Kristumiuunerit usorsisimaarutigiuk!

’Usorsitsaarumasup [Jehova] usorsitsaatigiliuk.’ — 1 KORINTHIMIUT 1:31, 1900/1961.

1. Upperisarsiornermut atatillugu inuppassuit qanoq isiginnittaaseqarpat?

„APATEISME.“ Upperisarsiornermut tunngatillugu oqaaseqartartup inuppassuit uppernerminnut isiginnittaasiat allaaseriniarlugu oqaaseq tamanna ’ilaguutiinnalernermik guuteqarneq’-mik nutserneqarsinnaasoq qanittukkut atorpaa. Ima nassuiaavoq: „Ullumikkut upperisarsiornerni malunnarnerpaaq upperisarsiornerunngilluinnarpoq — tassaavoq isiginnittaaseq ’apateisme’-mik taaneqarsinnaasoq.“ Nangilluni apateisme ’inuup upperisarsiornerminik soqutigisaqarpallaannginneratut’ nassuiarpaa. Oqarpoq inuppassuit ’Guuti upperigaat . . .; kisianni soqutigerpianngikkaat’.

2. (a) Sooq inuit anersaakkut ilaguutiinnalersimanerat tupaallannanngila? (b) Ilatsiinnarneq sooq kristumiunik ilumoortunik navianartorsiortitsiva?

² Biibilimik atuaqqissaartartut ilaguutiinnalernerup inuit akornanni nalinginnaalersimanera tupigusuutiginngilaat. (Lukasi 18:8) Upperisarsiornerit eqqarsaatigalugit taamatut soqutigisaqannginneq tupinnanngilaq. Qangaaniilli inuit upperisarsiornermit eqqunngitsumit tammartitaasarlutillu pakatsisinneqartarput. (Saqqummersitat 17:15, 16) Tamaviaarussinnginnerli kajumissuseqarpiannginnerlu nalinginnaalersimasut kristumiunik ilumoortunik navianartorsiortitsisinnaapput. Uppernerput soqutigiunnaarutsigu, Guutimut kiffartornitsinni aallussilluarunnaarutta sallusuissulluunniit Biibilimeersoq nuannariunnaarutsigu ajortumik kinguneqassaaq. Ukiuni hundredelinni siullerni Jiisusi ilagiinnut Laodikeamiittunut tusarliussamini akunnattuunermut, imaluunniit ilatsiinnarnermut, taama ittumut ima mianersoqqusivoq: ’Nilleratillu kissanngilatit. Nillertuugaluaruittoq kissartuullutilluunniit! . . . Akunnattuuvutit.’ — Saqqummersitat 3:15-18.

Kinaassutsitsinnik ilisimaarinninneq

3. Sooq kristumiut kinaassusertik usorsisimaarutigisinnaavaat?

³ Kristumiut anersaakkut ilaguutiinnalerneq akiorsinnaassagunikku namminneq kikkuunertik nalunngilluartariaqarpaat kinaassusertillu immikkut ittoq naleqquttumik usorsisimaarutigalugu. Jehovamut kiffaanitsinnut Kristusimullu ajoqersugaanitsinnut tunngatillugu kikkuunerput Biibilimi allaatigineqarpoq. Jehovamut ’nalunaajaasuuvugut’ aamma ’Guutimut suleqataavugut’ allat „nutaarsiassaq nuannersoq“ pillugu oqaluttuuttaratsigik. (Esaja 43:10, NV; 1 Korinthimiut 3:9; Matthæusi 24:14, NV) Uppeqatigiippugut ’asaqatigiillutalu’. (Johannesi 13:34) Kristumiut ilumoortut inuupput ’piginnaassutsimik atortuinnarnerisigut sungiussisimasunit ajunngitsumik ajortumillu immikkoortitsisinnaalersimasut’. (Hebræerit 5:14) ’Silarsuarmi qaammaqqutaavugut’. (Filippimiut 2:15) Sapinngisatsinnillu ’Guutimik nalusut akornanni ajunngitsumik inuuniarpugut’. — 1 Petrusi 2:12; 2 Petrusi 3:11, 14.

4. Jehovamik pallorfiginnittut sumut ilaanatik qanoq paasisinnaavaat?

⁴ Jehovamik pallorfiginnittut ilumoortut aamma sumut ilaanatik nalunngilaat. ’Silarsuarmut ilaanngillat’, soorluttaaq siulersuisuat, Jiisusi Kristusi, silarsuarmut ilaanngitsoq. (Johannesi 17:16, NV) ’Guutimik nalusut isumamikkut taarsiorlutillu  Guutimi inuunermut takornartaasut’ ilaginngilaat. (Efesosimiut 4:17, 18) Taamaattumik Jiisusip ajoqersugai ’iluaatsuussusermut silarsuarmiullu kajungerisaannut naaggaarput, silatusaarlutik peqqusersuillutillu Guutimillu mianerinnittuullutik silarsuarmi matumani inuullutik’. — Titusi 2:12.

5. ’Jehovamik usorsitsaatiginninnissamik’ kajumissaarut qanoq paasisariaqarpa?

⁵ Kinaassutsitsinnik ilisimaarinnilluinnarnerput aamma qilammi nunamilu kisimi oqartussaalluni Naalagaasumut attaveqarnerput ’Jehovamik usorsitsaatiginninnissatsinnut’ kajumississutigaavut. (1 Korinthimiut 1:31, 1900/1961) Tamanna qanoq paasisariaqarpa? Kristumiutut ilumoortutut Jehovamik Guuteqarnerput usorsisimaarutigaarput. Kajumissaarut una maleruarparput: „Usorsisimaartup usorsisimaarutigiliuk paasisimasaqarami uanga ilisimallunga. Uangami, [Jehova], tassaavunga nunarsuarmi unneqqarissuusoq, iluartuusoq naapertuilluartuusorlu.“ (Jeremia 9:23) Guutimik ilisarisimanninnerput immikkut pisinnaatitaaffigisarput allallu ikiornissaannut Guutimit atorneqarnerput usorsisimaarutigaarput.

Unamminiarnarnera

6. Kristumiutut kinaassutsip ilisimaariuarnissaa sooq ilaasa unamminiarnartutut isigisarpaat?

⁶ Miserratigineqarsinnaanngilaq kristumiutut kinaassutsitta immikkut ittup ilisimaariuarnissaata imaannaanngitsuunera. Angutip inuusuttup kristumiutut perorsarneqarsimasup anersaakkut sanngiissimanini eqqaamavaa: „Taamani ilaannikkut misigisarpunga nalullugu sooq Jehovamut nalunaajaasuunerlunga. Meeraninniilli sallusuissut nalunngilara. Ilaannikkulli misigisarpunga upperisarsioqatigiittut allatulli iinnartut.“ Kristumiut allat immaqa kinaassusertik aliikkutassianit, tusagassiuutinit silarsuullu matuma inuunermut isiginnittaasianit guutiitsumit sunnerneqartiinnarsimavaat. (Efesosimiut 2:2, 3) Kristumiut ilaat ilaannikkut imminut tatigiunnaartarput anguniakkatillu pingaartitatillu qularilertarlugit.

7. (a) Guutimut kiffaasut imminut qanoq misissortariaqarpat? (b) Suut ulorianarsinnaappat?

⁷ Imminut misissoqqissaarnerit suulluunniit ingalanneqartariaqarpat? Naamik, nalunngilarput apustili Paulusip kristumiut imminut misissoqqullugit kajumissaarai. Ima allappoq: „Immissinnik paasiniaaffiginiaritsi uppernermiinnersusi! Immissinnik misiligitsi!“ (2 Korinthimiut 13:5) Taamaalilluni apustilip uppeqatini kajumissaarpai iluaqutaasumik oqimaaqatigiissumillu periaaseqarlutik anersaakkut sanngiissutaalersinnaasut ujaqqullugit. Siunertaq tassaasariaqarpoq sanngiissutit qaangerniarlugit iliuuserisariaqakkanik iliuuseqarnissaq. Kristumiup uppernermiinnerluni imminik paasiniaaffiginiartup, oqaaserisani iliuuserisanilu upperinerakkaminut naapertuunnersut misissortariaqarpaa. Imminulli kukkusumik misissornerup, kristumiup Jehovamut ilagiinnullu kristumiunut attaveqarnini soqutiginagu „kinaassutsini“ paasiniarlugu iliuuseqarneranut akissutissarsiorneranullu pissutaasup, asuliinnarnissaa anersaakkullu aserornartuusinnaanera eqqumaffigineqartariaqarpoq. * Soorunami arlatta kialuunniit ’uppersutsimigut umiiarnissani’ kissaatiginngilaa. — 1 Timotheusi 1:19.

Unamminiarnartunit sunnertinngitsoorsinnaanngilagut

8, 9. (a) Mosesip imminut tatiginnginnini qanoq oqaatigaa? (b) Mosesip ajukkunnera Jehovap qanoq periaaseqarfigaa? (c) Jehovap neriorsuutai ilinnut qanoq sunniuteqarpat?

⁸ Kristumiut ilaannikkut imminut tatigiunnaartartut imminut naammaginngittariaqarpat? Soorunami naamik! Itsarsuarli aamma taamatut misigisoqartarnera tuppallersaatigisinnaavaat. Itsaq Guutimut nalunaajaasuusut aalajaatsut aamma taama misigisarsimapput. Eqqarsaatigeriaruk Mosesi, uppernermik, ilumoorfiginninnermik Guutimullu tunniusimanermik immikkorluinnaq ittumik ersersitsisoq. Sapernarpasissumik suliassinneqarami imminut nikanartilluni ima aperivoq: „Kinaagama?“ (2 Mosesi 3:11) Ima eqqarsarunarpoq: ’Suunngilanga!’ imaluunniit ’Atorsinnaanngilanga!’ Mosesip tunuliaquttaminut tunngassuteqartut arlallit ajukkussutigisimasinnaavai: Inuiaqatigiinnut inussiaasunut ilaavoq.  Israelikkunnit ajattugaavoq. Oqallorissuunngilaq. (2 Mosesi 1:13, 14; 2:11-14; 4:10) Savanik paarsisuuvoq, suliaq Egyptenimiunit narrugisaasoq. (1 Mosesi 46:34) Tupinnanngilaq Guutip innuttaanik inussiaasunik aniguisitsisussatut imminut piukkutinngimmat!

⁹ Jehovap Mosesi nakussatsillugulu eqqissisarpaa marlunnik kimittuunik neriorsuilluni: „Uanga najussavakkit, mannalu uannit aallartitaaninnut nalunaaqutigissavat: Illit Israelikkut Egyptenimit anisereerukkit qaqqami matumani guutisiorfigissavassinga.“ (2 Mosesi 3:12) Guutip kiffani nalornillunilu nangaasoq oqarfigaa najortuassallugu. Aamma Jehova neriorsueqqissaarpoq innuttani aniguisikkumaarlugit. Ukiut hundredelikkuutaat ingerlaneranni Guutip kiffani najorumaarlugit taamatut neriorsortarpai. Assersuutigalugu Mosesi aqqutigalugu inuiaqatigiit Israelikkut nunamut neriorsuutigisamut isingajalermata ima oqarfigai: „Sapiitsuugit nakuullutillu! . . . [Jehovap] Guutivit nammineq ingerlaqatigiumaarpaatit. Iperassanngilaatit imminiiginnassanallu.“ (5 Mosesi 31:6) Aamma Jehovap Josva nakussatsippaa ima oqarluni: „Inuutillutit kialuunniit ajugaaffigisinnaassanngilaatit. Najortuassavakkit . . .; qimanngisaannassavakkit.“ (Josva 1:5) Kristumiullu tamaasa immikkut ima neriorsorpai: „Iperassanngilakkit imminiiginnassanallu.“ (Hebræerit 13:5) Taama pissaaneqartigisumik annertoqquteqaratta kristumiuunerput usorsisimaarutigisariaqarparput!

10, 11. Asafip Levikkuusup Jehovamut kiffartornerminik pingaartitsiuarnissaminut suna iluaqutigaa?

¹⁰ Mosesip toquneraniit ukiut 500-t missaat qaangiuttut Levikkuusup aalajaatsup Asafimik atillip assuarnaalluni inuunerup iluaqutaaneranik qularutiginninnini ammasumik eqqartorpaa. Asafi annikilliortitaasaraluarlunilu usserniarneqaraluarluni Guutimut kiffartorneq ilungersuutigitillugu, malugaa Guutimik mitalliisut ilaat pigissaarnerujartorlutillu pissaaneqarnerujartortut. Asafip tamanna qanoq sunnerneqaatigaa? Ima oqarpoq: „Naakkiuteqqajaasimavunga, isikkakka quaaqqajaasimapput, uumitsaatigisarakkit anneruniartut, takugaangakkit iluaatsut pilluarlutik inuusut.“ Jehovamik pallorfiginnittuunerup iluaqutaanera qularutigilerpaa. Asafi ima isumaliorpoq: „Uummatiga minguitsuutinniarsimavara asuliinnaasumik, pinngitsuutinniarlungalu assakka asattarsimallugit, taamaattoq ulloq tamaat eqqorneqartarpunga.“ — Tussiaat 73:2, 3, 13, 14.

¹¹ Misigissutsit isumakulunnartut tamakku Asafip qanoq iliuuseqarfigai? Miserratigai? Naamik. Guutimut qinunermigut ersersippai, soorlu Tussiaat 73-imi atuarsinnaagipput. Asafi naalaffimmiitilluni isiginnittaasia allanngorluinnarpoq. Tassaniitsilluni paasivaa Guutimut tunniusimalluni inuuneq tassaajuassasoq inooriaaseq pitsaanerpaaq. Asafip anersaakkut ittunik pingaartitseqqilerami paasivaa Jehovap ajussuseq uumigigaa piffissarititaalu nalliuppat guutiitsut pillarumaarai. (Tussiaat 73:17-19) Eqqortumik isiginnittaaseqalersimanini pissutigalugu Asafip Jehovamut kiffaasutut immikkut pisinnaatitaaffeqartutut kinaassutsiminik misigisimanera nakussatsinneqarpoq. Guuti ima oqarfigaa: „Maanna ilinniittuaannarpunga, talerpiga tigummivat. Ilitsersuutikkut ingerlatissavarma, naalannassusermukaatissavarma.“ (Tussiaat 73:23, 24) Asafip Guutini usorsisimaarutigeqqilerpaa. — Tussiaat 34:3.

 Kinaassusertik ilisimaarilluarpaat

12, 13. Pallorfiginnittunik Guutimut attaveqarnerminnik usorsisimaarutiginnittunik Biibilimi oqaluttuarineqartunik eqqaasaqarit.

¹² Ilaatigut Guutip kiffaasa ilumoortut uppernerat misissorlugulu ilaarutsigu kristumiutut kinaassutsitsinnik misigisimanerput nakussatsissinnaavarput. Kiffat ilumoortut taakkua assortorneqaraluarlutik Guutimut attaveqarnertik usorsisimaarutigaat. Ataataanerpaap Jaakup ernera Josefi eqqarsaatigeriaruk. Inuusuttuaraalluni qatanngutiminit inussiatut tunineqarpoq Egyptenimullu, ataataminit Guutimik mianerinnittumit kilometerinik hundredelippassuarnik ungasitsigisumut avatangiisinullu angerlarsimaffimmini avatangiisinit allaanerulluinnartunut, aallarunneqarluni. Josefi Egyptenimiitsilluni Guutimeersumik siunnersuisinnaasumik siunnersortissaqanngilaq, pissutsillu unamminiarnartut ileqqorissaarnissaminut Guutimullu tatiginninnerminut misilinneqataasut nalaattarpai. Taamaattorli Guutimut kiffaasutut kinaassutsiminik misigisimanini sakkortooq attattuarumallugu iliuuseqartarpoq, eqqortutullu ilisimasaminut aalajaattuarluni. Allaat akeqqersimaarfiusumiinnermini Jehovamut kiffaanini usorsisimaarutigaa, nangaananilu misigissutsini ersersittarlugit. — 1 Mosesi 39:7-10.

¹³ Ukiut 800-t tamatuma kingorna niviarsiaraq Israelikkuusoq tigusaasimasoq Aramæerit sakkutuuisa naalagaannut Na’amanimut inussianngorpoq. Aamma taassuma Jehovamut kiffaasutut kinaassutsi puigorsimanngilaa. Periarfissaqalerami Elisa Guutip ilumoortup pruffiitiatut eqqartorlugu nakimaalluni Jehova pillugu nalunaajaalluarpoq. (2 Kunngit 5:1-19) Ukiorpassuit tamatuma kingorna kunngi Josiasi inuusuttoq ajortunngorsimasunik avatangiiseqaraluarluni siunissaq ungasinnerusoq eqqarsaatigalugu upperisarsiornikkut iluarsaaqqinnernik aallarniivoq Guutillu naalaffia iluarsaallugu, taamaalillunilu  inuiaqatigiit Jehovamik pallorfiginneqqilersillugit. Taassuma upperisani guutisiorninilu usorsisimaarutigai. (2 Nalunaarsuutit kapitalit 34 35-lu) Aamma Danielip ikinngutaasalu pingasut hebræeriusut Babylonimiittut Jehovamut kiffaasutut kinaassusertik puigunngisaannarpaat, allaallu tatineqangaaraluarlutillu usserniarneqaraluarlutik assuarnaattuarput. Erseqqippoq Jehovamut kiffaanertik usorsisimaarutigigaat. — Danieli 1:8-20.

Kristumiutut kinaassutsit usorsisimaarutigiuk

14, 15. Kristumiutut kinaassutsimik usorsisimaarutiginninneq qanoq paasisariaqarpa?

¹⁴ Guutimut attaveqarnertik naleqqulluartumik usorsisimaarutigimmassuk Guutimut kiffaasut taakku ingerlalluarput. Uagummi ullumikkut inuusugut? Kristumiutut kinaassutsimik usorsisimaarutiginninneq qanoq paasisariaqarpa?

¹⁵ Pingaarnerpaamik inunnut Jehovap aqqanik taaguuteqartunut ilaasinnaaneq taassumanngalu pilluaqquneqarneq akuerineqarnerlu qujamasuutigineqangaartariaqarput. Guutip kikkut pigisarinerlugit qularutiginngilaa. Apustili Paulusi, upperisarsiornikkut paatsiveerusimaartoqangaarnerata nalaani inuusoq, ima allappoq: „[Jehovap] pigisani ilisimavai.“ (2 Timotheusi 2:19; 4 Mosesi 16:5) Aap, Jehovap „pigisani“ usorsisimaarutigai. Ima nalunaarpoq: „Ilissinnik attuisut isima tappiutaat attorpaat.“ (Zakaria 2:12) Erseqqippoq Jehovap asagaatigut. Aamma uagut taassumunnga attaveqarnerput asanningaarnermik tunngaveqartariaqarpoq. Paulusi ima allappoq: „Kinaluunniit Guutimik asannittoq taassumannga ilisimaneqarpoq.“ — 1 Korinthimiut 8:3.

16, 17. Kristumiut inuusuttullu utoqqaanerusullu anersaakkut kingornussartik sooq usorsisimaarutigisinnaavaat?

¹⁶ Inuusuttut Jehovamut nalunaajaasutut perorsarneqarsimasut imminut misissortariaqarput Guutimut attaveqarnertik pissutigalugu kristumiutut kinaassutsiminnik misigisimanertik sakkortunerujartornersoq paasiniarlugu. Angajoqqaamik upperisaat naammagiinnarsinnaanngilaat. Guutimut kiffaasut tamaviisa pillugit Paulusi ima allappoq: „Naalagaata nammineq aalajangigassaraa qeqassanersoq orlussanersorluunniit.“ Imalu nangippoq: „Tassa tamatta immikkut Guutimut nassuertussaavugut.“ (Romamiut 14:4, 12) Paasinarpoq tamaviaarussinani ilaqutariit ileqquinik ingerlatsiinnarneq Jehovamut qanittumik ataavartumillu attaveqalernissamut naammanngitsoq.

¹⁷ Oqaluttuarisaanerup ingerlanerani angut aalajaatsoq Abeli, ukiut 6000-t missaat matuma siorna inuusoq, aallarnerfigalugu ullumikkut nalunaajaasut ’amerlangaartut’ tikillugit Jehovamut nalunaajaasoqartuarsimavoq. Siunissami Jehovamik pallorfiginnittut amerlangaartut naassaanngitsumik siunissaqarnertik nuannaarutigisinnaassavaat. (Saqqummersitat 7:9; Hebræerit 11:4) Pallorfiginnittunut aalajaatsorpassuarnut taakkununnga ilannguttut kingulliit ilagaatigut. Anersaakkut kingornussatta naleqangaarnera eqqarsaatigilaariaruk!

18. Pingaartitavut najoqqutarisavullu silarsuarmit qanoq immikkoorutigaavut?

¹⁸ Kristumiutut kinaassutsitsinnut aamma ilaapput pingaartitat, pissuserisat, najoqqutassiallu assigiinngitsut kristumiuunitsinnut ilisarnaataasut. Inooriaaseq tamanna „Aqqummik“ taaneqarpoq, inooriaasituaavorlu nuannaalersitsisoq Guutimillu iluarineqartoq. (Apustilit Suliaat 9:2; Efesosimiut 4:22-24) Kristumiut ’suut tamaasa paasiniaqqissaartarpaat, ajunngitsullu aalajangiullugit’. (1 Thessalonikamiut 5:21, NV) Paasilluinnarparput kristumiussuseq silarsuarlu Guutimik ajattuisoq qanoq assigiinngitsigisut. Eqqortumik eqqunngitsumillu pallorfiginninnerit akuleriissineqarnerat Jehovap akuerinngilluinnarpaa. Pruffiitini Malaki aqqutigalugu ima nalunaarpoq:  „Taava kingumut immikkoortissinnaanngussavarsi iluartoq iluanngitsumit, tassa Guutimik kiffartuussisoq kiffartuussisuunngitsumit.“ — Malaki 3:18.

19. Kristumiut ilumoortut sumut nakkaannanngisaannassappat?

¹⁹ Silarsuarmi paatsiveerusimaffiusumi matumani Jehovamik usorsisimaarutiginninneq taama pingaaruteqartigimmat, Guutitsinnik naleqquttumik usorsisimaarutiginnittuarnissatsinnut kristumiutullu kinaassutsitsinnik misigisimanitta sakkortuup attattuarnissaanut suna iluaqutigisinnaavarput? Allaaserisami tulliuttumi tamanna pillugu pitsaasunik siunnersuuteqarpoq. Tamakku sammitillugit nuannaarutigisinnaavat kristumiut ilumoortut „apateisme“-mut nakkaannanngisaannarnerat.

[Quppernerup ataani ilanngussaq]

Eqqaamavigit?

• Kristumiut qanoq ’Jehova usorsitsaatigisinnaavaat’?

• Mosesi Asafilu qanoq ilinniarfigaagit?

• Inuit Guutimut kiffartornerminnik usorsisimaarutiginnittut Biibilimi oqaluttuarineqartut ilaannik eqqaasaqarit.

• Kristumiutut kinaassutsimik usorsisimaarutiginninneq qanoq paasisariaqarpa?

[Atuaqqissaarnermi apeqqutit]

[Qupp. 24-mi assiliartaq]

Ilaanni Mosesi imminut tatigiunnaarpoq

[Qupp. 25-mi assiliartat]

Itsaq Jehovamut kiffaasut amerlasuut kinaassusertik immikkut ittoq usorsisimaarutigaat