Ullumikkut qanoq ’akisuumik sapanngarissorsiortoqartartoq’
Ullumikkut qanoq ’akisuumik sapanngarissorsiortoqartartoq’
„Naalagaaffimmik iivangkiiliu taanna silarsuarmi tamarmi oqaluussissutigineqassaaq.“ — MATTHÆUSI 24:14.
1, 2. (a) Jiisusip nunamiinnerani juutit Guutip naalagaaffia pillugu qanoq eqqarsartarpat? (b) Ajoqersukkat Guutip naalagaaffia suunersoq paasilluarniassammassuk Jiisusi sua, qanorlu kinguneqarpa?
JIISUSIP NUNAMIINNERANI juutit Guutip naalagaaffia soqutigisorujussuuaat. (Matthæusi 3:1, 2; 4:23-25; Johannesi 1:49) Aallaqqaammut amerlanersaasa paasinngilaat naalagaaffik taanna qanoq pissaaneqartigissanersoq taassumalu oqartussaaffia qanoq isorartutigissanersoq, aamma paasinngilaat naalakkersuisui qilammiittussaasut. (Johannesi 3:1-5) Allaat Jiisusimut ajoqersuganngortut ilaasa Guutip naalagaaffia suunersoq Kristusilu naalakkersueqatigissagunikku qanoq iliortariaqarnerlutik paasilluanngilaat. — Matthæusi 20:20-22; Lukasi 19:11; Apustilit Suliaat 1:6.
2 Piffissap ingerlanerani Jiisusip ajoqersukkani naammagittarluni amerlasuunik ilinniartippai. Ilaatigut sapanngarissumik akisuumik assersuusiaq allaaserisap matuma siuliani sammisarput taakkununnga oqaluttuaraa, assersuusiamilu tassani qilammi naalagaaffik ujaraanni tamaviaangaarnissap pingaaruteqarnera erseqqissarpaa. (Matthæusi 6:33; 13:45, 46; Lukasi 13:23, 24) Tamanna killinneqaatigisimassavaat, sivitsunngitsormi Guutip naalagaaffia pillugu nutaarsiassamik nuannersumik oqaluussissutiginnittunngorput qasusuitsut sapiitsullu — aap, allaat ungasissumut oqaluussiartortalerput, soorlu Apustilit Suliaat-ni taama allassimasoq. — Apustilit Suliaat 1:8; Kolossemiut 1:23.
3. Nalerput eqqarsaatigalugu Jiisusi Guutip naalagaaffia pillugu qanoq oqarpa?
3 Ullumikkummi? Guutip naalagaaffiata ataani nunami paratiisi pillugu tusarliussaq maanna millionilinnut oqaluussissutigineqarpoq. ’Pissutsit aaqqissuussaanerata naggatissaa’ (NV) pillugu siulittuutimini pingaaruteqangaartumi Jiisusi ima oqarpoq: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:3, 14; Markusi 13:10) Aamma nassuiaavoq ajornartorsiuteqaraluartoq unamminiarnartoqaraluartorlu, allaallu malersuisoqaraluartoq, suliassarujussuaq tamanna suliarineqarumaartoq. Ajoqersukkanilu ima neriorsoqqissaarpai: „Naggatissamut nikallujuitsuusoq annaanneqassaaq.“ (Matthæusi 24:9-13) Taamaattumik imminut pilliutigeriaannaanissaq anguniakkamillu aalajangiusimanninnissaq pisariaqarpoq, soorlu Jiisusip assersuusiaani niuertoq taamaattariaqartoq. Ullumikkut Guutip naalagaaffianik ujaasinerminni taama uppertigisunik taamalu aallussilluartigisunik inoqarpa?
Sallusuissummik nanisinermik nuannaarutiginninneq
4. Ullumikkut Guutip naalagaaffianik tusarliussaq inunnut qanoq sunniuteqartarpa?
4 Jiisusip assersuusiaani niuertup sapanngarissoq nalissaqanngitsoq nanisimallugu paasigamiuk asseqanngitsumik nuannaarpoq. Nuannaangaarami sapanngarissoq taanna pissarsiariniarlugu iliuuserisinnaasani tamaasa iliuuserai. (Hebræerit 12:1) Ullumikkut Guuti taassumalu naalagaaffia pillugu tusarliussaq aamma taamatut sunniuteqartarpoq. Kajungernarpoq iliuuseqarusulernarlunilu. Guutimik taassumalu inunnut siunertaanik ujaasinini pillugu qatanngut A.H. Macmillan atuakkiamini Troen på march-imi ima allappoq: „Nanisara inuit tusindillit ukiut tamaasa nanisarpaat. Inuit uattut ilittullu ittut inuiannit naggueqatigiinnillu tamaneersut, assigiinngitsunik inuutissarsiuteqarlutillu utoqqaassusillit. Sallusuissut kinaassusersiortuunngilaq. Inuit tamalaat taanna kajungeraat.“
5. Nalunaarusiaq naapertorlugu ukioq kiffartorfiusoq 2004 qanoq angusaqarfiulluarpa?
5 Tamatuma ilumoornera takuneqarsinnaavoq ukiut tamaasa inuit eqqortuliorusuttut hundredetusindillit Jehovap piumasaanik iliorniarlutik taassumunnga tunniulluinnarnissaminnut Guutip naalagaaffia pillugu nutaarsiassaq nuannersoq kajumississutigisarmassuk. Ukioq kiffartorfiusoq 2004, septembari 2003-miit aggusti 2004 ilanngullugu, aamma taamaappoq. Qaammatini aqqaneq-marlunni taakkunani 262.416-it Jehovamut tunniulluinnarnertik kuisinermikkut tamanut ersersippaat. Kuisittut taakku nunani 235-ni kuisipput. Nunani taakkunani Jehovap Nalunaajaasui sapaatip akunneranut 6.085.387-inik angerlarsimaffimmi Biibilimik atuaqqissaaqateqartarput inuit inuiaqatigiinni qanorluunniit inissisimaffillit inuiaqatigiippassuarnillu naggueqatigiippassuarnillu inuiappassuarnillu immikkullu oqaasilippassuarnit pisut sallusuissummik inuunartumik Guutip oqaasianeersumik paasinninnissaannik ikiorniarlugit. — Saqqummersitat 7:9.
6. Ukiut ingerlaneranni amerliartortuarneq sumik pissuteqarpa?
6 Qanoruna ilillutik tamakku tamarmik pisinnaanngortut? Qularutissaanngilaq eqqortuliorusuttut taakku Jehovap imminut kajungilersissimagai. (Johannesi 6:65; Apustilit Suliaat 13:48) Namminissarsiunnginnerli qasusuinnerlu, Guutip naalagaaffia pillugu suliaqarnermi ilungersuussisut ilisarnaatigisaat, maluginianngitsuugassaanngillat. Qatanngut Macmillan 79-inik ukioqarluni ima allappoq: „Inuiannut napparsimasunut toqujartortunullu neriorsuutit tusaqqaarneranniilli, neriuutiga Biibilimeersoq neriuutigiuarpara. Ingerlaannaq aalajangerpunga Biibilimi ajoqersuutigineqartut ilinniarneruniarlugit, allat uattut Jehova ajugaqanngitsoq pillugu taassumalu inunnut siunertai ajunngitsut pillugit paasisaqarnerorusuttut ikiorsinnaaniassagakkit.“
7. Pisimasoq suna sallusuissummik Biibilimeersumik nanisisut nuannaartarnerannut piumassuseqartarnerannullu takussutissaava?
7 Taamatut piumassuseqarneq aallussilluarnerlu ullumikkut Jehovap Nalunaajaasuini aamma takuneqarsinnaavoq. Assersuutigineqarsinnaavoq Daniela Østrigimiu Wienimeersoq. Taanna ima oqarpoq: „Meeraallungali Guuti ikinngutinnaaraara. Atiata paasinissaa kissaatigiuaannarnikuuara, uannummi ’Guuti’-mik oqaannarluni kinaassuseqanngippaluppallaarmat. 17-inilli ukioqalernissama tungaanut utaqqisariaqarpunga, taava Jehovap Nalunaajaasui kasuttorput. Taakkua Guuti pillugu paaserusutannik tamanik nassuiaappaannga. Kiisami sallusuissut nanivara, tamannalu nuannerluinnarpoq! Nuannaangaarama ingerlaannaq kikkunnut tamanut oqaluussisalerpunga.“ Oqaluusserusungaarmat atuaqataasa illaruaatigisalerpaat. Daniela ima nangippoq: „Taamaaliorneralli uannut Biibilimi siulittuutit eqquunneriinnarpaat, ilinniartinneqarpungami Jiisusi oqarsimasoq atini pillugu ajoqersukkani uumissorneqarlutillu malersorneqarumaartut. Nuannaarlungalu tupaallappunga.“ Sivitsunngitsoq Daniela Jehovamut tunniulluinnarpoq kuisillunilu, ajoqersuiartortitanngornissanilu anguniagarilerlugu. Katereernermi kingorna uini, Helmut, ilagalugu Wienimi Afrikamiut, Kinamiut, filippinerit Indiamiullu oqaluussiffigisalerpai. Maanna Daniela Helmutilu Afrikap kujataata kitaani ajoqersuiartortitaapput.
Uniinnanngillat
8. Inuppassuit pilluaqquneqangaassutigisaminnik Guutimut asanninnertik taassumalu naalagaaffianut ilumoorfiginninnertik qanoq takutittarpaat?
8 Ullumikkut Jehovap kiffaasa ilaatigut ajoqersuiartortitatut kiffartornermikkut Guutimut asanninnertik taassumalu naalagaaffianut ilumoorfiginninnertik takutittarpaat. Soorlu Jiisusip assersuusiaani niuertoq kusanartunik sapanngarissorsiorluni ungasissumut angalanissaminut piumassuseqartoq, taamatuttaaq ajoqersuiartortitanngortut Guutip naalagaaffia pillugu ungasissumut nuunnissaminnut piumassuseqarput. Ajoqersuiartortitalli Guutip naalagaaffia pillugu nutaarsiassaq ujarniarlugu aallarneq ajorput. Nutaarsiassaq inunnut ungasissumiittunut tusarliunniarlugu inuillu Jiisusi Kristusimut ajoqersuganngornissaannik ilinniartinniarlugillu ikiorniarlugit aallartarput. (Matthæusi 28:19, 20) Nunarpassuarni misilinneqangaartarput, pinertusaarnertilli pillugu pilluaqquneqangaartarput.
9, 10. Nunani ungasissuni, soorlu Afrikami Qiterlermi Kunngiitsuuffimmi, ajoqersuiartortitat nuannersunik sunik misigisaqartarsimappat?
9 Assersuutigalugu Afrikami Qiterlermi Kunngiitsuuffimmi oqaluussineq eqqaaneqarsinnaavoq. Tassani eqqaaniaanermi najuuttut 16.184-iupput, nunami tamatumani oqaluussisartut amerlassusiisa arfineq-marloriaataat. Nunap immikkoortortarpassuini kallerup inneqanngimmat inuit ullormut suliassatik illup silataani orpiup alannguani suliarisarpaat. Taamaattumik ajoqersuiartortitat aamma taamatut suliassartik suliarisarpaat: Silami orpiup alannguani Biibilimik atuaqqissaaqateqartarput! Tassaniinneq qaamallunilu nillataaginnarnani, aamma allamik iluaquteqarpoq. Inuit Biibili pingaartingaarpaat, upperisarsiornermullu tunngasut oqaluuserineqartarnerat kulturini allani timersornerup silallu oqaluuserineqartarnerattulli nalinginnaatigaaq. Sanioqquttut susoqarnersoq paasigaangamikku orniguttarnerat atuaqqissaaqataalertarnerallu qaqutigoortuunngilaq.
10 Ajoqersuiartortitaq silami atuaqqissaaqateqaleruttortoq angut inuusuttoq akiatungaani najugalik orniguppoq, oqarlunilu suli pulaarneqannginnami ajoqersuiartortitamit pulaarneqarusullunilu atuaqqissaaqatigineqarusulluni. Soorunalimi ajoqersuiartortitaq piumavoq, angullu inuusuttoq taanna maanna siumukarluarpoq. Qaqutigoortuunngilaq politiit ilaasa Jehovap Nalunaajaasuinik aqqusinermi unitsitsisarnerat, nalunaarsorniarnagit akiligassinniarnagilluunniit, Napasuliaq Alapernaarsuiffik-milli Iteritsi!-millu nutaanik piumallutik imaluunniit allaaserisaq nuannarilluinnagartik pillugu qutsaviginiarlugit.
11. Ukiorpassuit ajoqersuiartortitaasut ajornartorsiuteqartaraluarlutik kiffartornertik pillugu qanoq oqarpat?
11 Ukiut 40-t 50-illuunniit matuma siorna ajoqersuiartortitanngortut ilarpassui suli nunani allani aalajaallutik kiffartorput. Uppernerat pinertusaarnerallu tamatsinnut maligassaalluarpoq. Ajoqersuiartortitat aappariit ukiuni 42-ni kingullerni nunani assigiinngitsuni pingasuni kiffartorsimapput. Uiusoq ima oqarpoq: „Ajornartornarsiuteqartarpugut. Assersuutigalugu ukiuni 35-ni malaria naalliuutigisarparput. Ajoqersuiartortitanngornerpulli peqqissimissutiginngisaannarparput.“ Nulia ima oqarpoq: „Qujamasuutissarpassuaqartuarpoq. Oqaluussineq nuannaarutaavoq, Biibilimillu atuaqqissaaqatitaarnissaq ajornanngitsuaraalluni. Soqutiginnittut ataatsimiigiartalersut allanillu ilisarisimasaqalersut isigalugit, tamatigut soorlu tassa ilaqutariissuit ataatsimoortut.“
’Tamakku tamaasa ajunaarutaatippaat’
12. Guutip naalagaaffiata qanoq pingaaruteqartigineranik paasinnivinneq qanoq ersersinneqartarpa?
12 Niuertup sapanngarissoq akisooq nanigamiuk „pigisani tamaasa [ingerlaannaq, NV] akigiartorpai taannalu pisiaralugu“. (Matthæusi 13:46) Naleqangaartutut isigineqaraluartunik isumakkeerinnikkumaneq tamanna Guutip naalagaaffiata qanoq pingaaruteqartigineranik paasinnivissimasunut ilisarnaataavoq. Qilammi naalannassuseqarluni Kristusimik naalakkersueqateqartussatut apustili Paulusi ima oqarpoq: „Ilumummi suli tamakku tamaasa ajunaarutaatippakka pissutigalugu Kristusi-Jiisusimik Naalakkannik ilisimanninneq annerungaartoq. Taanna pillugu tamakku tamaasa annaasimavakka, tamaasalu perlukutut igitassaannaatippakka Kristusi pigilerumallugu.“ — Filippimiut 3:8.
13. Tjekkiamiup Guutip naalagaaffianik nuannarinningaarnini qanoq uppernarsarpaa?
13 Taamatuttaaq ullumikkut inuppassuit Guutip naalagaaffiata pilluaqqussutissartai iluaqutigiumallugit inuunerminni allannguerujussuarnissaminnut piumassuseqarput. 2003-mi oktobarimi Tjekkiami atuarfimmi pisortap 60-inik ukiullip atuagaq Biibilimik atuaqqissaarnermi atorneqartartoq Ilisarsineq inuunermut naassaanngitsumut sammisoq nalaatsornikkut pigilerpaa. Atuagaq taanna atuareeramiuk ingerlaannaq najukkamini Jehovap Nalunaajaasui attaveqarfigai Biibilimillu atuaqqissaaqatigineqarumalluni. Siumukarluarpoq sivitsunngitsorlu ataatsimiinnernut tamanut aggertalerluni. Borgmesterimut kingusinnerusukkullu inatsisartunut qinigassanngortinniarluni pilersaarutai qanoq pippat? Allamik anguniagaqarniarluni aalajangerpoq — tassa Guutip naalagaaffianik oqaluussissutiginnittunngorniarluni. Taanna ima oqaluttuarpoq: „Atuartuutikka atuagassianik Biibilersaaruterpassuarnik pilersorsinnaavakka.“ 2004-mi juulimi ataatsimeersuarnermi kuisinnermigut Jehovamut tunniulluinnarnini ersersippaa.
14. (a) Guutip naalagaaffia pillugu nutaarsiassaq nuannersoq pissutigalugu inuit millionillit qanoq iliorpat? (b) Imminut misissorluta qanoq imminut aperisinnaavugut?
14 Inuit millionillit allat silarsuarmit tamarmit pisut Guutip naalagaaffia pillugu nutaarsiassaq nuannersoq aamma taamatut ilassivaat. Silarsuarmut ajortumut ilaajunnaarput, pissusitoqqartik pissuseriunnaarpaat, ilagisartagarinikuusatik ilagisarunnaarpaat silarsuarmilu anguniagaqarunnaarlutik. (Johannesi 15:19; Efesosimiut 4:22-24; Jaaku 4:4; 1 Johannesi 2:15-17) Sooq tamakku tamaasa iliuuseraat? Pissutsit aaqqissuussaaneranni maanna atuuttumi neqeroorutigineqarsinnaasunit tamanit Guutip naalagaaffiata pilluaqqussutissartai pingaarnerutikkamikkik. Aamma illit taamatut Guutip naalagaaffia pingaartippiuk? Inooriaatsit, pingaartitatit inuuninnilu anguniakkatit Jehovap piumasaqaataanut naapertuuttunngortinniarlugit pisariaqartunik allannguerusussuseqarpit? Allannguiguit maanna siunissamilu pilluaqquneqangaassaatit.
Katersuineq naammassineqangajalerpoq
15. Siulittuut naapertorlugu ulluni kingullerni Guutip innuttai qanoq iliussappat?
15 Tussiaasiortoq ima allappoq: „Ullormi sakkutuussannik sorsuttussarsiffigisanni innuttatit kajumillutik sassarumaarput.“ Sassartut ilaat tassaapput Jehovap ’innuttai inuusuttut kanernertut ittut’ amerlangaartut ’arnallu amerlaqisut tipaatsunnartumik nalunaariartortut’. (Tussiaat 68:12; 110:3, NV) Jehovap innuttaasa — angutit arnallu, inuusuttut utoqqaallu — ulluni kingullerni makkunani eqiasuinnerat imminullu pilliutigeriaannaanerat qanoq kinguneqarpa?
16. Guutip naalagaaffia pillugu tusarliussaq allanut ilinniartitsissutigisinnaajumallugu ilaasa qanoq iliorsimanerannik assersuuteqarit.
16 Indiami qatanngutip arnap pioneriusup nunami tassani tusilartut 2 millioninit amerlanerusut qanoq ililluni Guutip naalagaaffia pillugu paasitinneqarsinnaanersut eqqarsaatigaa. (Esaja 35:5) Aalajangerpoq Bangaloremi ussersorluni oqaatsinik kursuserniarluni. Kursuserfimmini Guutip naalagaaffia pillugu tusilartorpassuarnut oqaluussinissaminut periarfissaqalerpoq, aamma arlalinnik Biibilimik atuaqqissaaqatigeeqalerpoq. Sapaatit-akunnialuisa ingerlaneranni qulit sinnerlugit naalagaaffilersaarfimmut ataatsimiigiartalerput. Kingusinnerusukkut angut inuusuttoq tusilartoq Calcuttameersoq katittorsiortuni naapippaa. Angut taanna apeqqutissarpassuaqarpoq Jehovalu pillugu ilisimasaqarnerulerusulluni. Akornutissaqarporli. Angut inuusuttoq taanna Calcuttamut 1600 kilometerit missiliorlugit ungasitsigisumiittumut utertussaavoq. Tassani ilinniarnini ingerlateqqittussaavaa, ussersorlunili oqalussinnaasumik oqaluussisartoqanngilaq. Bangaloremili ilinniarnermi nanginnissaanut ataataminik akuersisitsiniarnini iluatsippaa taamaalillunilu Biibilimik atuaqqissaartarnini ingerlatiinnarsinnaanngorlugu. Siumukarluarpoq ukiullu ataatsip missaa qaangiuttoq Jehovamut tunniulluinnarluni. Tusilartunik arlalinnik nammineq Biibilimik atuaqqissaaqateqartarpoq, taakkualu ilagaat meeraanerminiilli ikinngutaa. Indiami immikkoortortaqarfimmit pionerit amerlanerusut ussersorluni oqaatsinik ilinniarnissaat maannakkut isumagineqarpoq taakkua oqaluussiffigisartagaq nutaaq taanna oqaluussiffiginiassammassuk.
17. Ukiumi kiffartorfiusumi 2004-mi oqaluussinermik nalunaarusiami immikkut qiimmaallaatigisannik eqqaasaqarit.
17 Vagttårnet 1. februarimoortumi qupp. 19-22-mi Jehovap Nalunaajaasuisa ukiumi kiffartorfiusumi 2004-mi silarsuaq tamakkerlugu oqaluussinerannik nalunaarusiaqarpoq. Periarfissaqaruit misissuataalaaruk, taava paasissavat nunarsuaq tamakkerlugu Jehovap kiffai ullumikkut ’sapanngarissumik akisuumik’ ujaasinerminni aallussilluartuusut.
’Naalagaaffik ujaqqaarsiuk’
18. Niuertumik assersuusiami Jiisusip suna eqqaanngilaa, aamma sooq?
18 Jiisusip niuertumik assersuusiaa uterfigeqqikkutsigu maluginiarparput Jiisusi niuertup pigisani tamaasa tunereeramigit sumik inuussuteqarneranik eqqaasaqanngitsoq. Taamaattumik ilaat immaqa ima aperiumassapput: ’Niuertoq inuussutissaqannginnami maanna qanoq ililluni nerisassarsillunilu atisassarsillunilu illusimmavissarsissava? Sapanngarissoq akisooq qanoq iluaqutigissagamiuk?’ Taamatut aperineq silamiut isiginnittaasiannit isigalugu silatusaarnerussaaq. Jiisusilli ajoqersukkani ima oqarfiginnginnerpai: „Taamaattumik naalagaaffik naapertuilluassuserlu taassuma pia ujaqqaartuarsigik, taava tamakku tamaasa ilanngullugit ilissinnut tunniunneqarumaarput“? (Matthæusi 6:31-33, NV) Assersuusiami pingaarnerpaatinneqartoq unaavoq: Uummatikkut iluunngarluni Guutimut tunniusimasariaqarneq Guutillu naalagaaffianik aallussilluartariaqarneq. Tamanna uagut arlaannik ilinniarfigisinnaavarput?
19. Jiisusip sapanngarissumik akisuumik assersuusiaani ilinniarfigisinnaasarput pingaarnerpaaq suua?
19 Nutaarsiassaq nuannersoq aatsaat ilinnialeraluarutsigu ukiorpassuarniluunniit Guutip naalagaaffia ujaraluarutsigu pilluaqqussutissartaalu allanut oqaluttuaralugit, Guutip naalagaaffia samminerpaasariaqarlugulu soqutiginerpaasariaqarparput. Ulluni ajornartorsiorfiusuni inuuvugut, ujakkattali — sapanngarissutut niuertup nanisaatut — piviusuunera immikkullu illuinnartuunera upperissallugu tunngavissaqarluarpugut. Silarsuarmi pisut siulittuutillu eqquutereersut ’pissutsit aaqqissuussaanerata naggatissaata’ nalaani inuunitsinnut takussutissaalluarput. (Matthæusi 24:3, NV) Taamaattumik, niuertoq kusanartunik sapanngarissorsiortoq assigalugu, uummatikkut iluunngarluta Guutip naalagaaffianik aallussilluarta nutaarsiassamillu nuannersumik oqaluussissutiginnissinnaanerput immikkut pisinnaatitaaffiusoq nuannaarutigalugu. — Tussiaat 9:2, 3. (wE 2/1 05)
Eqqaamavigit?
• Ukiut ingerlaneranni pallorfiginnittut ilumoortut amerliartornerannut suut pissutaaqataappat?
• Ajoqersuiartortitatut kiffartortut isiginnittaaseq suna ilisarnaatigaat?
• Nutaarsiassaq nuannersoq pillugu inuit ilaat qanoq allannguisimappat?
• Jiisusip sapanngarissumik akisuumik assersuusiaani ilinniarfigisinnaasarput pingaarutilik suua?
[Atuaqqissaarnermi apeqqutit]
[Qupp. 9-mi assiliartaq]
„Sallusuissut . . . inuit tamalaat kajungeraat.“ — A.H. Macmillan
[Qupp. 10-mi assiliartat]
Ullumikkut ajoqersuiartortitat niuertutut pilluaqquneqangaarput
[Qupp. 12-mi assiliartaq]
’Innuttatit kajumillutik sassarput’