Jiisusip maligassiaa malinniaruk
Jiisusip maligassiaa malinniaruk
„Maligassippassi uanga ilissinnut iliornittut ilioqqullusi.“ — JOHANNESI 13:15.
1. Sooq Jiisusi maligassaava kristumiut ilaartariaqagaat?
INUIAAT oqaluttuarisaaneranni inuk ataasiinnaq ajortuliunngisaannarluni inuusimavoq. Inuk taanna tassaavoq Jiisusi. Inuit allat ’tamarmik ajortuliortarput’. (1 Kunngit 8:46; Romamiut 3:23) Taamaattumik kristumiut ilumoortut Jiisusi maligassatut naammalluinnartutut ilaartariaqakkamissut isigaat. Aamma Jiisusip toqunngitsiarluni ukiumi 33-mi nisanip ulluisa 14-ianni ajoqersukkani peqquai ilaaqqulluni. Ima oqarpoq: „Maligassippassi uanga ilissinnut iliornittut ilioqqullusi.“ (Johannesi 13:15) Unnuup kingulliup tamatuma ingerlanerani Jiisusip eqqartorpaa kristumiut assigiinngitsutigut qanoq assiginiartariaqarneraanni. Allaaserisami matumani ilaatigut qanoq assiginiarsinnaaneripput sammissavarput.
Maniguuttariaqarpugut
2, 3. Sutigut Jiisusi maniguunnikkut maligassaava naammalluinnartoq?
2 Jiisusip ajoqersukkani maligassiaminik malinneqqullugit kajumissaaramigit, pingaartumik maniguunneq eqqartorpaa. Ataasiaannarnani ajoqersukkani kajumissaareerpai maniguuteqqullugit, nisanillu ulluisa 14-ianni apustilit isigaannik asaanermigut maniguunnini ersersippaa. Tamatuma kingorna ima oqarpoq: „Uanga ilissinnut Naalagaallungalu Ajoqersuisuusunga isikkasi asakkakkit, taava ilissi aamma pisussaavusi isikkassinnik asaaqatigiissallusi.“ (Johannesi 13:14) Nangilluni apustilit peqquai maligassiaminik malinneqqullugit. Ilalu maniguunnikkut maligassaalluangaarami!
3 Apustili Paulusip oqaluttuuppaatigut Jiisusi nunarsuarmut tikiutsinnani ’Guutisut isikkoqartoq’. Taamaattorli tamanna „iperarpaa“ inuttullu inunngorluni. Taamaaliuinnarnanili aamma imminut „nikanartippoq naalalluni toqumut, saninngasulimmi [nappakkami naalliutsitaaffimmi, NV] toqumut allaat“. (Filippimiut 2:6-8) Eqqarsaatigeriaruk. Jiisusip, silarsuarmi qutsinnerpaap tulliata, inngilinit nikanarnerunissani, naalungiarsuttut susinnaanngitsutut inunngornissani, alliartortilluni inunnut naammalluinnanngitsunut naalatsigitinnissani naggataatigullu pinerluttuliortutut asissugaasutut toqutaanissani akueraa. (Kolossemiut 1:15, 16; Hebræerit 2:6, 7) Ila, maniguunnerata asseqanngilluinnassusia! Jiisusip isiginnittaasia ilaarneqarsinnaava, maniguunnerlu taassuma maniguunneratut ittoq ineriartortinneqarsinnaava? (Filippimiut 2:3-5) Aap, kisianni tamanna imaannaanngilaq.
4. Inuit suut pingaarniassutigisarpaat, pingaarniarnerli sooq ulorianarpa?
4 Maniguunnerup akerleraa pingaarniarneq. (Ussatit 6:16-19) Saatanillu pingaarniarneq nakkassutigaa. (1 Timotheusi 3:6) Misigissuseq taanna inuup uummataani sorlaneriaannaavoq, sorlanereeraangallu peeruminaattarpoq. Inuit nunagisartik, naggueqatigiissusertik, pigisatik, ilinniagartik, silarsuarmi angusimasatik, inuiaqatigiinni inissisimaffitsik, isikkortik, timersornermi angusimasatik allarpassuillu pingaarniassutigisarpaat. Tamakkuli tamaasa Jehovap pingaartinngilai. (1 Korinthimiut 4:7) Tamakkulu pingaarniassutigigutsigik Jehovamut attaveqarnerput aserorneqassaaq. „[Jehova] qutsinnermiippoq, nikanartulli isigai, imminut angisuutittoq nalunngilaa ungasissumit.“ — Tussiaat 138:6; Ussatit 8:13.
Qatanngutitsinnut maniguunneq
5. Sooq utoqqaanertat maniguuttuunissaat pingaaruteqarpa?
5 Allaat Jehovamut kiffartornitsinni angusimasavut pingaarniassutigissanngilavut, aamma ilagiinni akisussaaffeqarutta tamanna pingaarniassutigissanngilarput. (1 Nalunaarsuutit 29:14; 1 Timotheusi 6:17, 18) Aap, akisussaaffeqarnerujartortilluta maniguunnerusariaqarpugut. Apustili Petrusip utoqqaanertat kajumissaarpai ’akisussaaffigisaminnut naalagaaniaqqunagit, savaatinulli maligassaaqqullugit’. (1 Petrusi 5:3) Utoqqaanertat uppeqatiminnut naalagaasussatut toqqarneqanngillat, kiffartortutulli maligassatullu toqqarneqarput. — Lukasi 22:24-26; 2 Korinthimiut 1:24.
6. Kristumiut sutigut maniguuttariaqarpat?
6 Utoqqaanertaannaanngitsut maniguuttariaqarput. Angutit inuusunnerusut immaqa utoqqaanerusunit paasinnianerunerminnik nukissaqarnerunerminnillu pingaarniassutiginnittut Petrusip ima allaffigai: „Tamassi immissinnut qanilaarfigeqatigiinneq atiniarsiuk, Guutip makitasuut akerartorpai, qanilaartulli saammaattarpai.“ (1 Petrusi 5:5) Aap, Jiisusitut maniguunnerup ineriartortinnissaa inunnut tamanut pingaaruteqarluinnarpoq. Nutaarsiassamik nuannersumik oqaluussissutiginninnermi maniguunneq pisariaqarpoq, ingammik inuit soqutiginninnatillu inussiarniikkaangata. Siunnersorneqarnermik akuerinninniaraanni kiffartornermiluunniit naammassisaqarneruniarluni inuunermik pisariillisaaniaraanni maniguunneq pisariaqarpoq. Tamakkua saniatigut tusagassiuutini ajortumik eqqaaneqaraangatta, inatsisitigut saassunneqaraangatta peqqarniitsumilluunniit malersorneqaraangatta maniguunneq, upperneq sapiissuserlu pisariaqartittarpavut. — 1 Petrusi 5:6.
7, 8. Maniguunnermik ineriartortitsiniarluta iliuuserisinnaasatsinnik eqqaasaqarit.
7 Inuup pingaarniarneq qanoq ajugaaffigisinnaavaa, taamaalillunilu ’makitajuitsuunikkut allat imminit annerutillugit’? (Filippimiut 2:3) Jehovap isiginninneratut imminut isigisariaqarpoq. Jiisusip nassuiarpaa imminut eqqortumik isigineq qanoq paasisariaqartoq, ima oqarami: „Ilissi ilissinnut suliareqqusat tamaasa suliarereerussigit ima oqassaasi: ’Kiffaavugut atunngitsut. Pisussaassuserput malillugu iliuinnarpugut.’“ (Lukasi 17:10) Eqqaamajuk iliuuserisinnaasavut tamarmik Jiisusip iliuuserisimasaanut naleqqiunneqarsinnaanngimmata. Taamaattorli Jiisusi maniguuppoq.
8 Aammattaaq Jehova qinnuigisinnaavarput imminut eqqortumik isiginissatsinnut ikioqqulluta. Tussiaasiortutut ima qinusinnaavugut: „Silatusaallaqqinnermik ilisimasaqarnermillu tuninnga, naalakkiutitit tatigigakkit.“ (Tussiaat 119:66) Jehovap tulluartumik oqimaaqatigiissumillu imminut isiginissatsinnut ikiussavaatigut, maniguuttumillu isiginnittaaseqarnerput pillugu pilluaqqussavaatigut. (Ussatit 18:12) Jiisusi ima oqarpoq: „Imminut akitsisinniartoq nikanarsisitaassaaq, imminullu nikanartittoq akitsisitaassaaq.“ — Matthæusi 23:12.
Ajunngitsumik ajortumillu immikkoortitsisinnaaneq
9. Jiisusip ajunngitsoq ajortorlu qanoq isumaqarfigai?
9 Naak Jiisusi ukiuni 33-ni inuit naammalluinnanngitsut akornanni inuugaluarluni, ’ajorteqarnani’ inuujuarpoq. (Hebræerit 4:15) Missiarsi pillugu siulittuilluni tussiaasiortoq ima erinarsorpoq: „Eqqortumik iliorneq nuannaraat eqqunngitsuliornerlu uumigalugu.“ (Tussiaat 45:8; Hebræerit 1:9) Aamma tamanna eqqarsaatigalugu kristumiut Jiisusi malinniartarpaat. Ajunngitsumik ajortumillu immikkoortitsisinnaaginnanngillat; aamma ajortoq uumigaat ajunngitsorlu nuannaralugu. (Amosi 5:15) Taamaalillutik inunnguuseralugu ajortulioqqajaasarnertik akiorsinnaanngortarpaat. — 1 Mosesi 8:21; Romamiut 7:21-25.
10. ’Ajortuliavut’ peqqissimissutigineq ajorutsigit tamanna uagut pilluta qanoq ersersitsiva?
10 Jiisusip farisiiari Nikodemusi ima oqarfigaa: „Ajortuliortup kialluunniit qaamasoq uumigisarpaa qaamasumullu pisarnani suliani ersersinneqaqqunagit. Sallusuissulli malillugu iliortoq qaamasumut pisarpoq suliami Guutimi suliarisaanerat saqqummeqqullugu.“ (Johannesi 3:20, 21) Eqqarsaatigeriaruk: Johannesip nalunaarutigaa Jiisusi tassaasoq „qaammaqqut piviusoq, inunnut tamanut qaammarsaasoq“. (Johannesi 1:9, 10) Jiisusili oqarpoq ’ajortuliortarutta’ — eqqunngitsuliortarutta, Guutip akuerinngisaanik iliortarutta — qaamaneq uumigigipput. Takorloorsinnaaviuk Jiisusi taassumalu najoqqutassiai uumigalugit? Ajortuliaminnik peqqissimissutiginninneq ajortut taamaapput. Immaqa namminneq uumiginnissorinngikkaluarput, erseqqipporli Jiisusip taama isumaqarfigigai.
Qanoq Jiisusitut ajunngitsumut ajortumullu isiginnittaaseqalersinnaasugut
11. Ajortumut ajunngitsumullu Jiisusitut isiginnittaaseqalissagutta suna pingaaruteqarpa?
11 Paasilluinnartariaqarparput Jehovap isaani suut ajunngitsuunersut suullu ajortuunersut. Aatsaat Guutip oqaasia, Biibili, atuaqqissaartarutsigu tamanna paasilluarsinnaavarput. Taamatut atuaqqissaartarnermut atatillugu tussiaasiortutut ima qinusariaqarpugut: „Ingerlavigeqqusannik ilinniartinnga, [Jehova], aqqutigeqqusannik ajoqersuunnga!“ (Tussiaat 25:4) Eqqaamajulli Saatanip tammartinniaraatigut. (2 Korinthimiut 11:14) Ajortoq kristumiumut mianersunngitsumut akuerineqarsinnaasutut isikkoqartilersinnaavaa. Taamaattumik ilikkakkavut eqqarsaatigeqqissaartariaqarpavut aamma ’kiffap ilumoortup silatuullu’ siunnersuutai maleruaqqissaartariaqarlugit. (Matthæusi 24:45-47) Atuaqqissaartarneq, qinusarneq eqqarsaatiginneqqissaartarnerlu inersimallualernissatsinnut aamma paasinnissinnaanermik ’atuinermik sungiussilluta ajunngitsumik ajortumillu immikkoortitsisinnaalernissatsinnut’ iluaqutigissavavut. (Hebræerit 5:14) Taava ajortup uumiginissaa ajunngitsullu nuannarinissaa pissusissamisuulissaaq.
12. Biibilimi siunnersuutigineqartoq suna inatsisaatsuliunnginnissamut iluaqutigisinnaavarput?
12 Ajortoq uumigigutsigu ajortunut pilerissuseq uummatitsinni ineriartortinnavianngilarput. Jiisusip toquneranit ukiorpassuit qaangiuttut apustili Johannesi ima allappoq: „Silarsuaq taassumaluunniit pii asaniaqinasigit. Silarsuarmik asannittup Ataatap asanninnera immini piginngilaa; silarsuarmiittummi tamarmik — uinngup pilerigisai, isit pilerigisaat nunallu piinik usorsisimaaruteqarneq — Ataatamit pisuunngillat, silarsuarmit pisuupput.“ — 1 Johannesi 2:15, 16.
13, 14. (a) Sooq silarsuup piinik asanninneq kristumiunut ulorianarpa? (b) Silarsuup piinik asanninneq qanoq ineriartortinnaveersaarsinnaavarput?
13 Ilaat immaqa eqqarsartarput silarsuarmi matumani ilaannaat ajortuusut. Naak tamanna ilumooraluartoq silarsuup pilerinartuisalu Jehovamut kiffartornitsinnit allamut saatseriaannaavaatigut. Silarsuullu neqeroorutai suugaluartulluunniit Guutimut qaninnerulissutigisinnaanngilavut. Taamaattumik silarsuup matuma pii imminni ajortuunngikkaluartut asalerutsigik navianartorsiussaagut. (1 Timotheusi 6:9, 10) Aamma silarsuup piisa ilarpassui ilumut ajoqutaapput, aamma ajortunngortissinnaavaatigut. Nakuuserneq, pigisalerituneq imaluunniit kinguaassiuutitigut inuunerlunneq akuerilersinnaavavut — immaqalu naggataatigut kajungerilerlugit — filmit tv-miluunniit aallakaatitat tamakkununnga tunngasut isiginnaartarutsigik. Inuit pissaqarnerulernissamik niuernikkulluunniit periarfissanik atorluaanissamik pingaarnerutitsisut ilagisarutsigik, uaguttaaq tamakku inuunitsinni pingaarnerpaatilersinnaavavut. — Matthæusi 6:24; 1 Korinthimiut 15:33.
14 Paarlattuanik Jehovap oqaasianik nuannarisaqarutta „uinngup pilerigisai, isit pilerigisaat nunallu piinik usorsisimaaruteqarneq“ kajungernarpiarunnaassapput. Tamatumalu saniatigut Guutip naalagaaffiata soqutigisaanik salliutitsisut ilagisarutsigik, taakku assigilissavavut, nuannarisaat nuannaralugit ingalassimaniagaallu ingalassimaniarlugit. — Tussiaat 15:4; Ussatit 13:20.
15. Naapertuilluarnermik nuannarinninneq inatsisaassusermillu uumiginninneq Jiisusitut qanoq nakussatsissutigisinnaavavut?
15 Jiisusip naapertuilluarnermik nuannarinninnini inatsisaassusermillu uumiginninnini ’nuannaarnissap siunerminiittup’ isigiuarnissaanut iluaqutigisimavaa. (Hebræerit 12:2) Uaguttaaq taamaaliorneq iluaqutigisinnaavarput. Nalunngilarput ’silarsuaq piumatussusialu nungussasut’. Iluarusunnartut inuulluataarutillu tamarmik silarsuup matuma neqeroorutigisinnaasai atuukkallaannarput. „Guutilli piumasaanik iliortoq naassaanngitsumik atassaaq“. (1 Johannesi 2:17) Jiisusi Guutip piumasaatut iliorami inuit naassaanngitsumik inuusinnaanissamut periarfissippai. (1 Johannesi 5:13) Tamatta ilaartigu, taamaalillutalu assuarnaalluni naammassisimasai iluaqutigalugit.
Malersorneqarnermi pinertusaarneq
16. Sooq Jiisusip malinnitsini asaqatigeeqqullugit ilungersorluni kajumissaarpai?
16 Jiisusip eqqaavaa ajoqersukkami allatiguttaaq ilaarsinnaagaanni. Ima oqarpoq: „Inassutiga tassa asaqatigiissasusi, soorlu uanga ilissi asagissi.“ (Johannesi 15:12, 13, 17) Kristumiut qatanngutiminnik asanninnissaminnut pissutissarpassuaqarput. Taamatut oqarami Jiisusip kristumiut silarsuarmit uumigineqarnissaat eqqarsaatigineruaa. Ima oqarpoq: „Silarsuup uumissorpasi ilisimassavarsi ilissi siunissigulli uumissormanga. . . . Kiffaq naalakkaminit annerunngilaq. Uanga qinugisimaguninnga ilississaaq qinugiumaarpaasi.“ (Johannesi 15:18, 20) Aap, kristumiut Jiisusitut malersorneqartussaapput. Asaqatigiinnermikkut attaveqatigiilluarneq ineriartortittariaqarpaat uumissorneqarnerminni pinertusaarnissaminnut iluaqutigisinnaaqqullugu.
17. Sooq silarsuup kristumiut ilumoortut uumigai?
17 Sooq silarsuup kristumiut uumigissavai? Jiisusi assigalugu „silarsuarmut ilaanngimmata“. (Johannesi 17:14, 16, NV) Sakkutooqarnermut politikkimullu tunngatillugu kalluunnaveersaartuupput, Biibilip najoqqutassiai maleruartarpaat, inuunerup illernassusia ataqqivaat ileqqussatigullu najoqqutassiat qutsissut malillugit inuullutik. (Apustilit Suliaat 15:28, 29; 1 Korinthimiut 6:9-11) Pigisanut tunngasut pinnagit, anersaakkut ittunut tunngasut pingaarnertut anguniagaraat. Silarsuarmiikkaluarput, Paulusilli allassimaneratut ’silarsuarmik tamakkiisumik atuinngillat’. (1 Korinthimiut 7:31, NV) Ilumoorpoq inuit ilaasa Jehovap Nalunaajaasuisa najoqqutassiaat qutsissut nersoraat. Kisianni Jehovap Nalunaajaasui allanit nersorneqarniarlutik akuerineqarniarlutilluunniit aalajangiusimasaminnik qasukkartitsiumanngillat. Tamatuma kingunerisaanik silarsuup inuisa amerlanersaasa taakku paasisinnaanngilaat, inuppassuarnillu uumigineqarput.
18, 19. Kristumiut akerlilersorneqarlutillu malersorneqaraangamik qanoq Jiisusip maligassiaa malittarpaat?
18 Jiisusi tigusarineqarlunilu toqutaammat apustilii silarsuup uumissuingaarneranik isiginnittuupput, aamma takusimavaat Jiisusip uumissuineq tamanna qanoq qisuariarfigigaa. Naatsiivimmi Getsemanemi Jiisusimik upperisarsiornikkut akerlilersuisut tigusariniarlugu takkupput. Petrusip panani atorlugu Jiisusi illersorniaraluarpaa, Jiisusilli ima oqarfigaa: „Panat puuanut manguguk. Panalersortummi tamarmik panamik toqunneqassapput.“ (Matthæusi 26:52; Lukasi 22:50, 51) Qangaanerusoq Israelikkut pana atorlugu akeqqatik sorsuffigisarsimavaat, maannali pissutsit allaapput. Guutip naalagaaffia „silarsuarmut matumunnga ilaanngilaq“ nunaananilu illersorneqartariaqartunik killeqarfilik. (Johannesi 18:36, NV) Petrusi erniinnaq inuiaqatigiit anersaakkut ittut, qilammi nunavigisaqartut, ilagilissavaat. (Galatiamiut 6:16; Filippimiut 3:20, 21) Taamaattumik maannamiit Jiisusip ajoqersugaasa uumissorneqarneq malersorneqarnerlu Jiisusitut qisuariarfigissavaat — qunusuillutik eqqissisimallutilli. Pisut kingunissaat Jehovap assaanut tatiginnillutik tunniutissavaat tatigalugulu taassuma pinertusaarnissamut nakussatsissagaatik. — Lukasi 22:42.
19 Ukiut arlallit tamatuma kingorna Petrusi ima allappoq: ’Kristusi anniartitaavoq ilissi pillusi maligassamillu qimatsivigalusi, tumini atuarlugit malinnaaqqullusi. . . . Oqaasipiluunneqarami oqaasipiluummik akissuteqanngilaq, anniartitaanermini sioorasaarinngilaq; pineqarninili naapertuilluartumik eqqartuussisumut isumagisassanngortippaa.’ (1 Petrusi 2:21-23) Kristumiut ukiut ingerlaneranni peqqarniitsumik malersorneqartarsimapput, soorlu Jiisusip tamannarpiaq mianersoqqussutigisimagaa. Ukiuni hundredelinni siullerni ullumikkullu kristumiut Jiisusip maligassiaa malippaat aalajaallutillu pinertusaarlutik, taamaalillutillu takutillugu eqqissisimallutik assuarnaattuartuullutik. (Saqqummersitat 2:9, 10) Qanortoq pisariaqaraangat tamatta taamatut iliuuseqartarisa. — 2 Timotheusi 3:12.
„Naalagarput Jiisusi-Kristusi atiniarsiuk“
20-22. Kristumiut qanoq ’Naalagaq Jiisusi-Kristusi atisarpaat’?
20 Ilagiit Romamiittut Paulusip ima allaffigai: „Naalagarput Jiisusi-Kristusi atiniarsiuk, uinimmullu atasut samminiaqinasigit pileritsatsitseqinapput.“ (Romamiut 13:14) Kristumiut Jiisusi ilaarpaat taassumalu maligassiaa atisatullusooq atillugu. Taassuma pissusii iliuusiilu ima ilaarniartigisarpaat — naammalluinnanngitsuugaluarlutik — Naalagartik assigisutut ilerlugu. — 1 Thessalonikamiut 1:6.
21 Jiisusip inuunera ilisimallualerutsigu taassumatullu inuuniarutta, ’Naalagarput Jiisusi-Kristusi atisinnaassavarput’. Maniguunnera, naapertuilluarnermik nuannarisaqarnera, inatsisaassutsimik uumissuinera, qatanngutiminut asanninnera, silarsuarmut ilaannginnera naalliuunnerminilu naammagittarluni pinertusaarnera ilaartarpavut. ’Uinimmut atasut samminianngilavut pileritsatsitseqinammata’, tassa silarsuarmi matumani anguniakkat uinngulluunniit kajungerisaanik naammassinninniarneq inuunermi pingaarnerpaatinngilavut. Aalajangiigaangattali ajornartorsiummilluunniit aaqqitassaqaraangatta imminut ima aperisarpugut: ’Pissutsini taamaattuni Jiisusi qanormita iliussagaluarpa? Qanoq iliornissara kissaatigissavaa?’
22 Aamma Jiisusi ilaartarparput ’nutaarsiassamik nuannersumik oqaluussissutiginninnermik’ ulapputiginninnitsigut. (Matthæusi 4:23; 1 Korinthimiut 15:58) Taamaaliornitsigut aamma kristumiutut Jiisusip maligassiaa malittarparput. Allaaserisami tulliuttumi qanoq taamaaliorsinnaasugut sammissavarput.
Uku nassuiarsinnaavigit?
• Sooq kristumiumut maniguuttuunissaq pingaaruteqarpa?
• Ajunngitsumik ajortumillu immikkoortitsisinnaaneq qanoq ilinniarsinnaavarput?
• Kristumiut akerlilersorneqarlutillu malersorneqaraangamik Jiisusi qanoq ilaartarpaat?
• ’Naalagaq Jiisusi-Kristusi’ qanoq ’atineqarsinnaava’?
[Atuaqqissaarnermi apeqqutit]
[Qupp. 7-mi assiliartaq]
Jiisusi maniguunnikkut maligassaavoq naammalluinnartoq
[Qupp. 8-mi assiliartaq]
Kristumiu inuunermini sutigut tamatigut, aamma oqaluussinermini, maniguuttariaqarpoq
[Qupp. 9-mi assiliartaq]
Saatanip aliikkusersuinerit naleqqutinngitsut kristumiumut akuerineqarsinnaasutut isikkoqartilersinnaavai
[Qupp. 10-mi assiliartaq]
Qatanngutitsinnut asanninneq akerlilersorneqarnerup naammagalugu atornissaanut nakussatsissutigissavarput