Jehovamut kiffat pilluartut

„Pilluarput anersaakkut pisariaqartitaqarnerminnik miserratiginninngitsut.“ — MATTHÆUSI 5:3, NV.

1. Pilluarneq piviusoq sunaava, sumullu ersiutaava?

JEHOVAMUT kiffartortut pilluartuupput. Tussiaasiortoq Daavi ima erinarsorpoq: „Pilluarput inuiaat [Jehovamik] Guuteqartut!“ (Tussiaat 144:15) Pilluarneq tassaavoq ilorrisimaarnermik misigineq piumaneqaqisoq. Qamanngarpiaq pisumik pilluartutut misigineq Jehovap pilluaqqusineranik ilisimanninnitsinnit aallaaveqarpoq. (Ussatit 10:22) Ataatatsinnut qilammiusumut qanittumik attaveqarnitsinnut taassumalu peqqusaanik iliornermik ilisimasaqarnitsinnut ersiutaavoq. (Tussiaat 112:1; 119:1, 2) Jiisusip pilluarsinnaanitsinnut pissutaasut qulingiluat eqqaavai. „Pilluarneraanernik“ taaneqartarput. Aalajaalluta ’Guuti pilluartoq’, Jehova, kiffartorfigigutsigu qanoq pilluartigisinnaasugut ilanngutassiami uani tulliuttumilu misissuinitsigut paasissavarput. — 1 Timotheusi 1:11.

Anersaakkut pisariaqartitaqarnermik miserratiginninnginneq

2. Pisumi sumi Jiisusip pilluarneq oqaluuseraa, sunalu aallarniutigaa?

² Ukiumi 31-mi oqaluttuarisaanermi oqalugiaatit tusaamaneqarnerpaat ilaat Jiisusip oqalugiaatigaa. „Qaqqami oqaluutsimik“ taaneqartarpoq, Jiisusip Galilæap Tasersuata eqqaani qaqqap sivinganerani oqaluuserimmagu. Matthæusip iivangkiiliuani ima allassimavoq: „Jiisusip inuit takugamigit qaqqamut majuarpoq ingillunilu, ajoqersugaasalu ornippaat. Taava oqalulerpoq ajoqersorlugillu: ’Pilluarput anersaakkut piitsut [anersaakkut pisariaqartitaqarnerminnik miserratiginninngitsut, NV], taakkuami Qilaap Naalagaaffia pigaat.’“ Oqaatsit Jiisusip aallarniutai toqqaannartumik nutserlugit imaapput: „Pilluarput anersaakkut ittunut tunngatillugu piitsut,“ imaluunniit: „Pilluarput anersaakkut ittunut tunngatillugu qinusartuusut.“ (Matthæusi 5:1-3, Kingdom Interlinear; ilanngussaq) Today’s English Version-imi imaappoq: „Pilluarput anersaakkut piitsuunerminnik ilisimannittut.“

3. Maniguunneq qanoq ililluni uagutsinnik pillualersitseqataava?

³ Jiisusip qaqqami oqaluutsimini inuk anersaakkut pisariaqartitsinerminik ilisimannikkuni pilluartoq uparuarpaa. Kristumiut maniguuttut,  ajortiliunerminnik miserratiginninngitsut, Kristusip utertitsissutitut pilliutaa tunngavigalugu Jehovamut isumakkeerfigeqqullutik qinusarput. (1 Johannesi 1:9) Taamaalillutik isummamikkut eqqissisarput pilluarnerlu piviusoq misigalugu. Soorlu ima allassimasoq: „Pilluarpoq unioqqutitsinerminik isumakkeerfigineqartoq, ajortuliaminillu matooriffigineqartoq.“ — Tussiaat 32:1; 119:165.

4. (a) Qanoq ililluta takutissinnaavarput uagut allallu anersaakkut pisariaqartitsinerat miserratiginngikkipput? (b) Suna pilluarnerulissutigisinnaavarput?

⁴ Anersaakkut pisariaqartitsinerput miserratiginngikkutsigu, ullut tamaasa Biibilip atuartarnissaanut kajumissuseqassaagut. Aammattaaq anersaakkut inuussutissanik ’piffissaq eqqorlugu inussiamit aalajaallunilu silatuumit’ tunniunneqartartunik nerisassaagut, kristumiullu ataatsimiinnerinut orniguttuarluta. (Matthæusi 24:45; Tussiaat 1:1, 2; 119:111; Hebræerit 10:25) Tullitsinnik asanninnerput pissutigalugu allat anersaakkut pisariaqartitaat soqutigilissavavut Guutillu naalagaaffia pillugu nutaarsiassamik nuannersumik oqaluussissutiginneqataanermik allanillu ilinniartitsinermik aallussilluarnissatsinnut kajumississalluta. (Markusi 13:10; Romamiut 1:14-16) Sallusuissutinik Biibilimeersunik allanik aveqatiginninneq pilluaatigaarput. (Apustilit Suliaat 20:20, 35) Guutip naalagaaffia pillugu neriuutigisarput nuanningaartoq naalagaaffiullu tamatuma pilluaqqussutissartai eqqarsaatigigutsigit suli pilluarnerulissaagut. ’Savarpannguanut’ kristumiunut tanitanut neriuut tamanna piviusunngorpat Kristusimut naalakkersueqataasutut qilammi toqujuitsunngussapput. (Lukasi 12:32; 1 Korinthimiut 15:50, 54) ’Savanut allanut’ neriuut tamanna isumaqassaaq nunarsuarmi paratiisiusumi naalakkersuinerup tamatuma ataani naassaanngitsumik inuussasut. — Johannesi 10:16; Tussiaat 37:11; Matthæusi 25:34, 46.

Aliasuttut qanoq pilluarsinnaasut

5. (a) Oqaaseq „aliasuttut“ qanoq paasisariaqarpa? (b) Taamatut aliasuttut qanoq tuppallersarneqartarpat?

⁵ Pilluarneraanermi tulliuttumi oqaatsit imminnut assortuuppasissinnaapput. Jiisusi ima oqarpoq: „Pilluarput aliasuttut, taakkumi tuppallersarneqassapput.“ (Matthæusi 5:4) Qanoq ililluni aliasuutigaluni pilluartoqarsinnaava? Jiisusip oqaasii paasilluassagutsigit, aliasunneq suna pineraa paasisariaqarparput. Ajoqersugaq Jaaku nassuiaavoq ajortiliunerput aliasuutigisariaqaripput. Ima allappoq: „Ajortiliususi, assasi ipiiarsigit; isumassigut marluususi, uummatisi salissigit! Naakkinassutsissinni aliasugitsi qiallusilu. Illarnersi taarserneqarli aliasunnermik, nuannaarnersilu isumanerlunninngorli. [Jehova] maniguuffigisiuk, taava akitsisissavaasi.“ (Jaaku 4:8-10) Ilumoorlutik ajortiliunerminnik aliasuutiginnittut tuppallersarneqartarput paasitinneqaraangamik Kristusip utertitsissutitut pilliutaanik upperinnikkunik, allamik isumataarsimagunik Jehovallu peqqusaatut iliorunik ajortiminnik isumakkeerfigineqarsinnaallutik. (Johannesi 3:16; 2 Korinthimiut 7:9, 10) Taamaalillutik Jehovamut erlinnartumik attaveqalertarput naassaanngitsumillu inuunermik taassuminngalu kiffartorfiginninnermik unnersiutiginninnermillu neriuut nuannaarutigisinnaallugu. Tamanna pissutigalugu qamanngarpiaq pisumik pilluartutut misigilerput. — Romamiut 4:7, 8.

6. Inuit ilaasa suna aliasuutigaat, qanorlu tuppallersarneqartarpat?

⁶ Jiisusip oqaasiini pineqarputtaaq nunami pissutsinik ajortunik aliasuutiginnittut. Jiisusip Esaja 61:1, 2-mi siulittuut imminut atassuserpaa. Tassani ima allassimavoq: „Guutip [Jehovap] anersaavata tikippaanga [Jehovap] tanitarimmanga. Aallartippaanga nalunaarut nuannersoq oqaatigeqqullugu piitsunut, nakorsarneqarnissarlu aserorsimasumik uummatilinnut, . . . aliasuttut tamaasa tuppallersaqqullugit.“ Nunamiinerminni tanitat aamma tamanna suliassaraat, suleqatiminnillu ’savanit allanit’ ikiorneqarlutik suliarivaat. „Tassani [Jerusalemimi tunussisimasumi, kristumiuunerartut akornanni] maajunnartuliat pillugit anersaarulullutik kappialasut“ qaavisigut assersuutaasumik nalunaaqutsersuinermi tamarmik suleqataapput. (Ezekieli 9:4) Taamatut aliasuttut „Naalagaaffimmik nutaarsiassaq nuannersoq“ tusaraangamikku tuppallersarneqartarput. (Matthæusi 24:14, NV) Nuannaarutigaat paasillugu Saatanip pissutsinik aaqqissuussinera ajortoq qanittukkut taarserneqarumaartoq Jehovap silarsuassaanik nutaamik naapertuilluassuseqarfiusumik.

Pilluarput qanilaartut

7. ’Qanilaarneq’ qanoq isumaqanngila?

⁷ Jiisusip qaqqami oqaluutsini ima nangippaa:  „Pilluarput qanilaartut, taakkuami nunarsuaq kingornutissavaat.“ (Matthæusi 5:5) Qanilaarneq, imaluunniit saamaneq, inuit ilaannit sanngiinnertut isigineqartarpoq. Saamanerulli sanngiinneq assiginngilaa. Oqaaseq ’qanilaarneq’-mik nutserneqartoq pillugu grækerisoornermik ilisimasalik ima nassuiaavoq: „[Qanilaartup] imminut aqussinnaalluinnarnini pingaarnerpaamik ilisarnaatigaa. Tassaanngilaq saamaneq piumassusermik ilaqanngitsoq, killitsialluni maleruutianeq, ilatsiinnarnermik pissuteqarluni isumakkut eqqissineq. Nukiuvoq aqunneqartoq.“ Jiisusi imminut pilluni ima oqarpoq: ’Qanilaarpunga [saamavunga, NV] uummatikkullu makitajuippunga.’ (Matthæusi 11:29) Taamaakkaluartoq Jiisusi qunusuippoq najoqqutassiallu naapertuilluartut illersorlugit. — Matthæusi 21:12, 13; 23:13-33.

8. Suna saamanermut attuumassuteqarluinnarpa, aamma sooq allanut attaveqarnitsinni saamaneq pisariaqartipparput?

⁸ Tassa saamaneq imminut naalakkersinnaanermut attuumassuteqarluinnarpoq. Apustili Paulusip pissutsit ’anersaap inerititaanut’ ilaasut taagoramigit qanilaarneq imminullu naalakkersinnaaneq tulleriissippai. (Galatiamiut 5:22, 23) Anersaaq illernartoq iluaqutigalugu qanilaarneq, imaluunniit saamaneq, ineriartortinneqartariaqarpoq. Saamaneq kristumiutut pissusiuvoq ilagiit silataaniittunut ilagiinniittunullu eqqissisitseqataasoq. Paulusi ima allappoq: „Atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu. Kamageqatigiigitsi isumakkeerfigeqatigiittarlusilu.“ — Kolossemiut 3:12, 13.

9. (a) Sooq imaanngila inunnut allanut attaveqarnitsinniinnaq saamaneq pingaaruteqartoq? (b) Saamasut qanoq „nunarsuaq kingornutissavaat“?

⁹ Imaanngilarli inunnut allanut attaveqarnitsinniinnaq saamaneq pingaaruteqartoq. Saamasuulluta aamma ersersipparput Jehovamut qilammi nunamilu kisimi oqartussaasumut kajumilluta naalatsigitinnitsigut. Tamatuma tungaatigut maligassiuilluarnerpaaq tassaavoq Jiisusi Kristusi. Nunamiinnermini ersersippaa saamasuulluni Ataatamilu peqqusaanut naalatsigitilluni. (Johannesi 5:19, 30) Jiisusi pingaarnertut nunarsuarmik kingornussisuuvoq, tassami naalagaasussatut toqqarneqarpoq. (Tussiaat 2:6-8; Danieli 7:13, 14) Kingornussamik tamatuminnga ’kingornussisussaaqatini’ 144.000-iusut, ’nunamut kunngiusussanngorlugit’ ’inunnit immikkoortillugit pisiaasut’, aveqatigai. (Romamiut 8:17; Saqqummersitat 5:9, 10; 14:1, 3, 4, 1900/1961; Danieli 7:27) Jiisusi Kristusi kunngioqatissaalu angutinut arnanullu millionilinnut savatut assersuunneqartunut taamanikkussamut naalakkersuilissapput. Tussiaat siulittuutaasoq una taakkununnga pilluarnartumik eqquutissaaq: „Qanilaartut nuna kingornutissavaat pilluangaarnertillu nuannaarutigissallugu.“ — Tussiaat 37:11; Matthæusi 25:33, 34, 46.

Pilluarput naapertuilluarnermut kaattut

10. „Iluarnermut kaattut imerusuttullu“ aallarniutitut qanoq nalerisimaalertarpat?

¹⁰ Pilluarneraaneq tulliuttoq, Jiisusip Galilæami qaqqap sivinganerani oqaatigisaa, imaappoq: „Pilluarput iluarnermut kaattut imerusuttullu, taakkumi qaarsillartinneqassapput.“ (Matthæusi 5:6) Kristumiut isumaqarput Jehova iluarnermut, imaluunniit naapertuilluarnermut, najoqqutassiisuusoq. Taamaattumik inuit naapertuilluarnermut kaakkaangata imerusukkaangatalu, eqqortumik oqaatigalugu Guutip siunnersuutaanut kaattarput imerusullutillu. Ajortiliunertik naammalluinnannginnertillu aliasuutigalugulu ilisimavaat Jehovamullu akuerisaasumik attaveqalerusullutik. Pillualertarput Guutip oqaasia atorlugu paasitinneqaraangamik Guutip isaani naapertuilluartutut isigineqalersinnaallutik, isumataarunik Kristusillu utertitsissutitut pilliutaa tunngavigalugu isumakkeerfigineqarusukkunik. — Apustilit Suliaat 2:38; 10:43; 13:38, 39; Romamiut 5:19.

11, 12. (a) Kristumiut tanitat qanoq naapertuilluartunngortarpat? (b) Suleqataat naapertuilluarnermik ’imerusuttut’ qanoq nalerisimaalissappat?

¹¹ Jiisusi oqarpoq naapertuilluarnermut kaattut imerusuttullu pilluassasut, tassami nalerisimaalissagamik. Aamma qanoq isumaqarpa? Kristumiut tanitat, qilammi Kristusi ilagalugu ’naalagaassuseqalersussat’, ’inuusussatut naapertuilluartuutitaapput (NV)’. (Romamiut 5:1, 9, 16-18) Jehovap anersaamigut kinguaassiarisarpai, tamatumalu kingorna anersaakkut qitornamisut akuerisarlugit. Kristusi kingornusseqatigissavaat, taassuma qilammi naalagaaffiani kunngiusussatut palasiusussatullu qaaqqusaallutik. — Johannesi 3:3; 1 Petrusi 2:9.

 ¹² Tanitat suleqataat suli inuusussatut naapertuilluartuutitaanngillat. Jiisusilli aavanut kuisamut uppernertik pissutigalugu Jehovamit tamakkiinngikkaluartumik naapertuilluartutut isigineqarput. (Jaaku 2:22-25; Saqqummersitat 7:9, 10) Jehovamut ikinngutaasutut naapertuilluartutut isigineqarput, aamma ’annikilliortitaangaarneq’ nunarsuarmi atuutilerpat aniguisitaanissaminnik neriuuteqarput. (Saqqummersitat 7:14) Naapertuilluarnermut ’imerusunnermikkut’ suli nalerisimaarnerulissapput „qilaat nutaat“ ataanni ’nunamut nutaamut naapertuilluassuseqarfiusumut’ ilaalerunik. — 2 Petrusi 3:13, NV; Tussiaat 37:29.

Pilluarput nallittuisut

13, 14. Nallittuisuunerput iliuutsikkut qanoq ersersissinnaavarput, tamannalu qanoq iluaqutigissavarput?

¹³ Qaqqami oqaluutsimini Jiisusi nangilluni ima oqarpoq: „Pilluarput nallittuisut, taakkumi nallittorneqassapput.“ (Matthæusi 5:7) Inatsisinut atatillugu nallittuineq eqqartuussisup inatsisinik unioqqutitsisimasumik inatsisit naapertorlugit tamakkiisumik pillaanngitsuuineratut paasineqartarpoq. Biibilimili oqaatsit „nallittuineq“-mik nutserneqartut annikilliortunut ikiortarialinnut ilorfaallaataasumik inussiarnernermut, qajassuussinermut misigeqatiginninnermullu amerlanertigut ersiutaasarput. Tassa misigeqatiginninneq suliakkut ersertartoq pineqarpoq. Samariamiu tullermik asannittoq pillugu Jiisusip assersuusiaani inuup annikilliortumut ’naakkinnittuliornera’ maligassaalluarpoq. — Lukasi 10:29-37.

¹⁴ Pilluarneq nallittuinerup kingunerisartagaa misigissagutsigu, ikiortarialinnut ajunngitsuliornitsigut inussiarnisaartuusariaqarpugut. (Galatiamiut 6:10) Jiisusip naapitani misiginneqatigai. „Nalligingaalerpai savatut paarsisoqanngitsutut  immata; amerlasuunillu ajoqersulerpai.“ (Markusi 6:34) Jiisusip nalunngilaa anersaakkut pisariaqartitsineq timikkut pisariaqartitsinermit pingaarnerusoq. Uaguttaaq misiginneqataanerput nallittuinerpullu ersersissinnaavarput allat pisariaqartinnerpaasaannik tuninerisigut — Guutip naalagaaffia pillugu nutaarsiassamik nuannersumik. (Matthæusi 24:14) Uppeqativuttaaq utoqqaanerusut, uillarnerit iliarsuillu suliassatigut ikiornissaannik neqeroorfigisinnaavavut ’ernumasullu tuppallersarsinnaallugit’. (1 Thessalonikamiut 5:14; Ussatit 12:25; Jaaku 1:27) Tamatuma pillualersissavaatigut. Pillualernittali saniatigut aamma iliuuserisimasavut pissutigalugit Jehovap nallittorumaarpaatigut. — Apustilit Suliaat 20:35; Jaaku 2:13.

Uummatimikkut minguitsuusut eqqisseqatigiissitsisullu

15. Qanoq uummatitsigut minguitsuusinnaallutalu eqqisseqatigiissitsisinnaavugut?

¹⁵ Jiisusip pilluarneraanerit arfernat aamma arfineq-aappaat ima oqaatigai: „Pilluarput uummatimikkut minguitsuusut, taakkuami Guuti takussavaat. Pilluarput eqqisseqatigiissitsisut, taakkumi Guutip qitornaanik taaneqassapput.“ (Matthæusi 5:8, 9) Uummat minguitsuusoq ileqqussatiguinnaanngitsoq aammattaarli anersaakkut minguitsuuvoq. Uummataavoq iluunngartoq, tamarmiusoq Jehovamullu tunniusimalluinnartoq. (1 Nalunaarsuutit 28:9; Tussiaat 86:11) Eqqisseqatigiissitsisut qatanngutitik kristumiut, ajornanngippallu inuit allat, eqqisseqatigaat. (Romamiut 12:17-21) ’Eqqissineq ujarpaat noqqaassutigalugulu’. — 1 Petrusi 3:11.

16, 17. (a) Sooq tanitat „Guutip qitornaanik“ taagorneqarpat, qanorlu Guuti ’takuaat’? (b) ’Savat allat’ Guuti qanoq ’takuaat’? (c) Qanoq qaqugulu ’savat allat’ tamakkiisumik ’Guutip qitornarilissavai’?

¹⁶ Eqqisseqatigiissitsisut uummatimikkullu minguitsuusut ’Guutip qitornaanik taaneqarnissaminnik’ aamma ’Guutimik takunninnissaminnik’ neriorsorneqarput. Kristumiut tanitat suli nunamiinneranni Jehovap ’qitornamisut’ akuerisarpai anersaamillu kinguaassiarineqartarlutik. (Romamiut 8:14-17) Kristusi qilammeeqatigissallugu makitinneqaraangamik Jehovap eqqaani kiffartortarput Jehovalu takuittarlugu. — 1 Johannesi 3:1, 2; Saqqummersitat 4:9-11.

¹⁷ ’Savat allat’ eqqisseqatigiissitsisut ’Paarsisumit Ajunngitsumit’ Jiisusi Kristusimit ’Naassaanngitsumik Ataatagisassaminnit’ siulersorneqarlutik Jehova kiffartorfigaat. (Johannesi 10:14, 16; Esaja 9:5) Kristusip ukiuni tusindini naalakkersuinerata kingorna naggataarutaasumik misilinneqarnermit aniguisut, Jehovap qitornaasut nunamiusutut akuerineqassapput ’kiffaanngissuserlu Guutip qitornaasa naalannarsiffissami pisassaat’ pigilerlugu. (Romamiut 8:21; Saqqummersitat 20:7, 9) Tamakku neriuutigalugit Jehova Ataatamissut taagulereerpaat, inuunertik taassumunnga tunniulluinnarlugu inuunerminnillu Tunisisutut akueralugu. (Esaja 64:7) Itsaq Jobitut Mosesitullu Guuti uppernerup isaanik ’takuaat’. (Jobi 42:5; Hebræerit 11:27) Taakkua ’uummatimik isaatigut’ Guutimillu eqqorluartumik ilisimasaqalernikkut Jehovap pissusii alutornangaartut malugaat peqqusaanillu iliornermikkut ilaarniarsaralugu. — Efesosimiut 1:18; Romamiut 1:19, 20; 3 Johannesi 11.

18. „Pilluarneraanerni“ arfineq-marlunni siullerni oqaatigineqartutut ullumikkut kikkut piviusumik pilluarpat?

¹⁸ Takuarput anersaamik pisariaqartitaminnik miserratiginninngitsut, aliasuttut, saamasut, naapertuilluarnermut kaattut imerusuttullu, nallittuisut, uummatimikkut minguitsuusut eqqisseqatigiissitsisullu Jehovap kiffartorfigineratigut pillualissasut, aap pilluarneq piviusoq angussagaat. Kisianni assortorneqartuaannarput, allaat malersorneqarlutik. Pilluarunnaassutigaat? Apeqqut tamanna ilanngutassiami tulliuttumi sammineqassaaq.

Uteqqiineq

• Anersaakkut pisariaqartitaqarnerminnik miserratiginninngitsut pilluarneq suna misigisarpaat?

• Aliasuttut qanoq tuppallersarneqartarpat?

• Saamasuulluta qanoq ililluta takutissinnaavarput?

• Sooq nallittuisariaqarlutalu, uummatikkut minguitsuusariaqarlutalu eqqisseqatigiissitsisariaqarpugut?

[Atuaqqissaarnermi apeqqutit]

[Qupp. 6-imi assiliartaq]

„Pilluarput anersaakkut pisariaqartitaqarnerminnik miserratiginninngitsut“

[Qupp. 6-imi assiliartat]

„Pilluarput iluarnermut kaattut imerusuttullu“

[Qupp. 6-imi assiliartaq]

„Pilluarput nallittuisut“