Jehovap oqaasia uumavoq

Ruthimik allakkat-nit pingaarnersat

ARNAT marluk ilumoorfigeqatigiinnerat pillugu oqaluttuaavoq pissanganartoq attortinnartorlu. Jehova Guutimut tunniusimanermik aaqqissuussaanullu tatiginninnermik oqaluttuaavoq. Jehovap Missiarsimut siuaasaasussanik peqqissaarusseqqissaarluni erseqqissaaneranik oqaluttuaavoq. Ilaqutariit ataatsit nuannaarnerannik aliasuuteqarnerannillu oqaluttuaavoq killitsinnartoq. Biibilimi Ruthimik allakkat tamakkua allallu imarai.

Ruthimik allakkat-ni oqaluttuarineqartut Israelimi „eqqartuussisut nalaanni“ ukiut aqqaneq-marluk missaasa ingerlaneranni pisimasuupput. (Ruthi 1:1) Eqqartuussisut nalaanni siusissukkut pisimassapput, nunaatiliummi Boazip, oqaluttuami pisimasuimmi tamatumani inuttaasut ilaata, anaanagaa Rahabi, Josvap nalaani inuusoq. (Josva 2:1, 2; Ruthi 2:1; Matthæusi 1:5) Ilimanarpoq pruffiitip Samuelip ukiumi 1090-imi u.n.s. allatarigaa. Biibilip atuagartaani taannatuaavoq Israelikkuunngitsup arnap aqqanik taagutilik. Tusarliussaa „uumavoq sunniisinnaassuseqarlunilu“. — Hebræerit 4:12.

„ORNIKKAT UANGATTAAQ ORNISSAVARA“

(Ruthi 1:1–2:23)

No’omi Ruthilu Betlehemimut pigamik uitsatigineqarput. Illoqarfiup arnartaasa angajulleq pillugu ima aperipput: „Arraa, ilumut taannaanerluni No’omi?“ No’omip ima akivai: „No’omimik taananga Maramik taasalerniarsinga Ajugaqanngitsup narrutsatsissimammanga. Peqangaarlungami maanngaanniit aallarpunga, suerutitillungali [Jehovap] maanga utertippaanga.“ — Ruthi 1:19-21.

Israelimi kaannersuaqarnera pissutigalugu No’omip ilaqutai Betlehemimiit Moabimut nuuttariaqalermata No’omi ’peqangaarpoq’, tassa ueqarpoq marlunnillu erneqarluni. Moabimi nunaqalereerlutik No’omip uia, Elimeleki, toquvoq. Kingusinnerusukkut ernerisa arnat Moabikkuusut marluk Orpa Ruthilu nuliartaaraat. Ukiut qulit missaat qaangiuttut erneri qitornaatsuullutik toqupput qimataralugit arnat pingasut. No’omi Judamut uterniarluni aalajangermat ernerisa uillarneri malinnaapput. Aqqutaani No’omip Moabimut uteqqullugit kajumissaarpai immikkullu tamarmik namminneq inuiaqatigisaminnik uissarsioqqullugit. Orpa No’omip oqarneratut iliorpoq. Ruthilli No’omi najuinnarpaa imalu oqarluni: „Ornikkat uangattaaq ornissavara, najugariligassannilu najugaqassaanga. Inuiaqatitit uangattaaq inuiaqatigissavakka, illillu Guutit uangattaaq Guutigissavara.“ — Ruthi 1:16.

Uillarnerit marluk, No’omi Ruthilu, suaasiassanik katersuinerup aallartinnerata nalaani Betlehemimut tikipput. Guutip inatsisai malillugit aaqqissuussineq Ruthip atorpaa narsaammilu karrertaqarfinnik katersuilerluni, sunaaffa Elimelekip eqqarliata utoqqaanerusup Boazimik atillip narsaataani. Ruthi Boazimit iluarisaavoq narsaataanilu „suaasiassanik qajuusiassanillu katersuineq qaangiutserlugu“ katersuilluni. — Ruthi 2:23.

Allassimaffiit pillugit apeqqutit akineqartut:

1:8 — Sooq No’omip ukussani kajumissaarlugit oqarpa anaanamik illuinut, oqarnani  ataatamik illuinut, uteqqullugit? Allassimanngilaq Orpap angutaa suli uumanersoq, Ruthilli angutaa suli uumavoq. (Ruthi 2:11) No’omip anaanaasup illua eqqartoramiuk toqqissisimanermik anaanaasup isumassuineranut tunngatitaannik eqqarsaateqartinniarsimasinnaavai. Ukussanut sakiminnik asasaminnik inuulluaqqusinissaminnik aliasuutiginningaartunut immikkut tuppallernarsimassaaq. Aamma No’omip oqaatiginiamisaarsimasinnaavaa Ruthip Orpallu arnaat angerlarsimaffigissaartuusut, No’omili nammineq taamaannani.

1:13, 21 — Jehovaana No’omip narrujuummeqqaneranut ajunaarneranullu pisuusoq? Naagga, aamma No’omip Guuti naapertuilluanngitsuliornerarlugu unnerluutiginngilaa. Nalaatanili tamaasa pissutigalugit isumaqalersimavoq Jehovap ajorigaani. Narrujuummeqqavoq pakatseqqallunilu. Aammami taamanikkut qitornaqarneq pilluaqqussutitut qitornaatsuunerlu perloqqussutitut isigineqarpoq. No’omip ernini marluk annaasimavai ernutaqarnanilu, taamaattumik isumaqarsimasinnaavoq Jehovamit nikanarsarneqarluni.

2:12 — Ruthip suna Jehovamit ’naammattumik akissarsiatut’ pivaa? Ruthip oqaluttuarisaanermi kinguaariinnut pingaarnerpaanut, tassa Jiisusip siuaasaanut, ilanngunneq immikkut pisinnaatitaaffigilerpaa. — Ruthi 4:13-17; Matthæusi 1:5, 16.

Ilinniarfigisinnaasavut:

1:8; 2:20. No’omip alianartunik nalaataqartaraluarluni Jehovap ilumoorfiginnilluni tunniusimanera tatigiuarpaa. Aamma uagut taamaattariaqarpugut, ingammik sualuttumik misilinneqaraangatta.

1:9. Angerlarsimaffik ilaqutariinnut nerisarfiuunnartariaqarnanilu sinittarfiuunnartariaqanngilaq. Toqqissisimanartuusariaqarpoq tamarmik qasuersaarfigisinnaasaat.

1:14-16. Orpa ’inuiaqatiminut guutiminullu uterpoq’. Ruthilli inunngorfini toqqissisimanartoq isumannaatsorlu tunuppaa Jehovalu ilumoorfigiuarlugu. Guutimut ilumoorfiginnilluni asanninneq ineriartortikkutsigu imminullu pilliutigeriaannaagutta illersuutigissavavut namminissarsiorluni kissaatinut nakkaannarnissaraluamut ’iliuuserisariaqaraluakkatsinnillu iliuuseqanngitsoornissamut’, taamaaliunngitsooruttami piuneerutissaagut. — Hebræerit 10:39, NV.

2:2. Ruthip takornartat piitsullu karrit inerititaannik katersuisinnaanerannik aaqqissuussineq atorusuppaa. Qamannga pisumik maniguuttuuvoq. Kristumiu ikiortarialik uppeqatiminit isumatusaartumit pisortatigoortumilluunniit ikiorserneqarsinnaatitaanermisut ikiorserneqarnissaminut pingaarniarpallaartuusariaqanngilaq.

2:7. Naak Ruthi katersuisinnaatitaagaluarluni, taamaaliortinnani aperivoq. (3 Mosesi 19:9, 10) Tamanna qanilaartuunermut ersiutaavoq. Uaguttaaq qanilaartuuneq noqqaassutigisariaqarparput, tassami „qanilaartut nuna kingornutissavaat pilluangaarnertillu nuannaarutigissallugu“. — Sefania 2:3; Tussiaat 37:11.

2:11. Ruthip No’omi ilaqutariinnikkut attaveqarfigiinnanngilaa. No’omimut ikinngutiviuvoq. (Ussatit 17:17) Ikinngutigiilluartuupput,  ikinngutigiinnerisami asanninneq, ilumoorfiginninneq, misiginneqataaneq, inussiarnerneq imminullu pilliutigeriaannaaneq tunngavigaat. Aamma, suli pingaaruteqarnerusumik, tunngavigaa Jehovamut kiffartorusunnerat pallorfiginnikkusunnerallu. Uaguttaaq Jehovamik pallorfiginnittunik ilumoortunik ikinngutitaarniarnissatsinnut periarfissaqarluarpugut.

2:15-17. Allaat Boazip suliaminik oqilisaakkaluaraani, „unnunnissaa tikivillugu Ruthi narsaammi karrertaqarfinnik katersuivoq“. Eqiasuitsuuvoq. Kristumiutut aamma uagut eqiasuitsuusutut ilisimaneqartariaqarpugut.

2:19-22. No’omip Ruthillu unnukkut oqaloqatigiittarnertik nuannaraat. Angajulliup nukarliup suliai soqutigalugit ersersitsisarpoq, marluullutik isertugaqaratik eqqarsaatitik misigissutsitillu annittarpaat. Ilaqutariit kristumiuusut aamma taamaattariaqannginnerpat?

2:22, 23. Jaakup pania Dina assiginagu Ruthip Jehovamut pallorfiginnittut ilagisartagarai. Uagutsinnut maligassaalluarpoq! — 1 Mosesi 34:1, 2; 1 Korinthimiut 15:33.

NO’OMI ’PEQANGAALERPOQ’

(Ruthi 3:1–4:22)

No’omi utoqqarmut meerartaarsinnaajunnaareerpoq. Taamaattumik Ruthi qinnuigaa taarserluni utertitsisussamik aappartaaqqullugu, sakiatsiariit aappariilertarnerat malillugu. Ruthip No’omip siunnersuutai malillugit Boazi utertitsisooqqullugu qinnuigaa. Boazi piumavoq, qaninnerusumilli eqqarleqarput utertitsisutut salliusussaatitaasumik.

Boazip piffissaq atulussinnarnagu ingerlaannaq paasiniaavoq. Aqaguinnartoq ullaakkut utoqqaanertat qulit Betlehemimeersut katersortippai taakkualu tutsaanni eqqarliusoq utertitsisoorusunnersoq aperalugu. Taanna piumanngilaq. Taamaattumik Boazi utertitsisutut iliorpoq Ruthilu aappartaaralugu. Ernertaarput, Obedimik, kunngi Daavip aataavanik. Maanna Betlehemimi arnat No’omi ima oqarfigaat: „[Jehova] unnersiutigineqarli . . . Inuuneqartissavaatit isumagissallutillu utoqqalininni. Ukussavimmi ilinnik asanningaartup ernertaaraa. Ernernit arfineq-marlunnit ilinnut pingaaruteqarneruvoq.“ (Ruthi 4:14, 15) Arnaq ’suerutititaalluni’ Betlehemimut utertoq ’peqangaaqqilerpoq’. — Ruthi 1:21.

Allassimaffiit pillugit apeqqutit akineqartut:

3:11 (1900/1961). — Suna pissutigalugu Ruthi ’arnatut pikkorissutut’ tusaamaneqarpa? Qallikkut isikkuni, soorlu ’perlaajat, pinnersaatit kuultiusut atisalluunniit’, nersorneqaatiginngilai. Naagga, nersorneqaatigisaa tassaavoq ’uummat, inummi isertugaasoq’, ilumoorfiginnittuunini, asannittuunini, maniguuttuunini, qanilaartuunini, eqiasuitsuunini imminullu pilliutigeriaannaanini. Arnat Ruthitut tusaamaneqarusuttut, Guutimik mianerinnittuusut tamarmik, pissutsit taamaattut ineriartortinniarlugit aalajangiusimasariaqarpaat. — 1 Petrusi 3:3, 4; Ussatit 31:28-31.

3:14 — Sooq Ruthi Boazilu ullaakkut suli qaammanngitsoq iterpat? Imaanngilaq isertorniakkaminnik ileqqorluttuliorsimasut. (Takuuk  Biibilimi Ruthi 3:4, 7-imut quppernerup ataani ilanngussaq.) Sakiatsiariit aappariilersinnaatitaanerat malillugu arnat aappartaarusuttut iliortarnerattut Ruthi iliorsimagunarpoq. No’omip siunnersuutai malillugit iliorpoq. Aammattaaq Boazip akissutaanit erseqqilluarpoq Ruthip iliuusiinik ajorisassaqanngitsoq. (Ruthi 3:2-13) Ilimanarpoq Ruthi Boazilu makiaartut pissutissaqanngitsumik oqaatissuaasoqaleqqunagu.

3:15 — Boazip Ruthi suaasiassanik uuttuutinik arfinilinnik tunimmagu qanoq isumaqartinneqarpa? Taamaaliornikkut immaqa ersersinniarneqarpoq ullut arfinillit sulereernerup kingorna qasuersaarfiusumik ulloqarneratulli Ruthip qasuersaarfissaa qanillisoq. Boazip isumagiumavaa Ruthip uimini angerlarsimaffimmi isumannaatsumi qasuersaarfissarsinissaa. (Ruthi 1:9; 3:1) Aamma imaassinnaavoq annerpaamik suaasiassat uuttuutit arfinillit niaqquminik nammassinnaagai.

3:16 — Hebræerisut allassimaqqaarfia naapertorlugu No’omip Ruthi ima aperaa: „Kinaavit, paniga?“ Ukussani ilisarinnginnamiuk? Taamaalluarsinnaavoq, Ruthimi angerlarmat immaqa suli taarpoq. Aamma imaassinnaavoq No’omip paaserusukkaa utertitsisumut atatillugu Ruthi nutaamik kinaassuseqalersimanersoq.

4:6 — Utertitsisunngornikkut nunaat kingornuttaqattaagaq qanoq ’aserorneqarsinnaagami’? Israelikkuusup piitsunngorluni nunaatini kingornuttaqattaagaq tunisariaqalerpagu, utertitsiniussisussaata akilissavaa ukiup utertitsiviup tulliusup tungaanut ukiut sinneruttut nalingannik. (3 Mosesi 25:25-27) Pigisai nalikillissapput. Aammami Ruthi ernertaassappat, ernertaava, utertitsisup ulloq manna tikillugu eqqarlerisaa qaninnerpaajugaluaq pinnani, nunaatigiligaanik kingornussisussaavoq.

Ilinniarfigisinnaasavut:

3:12; 4:1-6. Boazip Jehovap siunnersuutai maleqqissaarpai. Najoqqutassiat Guutimeersut peqqissaartumik maleruartarpavut? — 1 Korinthimiut 14:40.

3:18. No’omip Boazi tatigaa. Uaguttaaq uppeqatit ilumoorfiginnittut tatigisariaqannginnerpavut? Ruthip angutip ilisarisimanngisami sakiatsiariit aappariilertarnerat malillugu aappartaarinissaanut piareersimavoq. (Ruthi 4:1) Sooq? Guutip aaqqissuussinera tatigigamiuk. Taamatulli tatiginnippugut? Assersuutigalugu aappassarsiorutta taamaallaat ’Naalakkami katinnissamik’ siunnersuut malipparput? — 1 Korinthimiut 7:39.

4:13-16. Naak Ruthi Moabikkuugaluarluni guutimullu Kemoshimut pallorfiginnittuusimagaluarluni immikkut pisinnaatitaafferujussuaq pisinnaatitaaffigilerpaa! Ruthimik oqaluttuap ersersippaa allassimaffik una qanoq isumaqarnersoq: „Taamaattumik piumassuseq ilungersornerluunniit apeqqutaanngillat Guutilli nallittuinera.“ — Romamiut 9:16.

Guutip ’piffissaq nalliuppat akitsisissavaasi’

Ruthimik allakkat ersersippaat Jehova Guuti ilumoorfiginnilluni tunniusimasuusoq kiffamilu ilumoorfiginittut iluaqutigisaannik iliuuseqartartoq. (2 Nalunaarsuutit 16:9) Ruthi qanoq pilluaqqusaasoq eqqarsaatigigaangatsigu paasisinnaasarparput nangaanngivilluni Guutimut tatiginninneq qanoq iluaqutaatigisoq, qularutiginngivillugu „taanna tassaareersoq ujarlersinilu akissarsisissagai“. — Hebræerit 11:6.

Ruthi, No’omi Boazilu Jehovap aaqqissuussineranik tatiginnilluinnarput, ingerlalluarpullu. Ullumikkuttaaq qularutiginngilluinnarsinnaavarput ’Guutip suliani tamaasa imminik asannittunut, siunertani naapertorlugu qaaqqusaasunut, iluaqutaatikkai’. (Romamiut 8:28, NV) Taamaattumik qulanngivilluta apustili Petrusip kajumissaarutaa una malitsigu: „Taamaattumik Guutip assaata pissarsuup ataani qanilaartuugitsi, taava taassuma piffissaq nalliuppat akitsisissavaasi, isumakuluutisilu tamaasa taassumunnga pisissigit isumassormasi.“ — 1 Petrusi 5:6, 7.  (wE 3/1 05)

[Qupp. 18-mi assiliartaq]

Nalunngiliuk sooq Ruthip No’omi qimanngikkaa?

[Qupp. 19-mi assiliartaq]

Ruthip ’arnatut pikkorissutut’ suna tusaamaneqaatigilerpaa?

[Qupp. 20-mi assiliartaq]

Jehovap Ruthi sumik ’naammattumik akissarsisippaa’?