„Aappimik akisinnaarusuppugut“

JEHOVAP NALUNAAJAASUISA Nigeriami immikkoortortaqarfiat qanittukkut allagarsivoq naalisarlugu imaattumik:

„Ernerput Anderson 14-inik ukioqarluni toquvoq. Toqutinnani marlunnik nakkutigisaminik kukkukuuaraateqarpoq. Tuniniassamaarpai aningaasallu immikkoortortaqarfimmut, silarsuaq tamakkerlugu oqaluussinermut, tapersiilluni tunissutitut nassiunniarlugit. Kukkukuuaqqalli suli tuniniarneqarsinnaalinngitsut toquvoq.

Kissaatigisaa tunngavigalugu kukkukuuaqqat nakkutigaavut kingornalu tunillugit. Matumuuna aningaasat Andersonip tapersiissutaatut nassiuppavut. Jehovap neriorsuutaa pissutigalugu qularinngilarput qanittukkut — qanittuararsuakkut — Anderson takoqqissallugu. Aperippat kissaatigisani eqquutitissimaneripput aappimik akisinnaarusuppugut. Andersoniinnaanngitsup, aammali ’nalunaajaasut amerlasuut’ toqusunit makititaasussat, naapinnissaat qilanaaraarput.“ — Hebræerit 12:1; Johannesi 5:28, 29.

Soorlu allakkani qulaani eqqaaneqartuni ersersinneqarluartoq makititaanissamik upperisaqarneq kristumiunut ilumoortunut qiimmassaataavoq. Ilaqutariit millionillit, Andersonip ilaqutaasut, asasatik toqukkut annaasimasatik tikilluaqqusinnaanngorunikkit, tamanna qanoq nuannaarutigitigissavaat! — 1 Korinthimiut 15:24-26.

Guutip oqaasiani makititaanissamik neriuut tuppallernartoq tamanna, pisussat alianaatsut Guutip naalagaaffiata ataani silarsuassami nutaami naapertuilluassuseqarfiusumi piviusunngungajalersut ilaattut, saqqummiunneqarpoq. (2 Petrusi 3:13) Taamanikkussamut Guutip inunnut iliuuseriumaagai pillugit Biibilimi imatut allassimasoqarpoq: „Qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ — Saqqummersitat 21:4. (wE 8/1 04)