„Sapangaq ataaseq akisoorujussuaq“ nanivaat

„Qilammiup naalagaaffia anguniagaavoq inuit tamaviaarutigisaat, tamaviaartullu angusarpaat.“ — MATTHÆUSI 11:12, NV.

1, 2. (a) Pissuseq qaqutigoortoq suna Jiisusip Guutip naalagaaffia pillugu assersuusiami ilaanni eqqartorpaa? (b) Jiisusi sapanngarissumik akisuumik assersuusiamini qanoq oqarpa?

ARLAANNIK ima pingaartitaqartigivit taanna pigilerniarlugu pigisatit tamaasa akigiumallugit? Naak inuit ilaat anguniakkamut aalajangersimasumut — aningaasanut, tusaamasaanermut pissaaneqarnermut inissisimaffimmulluunniit aalajangersimasumut — tunniulluinnarsimaneraraluartut qaqutigoorpoq ima pilerinartigisumik nassaartoqartarnera taanna pigilerumallugu sunik tamanik akiginnikkumasunik. Pissuseq qaqutigoortoq nersortariaqartorli taanna Jiisusi Kristusip Guutip naalagaaffia pillugu assersuusiarpassuarmi eqqarsalersitsisut ilaanni eqqartorpaa.

² Assersuusiaavoq Jiisusip ajoqersukkaminuinnaq oqaluttuarisaa. Amerlanertigut sapanngarissoq pillugu assersuusiamik taaneqartarpoq, kisianni sapanngarissoq akisooq pillugu assersuusiamik taasinnaavarput. Ima oqarpoq: „Qilaap Naalagaaffiata assigaa niuertoq sapanngarissorsiortoq, nassaarigamiullu sapangaq ataaseq akisoorujussuaq pigisani tamaasa [ingerlaannaq, NV] akigiartorpai taannalu pisiaralugu.“ (Matthæusi 13:36, 45, 46) Imminut tusarnaartut assersuusiaq taanna sumik ilinniarfigissagaat Jiisusip kissaatigaa? Oqaasiilu qanoq iluaqutigisinnaavavut?

Sapanngarissut akisuut

3. Itsaq sapanngarissut kusanartut sooq taama naleqartigippat?

³ Itsarsuarmiilli sapanngarissut pingaartinneqartarput pinnersaatitullu atorneqartarlutik. Ilisimatooq atuakkiortorlu Romamiu Plinius utoqqaaneq naapertorlugu „sapanngarissut pinnersaatit akisuut nalilersorneqarneranni naleqarnerpaat ilagaat“. Kuultimit, sølvimillu ujaqqanillu erlinnartorpassuarnit allaanerullutik sapanngarissut pinngortitanit uumassusilinninngaanneersuupput. Ilisimaneqarluarpoq uillut ilaat pisatarinngisaminnik — assersuutigalugu sioqqamik — perlemorimik taaneqartartumik seerititsilluni qalleqqiisaqattaarnermigut alutornangaartumik sapanngarissunngortitsisinnaasoq. Itsaq sapanngarissut kusanarnerpaat pingaartumik Immamit Aappalaartumit, Persiap Kangerliumanersuanit Indiallu Imarpianit, tassa Israelimit ungasissumiittumit, pipput. Qularutissaanngilaq tamanna pissutigalugu Jiisusip „niuertoq sapanngarissorsiortoq“ eqqartoraa. Sapanngarissut akisuupilussuit ujarniarlugit suleruloornissaq ilungersuanissarlu pisariaqarput.

4. Niuertumik assersuusiami ilinniutissaq pingaarneq suua?

⁴ Sapanngarissut kusanartut qangaaniilli akisuujusimagaluartut, Jiisusip assersuusiaani akisunerat pingaarnerunnginnguatsiarpoq. Jiisusip Guutip naalagaaffia sapanngarissumut akisuumut assersuutiinnanngilaa; assersuusiaminili „niuertoq sapanngarissorsiortoq“ malugeqquaa,  taassumalu sapanngarissumik nassaareerami iliuusia aamma pingaartillugu. Pisiniarfiutilimmit nalinginnaasumit allaanerulluni niuertoq sapanngarissunik nioqqutilik sapanngarissunik paasisimasalittut taaneqarsinnaavoq, sapanngarissup kusanassusianik tappiffiginnittoq, sapanngarissumik immikkut illuinnartunngortitsisunik takunninnissamut piginnaanilik. Sapanngarissoq takugaangamiuk sapanngarissuiunersoq nalusanngilaa, pitsaavallaanngitsorlu ilaarsilluniluunniit sanaaq pututitaassutigisanngilaa.

5, 6. (a) Jiisusip assersuusiaani niuertumut tunngatillugu ingammik suna maluginiarnarpa? (b) Erlinnartuut toqqorneqarsimasoq pillugu assersuummi niuertoq pillugu suna paasisinnaavarput?

⁵ Niuertumi taassumani allamik aamma maluginiarnartoqarpoq. Niuertoq nalinginnaasoq sapanngarissoq tuninialeruniuk qanoq akilersissinnaassanerlugu naatsorsueqqaassagunarpoq, iluanaaruteqarluni qanoq akilerlugu pisiarissanerlugu aalajangersinnaaniassagamiuk. Aamma sapanngarissoq taamaattoq piumaneqarnersoq eqqarsaatigeqqaassagunarpaa, tuneqqipallassinnaaniassagamiuk. Allatut oqaatigalugu pigiinnarusunngilaa, iluanaarutigisinnaaniassagamiulli tuneqqipallakkusunnerussallugu. Jiisusilli assersuusiaani niuertoq taamaattuunngilaq. Sapanngarissumik soqutiginninnera aningaasanut tigussaasunulluunniit allanut tunngassuteqanngilaq. Ujakkanili piniarlugu „pigisani tamaasa“ pilliutigiumavai.

⁶ Jiisusip assersuusiaani angutip iliuusia niuertut amerlanersaasa sianiilliornertut isigisimagunarpaat. Niuertoq misilittagaqarluartoq taama nalorninartigisumik iliuuseqarnavianngilaq. Jiisusilli assersuusiaani niuertoq allamik pingaartitaqarpoq. Sapanngarissumik soqutiginninnera aningaasatigut iluanaaruteqarusunnermik aallaaveqanngilaq, nalitoorujussuarmilli pigisaqarnermik nuannaarutiginninnermik nalerisimaarutiginninnermillu aallaaveqarpoq. Tamanna Jiisusip assersuusiaani allami assingusumilu paasinarsivoq. Ima oqarpoq: „Qilaap Naalagaaffiata assigaa erlinnartuut narsaammi toqqorneqarsimasoq; taanna inuup nassaaraa toqqorsimaannarlugulu, nuannaangaaramilu pigisani tamaasa akigiartorpai narsaallu taanna pisiaralugu.“ (Matthæusi 13:44) Aap, angutip erlinnartuummik nassaaminik pigilikkaminillu nuannaarutiginninnini pissutigiinnarlugu pigisani tamaasa isumakkeersinnaanngorpai. Ullumikkut taamatut ittunik inoqarpa? Taamatut pilliuteqassutaasinnaasumik erlinnartuuteqarpa?

Guutip naalagaaffiata pingaaruteqarneranik paasinnittut

7. Guutip naalagaaffiata pingaaruteqarnera paasilluinnarlugu Jiisusip qanoq ersersippaa?

⁷ Jiisusip assersuusiamini ’Qilaap Naalagaaffia’ eqqartorpaa. Guutip naalagaaffiata pingaaruteqarnera paasilluinnarpaa. Iivangkiiliuni tamanna uppernarsaatissaqarluarpoq. Ukiumi 29-mi kuisinnermi kingorna „ima oqaluussisalerpoq: ’Allamik isumataaritsi, Qilaap Naalagaaffia qanillimmat.’“ Ukiut pingasut affarlu tusindilippassuit Guutip naalagaaffia pillugu ilinniartippai. Nuna tamaat angalaffigaa, „illoqarfiit illoqarfeeqqallu aqqusaartorlugit oqaluussisarluni Guutillu naalagaaffianik iivangkiiliu tusarliuttarlugu“. — Matthæusi 4:17; Lukasi 8:1.

8. Guutip naalagaaffia sunik naammassisaqarumaartoq takutinniarlugu Jiisusi qanoq iliorpa?

⁸ Nuna tamakkerlugu tupinnartuliarpassuaqarnermigut — napparsimasunik ajorunnaarsitsinermigut, perlilersunik nerisitsinermigut, pinngortitap nukiinut pissaaneqarnermigut, allaat toqusunik makititsinermigut — Jiisusip aamma takutippaa Guutip naalagaaffia sunik naammassisaqarumaartoq. (Matthæusi 14:14-21; Markusi 4:37-39; Lukasi 7:11-17) Naggataatigut inuunerminik pilliutiginninnermigut Guutimut taassumalu naalagaaffianut ilumoorfiginninnini uppernarsarpaa, nappakkami anniartitaaffimmi martyritut toqulluni. Soorlu niuertoq sapanngarissoq akisooq pigilerniarlugu nuannaarluni pigisaminik tamanik akiginnittoq, taamatorluinnaq Jiisusi Guutip naalagaaffia pillugu inuullunilu toquvoq. — Johannesi 18:37.

9. Jiisusip ajoqersugaasa siulliit suna ilisarnaatigaat?

⁹ Jiisusi inuunermini Guutip naalagaaffianik pingaarnerpaatitsivoq. Tamannali naammagiinnaarnagu aamma imminik malinnittunik ikittunnguanik katersuivoq. Taakkuttaaq Guutip naalagaaffianik taama pingaartitsitigipput. Taakkua ilagaat Andreasi, Johannesi Kuisisumut ajoqersugaasimasoq. Taassuma Johannesi Jiisusi ’Guutimut savaaraanerarlugu’ nalunaajaasoq tusaramiuk, taanna Johannesimullu ajoqersugaq alla — qularnanngitsumik  Zebedæusip ernerisa ilaat aamma Johannesimik atilik — ingerlaannaq Jiisusi kajungerfigilerlugulu upperfigilerpaat. Oqaluttuarli tamaannga naanngilaq. Andreasi ingerlaannaq qatanngumminut Siimuumukarpoq imalu oqarfigalugu: „Missiarsi naapipparput.“ Kingunitsianngua Siimuut (Kefasitut Petrusitulluunniit ilisimaneqartoq) aamma Filipi taassumalu ikinngutaa Nathanaeli ilanngupput Jiisusilu Missiarsitut akueralugu. Aap, Nathanaeli qulanngingaarami Jiisusi ima oqarfigaa: „Illit Guutip erneraatit, Israelikkut kunngigaatsit.“ — Johannesi 1:35-49.

Iliuuseqarnissamut kajumissaarneqartut

10. Kingusinnerusukkut Jiisusip naapeqqimmatik maleqqullunilu kajumissaarmatik ajoqersukkat qanoq pippat?

¹⁰ Andreasip, Petrusip, Johannesip ilaasalu Missiarsimik naapitsigamik nuannaangaarnerat angorniornerallu, niuertup sapanngarissoq akisooq nanigamiuk nuannaangaarneranut angorniorneranullu assersuunneqarsinnaavoq. Maanna qanoq iliussappat? Iivangkiiliuni oqaluttuarineqanngilaq Jiisusimik naapitseqqaarnermik kinguninngua qanoq iliornersut. Amerlanersaat ulluinnarni inuunerminnut utersimassagunarput. Ukiulli ataatsip affaataluunniit missaa qaangiuttoq Jiisusip Andreasi, Petrusi, Johannesi Johannesillu qatanngutaa Jaaku naapeqqippai, tamatumuuna Galilæap Tasersuata sinaani aalisarfigisartakkaminniittut. * Jiisusip takugamigit ima oqarfigai: „Qaallusi malissinga, taava inunnik aalisartunngortissavassi.“ Qanoq pippat? Matthæusip oqaluttuaani Petrusi Andreasilu pillugit ima allassimavoq: „Erniinnarlu qassutitik ilaginnaannarlugit malippaat.“ Jaaku Johannesilu pillugit ima atuarpugut: „Erniinnarlu umiatsiaq ataatartillu qimallugit malilerpaat.“ Lukasip oqaluttuaani aamma allassimavoq ’tamaasa qimallugit malikkaat’. — Matthæusi 4:18-22; Lukasi 5:1-11.

11. Jiisusi kajumissaarimmat ajoqersukkat ingerlaannaq iliuuseqarnerannut qularnanngitsumik suna pissutaava?

¹¹ Jiisusi kajumissaarimmat ajoqersukkat ingerlaannaq iliuuseqarnerat aalajangeriataarnerua? Taamaagunanngilaq! Jiisusimik naapitseqqaarnermik kingorna ilaquttaminnut uteraluarlutik aalisaqqileraluarlutillu, qularutissaanngilaq taamani  takusatik tusakkatillu uummatimikkut isummamikkullu killinneqaatigisimassagaat. Tamatumalu kingorna ukioq ataasingajak misigisamik eqqarsaatigilluarnissaannut periarfissaqarluarput. Maanna aalajangernissamut piffissanngorpoq. Niuertutut, sapanngarissoq nalissaqanngitsoq nanigamiuk angorniungaarami pisiariumallugu iliuuserisariaqakkaminik, Jiisusip oqarneratut, „ingerlaannaq“ iliuuseqartutut issappat? Aap. Takusatik tusakkatillu qamuuna killitsissutigaat. Paasivaat iliuuseqarnissamut piffissanngortoq. Taamaattumik suut tamaasa qimallugit Jiisusi malippaat.

12, 13. (a) Inuppassuit Jiisusi tusarnaareeramikku suppat? (b) Ajoqersukkani aalajaatsut pillugit Jiisusi qanoq oqarpa, taamatullu oqarnera qanoq isumaqarpa?

¹² Iliuuseqarneq tamanna iivangkiiliuni kingusinnerusukkut oqaluttuarineqartunit allanit allaanerulluinnarpoq. Inuppassuit Jiisusimit ajorunnaarsinneqarlutilluunniit nerisinneqartut ulluinnarni inuunerminnik ingerlatsiinnarput, soorlu susoqarsimanngitsoq. (Lukasi 17:17, 18; Johannesi 6:26) Allaat Jiisusip maleqqulluni kajumissaarmatik ilaat piumanngillat. (Lukasi 9:59-62) Tamatuma akerlianik Jiisusi kingusinnerusukkut ajoqersukkat aalajaatsut pillugit ima oqarpoq: „Johannesip kuisisup ullui aallarniutigalugit mannalu tikillugu qilammiup naalagaaffia anguniagaavoq inuit tamaviaarutigisaat, tamaviaartullu angusarpaat.“ — Matthæusi 11:12, NV.

¹³ Matthæusip iivangkiiliua pillugu oqaaseqaatimini versi taanna pillugu Heinrich Meyer ima allappoq: „Naalagaaffik Missiarsikkoortoq tikiuttussaq pillugu pilerineq akiugassaanngitsumillu kajungerneq noqqaanerlu taamatut assersuusiorluni allaaserineqarpoq . . . Taama pileritigaluni uummaaritsigalunilu (eqqissisimajunnaarluni utaqqiinnarunnaarlunilu) naalagaaffimmik soqutiginnittoqarpoq.“ Niuertoq assigalugu ajoqersukkat ikittut taakkua suna pingaaruteqavinnersoq erniinnaq paasivaat, kajumillutillu Guutip naalagaaffia pillugu pigisatik tamaasa isumakkeerlugit. — Matthæusi 19:27, 28; Filippimiut 3:8.

Allat ilanngupput

14. Jiisusip apustilit Guutip naalagaaffianik oqaluussissutiginninnissaannut qanoq piareersarpai, qanorlu kinguneqarpa?

¹⁴ Taamanimiilli Jiisusip kiffartornermini inuit allat Guutip naalagaaffianik noqqaassutiginninnissaannik ilinniartillugillu ikiorpai. Siullermik ajoqersukkami ilaat aqqaneq-marluk toqqarpai apustilinillu taallugit, taaguut isumaqartoq aallartitaq. Taakku qanoq kiffartussanersut ilitsersuuteqqissaarpai, aamma unamminiarnartunut ajornartorsiutinullu nalaakkumaagaannut mianersoqquai. (Matthæusi 10:1-42; Lukasi 6:12-16) Taamanimiilli ukiut marluk missaanni Jiisusi nuna tamakkerlugu angalaqatigaat taassumunngalu qanittumik attaveqarnertik iluaqutigalugu. Oqaluussigaangat tusarnaartarpaat, malunnangaartuliai takuaat maligassiuineralu qimerloorlugu. (Matthæusi 13:16, 17) Qularnanngitsumik tamakku tamaasa killinneqaatigingaaramikkik Guutip naalagaaffianik noqqaassutiginninnerminni, niuertup iliorneratut, ilungersorlutillu uummatimikkut iluunngarlutik tamaviaarput.

15. Ajoqersukkat nuannaarutigisinnaasaasa pingaarnersaat Jiisusip suunerarpaa?

¹⁵ Apustilit aqqaneq-marluk saniatigut Jiisusip „72-it [70-it, 1900/1961] allat qinerpai, siuartillugillu marlukkuutaarlugit illoqarfinnut inoqarfinnullu tamanut orninniakkaminut aallartippai.“ Aamma oqaluttuuppai misilinneqartarumaartut ajornartorsiortarumaartullu, imalu oqaqqullugit: „Guutip naalagaaffia qanillivoq.“ (Lukasi 10:1-12) 70-it taakku uteramik nuannaangaarput Jiisusimullu ima nalunaarlutik: „Naalagaq, anersaapiluit allaat naalattarpaatigut illit atit taagaangatsigu.“ Jiisusilli, immaqa taakkua tupaallaatigisaannik, qulaarpaa Guutip naalagaaffianik aallussilluartuunertik pissutigalugu nuannaarnermik suli annerusumik misigisaqarumaartut. Ima oqarfigai: „Nuannaarutigeqinasiuk anersaat naalammasi; nuannaarutigisiulli atisi qilanni allassimammata.“ — Lukasi 10:17, 20.

16, 17. (a) Jiisusip apustilini aalajaatsut naggataamik unnussioqatigigamigit qanoq oqarfigai? (b) Jiisusip neriorsueqqissaarutaanut tunngatillugu apustilit suna nuannaarutigaat?

¹⁶ Ukiumi 33-mi nisanip ulluisa 14-ianni Jiisusip apustilini naggataamik unnussioqatigigamigit unnukkorsiorneq kingusinnerukkut ’Naalakkap unnukkorsiortitsineranik’ taaneqartalersoq pilersippaa, peqqullugillu pisoq tamanna eqqaaniartassagaat. Unnuup ingerlanerani kinguleruttut aqqanillit Jiisusip ima oqarfigai: „Ilissi uannut najuuttuartuuvusi  misilinneqarfigisanni. Soorlu Ataatama naalagaaffik uannut pigitikkaa, taamatut uanga ilissinnut pigitippara uanga nerrivinni nerillusilu imersinnaaqqullusi naalagaaffinni issiavissaarsuarnilu issiaqqullusi Israelip naggueqatigiissortai aqqaneq-marluk eqqartuutissallugit.“ — Lukasi 22:19, 20, 28-30.

¹⁷ Oqaatsit taakku tusarlugit apustilit nuannaangaarlutillu nalerisimaarsimassaqaat! Inuup ataqqinaatiginerpaasinnaasaanik immikkullu pisinnaatitaaffigisinnaasaanik annerpaamik neqeroorfigineqarput. (Matthæusi 7:13, 14; 1 Petrusi 2:9) Guutip naalagaaffianik noqqaassutiginninnerminni Jiisusi malinniarlugu, niuertup iliorsimaneratut, isumakkiigarpassuaqarput. Maanna uppernarsaavigineqarput maannamut pilliutigisimasatik asuliinnaanngitsut.

18. Apustilit aqqanillit saniatigut kikkut aamma Guutip naalagaaffia iluaqutigissavaat?

¹⁸ Apustilit unnuk taanna najuuttut kisimik Guutip naalagaaffianik iluaqutiginnissanngillat. Jehovap piumasaraa katillugit 144.000-it Naalagaaffik pillugu angerutsimut, naalagaaffimmi qilammiittumi Jiisusi Kristusip naalakkersueqatissaasut, ilaatinneqassasut. Tamatuma saniatigut Guutip naalagaaffia amerlangaartunut iluaqutaassaaq, taakkulu apustili Johannesip takorruukkamini takuai imalu allaaseralugit: „Inuppassuit amerlangaaramik kisinneqarsinnaanngitsut . . . issiavissaarsuup sioraani Savaaqqallu saavani qeqarput,“ imalu torlulapput: „Annassut Guutitsinnit issiavissaarsuarmi issiasumit Savaaqqamillu pivoq.“ Taakku tassaapput Guutip naalagaaffiata nunami innuttai. * — Saqqummersitat 7:9, 10; 14:1, 4.

19, 20. (a) Inunnut inuiannit tamaneersunut periarfissaq suna ammava? (b) Allaaserisami tulliuttumi apeqqut suna sammineqassava?

¹⁹ Jiisusip qilalianngitsiarluni ajoqersukkani aalajaatsut ima oqarfigai: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit, ajoqersorsigillu ilissinnut peqqussutikka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ (Matthæusi 28:19, 20, NV) Tassa inuit inuiannit tamaneersut Jiisusimut ajoqersuganngorumaarput. Taakkuattaaq — qilammi nunamiluunniit akissarsiassatut — Guutip naalagaaffia ujassavaat, soorlu niuertoq kusanartunik sapanngarissorsiortoq.

²⁰ Jiisusip oqaasiisa ersersippaat ajoqersuganngortitsiortorneq ’pissutsit aaqqissuussaanerata naggatissaa’ tikivillugu ingerlanneqassasoq. Taamaattumik ima aperisoqarsinnaavoq: Ullumikkut Guutip naalagaaffia pigilerniarlugu niuertutut pigisaminnik tamanik akiginnikkumasunik suli inoqarpa? Allaaserisami tulliuttumi apeqqut tamanna sammineqassaaq.

[Quppernerup ataani ilanngussat]

Uku nassuiarsinnaavigit?

• Niuertumik assersuusiami ilinniutissaq pingaarneq suua?

• Guutip naalagaaffiata pingaaruteqarnera paasillugu Jiisusip qanoq ersersippaa?

• Andreasi, Petrusi, Johannesi allallu Jiisusi kajumissaarimmat ingerlaannaq iliuuseqarnerannut suna pissutaava?

• Inunnut inuiannit tamaneersunut periarfissaq nuanningaartoq suna ammava?

[Atuaqqissaarnermi apeqqutit]

[Qupp. 5-mi assiliartaq]

’Tamaasa qimallugit Jiisusi malippaat’

[Qupp. 7-mi assiliartaq]

Jiisusip qilaliannginnermini malitsini ajoqersuganngortitseqquai