Peqqissaartumik nalunaajaanissamut ilinniartinneqartut

„Nalunaajaasigissavassi Jerusalemimi Judæamilu tamarmi Samariamilu nunarsuullu isua tikillugu allaat.“ — APUSTILIT SULIAAT 1:8.

1, 2. Petrusi sumik suliassinneqarpa, kialu tamatuminnga suliassippaa?

’JIISUSIP Naassarammiup inappaatigut inuit oqaluussiffigeqqullugit, nalunaajaassutigeqqullunilu [peqqissaartumillu nalunaajaaqqulluta, NV] taannaagami Guutip inuusunillu toqusunillu eqqartuussisussanngortitaa.’ (Apustilit Suliaat 10:38, 42, 1900/1961) Taama oqarluni apustili Petrusip Korneliusi ilaqutaalu iivangkiiliumik oqaluussissutiginnittunngoqquneqarsimanerminik oqaluttuuppai.

² Jiisusi qanga taamatut peqqusiva? Qularnanngitsumik Jiisusip toqusunit makititaasimasup qilalianngitsiarluni oqaaserisimasai Petrusip eqqarsaatigai. Taamani ajoqersukkani aalajaatsut ima oqarfigai: „Nalunaajaasigissavassi Jerusalemimi Judæamilu tamarmi Samariamilu nunarsuullu isua tikillugu allaat.“ (Apustilit Suliaat 1:8) Tamannali sioqqullugu Petrusip paasereersimavaa Jiisusimut ajoqersukkatut taassumunnga uppernermi allanut oqaluttuarinissaa pisussaaffigalugu.

Ukiuni pingasuni ilinniartinneqarneq

3. Jiisusi qanoq tupinnartuliorpa, aamma Petrusi Andreasilu qanoq kajumissaarpai?

³ Ukiumi 29-mi qaammatit arlallit kuisinnermi kingorna Jiisusi Galilæap Tasersuata eqqaani Petrusip qatanngutaatalu  Andreasip aalisarfigisartagaanni oqaluussivoq. Unnuaq tamaat pisaqarnatik aalisarsimapput. Taamaattorli Jiisusip ima oqarfigai: „Itisuumut avalallusi qassuseritsi!“ Jiisusip peqqusineratut ilioramik „aalisagarpassuarnik pisaqarput, qassutaallu qartoranngersaalerput.“ Tupinnartuliaq tamanna takullugu Petrusi ersingaalerpoq, Jiisusilli eqqissisarpaa ima oqarluni: „Erseqinak! Maannamiit inunnik pisaqartalerumaarputit.“ — Lukasi 5:4-10.

4. (a) Jiisusip qanoq ajoqersukkani nalunaajaanissaannut piginnaanngorsarpai? (b) Jiisusip kiffartorneranut naleqqiullugu ajoqersugai qanoq kiffartortigiumaarpat?

⁴ Petrusip Andreasillu — Zebedæusillu erneri Jaaku Johannesilu ilagalugit — ingerlaannaq umiatsiatik qimappaat Jiisusilu malilerlugu. Ukiuni pingasungajanni oqaluussilluni angalaarnerani ilagisarpaat iivangkiiliumillu oqaluussissutiginnittussatut ilinniartinneqartarlutik. (Matthæusi 10:7; Markusi 1:16, 18, 20, 38; Lukasi 4:43; 10:9) Ukiut taakkua naalerneranni, ukiumi 33-mi nisanip ulluisa 14-ianni, Jiisusip ima oqarfigai: „Uannut uppertup uanga suliakka — allaammi taakkunannga annerusut — aamma suliarissavai.“ (Johannesi 14:12) Ajoqersukkat Jiisusi assigalugu peqqissaartumik nalunaajaajumaarput, taassumanngali nalunaajaanipilussuussapput. Kingusinnerusukkut paasilerpaat namminneq ajoqersuganngortussallu tamarmik ’inuit inuiannit tamaneersut’ nalunaajaaffigisussaallugit, ’pissutsit aaqqissuussaanerata naggatissaa’ tikivillugu. — Matthæusi 28:19, 20, NV.

5. Jiisusip ajoqersukkaminut ilinniartitsinera qanoq iluaqutigisinnaavarput?

⁵ ’Pissutsit aaqqissuussaanerata naggatissaata’ nalaani inuuvugut. (Matthæusi 24:3, NV) Ajoqersukkalli siulliit pisimanerattut Jiisusi ilagisinnaanngilarput oqaluussigaangallu isiginnaarsinnaanagu. Taamaakkaluartoq oqaluusseriaasia ajoqersukkaminullu ilitsersuutai pillugit Biibilimi atuartarnikkut ilinniartitsinera iluaqutigisinnaavarput. (Lukasi 10:1-11) Allaaserisamili matumani Jiisusip ajoqersukkaminut ilinniartitsissutigisaa pingaartoq alla sammissavarput — oqaluussinermut eqqortumik isiginnittaaseqarneq.

Inunnik isumassuineq

6, 7. Jiisusip pissusiisa ilaat suna pissutigalugu oqaluussinera sunniuteqarluarpa, pissusialu taanna qanoq ilaarsinnaavarput?

⁶ Jiisusip oqaluussinera sooq taama sunniuteqarluartigaa? Ilaatigut inunnik soqutiginningaarnera isumassuingaarneralu pissutigalugit. Tussiaasiortup siulittuutigisimavaa Jiisusip ’sanngiitsut piitsullu nallittussagai’. (Tussiaat 72:13) Qularnanngivippoq siulittuut tamanna eqquutitikkaa. Assersuutigalugu Biibilimi ima oqaluttuarineqarpoq: „Inuit takugamigit nalligingaalerpai paarinerlugaallutillu naakkinarsisimangaarmata savatut paarsisoqanngitsutut.“ (Matthæusi 9:36) Allaat ajortuliortorsuit taassumannga isumassorneqarnertik malugaat taassumunngalu kajungilerlutik. — Matthæusi 9:9-13; Lukasi 7:36-38; 19:1-10.

⁷ Isumassuineratut inuit isumassorutsigik uaguttaaq killissinnaassavavut. Taamaattumik pitsaassaaq oqaluussiartunnginnitsinni eqqarsaatigilaarutsigu nalunaajaatigisavut inuit qanoq pisariaqartitsigigaat. Ajornartorsiutigisinnaasaat, taamaallaat Guutip naalagaaffianit aaqqinneqarsinnaasut, eqqarsaatigikkit. Inunnut tamanut isumalluartumik isiginnittaaseqarnissat aalajangiusimajuk, naluammi kikkut tusagassamik ilassinnikkumaarnersut. Immaqa naapitassavit tulliata ilittut ittumit ikiorneqarnissani qinnutigisimavaa!

Asanninneq kajumississutigalugu

8. Kristumiut Jiisusitut nutaarsiassamik nuannersumik oqaluussissutiginninnissamut suna kajumississutigaat?

⁸ Nutaarsiassaq nuannersoq Jiisusip oqaluussissutigisaa Jehovap piumasaata naammassineqarnissaanut, aqqata illernarsisinneqarnissaanut kisimilu oqartussaanerata qutsissisinneqarnissaanut — inuit isummerfigisariaqagaasa pingaarnersaannut — tunngassuteqarpoq. (Matthæusi 6:9, 10) Jiisusip Ataatani asavaa, taamaattumillu toqussi tikillugu assuarnaattuarnissaminut Guutillu naalagaaffia, inuiaat ajornartorsiutaannik tamanik aaqqiisussaq, pillugu peqqissaartumik nalunaajaanissaminut killinneqarluni. (Johannesi 14:31) Ullumikkut Jiisusip ajoqersugai taassumatut pissutiginiagaqaramik kajumillutik oqaluusseqataasarput. Apustili Johannesi  ima allappoq: „Guutimut asanninneq tassaavoq inassutai maleruaratsigit,“ ilaatigut nutaarsiassamik nuannersumik oqaluussissutiginninnissamik ajoqersuganngortitsinissamillu inassutit. — 1 Johannesi 5:3; Matthæusi 28:19, 20.

9, 10. Guutimut asanninnerup saniatigut kimut asanninneq peqqissaartumik nalunaajaanissatsinnut kajumississutigisariaqarparput?

⁹ Jiisusip ajoqersukkani ima oqarfigai: „Asagussinga inassutikka maleruarsigit. Inassutinnik piginnillunilu aalajangiussisoq tassaavoq uannik asannittoq.“ (Johannesi 14:15, 21) Taamaattumik Jiisusimut asanninnerput sallusuissutip oqaluussissutiginissaanut Jiisusillu peqqussutaasa allat naalannissaannut kajumississutigisariaqarparput. Jiisusi toqusunit makititaareerluni saqqummernermi ilaanni Petrusi ima kajumissaarpaa: „Savaaraatikka paarikkit! . . . Savaatinnik paarsisuugit. . . . Savaatikka paarikkit.“ Petrusip taamaaliornissaanut suup killittariaqarpaa? Tamanna paasinarsivoq Jiisusip arlaleriarluni Petrusi ima aperimmagu: „Asavinga? . . . Asavinga? . . . Asavinga?“ Aap, Petrusip Jiisusimut asanninnini, taassumunnga tunniusimanini, peqqissaartumik nalunaajaanissaminut, Jiisusip ’savaaraataanik’ nanisinissaminut tamatumalu kingorna taakkununnga anersaakkut ittumik paarsisunngornissaminut, kajumississutigissavaa. — Johannesi 21:15-17.

¹⁰ Ullumikkut Petrusitut Jiisusi inuttut ilisarisimasarinngilarput. Taamaattorli Jiisusi uagut pilluta susimanersoq paasilluinnarparput. ’Tamanut iluaqutaasussaasumik toqumik misigisaqarnermigut’ asanningaarnerminik ersersitsinera qamuuna killitsissutigaarput. (Hebræerit 2:9; Johannesi 15:13) Paulusi ima allakkami misigineratut misigivugut: „Kristusip asanninnerata pinngitsaalivaatigut . . . Taassuma tamaasa toqqutigai inuusut imminnik pillutik inuujunnaaqqullugit, imminnilli toqqutiginnittoq makissimasorlu pillugu inooqqullugit.“ (2 Korinthimiut 5:14, 15) Peqqissaartumik nalunaajaanissamik peqqussutip ilumoorunneratigut ersersissavarput Jiisusip uagutsinnut asanninnera pingaartingaarlugu taannalu asallugu. (1 Johannesi 2:3-5) Oqaluussineq soqutigiunnaalinngisaannartariaqarparput, Jiisusip pilliutaa nalinginnaasutut isigilerlugulusooq. — Hebræerit 10:29.

Pingaarnerpaaq sammiuarlugu

11, 12. Jiisusip nunarsuarmut pineranut suna siunertaava, qanorlu toraakkani aalajangiusimajuarpaa?

¹¹ Jiisusi Pontiusi Pilatusimut sassartitaagami ima oqarpoq: „Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu.“ (Johannesi 18:37) Jiisusi suliassamit tamatumannga allamut saassuteqarumanngilaq. Guutip piumasaraa sallusuissummik nalunaajaassutiginnissasoq.

¹² Tamatumunnga tunngatillugu Saatanip Jiisusi misilivissorpaa. Jiisusi kuiseqqammersoq Saatanip silarsuarmi nuimasunngornissaanik neqeroorfigaa, aap, „silarsuarmi naalagaaffiit tamaasa taakkualu alutornassusiat“ neqeroorutigai. (Matthæusi 4:8, 9) Kingusinnerusukkut juutit kunnginngortinniaraluarpaat. (Johannesi 6:15) Ilaasa immaqa isumaliutigaat Jiisusip neqeroorutit tamakku ilassisimasuuppagit qanoq kinguneqarluartigisimassanersoq, immaqalu eqqarsarlutik Jiisusi nunami kunngitut inuiannut ajunngingaartuliorsinnaasimagaluartoq. Jiisusilli eqqarsartaaseq tamanna itigartippaa. Sallusuissummik nalunaajaassutiginninneq pingaarnerpaatippaa.

13, 14. (a) Jiisusip suna allamut saassutiginngilaa? (b) Jiisusi pigisatigut piitsuugaluarluni sumik naammassisaqarpa?

¹³ Jiisusip aamma pisuussutinik noqqaassutiginninneq allamut saassutiginngilaa. Taamaattumik pigissaartuunngilaq. Allaat nammineq angerlarsimaffeqanngilaq. Ilaanni ima oqarpoq: „Terianniat siseqartarput qilaallu timmiai ulloqartarlutik, Inuulli Ernera niaqquminut iigarfissaqanngilarluunniit.“ (Matthæusi 8:20) Jiisusip toqugami pigisaa akisooq ataasiinnaavoq, tassa atisaq Romamiut sakkutuuisa immeraatigisaat. (Johannesi 19:23, 24) Taava imaappa Jiisusip inuunera iluatsinngitsoortoq? Naamerluinnaq!

¹⁴ Jiisusi ajunngitsuliorumatuut pisuujunerpaartaata inuunermini naammassisinnaasaanit naammassisaqarnerungaarpoq. Paulusi ima allappoq: „Nalunngilarsi Naalakkatta Jiisusi-Kristusip saammaannera, pisuugaluarluni ilissi pillusi piitsunngormat piitsuunermigut ilissi pisuunngoqqullusi.“ (2 Korinthimiut 8:9; Filippimiut 2:5-8) Jiisusi pigisatigut piitsuugaluarluni inuit maniguuttut naammalluinnarlutik naassaanngitsumik inuunissaannik periarfissippai. Taamaaliornera  qujamasuutigingaarparput! Guutillu piumasaanik iliornissamik pingaarnerpaatitsinera pillugu akissarsisinneqarnera nuannaarutigaarput. — Tussiaat 40:9; Apustilit Suliaat 2:32, 33, 36.

15. Pisuussutinit suna pingaaruteqarnerua?

¹⁵ Aamma kristumiut ullumikkut Jiisusimik ilaarsiniartut pisuussutinik noqqaassutiginninneq allamut saassutiginianngilaat. (1 Timotheusi 6:9, 10) Miserratiginngilaat nunap piinik pisuujuneq inuulluataarnarsinnaasoq, kisianni aamma nalunngilaat pigissaarneq naassaanngitsumik siunissaqalernissaminnut iluaqutaanngitsoq. Kristumiu toqugaangat pigisai taassumunnga pingaaruteqarunnaartarput, soorlu Jiisusi toqummat atisaa taassumunnga pingaaruteqarunnaartoq. (Oqaluussisartup oqaasii 2:10, 11, 17-19; 7:12) Aap, kristumiu toqugaangat taassumunnga pingaaruteqartutuaq tassaavoq Jehovamut Jiisusi Kristusimullu attaveqarnera. — Matthæusi 6:19-21; Lukasi 16:9.

Akerlilersorneqarnermik qunussuteqalinnginneq

16. Jiisusip akerlilersorneqarneq qanoq qisuariarfigaa?

¹⁶ Jiisusip akerlilersorneqarneq sallusuissummik peqqissaartumik nalunaajaajunnaassutiginngilaa. Allaat nalunngikkaluarlugu nunarsuarmi kiffartornini pilliutitut toqunissaminik kinguneqartussaasoq nikallunngilaq. Paulusi Jiisusi pillugu ima allappoq: „Taassuma nuannaarnissaq siunerminiittoq pillugu sanningasulik [nappagaq anniartitaaffik, NV] naammagalugu atorpaa kanngunarsaataanera soqutiginagu, maannalu Guutip issiavissaarsuata talerpiata tungaani issialluni.“ (Hebræerit 12:2) Maluginiaruk ’kanngunarsaataanera [Jiisusip] soqutiginngikkaa’. Akerlilersortimi qanoq isumaqarfigineraanni soqutiginngilaa, Guutilli piumasaatut iliornissani pingaarnerpaatippaa.

17. Jiisusip pinertusaarnera qanoq ilinniarfigisinnaavarput?

¹⁷ Jiisusip pinertusaarnera qanoq ilinniarfigisinnaagipput Paulusip ersersippaa ima allalluni: „Qasuleqqunasi nikalloqqunasilu isiginiarsiuk taanna ajortuliortunit taama assortorneqartigigaluarluni ilalaaginnartoq.“ (Hebræerit 12:3) Ilumoorpoq akerlilersorneqartuarneq illaruaatigineqartuarnerlu qasunarsinnaasoq. Silarsuup pilerinartuisa itigartittuarnissaat immaqalu ilaquttatta ’iluatsinngitsoornitsinnik’ pakatsissuteqarnerat qasunartupilussuusinnaavoq. Jiisusili assigalugu Jehova annertoqqutigaarput Guutillu naalagaaffiata soqutigisaanik inuunitsinni salliutitsiuarnissarput aalajangiusimallugu. — Matthæusi 6:33; Romamiut 15:13; 1 Korinthimiut 2:4.

18. Jiisusip Petrusimut oqaasii qanoq ilinniarfigisinnaavavut?

¹⁸ Jiisusip ajoqersukkani toqungajalernini pillugu oqaluttuutileramigit allamut saassuteqarumannginnera ersarippoq. Petrusip Jiisusi kajumissaarpaa ’imminut ajunngisaarfigeqqullugu’ imalu neriorsoqqissaarlugu: „Taama pineqanngisaannassaatit!“ (NV) Jiisusip Jehovap piumasaanik iliornissaminik aalajangiusimannikkunnaartitsisinnaasut  tusaajumanngivippai. Petrusi tunuppaa imalu oqarluni: „Tununnut nigorit, Saatani! Tammartinniarparma; Guutimmi pii pinnagit inuit pii isumagaatit [Guutip eqqarsaatai pinnagit inuilli eqqarsaataannik eqqarsaravit, NV].“ (Matthæusi 16:21-23) Qanortoq uagut taassumatut inuit eqqarsaataannik itigartitsinissarput Guutillu eqqarsaataanit siulersortinnissarput aalajangiusimajuarisigu.

Guutip naalagaaffia ataavartumik iluaqutissiissaaq

19. Jiisusip tupinnartuliani pingaarnerutinnagit suna pingaarnerutippaa?

¹⁹ Jiisusi Missiarsiunini uppernarsarniarlugu qasseeriarluni tupinnartuliorpoq. Allaat toqusimasunik makititsivoq. Inuppassuit tupinnartuliornerit tamakku kajungeraat, Jiisusili inunnik isumaginninnermut tunngasunik suliaqarniaannarluni nunarsuarmut pinngilaq. Sallusuissut nalunaajaassutiginiarlugu tikiuppoq. Nalunngilaa timikkut iluaqutissiisarnini utaqqiisaannaagallartussaasoq. Allaat inuit toqusunit makitissimasai toqoqqikkumaarput. Taamaallaat sallusuissummik nalunaajaassutiginninnermigut inuit naassaanngitsumik inuunissaannut ikiorsinnaavai. — Lukasi 18:28-30.

20, 21. Ajunngitsuliornermut tunngatillugu kristumiut qanoq oqimaaqatigiissumik isiginnittaaseqartariaqarpat?

²⁰ Ullumikkut inuit ilaasa napparsimmaviliornermikkut allatigulluunniit piitsunik ikiuinermikkut Jiisusip ajunngitsuliai ilaarniartarpaat. Inuit ilaasa taamaaliornertik inuttut pilliuteqangaassutigisarpaat, ilumoortuunerallu nersornartuuvoq; iliuuserisinnaasaalli ataavartumik iluaqutaasinnaanngillat. Guutip naalagaaffia kisimi silarsuarmi ajornartorsiutinut ataavartumik aaqqiissutaasinnaavoq. Taamaattumik Jehovap Nalunaajaasuisa Jiisusi assigalugu Guutip naalagaaffia pillugu sallusuissummik oqaluussissutiginninneq pingaarnerpaatippaat.

²¹ Soorunalimi kristumiut ilumoortut ajunngitsuliortarput. Paulusi ima allappoq: „Piffissaqarallartilluta tamanut ajunngitsuliorniarta, pingaartumik uppeqatitsinnut.“ (Galatiamiut 6:10) Ajornartorsiorfinni imaluunniit annikilliortoqartillugu eqqaamiuvut qatanngutivulluunniit kristumiut nangaanata ’ajunngitsuliorfigisarpavut’. Jiisusilli pingaarnerpaatitaa pingaarnerpaatittuarniarparput, tassa sallusuissummik nalunaajaassutiginninneq.

Jiisusip maligassiaa ilinniarfigiuk

22. Sooq kristumiut inuit allat oqaluussiffigisarpaat?

²² Paulusi ima allappoq: „Eqqanaq uanga iivangkiiliu nalunaajaatiginngikkukku.“ (1 Korinthimiut 9:16) Nutaarsiassamik nuannersumik oqaluussissutiginninneq pimooruppaa, suliarmi tamanna nammineq tusartimilu inuunissaannut  aalajangiisuummat. (1 Timotheusi 4:16) Uaguttaaq oqaluussinerput taassumatut isigaarput. Tullivut ikiorusuppavut Jehovamullu asanninnerput ersersikkusullugu. Aammattaaq Jiisusimut asanninnerput taassumalu uagutsinnut asanningaarneranik pingaartitsinerput ersersikkusuppavut. Taamaattumik nutaarsiassaq nuannersoq oqaluussissutigaarput ’inuillu pilerissusii piunnaarlugit Guutip piumasaa malillugu’ inuulluta. — 1 Petrusi 4:1, 2.

23, 24. (a) Aalisakkanik pisaqarnermik tupinnartuliaq qanoq ilinniarfigisinnaavarput? (b) Ullumikkut kikkut peqqissaartumik nalunaajaappat?

²³ Inuit illaruaatigigaangatigut imaluunniit kamallutik tusarliussarput itigartikkaangassuk Jiisusi assigalugu toraagarput aalajangiusimajunnaanngilarput. Jiisusip Petrusi Andreasilu maleqqulluni kajumissaaramigit tupinnartuliaa ilinniarfigisinnaavarput. Jiisusi naalallugu aalisagaqarsorinanngitsumi qassuseruttalusooq, imaassinnaavoq suliarput kinguneqarluartoq. ’Aalisartorpassuit’ kristumiuusut ukiorpassuarni aalisagaqarsorinanngitsumi aalisareerlutik pisaqarluartalersimapput. Allat aalisakkanik pisaqarneruffiusunut nuussimapput, tassanilu pisaqarluarlutik. Qanorluunniilli aalajangeraluarutta qassuserunnaarnavianngilagut. Nalunngilarput nunarsuarmi sumiluunniit oqaluussinerup naammassineqarneranik Jiisusi suli nalunaarutiginnissimanngitsoq. — Matthæusi 24:14.

²⁴ Nunani 230-nit amerlanerusuni Jehovap Nalunaajaasuisa 6 millioninit amerlanerusut maanna Guutip naalagaaffia pillugu tusarliussap oqaluussissutiginera ulapputigaat. Jehovallu oqaluussinerat tamanna pilluaqqungaarpaa. Pissutsit aaqqissuussaanerat manna atuutsillugu Paulusip oqaluussinissamut ilungersorluni kajumissaarutaa una maleruartuarniartigu: „Oqaaseq oqaluussissutiguuk, qanoq ilisukkulluunniit.“ (2 Timotheusi 4:2) Jehovap oqaluussinermik naammassineraanissaata tungaanut peqqissaartumik nalunaajaajuarniarta. (wE 1/1 05)

Qanoq akissavit?

• Jiisusip ajoqersukkaminik ilinniartitsinera qanoq iluaqutigisinnaavarput?

• Jiisusip oqaluussiffigisani qanoq isiginnittaaseqarfigai?

• Peqqissaartumik nalunaajaanissatsinnut suna kajumississutigisariaqarparput?

• Qanoq ililluta Jiisusi assigalugu Guutip piumasaatut iliornissaq pingaarnerpaatissinnaavarput?

[Atuaqqissaarnermi apeqqutit]

[Qupp. 15-mi assiliartaq]

Jiisusi assigalugu inuit isumassortarutsigik sunniuteqarluartumik kiffartorsinnaassaagut

[Qupp. 16, 17-mi assiliartaq]

Jiisusi nunarsuarmut tikiussimavoq pingaarnerpaamik sallusuissut nalunaajaassutigissallugu

[Qupp. 17-mi assiliartat]

Jehovap Nalunaajaasuisa peqqissaartumik nalunaajaaneq pingaarnerpaatippaat