Qanoq sivisutigisumik inuit inuusinnaappat?

1513-IMI marsip 3-ani Spaniamiu ilisimasassarsiortoq Juan Ponce de León maluginiarnartumik ilisimasassarsiorluni aallarpoq. Puerto Rico-mit umiarsuarmik aallarpoq neriulluni Bimini Islands angussallugu. Oqaluttuarineqarpoq puilasumik inuusussinartumik ujarlersoq, Amerikamili naalagaaffimmut maanna Floridamut tikittoq. Soorunami puilasoq tupinnaannartoq naninngisaannarpaa.

Ullumikkut nalinginnaasumik inuit 70-init 80-inut ukioqalertarput. Guinness Rekordbog 2002-moortoq naapertorlugu inuk sivisunerpaamik inuusimasoq ukiut 122-t ullullu 164-it inuusimavoq, inuilli inuuneqqortunerujussuusimanerat Biibilimi atuarneqarsinnaavoq. (1 Mosesi 5:3-32) Bioetikeri John Harris oqarsimavoq: „Qanittukkut misissuinermi paasivarput silarsuarmi utoqqaliartorneq allaallumi toqu saneqqunneqarsinnaajunnaartut.“ Maanna 2000-ikkunni ilisimatuut oqaluuseraat „toqusuissusermut periarfissaqalersinnaasoq“, „2099-imi inuit inuunerat killeerutissasoq“, „toqusuissuseq killeqanngitsumik cellit aveqattaarnerisigut“ tassungalu assingusutigut.

Mark Benecke atuakkiamini The Dream of Eternal Life-imi allappoq: „Timip pisatai tamangajammik inuunitta ingerlanerani arlaleriarlutik nutartertarput. . . . Ukiut arfineq marluk missaasa qaangiunneri tamaasa eqqorluartumik oqaatigissagaanni tassaalertarpugut inuk nutaarluinnaq.“ Tamannali killeqarpoq, tassami cellit aveqattaarunnaartarput aalajangersimasumik amerlassusilinnik nutartereeraangamik. Taamaanngitsuuppat, „inuup timaa ukiorparujussuarni imminut nutaanngorsarsinnaagaluarpoq — allaat naassaanngitsumik,“ Mark Benecke oqarpoq.

Eqqarsaatigiuttaaq inuup qarasaata qanoq immerneqarsinnaatigigaluarnera tupinnartoq, inuunitsinni sivikitsumi ilaminiinnanngua atortagarput. Encyclopædia Britannica  naapertorlugu inuup qarasaa „inuup ataatsip inuunermi ingerlanerani iluaqutigisinnaasai sinnerujussuarlugit imaqarsinnaavoq.“ (1976-imi saqqummertoq, atuagaq 12, qupperneq 998) Atuakkami How the Brain Learns, David A. Sousa-mit, oqaatigineqarpoq: „Qaratsap paasissutissanik toqqorterisinnaanera killeqanngilaq.“ — Qupperneq 78, aappassaanik saqqummersoq, copyright 2001.

Sooq ilisimatuut toqusoqartarneranut pissutaasoq nassaarisinnaanngilaat? Aamma sooq inuup qarasaa taamarsuaq immerneqarsinnaava? Naassaanngitsumik ilinniagaqartuartussatut pinngortitaavugut? Sooq naassaanngitsumik inuusinnaaneq takorloorsinnaavarput?

Biibilimi allassimavoq: „Aammattaaq ittuinnartoqarnera [Guutip] uummataannut tunniuppaa, tamanna piginagu inuup isumasisinnaanngimmagu suliaq Guutip suliarisaa aallaqqaataaniit naggatissaanullu.“ (Oqaluussisartup oqaasii 3:11, 1900/1961) Oqaatsit taakkua takutippaat naassaanngitsumik inuuneq Guutip eqqarsaatitsinniilersissimagaa. Aamma naak ukiuni milliardilippassuarni inuugaluarluta — aap naassaanngitsumik — Guuti pinngortitarsualu alutornangaartoq pillugit ilinniagassaqartuaannassaagut.

Aamma Jiisusi Kristusip oqaatigaa inuit naassaanngitsumik inuulernissaat ajornanngitsoq. Taanna oqarpoq: „Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (Johannesi 17:3) Illimmi, naassaanngitsumik inoorusuppit?

[Qupp. 3-mi assiliartat]

Juan Ponce de León puilasoq inuusussinartumik ujarlerpoq

[Suminngaanneernera]

Ponce de León: Harper’s Encyclopædia of United States History