„Ungageqatigiigitsi“

„Qatanngutigiittut asaqatigiillusi ungageqatigiigitsi.“ — ROMAMIUT 12:10.

1, 2. Apustili Paulusi ullumikkullu ajoqersuiartortitaq qatanngutinut qanoq asannittumik attaveqarpat?

UKIUT 43-t Don Kangiani ajoqersuiartortitatut kiffartorsimavoq, kiffartuussaminullu asanningaartuunini inussiarnersuuninilu ilisimaneqaatigaa. Maannali toqulermat atuaqqissaaqatigisarsimasaasa ilaat kilometerit tusindillit angalapput napparsimalluni nallavianukarlutik ima oqarfiginiarlugu: „Kamsahamnida, kamsahamnida!“ — „Qujanarujussuaq, qujanarujussuaq!“ Koreamiutut. Donip qamannga pisumik tunniusimanera qamuuna attortissutigisimavaat.

² Donip oqaluttuarineqarnera pisimasuunngilaq qaqutigoortoq. Ukiuni hundredelinni siullerni apustili Paulusi kiffartuussaminut tunniusimalluinnarpoq. Paulusi imminik pilliutigaaq. Angutaangaluarluni qulanngilluinnartoq saamasuullunilu isumassuisuuvoq, „soorlu anaanap qitornani paaqqisarai“. Thessalonikami ilagiinnut ima allappoq: „Asallusi kissaatigisimavarput Guutip iivangkiiliuanik tuniinnarasi aammattaaq inuunerput tunniutissallugu, nuannarisarilersimagassimi.“ (1 Thessalonikamiut 2:7, 8) Kingorna Paulusi qatanngutimi Efesosimiut takoqqissanngikkaanni oqaluttuarmat „tamarmik qissaserput, Paulusilu qungasiagut eqippaat kunillugulu.“ (Apustilit Suliaat 20:25, 37) Erseqqippoq Paulusip qatanngutillu attaveqatigiinnerat uppeqatigiinnerannit isumaqarnerungaartoq. Qamannga pisumik tunniusimaqatigiipput.

Qamannga pisumik tunniusimaneq asanninnerlu

3. Tunniusimaneq asanninnerlu Biibili malillugu qanoq imminnut atassuteqarpat?

³ Allakkat-ni qamannga pisumik tunniusimaneq misiginneqataanerlu kristumiunit pissuserineqartussanit tamanit pingaarnerpaamut — asanninnermut — atalIuinnarpoq. (1 Thessalonikamiut 2:8; 2 Petrusi 1:7) Diamantip kusanartup silineqarneratut  pissutsit Guutimit pisut taakku tapertariilluinnarput. Kristumiut pissutsit taakku imminnut qaninnerulissutigaat, aammattaarli Ataataminnut qilammiusumut. Taamaammat apustili Paulusip uppeqatini ima kajumissaarpai: „Asanninneq pisuusaarnerunngikkili . . . Qatanngutigiittut asaqatigiillusi ungageqatigiigitsi.“ — Romamiut 12:9, 10.

4. Oqaaseq Biibili-mi ’ungageqatigiinneq’-mik nutserneqartoq qanoq isumaqarpa?

⁴ Oqaaseq grækerisooq Paulusip ’ungageqatigiinneq’-mut atugaa oqaatsinit marlunnit naggueqarpoq, aappaa ikinngutigiinnermik isumaqarpoq aappaalu pissusissamisoortumik tunniusimanermik isumaqarluni. Biibilimik misissueqqissaartartoq naapertorlugu tamanna isumaqarpoq kristumiut „asaqatigiinnertik ilisarnaatigisariaqaraat soorlu ilaqutariit asaqatigiittut ataqatigiilluartullu tamarmik imminnut tapersersoqatigiittartut“. Qatanngutitit kristumiut taamatut misigissuseqarfigaagit? Asannittunik avatangiiseqarluni — ilaqutariittut misigisimalluni — ilagiinni kristumiuniittut taamatut misigisimasariaqarput. (Galatiamiut 6:10) Taamaammat The New Testament in Modern English-imi J.B. Phillipsip Romamiut 12:10 imatut issuarpaa: „Ilumoortumik asannittumillu tunniusimaqatigiinniarta soorlu qatanngutigiit taamaattartut.“ Aamma The Jerusalem Bible-imi allassimavoq: „Asaqatigiigitsi qatanngutigiit asaqatigiittariaqarnerattut.“ Aap, kristumiut akornanni asaqatigiinneq silatusaarnermit pisussaasutullu misigisimanermit isumaqarneruvoq. ’Qatanngutigiittut ilumoortumik asaqatigiittut uummammik minguitsumik asaqatigiittariaqarpugut.’ — 1 Petrusi 1:22.

Asaqatigiinnissamik Guutimit ilinniartinneqarneq

5, 6. (a) Ataatsimeersuarnerit nunanit tamalaanit peqataaffigineqartut atorlugit Jehovap innuttani kristumiutut tunniusimanermik qanoq ilinniartissimavai? (b) Qatanngutit piffissami aalajangersimasumi Jehovamut kiffartoqatigiikkaangata ataqatigiinnerat qanoq nakussatsinneqartarpa?

⁵ Silarsuarmi matumani ’asanninneq amerlanerni nillertunngoraluartoq’, ullumikkut Jehovap kiffani ’asaqatigiinnissamik’ ilinniartippai. (Matthæusi 24:12; 1 Thessalonikamiut 4:9) Jehovap Nalunaajaasuisa ataatsimeersuarneri nunanit tamalaanit peqataaffigineqartut tamatumunnga periarfissaalluarput. Ataatsimeersuarnerni taamaattuni Jehovap Nalunaajaasuisa tamaani najugaqartut qatanngutitik nunanit ungasissuninngaanneersut naapittarpaat, amerlasuullu ataatsimeersuariat nunanit allaneersut illusimasorisarpaat. Qanittukkut ataatsimeersuarnermi ataatsimeersuariat ilaat nunanit misigissutsiminnik takutitsinissamut tunuarsimaarfiusuneersuupput. „Ataatsimeersuariat tikikkamik annilaangarpasillutillu nipaapput,“ kristumiu taakkua illusimaffissarsiorneranni ikiuisoq oqaluttuarpoq. „Ullulli arfinillit qaangiutiinnartut aallaleramik inisimmavitillu qungatsimikkut eqillutik qissapput. Kristumiutut asaqatigiinneq puigunngisaannagassartik iluaqutigisimavaat.“ Qatanngutivut, qanorluunniit tunuliaqutallit, inoroorsaarfigigaangatsigit tikeraap inisimatitsisullu tamanna ajunngitsuliornissaminnut kajumississutigissinnaavaat. — Romamiut 12:13.

⁶ Ataatsimeersuarnermi misigisat taamaattut killitsinnartorujussuusinnaapput, kristumiulli suli qaninnerusumik attaveqatigiilersinnaapput piffissami sivisunerusumi Jehovamut kiffartoqatigiikkunik.  Qatanngutivut ilisarisimalluarutsigit pissusii ajunngitsut pingaartinnerussavavut — ilumoortuunerat, tatiginartuunerat, ilumoorfiginnittuunerat, inussiarnersuunerat, tukkortuunerat, isumatusaartuunerat, misiginneqataasuunerat namminissarsiunnginnerallu. (Tussiaat 15:3-5; Ussatit 19:22) Mark, Afrikap kangiani ajoqersuiartortitaasimasoq, ima oqarpoq: „Qatanngutit suleqatigiikkaangamik ataavartussamik ataqatigiilertarput.“

7. Suna pisariaqarpa ilagiinni kristumiutut tunniusimaneq iluaqutigisinnaassagutsigu?

⁷ Ilagiinniittut taamatut ataqatigiilissagunik ataqatigiittuassagunillu imminnut qanittumik attaveqartariaqarput. Ataatsimiigiartuarnitsigut qatanngutitsinnut attaveqarnerput nakussatsissavarput. Ataatsimiinnermi peqataanikkut ataatsimiilinnginnermilu ataatsimeereernermilu oqaloqateqarnikkut „asanninnermut ajunngitsuliornermullu“ kajumissaaqatigiittarpugut. (Hebræerit 10:24, 25) USA-mi utoqqaanertaq ima oqaluttuarpoq: „Nuannaralugu meeraanera kingumut eqqarsaatigisarpara, taamani ilaquttakka naalagaaffilersaarfimmit kingulliit ilagalugit aniuaannarput. Ingerlaannaq anineq ajorpugut ikinngutinnersunik oqaloqateqarsinnaaneq imaqarluartunillu oqaloqatigiissuteqarsinnaaneq sapinngisamik sivisunerpaamik nuannaarutiginiarlugit.“

’Ammarnissat’ pisariaqartippiuk?

8. (a) Paulusip Korinthimiut ’ammaqqullugit’ kajumissaaramigit qanoq isumaqarpa? (b) Ilagiinni qamannga pisumik tunniusimaneq ineriartortinniarlugu qanoq iliorsinnaavugut?

⁸ Taamatut tunniusimalluinnassagutta immaqa uummatitta ’ammarnissaa’ pisariaqartipparput. Korinthimi ilagiinnut apustili Paulusi ima allappoq: „Uummaterput ammarparput. Uatsinni ninniortitaanngilasi.“ Paulusip kajumissaarpai akisillutik ’ammaqqullugit’. (2 Korinthimiut 6:11-13) Aamma illit tunniusimanikkut ’ammarsinnaavit’? Utaqqisariaqanngilat allat siulliunissaat. Paulusip Romamiunut allakkamini qamannga pisumik tunniusimasariaqarneq siunnersuullu una imminnut atassuserpai: „Ataqqeqatigiigitsi immissinnut akimorniullusi.“ (Romamiut 12:10) Allat ataqqisinnaavatit ataatsimiinnerni siulliullutit ilassisarlugit. Aamma oqaluusseqatigiumasinnaavatit piareersaqatigiumasinnaallugilluunniit. Taamaaliornikkut qamannga pisumik tunniusimanermik ineriartortitsinissamut aqqutissiuussissaatit.

9. Uppeqatitik kristumiut qanillineruniarlugit ilaat qanoq iliorsimappat? (Aamma ilagiissinneersumik assersuuteqarsinnaavutit.)

⁹ Ilaqutariit inuillu ataasiakkaat ilagiinniittut imminnut pulaaqattaattarnermikkut, immaqa suunngitsunnguugaluanik nereqatigiittarnermikkut imaluunniit peqqinnartunik sammisaqaqatigiittarnermikkut ’ammarsinnaapput’. (Lukasi 10:42; 14:12-14) Hakop ilaannikkut ikittunnguakkuutaarlugit orpippassualiaqatigiinnissamik aaqqissuussisarpoq. Taanna ima oqaluttuarpoq: „Assigiinngitsunik utoqqassusillit ilaasarput, angajoqqaallu kisimiittut aamma ilaasarput. Angerlaraangamik tamarmik nuannersunik eqqaamasaqarlutillu imminnut qaninnerusutut misigisarput.“ Kristumiutut immitsinnut uppeqatigiittuinnaq piniassanngilagut, aammali ikinngutaaniartariaqarpugut ilumoortut. — 3 Johannesi 14, 15.

10. Alla attaveqarfigilluanngikkutsigu qanoq iliorsinnaavugut?

¹⁰ Ilaatigut naammalluinnanngitsuunerput pissutigalugu ikinngutitaarniarnerput allanullu tunniusimaniarnerput ajornakusoortittarsinnaavarput. Qanormi iliorsinnaavugut? Pingaarnerpaamik Jehova qinnuigisinnaavarput qatanngutitsinnut attaveqarlualernissamut ikioqqulluta. Guutip piumasaraa kiffami attaveqatigiilluarnissaat, qinnutillu ilumoortut taamaattut akiumaarpai. (1 Johannesi 4:20, 21; 5:14, 15) Aamma qinnutivut naapertorlugit iliuuseqartariaqarpugut. Ricip, Afrikap kangiani nakkutilliisup angalasartup, eqqaamavaa qatanngut peqqarniitsuunini pissutigalugu allanit qanilliuminaatsinneqartoq. „Aalajangerpunga qanillinaveersaaginnarnagu ilisarisimalluarnerulerniarlugu,“  Ric nassuiaavoq. „Sunaaffa ataataminit sukangasupilussuarmik perorsarneqarsimasoq. Paasilerakku qatanngut taanna qanoq tunuliaquttani akiorniarlugu ilungersorsimatigisoq qanorlu siumukarsimatigisoq, nersualaartariaqarpara. Ikinngutigiillualerpugut.“ — 1 Petrusi 4:8.

Uummatit ammaruk!

11. (a) Suna pisariaqarpa tunniusimaneq ilagiit iluanni ineriartortinniarlugu? (b) Sooq allanik misigissutsikkut qanillinaveersaarineq uagutsinnut anersaakkut ajoqutaasinnaava?

¹¹ Ullumikkut inuppassuit inuunertik tamaat qanimut ikinnguteqalinngisaannarlutik inuupput. Alianassusia! Ilagiinni kristumiuni taamaattariaqanngilaq — taamaattussaananilu. Qatanngutigiittut asaqatigiinneq ilumoortoq inussiarnersumik oqaloqatigiinnerinnaanngilaq pissuserissaarnerinnaananilu; aamma oqaaserpassuaqarluni ingasattajaartumik misigissutsinik ersersitsinerinnaanngilaq. Uummatitsinnilli ammaanissamut uppeqatittalu atugarissaarnissaannik ilumoorluta soqutiginninnitsinnik takutitsinissamut piumassuseqartariaqarpugut, Paulusip Korinthimiunut iliorsimaneratut. Soorunami tamarmiunngitsoq peqateqarumatuujullutillu oqalukkumatuujupput, tunuarsimaarpallaarnerli ajoqutaasinnaavoq. „Inuk inoqatiminit immikkoorniartuusoq nammineq piumasani malillugu iliortarpoq,“ Biibilimi taama mianersoqqussuteqarpoq. „Saqitsaassilersarpoq pikkorissaaqaluni.“ — Ussatit 18:1.

12. Sooruna oqaloqatigiilluarsinnaaneq ilagiit iluanni ikinngutigiilluarnermut aalajangiisuusoq?

¹² Ammasumik ilumoortumillu oqaloqatigiinneq ikinngutigiinnermut ilumoortumut tunngaviuvoq. (Johannesi 15:15) Tamatta ikinnguteqarnissatsinnik eqqarsaatitsinnik misigissutsitsinnillu qamannga pisunik oqaluttuarfigisinnaasatsinnik pisariaqartitsivugut. Aamma ilisarisimanerujartortilluta ilatta pisariaqartitaannik eqqarsaatiginninnissaq ajornannginnerulissaaq. Taamatut ilatta soqutigisaat soqutigisarutsigit qamannga pisumik tunniusimaneq ineriartortissavarput Jiisusillu oqaasiisa ukua ilumoornerat misigissallugu: „Tunisineq pilluarnarneruvoq tigusinermit.“ — Apustilit Suliaat 20:35; Filippimiut 2:1-4.

13. Qanoq iliorsinnaavugut qatanngutitsinnut ilumoortumik tunniusimanerput ersersinniarlugu?

¹³ Tunniusimanerput iluaqutaalluassappat, ersersittariaqarparput. (Ussatit 27:5) Ilumoortumik tunniusimagaangatta kiinnatsigut takuneqarsinnaasarpoq, immaqalu allat qamuuna attorneqaatigisarpaat. „Isit qaammarinnerata uummat nuannaalersittarpaa,“ angut silatooq taama allappoq. (Ussatit 15:30) Isumassuineq iliuutsikkut ersersinneqartoq qamannga pisumik tunniusimanermik ineriartortitsisarpoq. Ilumoortumik tunniusimaneq pisiarineqarsinnaanngilaq, uummammilli pisumik tunissut pingaaruteqangaarsinnaavoq. Allakkat aamma „oqaatsit pissusissavimmissut oqaatigisat“,  tamarmik tunniusimalluinnarnermut ersiutaasinnaapput. (Ussatit 25:11; 27:9) Ikinngutitaaraangatta namminissarsiunngitsumik tunniusimajuarluta ikinngutigiuarniartariaqarpavut. Ingammillu ikinngutivut ajornartoortillugit tapersersuerusuttariaqarpugut. Biibilimi ima allassimavoq: „Ikinngut ilumoortoq asannittuaannarpoq, qatanngutaallunilu annikilliornartussaq pillugu erniarititaasoq.“ — Ussatit 17:17, NV.

14. Allap tunniusimanerput akiniarpasinngippagu qanoq iliorsinnaavugut?

¹⁴ Pissutsit piviusut naapertorlugit ilagiinniittut tamaasa qanittumik attaveqarfiginissaat naatsorsuutigisinnaanngilarput. Pissusissamisoorluinnassaaq ilaasa allanit qaninnerusutut misigiffiginissaat. Taamaattumik nuannarisatta arlaata nuannarinninnerput kissaatigisatsitut akiniarpasinngippagu, isummiaarpallaassanngilagut uagut nammineq imaluunniit taanna ajoquteqartoq. Taanna pinngitsaalillugu qanilliniarsarissanngilarput. Akuerisinnaasaanik inussiarnisaarfigilluaannarutsigu siunissami qanillinissamut periarfissaqalerumaarpoq.

„Nuannarisaraakkit“

15. Akuerineqarneq nersualaarneqarnerlu taamatullu pineqannginneq qanoq sunniuteqartarpat?

¹⁵ Jiisusi qanoq nuannaartigisimassava kuisikkami qilammit ima oqartoqartoq tusaramiuk: „Nuannarisaraakkit.“ (Markusi 1:11) Akuerinnilluni oqaatsit taakku Jiisusip Ataatami imminut tunniusimaneranik qularutiginninnginnerminut nakussatsissutigai. (Johannesi 5:20) Alianaraluartumik inuit ilaat ataqqisaminnit asasaminnillu nersorneqanngisaannarput akuerineqanngisaannarlutilluunniit. „Inuusuttuusugut amerlavugut ilaquttatsinnik kristumiutut uppeqateqanngitsut,“ Ann oqarpoq. „Uagutsinni isornartorsiorneqartuartarpugut. Tamanna aliasuutigingaartarparput.“ Inuusuttulli taamaattut ilagiinnut ilaaleraangamik, anersaakkut ilaqutariinnit isumassuisunit — uppernikkut ataataasunit, anaanaasunit, qatanngutaasunillu — asaneqarlutik tapersersorneqarlutillu misigisarput. — Markusi 10:29, 30; Galatiamiut 6:10.

16. Sooq isornartorsiuineq iluaqutaanngila?

¹⁶ Inuiaqatigiit ilaanni qaqutigoorpoq angajoqqaat, ilinniartitsisut inersimasullu allat inuusunnernik ilumoortumik nersualaarisarnerat, isumaqaramik inuusuttut tamanna naammagisimaalissutigiinnassagaat pingaarnialissutigiinnassagaalluunniit. Taamatut eqqarsartaaseqarneq allaat ilaqutariinnut kristumiunut ilagiinnullu sunniuteqarsinnaavoq. Inuusuttoq saqqummiussaqarsimappat allamilluunniit naammassisaqarsimappat, immaqa inersimasut ilaat ima oqartarput: „Ajunngilaq, pitsaanerusumilli suliarisinnaavat!“ Imaluunniit meeqqanik inuusuttunillu naammaginninnginnertik immaqa allatut oqaatigisarpaat. Arlallit isumaqartarput taamaalillutik inuusuttunik kaammattuillutik periarfissaminnik tamakkiisumik atuinissaannut. Taamatulli periaaseqarneq killormut sunniuteqarajuttarpoq, inuusuttummi immaqa tunuartissapput misigalutilluunniit isumalluarfigineqarnermittut angusaqarsinnaanngilluinnarlutik.

17. Sooq allanik nersualaarinissamut periarfissarsiortariaqarpugut?

¹⁷ Nersualaarineq siunnersuilernermut aallaqqaasiuttaannaassanngilaq. Ilumoorluni nersualaarineq ilaqutariinni ilagiinnilu qamannga pisumik  tunniusimanermut ineriartuutaasarpoq, tamannalu inuusuttunut qatanngutinik misilittagalinnik siunnersortissarsiornissamut kajumississutaasinnaavoq. Allanut periaatsitsinni ileqquusut aalajangiisuutinnagit ’inuttaaq Guuti assilillugu pinngortitaq atisariaqarparput iluartillugu illernartillugulu ilumoornikkut’. Akuerinninnerit oqaatigiuk soorlu Jehova taamaaliortoq. — Efesosimiut 4:24, 1900/1961.

18. (a) Inuusuttuususi inersimasut ilissinnut siunnersuutaat qanoq isigisariaqarpisigit? (b) Sooq inersimasut qanoq siunnersuissanerlutik mianersuutigaat?

¹⁸ Ilissili inuusuttut inersimasut siunnersorpasi isumaqassanngilasi nuannarinngikkaasi. (Oqaluussisartup oqaasii 7:9) Naamerluinnaq! Qularnanngilluinnarpoq isumassorusukkamisi ilissinnullu tunniusimalluinnaramik taamaaliortut. Taamaanngippammi piffissaajarlutik tamanna pillugu sooq oqaloqatigissavaasi? Inersimasut — ingammillu ilagiinni utoqqaanertat — nalunnginnamikku oqaatsit qanoq sunniuteqarsinnaasut, eqqarsarluaqqaartarput qinoqqaartarlutillu siunnersuitinnatik. Ajunngitsuinnarnik kissaappaasi. — 1 Petrusi 5:5.

’Jehova misiginneqataangaarpoq’

19. Sooq pakatsisitaasimasut Jehova annertoqqutigisinnaavaat?

¹⁹ Misigisat nuanniitsut pissutigalugit inuit ilaat misigisinnaapput qamannga pisumik tunniusimagaluarunik pakatseqqiinnassallutik. Sapiisertariaqarput upperluartariaqarlutillu uummatertik allanut ammaqqissagunikku. Puigunngisaannartariaqarpaalli Jehova „ilatsinnit kimilluunniit ungasinngikkaluartoq“. Imminut qanilleqquaatigut. (Apustilit Suliaat 17:27; Jaaku 4:8) Aamma ajuallatsinneqarnissamut siooranerput paasivaa, neriorsorpaatigullu annertoqqusersorumalluta ikiorumallutalu. Tussiaasiortup Daavip neriorsoqqissaarpaatigut: „[Jehovap] qanippai sequmissimasumik uummatillit, annaattarpai aserortersimasumik anersaallit.“ — Tussiaat 34:19.

20, 21. (a) Qanoq ililluta paasisinnaavarput Jehovamik qanimut ikinnguteqalersinnaalluta? (b) Jehovamut ikinngutinnaajuniartunut sunik piumasaqaateqarpa?

²⁰ Ikinngutigiinneq ineriartortissinnaasarput pingaarnerpaaq tassa Jehovamik qanimut ikinnguteqarneq. Attaveqarnerli taamaattoq ilumut ineriartortinneqarsinnaava? Aap. Biibilimi paasineqarsinnaavoq angutit arnallu naapertuilluartut Ataatatsinnut qilammiusumut qanoq qanitsigisumik attaveqartutut misigisimanerat. Taakkua oqaasii qamuuna nuannaajallannartut tammatsaalineqarsimapput uaguttaaq Jehovamut qanillisinnaanerput upperiniassagatsigu. — Tussiaat 23, 34, 139; Johannesi 16:27; Romamiut 15:4.

²¹ Inuit tamarmik periarfissaqarput Jehovap imminut ikinngutinnaanngorusuttunut piumasaqaataanik naammassinninnissamut. „[Jehova], kinaava tupinni tikeraajusinnaasoq,“ Daavi aperivoq. „Tassaavoq taanna assuarnaalluni inuusoq, innarluitsumik iliortoq ilumoortumillu uummammit pisumik oqalulluni.“ (Tussiaat 15:1, 2) Guutimut kiffartornitta ajunngitsunik inerititaqartarnera Jehovamillu siulersorneqarnitsinnik sernissorneqarnitsinnillu kinguneqarnera misigiartortillugu paasissavarput ’Jehova misiginneqataangaartoq’. — Jaaku 5:11, NV.

22. Jehovap imminut kiffamilu imminnut qanoq ittumik attaveqarnissaat kissaatigaa?

²² Pilluaatigingaarsinnaavarput Jehova inunnut naammalluinnanngitsunut taama qanitsigisumik attaveqarusummat! Taamaammat uaguttaaq qamannga pisumik tunniusimaqatigiittariaqarpugut, ilaa? Jehovap ikiuineratigut tamatta qamannga pisumik tunniusimanermik kristumiutut qatanngutigiissuartut ilisarnaatitsinnik ineriartortitseqataasinnaallutalu iluaqutiginnissinnaavugut. Guutillu naalagaaffiata aqutsinerani naassaanngitsumik taamaaliorsinnaassaagut. (wE 10/1 04)

Uku nassuiarsinnaavigit?

• Ilagiinni kristumiuni avatangiisit qanoq ittuusariaqarpat?

• Ilagiinni qamannga pisumik tunniusimanermik tamatta qanoq ineriartortitseqataasinnaavugut?

• Ilumoorluni nersualaarineq kristumiut akornanni qamannga pisumik tunniusimanermut qanoq ineriartuutaasarpa?

• Jehovap qamannga pisumik tunniusimanera qanoq annertoqqutigalugulu nakussatsissutigaarput?

[Atuaqqissaarnermi apeqqutit]

[Qupp. 15-imi assiliartaq]

Kristumiut akornanni asaqatigiinneq pisussaasutut misigisimanermit isumaqarneruvoq

[Qupp. 16, 17-imi assiliartat]

Tunniusimanikkut illit ’ammarsinnaavit’?

[Qupp. 18-imi assiliartaq]

Isornartorsiuisarpit qiimmassaasarpilluunniit?