Guutimut asanninneq ataasiussuseqalersitsivoq

UKIUNI hundredelinni siullerni kristumiut ilagiit pilersinneqarmata, ataasiussuseq ilisarnaataasut pingaarnerit ilagaat, naak kristumiut siulliit assigiinngitsorujussuugaluartut. Guutimik ilumoortumik pallorfiginnittut taakkua Asiameersuupput, Europameersuupput Afrikameersuullutillu. Tunuliaqutaat assigiinngitsorujussuupput — ilaat palasiupput, sakkutuujullutik, inussiaallutik, qimaasuullutik, sulisartuullutik, qaffasissumik atorfiliullutik niuertuullutillu. Ilaat juutiupput, allat Guutimik nalusuullutik. Amerlasuut allasiortartuusimapput, anguteqatiminnoortartuusimallutik, imerajuttuusimallutik, tillittuusimallutik, iluanaarniapiluttuusimallutilluunniit. Kristumiunngoramilli ajortuliortarunnaarsimapput uppernermilu ataasioqatigiilerlutik.

Ukiuni hundredelinni siullerni kristumiuussuseq inuppassuit taakkua qanoq ataasiussuseqalissutigaat? Sooq eqqisseqatigiippat inuillu amerlanersaat eqqisseqatigalugit? Sooq pikitsitsinernut akerleriinnernullu peqataaneq ajorpat? Sooq ullutsinni upperisarsioqatigiinnit anginernit kristumiussuseq siulleq taama allaanerutigaa?

Kristumiut siulliit suna ataasiussutigaat?

Ukiuni hundredelinni siullerni kristumiut ataasiussutigisaat pingaarneq tassaavoq Guutimut asanninneq. Kristumiut taakkua paasivaat akisussaaffitsik pingaarneq tassaasoq Guutimik ilumoortumik,  Jehovamik, uummatimikkut tarnimikkut isummamikkullu iluunngarlutik asanninneq. Assersuutigalugu apustili Petrusi, juutiusoq, guutimik nalusup illuanukaqquneqarpoq, ulluinnarni ilaginaveersaagaanut. Naalanneranut pissutaanerpaavoq Jehovamut asanninnera. Petrusi kristumiullu allat Guutimut qanittumik attaveqarput kinaassusia pillugu, suna nuannarineraa sunalu nuannarinnginneraa, eqqorluartumik ilisimasaqaramik. Piffissap ingerlanerani Jehovamik pallorfiginnittut tamarmik paasivaat piumasarigaa ’eqqarsaatimikkut isumamikkullu ataasioqatigiinnissartik’. — 1 Korinthimiut 1:10; Matthæusi 22:37; Apustilit Suliaat 10:1-35.

Kristumiunik imminnut qaninnerulersitsisoq alla, tassa Jiisusi Kristusimut upperneq. Tumaasa atuaqqissaarnissaat kissaatigaat. Ima peqquai: „Soorlu uanga asagissi, taamattaaq ilissi asaqatigiissaasi. Asaqatigiikkussi tamatumuuna tamarmik paasissavaat ajoqersugarigissi.“ (Johannesi 13:34, 35) Tamanna qarsupittumik misigissuseqarnerussanngilaq, tassaassallunili imminut pilliutigeriaannaalluni asanninneq. Suna kingunerissavaa? Jiisusip imminut uppertunngortut qinnuppai: „Qinnuppakka . . . tamarmik ataasioqqullugit, soorlu illit, Ataataq, uanniittutit uangalu ilinniittunga, taakkuttaaq aamma uatsinneeqqullugit.“ — Johannesi 17:20, 21; 1 Petrusi 2:21.

Jehovap anersaani illernartoq imaluunniit nukini sulisoq kiffaminut ilumoortunut kuivaa. Anersaap taassuma ataasioqatigiinnerat siuarsarpaa. Biibilimi ajoqersuutinik paasinnilersippai, paasinninneq ilagiinnit tamanit akuerineqartoq. Assigiimmik tusarliussaqarput — Jehovap aqqata illernarsisitaanissaa Guutip naalagaaffia Missiarsikkoortoq aqqutigalugu, naalakkersuisut qilammiittut inuiannut tamanut naalakkersuisuusussat. Kristumiut siulliit paasivaat ’silarsuarmut matumunnga ilaasussaanatik’. Taamaattumik sakkutuujunngitsut pikitsitsinerini sakkutooqarnikkullu akerleriinnerni kalluunnaveersaartuarput. Inuit tamaasa eqqisseqatiginiartarpaat. — Johannesi 14:26; 18:36, NV; Matthæusi 6:9, 10; Apustilit Suliaat 2:1-4; Romamiut 12:17-21.

Kristumiut tamarmik ataasioqatigiinnermik siuarsaanissaq akisussaaffigaat. Qanoq? Biibilimut naapertuuttumik ileqqoqarnermikkut. Apustili Paulusip kristumiut allaffigai: „Inutoqaq manna tikillugu inuuserisassinniittoq . . . iperassagissi“ aamma „atillugu inuk nutaaq“. — Efesosimiut 4:22-32.

Ataasiussuseq atatiinnarneqarpoq

Soorunami ukiuni hundredelinni siullerni kristumiut naammalluinnanngitsuupput, pisoqartarporlu ataasioqatigiinnermik navianartorsiortitsisunik. Assersuutigalugu Apustilit Suliaat 6:1-6-imi allassimavoq isumaqatigiinngitsoqalersoq juutit kristumiut hellinistit hebræerisullu oqaasillit akornanni. Hellinistit misigisimapput immikkoortinneqarlutik. Apustilit pisimasoq tusarniariarlugu, pisut iluarsiivigipallappaat. Kingusinnerusukkut ilagiinni kristumiuni juutiunngitsut sunik pisussaaffeqarnerat pillugu ajoqersuut isumaqatigiinngissutaalerpoq. Biibilimi najoqqutassiat tunngaviusut tunngavigalugit aalajangiisoqarpoq tamannalu tamanit akuerineqarluni. — Apustilit Suliaat 15:1-29.

Assersuutit taakkua takutippaat ukiuni hundredelinni siullerni kristumiuni ilagiinni ajoqersuutit pillugit isumaqatigiinnginnerit inuiaqatigiissutsikkut avissaartuussutaalernatillu sualuttumik isumaqatigiinngissutaalinngitsut. Sooq taamaappa? Ataasiussuseqalissutaasut — Jehovamut asanninnerat, Jiisusi Kristusimut uppernerat, imminut pilliutigeriaannaallutik asaqatigiinnerat, anersaaq illernartup siulersuineranik akuerinninnerat, Biibilimi ajoqersuutinik tamarmik paasinninnerat iliuutsiminnillu allannguinissamut piumassuseqarnerat — ima sakkortutigimmata ilagiit kristumiut  siulliit ataasiussuseqartuarlutillu eqqisseqatigiittuarput.

Ullumikkut pallorfiginninnermi ataasioqatigiinneq

Ullumikkut taamatut ataasiussuseqartoqalersinnaava? Ataasiussuseqalissutaasut taakku suli inunnik uppeqatigiit ataatsit iluanni ataasiussuseqalersitsisinnaappat silarsuarlu tamakkerlugu inunnik inuiaqatigiinnit tamaneersunik eqqisseqatigiissitsisinnaallutik? Aap, taamaalisoqarsinnaavoq! Jehovap Nalunaajaasui silarsuaq tamakkerlugu qatanngutigiissuartut ataasioqatigiipput nunani sumiiffinnilu 230-nit amerlanerusuni. Ukiunilu hundredelinni siullerni kristumiunik ataasiussuseqalersitsisut ataasiussuseqalissutigaat.

Jehovap Nalunaajaasuisa ataasioqatigiinnerannut pissutaasoq pingaarnerpaaq tassaavoq Jehova Guutimut tunniusimanerat. Pissutsini tamani ilumoorfiginissaa ilungersuutigaat. Jehovap Nalunaajaasuisa aamma Jiisusi Kristusi ajoqersuutaalu upperaat. Kristumiut taakkua imminut pilliutigeriaannaallutik uppeqatiminnut asanninnertik ersersippaat, Guutillu naalagaaffianik nutaarsiassaq nuannersoq taanna nunani oqaluussiffigisaminni tamani tusarliuttarpaat. Guutillu naalagaaffia taanna inunnut tamanut oqaluuserissallugu nuannaraat — qanorluunniit upperisaqaraluarpata, naggueqaraluarpata, inuiaassuseqaraluarpata inuttullu qanoq atugaqaraluarpata. Aamma Jehovap Nalunaajaasui silarsuarmut tunngassutilinnut kalluunnaveersaartuupput, tamannalu iluaqutigaat politikkimut, kulturimut, inooqatigiinnermut niuernermullu tunngasunik kimigiiserfigineqarnerit avissaartuussutaasut akiornissaannut. Biibilimi najoqqutassianut naapertuuttunik pissuseqarnermikkut Jehovap Nalunaajaasuisa tamarmik ataasiussusermik siuarsaanissaq pisussaaffimmittut isigaat.

Ataasiussuseq allanik ussagartitsivoq

Ataasiussuseq tamanna Jehovap Nalunaajaasorinngisaasa soqutiginnilissutigigajuppaat. Assersuutitut Ilse * eqqaaneqarsinnaavoq, arnaq katuuleq mattuttoq Tysklandimi mattuffimmiissimasoq. Sooq Jehovap Nalunaajaasui kajungerai? Taanna oqaluttuarpoq: „Inunnit naapissimasannit pitsaanersaapput. Sorsoqataaneq ajorput, inuit allat ajoqutigisinnaasaannik iliuuseqarneq ajorput. Guutip naalagaaffiata ataani nunami paratiisiusumi pilluarlutik inuunissaannut inuit ikiorusuppaat.“

Taavalu Günther, tyskit sakkutuuattut sorsunnersuup aappaata nalaani Frankrigimiitinneqarsimasoq. Ullut ilaanni naaggaartut palasiata sakkutooqatigiit Güntherip ilaaffigisai naalagiartippai. Palasi Guutimut qinuvoq pilluaqquneqarnissamik, illersorneqarnissamik ajugaatinneqarnissamillu. Naalagiareeramik Güntherip nakkutilliinini nangippaa. Qinngutiminik takusinnaavaa akeqqat sakkutuui akersuuffiusup illuatungaani aamma palasimit naalagiartinneqartut. Kingorna Günther oqaluttuarpoq: „Ilimanarpoq palasi taanna aamma Guutimut pilluaqquneqarnissamik, illersorneqarnissamik ajugaatinneqarnissamillu qinusimassasoq. Eqqarsaatigaara upperisarsioqatigiit tamarmik kristumiuusut sorsunnermi ataatsimi akerariinnerat qanoq pisinnaanersoq.“ Tamanna Güntherip eqqarsaataaniittuarpoq. Kingusinnerusukkut Jehovap Nalunaajaasui, sorsunnermi peqataaneq ajortut, atassuteqarfigileramigit silarsuaq tamakkerlugu qatanngutigiissuarnut ilaannguppoq.

Ashokip Feemallu kangiani upperisarsioqatigiit ilaat siornatigut peqataaffigisarsimavaat. Illuminni guutimut pilliiveqarput. Ilaquttatik perulunnartumik napparsimalermata, upperisartik isumaliutigeqqippaat. Ashokip Feemallu Jehovap Nalunaajaasui oqaloqatigisareerlugit Biibilimi ajoqersuutigineqartut Jehovap Nalunaajaasuisalu akornanni asaqatigiinneq tupigusuutigaat. Maanna taakku Jehovap naalagaaffianik tusagassamik nuannersumik oqaluussisartuupput aallussilluartut.

Ilsep, Güntherip, Ashokip Feemallu silarsuaq tamakkerlugu qatanngutigiissuit Jehovap Nalunaajaasui millionillit ataasioqatigaat. Taakkua Biibilimi neriorsuut manna upperaat: Guutimik pallorfiginninnermi ullumikkut ataasiulissutigisatik qanittukkut inuit Guutimut naalattut tamarmik ataasiulissutigissagaat. Taamanikkussamut naakkittaatsuerussimassaaq, isumaqatigiinngitsuerussimassalluni upperisarsiornerullu aqqani avissaartuuttuerussimassalluni. Silarsuaq tamakkerlugu Guutimik ilumoortumik Jehovamik pallorfiginnittut ataasioqatigiilersimassapput. — Saqqummersitat 21:4, 5.  (wE 1/1 05)

[Quppernerup ataani ilanngussaq]

[Qupp. 4, 5-mi assiliartaq]

Kristumiut siulliit tunuliaquttatik assigiinngilluinnaraluartut ataasioqatigiipput