Imigassamut oqimaaqatigiissumik isiginnittaaseqarit

„Viinni mitalliisuuvoq immiarlu perpalulersitsisarluni, taassuminnga uppeqqajaassuteqartut ilisimassuseqartuunngillat.“ — USSATIT 20:1.

1. Tussiaasiortup Jehovap tunissutaanik ajunngitsunik pingaartitsinini qanoq oqaatigisimavaa?

AJOQERSUGAQ Jaaku ima allappoq: „Tunissutit ajunngitsut naammalluinnartuusullu tamarmik pavannga qaamasut ataataannit . . . pisarput.“ (Jaaku 1:17) Guutip tunissuterpassui ajunngitsut qujamasuutigalugit tussiaasiortoq ima allappoq: „Naatippatit ivikkat nersutaatit nerisassaat naasullu inunnut atuuttussat pilersillugit timiusat nunamit viinnilu inunnik nuannaalersitsisartoq. Inuit kiinaat qillertisippatit uuliamik, timiusallu inuk nutaamik nukeqalersippaa.“ (Tussiaat 104:14, 15) Naasut, timiusat uulialu assigalugit viinni imigassallu allat Guutimit tunissutaapput ajunngitsut. Qanoq atortariaqarpavut?

2. Imigassaq pillugu apeqqutit suut sammissavavut?

² Tunissut ajunngitsuuvoq aatsaat eqqortumik atorneqaruni. Assersuutigalugu tungusunnitsuut  ’pitsaaqaaq’, kisianni „tungusunnitsuutitorpallaarluni ajorpoq“. (Ussatit 24:13; 25:27) ’Viinnisulaarneq’ immaqa ajunngilaq, imigassamilli atornerluineq ajornartorsiutaavoq ilungersunartoq. (1 Timotheusi 5:23) Biibilimi ima mianersoqquneqarpugut: „Viinni mitalliisuuvoq immiarlu perpalulersitsisarluni, taassuminnga uppeqqajaassuteqartut ilisimassuseqartuunngillat.“ (Ussatit 20:1) Imigassamik ’uppeqqajaassuteqarneq’ qanoq paasisariaqarpa? * Imigassartorpallaarneq qanoq paasisariaqarpa? Qanoq imigassamut oqimaaqatigiissumik isiginnittaaseqarsinnaavugut?

Imigassamik ’uppeqqajaassuteqarneq’ qanoq paasisariaqarpa?

3, 4. (a) Aalakoornerup Biibilimi assuarineqarnera qanoq ersersinneqarpa? (b) Aalakoornerup malunniutaasa ilaannik taasaqarit.

³ Itsaq Israelimi erneq ’atuipiluttuullunilu imerajuttuusoq’ ujaqqanik milloorlugu toqunneqartussaavoq. (5 Mosesi 21:18-21) Paulusip kristumiut ima peqquai: ’Qatanngummik taaneqartoq kinguaassiuutitigut inuunerluttuuppat piumatuujulluniluunniit, guutipilussiortuulluni mittatilliisuulluniluunniit, imerajuttuulluni ujajaasuulluniluunniit, taanna ilagisassanngilarsi. Taamaattoq nereqatigissanngilarsiluunniit’. Erseqqippoq aalakoorneq Biibilimi assuarineqartoq. — 1 Korinthimiut 5:11; 6:9, 10.

⁴ Biibilimi aalakoornerup malunniutai ima allaatigineqarput: „Isiginiaqinagu viinni aappalulluni tallissimasoq imertarfimmi qillaallattartoq, naammattumik kuerarneqartoq! Naggataatigummi pulateriaarsuttut kiisisinnaavoq toqunartumik tissalutsitsilluni pulateriaarsuttut toqunartulittut. Taava takusaqassaatit eqqumiitsunik, paatsiveqanngitsunillu oqalulissaatit.“ (Ussatit 23:31-33) Imigassartorpallaarneq ’pulateriaarsuttut kiisisarpoq’, tassa aalakoortoq napparsimalertarlunilu paatsiveerusimaalertarpoq immaqalu ilisimajunnaarluni. Imaassinnaavoq ’eqqumiitsunik takusaqartoq’ — takorluuisoq imaluunniit allaat sanaroorluni. Immaqa aamma imminut nangarsinnaajunnaartarpoq eqqarsaatini kissaatinilu ’paatsiveqanngitsut’ imaluunniit ajortunngorsimasut oqaluuserilerlugit.

5. Imigassartungaatsiarneq qanoq ajoqutaasinnaava?

⁵ Aalakuulinnginnermimi imigassartorunnaaginnarluni ajunngila? Ilaat imigassartungaatsiarsimagaluarlutik aalakoorpasinneq ajorput. Taamaaliornermilli ajorsorinninngitsoq imminut salloqittarpoq. (Jeremia 17:9) Imigassamik pinngitsuuisinnaajunnaariartuaartoqarsinnaavoq, tassa imerajuttunngoriartuaartoqarsinnaavoq. (Titusi 2:3) Atuakkiortup Caroline Knappip imerajuttunngoriartorneq ima allaatigaa: „Arriitsumik malunnanngingajattumillu pisarpoq.“ Aap, imigassartorpallaarneq napiaaniutaavoq inuunermik navianartorsiortitsisoq!

6. Sooq imigassartorpallaannginnissarput nerivallaannginnissarpullu pingaaruteqarpa?

⁶ Aamma Jiisusip mianersoqqussutaa una eqqarsaatigiuk: „Mianersoritsi uummatisi malussarlersitaaqqunagit aalakoornermit imerajunnermillu inuunerullu matuma piinik isumakuluutinit, pakasarteqqunasi ullup taassuma tassanngaannaq tikiunneranit nigartuutitut illuni, inuiaammi nunarsuarmi tamarmi najugaqartut tamaasa tikissammagit.“ (Lukasi 21:34, 35) Aalakuulinngikkaluarluni imigassartorneq uernalissutaasinnaallunilu puungalissutaasinnaavoq  — timikkut anersaakkullu. Taamaatsilluta Jehovap ullussaa nalliukkaluarpat qanormita issagaluarpa!

Imigassamik atornerluineq qanoq kinguneqarsinnaasoq

7. Sooq imigassamik atornerluineq Korinthimiunut allakkat aappaat 7:1-imi oqaaqqissaarummut naapertuutinngila?

⁷ Imigassamik atornerluineq navianaaterpassuaqarpoq, timikkut anersaakkullu. Tingummik eqittoortoqarsinnaavoq, hepatitisertoqalersinnaavoq, kræftertoqalersinnaavoq sukkortoqalersinnaallunilu, aamma uummatikkut naakkullu ajuuteqalertoqarsinnaalluni. Sivisuumik imigassamik atornerluineq tarnikkut perulunnermik, deleeriarnermik taaneqartumik, kinguneqarsinnaavoq. Imigassamik atornerluineq Biibilimi oqaaqqissaarummut uumunnga ersarissumik naapertuutinngivippoq: „Immitsinnik minguiarniarta, timimi anersaamilu minguk tamaat piiassavarput illernartuullutalu Guutimik mianerinninnermi.“ — 2 Korinthimiut 7:1.

8. Ussatit 23:20, 21 naapertorlugu imigassamik atornerluineq qanoq kinguneqarsinnaava?

⁸ Imigassamik atornerluineq akisoorujussuuvoq, imerajuttullu amerlasuut suliffissaaruttarput. Itsaq Israelimi kunngi Salomo ima mianersoqqusivoq: „Ilaginiaqinagit viinnisorpallaartut, imaluunniit taakku ingasattumik neqitortut.“ Sooq? Ima nangippoq: „Imerpallaartut nerivallaartullu piitsunngortussaapput, sinngullu inuit alittornikunik atisaqalersittarpai.“ — Ussatit 23:20, 21.

9. Sooq biilertussaatilluni imigassartunngivinnissaq silatusaarnerua?

⁹ Qinerlerfissiami The Encyclopedia of Alcoholism-imi navianaat alla eqqaaneqarpoq: „Misissuinerit takutippaat imigassartorsimallutik biilertut iluamik biilersinnaajunnaartartut. Ilaatigut qisuariarnerat arriinnerulertarpoq, ataqatigiissaarilluarsinnaajunnaartarlutillu mianersorluarsinnaajunnaartarlutillu naliliilluarsinnaajunnaartarput.“ Imigassartorsimalluni biilerneq ajunaarutaasinnaavoq. 2003-mi Danmarkimi angallannermi ajutoornerni aalakoornartutorsimanermik pissuteqarlutik 105-it toqusimapput 672-illu aqqunartitersimallutik. Ingammik inuusuttut navianartorsiorput, taakkumi biilerneq imigassartornerlu eqqarsaatigalugit misilittagakinnerupput. Imigassartungaatsiarsimalluni biileraanni oqartoqarsinnaanerpa inuuneq Guutimit tunissutitut ataqqillugu? (Tussiaat 36:10) Inuunerup illernassusia pissutigalugu, biilertussaatilluni imigassartunngivinnissaq pitsaanerussaaq.

10. Imigassaq qaratsamut qanoq sunniuteqartarpa, tamannalu qanoq navianaateqarpa?

¹⁰ Ingasattumik imigassartorneq timikkut peqqissutsimut ajoqutaaginnarnani aammali anersaakkut peqqissutsimut ajoqutaavoq. Biibilimi ima allassimavoq: „Viinni innuttama silaarussutigaat.“ (Hosea 4:11) Imigassaq qaratsamut sunniuteqartarpoq. Atuagassiaaqqami Misbrugets ABC-mi ima nassuiarneqarpoq: „Siullerpaamik imigassaq qaratsamik qiteqqamillu nukillaartitsisarpoq. Qarasarsuaq nukillaaraangat inuk annerusumik minnerusumilluunniit imminut nangarsinnaajunnaartarpoq.“ Taamaatsilluni ittuujuisaarnissamut ussernartunullu nakkaannarnissamut ’uppeqqajaanarnerussaaq’. — Ussatit 20:1.

11, 12. Imigassartorpallaarneq qanoq anersaakkut ajoqutaasinnaava?

¹¹ Aammattaaq Biibilimi ima peqqussuteqarpoq: „Nerigussi imerussiluunniit qanorluunniillu iliorlusi taamaaliussaasi Guutip ataqqinaatissaanik.“  (1 Korinthimiut 10:31) Imigassartungaatsiarneq Guutimut ataqqinaataava? Kristumiu imerajuttutut tusaamaneqarusunnavianngilaq. Imerajuttutummi tusaamaneqarneq Jehovap aqqanut ataqqinaataanani nikanarsaataassaaq.

¹² Taavami kristumiu imigassartorpallaarluni uppeqatiminut, immaqa ajoqersuganngorlaamut, mamiatsatsitsippat? (Romamiut 14:21) Jiisusi ima mianersoqqusivoq: „Minninnguit uannut uppertut ukua ilaannik tammartitsisoqarpat taassumunnga pitsaanerussagaluarpoq aserorteriviup ujarattaa qungasianut qilerullugu immap itinersaanut kivisitaaguni.“ (Matthæusi 18:6) Aamma imigassartorpallaarneq ilagiinni immikkut pisinnaatitaaffinnik annaasaqarnermik kinguneqarsinnaavoq. (1 Timotheusi 3:1-3, 8) Puigorneqassanngilarlu imigassamik atornerluineq ilaqutariinnut ajoqutaasoq.

Qanoq imigassamik atornerluisunngornaveersaartoqarsinnaava?

13. Imigassamik atornerluisunngornaveersaarnissamut suna pingaaruteqarpa?

¹³ Imigassamik atornerluisunngornaveersaassagaanni qanoq imigassartortiginissap nalunnginnissaa pingaaruteqarpoq — imaanngitsoq imigassartorpallaareerluni aalakuuliivikkaanni imerunnaartoqassasoq imigassartorpallaartinnanili unitsittariaqarpoq. Kia qanoq imertiginissat killilissavaa? Apeqqutaasut arlaliummata qanoq imigassartortoqartigisinnaaneranik najoqqutassiortoqarsinnaanngilaq. Tamatta immikkut killissarput nalunngittariaqarparput qaangernaveersaartariaqarlugulu. Imerpallaarnerluni qanoq paasineqarsinnaava? Tamanna pillugu najoqqutassaqarpa?

14. Imigassartorpallaarnani qanoq imigassartortigisinnaanerluni aalajangernissamut suna najoqqutassaalluarpa?

¹⁴ Biibilimi ima allassimavoq: „Silatussuseq isumatussuserlu . . . ilinnut inuussutaassapput qungatsinnilu ujamiullutik kusanangaartut.“ (Ussatit 3:21, 22) Taamaattumik manna najoqqutassaalluarpoq: Imigassartorsimalluni malunnartumik naliliilluarsinnaajunnaarlunilu eqqarsarluarsinnaajunnaaraanni, tamanna imerpallaarneruvoq. Aamma killissamik aalajangiigaanni imminut ilumoorfiginissaq pingaaruteqarpoq!

15. Qaqugukkut imigassartunngilluinnarnissaq silatusaarnerusinnaava?

¹⁵ Ilaannikkut immaqa silatusaarnerussaaq imigassartunngilluinnarnissaq. Immaqa arnaq naartusoq naartuni ajoquserniarnagu imigassartorniarnani aalajangerpoq. Imigassamillu ajornartorsiuteqarsimasup imaluunniit nalunngeqatiginnissutsi pissutigalugu imigassartorneq ajortup peqatiginerani nammineq imigassartornaveersaarutta asannittuliussannginnerpugut? Jehovap palasit tupermi naapeqatigiittarfimmi kiffartortut ima peqquai: „Viinnimik immiamilluunniit imersimassanngilasi Tupermut Naapeqatigiittarfimmut isissagaangassi, imersimagaluarussi toqussagassi.“ (3 Mosesi 10:8, 9) Taamaattumik kristumiut ataatsimiinnerinukarnissarput, oqaluussiartornissarput teokratiimulluunniit tunngatillugu allamik suliaqarnissarput sioqqutingaatsiarlugu imigassartunngissimasariaqarpugut. Soorunami nunat ilaanni inuusuttunut aalajangersimasumik ukiulinnut imigassamik sassaalliuteqarnissaq inerteqqutaappat imaluunniit imigassaq inerteqqutaalluinnarpat inatsisit maleruartariaqarpavut. — Romamiut 13:1.

16. Imigassallerfigineqaruit qanoq eqqortumik aalajangersinnaavit?

¹⁶ Imigassallerfigineqaruit ingerlaannaq imminut  ima aperisariaqarputit: ’Maannakkut imigassartoruma ajunngila?’ Imigassartorniarlutit aalajangeruit, qanoq imigassartortigissanerlutit killiliussat eqqaamajuaruk qaangernagulu — aamma qaaqqusisumit tukkortumit kimigiiserfigineqaraluaruit. Ingammik imigassaq killeqanngitsumik sassaalliutigineqaraangat mianersortarit, soorlu katittorsiornerni. Nunani amerlasuuni nukangasut imigassartornissaat inerteqqutaanngilaq. Angajoqqaat akisussaaffigaat meeqqamik imigassamut tunngatillugu siunnersornissaat, siunnersuutiminnillu maleruaanissaat qulakkeertariaqarlugu. — Ussatit 22:6.

Ajornartorsiut ajugaaffigisinnaasat

17. Imigassamik ajornartorsiuteqarnerluta qanoq ililluta paasisinnaavarput?

¹⁷ Imigassartorpallaartarpit? Kukkoqinak — isertukkannik imigassamik ajornartorsiuteqaruit qaqugukkulluunniit kingunipiloqassaaq. Taamaattumik ilumoorlutit imminut misissoqqissaarit. Imminut ima aperigit: ’Siornatigornit imerneruvunga? Kimittunerusunik imertalersimavunga? Isumakuluutit, stressi ajornartorsiutilluunniit puiorniarlugit imertarpunga? Ilaquttama ikinngutimaluunniit ilaasa imigassamik atuinera isumakuluutigaat? Imigassartornera ilaquttannut ajoqutaava? Sapaatip-akunnera ataaseq, qaammat ataaseq qaammatilluunniit arlallit imigassartornaveersaarnissaq sapernartissavara? Isertorlunga imertarpunga?’ Taavami apeqqutit taakkua ilaat arlallilluunniit aappimik akisariaqarukkit? Taava ’inuk kiinnaminik tarrarsuutikkut qimerluuisoq erniinnarlu qanoq isikkoqarnerminik puiuisoq’ assigeqinagu. (Jaaku 1:22-24) Ajornartorsiut aaqqinniarlugu iliuuseqarit. Suut iliuuserisinnaavigit?

18, 19. Imigassartorpallaarneq qanoq unitsinneqarsinnaava?

¹⁸ Paulusip kristumiut ima oqaaqqissaarpai: „Viinnimik aalakooqinasi, aalakoornerup inuunerlunnerit pilersittarmagit, Anersaamilli peqangaalersinneqaritsi.“ (Efesosimiut 5:18) Aalajangerit ingasaassinak qanoq imigassartortigissanerlutit tassungalu killilerlutit. Aalajangerit killiliussat qaangerniarnagu. Imminut naalakkersinnaagit. (Galatiamiut 5:22, 23) Imerpallaarnissannut kimigiiserfiginnittut ilaannikkut ilagisarpigit? Taamaappat mianersorit. Biibilimi ima allassimavoq: „Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.“ — Ussatit 13:20.

¹⁹ Ajornartorsiut qimarratiginiarlugu imigassartortaruit, taava ajornartorsiut iliuuseqarfigiuk. Biibilimi siunnersuutit atorlugit ajornartorsiutit iliuuseqarfigineqarsinnaapput. (Tussiaat 119:105) Nangaanak utoqqaanertamut tatigilluakkannut ikiortissarsiorit. Jehovap pilersitaanik tamanik atorluaanikkut anersaakkut ineriartorit. Guutimut attaveqarnerit nakussatsiguk. Qinunikkut saaffigiuartaruk, ingammik sanngiissutitit pillugit. ’Uummatit tartutillu misissuiffigeqqullugit [minguiaqqullugit, NV]’ kimigiiserfigiuk. (Tussiaat 26:2) Sapinngisannillu assuarnaallutit inuuniarit, soorlu allaaserisap matuma siuliani allaatigineqartoq.

20. Imigassamik ajornartorsiut ajugaaffigiuminaatsikkaanni suut iliuuserisariaqarsinnaappat?

²⁰ Imigassamik ajornartorsiuteqarnerit ilungersoraluarlutit ajugaaffigisinnaanngikkukku qanoq iliussavit? Taava Jiisusip siunnersuutaa una malittariaqarpat: „Assappit tammartippatit taava kipiuk; ilinnut pitsaanerussaaq avataajarsimallutit  inuunermut iseruit illuttut assaqarluni Anniarfimmut [Gehennamut, NV] . . . pinermit.“ (Markusi 9:43, 44) Tamanna isumaqarpoq imigassartunngilluinnartariaqartutit. Arnaq Irenemik taasinnaasarput taamaaliorniarluni aalajangersimavoq. Ima oqaluttuarpoq: „Ukiut marluk affangajallu imigassartornikuunanga eqqarsartalerpunga qanoq qisuariassanersunga paasiniaannarlugu immannguaq imigassartoruma ajussannginnersoq. Taamatulli eqqarsaleraangama ingerlaannaq ajornartorsiutiga Jehovamut qinunikkut saqqummiuttarpara. Silarsuassaq nutaaq tikiutsinnagu imigassartorniarnanga aalajangernikuuvunga, immaqa aamma taamanikkussamut imigassartornavianngilanga.“ Imigassartunngilluinnarnissaq ingasaassinerunngilaq Guutip silarsuassaani nutaami naapertuilluassuseqarfiusumi inuulerumagaanni. — 2 Petrusi 3:13.

’Arpagitsi ajugaasup pisassaa pissarsiariniarlugu’

21, 22. Inuunermut arpannermi suna apuuffissamut apuutinngitsoorutigisinnaavarput, tamannalu qanoq pinngitsoorsinnaavarput?

²¹ Paulusip kristumiup inuunera arpaliunnermut assersuuppaa, ima allakkami: „Nalugassiuk arpaliuttarfimmi unammisut tamarmik arpattaraluartut, ataasiinnaalli ajugaasup pisassaa pissarsiarisaraa? Arpagitsi pissarsiariniarlugu! Timersorlutik unammisut tamarmik sunik tamanik pinaveersaagaqartarput — allat taamaaliortarput ajugaasumut niaqorusiussaq toquliortartoq pissarsiariumallugu, uagulli taamaaliortarpugut toquliorneq ajortoq pissarsiariumallugu. Taamaattumik uanga arpappunga maangaannaq pinnanga, tilluuttartutullu silaannarmut tillueriartutut inngilanga. Timiga peqqarniisaarfigaara naalatsillugulu pinngitsaalillugu allanut oqaluussisartunga narrugisaaqqunanga.“ — 1 Korinthimiut 9:24-27.

²² Apuuffissaminnut apuuttut kisimik ajugaasup pisassaa pissarsiarissavaat. Inuunermut arpannermi imigassamik atornerluineq pissutigalugu apuuffissamut apuutinngitsoorsinnaavugut. Imminut naalakkersinnaasariaqarpugut. ’Maangaannaq arpassanngikkutta’ ’imerujuupilunnaveersaartariaqarpugut’. (1 Petrusi 4:3) Sutigut tamatigut imminut naalakkersinnaasariaqarpugut. Imigassamut tunngatillugu ’iluaatsuussusermut silarsuarmiullu kajungerisaannut naaggaarutta’ silatusaassaagut. Aap, „silatusaarluta peqqusersuillutalu Guutimillu mianerinnittuulluta“ inuusariaqarpugut. — Titusi 2:12.  (wE 12/1 04)

[Quppernerup ataani ilanngussaq]

Eqqaamavigit?

• Imigassamik atornerluineq suua?

• Imigassamik atornerluineq qanoq kingunipiloqartarpa?

• Qanoq imigassamik atornerluinaveersaarsinnaavugut?

• Imigassamik atornerluineq qanoq akiorneqarsinnaava?

[Atuaqqissaarnermi apeqqutit]

[Qupp. 17-mi assiliartaq]

Viinni ’inunnik nuannaalersitsisarpoq’

[Qupp. 18-mi assiliartaq]

Killissarput nalunngittariaqarparput qaangernagulu

[Qupp. 19-mi assiliartaq]

Imigassartortinnak aalajangereeruk qanoq imigassartortiginissat

[Qupp. 20-mi assiliartaq]

Sanngiissutitit pillugit qinunikkut Jehova saaffigiuartaruk

[Qupp. 21-mi assiliartaq]

Angajoqqaat meeqqamik imigassamut tunngatillugu siunnersornissaat akisussaaffigaat