Kikkut ullumikkut Guuti ataqqinartippaat?

„Illit, [Jehova Guuterput], qinngaqqunnanngillat pigissallugit naalannaat ataqqinaallu pissaanerlu.“ — SAQQUMMERSITAT 4:11.

1, 2. (a) Biomimetik pillugu assersuuteqarit. (b) Suna apeqqutaalerpa, qanorlu akineqassava?

1940-kkunni ullut ilaanni ingeniørip George de Mestralip Schweizimiup qimmini pisuttuaqatigaa. Angerlarami takulerpaa atisani qimmillu meqqui burrenik ulikkaartut. Alapernaalluni burret allisitsiummik misissulerpai, oqummersaaraasaaqqallu sunut tamanut orsilinnut naatittarnerat alutorilerpaa. Piffissap ingerlanerani taakkununnga assingusumik syntetiskiusumik nassaartuuvoq — velcrobåndimik. George de Mestral kisimi pinngortitarsuarmeersumik issuaasuunngilaq. USA-mi qatanngutigiit Wrightikkut timmisartuliorput timmiarujussuit timmisut misissoqqissaareerlugit. Aamma franskeq ingeniøri Alexandre-Gustave Eiffel Parisimi napasulialiorpoq aterminik atserneqartumik, inuup quttoraata saarnanut, timaata oqimaassusianik nammassinnaasusianut, tunngaviusut malillugit.

² Taakku assersuutissaalluarput biomimetik-imik taaneqartunut, tassa ilisimatuutut misissueriaaseq ilutsinik aaqqissuussinernillu pinngortitarsuarmiittunik ilaarsiniarluni. * Tamatumunnga atatillugu manna apeqqutaalerpoq: Nassaartut taakkua burreeqqanik, timmiarujussuarnik, inuup quttoraata saarnanik allarpassuarnillu nalissaqanngitsunik pinngortitarsuarmiittunik, nassaartut ilarpassuisa tunngavigisaannik, pinngortitsisoq ataqqinartittarpaat? Ajoraluartumik Guuti ullutsinni qaqutigoortumik ataqqineqartariaqarnermisut ataqqinartinneqartarpoq.

3, 4. Oqaaseq hebræerisooq amerlanertigut „ataqqinninneq“-mik „naalannassuseq“-millu nutserneqartartoq qanoq isumaqarpa, qanorlu isumaqartillugu Jehovamut tunngatillugu atortariaqarparput?

³ Immaqa ilaat eqqarsarput: ’Guutimik ataqqinartitsinissaq pisariaqarpa? Ataqqinartooreerpormi!’ Ilumoorpoq Jehova qilammi nunamilu ataqqinarnerpaasoq naalannassuseqarnerpaallunilu, imaanngilarli inuit tamarmik taamatut isigigaat. Hebræerit oqaasiat Biibilimi „ataqqinninneq“-mik aamma „naalannassuseqarneq“-mik nutserneqartartoq isumaqavippoq „oqimaassuseq“. Tassa inuup ataqqineqarnera isumaqarpoq taanna pingaartinneqartoq nuannarineqangaartorlu. Guutimut tunngatillugu tamanna isumaqarpoq taanna pingaartinneqartoq sunniuteqartorlu.

⁴ Ullumikkut ikittuinnaat maluginiartarpaat Guutimik nersuisariaqarnermut pissutaasut. (Tussiaat 10:4; 14:1) Inuit inuiaqatigiinni nuimasut,  Guutimik immaqa upperinninngilluinnartut, qilammik nunamillu Pinngortitsisumut naalannartumut allanik allaat ataqqinninngitsumik iliortitsisarput. Qanoq taamaaliortarpat?

„Patsisiginiagassaqanngillat“

5. Qanoq ilisimatoorpassuit pinngortitarsuup tupinnartui suunngitsutut nassuiartarpaat?

⁵ Ilisimatoorpassuit oqartarput Guuteqanngitsoq. Qanormi pinngortitsinerup tupinnartui nassuiartarpaat, ilaatigut inuk? Tupinnartut taamaattut pinngoriartornikkut, pissaanernit kinaassusiliunngitsunit nalaatsornikkut, pisutut oqaatigaat. Assersuutigalugu pinngoriartuaarnermik tapersersuisoq Stephen Jay Gould ima allappoq: „Maaniippugut aalisakkat eqimattat arlaasa immikkut ittut avaleraat niunngorsinnaammata . . . Immaqa siunertamik itinerusumik maqaasisaqaraluarpugut — soqanngilarli.“ Richard E. Leakey aamma Roger Lewin isumaqataallutik ima allapput: „Immaqaana inuit naggueqatigiit kukkuluttorujussuarnikkut pilersimasut.“ Allaat ilisimatuut pinngortitarsuup kusanassusianik sananeqarneranillu alianaaginnittut nersorinnittullu Guuti ataqqinartinngitsoortarpaat.

6. Inuppassuit qanoq sunnerneqartarpat Guutimik Pinngortitsisutut ataqqinnittariaqarnermissut ataqqinartitsinnginnissamut?

⁶ Ilinniagartuut pinngoriartorneq piviusuuneraraangamikku oqamisaartarput ilisimaatsut kisimik ajoqersuummik tamatumannga upperinnikkumanngitsut. Isummamut taamaattumut inuppassuit qanoq qisuariartarpat? Ukiorpaaluit matuma siorna angut pinngoriartuaarsimanermik ajoqersuummik misissuilluarsimasoq aalajangerpoq isummamik tamatuminnga upperinnittut apeqqarissaarfiginiarlugit. Oqaluttuarpoq: „Paasilerpara pinngoriartuaarnermik ajoqersuummik upperisallit amerlanersaasa upperigaat tusarsimagamikku inuit silassorissut tamarmik upperigaat.“ Aap, ilinniagartuut Guutiitsutut isummaminnik saqqummiussigaangamik allat sunnertarpaat Guutimik Pinngortitsisutut ataqqinnittariaqarnerattut ataqqinartitsinngitsoortillugit. — Ussatit 14:15, 18.

7. Romamiut 1:20 naapertorlugu pinngortitarsuarmi takussaasumi suna erseqqissumik takuneqarsinnaava, aamma sooq?

⁷ Ilisimatuut piviusunik uppernarsakkanillu tunngaveqarlutik taama isumaqarpat? Naamerluinnaq! Avatangiiseqarpugut Pinngortitsisoqarneranut uppernarsaataasunik. Apustili Paulusi taanna pillugu ima allappoq: „Takussaanngitsuunera, ittuinnartumik pissaanera Guutiussusialu, silarsuup [inuiaat] pinngortitaaneraniilli takussaagaluarput suliaasigullu ilisimaneqarlutik. Taamaattumik [uppinngitsut] patsisiginiagassaqanngillat.“ (Romamiut 1:20) Pinngortitsisoqarnera piliaasigut erseqqilluinnarpoq. Taamaattumik Paulusi allappoq inuiaat pileqqaarneranniilli Guutip piunera ’ilisimaneqarsinnaasimassasoq’ pinngortitarsuaq takussaasoq uppernarsaataammat. Suna uppernarsaataagami?

8. (a) Qilak Guutip pissaaneranut ilisimassusianullu qanoq uppernarsaataava? (b) Suna uppernarsaataava avataarsuata aallarniisoqarneranut?

⁸ Qilak ullorialik uppernarsaataavoq Guutip piuneranut. „Qilaap oqaluttuaraa Guutip naalannassusia,“ Tussiaat 19:2-mi allassimavoq. ’Qilak’ — seqineq, qaammat ullorissallu — uppernarsaataapput Guutip pissaaneranut ilisimassusianullu. Ullorissat amerlassusiisa mianerinningaartilerpaatigut. Taakkulu tamarmik, ullorissat, seqineq qaammallu, avataarsuani ingerlaarput siunertalimmik, pinngortitami inatsisit aalajangersimasut malillugit. * (Esaja 40:26) Silatusaarnerua taamatut aaqqissugaalluarnermut nalaatsornerinnakkut pisunut ataqqinaammik tunniussineq? Maluginiarnarpoq ilisimatoorpassuit oqarmata avataarsua tassanngaannartumik aallarnerfeqartoq. Tamatuma pingaaruteqarnera nassuiarniarlugu professori ima allappoq: „Avataarsua piujuaannarsimasoq guutiitsut qulartulluunniit [isumaannut] tulluarnerpaavoq. Tamatumunnga assingusumik avataarsua aallarnerfeqartoq aallarniisoqartariaqarpoq; kiami takorloorsinnaavaa sunniut taamaattoq pissuteqanngitsoq?“

9. Uumasut eqqarsaatigalugit Jehovap ilisimassusia qanoq ersersinneqarpa?

⁹ Aamma maani nunami Guutip piuneranut uppernarsaateqarpoq. Tussiaasiortoq pilerpoq: „Amerlangaarput pinngortitatit, [Jehova]! Pinngortippatit  tamaasa ilisimasuullutit. Nunarsuaq pinngortitannik ulikkaarpoq.“ (Tussiaat 104:24) Jehovap piliaasa, ilaatigut uumasut, ilisimassusia uppernarsarpaat. Aallaqqaataani eqqaaneqartutut uumassusillit ilusaat ima torrallataatigipput ilisimatuunit ilaarniarneqartarlutik. Assersuutissarpaaluit misissoriartigit. Ilisimatuut tuttorsuup nassui misissoqqissaartarpaat niaqorornaveeqqummik ninngunerusumik sananiassagamik; niviukkat aalajangersimasut tutsarissut misissortarpaat tusartaatit pitsanngorsarniarlugit; uppiullu suluisa meqqui misissoqqissaartarpaat timmisartunik radarikkut takuneqarsinnaanngitsunik pitsanngorsaaniarlutik. Qanorluunniilli inuit ilungersortigigaluarunik, pinngortitarsuarmiittut naammalluinnartut asserluinnaannik sanasinnaalinngisaannassapput. Atuakkami Biomimicry — Innovation Inspired by Nature-mi allassimavoq: „Uumasut uumassusillit iliuusererusussinnaasavut tamaasa iliuuserisarpaat, ikummatissarpassuarnilli atuinatik, nunarsuarmik mingutsitsinatik siunissartillu navianartorsiortinnagu.“ Ilisimassuseq tupinnangaarami!

10. Ilusilersuisorsuaqarneranik miserratiginninneq sooq sianiilliornerussava? Assersuuteqarit.

¹⁰ Qilak qulitsinniittoq nunamiluunniit pinngortitat qimerlooraluarutsigik, pinngortitsisoqarneranut erseqqissunik uppernarsaatissaqarpoq. (Jeremia 10:12) Uummatikkut iluunngarluta pinngortitat qilammiut ima torlulasut isumaqatigalugit nassuerutigisariaqarparput: „Illit, [Jehova Guuterput], qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit.“ (Saqqummersitat 4:11) Ilisimatoorpassuit Pinngortitsisoqarneranut uppernarsaatit ’uummatimik isaannik’ takusinnaanngilaat, naak immaqa isiminnik takusinnaasamik ilusaat tupigusuutigigaluarlugit. (Efesosimiut 1:18) Imatut assersuusiorsinnaavugut: Pinngortitami kusanassuseq ilusilersueriaaserlu alutoralugit Ilusilersuisorsuaqarneralu miserratigalugu, ima sianiilliornerutigissaaq qalipagarsuarmik kusaginnittutut qalipaaffissamillu qalipaaffigineqanngitsumik qalipagarsuanngortitsisoqarneranik miserratiginniitigaluni. Tupinnanngilaq Guutimik upperinnikkumanngitsut ’patsisiginiagassaqanngitsutut’ oqaatigineqarmata!

’Tappiitsuullutik tappiitsunik ingerlassisut’ amerlasuut tammartittarpaat

11, 12. Siunissap siumut aalajangeriigaaneranik ajoqersuutip suna tunngavigaa, suullu takutippaa ajoqersuut taanna Guutimut ataqqinaataanngitsoq?

¹¹ Upperisarsiortorpassuit ilumoorlutik pallorfiginneriaasertik Guutimut ataqqinaataasoraat. (Romamiut 10:2, 3) Taamaattorli upperisarsiornerit ataatsimut isigalugit inuiaqatigiinnut, millionilippassuarnik Guutimik ataqqinnilersinnaasunik akornusiisunut, ilaapput. Qanoq? Periaatsit marluk misissoriartigit.

¹² Siullermik upperisarsiornerit Guuti kanngunarsarpaat eqqunngitsunik ajoqersuuteqarnermikkut. Siunissap siumut aalajangeriigaaneranik ajoqersuut assersuutigeriartigu. Ajoqersuut taanna isummamik matuminnga tunngaveqarpoq: Guuti siunissamik ilisimasaqarsinnaammat aamma sunik tamanik ilisimannereertariaqarsoraat. Siunissap siumut aalajangeriigaaneranik ajoqersuutip tunngavigaa Guutip qangali inuit ataasiakkaat tamavimmik siunissaat — ajunngippat ajorpalluunniit — aalajangereersimagaa. Paasinnittaaseq tamanna malillugu Guuti naalliuutinut ajussusermullu silarsuarmi ullumikkut takusinnaasatsinnut tamanut pisuutinneqartariaqarpoq. Guutimik akerlilersuisut pingaarnersaata, Saatanip, Biibilimi ’silarsuup naalagaaneratut’ taaneqartup, eqqortumik pisuussutigisaanik Guuti pisuutinneqaraangat taassumunnga ataqqinaataanngilluinnartarpoq! — Johannesi 14:30; 1 Johannesi 5:19.

13. Sooq sianiitsuliornerua isumaqassalluni Guuti siunissamik ilisimannissinnaanerminik qanoq atuissanerluni aalajangersinnaanngitsoq? Assersuuteqarit.

¹³ Siunissap siumut aalajangeriigaanera ajoqersuutaavoq Biibilerpalaanngitsoq Guutimut narrunarsaataasoq. Guutip iliuuserisinnaasai iliuuserisaalu paarlaanneqarput. Guutip pisussanik ilisimannereersinnaanerata ilumoortuunera Biibilimi erseqqilluinnarpoq. (Esaja 46:9, 10) Sianiilliornerussaarli isumaqassalluni Guuti siunissamik ilisimannissinnaanerminik qanoq atuissanerluni aalajangersinnaanngitsoq imaluunniit pisunut tamanut akisussaasoq. Ima assersuusioriarta: Timikkut nukittoorsuusuuguit oqimaatsut takusatit tamaasa kivikkumassagaluarpigit?  Soorunami naamik! Guuti aamma taamaappoq. Siunissamik ilisimannissinnaagaluarluni sunik tamanik siumut ilisimannittariaqanngilaq aalajangeereertariaqaraniluunniit. Nammineq aalajangertarpaa siumut ilisimannereersinnaanini qaqugu atussanerlugu. * Erseqqippoq ajoqersuutit eqqunngitsut, ilaatigut siunissap siumut aalajangeriigaaneranik ajoqersuut, Guutimut ataqqinaataanngitsut.

14. Upperisarsiornerikkut Guuti qanoq kanngunarsarneqartarpa?

¹⁴ Guutimut kanngunarsaataasoq alla tassa upperisarsiornerni ilaasortaasut pissusilersornerat. Jiisusip ajoqersuutaanik kristumiut maleruaanissaat naatsorsuutigineqarpoq, assersuutigalugu imminnut ’asaqatigiissasut’ aamma ’silarsuarmut ilaassanngitsut’. (Johannesi 15:12; 17:14-16, NV) Kristumiuunerartut palasii qanoq pippat? Ajoqersuutinik tamakkuninnga ilumut malinnittarpat?

15. (a) Inuiaat sorsukkaangata palasit qanoq iliortarsimappat? (b) Palasit iliuusii inunnut millionilippassuarnut qanoq sunniuteqarsimappat?

¹⁵ Misissoriartigu sorsuttoqaraangat palasit qanoq iliortarsimanersut. Inuiaat sorsunnerisa ilarpassuinik tapersersuisimapput, isiginngitsuusaarisimapput, allaallu siulersuisimapput. Sakkutuut pilluaqqusarpaat toqoraannerillu eqqortuunerartarlugit. Eqqarsaatiginngitsoorneq ajornaqaaq palasit taakkua eqqarsaatiginngisaannarsimaneraat palaseqatitik sorsuffiup illuatungaaniittut aamma taamatorluinnaq iliortartut. (Takuuk ungalusaq „Kikkummitaava Guutimik ileqarpat?“) Palasit Guuti ataqqinartittanngilaat sorsunnerni toqoraanertaqaqisuni Guutimit tapersersorneqarneraraangamik. Ataqqinartittanngilaattaaq Biibilimi najoqqutassiat itsanganeraraangamikkit kinguaassiuutitigullu inuunerlunnerit suulluunniit akueriinnaraangamikkit. Taakku upperisarsiornikkut siuttuusunut, Jiisusip ’inatsisinik unioqqutitsisutut’ aamma ’tappiitsuullutik tappiitsunik ingerlassisutut’ oqaatigisaanut assingulluinnarput! (Matthæusi 7:15-23; 15:14) Palasit iliuusii pissutigalugit millionilippassuit Guutimut asanninnerat nillertunngorsimavoq. — Matthæusi 24:12.

Kikkut Guuti ilumoortumik ataqqinartippaat?

16. Kikkut Guuti ilumoortumik ataqqinartinneraat paasiniarlugu sooq Biibili atortariaqarparput?

¹⁶ Silarsuarmi nuimasut sunniisinnaasusillillu amerlanersaat Guutimik ataqqinartitsinngitsoormata, kikkuuppammitaava Guutimik ilumoortumik ataqqinartitsisut? Apeqqut tamanna akisinnaajumallugu Biibili atortariaqarparput. Soorunami Guuti aalajangiisinnaatitaavoq qanoq ataqqineqassanerluni, najoqqutassallu oqaatsimini, Biibilimi, aalajangersarsimavai. (Esaja 42:8) Misissoriartigit Guutimik ataqqineriaatsit pingasut paasiniarlugulu kikkut ullumikkut ilumut taamaaliortarnersut.

17. Jehovap nammineq qanoq ersersippaa piumasaminik iliornermut tunngatillugu atermi naalannarsisinneqarnissaata pingaaruteqarnera, ullumikkullu kikkut Guutip aqqanik nunarsuaq tamakkerlugu unnersiutiginnittarpat?

¹⁷ Siullermik, Guuti ataqqisinnaavarput naalannarsisissinnaallugulu aqqanik unnersiutiginninnikkut.  Tamatuma Guutip piumasaanik iliornermut tunngatillugu pingaaruteqarnera erserpoq Jehovap Jiisusimut oqaasianit. Toqunissani ullualunnik sioqqullugu Jiisusi ima qinuvoq: „Ataataq, aqqit naalannarsisiguk!“ Taavalu nipi tutsiuppoq: „Naalannarsisereerpara, naalannarsiseqqikkumaarparalu.“ (Johannesi 12:28) Oqaluttoq nalunanngitsumik tassa Jehova nammineq. Akissutaanit erserpoq atermi naalannarsisinneqarnissaa pingaartikkaa. Ullumikkummi kikkut Jehova ataqqillugulu naalannarsisippaat aqqanik nunarsuaq tamakkerlugu ilisimannilersitsinermikkut unnersiutiginninnermikkullu? Jehovap Nalunaajaasui, taamaaliortarlutillu nunani 235-ni! — Tussiaat 86:11, 12.

18. Guutimik „ilumoornikkut“ pallorfiginnittut qanoq ilisarisinnaavavut, kikkullu ukiut 100-t sinnerlugit sallusuissutinik Biibilimeersunik ilinniartitsippat?

¹⁸ Aappassaanik, Guuti ataqqisinnaavarput allanik taanna pillugu sallusuissummik ilinniartitsinikkut. Jiisusi oqarpoq pallorfiginnittut ilumoortut ’Guuti pallorfigissagaat ilumoornikkut’. (Johannesi 4:24) Guutimik „ilumoornikkut“ pallorfiginnittut qanoq ilisarisinnaavavut? Ajoqersuutit Biibiliminngaaneersuunngitsut, Guutimik piumasaanillu eqqunngitsumik isiginnilersitsisut, itigartittariaqarpaat. Aamma sallusuissutinik minguitsunik Guutip oqaasianeersunik ilinniartitsisariaqarput, ilaatigut makkuninnga: Jehova Guutiuvoq Qutsinnerussaartoq, taannalu kisimi Qutsinnerussaartutut ataqqineqartariaqarnermisut ataqqinartinneqartariaqarpoq (Tussiaat 83:19); Jiisusi Guutip erneraa, Guutillu naalagaaffiani Missiarsikkoortumi kunngiusussatut toqqarneqarpoq (1 Korinthimiut 15:27, 28); Guutip naalagaaffiata Jehovap aqqa illernarsisissavaa nunalu inuilu tassaniittut pillugit siunertai naammassissallugit (Matthæusi 6:9, 10); nutaarsiassarlu nuannersoq naalagaaffik taanna pillugu nunarsuaq tamakkerlugu oqaluussissutigineqassaaq. (Matthæusi 24:14) Ukiut 100-t sinnerlugit sallusuissutinik naleqangaartunik taamaattunik aalajaalluni ilinniartitsissutiginnittoq gruppi ataasiinnaavoq, tassa Jehovap Nalunaajaasui.

19, 20. (a) Sooq kristumiup ileqqorissaarnera Guutimut ataqqinaataava? (b) Apeqqutit suut iluaqutigalugit ullumikkut kikkut ileqqorissaartuaannarnermikkut Guutimik ataqqinnittuunersut paasisinnaavarput?

¹⁹ Pingajussaanik, Guuti ataqqisinnaavarput najoqqutassiai malillugit inuunitsigut. Apustili Petrusi ima allappoq: „Guutimik nalusut akornanni ajunngitsumik inuugitsi, tamatumuunarpiaq taakkua ilissinnik pinerluttuuneraallutik mamarliisartut takusinnaaniassammatigit suliasi ajunngitsut taakkunuunatigullu Guuti unnersiutigisinnaaniassammassuk ullormi takusarneqarfissami.“ (1 Petrusi 2:12) Kristumiup ileqqulersornera upperisaanut ersiutaavoq. Takunnittut tamanna paasilerunikku — kristumiup ileqqorissaarnera upperisaanik pissuteqartoq — tamanna Guutimut ataqqinaataavoq.

²⁰ Ullumikkut kikkut ileqqorissaartuarnermikkut Guutimik ataqqinnippat? Aap, upperisarsioqatigiit sorliit oqartussaasorpassuarnit innuttaasutut qanilaartutut inatsisinillu maleruaasutut peqqissaarluarlutik akileraarutinik akiliisarmata nersualaarneqartarpat? (Romamiut 13:1, 3, 6, 7) Kikkut ilisimaneqarpat silarsuarmi tamarmi uppernikkut ataasioqatigiissutut — ataasioqatigiinnermik naggueqatigiissutsikkut inuaqatigiissutsikkullu assigiinngissutinik tamanik qaangeerujussuartutut? (Tussiaat 133:1; Apustilit Suliaat 10:34, 35) Kikkut silarsuaq tamakkerlugu Biibilimik ilinniartitsissutiginnittutut, inatsisinik, ilaqutariittut inuunermi ileqqussatigut najoqqutassianik Biibilimilu najoqqutassianik ataqqinninnissamik kajumissaarisutut, ilisimaneqarpat? Upperisarsioqatigiit tamakkunuuna allatigullu  erseqqissumik ileqqorissaartut ataasiinnaapput — Jehovap Nalunaajaasui!

Ullumikkut Guuti illit ataqqinartippiuk?

21. Sooq eqqarsaatigisariaqarparput nammineq Jehovamik ataqqinartitsinerluta?

²¹ Tamatta immikkut imminut ima aperisariaqarpugut: ’Guuti ataqqinartippara?’ Tussiaat 148 naapertorlugu pinngortitarsuarmiittut amerlanersaasa Guuti ataqqinartippaat. Inngilit, qilaat, nunarsuup uumasullu — tamarmik Jehova unnersiutigaat. (Versi 1-10) Alianaraluassusia ullumikkut inuit amerlanersaasa taamaaliunnginnerat! Guutimik ataqqinartitsilluta inuunitsigut pinngortitarsuup sinneranut Jehovamik unnersiutiginnittumut naleqqussassaagut. (Versi 11-13) Inooriaatsimik allamik pitsaanerusoqanngilaq.

22. Guutimik ataqqinartitsineq sunik pilluaqqussutitaqarpa, sunalu aalajangiusimalluinnartariaqarparput?

²² Jehovamik ataqqinartitsineq pilluaqqussutisiassartassarpassuaqarpoq. Kristusip utertitsissutitut pilliutaanik upperinnikkaangatta, Guutimit saammaanneqartarpugut Ataatatsinnullu qilammiusumut eqqissinartumik nuannersumillu attaveqalertarluta. (Romamiut 5:10) Guutimillu ataqqinartitsinermut pissutaasut eqqumaffigisarutsigit, isumalluarnerulissallutalu qujamasunnerulissaagut. (Jeremia 31:12) Taavalu allat pilluarnartumik siunertaqarluartumillu inuulernissaannik ikiorsinnaassavavut, taamaalillutalu nammineq pilluarnerulissalluta. (Apustilit Suliaat 20:35) Qanortoq Guutimik ataqqinartitsiniarlutik aalajangiusimannilluinnartunut ilaagisa — maanna naassaanngitsumullu!

[Quppernerup ataani ilanngussat]

Eqqaamavigit?

• Sooq oqarsinnaavugut ilisimatuut ataatsimut isigalugit inuit Guutimik ataqqinnilernissaannut iluaqutaasimanngitsut?

• Upperisarsiornerit inuit Guutimik ataqqinartitsinissaat qanoq ilillutik akornusersimavaat?

• Qanoq Guuti ataqqisinnaavarput?

• Sooq tamatta immikkut eqqarsaatigisariaqarparput Jehovamik ataqqinartitsinerluta?

[Atuaqqissaarnermi apeqqutit]

[Qupp. 12-imi ungalusaq]

„Kikkummitaava Guutimik ileqarpat?“

Angut sorsunnersuup aappaani tyskit sakkutuuisa timmisartortartuinut ilaasoq, kingornali Jehovap Nalunaajaasuinut ilannguttoq, ima oqaluttuarpoq:

„Ukiuni sorsuffiusuni . . . palasit upperisarsiortunit tamangajanneersut — katuullineersut, lutherikkunneersut episkopalerineersullu allaneersullu — timmisartunik inuttaannillu qaartartumeeriartunnginneranni pilluaqqusisut takullugit eqqissisimajunnaarutigaakka. Imminut ima aperisarpunga: ’Kikkummitaava Guutimik ileqarpat?’

Tyskit sakkutuuisa qitequtaasa ikkuffianni allassimavoq Gott mit u.n.s. (Guutip ilagaatigut). Eqqarsaatigingaartarparali apeqqut una: ’Sooq Guutip akeqqat sakkutuui upperisatta assinganik upperisallit Guutimut qinusut ilagissanngilai?’“