Siunnersuutit ajunngitsut atorfissaqartinneqarpat?

AMERLASUUT isumaqarput ajunngitsunik ajortunillu immikkoortitsisinnaallutik, aamma qanorluunniit iliornissaminnut pisinnaatitaallutik. Allat isumaqarput ilerasuutiginagu iliuuserisinnaasat tamarmik ajunngitsuusut. Isummat taamaattut ingammik aappariinnermut ilaqutariinnermullu, inuiaqatigiinnut tunngaviusutut sivisuumik isigineqarsimasumut, tunngatillugu ersersinneqartarput. — 1 Mosesi 3:5.

Verónica * Mexicomi najugalik assersuutigeriartigu. Taanna ima oqaluttuarpoq: „Ukiut 15-inngorlugit katiffissiornissarput sioqqutilaarlugu uima oqaluttuuppaanga allamik sammisaqarluni. Oqarpoq arnaq taanna inuusunnerummat ilorrisimaarnerusutullu misigitittarmani qimanniarnagu. Annilaaqaanga eqqarsaatigalugu uima, ikinngutiginerpaasama, aappariunnaarnissaa tapersersortigiunnaarnissaalu. Siornatigut isumaqarsimavunga pisinnaasut ajornerpaartaasa ilaat tassaasoq asasamik toqukkut annaasaqarneq. Uannulli allasiorneq ilumut annernarneruvoq, asangaagarami annaaginnanngilara, annerisannilli iliortuarnera akueriinnartariaqarpara.“

Taavali angummik 22-nik ukiulimmik avereersimasumik ernilimmillu, ataatatulli akisussaaffimminik tiguserusunngitsumik, pisimasoq. Taassuma ilimagaa erninilu anaanami isumagissagaatik. Piumasani tamaasa akuerinngikkaangagit, meeqqatut perorsarsimanngitsutut kamalertarpoq saapiloortarlugulu. Arnaa taama sakkortuuliorfigineqarnini pillugu ikiortissaqanngitsutut misigisarpoq.

Taanna kisimi taama ittuunngilaq. Sumi tamaani averusernerit avinnerillu nalinginnaaleraluttuinnarput. Meerarpassuit angajoqqaamik arlaata nuunneranut nutaamillu aallartinneranut takunnittuupput. Inuusuttut ilaat allanut, allaat angajoqqaaminnut, ataqqinnikkunnaavissimapput, qangalu eqqarsaatigineqarsinnaanngitsutut isigineqartunik iliuuseqartalersimapput. Nunani  amerlasuuni inuusuttut aalajangersimanngitsumik atoqateqarnermik misileraasarnerat, ikiaroornartutortarnerat, inunnik saassussisarnerat, ilinniartitsisunik angajoqqaaminnilluunniit toqutsisarnerat qaqutigoortuunngilaq. Malugisimassagunarpat meeqqanik perorsaanermut aappariinnermullu tunngasuinnaanngitsunik inuiaqatigiit assut ajornartorsiuteqartut.

Allanngoriartorneq tamanna qimerlooraanni ima aperinartarpoq: Inuiaqatigiinnuku susut? Inuit ilumut ajortoq ajunngitsorlu immikkoortissinnaappatigik, sooq ajornartorsiutit aaqqinneqanngitsut suli taama amerlatigippat? Siunnersorneqarluarnissaq pisariaqartinneqarpa? Siunnersuutit iluaqutaasut tatiginartullu sumi nanineqarsinnaappat? Inuppassuit oqartarput Guuti taassumalu oqaasia allassimasoq upperalugu, aalajangikkaminnulli sunniuteqarnerannik takussutissaqaratik. Guutimit siunnersorneqarumalluni iliuuseqarneq ajunngitsunik sunik kinguneqartarpa? Ilanngutassiami tulliuttumi tamanna misissoriartigu.

[Quppernerup ataani ilanngussaq]