Naassaanngitsumik inoorusuppit?

„TOQUNISSARA siooraginngilara,“ Japanimiu arnaq utoqqaq oqarpoq. „Naasulli ukua qimannissaat aliasuutigaara.“ Kristumiup oqaluussisartup pulaartuata misigissusii paasivai, arnammi naatsiivia kusanartorujussuuvoq. Toqu annilaangaginagu oqartut ilaasa, pinngortitarsuup tupinnartui pingaartingaarpaat, immaqalu qamuuna naassaanngitsumik inoorusukkaluarlutik.

Amerlasuulli naassaanngitsumik inuusinnaanermik eqqarsaat suusupagalugu itigartittarpaat. Allaat immaqa oqartarput inuujuaannarnissaq eqqarsaatigisinnaanngilluinnarlugu. Soormita ilaat taamaappat?

Inuuneq naassaanngitsoq — nuanniitsoq?

Ilaasa naassaanngitsumik inuuneq nuanniissagatippaat. Taakku immaqa eqqarsartarput  pensionistit amerlasuut inuunerat assigiiaaginnaasoq allamik suliassaqarpiannginnamik ingillutik fjernsyneruusaartartut. Taamatut eqqarsartaruit, taava ulloriarsiortup Robert Jastrowip, inuuneq naassaanngitsoq pilluaqqussutaassanersoq perloqqussutaassanersorluunniit aperineqarami oqaasia tusaariaruk. Taanna ima akivoq: „Alapernaatsunut killeqanngitsumillu ilinniarusussusilinnut pilluaqqussutaassaaq. Taakkununnga nuannerluinnassaaq nalunagu naassaanngitsumik ilinniagaqarluarsinnaallutik. Sunilli ilisimasariaqartunik pingaartunik tamanik ilisimasaqareersorisunut, matoqqasunullu, inuuneq naassaanngitsoq tassaassaaq perloqqusaaneq ajorluinnartoq. Piffissaq sumut atussanerlugu nalulluinnassavaat.“

Inuuneq naassaanngitsoq nuannarinngikkukku nuannarigukkuluunniit isiginnittaatsit apeqqutaasorujussuuvoq. „Alapernaatsuuguit killeqanngitsumillu ilinniarusussuseqarlutit“, taava eqqarsaatigiuk eqqumiitsuliornermi, nipilersornermi, illussanik titartaanermi, naatsiivilerinermi suliassamilluunniit allamik nalerisimaarnartumik nammineq soqutigisannik qanoq naammassisaqarsinnaanerlutit. Nunami naassaanngitsumik inuunerup piginnaaninnik assigiinngitsutigut ineriartortitsinnissamut killeqanngitsumik periarfississavaatit.

Naassaanngitsumut asannissinnaanerup asaneqarsinnaanerullu, naassaanngitsumik inuuneq immikkut nalerisimaarnartunngortissavaa. Asanninnermik ersersitsisinnaasutut pinngortitaavugut, ingerlalluartarpugullu asaneqarluta misigigaangatta. Asanninneq ilumoortoq nalerisimaalersitsingaartarpoq piffissap ingerlanerani allanngorneq ajorami. Inuuneq naassaanngitsoq asanninnitsinnik ineriartortitsinissamut killeqanngitsumik periarfissaqalersitsissaaq, inoqatitsinnuinnaanngitsoq, aammali Guutimut. Apustili Paulusi allappoq: „Kinaluunniit Guutimik asannittoq taassumannga ilisimaneqarpoq.“ (1 Korinthimiut 8:3) Pinngortitarsuarmi qutsinnerussaartumik ilisarisimannilersinnaanerput taassuminngalu ilisarisimaneqalersinnaanerput eqqarsaatigalugu tupinnarpoq. Aamma Pinngortitsiserput asannittoq pillugu ilinniarneqarsinnaasut killeqanngillat. Taava inuuneq naassaanngitsoq qanoq ililluni nuanniillisinnaagami naammaginarunnaarluniluunniit?

Inuuneq — sivikitsoq erlinnartorlu

Ilaat isumaqarput inuuneq inuunerup sivikissusiata erlinnartunngortittaraa. Inuuneq guultimut, taamaallaat killilimmik nassaarineqarsinnaasumut, immaqa assersuuttarpaat. Tunngavilersuutigaat sumiluunniit guulti nassaarineqarsinnaasuuguni nalikillissasoq. Taamaakkaluartorli suli guulti kusanassaaq. Inuuneq taamatut oqaatigineqarsinnaavoq.

 Inuuneq naassaanngitsoq assersuunneqarsinnaavoq avataarsuani naammattorsuarmik silaannalimmut. Silaannaq aqqartartup umiiarsimasup inuttaasa mattussaasut pingaaruteqangaartutut isigissavaat. Isumaqarpit annaanneqareerunik naammagittaalliussasut maalaarutigeqqilerlugulu anersaartoraangatta atortakkatsinnik naammattumik silaannaqarmat? Soorunami naamik!

Aqqartartup inuttaasa annaanneqarnerattut annaanneqarsinnaavugut, allaat annerungaartumik neriuuteqalersinnaalluta, inuunermik naassaanngitsumik. „Ajortimmi akissarsiarititaa tassa toqu,“ apustili Paulusi allappoq, „Guutilli saammaannermit tunissutaa tassaavoq inuuneq naassaanngitsoq Kristusimi-Jiisusimi Naalakkatsinni.“ (Romamiut 6:23) Jiisusip utertitsissutissatut pilliutaa tunngavigalugu Guutip inuit naammalluinnanngissusiat toqulu piissavai, inuillu imminut naalattut inuunermik naassaanngitsumik tunissallugit. Asannittumik isumassuinerup taamaattup qujamasuutiginissaanut pissutissaqarpugut.

Asasavummi?

Ilaat immaqa ima eqqarsarsinnaapput: ’Asasakkami? Taakku ilagisinnaanngikkukkit nunami naassaanngitsumik inoorusunngilanga.’ Immaqa Biibilimik misissuilersimavutit ilikkarsimallugulu nunarsuarmi paratiisiusumi naassaanngitsumik inuulersinnaallutit. (Lukasi 23:43; Johannesi 3:16; 17:3) Soorunami kissaatigaat ilaquttatit qanigisatit ikinngutitillu asasatit allat aamma tassaniissasut, Guutillu silarsuassaani nutaami naapertuilluarfiusumi nuannersut qilanaarisatit aamma misigiumaaraat. — 2 Petrusi 3:13.

Taavami asasavit nunami paratiisiusumi naassaanngitsumik inuunissaq soqutiginngippassuk? Tamanna nikalluutiginiaqinagu. Biibilimik paasisaqarnerulerniarnerit ingerlatiinnaruk paasisaqarnerillu naapertorlugu iliuuseqarlutit. Apustili Paulusi allappoq: „Illit, arnaq, qanoq ilillutit ilisimasinnaaviuk uiit annaassinnaanerit? Illilluunniit, angut, qanoq ilillutit ilisimasinnaaviuk nuliat annaassinnaanerit?“ (1 Korinthimiut 7:16) Inuit allanngorsinnaapput. Assersuutigalugu angutip ilaquttaminik uppertunik akerlilersuisimagaluartup, isummani allanngortippaa kingusinnerusukkullu ilagiinni kristumiuni utoqqaanertanngorluni. Taanna oqarpoq: „Qujamasuutigeqaara ilaqutannguama Biibilimi najoqqutassiat tunngaviusut aalajaallutik aalajangiusimammatigit, naak uannit akerlilersorneqangaaraluarlutik.“

Guutip ilumoorluni soqutigaa illit qanigisatillu qanoq ingerlanersusi. Aap, „kimilluunniit tammaqqusinnginnami, tamaasalu allamik isumataarnissamut periarfissikkumagamigit“. (2 Petrusi 3:9) Jehova Guutip kissaatigaa illit asasatillu naassaanngitsumik inuussasusi. Asanninnera uagut inuit naammalluinnanngitsutut asannissinnaanitsinnit anginerungaarpoq. (Esaja 49:15) Taassuma kajumissaarpaatit qanimut ikinngutigilerniaqqulluni. Taava immaqa asasatit taamatut iliornissaannut ikiorsinnaalissavatit. Naak maannakkut inuunermik naassaanngitsumik upperinninngikkaluarlutik, takugunikku Biibilimeersunik ilisimasaqalernerit malillugu inuusutit isumaat allanngorsinnaavoq.

Toqukkummi annaasimasatit? Biibilimi allassimavoq makinnissamik neriuut asseqanngitsoq — millionillit maanna toqungasut makeqqikkumaartut nunamilu Paratiisiusumi inuulerlutik. Jiisusi Kristusi ima neriorsuivoq: „Piffissaq nalliukkumaarpoq ilivermiittut tamarmik . . . aniumaarfissaat.“ (Johannesi 5:28, 29) Naak Guutimik ilisarisimannilersimanatik toqusimagaluarlutik inuuleqqikkumaartut Biibilimimi allassimavoq: „Toqusut makikkumaarput — iluartut iluaatsullu.“ (Apustilit Suliaat 24:15) Takorlooriaruk qanoq nuannertigissasoq taakku inuunermut tikilluaqqusinissaat!

Inuuneq naassaanngitsoq — siunissami neriuut nuannersoq

Silarsuarmi eqqissiviilliornartumi matumani pilluarneq nalerisimaarnerlu misigisinnaagukkit, aamma qularnanngilluinnartumik nunami paratiisiusumi inuuneq naassaanngitsoq nuannarissavat. Jehovap Nalunaajaasuisa ilaata inuuneq naassaanngitsoq qanoq nuannertigissanersoq nassuiaqqissaarmagu, arnaq nilliummerpoq:  „Naassaanngitsumik inoorusunngilanga. Maanna 70-init 80-inut ukioqarluni inuuneq naammagaara.“ Utoqqaanertap kristumiup oqarmat tusarnaartup aperaa: „Takorloorsimaviuk toquguit meeqqavit qanoq innissaat?“ Eqqarsaatigileramiuk qanoq aliasutsiginissaat, qullililerpoq. „Aatsaat paasilerpara imminuinnaq eqqarsaatigisimallunga,“ nassuerpoq, „takusinnaavaralu naassaanngitsumik inuunissamik neriuuteqarneq namminissarsiornerunngitsoq, allalli pillugit inuunerusoq.“

Ilaat misigisimapput uumagunik toqungagunilluunniit allanut soqutaanngitsoq. Inuunermilli Tunisisumut soqutaavoq, taanna oqarpoq: „Ilumut uumagama, . . . Piumasarinngilara iluanngitsoq toqussasoq, kisiannili piumasaraara ileqqorisani ajortut tunullugit uannut saassasoq inuuginnaqqulluni.“ (Ezekieli 33:11) Guuti guutiitsunik soqutiginnittoq imminut asannittunik qanoq soqutiginnitsigisimassava.

Daavip itsaq Israelimi kunngiusup, Guutip asannilluni isumassuinera tatigaa. Ilaanni ima oqarsimavoq: „Ataatamami anaanamalu qimakkaluarpannga [Jehovap] ilasiarissavaanga.“ (Tussiaat 27:10, 1900/1961) Qularnanngilaq Daavip angajoqqaami imminut asanninnerat qularinngikkaa. Angajoqqaamili — nunami qaniginerpaasami — qimassagaluarpanni, nalunngilaa Guutip qimassanngikkaani. Jehovap inuunermik naassaanngitsumik ikinngutaajuarnissamillu neqeroorfigaatigut, asannilluni isumassoramisigut. (Jaaku 2:23) Qujamasulluta immikkut pisinnaatitaaffik angisooq taanna ilassissariaqarparput, ilaa? (wE 11/15 04)

[Qupp. 7-mi assiliartaq]

Guutimut tullermullu asanninnerup inuuneq naassaanngitsoq siunertaqalersissavaa