Guutip oqaasia nakimaallutit oqaluussissutigiuk

„Innuttakka Israelikkut siulittuiffigiartukkit!“ — AMOSI 7:15.

1, 2. Amosi kinaava, Biibilimilu qanoq oqaluttuarineqarpa?

JEHOVAMUT nalunaajaasoq oqaluussileruttortoq palasimit orninneqarpoq. Palasi ima nilliavoq: ’Oqaluussiunnaarniarit! Peerniarit!’ Oqaluussisartoq qanoq iliorpa? Palasip piumasaqaataa nakkaannarfigaa, imaluunniit Guutip oqaasia nakimaalluni oqaluussissutigiuarpaa? Qanoq iliornersoq paasisinnaavarput, oqaluussisartummi pineqartup misigisani atuakkami ateqaatigisamini, Biibilimi Amosip allagaani, allappai. Palasimilli naapitsinera samminerutinnagu Amosip tunuliaqutaa pillugu paasissutissaaluit misissoqqaariartigik.

² Amosi kinaava? Sumiuua, qangalu inuua? Amosi 1:1-imi apeqqutit taakku akissutissarsisinnaavavut, tassanilu ima allassimavoq: „Amosip savaatillit Tekoameersut ilaata oqaaserisai . . . Ussia Judami kunngiutillugu Jeroboamilu Joaship ernera Israelimi kunngiutillugu.“ Tassa Amosi Judami illoqarfimmit Tekoameersuuvoq. Illoqarfik taanna Jerusalemimiit kujammut 16 kilometerisut ungasitsigaaq. Amosi ukiunik naatsorsuisalerfitta siorna 800-kkut naalerneranni Ussia Judami kunngiutillugu Jeroboami II-lu Israelimi kunngiutillugu inuuvoq. Savaatiliuvoq, Amosi 7:14-imili allassimaneratut ’savaatiliuinnarnani’, aamma ’figequllussuarnik passussisartuuvoq’ (1900/1961). Tassa ukiup ilaani ’passussisartutut’ suliassaqaleraangat taamatut sulisarpoq. Figequllussuup paarnai ’passuttarpai’, imaluunniit „putoortarpai“, tassa ineritiaarniarlugit taamaaliortoqartarpoq. Suliaq qasunartoq.

’Siulittuiartorit’

3. Oqaluussinissamut piukkunnaateqanngitsutut misigigutta Amosip pruffiititut suliaata misissornerunera qanoq iluaqutigisinnaavarput?

³ Amosi unneqqarilluni ima oqarpoq: „Pruffiitiunngilanga pruffiitimulluunniit ajoqersugaananga.“ (Amosi 7:14) Tassa pruffiitip erneratut inunngunngilaq pruffiititulluunniit ilinniartinneqarnani. Judamili innuttaasunit tamanit Jehovap Amosi aallartitassamisut toqqarpaa. Kunngi pissaanilik, palasi ilinniagartooq qullersaasorluunniit pisooq toqqanngilaa. Tamatuminnga ilisimanninnerput toqqissisimassutigaarput. Immaqa silarsuarmi ilinniagartuujunngilagut innuttaaqatigiinniluunniit immikkut inissisimaffeqarnata, tamannali pissutigalugu Guutip oqaasianik oqaluussinissamut piukkunnaateqanngitsutut misigissaagut? Naamerluinnaq! Jehovammi oqaluussinissamut piginnaanngorsarsinnaavaatigut — aamma oqaluussiffigiuminaatsuni.  Amosi taamatorluinnaq pimmagu, Guutip oqaasianik nakimaalluni oqaluusserusuttunut tamanut pruffiitip sapiitsup taassuma iliuusiinik misissuineruneq ilinniarfiulluassaaq.

4. Sooq Israelimi siulittuineq Amosimut imaannaanngitsuua?

⁴ Jehova Amosimut ima oqarpoq: „Innuttakka Israelikkut siulittuiffigiartukkit!“ (Amosi 7:15) Suliaq imaannaanngitsuuvoq! Taamanikkut Israelip naggueqatigiivini quliusuni eqqissineqarlunilu aarlerinartoqarnanilu pigissaarfiuvoq. Inuppassuit illoqarput ’ukiorsiorfinnik aasarsiorfinnillu’, ujaqqanik marrarnit nalinginnaasunik sanaajunngitsunik, akisuunilli „ujaqqanik sikkigissakkanik“ sanaanik. Ilaat pequteqarput nagguaatsup tuugaavinik kusassakkanik viinnisortarlutillu namminneq ’viinnequteqarfimminneersumit alutornartumit’. (Amosi 3:15; 5:11) Taamaattumik inuppassuit inuunertik naammagisimaarpaat. Aap, Amosimut oqaluussiffigeqquneqartoq ilatta oqaluussiffigisartagaannut assinguvoq.

5. Israelikkut ilaat qanoq naapertuilluanngitsuliorpat?

⁵ Israelikkut pigisaqarnerat eqqunngitsuliornerunngilaq, ilaalli unneqqaserluttumik periaaseqarnikkut pisuunngorsimapput. ’Sanngiitsunik qunusiarinnittarput piitsunillu naalliutsitsisarlutik’. (Amosi 4:1) Niuertut, eqqartuussisut palasillu sunniisinnaassusillit piitsut piiaaffiginiarlugit pinerlunniaqatigiittarput. Taamanikkut angutit taakku qanoq iliortarsimanersut misissoriartigu.

Guutip inatsisai unioqqutinneqarput

6. Niuertut Israelikkuusut nunaqqatitik qanoq iluanaarniarfigisarpaat?

⁶ Siullermik niueriartortarfimmi susoqartarnersoq misissoriartigu. Tassani niuertut unneqqaserluttut ’uuttuut efa imakinaariarlugu sekeli annaartarpaat’, allaallu „ajornikut“ karritut tuniniartarpaat. (Amosi 8:5, 6) Allatut oqaatigalugu niuertut pisiniartumik pisiaasa oqimaassusiisigut, akiisigut pitsaassusiisigullu pisiniartut iluanaarniarfigisarpaat. Piitsut uukapaatitaallutik aningaasaataarukkaangamik inussiatut imminut tunisariaqartarput, taava niuertut „aloqutinik illugiinnik akilerlugit“, aloqutit illugiit akiisa nalinganik akilerlugit, pisiarisarpaat. (Amosi 8:6) Takorlooriassagit! Niuertut piumatuut taakkua nunaqqatitik aloqutinit naleqarnerutinngilaat! Piitsunik nikanarsaanerussusia, Guutillu inatsisaanik unioqqutitsinerussusia! Niuertulli taakkorpiaat sabbatisiortarput. (Amosi 8:5) Aap, uppertuupput, qallikkuinnarsiortuullutilli.

7. Sooq niuertut Guutip inatsisaanik unioqqutitsisinnaasimappat?

⁷ Niuertulli Guutip inatsisai, tullermik immisut asanninnissamik peqqussutertallit, sooq pillarneqarnatik unioqqutissinnaavaat? (3 Mosesi 19:18) Iluatsitsillutik taamaaliorsinnaapput inatsisinik unioqqutitsaalisitsisussat — eqqartuussisut — niuertunik pinerloqateqartarmata. Illoqarfiup isaaffiani, eqqartuussissutigoortunik suliaqarfiusartumi, eqqartuussisut ’akilersinnerluutinik tunisittarput, piitsullu isaaffimmi ikiorumasarnagit’. Eqqartuussisut piitsunik illersuinatik akilersillutik peqquserluttarput taamaalillutillu piitsut sumiginnartarlugit. (Amosi 5:10, 12) Tassa taakku aamma Guutip inatsisaanik unioqqutitsipput!

8. Palasit sunik takunninngitsuusaartarpat?

⁸ Israelimimi palasit? Paasissagutsigu allamut qiviartariaqarpugut. Palasit „Guutimik illuani“ ajortuliat akuerisaat malugikkit. Amosi aqqutigalugu Guuti ima oqarpoq: „Erneriit arnaq atortittartoq marluuttarpaat taamaalillutillu atera illernartoq mingutsillugu.“ (Amosi 2:7, 8) Takorlooriassagit! Erneriit Israelikkuusut naalaffimmi atortittartoq ataaseq kinguaassiuutitigut inuunerloqatigisarpaat, tamakkuninngalu palasit takunninngitsuusaartarput! — 3 Mosesi 19:29; 5 Mosesi 5:18; 23:18.

9, 10. Israelikkut Guutip inatsisai qanoq unioqqutippaat, ullumikkumullu qanoq assingussuteqarpat?

⁹ Iliuuseq aalassaataasoq alla pillugu Jehova ima oqarpoq: „Atisat akiitsulinnit sallunaveeqqutitut tigusat nallarfigisarpaat pilliiviit tamarmik sanianni. Pinerluuteqartut akiliisitat akiliutaannik viinnisortarput Guutimik illuani.“ (Amosi 2:8) Aap, palasit inuillu inatsit Mosesimik allakkat aappaat 22:25, 26-miittoq sumiginnartarpaat. Tassani allassimavoq atisat  sallunaveeqqutitut tigusat seqineq tarritsinnagu utertinneqassasut. Pineqartulli guutipilummik ataqqinaatissaannik festeraangamik imeraangamillu atisat taakku allequtitut nallavigisarpaat. Piitsullu akiliisikkaangamikkik aningaasat isertitatik viinnisissutigisarpaat upperisarsiornikkut nalliuttorsiornerminni imigassaminnik. Pallorfiginninnerup minguitsup aqqutaanit ungasillisimaqaat!

¹⁰ Israelikkut Inatsisini inassutit annerpaat marluk — Jehovamik asanninnissamik tullermillu asanninnissamik inassutit — kannguttaallutik unioqqutittarpaat. Taamaattumik Guutip Amosi aallartippaa ilumuunngitsuunerat pillugu eqqartuukkiartortillugit. Ullumikkut silarsuarmi, aamma kristumiuunerartuni, pissutsit itsaq Israelimi pissutsit ajornerattulli ajortigipput. Niuernerup silarsuaani, politikkikkut upperisarsiornermilu eqqunngitsumi ileqqorlunneq pissutaalluni ikittut pigissaartuusut inuppassuit aningaasaqarnikkut nakkaassimapput misigissutsikkulluunniit naalliuuteqalersimallutik. Jehovalli naalliuutillit ujarlersini malugisarpai. Taamaattumik nalitsinni kiffani suliassippai Amosip suliaanut assingusumik — Guutip oqaasianik nakimaalluni oqaluussinissamik.

11. Amosip maligassiuinera sumik ilinniarfigisinnaavarput?

¹¹ Amosimut suliassiissutigineqartoq uagutsinnullu suliassiissutigineqartoq assigiissuteqarmata Amosip maligassiuinerata misissornera iluaqutigissavarput. Tassani erserpoq (1) tusarliussaq suna oqaluussissutigissagipput, (2) qanoq oqaluussissutigissagipput, aamma (3) sooq akerlilersortitta oqaluussinerput unitsissinnaanngikkaat. Ataasiakkaarlugit misissoriartigik.

Amosi qanoq ilaarsinnaagipput

12, 13. Jehovap Israelikkunnik iluarinninnginnini qanoq ersersippaa, qanorlu qisuariarpat?

¹² Kristumiutut kiffartornitsinni Jehovamut nalunaajaasutut Guutip naalagaaffiata oqaluussissutiginera ajoqersuganngortitsiortornerlu pingaartippavut. (Matthæusi 28:19, 20; Markusi 13:10) Taamaattorli Amosip Jehovap ajortunut guutiitsunullu eqqartuussutaanik oqaluussissutiginninneratulli aamma Guutip mianersoqqussutai oqaluussissutigaavut. Assersuutigalugu Amosi 4:6-11-mi erserpoq Jehovap Israelikkunnik iluarinninnginnerminik arlaleriarluni ersersitsisimasoq. Israelikkut ’timiusartugassaarutitippai’, aamma ’siallersitsiviginngitsoorpai’; ’pillarpai karrit oqunnerannik naasullu nappaataannik’, aamma ’nappaammik toqoraataasumik aallartitsivigai’. Tamakku tamarmik Israelikkunnik peqqissimititsippat saatsitsillutillu? „Uannut saakkumanngilasi,“ oqarpoq Guuti. Ilumut Israelikkut Jehova ajattortuarpaat.

¹³ Taamaattumik Jehovap Israelikkut peqqissimiumanngitsut pillarpai. Siullermilli siulittuummik mianersoqquneqarput. Jehova nammineq ima nalunaarpoq: „Guuti [Jehova] qanoq iliortarinngilaq pilersaarutini kiffaminut pruffiitinut saqqummerseqqaartinnagit.“ (Amosi 3:7) Guutip ulersuaqarnissaa Noamut nalunaarutigaa, mianersoqqusiartortillugulu. Taamatulli Guutip Amosi naggammik mianersoqqusiartortippaa. Alianaraluartumik Israelimi innuttaasut tusarliussaq Guutimeersoq taanna soqutiginngilaat allannguisariaqaraluarnermissullu allannguinatik.

14. Amosip nalaa nalerpullu qanoq assigiissuteqarpat?

¹⁴ Amosip nalaata nalittalu assigiissuteqarluinnarnerat malugaajuk? Jiisusip siulittuutigaa naggatissap nalaani ajunaarnersuaqartarumaartoq. Aammattaaq siulittuivoq silarsuaq tamakkerlugu oqaluussisoqarumaartoq. (Matthæusi 24:3-14) Amosillu nalaanisulli ullumikkut inuit amerlanerit ullut nalunaaqqutaat Guutillu naalagaaffianik tusarliussaq soqutiginngilaat. Taakku Israelikkutut peqqissiumanngitsutut kingunerlutsitsissapput. Jehovap Israelikkut mianersoqqullugit ima oqarfigai: „Piareersimaniassaatit Guutinnut sassartitaanissannut.“ (Amosi 4:12) Inuit Guutimut ’sassartitaapput’ taassumannga iluarisaanngitsutut eqqartuussaallutik Assyriamiut sakkutuuinit artorsartitaagamik. Ullumikkut silarsuaq ajortoq ’Guutimut sassartitaassaaq’ Harmagedonimi. (Saqqummersitat 16:14, 16) Jehovali kamagittartuartillugu sapinngisamik amerlanerpaat ima kajumissaarpavut: „[Jehova] ujarsiuk, taava inuussaasi.“ — Amosi 5:6.

 Amositut akerlilersorneqaraluarluni aalajaanneq

15-17. (a) Amasja kinaava, Amosillu siulittuutai qanoq periaaseqarfigai? (b) Amasjap Amosi qanoq unnerluutigaa?

¹⁵ Amosi ilaarsinnaavarput tusarliussamik oqaluussinitsiguinnaanngitsoq, aammattaarli oqaluusseriaatsitsigut. Tamanna kapitali 7-imit paasinarsivoq, tassanilu allaatigineqarpoq palasi allaaserisap matuma aallaqqaataani eqqaaneqartoq. Tassaavoq „Amasja Betelimi palasi“. (Amosi 7:10) Illoqarfik Beteli Israelikkut tunussisut guutisiorneranni, ilaatigut nersuteeraasaliamik pallorfiginninnermi, qitiusut ilagaat. Tassa Amasja upperisarsiortuni naalagaaffimmut atasuni palasiuvoq. Amosi nakimaalluni oqaluussisoq tusaramiuk qanoq iliorpa?

¹⁶ Amasja Amosimut ima oqarpoq: „Siulittuisartoq, Judamut uterasuarniarit, tassani siulittuisarsinnaavutit inuutissarsiutigalugu. Betelimi siulittuisinnaajunnaarputit, kunngip illernartuutigimmagu naalagaaffiullu naalaffigimmagu.“ (Amosi 7:12, 13) Amasja ima oqarporlusooq: ’Angerlarniarit! Nammineq upperisaqarpugut!’ Aamma Amosip oqaluussinera naalakkersuisunit inerteqqutaalersinniaraluarpaa, kunngimummi Jeroboamimut ima oqarpoq: „Amosi ilinnut perlulioqatigiinnianik pilersitsivoq Israelimi.“ (Amosi 7:10) Aap, Amasjap Amosi killuussisutut unnerluutigaa! Kunngimut ima oqarpoq: „Tassa Amosi oqarpoq: Kunngi Jeroboami panamik toqunneqarumaarpoq, Israelilu nunaminit aallarunneqarumaarpoq.“ — Amosi 7:11.

¹⁷ Amasja naatsumik taama oqaaseqarluni tammartitsiniutaasut pingasut oqaatigai. Ima oqarpoq: „Tassa Amosi oqarpoq.“ Amosili siulittuummik isumassarsisuuneranngisaannarpoq. Akerlianik ima oqartuaannarpoq: „Ima oqarpoq [Jehova].“ (Amosi 1:3) Amosi aamma ima oqarnerarneqarpoq: „Jeroboami panamik toqunneqarumaarpoq.“ Amosi 7:9-mili allassimaneratut Amosi ima siulittuivoq: „[Uanga Jehova]  Jeroboamikkut panamik saassutissavakka.“ Oqaatsini pineqarput „Jeroboamikkut“, Jeroboamip kinguaavi. Aammattaaq Amasjap Amosi ima oqarnerarpaa: „Israeli nunaminit aallarunneqarumaarpoq.“ Amosilli aamma siulittuutigaa Israelikkuusut Guutimut saattut tamarmik pilluaqquneqarumaartut. Erseqqippoq Amasjap oqaatsit killormut saatitat ilumoortortallillu atorlugit Amosip oqaluussinera qullersanit inerteqqutaalersinniaraa.

18. Amasjap periaasii ullumikkullu palasit periaasii qanoq assigiissuteqarpat?

¹⁸ Amasjap periaasiisa ullumikkullu Jehovap innuttaasa akerlilersortaasa periaasiisa assigiissuteqarnerat malugaajuk? Amasjap Amosimik nipangersitsiniarneratulli nalitsinni palasit, biskoppit upperisarsiornikkullu siuttut allat ilaat Jehovap Nalunaajaasuisa oqaluussinerannik akornusersuiniarsaripput. Amasjap Amosi killuussisutut eqqunngitsumik unnerluutigaa. Ullumikkut palasit ilaasa Jehovap Nalunaajaasui naalagaaffimmik navianartorsiortitsisutut unnerluutigisarpaat. Amasjallu Amosimik akerlilersuinermini kunngimut tapersersortissarsiorneratulli palasit Jehovap Nalunaajaasuinik malersuinerminni politikerinut peqatigisaminnut tapersersortissarsiortarput.

Oqaluussinerput akerlilersuisut unitsissinnaanngilaat

19, 20. Amasjap akerlilersuinera Amosip qanoq periaaseqarfigaa?

¹⁹ Amasjap akerlilersuinera Amosip qanoq periaaseqarfigaa? Siullermik Amosip palasi ima oqarfigaa: „Oqarputit: ’Israelimut ajoqutissanik siulittuiunnaarniarit.’“ Taava Guutip pruffiitiata sapiitsup nangaanngivilluni oqaatsit Amasjap tusarusunngilluinnagai oqaatigai. (Amosi 7:16, 17) Amosi qunulersitaanngilaq, taamaalillunilu ullumikkut uagutsinnut maligassiuilluarpoq. Guutip oqaluusseqqusinera maleruanngitsuussanngilarput, aamma nunani ullumikkut ’Amasjat’ malersuisitsiniarfigisaanni. Amositulli ima oqartuassaagut: „Ima oqarpoq [Jehova].“ Akerlilersuisullu oqaluussinerput unitsisinnaanngisaannassavaat, ’Jehovammi assaata’ najorpaatigut. — Apustilit Suliaat 11:19-21.

²⁰ Amasjap nalunngittariaqaraluarpaa sioorasaarutini sunniuteqarnavianngitsut. Amosip nassuiareerpaa sooq nunarsuarmi kialuunniit nipangersissinnaanngikkaani — misissugassattalu tamanna pingajoraat. Amosi 3:3-8 naapertorlugu pisoqaraangat pissuteqartuaannartoq ersersinniarlugu Amosip apeqquterpaaluit assersuuterpaaluillu atorpai. Taava ima aperivoq: „Løveq uiannisaaraangat kinaluunniit ersilertannginnerpa? Guuti [Jehova] oqalukkaangat kinami taava siulittuissannginnerpa?“ Allatut oqaatigalugu Amosi tusarnaartiminut ima oqarpoq: ’Soorlu løveq uiannisaartoq tusaraangassiuk ersilinngitsoortanngitsusi, taamatulli oqaluussinngitsoortanngilanga Guuti taamatut peqqusisoq tusaraangakku!’ Guutimik mianerinningaarneq kajumississutigalugu Amosi nakimaalluni oqaluussivoq.

21. Nutaarsiassamik nuannersumik oqaluussinissamik peqqussut qanoq isiginnittaaseqarfigaarput?

²¹ Aamma uagut Guutip oqaluusseqqusinera tusarparput. Qanoq qisuariarpugut? Amositut Jiisusillu ajoqersugaasut siullertut Jehovap ikiuineratigut oqaasia nakimaalluta oqaluussissutigissavarput. (Apustilit Suliaat 4:23-31) Akerlilersuisut malersuinerisa oqaluussiffigisattaluunniit pissutsinik naammagisimaarinninnerisa nipangersissanngilaatigut. Amosip aallussilluarneratulli silarsuaq tamakkerlugu Jehovap Nalunaajaasui nakimaallutik nutaarsiassaq nuannersoq oqaluussissutigiuassavaat. Jehovap eqqartuussinissaanik inuit mianersoqqunissaat pisussaaffigalugu misigivugut. Eqqartuussineq tamanna sumik nassataqassava? Tamanna allaaserisami tulliuttumi akineqassaaq.

Qanoq akissavit?

• Pissutsini qanoq ittuni Amosip Guutip suliassiissutaa suliaraa?

• Amositut suna oqaluussissutigissavarput?

• Qanoq isiginnittaaseqarluta oqaluussisariaqarpugut?

• Sooq akerlilersortitta suliarput unitsissinnaassanngilaat?

[Atuaqqissaarnermi apeqqutit]

[Qupp. 18-imi assiliartaq]

Guutip Amosi, ’figequllussuarnik passussisartoq’, tusarliussaminik oqaluussisussatut toqqarpaa

[Qupp. 21-mi assiliartat]

Amositut Jehovap tusarliussaa nakimaallutit oqaluussissutigaajuk?