Ujarsiuk Jehova, uummatinik misissuisartoq

„Uanga ujarsinga, taava inuussaasi!“ — AMOSI 5:4.

1, 2. Biibilimi allassimagaangat Jehovap ’inuup uummataa isigigaa’ qanoq isumaqartarpa?

JEHOVA GUUTI pruffiitimut Samuelimut ima oqarpoq: „Inuit isiminnut saqqumisuinnaat isigisarpaat, [Jehovalli] inuup uummataa isigisarpaa.“ (1 Samueli 16:7) Qanoq ililluni ’Jehovap inuup uummataa isigisarpaa’?

² Biibilimi uummat inuup ilorlikkut pissusiinut — kissaataanut, eqqarsaataanut, misigissusiinut qanorlu misigisimaneranut — assersuutaagajuppoq. Tassa Biibilimi allassimagaangat Guutip inuup uummataa isigigaa isumaqartarpoq qallikkut ittut kisiisa isigineq ajorai. Inuup pissusivia isiginerusarpaa.

Guutip Israelikkut misissuiffigai

3, 4. Amosi 6:4-6 naapertorlugu Israelikkut naggueqatigiissortaasa quliusut naalagaaffianni pissutsit qanoq ippat?

³ Amosip nalaani Israelikkut naggueqatigiissortaasa quliusut naalagaaffiat isigigaangamiuk uummatinik misissuisartup suut takusarpai? Amosi 6:4-6-imi allaatigineqartutut takusarpai ’nalaasaarujuuinnartartut siniffinni nagguaatsup tuugaavinik pinnersaasersukkani nalaasaarfimminnilu, nerisartullu savaaqqanik illinnarnersiukkanik nersuteeqqanillu puallarsakkanik’ aamma ’nipilersorujoorniartartut viinnisortartullu qummuattanit’.

⁴ Qiviatsiaannarlugit immaqa ajorpasinngikkaluarpoq. Pisuut pequtilersorluagaasuni inuulluataarnartunilu najugaqartut pitsaanersiukkanik nerisaqartarlutillu imigaqartarput, nipilersuutinillu tusarnernerpaanik aliikkusersortittarlutik. „Siniffinni nagguaatsup tuugaavinik pinnersaasersukkani“ nalasarput. Israelikkut naggueqatigiissortaasa quliusut naalagaaffianni illoqarfiit pingaarnersaanni, Samariami, itsarnisarsiuut assaanerminni nagguaatsup tuugaavinik qiperukkat kusanartut nassaarisimavaat, qularnanngitsumillu taakkua ilarpassui pequtinut iikkanullu pinnersaataasimapput. — 1 Kunngit 10:22.

5. Sooq Amosip nalaani Israelikkut Guutimit iluarisaanngillat?

⁵ Jehovap Israelikkut mamartunik nerisarlutik, pitsaasunik viinnisortarlutik nipilersuutinillu nuannersunik tusarnaartarlutik pigissaarlutik inuunerat ajoraa? Soorunami naamik! Guutimmi sunik tamanik naammangaartunik tunivaatigut nuannaarutigisinnaaniassagatsigit. (1 Timotheusi 6:17) Jehovap iluarinngisai tassaapput Israelikkut kissaataat eqqunngitsut, uummatimikkut pissusii ajortut, Guutimut ataqqinninnginnerat nunaqqatiminnillu asanninnginnerat.

6. Amosip nalaani Israelimi anersaakkut pissutsit qanoq ippat?

⁶ ’Nalaasaarfimminni nalaasaarujuuinnartartut, savaaqqanik illinnarnersiukkanik nersuteeqqanillu puallarsakkanik nerisartut, viinnisortartut kukkilattarissanillu ingiorteqarlutik appisimaartartut’ tupatsinneqartussaapput. Angutit taakkua ’ulloq perlussiorfissaq imminnit ungasissuutinniarsaraat’. Israelimi pissutsit eqqissiunnaarutigisariaqaraluarpaat, kisianni ’Josefip kinguaavisa perluutaat soqutiginngilaat’. (Amosi 6:3-6, 1990) Josefi — tassa Israeli — aningaasaqarnikkut atugarissaaraluartoq Guutip takusinnaavaa anersaakkut ajorluinnartunik atugaqartoq. Tamannali isumakuluutiginagu ulluinnarni sammisartakkatik ingerlatiinnarpaat. Ullumikkut inuppassuit taamatuttaaq isiginnittaaseqarput. Miserratiginngilaat ulluni atugarliorfiusuni inuusugut, inuttulli eqqorneqaatiginngikkunikku allat qanoq innerat isumakuluutiginngilaat, anersaakkullu ittunik soqutigisaqaratik.

Israelikkut — inuiaat ajortunngoriartortut

7. Israelimi innuttaasut mianersoqqussutinik Guutimeersunik eqqumaffiginninngikkunik qanoq pineqassappat?

⁷ Amosip allagaani erserpoq inuiaat atugarissaarpasikkaluarlutik  ajortunngoriartortut. Israelikkut imminnuinnaq iluarusutsikkusuttut mianersoqqussutit Guutimeersut eqqumaffiginngippatigik isiginnittaasertillu allanngortinngippassuk Jehovap akeraannut tunniukkumaarpai. Assyriamiunit siniffiminnit nagguaatsup tuugaavinik pinnersaasersukkanit peersitaassapput tigusatullu aallarunneqarlutik. Inuulluataarunnaassapput!

8. Israelimi pissutsit qanoq ilillutik allaatigineqartutut ilersimappat?

⁸ Israelikkut qanoq ilillutik taamatut atugaqalersimappat? Pissutsit allanngoriartulersimapput 997-imi u.n.s. kunngi Salomo toqummat erneratalu Rehabeamip kingoraarmagu Israelikkullu naggueqatigiissortaasa quliusut Judakkut Benjaminikkullu naggueqatigiissortaannit avissaarmata. Israelikkut naggueqatigiissortaasa quliusut naalagaaffianni Jeroboami I, Nebatip ernera, siullersaalluni kunngiuvoq. (1 Kunngit 11:26) Taassuma inuit oqartussaaffigisani isumaqalersippai Jerusalemiliarluni Jehovamut pallorfiginnikkiartortarneq taakkununnga pisariuallaartoq. Inuilli atugarissaarnissaat eqqarsaatiginngilaa. Naagga, namminerliuna soqutigisani illersorniarai. (1 Kunngit 12:26) Israelikkut Jehovap ataqqinaatissaanik ukiumoortumik nalliuttorsuit nalliussiniarlugit Jerusalemiliartuarunik naalagaaffimmut Judamut uteqqerusulersinnaanerat Jeroboamip annilaangassutigaa. Taama pisoqannginniassammat nersuteeraasalianik guultiusunik marlunnik inissiivoq, aappaa Danimi aappaalu Betelimi. Taamaalilluni naalagaaffimmi Israelimi nersuteeraasaliamik pallorfiginninneq upperisarsiornerulerpoq naalagaaffimmut atasoq. — 2 Nalunaarsuutit 11:13-15.

9, 10. (a) Jeroboamip I-up upperisarsiornikkut nalliuttorsuit suut atulersippai? (b) Jeroboamip II-ta nalaani Israelimi nalliuttorsiutigineqartartut Guutip qanoq isigai?

⁹ Jeroboamip upperisarsiorneq nutaaq taanna ilumoortoorpasitsinniarsaraa Jerusalemimi nalliuttorsuarnut assingusunik nalliuttorsuaqalersitsinermigut. Kunnginik allakkat siulliit 12:32-mi ima allassimavoq: „Qaammatit arfineq-pingajuata ulluisa 15-ianni Jeroboami nalliuttorsiortitsivoq Judami nalliuttorsiortarneq malillugu. Betelimi pilliivimmut sanaaminut sassarpoq . . . pilliiniarluni.“

¹⁰ Jehovap upperisarsiornikkut nalliuttorsuit eqqunngitsut taakku akuerinngisaannarpai. Tamanna ukiut 100-t qaangiutereersut Jeroboamip II-ta naalakkersuinerata nalaani Amosi aqqutigalugu erseqqissarpaa. Jeroboami II ukiup 844-p u.n.s. missaani Israelikkut naggueqatigiissortaasa quliusut naalagaaffianni kunnginngorpoq. (Amosi 1:1) Amosi 5:21-24 naapertorlugu Guuti ima oqarpoq: „Nalliussisarnisi uumigaakka avaanngugeqalugillu, ullut nalliussiffisi nuannarinngilakka. Pilliutissinnik  ikikkagassanik naatitanillu pilliutissinnik pilliiffigigaluarussinga ilassiumassanngilakka, nersutaatinik puallarsakkanik nereqatigiissutissatut pilliiffigigaluarussinga qiviumissanngilakka. Tussiarnersi soraarukkussiuk uannut qujanaannassaaq, kukkilattariarsornersi tusarumanngilara! Iluarsuserli pikialatissiuk puilasutut, naapertuilluarnerlu kuunnguatut imaarutissanngitsutut.“

Ullumikkumut naleqqiussineq

11, 12. Israelimi nersuteeraasaliamik pallorfiginninneq kristumiuuneraqatigiinnilu guutisiorneq sutigut assigiissuteqarpat?

¹¹ Erseqqippoq Jehovap Israelikkut guutipilussiortut uummataat misissorsimagai, aamma nalliuttorsuit pilliutigineqartullu akuerinngikkai. Ullumikkuttaaq kristumiuuneraqatigiinni guutimik nalusut nalliuttorsiutigisartagaannik, soorlu juullimik guutimillu nalusut ileqquinik poorskisiornermut tunngatinneqartunik, nalliuttorsiutiginnittarneq Guutip akuerinngilaa. Jehovamut pallorfiginnittunut naapertuilluarneq inatsisaannerlu, imaluunniit qaamaneq taartorlu, peqatigiissinneqarsinnaanngillat. — 2 Korinthimiut 6:14-16.

¹² Israelimi nersuteeraasaliamik pallorfiginninneq kristumiuuneraqatigiinnilu guutisiorneq aamma allatigut assigiissuteqarput. Naak kristumiuunerartut ilaasa Biibili Guutip oqaasiatut akuerigaluaraat, Guutimik pallorfiginninnerat Guutimut ilumoortumik asanninnermik pissuteqanngilaq. Tamanna pissutigisuugunikku Guutip pallorfiginneriaasereqqusaatut „anersaakkut ilumoornikkullu“ Guuti pallorfigissagaluarpaat. (Johannesi 4:24) Aammattaaq kristumiuuneraqatigiit ’iluarsuseq pikialatinngilaat puilasutut, naapertuilluarnerlu kuunnguatut imaarutissanngitsutut’. Guutilli ileqqussatigut najoqqutassiai kimikillisittarpaat kinguaassiuutitigut inuunerlunnermik sualuttumillu ajortulianik allanik akuersaarinermikkut, allaallu ima ingasatsigipput anguteqatiminnoortartut arnaqatiminnoortartullu aappariittut pilluaqqusarlugit.

’Ajunngitsoq nuannarisiuk’

13. Amosi 5:15-imi kajumissaarut sooq malittariaqarparput?

¹³ Jehovap akuerisaanik pallorfiginnerusuttunut tamanut ima oqarpoq: „Ajortoq uumigisiuk ajunngitsorlu nuannaralugu.“ (Amosi 5:15) Nuannarinninneq uumiginninnerlu misigissusiupput sakkortuut uummammit assersuutaasumit aallaaveqartut. Uummat tatigisassaanngitsuummat paariniarlugu sapinngisatsinnik iliortariaqarpugut. (Ussatit 4:23; Jeremia 17:9) Uummaterput ajortunik kissaateqartikkutsigu, immaqa paasilissavarput ajortut nuannarilersimallugit ajunngitsullu uumigilersimallugit. Kissaatillu taakku ajortuliornikkut piviusunngortittarutsigik kiffartornermi qanorluunniit aallussilluartigigaluarutta Guutimit iluarisaaleqqinnavianngilagut. Taamaattumik Guuti qinnuigisariaqarparput ’ajortumik uumiginninnissamik ajunngitsumillu nuannarinninnissamik’ ikioqqulluta.

14, 15. (a) Israelimi ajunngitsuliortut ilaatigut kikkuuppat, qanorli pineqarpat? (b) Ullumikkut piffissaq tamaat kiffartortut qanoq kajumissaarsinnaavavut?

¹⁴ Israelikkut tamakkeratik Jehovap isaani ajortumik iliortarput. Assersuutigalugu Hoseap Amosillu ’ajunngitsoq nuannaraat’ aalajaallutillu pruffiititut Guuti kiffartorfigalugu. Allat nasiræeritut neriorsuipput. Neriorsuut tamanna atuutsillugu viinnequtinit pisunik tamanik nerissanatillu imissanngillat, ingammik viinnimik. (4 Mosesi 6:1-4) Nasiræerit imminut pilliutigeriaannaallutik inuunerat Israelikkut allat qanoq isigaat? Akissummi aalassannartumi anersaakkut qanoq ajortunngorsimatiginerat erserpoq. Amosi 2:12-imi ima allassimavoq: „Nasiræerit viinnisortaqquasi pruffiitillu siulittueqqunagit.“

¹⁵ Nasiræerit pruffiitillu maligassiuinerata Israelikkut kanngusutsilertariaqaraluarpai inooriaatsiminnillu allannguisittariaqaraluarlugit. Taamaaliornatilli Israelikkut Guutimik ilumoorfiginnillutik kiffartorfiginnittut taassuminnga naalannarsisitsiunnaarsinniarsaraat. Ullutsinni uppeqativut pioneriusut, ajoqersuiartortitaasut, nakkutilliisuusut angalasartut imaluunniit Betelimi suleqataasut inuttut allatut inuuleqqinniassammata piffissaq tamaat kiffartornertik unitseqqullugu kajumissaanngisaannartariaqarpavut. Sulilluarnerminnilli ingerlatsiinnaqqullugit kajumissaartariaqarpavut.

16. Israelikkut Mosesip nalaani atugaat Amosip nalaani atugaasunit sooq pitsaanerusimappat?

¹⁶ Naak Amosip nalaani Israelikkut pigissaaraluarlutik  ’Guutimi pisuujunngillat’. (Lukasi 12:13-21) Siuaasaat inoqajuitsumi ukiuni 40-ni mannaannarmik nerisaqarsimapput. Nersuteeqqat puallarsakkat neqaannik nerineq ajorsimapput siniffinniluunniit nagguaatsup tuugaavinik pinnersaasersukkani eqiatitaarlutik nalaasaarneq ajorlutik. Mosesilli oqaasii uku ilumoorput: „[Jehovap] Guutivit qanoq iliorninni tamani pilluaqqusimavaatit. . . . Ukiuni 40-ni najorsimagakkit sumilluunniit amigaateqarsimanngilatit.“ (5 Mosesi 2:7) Aap, Israelikkut inoqajuitsumiittut pisariaqartitatik piuaannarpaat. Pingaarnerpaamillu Guutimit asaneqarlutillu, illersorneqarlutillu pilluaqqusaapput!

17. Sooq Jehovap Israelikkut nunamut neriorsuutigisamut siulersorpai?

¹⁷ Jehovap Amosip nalaani inuusut eqqaasippai siuaasaat nunamut neriorsuutigisamut siulersorsimagini akeraasalu peersinissaannik ikiorsimagini. (Amosi 2:9, 10) Sooruna Guutip Israelikkut Egyptenimiit nunamut neriorsuutigisamut siulersorai? Pinngortitsisertik tunullugu assatik sarliaannarlugit inuulluataarniassammata taamaaliorpa? Naagga, inuiattut kiffaanngissuseqarlutik anersaakkullu minguitsuullutik pallorfigisinnaaniassammanni taamaaliorpoq. Kisianni Israelikkut naggueqatigiissortaasa quliusut naalagaaffianni innuttaasut ajunngitsoq nuannarinngilaat ajortorlu uumiginagu. Inuusaliarujussuit naalannarsisippaat, Jehova Guuti naalannarsisinnagu. Ila kangunassusia!

Jehovap inuiaat akisussaatippai

18. Sooq Jehovap anersaakkut inussiaataanermit aniguisippaatigut?

¹⁸ Jehovap inuiaat ileqqui isiginngitsuusaarnianngilai. Qanoq iliorniarnerluni oqaluttuaraa. Amosi aqqutigalugu ima oqarpoq: „Pillarumavassi ajortuliasi tamaasa pillugit.“ (Amosi 3:2) Tamanna assersuutaasumik Egyptenimit, pissutsit aaqqissuussaanerannit ajortumit maanna atuuttumit, aniguisitaanitsinnik eqqarsaatiginnilissutigisariaqarparput. Jehovap namminissarsiorluta nammineq anguniakkavut anguniarniassagatsigit anersaakkut inussiaataanermit aniguisinngilaatigut. Naamik, inuiattut kiffaanngissusilittut minguitsumik pallorfiginninnikkut naalannarsisillugulu unnersiutiginiassagatsigu aniguisippaatigut. Tamatta kiffaangissutsitsinnik Guutimeersumik qanoq atuinerluta nassuerutigisussaavarput. — Romamiut 14:12.

19. Amosi 4:4, 5 naapertorlugu Israelikkut amerlanersaasa suna nuannarilersimavaat?

¹⁹ Ajoraluartumik Amosip tusarliussaa kimittooq Israelikkut amerlanersaannit soqutigineqanngilaq. Pruffiitip uummatimikkut anersaakkut napparsimanerat qulaarpaa, soorlu Amosi 4:4, 5-imi atuarsinnaagipput: „Betelimukaritsi ajortulioriartorlusi, Gilgalimukaritsi suli annerusumik ajortulioriartorlusi! . . . Taamaaliornermi nuannarisareqigassiuk, Israelikkuususi.“ Israelikkut kissaatit eqqortut ineriartortinngilaat. Uummatertik paarisimanngilaat. Tamatuma kingunerisaanik amerlanersaasa ajortoq nuannarilerpaat  ajunngitsorlu uumigilerlugu. Nersuteeraasaliamik pallorfiginnittut manngertunik pukusullit taakku allanngunngillat. Jehovap akisussaatikkumaarpai, ajortuliatillu pillugit toqusariaqarput.

20. Amosi 5:4-mi kajumissaarut qanoq ililluni malinneqarsinnaava?

²⁰ Taamanikkut Israelimi Jehovamut aalajaattuarnissaq imaannaanngitsuusimavoq. ’Sarfap assorniarnera’ imaannaanngitsoq kristumiut ullumikkut, inuusuttut utoqqaallu, nalunngilluinnarpaat. Israelikkulli ilaasa Guutimut asanninnertik taassumanngalu iluarisaarusunnertik kajumississutigalugit kissaatigisaatut Guuti pallorfigaat. Amosi aqqutigalugu Jehovap ilumoorluni taakku ima kajumissaarpai: „Uanga ujarsinga, taava inuussaasi!“ (Amosi 5:4) Ullumikkut Jehovap imminut saattut imminillu ujarlersut, oqaatsini aqqutigalugu ilisarisimannilersut piumasaminillu maleruaasut aamma taamatut nallittorpai. Nassuerutigisariaqarpoq imaannaanngitsuusoq, inuunermilli naassaanngitsumik kinguneqassaaq. — Johannesi 17:3.

Anersaakkut kaannersuaqaraluartoq pigissaarneq

21. Guutimik eqqortumik pallorfiginninngitsut kaannersuarmit qanoq ittumit eqqorneqarpat?

²¹ Pallorfiginninnermik ilumoortumik tapersersuinngitsut suna ilimagisinnaavaat? Kaannersuaq kaannersuarnit tamanit ajornerpaaq — anersaakkut kaanneq! „Ullut nalliukkumaarput,“ Jehova, Naalagaq kisimi oqartussaasoq oqarpoq, „taava kaannersuaq nunamut nalliutitikkumaarpara — imaanngitsoq timiusamik nererusunneq, imaanngitsoq imermik imerusunneq, tassaasorli [Jehovap] oqaasia tusarusullugu noqqaaneq.“ (Amosi 8:11) Ullumikkut kristumiuuneraqatigiinni taamatut anersaakkut kaannersuaqarpoq. Inuilli unneqqarillutillu ilumoorusuttut Guutip innuttaasa anersaakkut pigissaarnerat takusinnaavaat, taamaattumillu Jehovap peqatigiissortaanut ilanngussortorpassuupput. Kristumiuuneraqatigiinni pissutsit kristumiullu ilumoortut akornanni pissutsit assigiinngilluinnarneri Jehovap oqaasiini ukunani eqqorluinnartumik oqaatigineqarput: „Kiffakka nerissapput, ilissili kaassaasi, kiffakka imissapput, ilissili imerusussaasi, kiffakka nuannaartinneqassapput, ilissili kanngusutsinneqassaasi.“ — Esaja 65:13.

22. Sooq nuannaarnissatsinnut pissutissaqarpugut?

²² Anersaakkut inuussutissat pisakkavut taakkualu iluaqutaanerat nammineq inuttut pingaartippavut? Biibilimik atuagassianillu Biibilersaarutinik atuaraangatta aamma ataatsimiinnerit ataatsimeersuarnerillu peqataaffigigaangatsigit nuannaangaaratta nilliarusulersarpugut, ilaa? Ilumut! Guutip oqaasianik, ilaatigut Amosip siulittuutaanik isumassarsiarititaasunik paasinninnitta nuannaarutiginissaanut pissutissaqaqaagut.

23. Guutimik asannittut naalannarsisitsisullu suut nuannaarutigisinnaavaat?

²³ Guutimik asannittunut naalannarsisitserusuttunullu tamanut Amosip siulittuutaa neriuummik tusarliussaqarpoq. Aningaasaqarnikkut atukkavut qanorluunniit ikkaluarpata silarsuarmilu qanorluunniit misilinneqaraluarutta, Guutip kiffaasut pilluaqquneqartarpugut anersaakkullu inuussutissanik pitsaanerpaanik pilersorneqarluta. (Ussatit 10:22; Matthæusi 24:45-47) Taamaammat ataqqinaat tamaat Jehovamut tunniunneqartarpoq, uagutsinnut nuannaarutigisinnaaqqullugit sunik tamanik naammangaartunik tunisisumut. Qanortoq aalajangiusimatigu naassaanngitsumik uummatitsigut taanna unnersiutiginiarlugu. Jehova uummatinik misissuisartoq ujarutsigu, tamanna immikkut pisinnaatitaaffigissavarput. (wE 11/15 04)

Qanoq akissavit?

• Amosip nalaani Israelimi pissutsit qanoq ippat?

• Israelikkut naggueqatigiissortaasa quliusut naalagaaffianni pissutsit ullumikkullu silarsuarmi pissutsit sutigut assigiissuteqarpat?

• Kaannersuaq siulittuutigineqartoq qanoq ittoq maannakkut atuuppa, kikkullu tamatumannga eqqorneqanngillat?

[Atuaqqissaarnermi apeqqutit]

[Qupp. 29-mi assiliartat]

Israelikkorpassuit inuulluataartuupput, anersaakkulli piitsuullutik

[Qupp. 31-mi assiliartaq]

Piffissaq tamaat kiffartortut sulilluarnerminnik ingerlatsiinnaqqullugit kajumissaartigit