Kristumiutut kinaassutsit paarilluaruk

„’Ilissi nalunaajaasigaassi,’ oqarpoq Jehova.“ — ESAJA 43:10, NV.

1. Inuit qanoq ittut Jehovap imminut kajungilersittarpai?

NAALAGAAFFILERSAARFIMMI ataatsimiitsillutit najuuttut qimerlooriakkit. Pallorfiginnittarfimmi tamatumani kikkut maluginiarpigit? Immaqa meeqqat inuusuttullu ilumoorussisut soqutiginnillutik ilisimassutsimik Biibilimeersumik pigiliussisut takuatit. (Tussiaat 148:12, 13) Qularnanngitsumik aamma silarsuarmi ilaqutariittut inuunermik isiginerlutsitsiffiusumi ilaqutariinni ittuusut Guutimik nuannaartitsiniartut takusinnaavatit. Immaqa aamma takulerpatit utoqqannguit utoqqalinerminni ajuuteqaraluarlutik aalajaallutik Jehovamut tunniulluinnarnerminnut naapertuuttumik inuusut. (Ussatit 16:31) Tamarmik Jehova asangaarpaat. Taassumalu imminut kajungilersikkumavai. Guutip ernera ima nalunaarpoq: „Kinaluunniit uannut ornigussinnaanngilaq Ataatap uannik aallartitsisup kajungilersinngippani.“ — Johannesi 6:37, 44, 65.

2, 3. Sooq kristumiutut kinaassutsimik misigisimanerup sakkortuup attatiinnarnissaa unamminiarnartuusinnaava?

² Inunnut Jehovap iluarisaanut pilluaqqusaanullu ilaanerput pilluaatigisinnaavarput. Kisianni ’ulluni atugarliungaarfiusuni’ makkunani kristumiutut kinaassutsimik misigisimanerup sakkortuup attatiinnarnissaa unamminiarnartuuvoq. (2 Timotheusi 3:1) Ingammik inuusuttunut ilaqutariinni kristumiuni peroriartorsimasunut taamaappoq. Angut inuusuttoq ilumoorluni ima oqarpoq: „Taamani kristumiut ataatsimiinnerinut  najuuttaraluarlunga anersaakkut ittunik iluamik anguniagaqanngilanga, oqaatigilluaannarlugulu Jehovamut kiffaarusuppallaarnanga.“

³ Ilumoorlutik Jehovamut kiffartorusuttut ilaat immaqa allanit tatineqaraangamik, silamiunit sunnerneqaraangamik ajortulioqqajaaleraangamilluunniit allamut saattarput. Taamatut tatineqarneq kristumiutut kinaassuseerukkiartuaassutigilersinnaavarput. Assersuutigalugu ullumikkut inuppassuit Biibilimi ileqqussatigut najoqqutassiat inooriaatsimut muteerniusumut naleqqiullugit ittangasutut imaluunniit piviusorsiunngitsutut isigaat. (1 Petrusi 4:4) Inuit ilaat isumaqarput Guutip imminut pallorfigeqqusineratut pallorfiginissaa pingaaruteqanngitsoq. (Johannesi 4:24) Korinthimiunut allakkamini Paulusip „silarsuup anersaava“ imaluunniit silarsuarmi isiginnittaaserineqarnerusoq eqqaavaa. (1 Korinthimiut 2:12) Inuit anersaamit tamatumannga silarsuartut avatangiisiminniittutut, silamiutut Jehovamik nalusutut, eqqarsalernissamut tatineqarput.

4. Jiisusip kristumiutut kinaassutsitta paarinissaata pingaaruteqassusia qanoq erseqqissarpaa?

⁴ Jehovamulli kiffaasutut tunniulluinnarsimasutut nalunngilluinnarparput kristumiutut ilisarnaammik annaasaqarneq inuttut ataasiakkaatut — inuusuttuugutta utoqqaaguttaluunniit — aliasuutigissallutigu. Kristumiutut kinaassutsimik misigisimaneq naleqquttoq Jehovap najoqqutassiaanik taassumalu uagutsinnut piumasaqaataanik taamaallaat tunngaveqarsinnaavoq. Tassami taanna assilillugu pinngortitaavugut. (1 Mosesi 1:26; Mika 6:8) Biibilimi kristumiutut ilisarnaativut atisanut tamanit takuneqarsinnaasunut assersuunneqarput. Ullut inuuffigisavut pillugit Jiisusi ima mianersoqqusivoq: „Tillinniatut tikiukkumaarpunga. Pilluarpoq taanna eqqumasoq atisaqarluni pigaartoq tamaqanngitsuujumanani, kinguaassiuutini takuneqaqqunagit.“ * (Saqqummersitat 16:15) Kristumiutut pissuserisavut ileqqussatigullu najoqqutarisavut soraarukkumanngilavut Saatanillu silarsuaanit sunnertikkumanata. Taama pisoqassagaluarpat ’atisavut’ taakku annaassagaluarpavut, tamannalu ajuusaarnarlunilu nikanarsaataassaaq.

5, 6. Anersaakkut aalajaanneq sooq taama pingaaruteqartigaa?

⁵ Kristumiutut kinaassutsimik misigisimaneq sakkortooq qanoq inuunissamut sunniuteqangaassaaq. Sooq? Jehovamik pallorfiginnittup kristumiutut kinaassutsini iluamik misigisimajunnaaruniuk qulalersinnaavoq nakimalersinnaallunilu, anguniagaarulluni. Biibilimi nakimaneq taama ittoq mianersoqqussutigineqaqattaarpoq. Ajoqersugaq Jaaku ima mianersoqqusivoq: „Qulartup assigaa immap malinga anorip aalatitaa qaraartitaalu. Inuk taama ittoq isumaqanngikkili [Jehovamit] sumik tunineqassalluni, isummani saqittuartuummat inuuserisanilu allanngorartuartuulluni.“ — Jaaku 1:6-8; Efesosimiut 4:14; Hebræerit 13:9.

⁶ Kristumiutut kinaassuserput qanoq paarilluarsinnaavarput? Aamma Qutsinnerpaamik pallorfiginnittuunerup immikkut pisinnaatitaafferujussuuneranik ilisimaarinninnerput qanoq nakussatsissinnaavarput? Siunnersuutit tulliuttut eqqarsaatigikkit.

Kristumiutut kinaassutsit nakussatsiguk

7. Jehovamut misissoqqulluta qinunissaq sooq iluaqutaassava?

⁷ Jehovamut attaveqarnerit nakussatsittuaruk. Kristumiup pigisaa naleqarnerpaaq tassaavoq Jehovamut  attaveqarnera. (Tussiaat 25:14; Ussatit 3:32) Kristumiutut kinaassuserput eqqarsaatigalugu nalornissuteqalerutta Guutimut qanoq attaveqarluartiginerluta misissoqqissaartariaqalersimassavarput. Tussiaasiortup ilungersorluni Guuti ima qinnuigaa: „Misilinnga [Jehova], misissunnga, misissuiffigikkit uummatiga tartukkalu.“ (Tussiaat 26:2) Sooq taamatut misissorneqarnissaq taama pingaaruteqartigaa? Pissutiginiakkavut kajungerisavullu ilorlerpaat nammineq eqqortumik nalilersinnaannginnatsigik. Jehovap kisimi inuup ilorpiaanik — pissutiginiakkatsinnik, eqqarsaatitsinnik misigissutsitsinnillu — paasinnilluinnarsinnaavoq. — Jeremia 17:9, 10.

8. (a) Jehovamit misilinneqarnerput qanoq iluaqutigisinnaavarput? (b) Kristumiutut siumukarnissannut qanoq ikiorneqarsimavit?

⁸ Jehovamut qinunikkut saaffiginnikkaangatta misissoqqullutalu qinnuigalugu, misileqqulluta qinnuigisarparput. Immaqa pissutiginiakkatsinnik uummatittalu pissusiinik ersersitsisinnaasunik pisoqarnissaa akuerissavaa. (Hebræerit 4:12, 13; Jaaku 1:22-25) Misilinneqarnerit taamaattut qujamasuutigisariaqarpavut, Jehovamut qanoq ilumoorfiginnitsiginitsinnik ersersitsinissamut periarfissarigatsigik. Misilinneqarnerit ersersissinnaavaat ’naammalluinnartuunersugut, pissuserilluartuunersugut sumillu inorsarfeqannginnersugut’. (Jaaku 1:2-4) Misilinneqarnitsinnilu anersaakkut ineriartorsinnaavugut. — Efesosimiut 4:22-24.

9. Biibilimi ajoqersuutigineqartut ilumoortuunerannik qulakkeerinissaq sooq pisariaqarpa?

⁹ Biibilip ilumoortuunera qulakkeeruk. Jehovamut kiffaasutut kinaassuserput sanngiillisinneqarsinnaavoq ilisimasanik Biibilimeersunik tunngaveqarluanngikkuni. (Filippimiut 1:9, 10) Kristumiut tamarmik immikkut — inuusuttut utoqqaallu — upperisamik ilumut sallusuissutaanera Biibilimeersoq qulakkiissallugu pisariaqartippaat. Paulusip uppeqatini ima kajumissaarpai: „Suut tamaasa paasiniaqqissaarsigit; ajunngitsut aalajangiussigit.“ (1 Thessalonikamiut 5:21, NV) Meeqqat inuusuttullu kristumiut ilaqutariinni Guutimik mianerinnittuniittut paasisariaqarpaat angajoqqaamik upperisaat pissutigiinnarlugu kristumiuusinnaanatik ilumoortut. Salomo ataataaminit, Daavimit, kajumissaarneqarpoq ’ataatami Guutia ilisareqqullugu kiffartorfigeqqullugulu uummatikkut iluunngarluni’. (1 Nalunaarsuutit 28:9) Salomop inuusuttup ataatami Jehovamut uppernerminik qanoq ineriartortitsinera qimerluuinnaarsinnaanngilaa. Nammineq Jehova ilisarisimalertariaqarpaa, taamaaliorporlu. Guuti ima qinnuigaa: „Tuninnga ilisimassusermik silaqassusermillu illit innuttannut siulersuisuusinnaaqqullunga.“ — 2 Nalunaarsuutit 1:10.

10. Ilumoorluni eqqortumillu pissutiginiagaqarluni aperineq sooq ajunngila?

¹⁰ Upperluarneq ilisimasaqarnermik tunngaveqarpoq. „Upperneq tusakkanit pilersinneqartarpoq,“ Paulusi allappoq. (Romamiut 10:17) Qanoruna isumaqarluni taama allattoq? Isumaqarpoq Guutip oqaasianik inuussutissalersornitsigut Jehovamut uppernerput aamma taassuminnga taassumalu neriorsuutaanik peqatigiissortaanillu tatiginninnerput ineriartortissinnaagivut. Biibili pillugu ilumoorluta aperisarutta, nalerisimaarnartunik akissutissarsissaagut. Aammattaaq Paulusi Romamiut 12:2-mi ima siunnersuivoq: ’Sianiginiarsiuk sunaasoq Guutip piumasaa: ajunngitsoq, iluarinartoq, naammalluinnartoq.’ Qanorli taamaaliorsinnaavugut? ’Sallusuissummik ilisarsinitsigut’. (Titusi 1:1) Jehovap anersaava ikiortigalugu allaat paasiuminaatsut paasisinnaavavut. (1 Korinthimiut 2:11, 12) Paasiuminaatsitaqaraangatta Guuti ikioqqulluta qinnuigisariaqarparput. (Tussiaat 119:10, 11, 27) Jehovap kissaatigaa oqaatsini paasissagipput, upperissagipput naalassagippullu. Ilumoorluni eqqortumillu pissutiginiagaqarluni apeqqutigineqartut nuannaarutigai.

Guutimit iluarisaanissat aalajangiusimajuk

11. (a) Pissusissamisoortumik kissaatigineqartartoq suna napitiffigisinnaavarput? (b) Ilagisartakkanit tatineqarnerup akiornissaanut qanoq sapiissuseqalersinnaavugut?

¹¹ Guutimut iluarisaaniarniarit, inunnuunngitsoq. Kinaassutsip ilaatigut ilagisartakkanit ilusilersorneqartarnera pissusissamisuuinnarpoq. Ikinnguteqarnissarput tamatta pisariaqartipparput, allanillu akuerineqarnerput iluarusuutigisarlugu. Inuusuttunngulernermi — aamma kingusinnerusukkut — inuk ilagisartakkanit tatineqangaarsinnaavoq allanik ilaarserusungaalissutigisaminik iluarusutsitserusungaalissutigisaminillu. Ikinngutilli kamalaatillu uagutsinnut pitsaanerpaaq tamatigut  eqqarsaatigineq ajorpaat. Ilaannikkut eqqunngitsulioqatissarsiuinnartarput. (Ussatit 1:11-19) Kristumiu allanit tatineqarluni nakkaannaraangami, amerlanertigut kristumiutut kinaassutsiminik isertuiniartarpoq. (Tussiaat 26:4) „Silarsuarmut matumunnga naleqqussarniaqinasi,“ Paulusi mianersoqqusivoq. (Romamiut 12:2) Jehovap allanit tatineqarnerup akiornissaanut pisariaqartumik qamuuna nakussatsittarpaatigut. — Hebræerit 13:6.

12. Guutimik tatiginninnerput misilinneqaraangat uppernikkut aalajaannissamut siunnersuut suna kialu maligassiaa nakussatsissutigisinnaavavut?

¹² Kristumiutut kinaassutsimik misigisimanerput avataanit tatineqarnermit navianartorsiortinneqaraangat, eqqaamasariaqarparput Guutimik ilumoorfiginninnerput inuit amerlanerit isumaannit iliuuserisartagaannilluunniit pingaaruteqarnerungaartoq. Mosesimik allakkat aappaat 23:2-mi pitsaasumik siunnersuuteqarpoq: „Amerlanerusut iliornerannut ajortumut maleruutiinnassanngilatit.“ Israelikkut amerlanersaasa Jehovap neriorsuutiminik piviusunngortitsisinnaanera qularilermassuk, Kalebi amerlanerusunut maleruutiinnarumanngivippoq. Qularinngilluinnarpaa Guutip neriorsuutaasa tutsuiginartuunerat, aalajaattuaramilu akilerneqangaarpoq. (4 Mosesi 13:30; Josva 14:6-11) Illittaaq isummat inuit amerlanerit isumaannit sunnerneqaqqunagu Guutimut attaveqarnerit paarilluartarpiuk?

13. Sooq kristumiutut kinaassutsitta ilisimatitsissutiginissaa silatusaarnerua?

¹³ Kristumiutut kinaassutsit allanut ilisimatitsissutigiuk. Oqariartaaseq ’saassussineq illersuutaavoq pitsaanerpaaq’ kristumiutut kinaassutsitsinnik illersuinissamut aamma atuuppoq. Ezrap nalaani Israelikkut aalajaatsut Jehovap piumasaatut iliornissartik ilungersuutigigamikku akerlilersorneqaleramillu ima nalunaarput: „Qilaap nunallu Guutiannut kiffaavugut.“ (Ezra 5:11) Inuit akeqqersimaartut qisuariarnerat isornartorsiuinerallu sunnertissutigigutsigu, annilaanganermik susinnaajunnaarsinnaavugut. Kikkunnut tamanut iluarisaaniarsarigutta iluamik iliuuseqarsinnaajunnaassaagut. Taamaattumik qunulerniaqinak. Allat paasitikkaangatsigik Jehovamut Nalunaajaasuulluta tamatigut iluaqutaasarpoq. Ataqqinnillutit aalajangersimallutilli allat pingaartitannik, upperisannik kristumiutullu isummannik oqaluttuussinnaavatit. Jehovap ileqqussatigut najoqqutassiaanik qutsissunik maleruaanissat aalajangiusimallugu allat paasitikkit. Kristumiutut assuarnaakkunnaanngisaannassallutit paasitikkit. Ersersiguk ileqqussatigut najoqqutarisatit usorsisimaarutigigitit. (Tussiaat 64:11) Kristumiutut aalajaatsutut allanit allaaneruguit, tamanna nakussatsissutigisinnaallugulu illersuutigisinnaavat, allaallu immaqa allat Jehovamik innuttaanillu soqutiginnilissutigisinnaavaat.

14. Illaruaatigineqarneq akerlilersorneqarnerluunniit nikalluutigisariaqarpavut? Nassuiaruk.

¹⁴ Inuit ilaasa immaqa illaruaatigissavaatsit akerlilersussallutilluunniit. (Judasi 18) Nikalloqinalli allat pingaartitannik oqaluttuukkaluarlugit ilaat ajunngitsumik qisuarianngippata. (Ezekieli 3:7, 8) Qanorluunniit aalajangersimatigigaluaruit qularunnaarsinneqarumanngitsut qularunnaarsissinnaanngisaannassavatit. Farao eqqaamajuk. Perluk tupinnartuliarlu sunaluunniit — angajullilianiluunniit annaagamiuk — Mosesip Jehova sinnerlugu oqaluttuuneranut Faraop qularunnaassutiginngilaa.  Taamaattumik inunnut qununermit susinnaajunnaarsinneqaqinak. Guutimut uppernerput taassuminngalu tatiginninnerput qunujunnaarnissatsinnut iluaqutaasinnaapput. — Ussatit 3:5, 6; 29:25.

Itsaq pisimasut ilinniarfigikkit siunissamullu ajunngitsumik tunngaviliorlutit

15, 16. (a) Anersaakkut kingornussarput suua? (b) Anersaakkut kingornussatsinnik Guutip oqaasia tunngavigalugu eqqarsaatiginneqqissaarneq qanoq iluaqutigisinnaavarput?

¹⁵ Anersaakkut kingornussat pingaartiguk. Kristumiut anersaakkut kingornussaminnik naleqangaartumik Guutip oqaasia tunngavigalugu eqqarsaatiginneqqissaarnissartik iluaqutigissavaat. Sallusuissut Jehovap oqaasianeersoq, inuunermik naassaanngitsumik neriuut Guutilu sinnerlugu nutaarsiassamik nuannersumik oqaluussissutiginnittutut ataqqinaat kingornussamut tamatumunnga ilaapput. Taassuma nalunaajaasuatut, inuit immikkut pisinnaatitaaffigalugu inuunermik annaassiniarluni Guutip naalagaaffia pillugu oqaluussinermik suliakkerneqartut ilaattut, qanoq inissisimanerlutit paasisinnaaviuk? Eqqaamajuk Jehova nammineq ima nalunaartoq: „Ilissi uanga nalunaajaasigaassi.“ — Esaja 43:10, NV.

¹⁶ Imminut ima aperisinnaavutit: ’Anersaakkut kingornussaq tamanna qanoq pingaartitsigaara? Ima pingaartitsigaara inuuninni Guutip piumasaanik iliornissaq pingaarnerpaatillugu? Kingornussamik ima pingaartitsitigaanga ussernartut tamatuminnga annaasaqartitsisinnaasut tamaasa akiorsinnaallugit?’ Anersaakkut kingornussarput aamma anersaakkut assut toqqissisimassutigilersinnaavarput, toqqissisimaneq taamaallaat  Jehovap peqatigiissortaani misigineqarsinnaasoq. (Tussiaat 91:1, 2) Jehovap Nalunaajaasuisa oqaluttuarisaanerat nutaanerusoq misissorutsigu, Jehovap innuttaasa kimilluunniit sumilluunniillu nungutinneqarsinnaasimannginnerat killinneqaatigissavarput. — Esaja 54:17; Jeremia 1:19.

17. Anersaakkut kingornussatta saniatigut aamma suna pisariaqarpa?

¹⁷ Soorunami anersaakkut kingornussarput sunut tamanut kisimi aalajangiisuunngilaq. Tamatta immikkut Guutimut qanittumik attaveqarneq ineriartortittariaqarparput. Paulusip kristumiut Filippimiittut uppernerata ineriartortinnissaat ilungersorluni sulissutigereerlugu ima allaffigai: „Taamaattumik, asasakka, naalattuarsimasusi: Annaanneqarnissarsi noqqaassutigisiuk mianerinnillusi uulillusilu, taamani najorassi pisarnissitut piinnarnasi sulili annerusumik maanna najuutinnginninni.“ (Filippimiut 2:12) Inuit allat uppernerat annaanneqaatigisinnaanngilarput.

18. Kristumiutut sammisassat qanoq kristumiutut kinaassutsimik misigisimanerput nakussatsissinnaavaat?

¹⁸ Kristumiutut sammisassanik ulapputeqarit. Oqartoqarsimavoq ’inuk suliaminit kinaassusilerneqartartoq’. Ullumikkut kristumiut Guutip naalagaaffia pilersinneqareersoq pillugu nutaarsiassamik nuannersumik oqaluussissutiginninnissamik pingaarutilimmik suliakkerneqarput. Paulusi ima nalunaarpoq: „Guutimik nalusunut apustiliusutut kiffartuutiga pingaartingaarpara.“ (Romamiut 11:13) Oqaluussinerput silarsuarmit immikkoorutigaarput, oqaluusseqataanitsigullu kristumiutut kinaassuserput nakussatsittarparput. Kristumiutut sammisassanik allanik ulapputeqaraangatta, soorlu ataatsimiigiaraangatta, sanaartornerit teokratiimut tunngassutillit suleqataaffigigaangatsigik immikkullu pisariaqartitallit ikioraangatsigik kristumiutut kinaassutsimik misigisimanerput nakussatsinneqartarpoq. — Galatiamiut 6:9, 10; Hebræerit 10:23, 24.

Erseqqissumik kinaassuseqarneq pilluaqqussutinik piviusunik kinguneqartarpoq

19, 20. (a) Kristumiuunerit illit nammineq qanoq iluaqutigisimaviuk? (b) Kinaassusivitsinnut suna tunngaviua?

¹⁹ Eqqarsaatigilaariaruk kristumiutut ilumoortuunitta iluaqutissartarpassuaqarnera. Jehovamit inuttut ilisarisimaneqarnerput immikkut pisinnaatitaaffigaarput. Pruffiiti Malaki ima allappoq: „[Jehovamik] mianerinnittut . . . oqaloqatigiipput, [Jehovalu] naalaaqqissaarpoq. Mappersagarlu allanneqarpoq [Jehovamik] mianerinnittut aqqanillu ataqqinnittut taassumannga eqqaamaneqaqqullugit.“ (Malaki 3:16) Guutimut ikinngutitut taassumannga isigineqarsinnaavugut. (Jaaku 2:23) Guutip siunertaanik ilisimanninnerput, inuunitta siunertaqarnera pitsaasunillu anguniagaqarnerput inuunitsinnik pisuunerulersitsipput. Aamma siunissamik naassaanngitsumik neriuutissinneqarpugut. — Tussiaat 37:9.

²⁰ Eqqaamajuk Guutip ilinnik qanoq isiginninnera kinaassusivinnut inuttullu naleqassutsinnut aalajangiisuusoq, inuit allat illit pillutit qanoq eqqarsarnerat aalajangiisuunani. Allat immaqa inuit najoqqutassiaat naammanngitsut tunngavigalugit isummerfigisarpaatigut. Guutilli asanninnera uagutsinnillu inuttut soqutiginninnera inuttut piviusumik naleqarnitsinnut tunngaviupput — taassuma pigaatigut. (Matthæusi 10:29-31) Uagullu Guutimut asanninnerput pissutigalugu kinaassutsimik misigisimanerput aatsaat taama sakkortutigilerpoq inuunitsinnilu aatsaat taama paasinartigisunik siunnersorneqarsinnaalerluta. „Kinaluunniit Guutimik asannittoq taassumannga ilisimaneqarpoq.“ — 1 Korinthimiut 8:3.  (wE 2/15 05)

[Quppernerup ataani ilanngussaq]

Eqqaamavigit?

• Anersaakkut kinaassutsip paarilluarnissaa sooq kristumiunut pingaaruteqarpa?

• Kristumiutut kinaassuserput qanoq nakussatsissinnaavarput?

• Kikkunnut iluarisaaniarnerluta aalajangissagaangatta, suut eqqortumik aalajangernissatsinnut iluaqutigisinnaavavut?

• Kinaassutsimik misigisimaneq sakkortooq kristumiutut siunissatsinnut qanoq sunniuteqarsinnaava?

[Atuaqqissaarnermi apeqqutit]

[Qupp. 31-mi assiliartaq]

Kristumiutut sammisassanik ulapputiginninneq kristumiutut kinaassutsimik misigisimanermik nakussatsitsisinnaavoq