25:9 — Sakiatsiaminik nuliartaarumanngitsup aloqutaanik isigaanit peersinissaq kiinaatigullu qisersinissaq qanoq paasisariaqarpa? „Qanga Israelimi utertitsinissaq taartigiinnissarluunniit aalajangiiffigineqassagaangata arlaata ateraasani peeriarlugu aapparminut tunniuttarpaa.“ (Ruthi 4:7) Taamaammat sakiatsiaminik nuliartaarumanngitsup aloqutaanik peersineq isumaqarpoq taassuma pigisassaraluani qatanngunnilu angut toqusimasoq sinnerlugu kinguaassiorsinnaatitaanini sussakkeersimagai. Tamanna kanngunarsaataavoq ataqqinaataajaallunilu. (5 Mosesi 25:10) Kiinnakkut qiserneqarneq nikanarsaataavoq. — 4 Mosesi 12:14.

Ilinniarfigisinnaasavut:

6:6-9. Soorlu Israelikkut peqquneqartut Inatsisit ilinniaqqullugit, uaguttaaq Guutip inatsisai ilinniartariaqarpavut, eqqaamajuartariaqarpavut meeqqatsinnullu tamakku puiguikkiutsitsillugit. ’Assatsinnut qilerutissavavut ilisarnaatitut’, tassa iliuuseqartarnitsigut — assavut tamakkununnga assersuutaammata — takutittariaqarparput Jehova naalakkipput. Aamma ’qaatsinni inissinneqarsimasutut’ naalannerput tamanit takuneqarsinnaasariaqarpoq.

6:16. Qanortoq Jehova misilinngisaannartigu, soorlu Israelikkut Massami misilinniarsimagaluaraat, imissaaleqinertik naammagittaalliutigalugu ilumuunngitsulioramik. — 2 Mosesi 17:1-7.

 8:11-18. Nunap piinik pingaartitsivallaarutta Jehova puigorsinnaavarput.

9:4-6. Imminut iluartuutinneq mianersuutigisariaqarparput.

13:7. Inuit allat Jehovamik pallorfiginninnermit nigortinngisaannartariaqarpaatigut.

14:1. Inuup timaanik kilertiterineq ataqqinninnginneruvoq; taamaaliorneq eqqunngitsumik upperisarsiornermut attuumassuteqarpoq pinngitsoorneqartariaqarlunilu. (1 Kunngit 18:25-28) Toqusoqaraangat taama ingasattajaartigisumik aliasunneq kristumiunut makinnissamik upperisaqartunut naapertuutinngilaq.

20:5-7; 24:5. Allaat suliassat pingaarutillit eqqarsaatigalugit immikkut ittunik atugallit innimigineqartariaqarput.

22:23-27. Arnap pinngitsaaliniarneqartup illersuutissaasa pitsaanerpaat ilaat tassaavoq nillianeq.

„INUUNEQ QINERNIARUK“

(5 Mosesi 27:1–34:12)

Pingajussaanik oqalugiarami Mosesip eqqaavaa Israelikkut kuussuakkut Jordanikkut ikaareerunik Inatsisit ujarassuarnut allassagaat eqqartussallugillu perloqqussutit naalannginnerup kingunerisai pilluaqqussutillu naalannerup kingunerisai. Oqalugiaatit sisamaata aallaqqaataani Jehovap Israelikkullu angerusiat nutarterneqarpoq. Mosesip naalannginnissaq mianersoqqussutigeqqippaa inuillu kajumissaarlugit ’inuuneq qineqqullugu’. — 5 Mosesi 30:19.

Mosesi sisamariarluni oqalugiarpoq, aammalu oqaluttuuppai allamik siulersuisoqalissasut, Israelikkullu erinarsuummik nuannersumik Jehovamut unnersiutiginnissutaasumik ilumunngitsuliornerullu kingunipiluinut mianersoqqussutaasumik ilinniartillugit. Naggueqatigiit pilluaqqoreerlugit Mosesi 120-nik ukioqarluni toquvoq ilineqarlunilu. Ulluni 30-ni upputigineqarpoq, tassa piffissap Mosesimik allakkat tallimaat-ni pineqartup affangajaa.

Allassimaffinnut apeqqutit akineqartut:

32:13, 14 — Israelikkut suulluunniit tunnuanik nereqqusaanngivissut ’savaaqqat angutivissat tunnuannik’ nerinerat qanoq paasisariaqarpa? Oqaatsit uani assersuutitut atorneqarput, isumaqartinneqarlutillu uumasut pitsaanerpaartaat. Versimi tassani taalliarpalaartuunera ersersinneqarpoq aamma ’qajuusiassat tartoqutaat tunnoq’ eqqaaneqarmat.

33:1-29 — Sooq Simmiuut toqqaannartumik eqqaaneqanngila Mosesip Israelikkut pilluaqqummagit? Simmiuup Levillu ’uumitsannerata sualuppallaarnerat kamanneratalu sakkortuallaarnerat’ pissutaavoq. (1 Mosesi 34:13-31; 49:5-7) Naggueqatigiinnit allanit allaanerulaartumik kingornussipput. Levi illoqarfinnik 48-nik tunineqarpoq, Simmiuullu kingornussarsiaa Judamiippoq. (Josva 19:9; 21:41, 42) Mosesip taamaattumik Simmiuut toqqaannartumik pilluaqqunngilaa. Israelikkulli nalinginnaasumik pilluaqqusaanerat aamma Simmiuukkunnut tunngavoq.

Ilinniarfigisinnaasavut:

31:12. Ilagiit ataatsimiinnerini meeqqat inuusuttullu inersimasut issiaqatigisassavaat, tusarnaarniartariaqarlutillu ilinniarniartariaqarput.

32:4. Jehovap iliuusii tamarmik naammalluinnartuupput, naapertuilluarnera, ilisimassusia, asanninnera pissaaneralu oqimaqatigiilluinnartarmata.

Iluaqutigingaarsinnaavavut

Mosesimik allakkat tallimaat-ni ersersinneqarpoq Jehova ’ataasiusoq’. (5 Mosesi 6:4) Inuiaqatigiit Guutimut asseqanngilluinnartumik attaveqartut pillugit allagaavoq. Aamma guutipilussiornermut mianersoqqussuteqarpoq erseqqissarneqarlunilu Guutip ilumoortup tunniusimalluinnarfigineqarnissaa qanoq pingaaruteqartigisoq.

Mosesimik allakkat tallimaat iluaqutigingaarsinnaavavut. Naak inatsisinut naalatsigititaanngikkaluarluta atuarneranni ’uummatikkut iluunngarluta tarnikkullu iluunngarluta nukivullu tamakkerlugit [Jehovap] Guutitta asanissaa’ pillugu ilikkagaqangaartarpugut. — 5 Mosesi 6:5.  (wE 9/15 04)

[Quppernerup ataani ilanngussaq]

[Qupp. 8-mi nunap assinga]

(Allassimasut qanoq inissisimanersut naqitami takuneqarsinnaavoq

SEʹIRI

Kadesh-Barnea

Qaqqaq Sinaji (Horebi)

Imaq Ivissuartooq

[Suminngaanneernera]

Nunap assinga Pictorial Archive (Near Eastern History) Est. and Survey of Israel-meersut

[Qupp. 8-mi assiliartaq]

Mosesimik allakkat tallimaat-ni Mosesip oqalugiaataannangajavii sammineqarput

[Qupp. 10-mi assiliartaq]

Jehovap mannamik pilersuinera qanoq ilinniarfigisinnaavarput?

[Qupp. 10-mi assiliartaq]

Aserorterivimmik ujaqqamilluunniit aserorterutitaanik sallunaveeqqutitut tigusineq ’inuunermik’ tigusinermut assersuunneqarsinnaavoq